၉
တၢင်းသူးတွင်းတၢၼ်ႇယေႇလ
၁ ၼႂ်းပီႊဢၼ်တႃႇရိလုၵ်ႈၸၢႆးဢႃႇသုၺ်ႇရမဵဝ်းလေႇဝိဢၼ်လႆႈဢုပ်ႉပိူင်ႇမိူင်းၶႃႇလတေႇၸၢမ်ႇႁၢင်ႈၸၢမ်ႇႁေႃပီႊပထမၼၼ်ႉၵဝ်တၢၼ်ႇယေႇလဢိင်ၵျၢမ်းလိၵ်ႈ
၂ ဢၼ်ပရေႃးၽိတ်ႈယေႇရမိလႆႈၶၢမ်ႇပျႃႇတိၵ်ႈထႃႇဝရႃႉၽြႃးလႄႈလူၺ်ႈလွင်ႈဢၼ်ဝႃႈတၢင်းလူႉလႅဝ်ဝဵင်းယေႇရုသလႅမ်ႇတၵ်းႁိုင်ၸဵတ်းပီႊၼၼ်ႉဢေႃႈ။
၃ ပိူဝ်ႈၼႆလႄႈၵဝ်ဝၢႆႇၼႃႈၵဝ်ၸူးတီႈၸဝ်ႈၽြႃးပဵၼ်ၸဝ်ႈႁႂ်ႈလႆႈပႃးတင်းဢၼ်ၵမ်တၢင်းၵိၼ်ယူႇ၊ၼုင်ႈၶူဝ်းၼုင်ႈၼင်ပေႃယူႇ၊ဢဝ်တဝ်ႈလုပ်ႉတႃးယူႇၼၼ်ႉသေလႄႈႁဵတ်းသူးတွင်းပထၼႃႇလဝ်ႈယွၼ်းဢေႃႈ။
၄ ၼင်ႇၼၼ်လႄႈၵဝ်ႁဵတ်းသူးတွင်းပထၼႃႇတီႈထႃႇဝရႃႉၽြႃးၽြႃးပဵၼ်ၸဝ်ႈၵဝ်ဝႃႈၸမ်း၊-ၸဝ်ႈႁဝ်းၽြႃးပဵၼ်ၸဝ်ႈဢၼ်ယႂ်ႇမျၢတ်ႈၼႃႇလူင်လၢင်လႄႈပဵၼ်ဢၼ်လီၵူဝ်လီႁႄ၊ဢၼ်သႅတ်ႉၸႃႇဢမ်ႇလူႉလႄႈပႂ်ႉၵရူႉၼႃႇတြႃးတီႈၶဝ်ၸိူဝ်းဢၼ်ႁၵ်ႉၸဝ်ႈႁဝ်းလႄႈပႂ်ႉပိင်းၺၢပ်ႈတြႃးၸဝ်ႈႁဝ်းၼၼ်ႉတီႈၶႃႈဢိူၺ်း။
၅ ၶႃႈၸဝ်ႈႁဝ်းၶဝ်ၽိတ်းပိူင်ႈလႄႈႁဵတ်းတူႉၸရိူၵ်ႈယဝ်ႉတီႈၶႃႈယဝ်ႉ။ယင်းဢမ်ႇၵမ်ၵျၢင်ႉၸွမ်းၼင်ႇတြႃးလႄႈပုင်ႇၵၢၼ်ႇယဝ်ႉ၊တီႈၶႃႈယဝ်ႉ။ပိူင်ႈသေၵႃႈတီႈပိင်းၺၢပ်ႈၸဝ်ႈႁဝ်းဢိၵ်ႇတင်းလွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉၸိူဝ်းၼၼ်ႉၵႂႃႇယဝ်ႉတီႈၶႃႈယဝ်ႉ။
