၁
ၵႃႈမီးတင်းသဵင်ႈတင်းလူင်ဢႃႉၼတ်ႉတႃႉလွၼ်ႉလွၼ်ႉ
၁ ၵႂၢမ်းသြႃႇထမ်ႇမႃႉတေႇသၼႃႇဢၼ်ပဵၼ်ၶုၼ်လူင်ၵႃႈၼႂ်းဝဵင်းယေႇရုသလႅမ်ႇလႄႈပဵၼ်လုၵ်ႈၸၢႆးတႃႇဝိတ်ႉၼၼ်ႉၸမ်း၊-
၂ သြႃႇထမ်ႇမႃႉတေႇသၼႃႇဝႃႈ၊-ဢႃႉၼတ်ႉတႃႉလွၼ်ႉလွၼ်ႉ။ဢႃႉၼတ်ႉတႃႉလွၼ်ႉလွၼ်ႉ။လွင်ႈတၢင်းၵူႈၸိူဝ်ႉၵူႈပိူင်ပဵၼ်ဢႃႉၼတ်ႉတႃႉလွၼ်ႉလွၼ်ႉဢေႃႈ။
၃ ၵႃႈတီႈတၢင်းႁဵတ်းတၢင်းသၢင်ႈၵႃႈဢၼ်ၵူၼ်းၶတ်းၸႂ်ဢဝ်ႁႅင်းဢွၵ်ႇႁဵတ်းသၢင်ႈၵႃႈတႂ်ႈၵၢင်ဝၼ်းၸိူဝ်းၼၼ်ႉမီးဢၵျူဝ်းၵႃႈသင်။ၵူၼ်းသိုပ်ႇၼိုင်ႈပူၼ်ႉၵႂႃႇဢေႃႈ။
၄ သိုပ်ႇၼိုင်ႈပေႃႇပဵၼ်မႃးဢေႃႈ။လိၼ်မိူင်းၸမ်းတႄႇယူႇတႃႇသေႇဢေႃႈ။
၅ ၵၢင်ဝၼ်ၵေႃႈဢွၵ်ႇယူႇတူၵ်းယူႇသမ်ႉၶိုၼ်းၶုၼ်ႇလႅၼ်ႈၸူးၵႃႈတီႈဢၼ်မၼ်းယၢမ်ႈဢွၵ်ႇယူႇၼၼ်ႉဢေႃႈ။
၆ လူမ်းၵေႃႈၸၢင်ႊၸွမ်းသဵၼ်ႈတၢင်းၸၢၼ်းၵႂႃႇလႄႈသမ်ႉလႄႇလဵပ်ႈၵႂႃႇၵႃႈတီႈသဵၼ်ႈတၢင်းႁွင်ႇဢေႃႈ။လႄႇလဵပ်ႈသေလႄႈသမ်ႉၶိုၼ်းလႄႇၶိုၼ်းလႄႈလဵပ်ႈထႅင်ႈဢေႃႈ။
၇ ၼမ်ႉႁွင်ႈၼမ်ႉၵေးတင်းသဵင်ႈတင်းလူင်ဢွၼ်ၵၼ်လူင်းႁွတ်ႈထိုင်ၵႃႈၼႂ်းပၢင်ႇလၢႆႇဢေႃႈ။ၵူၺ်းၵႃႈပၢင်ႇလၢႆႇဢမ်ႇၸၢင်ႊတဵမ်။ၼမ်ႉႁွင်ႈၼမ်ႉၵေးၸိူဝ်းၼၼ်ႉဢွၼ်ၵၼ်လူင်းႁွတ်ႈလူင်းထိုင်ၵႃႈတီႈဢၼ်ၶဝ်လူင်းႁွတ်ႈလူင်းထိုင်ၼၼ်ႉတဵတ်ႇတဵတ်ႇဢေႃႈ။
