၅
လီႈဢမ်းဢေႃးၽြႃးပဵၼ်ၸဝ်ႈ
၁ ယၢမ်းမိူဝ်ႈဢၼ်မႂ်းၵႂႃႇၵႃႈတီႈႁိူၼ်းၽြႃးပဵၼ်ၸဝ်ႈၼၼ်ႉၸိုင်ပႂ်ႉတိၼ်မႂ်းယူႇတႃႉ။တၢင်းဢၼ်သုတ်ႉၸပ်းသုတ်ႉၸူးႁႂ်ႈလႆႈထွမ်ႇတြႃးၼၼ်ႉယိင်ႈၶႅၼ်းလီၼႃႇသေတၢင်းပုၵ်ႉၸေႃႇဢၼ်ၵူၼ်းမိူၵ်ႈႁဵတ်းၼၼ်ႉဢေႃႈ။ၶဝ်ၼၼ်ႉဢမ်ႇႁူႉလွင်ႈဢၼ်ၶဝ်ႁဵတ်းဢပျႅတ်ႈၼၼ်ႉ။
၂ ယႃႇပေႁႂ်ႈသူပ်းမႂ်းလိုမ်းႁဵတ်းသတိ။ယႃႇပေႁႂ်ႈႁူဝ်ၸႂ်မႂ်းၶၼ်ၽႂ်းႁႂ်ႈလႆႈလၢတ်ႈၵႂၢမ်းၵႃႈတီႈၽၢႆႇၼႃႈၽြႃးပဵၼ်ၸဝ်ႈ။ၽြႃးပဵၼ်ၸဝ်ႈမီးၵႃႈတီႈၽုင်ႇၵၢင်ႁၢဝ်ဢေႃႈ။မႂ်းၸိုင်မီးၵႃႈၼိူဝ်လိၼ်မိူင်းဢေႃႈ။ပိူဝ်ႈၼႆလႄႈယႃႇပေႁႂ်ႈၵႂၢမ်းမႂ်းၼမ်။
၃ ၸိူဝ်ႉၼင်ႇဢၼ်တၢင်းဢၼ်ၼွၼ်းၽၼ်ႁၼ်ၼၼ်ႉၸၢင်ႊပဵၼ်မႃးၵွပ်ႈပိူဝ်ႈဢၼ်ၵၢၼ်တၢင်းႁဵတ်းၼမ်ၼႃႇၼၼ်ႉလႆႈငိၼ်းသဵင်ၵႂၢမ်းၵေႃႉဢၼ်မိူၵ်ႈၼၼ်ႉၵွပ်ႈပိူဝ်ႈဢၼ်သူပ်းၵႂၢမ်းမၼ်းၼမ်ၼၼ်ႉဢေႃႈ။
၄ ပေႃးႁဵတ်းၵတိသႅတ်ႉၸႃႇတီႈၽြႃးပဵၼ်ၸဝ်ႈမႅၼ်ႈၸိုင်ယင်းဢမ်ႇၽႄႇဝတ်ႈသႅတ်ႉၸႃႇလႄႈယႃႇပေယူႇ။မၼ်းၸဝ်ႈဢမ်ႇၵျိူၵ်ႈၶဝ်ၸိူဝ်းဢၼ်မိူၵ်ႈၼၼ်ႉ။
၅ ၽႄႇဝတ်ႈၸွမ်းၵႃႈၼင်ႇဢၼ်ႁဵတ်းၵတိသႅတ်ႉၸႃႇဝႆႉၼၼ်ႉတႃႉ။တၢင်းဢၼ်ယင်းဢမ်ႇႁဵတ်းၵႃႈတီႈသႅတ်ႉၸႃႇလႃးလႃးလႄႈယူႇၼၼ်ႉယိင်ႈၶႅၼ်းလီၼႃႇသေတၢင်းဢၼ်ႁဵတ်းၵတိသႅတ်ႉၸႃႇယဝ်ႉလႄႈယင်းဢမ်ႇၽႄႇလႄႈယူႇၼၼ်ႉဢေႃႈ။
