၂
တၢင်းမူၼ်ႈတၢင်းသိူဝ်းဢႃႉၼတ်ႉတႃႉလွၼ်ႉလွၼ်ႉ
၁ လၢႆးသမ်ႉၵဝ်လၢတ်ႈၵႃႈၼႂ်းႁူဝ်ၸႂ်ၵဝ်လႄႈဝႃႈၸမ်း၊-မႃးတႃႉ။ၵဝ်တၵ်းဢဝ်တၢင်းဢၼ်သႂၢင်ႇဢၼ်သိူဝ်းၸၢမ်းတူၺ်းမႂ်းဢေႃႈ။ပိူဝ်ႈၼႆလႄႈမၼ်းမူၼ်ႈသိူဝ်းယူႇၼႂ်းၵႃႇမႃႉၵုင်ႇတႃႉ၊ဝႃႈၼင်ႇၼႆလႄႈလွင်ႈတၢင်းၼၼ်ႉၵေႃႈပဵၼ်ဢႃႉၼတ်ႉတႃႉဢေႃႈ။
၂ ၵဝ်လႆႈလၢတ်ႈတီႈတၢင်းဢၼ်ၶူဝ်ဢၼ်ႁိူဝ်ႇၼၼ်ႉလႄႈဝႃႈ၊-မႂ်းယွင်ႇဢေႃႈဝႃႈၼင်ႇၼႆလႄႈလၢတ်ႈတီႈတၢင်းဢၼ်သႂၢင်ႇဢၼ်သိူဝ်းၼၼ်ႉလႄႈဝႃႈ၊-
၃ မႂ်းႁဵတ်းပွင်ႇလွင်ႈၵႃႈသင်ဝႃႈၼင်ႇၼႆဢေႃႈ။ႁူဝ်ၸႂ်ၵဝ်မီးတၢင်းဢၼ်ၶတ်းၸႂ်ႁဵတ်းလူၺ်ႈပိင်ႇၺႃႇတြႃးယူႇသေလႄႈၵဝ်လႆႈၵျၢမ်ႇပွင်ၼႂ်းႁူဝ်ၸႂ်ၵဝ်ႁႂ်ႈလႆႈဢဝ်တင်းၼမ်ႉၸပိတ်ႉၸူဝ်းဢဝ်ၸႂ်ၵဝ်လႄႈယိပ်းၵမ်ဢဝ်တၢင်းဢၼ်မိူၵ်ႈၼၼ်ႉထၼ်ႈပေႃးၵဝ်လႆႈႁူႉလွင်ႈဢၼ်လီဢၼ်လုၵ်ႈၵူၼ်းတင်းလၢႆထုၵ်ႇလီႁဵတ်းယူႇၸူဝ်ႈဢသၢၵ်ႈၵႃႈတီႈတႂႃ်ႈႉၵၢင်ႁၢဝ်ၼၼ်ႉဢေႃႈ။
၄ ၵဝ်ၸီႇယၢင်ႇပွင်ႁဵတ်းလွင်ႈတၢင်းဢၼ်ယႂ်ႇၼႃႇတင်းလၢႆလႄႈႁဵတ်းႁိူၼ်းလႂ်ၽုၵ်ႇသွမ်ႈသူၼ်ဢူးယဵၼ်ႇၸပိတ်ႉလႂ်၊
၅ လုမ်းလႃးသူၼ်ဢူးယဵၼ်ႇၵူႈၸိူဝ်ႉၵူႈမဵဝ်းလႂ်ၽုၵ်ႇသွမ်ႈတူၼ်ႈဢၼ်မၢၵ်ႇမၢၵ်ႇၵူႈၸိူဝ်ႉၵူႈပိူင်လႂ်၊ႁဵတ်းၼမ်ႉၼွင်တင်းလၢႆ