၈ လွင်ႈတၢင်းၵႃႈမီးၼၼ်ႉသဵၼ်ၽႃႇႁွမ်းလူၺ်ႈၵၼ်တင်းတၢင်းဢၼ်ယၢပ်ႇၸႂ်ၶၢၼ်ၸႂ်ထၢၼ်ႈပေႃးၵူၼ်းဢမ်ႇလၢတ်ႈလႆႈဢေႃႈ။မၢၵ်ႇတႃႁၼ်လႄႈဢမ်ႇၸၢင်ႊဢိမ်ႇၸၢင်ႊတိူၵ်ႈ။ႁူၵေႃႈငိၼ်းလႄႈဢမ်ႇၸၢင်ႊတဵမ်။လွင်ႈတၢင်းဢၼ်ယၢမ်ႈပဵၼ်ၵႂႃႇယဝ်ႉၼၼ်ႉမိူၼ်ၵၼ်တင်းလွင်ႈတၢင်းဢၼ်တၵ်းပဵၼ်မႃးၼၼ်ႉဢေႃႈ။
၉ လွင်ႈတၢင်းဢၼ်ယၢမ်းႁဵတ်းယဝ်ႉၼၼ်ႉမိူၼ်ၵၼ်တင်းလွင်ႈတၢင်းဢၼ်တၵ်းႁဵတ်းၼၼ်ႉဢေႃႈ။ဢမ်ႇမီးလွင်ႈတၢင်းဢၼ်မႂ်ႇၵႃႈတီႈတႂ်ႈၵၢင်ဝၼ်းလႃးလႃး။
၁၀ လွင်ႈတၢင်းဢၼ်သေၵေႃႉသေၵူၼ်းလႆႈလၢတ်ႈလႄႈဝႃႈ၊-တူၺ်းသေၵမ်း၊ပဵၼ်ဢၼ်မႂ်ႇဢေႃႈ၊ဝႃႈၼင်ႇၼႆၼၼ်ႉမီးသေၸိူဝ်ႉသေပိူင်ႁိုဝ်။လွင်ႈတၢင်းၼၼ်ႉယၢမ်ႈပဵၼ်ၵႂႃႇမိူဝ်ႈဢွၼ်တၢင်းႁဝ်းမိူဝ်ႈၵွၼ်ႇဢွၼ်ၼႆႉၼၼ်ႉယဝ်ႉ။
၁၁ ဢမ်ႇမီးတၢင်းဢၼ်ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းဢၼ်ပဵၼ်ၵႂႃႇယဝ်ႉမိူဝ်ႈၵွၼ်ႇဢွၼ်ၼႆႉၼၼ်ႉလႃးလႃး။လွင်ႈတၢင်းဢၼ်ပဵၼ်မႃးၵမ်းလိုၼ်းၸိူဝ်းၼၼ်ႉၵေႃႈၶဝ်ၸိူဝ်းဢၼ်ပဵၼ်မႃးလိုၼ်းလွင်ႈတၢင်းၸိူဝ်းၼၼ်ႉၼၼ်ႉတၵ်းဢမ်ႇမီးတၢင်းဢၼ်ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းလႃးလႃး။
ၺၢၼ်ႇဢမ်ႇပွင်ႇလွင်ႈၵႃႈသင်
၁၂ ၼႂ်းမိူဝ်ႈဢၼ်ၵဝ်သြႃႇထမ်ႇမႃႉတေႇသၼႃႇၼႆႉယင်းတိုၵ်ႉပဵၼ်ၶုၼ်ႁေႃၶမ်းဢိသရေႇလယူႇၵႃႈၼႂ်းဝဵင်းယေႇရုသလႅမ်ႇၼၼ်ႉၸိုင်ၵဝ်ဝႆႉၸႂ်ၵဝ်ႁႂ်ႈလႆႈဢဝ်တင်းၺၢၼ်ႇပိင်ႇၺႃႇၸႅတ်ႈထၢမ်ႁႃဢဝ်ၵႃႈဢၼ်ၵဝ်ႁဵတ်းၵႃႈတီႈတႂ်ႈၾႃႉၵၢင်ႁၢဝ်ၼၼ်ႉဢေႃႈ။