၆ ယႃႇပပေၼ်သူပ်းမႂ်းႁႂ်ႈတၢမ်ႇဢပျႅတ်ႈႁွတ်ႈထိုင်တီႈတူဝ်ၶိင်းမႂ်း။ယႃႇပေႁႂ်ႈမီးလွင်ႈဢၼ်တၵ်းလႆႈလၢတ်ႈၵႃႈတီႈၽၢႆႇၼႃႈတမၢၼ်ႇၸဝ်ႈလႄႈဝႃႈ၊-ၵဝ်ၶႃႈၽိတ်းပိူင်ႈၶႃႈယဝ်ႉ၊ဝႃႈၼင်ႇၼႆၼၼ်ႉ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၽြႃးပဵၼ်ၸဝ်ႈတၵ်းလႆႈၸႂ်မႆႈၶႆႈၸႃႉတီႈသဵင်ၵႂၢမ်းမႂ်းလႄႈယႃႉၽဵဝ်ႈလွင်ႈတၢင်းဢၼ်မႂ်းဢဝ်မိုဝ်းႁဵတ်းသၢင်ႈၼၼ်ႉပႅတ်ႈၼင်ႇႁိုဝ်။
၇ ၵႃႈၼႂ်းတၢင်းဢၼ်ၼွၼ်းၽၼ်ႁၼ်ၼမ်ၼႃႇဢိၵ်ႇတင်းၵႃႈၼႂ်းၵႂၢမ်းဢၼ်ၼမ်ၼႃႇၼၼ်ႉၸၢင်ႊပႃးလွင်ႈတၢင်းဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။မႂ်းၸမ်းၵူဝ်ႁႄၽြႃးပဵၼ်ၸဝ်ႈယူႇတႃႉ။
တၢင်းမၢၵ်ႈမီးပဵၼ်ဢႃႉၼတ်ႉတႃႉ
၈ ပေႃးမႂ်းႁၼ်တၢင်းဢၼ်ၼိၵ်ႈၸၢၵ်ႈငႅၼ်းသေးၵူၼ်းယၢၵ်ႈၵူၼ်းၽၢၼ်၊တၢင်းဢၼ်ဝႄႈပိူင်ႈသဵၼ်ႈတၢင်းတြႃးလႄႈဢမ်ႇၸွမ်းၼင်ႇတြႃး၊ႁဵတ်းပေႉႁဵတ်းၼႅင်ႇၸီႇယၢင်ႇတႅပ်းတတ်းၵႃႈၼႂ်းဢိူင်ႇဝၢၼ်ႈၼွၵ်ႈၼႃးပၢင်ႇၼၼ်ႉၸိုင်၊ယႃႇပမေီးတၢင်းဢၼ်ဢၢမ်းလွင်ႈတၢင်းၸိူဝ်ႉၼင်ႇၼၼ်ၼၼ်ႉ။ၵေႃႉဢၼ်ယႂ်ႇသုင်ၼႃႇသေၵေႃႉဢၼ်ယႂ်ႇသုင်ၼၼ်ႉလူတူၺ်းမၢတ်ႈတွင်းလွင်ႈမၼ်းဝႆႉယူႇလႄႈၵေႃႉဢၼ်ယႂ်ႇသုင်ၼႃႇသေပိူၼ်ႈၼၼ်ႉယင်းမီးယူႇၵႃႈၼိူဝ်ၶဝ်ၼၼ်ႉဢေႃႈ။
၉ တၢင်းဢၼ်ပဵၼ်တိုၼ်းပဵၼ်ႁွၼ်းဢၼ်ပဵၼ်မႃးၵႃႈတီႈလိၼ်မိူင်းၼႆႉၼၼ်ႉပဵၼ်ပုၼ်ႈၵူၼ်းတင်းသဵင်ႈတင်းလူင်လႄႈၶုၼ်ႁေႃၶမ်းသေၵေႃႈလႆႈၶၢမ်ႇဢဝ်ၵျေးၸူးႁႆႊၵျေးၸူးၼႃးဢေႃႈ။