၆ ယင်းဢမ်ႇထွမ်ႇဢဝ်ၵႂၢမ်းၶႃႈၸဝ်ႈႁဝ်းပရေႃးၽိတ်ႈတင်းလၢႆဢၼ်ဢိင်ၼႃႇမႃႉၸိုဝ်သဵင်ၸဝ်ႈႁဝ်းသေလႄႈႁေႃးလၢတ်ႈတီႈၶုၼ်ႁေႃၶမ်းၶႃႈၸဝ်ႈႁဝ်းၶဝ်၊မူးမၢတ်ႈၽွင်းမိူင်းၶႃႈၸဝ်ႈႁဝ်းၶဝ်၊ပူႇပေႃႈၶႃႈၸဝ်ႈႁဝ်းၶဝ်၊ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်လႄႈဢွၼ်ၵၼ်ယူႇသဝ်းတီႈၶႃႈယဝ်ႉ။
၇ ၸဝ်ႈၽြႃးတီႈၶႃႈ။တြႃးတၢင်းသိုဝ်ႈတေႃႇၸၢပ်ႈသႅင်ႇၵၼ်တင်းၸဝ်ႈႁဝ်းတီႈၶႃႈဢေႃႈ။တၢင်းဢၼ်ၼႃႈလူႉၸွမ်းၵႃႈၼင်ႇဢၼ်မီးဝၼ်းမိူဝ်ႈၼႆႉၼၼ်ႉၸၢပ်ႈသႅင်ႇၵၼ်တင်းၶႃႈၸဝ်ႈႁဝ်းၶဝ်ဢၼ်ဝႃႈၵူၼ်းယုတ၊ၵူၼ်းဝဵင်းယေႇရုသလႅမ်ႇ၊ၵူၼ်းဢိသရေႇလၵႃႈဢၼ်လႆႈယူႇၵႃႈတီႈဢၼ်ၸမ်ၵႃႈတီႈဢၼ်ၵႆ၊ၼႂ်းမိူင်းၵူႈတီႈၵူႈလႅၼ်ဢၼ်ၸဝ်ႈႁဝ်းႁေႃႈၶဝ်ဢွၵ်ႇၸူးၵွပ်ႈပိူဝ်ႈဢပျႅတ်ႈဢၼ်ၶဝ်ၽိတ်းပိူင်ႈၸဝ်ႈၸိူဝ်းၼၼ်ႉတီႈၶႃႈဢေႃႈ။
၈ ၸဝ်ႈၽြႃးတီႈၶႃႈ။တၢင်းဢၼ်ၼႃႈလူႉၸၢပ်ႈသႅင်ႇၵၼ်တင်းၶႃႈၸဝ်ႈႁဝ်းၶဝ်ဢၼ်ဝႃႈၶုၼ်ႁေႃၶမ်းၶႃႈၸဝ်ႈႁဝ်းၶဝ်၊မူးမၢတ်ႈၽွင်းမိူင်းၶႃႈၸဝ်ႈႁဝ်းၶဝ်၊ပူႇပေႃႈၶႃႈၸဝ်ႈႁဝ်းၶဝ်ၵွပ်ႈပိူဝ်ႈဢၼ်ၶႃႈၸဝ်ႈႁဝ်းၶဝ်ၽိတ်းပိူင်ႈၸဝ်ႈႁဝ်းၼၼ်ႉတီႈၶႃႈဢေႃႈ။
၉ ပိၵ်ႉသမ်ႉၶႃႈၸဝ်ႈႁဝ်းၶဝ်ပုင်ႇၵၢၼ်ႇၸဝ်ႈႁဝ်းယဝ်ႉသေၵေႃႈဢၶႂၢင်ႉတၢင်းဢၼ်ၼႄပျႃႉၵရူႉၼႃႇဢိၵ်ႇတင်းဢၶႂၢင်ႉဢၼ်ၽႄႇဢပျႅတ်ႈၸၢပ်ႈသႅင်ႇၵၼ်တင်းၸဝ်ႈၽြႃးပဵၼ်ၸဝ်ႈႁဝ်းၶႃႈတီႈၶႃႈဢေႃႈ။
