၄
တၢင်းၶတ်းၶဵင်ႇ၊တၢင်းၵႆႉၶတ်းႁႅင်းဢွၵ်ႇတၢင်းဢၼ်ဢမ်ႇမီးၵေႃႈသေႈ
၁ လၢႆးသမ်ႉၵဝ်ဝၢႆႇၶိုၼ်းလႄႈႁၼ်တၢင်းဢၼ်ၼိၵ်ႈၸၢၵ်ႈငႅၼ်းသေးၵႃႈဢၼ်ႁဵတ်းၵႃႈတီႈတႂ်ႈၵၢင်ဝၼ်းၼႆႉၼၼ်ႉဢေႃႈ။ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသေးၼၼ်ႉႁႆႈႁွင်ႉလႄႈဢမ်ႇမီးၵေႃႉဢၼ်ပၼ်ၵတ်းယဵၼ်ၶျၢမ်းသႃႇလႆႈတီႈၶဝ်။ၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသေးၸိူဝ်းၼၼ်ႉမီးတၼ်းၶူဝ်းလႄႈဢမ်ႇမီးၵေႃႉဢၼ်ပၼ်ၵတ်းယဵၼ်ၶျၢမ်းသႃႇတီႈၶဝ်ၼၼ်ႉလႆႈ။
၂ ပိူဝ်ႈၼႆလႄႈၵဝ်လၢတ်ႈလႄႈဝႃႈဝႆႉၵူၼ်းတၢႆဢၼ်တၢႆပူၼ်ႉၵႂႃႇယဝ်ႉၸိူဝ်းၼၼ်ႉယိင်ႈၶႅၼ်းမီးမၢင်ႇၵလႃႇၼႃႇသေၵူၼ်းလိပ်းဢၼ်ဢသၢၵ်ႈလိပ်းယူႇၸိူဝ်းၼႆႉဢေႃႈ၊ဝႃႈၼင်ႇၼႆဢေႃႈ။
၃ ၵူၺ်းၵႃႈၵေႃႉဢၼ်ဢမ်ႇပႆႇတွၼ်ႉပဵၼ်သပွေၵ်ႈ၊ၵေႃႉဢၼ်ဢမ်ႇပႆႇတွၼ်ႉႁၼ်တူႉၸရိူၵ်ႈဢၼ်ႁဵတ်းၵႃႈတီႈတႂ်ႈၵၢင်ဝၼ်းၼႆႉၼၼ်ႉယိင်ႈၶႅၼ်းမီးမၢင်ႇၵလႃႇၼႃႇသေသွင်ၸိူဝ်ႉသွင်ပိူင်ၼၼ်ႉဢေႃႈ။
၄ လၢႆးသမ်ႉၵဝ်ႁၼ်လွင်ႈတၢင်းဢၼ်ၶတ်းၸႂ်ဢဝ်ႁႅင်းဢွၵ်ႇႁဵတ်းၵႃႈမီးဢိၵ်ႇတင်းတၢင်းဢၼ်ယဝ်ႉတူဝ်ႈလီငၢမ်းဝႆႉၵူႈၸိူဝ်ႉၵူႈပိူင်ၼၼ်ႉဢိၵ်ႇတင်းလွင်ႈတၢင်းဢၼ်ပိူၼ်ႈတၢင်ႇၵေႃႉသီႇၵေႉႁႄႈတႃၵွပ်ႈပိူဝ်ႈလွင်ႈတၢင်ႇၸိူဝ်ႉတၢင်ႇပိူင်ၼၼ်ႉဢေႃႈ။လွင်ႈတၢင်းၼၼ်ႉပဵၼ်လွင်ႈတၢင်းဢႃႉၼတ်ႉတႃႉ၊လွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်းဢေႃႈ။