၁၀ ၵေႃႉဢၼ်ၸႂ်ၸပ်းၸႂ်ၸွႆးငိုၼ်းၼၼ်ႉဢလူဝ်ႇသၼ်ႇတႃႉမၼ်းဢမ်ႇဢိမ်ႇတႅမ်ႈတီႈငိုၼ်းလႆႈ။ၵေႃႉဢၼ်ၸႂ်ၸပ်းၸႂ်ၸွႆးၸေးၸိမ်ႇၼၼ်ႉပိၵ်ႉသမ်ႉၸေးၸိမ်ႇၽႄႈတူဝ်းတွၼ်းမႃးသေၵေႃႈဢမ်ႇပျေႃႇၸႂ်လႆႈ။လွင်ႈတၢင်းၼၼ်ႉၵေႃႈပဵၼ်ဢႃႉၼတ်ႉတႃႉဢေႃႈ။
၁၁ ယၢမ်းမိူဝ်ႈဢၼ်ဢုၵ်ႉၸႃႇၽႄႈတူဝ်းတွၼ်းမႃးၼၼ်ႉၸိုင်ၶဝ်ၸိူဝ်းဢၼ်လႆႈၵိၼ်ၵေႃႈယႂ်ႇၽႄႈၼမ်ၵိုၼ်းမႃးလႄႈၼွၵ်ႈသေၵျေးၸူးတၢင်းဢၼ်ဢဝ်ဢုၵ်ႉၸႃႇဢဝ်မၢၵ်ႇတႃမၼ်းလူတူၺ်းၼၼ်ႉၵူၺ်းမီးၵျေးၸူးၵႃႈသင်လူးၵွၼ်ႇ။
၁၂ ၵေႃႉဢၼ်ႁဵတ်းၵၢၼ်တၢင်းႁဵတ်းၼၼ်ႉလႆႈၵိၼ်ၼမ်ၼမ်သေဢမ်ႇဝႃႈလႆႈၵိၼ်ၵေႇၵေႇသေဢမ်ႇဝႃႈၸၢင်ႊၼွၼ်းလပ်းလီဝၢၼ်လီဢေႃႈ။ၸေးၸိမ်ႇၶွင်ၶူဝ်းၵေႃႉဢၼ်မၢၵ်ႈမီးၼၼ်ႉၸမ်းၸၢင်ႊႁႂ်ႈတၢင်းၼွၼ်းၸဝ်ႈမၼ်းလူႉဢေႃႈ။
၁၃ ၵဝ်လႆႈႁၼ်တၢင်းဢၼ်ႁၢႆႉယုတ်ႈၼႃႇလူင်လၢင်ၵႃႈတီႈတႂ်ႈၵၢင်ဝၼ်းၼႆႉဢၼ်ဝႃႈတၢင်းဢၼ်မၢၵ်ႈမီးသိမ်းပႅင်းတၢင်းဢၼ်မၢၵ်ႈမီးဝႆႉတေႃႇထိုင်ႁွတ်ႈထၼ်ႈပေႃးဢၵျူဝ်းမၼ်းလူႉၼၼ်ႉယဝ်ႉ။
၁၄ တၢင်းဢၼ်မၢၵ်ႈမီးၼၼ်ႉၸၢင်ႊႁူင်ႈႁၢႆၵႂႃႇၵွပ်ႈပိူဝ်ႈလွင်ႈတၢင်းဢၼ်ဢမ်ႇလီဢမ်ႇငၢမ်းလႄႈပေႃးမၼ်းလႆႈလုၵ်ႈၸၢႆးၸိုင်လုၵ်ႈၸၢႆးမၼ်းၼၼ်ႉလႆႈယူႇတိၼ်လၢႆမိုဝ်းပဝ်ႇဢေႃႈ။
၁၅ ၸိူဝ်ႉၼင်ႇဢၼ်မၼ်းယင်းဢမ်ႇပႃးၵႃႈသင်လႃးလႃးလႄႈဢွၵ်ႇသေၵႃႈၼႂ်းတွင်ႉမေႈမၼ်းမႃးၼၼ်ႉမၼ်းတၵ်းလႆႈၶိုၼ်းၵႂႃႇမိူၼ်ၸိူဝ်ႉၼင်ႇဢၼ်မၼ်းမႃးၼၼ်ႉဢေႃႈ။မၼ်းဢမ်ႇလႆႈဢဝ်မိုဝ်းမၼ်းယိပ်းၵမ်ဢဝ်ၶွင်ၶူဝ်းၵႂႃႇဢၼ်မၼ်းၶတ်းၸႂ်ဢဝ်ႁႅင်းဢွၵ်ႇႁဵတ်းလႄႈလႆႈၼၼ်ႉသေၸိူဝ်ႉသေပိူင်။