၁၀ ၶႃႈၸဝ်ႈႁဝ်းၶဝ်ယင်းဢမ်ႇထွမ်ႇဢမ်ႇဢဝ်သဵင်ပျႃႇတိၵ်ႈထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈႁႂ်ႈလႆႈၸွမ်းသဵၼ်ႈတၢင်းပိင်းၺၢပ်ႈတြႃးဢၼ်ၸဝ်ႈႁဝ်းဢဝ်ၶႃႈၸဝ်ႈႁဝ်းပရေႃးၽိတ်ႈတင်းလၢႆဝႆႉတီႈၶႃႈၸဝ်ႈႁဝ်းၶဝ်ၼၼ်ႉလႄႈဢွၼ်ၵၼ်ယူႇယဝ်ႉတီႈၶႃႈယဝ်ႉ။
၁၁ ၵူၼ်းမဵဝ်းဢိသရေႇလတင်းသဵင်ႈတင်းလူင်ယင်းဢမ်ႇထွမ်ႇဢမ်ႇဢဝ်သဵင်ပျႃႇတိၵ်ႈၸဝ်ႈႁဝ်းလႄႈဢွၼ်ၵၼ်ပိူင်ႈၵႂႃႇလႄႈပူၼ်ႉလိူဝ်ပိင်းၺၢပ်ႈတြႃးၸဝ်ႈႁဝ်းတီႈၶႃႈယဝ်ႉ။ပိူဝ်ႈၼႆလႄႈၵွပ်ႈပိူဝ်ႈဢပျႅတ်ႈဢၼ်ၶႃႈၸဝ်ႈႁဝ်းၶဝ်ၽိတ်းပိူင်ႈၸဝ်ႈႁဝ်းၼၼ်ႉလႄႈၸဝ်ႈႁဝ်းဢဝ်တင်းဢၼ်တိူင်ႇဝႃႈဢၼ်ဝႃႈတၢင်းဢၼ်ၵိၼ်ႇဝႃႈဢၼ်တႅမ်ႈမၢႆဝႆႉၵႃႈၼႂ်းၵျၢမ်းလိၵ်ႈပိင်းၺၢပ်ႈတိမုဝ်းသေႇၶႃႈၽြႃးပဵၼ်ၸဝ်ႈၼၼ်ႉသွၼ်းလေႃႇၵႃႈၼိူဝ်ၶႃႈၸဝ်ႈႁဝ်းၶဝ်တီႈၶႃႈယဝ်ႉ။
၁၂ ၸဝ်ႈႁဝ်းႁႂ်ႈၵႂၢမ်းဢၼ်ၸဝ်ႈႁဝ်းမီးဢမိင်ႉယူႇၽၢႆႇၼိုင်ႈတင်းၵူၼ်းလူင်ဢၼ်ၸီႇယၢင်ႇတြႃးဢၼ်ဢုပ်ႉပိူင်ႇၵႃႈၼိူဝ်ၶႃႈၸဝ်ႈႁဝ်းၶဝ်ၸိူဝ်းၼၼ်ႉတႄႇပဵၼ်လႄႈႁႂ်ႈၽေးဢူးပၢတ်ႈဢၼ်ယႂ်ႇၼႃႇႁွတ်ႈထိုင်ၵႃႈၼိူဝ်ၶႃႈၸဝ်ႈႁဝ်းၶဝ်တီႈၶႃႈယဝ်ႉ။လွင်ႈမၼ်းၸမ်းၵႃႈတီႈတႂႃ်ႈႉၵၢင်ႁၢဝ်ၼႆႉၽေးဢူးပၢတ်ႈဢမ်ႇတွၼ်ႉႁွတ်ႈထိုင်ၵႃႈတီႈလႂ်သတေီႈၸိူဝ်ႉၼင်ႇဢၼ်ႁွတ်ႈထိုင်ၵႃႈတီႈဝဵင်းယေႇရုသလႅမ်ႇၼၼ်ႉတီႈၶႃႈ။