၆ ပုၼ်ႈဢၼ်တၵ်းႁူတ်းပႃႇမႆႉဢၼ်တဵမ်ဝႆႉတင်းမဵဝ်းတူၼ်ႈမႆႉၼၼ်ႉလႂ်၊သိုဝ်ႉဢဝ်ၶႃႈၵူၼ်းၸၢႆး၊ၶႃႈၵူၼ်းယိင်းလႄႈလႆႈလုၵ်ႈၶႃႈဢၼ်ၵိူတ်ႇလဵင်ႉမႃးၵႃႈၼႂ်းႁိူၼ်းၵဝ်လႂ်၊
၇ လႆႈမၢၵ်ႈမီးၽုင်သူဝ်းၽုင်ဝူဝ်းလိူဝ်တွၼ်းၼႃႇသေၶဝ်ၸိူဝ်းဢၼ်ယၢမ်ႈပဵၼ်ၵႂႃႇယဝ်ႉၵႂႃႇၵႃႈၼႂ်းဝဵင်းယေႇရုသလႅမ်ႇမိူဝ်ႈဢွၼ်တၢင်းၵဝ်ၼၼ်ႉၼႃႇလူင်လၢင်လႂ်၊
၈ ၵဵပ်းႁွမ်သိမ်းဢဝ်ငိုၼ်းၶမ်းၶွင်ၶူဝ်းဢၼ်ၸၢပ်ႈသႅင်ႇၵၼ်တင်းၶုၼ်ႁေႃၶမ်း၊ၶွၼ်ႇဢၼ်ၽႃႇၵဵပ်းဢဝ်ၵႃႈတီႈၵူႈဢိူင်ႇၵူႈၵျၢၵ်ႈလႂ်၊သိမ်းဢဝ်ၵူၼ်းယိင်းၵူၼ်းၸၢႆးၽူႈႁွင်ႉၵႂၢမ်းၵႃႈဝႅၼ်တင်းလၢႆဢိၵ်ႇတင်းမေႈယိင်းၸိူဝ်ႉၼင်ႇဢၼ်ၵူၼ်းႁဝ်းမူၼ်ႈပျေႃႇၸႂ်ၸိူဝ်းၼၼ်ႉဝႆႉဢေႃႈ။
၉ ၼင်ႇၼၼ်လႄႈၵဝ်ႁွတ်ႈထိုင်တၢင်းဢၼ်ယႂ်ႇသုင်လႄႈၽႄႈၵႂၢင်ႈတူဝ်းတွၼ်းမႃးလႄႈလိူဝ်တွၼ်းၼႃႇသေၶဝ်ၸိူဝ်းဢၼ်ယၢမ်ႈပဵၼ်ၵႂႃႇယဝ်ႉၼႂ်းဝဵင်းယေႇရုသလႅမ်ႇမိူဝ်ႈဢွၼ်တၢင်းၵဝ်ၸိူဝ်းၼၼ်ႉဢေႃႈ။
၁၀ ၵဝ်ဢမ်ႇတွပ်ႇထဵင်ပႅတ်ႈလွင်ႈတၢင်းဢၼ်မၢၵ်ႇတႃၵဝ်ၸပ်းၸွႆးၶႂ်ႈလႆႈၼၼ်ႉသေၸိူဝ်ႉသေပိူင်။ၵဝ်ဢမ်ႇပႄႇပႅတ်ႈတီႈဢၼ်ႁူဝ်ၸႂ်ၵဝ်ၸူမ်းသိူဝ်းၼၼ်ႉသေၸိူဝ်ႉသေပိူင်။ႁူဝ်ၸႂ်ၵဝ်ၸူမ်းသိူဝ်းယူႇၵႃႈၼႂ်းတၢင်းဢၼ်ၶတ်းၸႂ်ၼၼ်ႉယူႇသေလႄႈၵဝ်လႆႈၶၢမ်ႇတၢင်းဢၵျူဝ်းလွင်ႈတၢင်းၵႃႈ၁၁ ဢၼ်ၵဝ်ၶတ်းၸႂ်ၼၼ်ႉဢေႃႈ။