၁၆ တၢင်းဢၼ်မၼ်းယင်းဢမ်ႇပႅၵ်ႇဢမ်ႇပိူင်ႈလႃးလႃးလႄႈလႆႈၶိုၼ်းၵႂႃႇၼၼ်ႉပဵၼ်တၢင်းဢၼ်ႁၢႆႉယုတ်ႈၼႃႇလူင်လၢင်ဢေႃႈ။ၵေႃႉဢၼ်ၶတ်းၸႂ်ဢဝ်ႁႅင်းဢွၵ်ႇႁဵတ်းႁႂ်ႈလႆႈလူမ်းလႆႈလႅင်ႉႉၵူၺ်း
၁၇ ၼၼ်ႉပွင်ႇလွင်ႈၵႃႈသင်။မၼ်းၸၢင်ႊႁႂ်ႈမိုဝ်ႉဝၼ်းမၼ်းတင်းသဵင်ႈတင်းလူင်ပူၼ်ႉၵႂႃႇယူႇၵႃႈၼႂ်းဢၼ်လပ်းသိင်ႇလႄႈမၼ်းလႆႈၶၢမ်ႇတၢင်းဢၼ်ယႃႉယူၵ်ႉတၢင်းဢၼ်ယၢပ်ႇၸႂ်ယုင်ႈၸႂ်၊တၢင်းဢၼ်ၸႂ်မႆႈၶႆႈၸႃႉၼႃႇလူင်လၢင်ဢေႃႈ။
၁၈ တူၺ်းလူလွင်ႈတၢင်းဢၼ်ၵဝ်ႁၼ်ဢၼ်ပဵၼ်ဢၼ်သေႇၶျႃႇလီငၢမ်းလႄႈထုၵ်ႇၶိုင်ၼၼ်ႉၸမ်း၊ပဵၼ်တၢင်းဢၼ်ၵိၼ်ဢၼ်ၶူပ်း၊တၢင်းဢၼ်ပျေႃႇယူႇၵႃႈၼႂ်းဢၵျူဝ်းၵႃႈဢၼ်မၼ်းၶတ်းၸႂ်ဢဝ်ႁႅင်းဢွၵ်ႇလႄႈႁဵတ်းလႆႈမႃးၵႃႈတီႈတႂ်ႈၵၢင်ဝၼ်းၼၼ်ႉၼႂ်းၸူဝ်ႈဢသၢၵ်ႈမၼ်းၵႃႈဢၼ်ၽြႃးပဵၼ်ၸဝ်ႈပၼ်တီႈမၼ်းၼၼ်ႉတဵမ်တဵမ်ၼၼ်ႉဢေႃႈ။လွင်ႈတၢင်းၼၼ်ႉပဵၼ်ပုၼ်ႈမၼ်းတႃႇမၼ်းဢေႃႈ။
၁၉ ၵႃႈပဵၼ်ၵေႃႉဢၼ်လႆႈၸေးၸိမ်ႇၶွင်ၶူဝ်းဢၼ်ၽြႃးပဵၼ်ၸဝ်ႈဢိတ်းလူပၼ်ၼၼ်ႉမၼ်းမီးဢၶႂၢင်ႉဢၼ်လႆႈၵိၼ်လႄႈမူၼ်ႈပျေႃႇယူႇၼႂ်းတၢင်းဢၼ်မၼ်းၶတ်းၸႂ်ဢဝ်ႁႅင်းဢွၵ်ႇႁဵတ်းလႄႈလႆႈမႃးၼၼ်ႉပဵၼ်ၵွပ်ႈပိူဝ်ႈၵျေးၸူးၽြႃးပဵၼ်ၸဝ်ႈၵူၺ်းဢေႃႈ။
၂၀ မၼ်းတၵ်းဢမ်ႇၶုၵ်းၸႂ်လႆႈၶႆႈၸႂ်ထူပ်းမိုဝ်ႉဝၼ်းဢသၢၵ်ႈမၼ်းဢၼ်ပူၼ်ႉမႃးယဝ်ႉၼၼ်ႉၼႃႇလူင်လၢင်။လွင်ႈမၼ်းၸမ်းၽြႃးပဵၼ်ၸဝ်ႈဢိတ်းလူပၼ်ဢၶႂၢင်ႉႁႂ်ႈႁူဝ်ၸႂ်မၼ်းလႆႈၸူမ်းလႆႈသိူဝ်းၼၼ်ႉဢေႃႈ။