၁၃ ၸွမ်းၵႃႈၼင်ႇဢၼ်မၢတ်ႈမၢႆတႅမ်ႈဝႆႉၵႃႈၼႂ်းၵျၢမ်းလိၵ်ႈပိင်းၺၢပ်ႈတိမုဝ်းသေႇၼၼ်ႉသေလႄႈၽေးဢူးပၢတ်ႈၵႃႈမီးၼႆႉႁွတ်ႈထိုင်ၵႃႈၼိူဝ်ၶႃႈၸဝ်ႈႁဝ်းၶဝ်တီႈၶႃႈယဝ်ႉ။ၶႃႈၸဝ်ႈႁဝ်းၶဝ်ယင်းဢမ်ႇတွင်းပၢၼ်ႇတီႈထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈႁႂ်ႈလႆႈဝႄႈပႅတ်ႈတူႉၸရိူၵ်ႈတင်းလၢႆသေလႄႈထွမ်ႇဢဝ်ႁူႉၸႅင်ႈသမ်ႇမႃႇတြႃးၸဝ်ႈလႄႈဢွၼ်ၵၼ်ယူႇယဝ်ႉတီႈၶႃႈယဝ်ႉလူင်ပေႇ။
၁၄ ပိူဝ်ႈၼႆလႄႈထႃႇဝရႃႉၽြႃးပႂ်ႉၽေးဢူးပၢတ်ႈလႄႈႁႂ်ႈႁွတ်ႈထိုင်ၵႃႈၼိူဝ်ၶႃႈၸဝ်ႈႁဝ်းၶဝ်ယဝ်ႉတီႈၶႃႈယဝ်ႉ။ၵႃႈဢၼ်ထႃႇဝရႃႉၽြႃးၽြႃးပဵၼ်ၸဝ်ႈႁဝ်းၶႃႈႁဵတ်းၼၼ်ႉသိုဝ်ႈတေႃႇတီႈၶႃႈဢေႃႈ။ၶႃႈၸဝ်ႈႁဝ်းၶဝ်ယင်းဢမ်ႇထွမ်ႇဢမ်ႇဢဝ်သဵင်ပျႃႇတိၵ်ႈၸဝ်ႈလႄႈဢွၼ်ၵၼ်ယူႇယဝ်ႉတီႈၶႃႈလူင်ပေႇ။
၁၅ တေႃႈလဵဝ်ၼႆႉၸမ်းၸဝ်ႈၽြႃးပဵၼ်ၸဝ်ႈႁဝ်းၶႃႈဢၼ်ဢဝ်မိုဝ်းၸဝ်ႈဢၼ်တၼ်းၶူဝ်းယႂ်ႇၼႃႇၼၼ်ႉသေလႄႈၼုၵ်ႈဢဝ်ၵူၼ်းၸဝ်ႈႁဝ်းတင်းလၢႆဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးလႄႈႁႂ်ႈသရေႇၸဝ်ႈႁူင်ႁၢင်းယူႇမိူၼ်ၸိူဝ်ႉၼင်ႇဢၼ်မီးဝၼ်းမိူဝ်ႈၼႆႉၼၼ်ႉတီႈၶႃႈဢိူၺ်း။ၶႃႈၸဝ်ႈႁဝ်းၶဝ်ၽိတ်းပိူင်ႈယဝ်ႉတီႈၶႃႈယဝ်ႉ။ယင်းဢမ်ႇႁဵတ်းၸွမ်းၼင်ႇတြႃးလႄႈယူႇယဝ်ႉတီႈၶႃႈယဝ်ႉ။