၁၁ မိူဝ်ႈၼၼ်ႉၵဝ်လူတူၺ်းၵႃႈဢၼ်ၵဝ်ၸီႇယၢင်ႇဢဝ်မိုဝ်းပွင်ႁဵတ်း၊ၵႃႈဢၼ်ၵဝ်လႆႈၶတ်းၸႂ်ဢဝ်ႁႅင်းဢွၵ်ႇႁဵတ်းၸိူဝ်းၼၼ်ႉလႄႈတူၺ်းလူ၊ၵူႈၸိူဝ်ႉၵူႈပိူင်ၼၼ်ႉဢွၼ်ၵၼ်ပဵၼ်လွင်ႈတၢင်းဢႃႉၼတ်ႉတႃႉ၊လွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်းဢေႃႈ။ဢမ်ႇမီးဢၵျူဝ်းဢၼ်လီၵႃႈတီႈတႂ်ႈၵၢင်ဝၼ်းလႃးလႃး။
ၺၢၼ်ႇတင်းတၢင်းမိူၵ်ႈပဵၼ်ဢႃႉၼတ်ႉတႃႉလွၼ်ႉလွၼ်ႉ
၁၂ လၢႆးသမ်ႉၵဝ်ဝၢႆႇၶိုၼ်းလႄႈၶႆႈၸႂ်ဝူၼ်ႉၸႂ်လူၺ်ႈၺၢၼ်ႇဢိၵ်ႇတင်းတၢင်းဢၼ်မဝ်မၢင်ႇတင်းတၢင်းဢၼ်မိူၵ်ႈၸိူဝ်းၼၼ်ႉဢေႃႈ။ၵေႃႉဢၼ်ပဵၼ်လိုၼ်းၶုၼ်ႁေႃၶမ်းၼၼ်ႉတၵ်းႁဵတ်းၸိူဝ်ႉၼင်ႇႁိုဝ်လႆႈ။တၵ်းႁဵတ်းလႆႈၵႃႈၼင်ႇဢၼ်ယၢမ်ႈႁဵတ်းယဝ်ႉၼၼ်ႉၵူၺ်းဢေႃႈ။
၁၃ မိူဝ်ႈၼၼ်ႉၵဝ်ႁူႉႁၼ်လွင်ႈဢၼ်ၺၢၼ်ႇမျၢတ်ႈလီလိူဝ်တွၼ်းၼႃႇသေတၢင်းဢၼ်မိူၵ်ႈၼၼ်ႉမိူၼ်ၸိူဝ်ႉၼင်ႇဢၼ်လႅင်းမျၢတ်ႈလီလိူဝ်တွၼ်းၼႃႇသေႇဢၼ်လပ်းသိင်ႇၼၼ်ႉဢေႃႈ။
၁၄ မၢၵ်ႇတႃၵေႃႉဢၼ်မီးၺၢၼ်ႇၼၼ်ႉမီးၵႃႈတီႈၵွၵ်းႁူဝ်မၼ်းလႄႈၵေႃႉဢၼ်မိူၵ်ႈၸမ်းၸၢင်ႊၵႂႃႇမႃးယူႇၵႃႈၼႂ်းဢၼ်လပ်းသိင်ႇဢေႃႈ။ၼႂ်းဝႃႈၼၼ်သေၵေႃႈၵဝ်ႁူႉႁၼ်လွင်ႈဢၼ်ဢမူႉၸိူဝ်းလဵဝ်ပိူင်လဵဝ်ၵူၺ်းႁွတ်ႈထိုင်ၵႃႈၼိူဝ်ၶဝ်တင်းသဵင်ႈတင်းလူင်ၼၼ်ႉဢေႃႈ။