၅ ၵေႃႉဢၼ်မိူၵ်ႈၼၼ်ႉၸၢင်ႊဢဝ်မိုဝ်းတူဝ်ၸဝ်ႈၵဝ်ႇၼင်ႇၵၼ်ၵၼ်ၵွတ်ႇၵၼ်ဝႆႉသေလႄႈႁႂ်ႈတူဝ်ၸဝ်ႈၵဝ်ႇလူႉလႅဝ်ဢေႃႈ။
၆ ၶွင်ၶူဝ်းဢၼ်သဵၼ်ႈၽႃႁွမ်းလူၺ်ႈၵၼ်တင်းတၢင်းဢၼ်ၼိမ်ၵမ်မိုဝ်းၼိုင်ႈၵူၺ်းၼၼ်ႉယိင်ႈၶႅၼ်းလီၼႃႇသေၶွင်ၶူဝ်းဢၼ်သဵၼ်ႈၽႃႁွမ်းလူၺ်ႈၵၼ်တင်းတၢင်းဢၼ်ႁဵတ်းယၢပ်ႇႁဵတ်းၽိုတ်ႇဢိၵ်ႇတင်းတၢင်းဢၼ်ၵိၼ်လူမ်းၵိၼ်လႅင်ႉသွင်ၵမ်မိုဝ်းၼၼ်ႉဢေႃႈ။
၇ လၢႆးသမ်ႉၵဝ်ဝၢႆႇၶိုၼ်းလႄႈႁၼ်လွင်ႈတၢင်းဢႃႉၼတ်ႉတႃႉၵႃႈတီႈတႂ်ႈၵၢင်ဝၼ်းၼႆႉၸမ်း၊-မီးၵေႃႉၼိုင်ႈဢၼ်မီးၵေႃႉလဵဝ်ၵူၺ်းမၼ်း၊ဢၼ်ဢမ်ႇမီးၵေႃႉဢၼ်ၵိုၵ်းဢၼ်ႁွမ်းမၼ်းဢၼ်ဢမ်ႇမီးပီႈၸၢႆးၼွင်ႉၸၢႆးမၼ်းၼၼ်ႉဢေႃႈ။
၈ တၢင်းဢၼ်မၼ်းၶတ်းၸႂ်ဢဝ်ႁႅင်းဢွၵ်ႇႁဵတ်းၼၼ်ႉဢမ်ႇသဵင်ႈဢမ်ႇမူတ်းလႆႈ။မၢၵ်ႇတႃမၼ်းႁၼ်ၸေးၸိမ်ႇမၼ်းလႄႈဢမ်ႇပျေႇၸႂ်လႆႈ။မၼ်းၸၢင်ႊထၢမ်လႄႈဝႃႈ၊-ၵဝ်ၼႆႉၶတ်းၸႂ်ဢဝ်ႁႅင်းဢွၵ်ႇႁဵတ်းလႄႈၼိၵ်ႈၸၢၵ်ႈငႅၼ်းသေးတူဝ်ၸဝ်ႈၵဝ်ႇပုၼ်ႈၽူႈလႂ်၊ဝႃႈၼင်ႇၼႆဢေႃႈ။လွင်ႈတၢင်းၼႆႉၵေႃႈပဵၼ်လွင်ႈတၢင်းဢႃႉၼတ်ႉတႃႉ၊လွင်ႈတၢင်းဢၼ်ႁႂ်ႈယၢပ်ႇၸႂ်ၶၢၼ်ၸႂ်ၼႃႇလူင်လၢင်ဢေႃႈ။
၉ ၵူၼ်းသွင်ၵေႃႉယိင်ႈၶႅၼ်းလီၼႃႇသေၵေႃႉလဵဝ်ဢေႃႈ။လွင်ႈမၼ်းၸမ်းဢၵျူဝ်းဢၼ်လီၸၢင်ႊမီးၼႂ်းတၢင်းဢၼ်သွင်ၶႃၶတ်းၸႂ်ဢဝ်ႁႅင်းဢွၵ်ႇႁဵတ်းၼၼ်ႉဢေႃႈ။
၁၀ ပေႃးၵေႃႉၼိုင်ႈလူမ်ႉၸိုင်ၵေႃႉၼိုင်ႈတၵ်းပူၵ်းဢေႃႈ။ပေႃးမီးၵေႃႉလဵဝ်ၵူၺ်းလႄႈလူမ်ႉၸမ်းပဵၼ်ဢႃႉမၢင်ႇၵလႃႇဢေႃႈ။