၁၆ ၸဝ်ႈၽြႃးတီႈၶႃႈ။ၸွမ်းၵႃႈၼင်ႇဢၼ်တြႃးတၢင်းသိုဝ်ႈတေႃႇၸဝ်ႈႁဝ်းၵႃႈမီးၼၼ်ႉမီးဝႆႉၼၼ်ႉသေလႄႈၶႅၼ်းတေႃႈႁႂ်ႈတၢင်းၸႂ်မႆႈၶႆႈၸႃႉၸဝ်ႈႁဝ်းဢိၵ်ႇတင်းဢၢႆႁႅင်းတေႃးသႃႉၸဝ်ႈႁဝ်းဝႄႈပိူင်ႈသေၵႃႈတီႈဝဵင်းယေႇရုသလႅမ်ႇဢၼ်ဝႃႈလွႆဢၼ်မူတ်းၸၢင်ႇၸဝ်ႈၼၼ်ႉသေၵမ်းတီႈၶႃႈ။ၶႃႈၸဝ်ႈတွင်းပၢၼ်ႇတီႈၶႃႈဢေႃႈ။လွင်ႈမၼ်းၸမ်းၵွပ်ႈပိူဝ်ႈဢပျႅတ်ႈၶႃႈၸဝ်ႈႁဝ်းၶဝ်ဢိၵ်ႇတင်းဢပျႅတ်ႈပူႇမွၼ်ႇၶႃႈၸဝ်ႈႁဝ်းၸိူဝ်းၼၼ်ႉလႄႈဝဵင်းယေႇရုသလႅမ်ႇဢိၵ်ႇတင်းၵူၼ်းၸဝ်ႈႁဝ်းတင်းလၢႆၼႆႉပဵၼ်တီႈဢၼ်လီသေႉသွမ်းၵႃႈၼႂ်းၶဝ်ၵႃႈဢၼ်မီးၵႃႈတီႈႁိမ်းႁွမ်းလဵပ်ႈႁွပ်ႈၶႃႈၸဝ်ႈႁဝ်းၶဝ်ၸိူဝ်းၼၼ်ႉတီႈၶႃႈဢေႃႈ။
၁၇ မိူဝ်ႈလဵဝ်ၼႆႉၸမ်းၽြႃးပဵၼ်ၸဝ်ႈႁဝ်းၶႃႈတီႈၶႃႈ။ၶႅၼ်းတေႃႈထွမ်ႇဢဝ်ၵႂၢမ်းဢၼ်ၶႃႈၸဝ်ႈႁဝ်းသူးတွင်းႁဵတ်းပထၼႃႇၼႆႉလႄႈထွၵ်ႈလူၺ်ႈဢၵျူဝ်းၸဝ်ႈၽြႃးသေလႄႈႁႂ်ႈသၢႆဢရွင်ႇၼႃႈၸဝ်ႈႁဝ်းႁိူဝ်ႈႁိူင်းလႅင်းၵႃႈတီႈထႃႇၼႃႉတီႈမူတ်းၸၢင်ႇၸဝ်ႈဢၼ်မီးတၢင်းဢၼ်သိတ်ႇဢၼ်ယဵၼ်ယူႇၼၼ်ႉသေၵမ်းတီႈၶႃႈ။ၽြႃးပဵၼ်ၸဝ်ႈႁဝ်းၶႃႈတီႈၶႃႈ။
၁၈ ၶႅၼ်းတေႃႈႁႄႈႁူၸဝ်ႈႁဝ်းသေလႄႈလူတူၺ်းတီႈဢၼ်လူႉလႅဝ်ၶႃႈၸဝ်ႈႁဝ်းတင်းလၢႆဢိၵ်ႇတင်းဝဵင်းဢၼ်ႁွင်ႉႁိၵ်ႈၵူပ်းလူၺ်ႈၼႃႉမႃႉၸိုဝ်သဵင်ၸဝ်ႈႁဝ်းၼႆႉသေၵမ်းတီႈၶႃႈ။ၶႃႈၸဝ်ႈႁဝ်းၶဝ်ဢမ်ႇဢိင်ဢမ်ႇပိုင်ႈၵူႉသူဝ်တူဝ်ၸဝ်ႈၵဝ်ႇ။ဢိင်ပိုင်ႈမႁႃႇၵရူႉၼႃႇၸဝ်ႈႁဝ်းသေလႄႈဢဝ်ၵႂၢမ်းပထၼႃႇသၢၵ်ႈၵၢပ်ႈၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။