၁၅ ၵဝ်လႆႈလၢတ်ႈၼႂ်းႁူဝ်ၸႂ်ၵဝ်လႄႈဝႃႈ၊-ၸိူဝ်ႉၼင်ႇဢၼ်ႁွတ်ႈထိုင်တီႈၵေႃႉဢၼ်မိူၵ်ႈၼၼ်ႉတၵ်းႁွတ်ႈထိုင်တီႈၵဝ်ဢေႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵဝ်ယိင်ႈၶႅၼ်းမီးပိင်ႇၺႃႇၼႃႇသမေၼ်း။လွင်ႈတၢင်းၼႆႉၵေႃႈပဵၼ်ဢႃႉၼတ်ႉတႃႉဢေႃႈ၊ဝႃႈၼင်ႇၼႆဢေႃႈ။
၁၆ ၵေႃႉဢၼ်မီးၺၢၼ်ႇၼၼ်ႉမိူၼ်ၸိူဝ်ႉၼင်ႇၵေႃႉဢၼ်မိူၵ်ႈၼၼ်ႉတၵ်းလႆႈၶၢမ်ႇတၢင်းဢၼ်လိုမ်းပႅတ်ႈမိူၼ်မိူၼ်ၵၼ်မိူဝ်ႈၶိင်ႇၵႃႇလႃႉဢၼ်တၵ်းမႃးၼၼ်ႉလႄႈၵမ်းလိုၼ်းၼၼ်ႉတၵ်းဢမ်ႇမီးတၢင်းဢၼ်မိူၼ်ၸိူဝ်ႉၼင်ႇၵူၼ်းမိူၵ်ႈၼၼ်ႉၵူၼ်းမီးၺၢၼ်ႇၵေႃႈတၵ်းတၢႆၼင်ႇၵဝ်ႇဢေႃႈ။
၁၇ ပိူဝ်ႈၼႆလႄႈၵဝ်မိူဝ်ႇၸၢၼ်ႈတၢင်းဢၼ်ဢသၢၵ်ႈလိပ်းဢေႃႈ။လွင်ႈတၢင်းဢၼ်လႆႈႁဵတ်းၵႃႈတီႈတႂ်ႈၵၢင်ဝၼ်းၼႆႉပဵၼ်ဢၼ်ယၢပ်ႇၽိုတ်ႇၼႃႇလူင်လၢင်တီႈၵဝ်လႄႈၵူႈၸိူဝ်ႉၵူႈပိူင်ၼၼ်ႉပဵၼ်လွင်ႈတၢင်းဢႃႉၼတ်ႉတႃႉလွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်းဢေႃႈ။
တၢင်းဢၼ်ၵႆႉၶတ်းႁႅင်းဢွၵ်ႇပဵၼ်ဢႃႉၼတ်ႉတႃႉလွၼ်ႉလွၼ်ႉ
၁၈ ၼွၵ်ႈသေၼႆႉလွင်ႈတၢင်းဢၼ်ၵဝ်လႆႈမိူဝ်ႇၸၢၼ်ႈလွင်ႈတၢင်းဢၼ်ၵဝ်ၶတ်းၸႂ်ဢဝ်ႁႅင်းဢွၵ်ႇႁဵတ်းၵႃႈတီႈတႂ်ႈၵၢင်ဝၼ်းၵူႈၸိူဝ်ႉၵူႈပိူင်ၼၼ်ႉၸမ်းၵဝ်တၵ်းလႆႈဢဝ်လွင်ႈတၢင်းၼၼ်ႉဝႆႉၵိုတ်းဝႆႉၵျၢၼ်ႇပုၼ်ႈၵေႃႉဢၼ်တၵ်းပဵၼ်မႃးလိုၼ်းၵဝ်ၼၼ်ႉဢေႃႈ။