၁၁ ဢမ်ႇမီးၵေႃႉဢၼ်တၵ်းပူၵ်း။ပေႃးၵူၼ်းသွင်ၵေႃႈၼွၼ်းႁူမ်ႈၵၼ်ၸိုင်ဢုၼ်ႇဢေႃႈ။ၵူၼ်းၵေႃႉလဵဝ်ၼွၼ်းၵူၺ်းၸမ်းတၵ်းဢုၼ်ႇလႆႈၸိူဝ်ႉၼင်ႇႁိုဝ်။
၁၂ ပေႃးၵူၼ်းၵေႃႉၼိုင်ႈလႆႈၶၢမ်ႇပေႉၼႅင်ႇၸိုင်ၵူၼ်းသွင်ၵေႃႉတၵ်းႁၢမ်ႈတၢပ်ႉႁႄႉၶႅၼ်လႆႈယူႇဢေႃႈ။ၸိူၵ်ႈဢၼ်ႁွမ်းၵၼ်သၢမ်ၵိဝ်ၵေႃႈဢမ်ႇၸၢင်ႊၶၢတ်ႇငၢႆႈငၢႆႈ။
၁၃ လုၵ်ႈဢွၼ်ႇဢၼ်ယၢၵ်ႈဢၼ်ၽၢၼ်လႄႈမီးၺၢၼ်ႇၼၼ်ႉယိင်ႈၶႅၼ်းမျၢတ်ႈၼႃႇသေၶုၼ်ႁေႃၶမ်းဢၼ်ဢသၢၵ်ႈယႂ်ႇလႄႈမိူၵ်ႈဢၼ်ဢမ်ႇႁူႉလွင်ႈဢၼ်တၵ်းလႆႈၶၢမ်ႇတၢင်းဢၼ်သင်ႇသွၼ်သုင်းမႃႉပၼ်ထႅင်ႈၼၼ်ႉဢေႃႈ။
၁၄ လုၵ်ႈဢွၼ်ႇၸိူဝ်ႉၼင်ႇၼၼ်ၼၼ်ႉၸၢင်ႊဢွၵ်ႇသေၵႃႈၼႂ်းႁိူၼ်းတီႈဢၼ်မၼ်းပၢႆႈတဵတ်ႇပၢႆႈမႅပ်းယူႇၼၼ်ႉလႄႈႁွတ်ႈထိုင်ၵႃႈၼိူဝ်ႁေႃၶမ်းဢေႃႈ။ၶုၼ်ႁေႃၶမ်းၸိူဝ်ႉၼင်ႇၼၼ်ၼၼ်ႉမိူၼ်ၼင်ႇၵိူတ်ႇလဵင်ႉမႃးပဵၼ်ၵူၼ်းယၢၵ်ႈၵူၼ်းၽၢၼ်ၵႃႈၼႂ်းသိုင်ႇၸိုင်ႈဝၢၼ်ႈမိူင်းမၼ်းဢေႃႈ။
၁၅ ၵဝ်ႁၼ်ၵူၼ်းသတ်ႉတဝႃႇဢၼ်ၵႂႃႇမႃးယူႇၵႃႈတီႈတႂ်ႈၵၢင်ဝၼ်းၼႆႉတင်းသဵင်ႈတင်းလူင်ၸၢင်ႊဢွၼ်ၵၼ်ၸွမ်းၵူၼ်းၼုမ်ႇဢၼ်တၵ်းလႆႈၶၢမ်ႇဢဝ်ဢရႃႇၶုၼ်ၼၼ်ႉဢေႃႈ။
၁၆ ၶုၼ်ၸိူဝ်းဢၼ်ဢုပ်ႉပိူင်ႇမႃးယဝ်ႉၸိူဝ်းၼၼ်ႉၼပ်ႉဢၢၼ်ႇလႄႈဢမ်ႇသဵင်ႈလႆႈ။ၵူၺ်းၵႃႈၶဝ်ၸိူဝ်းဢၼ်ပဵၼ်မႃးၵမ်းလိုၼ်းၸိူဝ်းၼၼ်ႉယင်းဢမ်ႇထုၵ်ႇၸႂ်မႅၼ်ႈၸႂ်လူၺ်ႈၸိူဝ်းဢၼ်ပူၼ်ႉၵႂႃႇၸိူဝ်းၼၼ်ႉ။လွင်ႈတၢင်းၼၼ်ႉၵေႃႈပဵၼ်ဢႃႉၼတ်ႉတႃႉ၊လွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်းဢမၢၼ်ႇၶၢၼ်ပဵၼ်ဢေႃႈ။