၁၉ ၸဝ်ႈၽြႃးတီႈၶႃႈၶႅၼ်းတေႃႈထွမ်ႇငိၼ်းသေၵမ်းတီႈၶႃႈ။ၸဝ်ႈၽြႃးတီႈၶႃႈ။ၶႅၼ်းတေႃႈပွႆႇလွတ်ႈဢပျႅတ်ႈသေၵမ်းတီႈၶႃႈ။ၸဝ်ႈၽြႃးတီႈၶႃႈ။ၶႅၼ်းတေႃႈထွမ်ႇဢဝ်လႄႈႁဵတ်းၸွမ်းသေၵမ်းတီႈၶႃႈ။ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ယႃႇပေႁဵတ်းၵွႆႈႁဵတ်းထိူင်းပုၼ်ႈၸဝ်ႈႁဝ်းသေၵမ်းတီႈၶႃႈ။ဝဵင်းၸဝ်ႈႁဝ်းဢိၵ်ႇတင်းၵူၼ်းၸဝ်ႈႁဝ်းၸိူဝ်းၼႆႉမီးတၢင်းဢၼ်ႁွင်ႉႁိၵ်ႈၵူပ်းလူၺ်ႈၼႃႇမႃႉၸိုဝ်သဵင်ၸဝ်ႈႁဝ်းၶႃႈတီႈၶႃႈဢေႃႈ၊ဝႃႈၼင်ႇၼႆဢေႃႈ။
ၸဵတ်းသိပ်းပၢတ်ႈ
၂၀ ၼႂ်းမိူဝ်ႈဢၼ်ၵဝ်ယင်းတိုၵ်ႉဢွၵ်ႇသူပ်းႁဵတ်းသူးတွင်းပထၼႃႇလႄႈၽုၺ်ႇၼႄတွင်းပၢၼ်ႇဢပျႅတ်ႈၵဝ်ဢိၵ်ႇတင်းဢပျႅတ်ႈၵူၼ်းမဵဝ်းၵဝ်ၵူၼ်းမဵဝ်းဢိသရေႇလတင်းလၢႆယူႇ၊ဢဝ်ၵႂၢမ်းပထၼႃႇဢၼ်ၵဝ်ႁဵတ်းပုၼ်ႈလွႆဢၼ်မူတ်းၸၢင်ႇၽြႃးပဵၼ်ၸဝ်ႈဢၼ်ၵဝ်ၵူဝ်းၵႂၢႆႇၼၼ်ႉသၢၵ်ႈၵၢပ်ႈၵႃႈတီႈၽၢႆႇၼႃႈထႃႇဝရႃႉၽြႃးၽြႃးပဵၼ်ၸဝ်ႈၵဝ်ယူႇ၊
၂၁ ၼႂ်းၸူဝ်ႈဢၼ်ႁဵတ်းတၢင်းဢၼ်သူးတွင်းၼၼ်ႉဢမ်ႇပႆႇယဝ်ႉပႆႇတူဝ်ႈလႄႈယင်းတိုၵ်ႉဢွၵ်ႇသူပ်းဝႃႈယူႇၼၼ်ႉၸိုင်ၵႃႇပေႇလၵေႃႉဢၼ်ၵဝ်လႆႈႁၼ်ၵႃႈၼႂ်းပျႃႇတိၵ်ႈရူႇပႃႇရုင်ႇမိူဝ်ႈဢွၼ်တၢင်းၼၼ်ႉသမ်ႉလႆႈႁိပ်ႈၼႅတ်ႈၶိုၼ်းမႃးၶၼ်ၶၼ်ၽႂ်းၽႂ်းလႄႈႁွတ်ႈထိုင်ၵႃႈတီႈၵဝ်ၶိင်ႇမိူဝ်ႈဢၼ်ပုၵ်ႉၸေႃႇၶိင်ႇႁူဝ်ၶမ်ႈၼၼ်ႉလႄႈတၵ်းလၢတ်ႈၵဝ်သေလႄႈဝႃႈ၊-