၁၉ လွင်ႈဢၼ်ၵေႃႉၼၼ်ႉတၵ်းမီးၺၢၼ်ႇႁိုဝ်၊တၵ်းမိူၵ်ႈႁိုဝ်ၼၼ်ႉၸိုင်ၽူႈလႂ်တၵ်းႁူႉလႆႈ။ၵေႃႉၼၼ်ႉတၵ်းလႆႈဢုပ်ႉပိူင်ႇၵႃႈဢၼ်ၵဝ်ၶတ်းၸႂ်ဢဝ်ႁႅင်းဢွၵ်ႇႁဵတ်းၼၼ်ႉလႂ်၊ၵႃႈဢၼ်ၵဝ်ၽုၺ်ႇဢွၵ်ႇၼႄပျႃးပိင်ႇၺႃႇၵဝ်ၵႃႈတီတႂ်ႈၵၢင်ဝၼ်းလႂ်ၸိူဝ်းၼၼ်ႉဢေႃႈ။
၂၀ လွင်ႈတၢင်းၼၼ်ႉၵေႃႈပဵၼ်ဢႃႉၼတ်ႉတႃႉဢေႃႈ။ပိူဝ်ႈၼႆလႄႈၵဝ်ဝၢႆႇၶိုၼ်းႁႂ်ႈလႆႈၵျၢမ်ႇပွင်ႁႂ်ႈႁူဝ်ၸႂ်ၵဝ်ယင်းဢမ်ႇမီးတၢင်းဢၼ်မုင်ႈထႃႈမွင်းထႃႈလႄႈၸႂ်လူႉလူၺ်ႈလွင်ႈၵႃႈဢၼ်ၵဝ်ၶတ်းၸႂ်ဢဝ်ႁႅင်းဢွၵ်ႇႁဵတ်းၼၼ်ႉဢေႃႈ။
၂၁ လွင်ႈမၼ်းၸမ်းပိၵ်ႉသမ်ႉပဵၼ်ၵေႃႉဢၼ်မီးၺၢၼ်ႇယူႇ၊တဵမ်ဝႆႉတင်းဢတၢတ်ႈတၢင်းႁူႉတၢင်းၸၢင်ႊယူႇ၊ပွင်ႁဵတ်းပွင်သၢင်ႈလီလီငၢမ်းငၢမ်းယူႇသေလႄႈၶတ်းၸႂ်ဢဝ်ႁႅင်းဢွၵ်ႇႁဵတ်းသေၵေႃႈတၵ်းလႆႈဢဝ်လွင်ႈတၢင်းၸိူဝ်းၼၼ်ႉဝႆႉၵိုတ်းဝႆႉၵျၢၼ်ႇပုၼ်ႈၵေႃႉဢၼ်ဢမ်ႇၶတ်းၸႂ်ဢမ်ႇဢဝ်ႁႅင်းဢွၵ်ႇႁဵတ်းၼၼ်ႉတၵ်းၶဝ်ႈၸၢမ်ႇၸႃးဢေႃႈ။လွင်ႈတၢင်းၼၼ်ႉၵေႃႈပဵၼ်လွင်ႈတၢင်းဢႃႉၼတ်ႉတႃႉ၊လွင်ႈတၢင်းဢၼ်ႁၢႆႉယုတ်ႈၼႃႇလူင်လၢင်ဢေႃႈ။
၂၂ ၼႂ်းလွင်ႈတၢင်းဢၼ်ၶတ်းၸႂ်ဢဝ်ႁႅင်းဢွၵ်ႇႁဵတ်းၼႂ်းလွင်ႈတၢင်းဢၼ်ၸႂ်ၸပ်းၸႂ်ၸွႆးၼႃႇလူင်လၢင်ၵႃႈတီႈတႂ်ႈၵၢင်ဝၼ်းၵူႈၸိူဝ်ႉၵူႈပိူင်ၼၼ်ႉၵူၼ်းႁဝ်းၼႆႉမီးဢၵျူဝ်းၵႃႈသင်။