၁၃ ပဵၼ်လွင်ႈတၢင်းဢၼ်ယၢပ်ႇၸႂ်ၽိုတ်ႇၸႂ်ဢၼ်ၽြႃးပဵၼ်ၸဝ်ႈပၼ်ပုၼ်ႈဢၼ်လုၵ်ႈၵူၼ်းတင်းလၢႆတၵ်းလႆႈၶတ်းၸႂ်ႁဵတ်းၼၼ်ႉဢေႃႈ။ၵဝ်ႁၼ်လွင်ႈတၢင်းၵႃႈဢၼ်ႁဵတ်းၵႃႈတီႈတႂ်ႈၵၢင်ဝၼ်းၼၼ်ႉယဝ်ႉ။
၁၄ ၵူႈၸိူဝ်ႉၵူႈပိူင်ၼၼ်ႉဢွၼ်ၵၼ်ပဵၼ်လွင်ႈတၢင်းဢႃႉၼတ်ႉတႃႉ၊ပဵၼ်လွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်းဢေႃႈ။
၁၅ လွင်ႈတၢင်းဢၼ်ၵူတ်ႉၼၼ်ႉၸိုင်ဢမ်ႇႁႂ်ႈသိုဝ်ႈလႆႈ။လွင်ႈတၢင်းဢၼ်လုတ်ႈႁၢမ်းၸိုင်ဢမ်ႇၼပ်ႉဢၢၼ်ႇလႆႈ။
၁၆ ၵဝ်လၢတ်ႈၼႂ်းႁူဝ်ၸႂ်ၵဝ်လႄႈဝႃႈၸမ်း၊-ၵဝ်ၼႆႉယိင်ႈၶႅၼ်းလႆႈၺၢၼ်ႇလိူၼ်တွၼ်းၼႃႇသေၶဝ်ၸိူဝ်းဢၼ်ယၢမ်ႈလႆႈဢုပ်ႉပိူင်ႇၵႃႈၼႂ်းဝဵင်းယေႇရုသလႅမ်ႇမိူဝ်ႈဢွၼ်တၢင်းၵဝ်ၸိူဝ်းၼၼ်ႉဢေႃႈ။ႁူဝ်ၸႂ်ၵဝ်လႆႈၶႆႈၸႂ်ဝူၼ်ႉၸႂ်လူၺ်ႈၺၢၼ်ႇတင်းဢတၢတ်ႈတၢင်းႁူႉတၢင်းၸၢင်ႊၼႃႇလူင်လၢင်ဢေႃႈ။
၁၇ ၵဝ်ဝႆႉၸႂ်ၵဝ်ႁႂ်ႈလႆႈၸၵ်းၽႄလႄႈႁူႉပိင်ႇၺႃႇတြႃးဢိၵ်ႇတင်းတၢင်းဢၼ်မဝ်မၢင်တင်းတၢင်းဢၼ်မိူၵ်ႈၸိူဝ်းၼၼ်ႉဢေႃႈ။ၵဝ်ႁူႉႁၼ်လွင်ႈဢၼ်လွင်ႈတၢင်းၼၼ်ႉပဵၼ်လွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်းၼၼ်ႉဢေႃႈ။
၁၈ လွင်ႈမၼ်းၸမ်းပေႃးၺၢၼ်ႇၼမ်ၸိုင်မီးလွင်ႈဢၼ်လီယၢပ်ႇၸႂ်ၽိုတ်ႇၸႂ်ၼမ်ဢေႃႈ။ၵေႃႉဢၼ်ဢတၢတ်ႈတၢင်းႁူႉတင်းၸၢင်ႊယႂ်ႇၽႄႈတူဝ်းတွၼ်းမႃးၼၼ်ႉႁႂ်ႈတၢင်းဢၼ်မႆႈၸႂ်ၶီၸႂ်မၼ်းယႂ်ႇၽႄႈတူဝ်းတွၼ်းမႃးဢေႃႈ။