၂၂ တၢၼ်ႇယေႇလဢိူၺ်း။ၵဝ်ဢွၵ်ႇမႃးႁႂ်ႈလႆႈႁႂ်ႈၺၢၼ်ႇပိင်ႇၺႃႇယႂ်ႇၽႄႈတူဝ်းတွၼ်းမႃးတီႈမႂ်းယဝ်ႉ။မိူဝ်ႈဢၼ်မႂ်းၸင်ႇၸႃႉႁဵတ်းသူးတွင်းပထၼႃႇၼၼ်ႉၸိုင်ဢမိင်ႉၸဝ်ႈမီးလႄႈၵဝ်ႁွတ်ႈမႃးႁႂ်ႈလႆႈမွၵ်ႇလၢတ်ႈတီႈမႂ်းယဝ်ႉ။
၂၃ မႂ်းၼႆႉပဵၼ်ၵေႃႉဢၼ်လီႁၵ်ႉလီပႅင်းၼႃႇလူင်လၢင်ဢေႃႈ။ပိူဝ်ႈၼႆလႄႈၶႆႈၸႂ်ဝူၼ်ႉၸႂ်လူၺ်ႈလွင်ႈၼၼ်ႉလႄႈႁူႉၸႅင်ႈပျႃႇတိၵ်ႈရူႇပႃႇရုင်ႇၼၼ်ႉတႃႉ။
၂၄ မီးတၢင်းဢၼ်တႅပ်းတတ်းၸီႇယၢင်ႇၸဵတ်းသိပ်းပၢတ်ႈဝႆႉပုၼ်ႈၵူၼ်းမဵဝ်းလဵဝ်ၵၼ်တင်းမႂ်းဢိၵ်ႇတင်းဝဵင်းဢၼ်မူတ်းၸၢင်ႇမႂ်းႁႂ်ႈလႆႈႁႄႉၶႅၼ်လွင်ႈတၢင်းဢၼ်ပူၼ်ႉလိူဝ်လႄႈတွၵ်ႇတၼ်းသိၵ်ႈဢပျႅတ်ႈဢိၵ်ႇတင်းႁႂ်ႈလႆႈၽႄႇဢပျႅတ်ႈတူႉၸရိူၵ်ႈလႄႈဢဝ်တၢင်းသိုဝ်ႈတေႃႇထႃႇဝရႃႉသႂၢင်းၶဝ်ႈတင်းႁႂ်ႈလႆႈတွၵ်ႇတၼ်းသိၵ်ႈပျႃႇတိၵ်ႈရူႇပႃႇရုင်ႇဢိၵ်ႇတင်းပျႃႇတိၵ်ႈဢၼႃႇၵၢတ်ႉတိၸဝ်ႈလႄႈလုပ်ႉတႃးထႃႇၼႃႉတီႈမူတ်းၸၢင်ႇသေပိူၼ်ႈၼၼ်ႉဢေႃႈ။
၂၅ ပိူဝ်ႈၼႆလႄႈႁူႉၸႅင်ႈမၢတ်ႈတွင်းလွင်ႈဢၼ်ဢဝ်ၸႃႉၸဵမ်ဝၼ်းဢၼ်ဢမိင်ႉၸဝ်ႈပူင်ႁႂ်ႈလႆႈသမ်ႉၶိုၼ်းတႄႇႁဵတ်းၵုမ်းမႄးဝဵင်းယေႇရုသလႅမ်ႇၼၼ်ႉၵႂႃႇတေႃထိုင်ႁွတ်ႈၸဝ်ႈဢၼ်ၶၢမ်ႇၽိၵ်ႈသိၵ်ႈမင်ႇၵလႃႇဢၼ်ဝႃႈၶုၼ်ၼၼ်ႉတၵ်းႁွတ်ႈမႃးၼၼ်ႉတၵ်းႁိုင်ၸဵတ်းသတၢင်းၼၼ်ႉဝႆႉတႃႉ။ၼႂ်းႁူၵ်းသိပ်းပၢႆသွင်ပၢတ်ႈတဵမ်တဵမ်တၵ်းလႆႈတႄႇႁဵတ်းမႄးၵုမ်းဝဵင်းပႃးလူၺ်ႈၵၼ်တင်းသဵၼ်ႈတၢင်းဢၼ်ၵႂၢင်ႈဢၼ်ၵႅပ်ႈၸိူဝ်းၼၼ်ႉၼႂ်းၶိင်ႇၵႃႇလႃႉဢၼ်လႆႈၶၢမ်ႇတၢင်းဢၼ်ယႃႉယူၵ်ႉၼၼ်ႉဢေႃႈ။