၂၃ မိုဝ်ႉဝၼ်းမၼ်းတင်းသဵင်ႈတင်းလူင်ပဵၼ်တၢင်းဢၼ်မႆႈၸႂ်ၶီၸႂ်၊တၢင်းႁဵတ်းတၢင်းသၢင်ႈမၼ်းၵေႃႈပဵၼ်တၢင်းဢၼ်ယၢပ်ႇၸႂ်ၽိုတ်ႇၸႂ်ဢေႃႈ။လိူဝ်သေၼၼ်ႉၶိင်ႇၵၢင်ၶိုၼ်းၵေႃႈႁူဝ်ၸႂ်မၼ်းဢမ်ႇလႆႈတႄႇလႆႈၼိမ်။လွင်ႈတၢင်းၼၼ်ႉၵေႃႈပဵၼ်ဢႃႉၼတ်ႉတႃႉဢေႃႈ။
၂၄ ဢၶႂၢင်ႉဢၼ်လီပုၼ်ႈၵူၼ်းႁဝ်းလႄႈလိူဝ်တွၼ်းၼႃႇသေတၢင်းဢၼ်ၵိၼ်ဢၼ်ၶူပ်း၊တၢင်းဢၼ်ႁူဝ်ၸႂ်မူၼ်ႈပျေႃႇယူႇၵႃႈၼႂ်းတၢင်းဢၼ်ၶတ်းၸႂ်ဢဝ်ႁႅင်းဢွၵ်ႇႁဵတ်းၼၼ်ႉဢမ်ႇမီးသေၸိူဝ်ႉသေပိူင်။ဢၶႂၢင်ႉၼၼ်ႉၵေႃႈၵဝ်ႁူႉႁၼ်လွင်ႈဢၼ်ပဵၼ်မႃးတီႈမိုဝ်းၽြႃးပဵၼ်ၸဝ်ႈဢေႃႈ။
၂၅ ပေႃးဢၶႂၢင်ႉမၼ်းၸဝ်ႈဢမ်ႇမီးၸိုင်ၽူႈလႂ်တၵ်းၵိၼ်လႆႈ။ၽူႈလႂ်တၵ်းၸၢမ်ႇၸႃးလႆႈ။
၂၆ တီႈၵေႃႉဢၼ်ထုၵ်ႇၸႂ်ၵျိူၵ်ႈၸႂ်မၼ်းၸဝ်ႈၼၼ်ႉမၼ်းၸဝ်ႈပၼ်ၺၢၼ်ႇပိင်ႇၺႃႇ၊ဢတၢတ်ႈတၢင်းႁူႉတၢင်းၸၢင်ႊဢိၵ်ႇတင်းဢၶႂၢင်ႉတၢင်းဢၼ်ၸူမ်းသိူဝ်းဢေႃႈ။တီႈၵေႃႉဢၼ်မီးဢပျႅတ်ႈၼၼ်ႉၸမ်းမၼ်းၸဝ်ႈပၼ်ဢၶႂၢင်ႉဢၼ်လႆႈႁဵတ်းတၢင်းႁဵတ်းဢၼ်ယၢပ်ႇၸႂ်ၽိုတ်ႇၸႂ်ၼႃႇလူင်လၢင်ႁႂ်ႈလႆႈၵိပ်းႁွမ်ၸူႉသိမ်းဝႆႉပုၼ်ႈဢၼ်တၵ်းပဵၼ်တီႈၵေႃႉဢၼ်ထုၵ်ႇၸႂ်ၵျိူၵ်ႈၸႂ်ၽြႃးပဵၼ်ၸဝ်ႈၼၼ်ႉဢေႃႈ။လွင်ႈတၢင်းၼၼ်ႉၵေႃႈပဵၼ်လွင်ႈတၢင်းဢႃႉၼတ်ႉတႃႉလွင်ႈတၢင်းဢၼ်ၵိၼ်လူမ်းၵိၼ်လႅင်ႉၵူၺ်းဢေႃႈ။