၂၆ ပူၼ်ႉသေႁူၵ်းသိပ်းသွင်သတၢင်းၼၼ်ႉသေယဝ်ႉၸဝ်ႈဢၼ်ၶၢမ်ႇၽိၵ်ႈသိၵ်ႈမင်ႇၵလႃႇၼၼ်ႉတၵ်းလႆႈၶၢမ်ႇတၢင်းဢၼ်ဢဝ်တၢႆလႄႈဢမ်ႇမီးၸဝ်ႈမီးၸွမ်တီႈၵူၼ်းတင်းလၢႆ။လိုၼ်းၼၼ်ႉၵူၼ်းၶုၼ်ဢၼ်တၵ်းမႃးၸိူဝ်းၼၼ်ႉတၵ်းဢွၼ်ၵၼ်ၵိူၼ်ႇယႃႉဝဵင်းၸဝ်ႈဢိၵ်ႇတင်းထႃႇၼႃႉတီႈမူတ်းၸၢင်ႇၸဝ်ႈၼၼ်ႉပႅတ်ႈဢေႃႈ။တီႈသုတ်းမၼ်းတၵ်းပဵၼ်တၢင်းဢၼ်သုမ်းၸွမ်းလူၺ်ႈတၢင်းဢၼ်ၼမ်ႉထူမ်ႈႁူမ်ႇပႅတ်ႈလႄႈတၵ်းမီးတၢင်းဢၼ်တိုၵ်းသိုၵ်းတေႃႇထိုင်ႁွတ်ႈတီႈသုတ်း၊တၢင်းဢၼ်ၸီႇယၢင်ႇတႅပ်းတတ်းဢၼ်ၸၢပ်ႈသဵင်ႇၵၼ်တင်းဢၼ်လူႉလႅဝ်ၼၼ်ႉဢေႃႈ။
၂၇ မၼ်းတၵ်းႁဵတ်းပတိၺိၼ်ႇဢၼ်မၼ်ႈၶိူင်ႇလူၺ်ႈၵၼ်တင်းၵူၼ်းၼမ်ၼႃႇပုၼ်ႈသတၢင်းၼိုင်ႈလႄႈႁႂ်ႈတၢင်းဢၼ်ပုၵ်ႉၸေႃႇယိၸ်ႉဢိၵ်ႇတင်းတၢင်းဢၼ်သၢၵ်ႈၵၢပ်ႈၼၼ်ႉႁၢႆလၢႆၵႂႃႇပုၼ်ႈၶိုင်ႈသတၢင်းၼိုင်ႈဢေႃႈ။ၵေႃႉဢၼ်ယႃႉပႅတ်ႈၼၼ်ႉတၵ်းႁွတ်ႈထိုင်ၵႃႈၼိူဝ်ၸိၵ်းလွင်ႈတၢင်းဢၼ်လီႁင်ႈဢဵတ်ႇသဵၼ်ႇၼၼ်ႉလႄႈတၢင်းဢၼ်ထွၵ်ႇႁိုဝ်တေႃးသႃႉတၢင်းၸႂ်မႆႈသႂ်ႇၵႃႈၼိူဝ်ၵေႃႉဢၼ်ယႃႉပႅတ်ႈၼၼ်ႉတၵ်းလႆႈမီးယူႇတေႃႇထိုင်ႁွတ်ႈတၢင်းဢၼ်ဢမူႉဢၼ်တႅပ်းတတ်းၸီႇယၢင်ႇဝႆႉၼၼ်ႉယဝ်ႉယဝ်ႉၼၼ်ႉဢေႃႈ၊ဝႃႈၼင်ႇၼႆဢေႃႈ။