၁
တၢၼ်ႇယေႇလသွၼ်တီႈပႃႇပုလုၼ်ႇ
၁ ၼႂ်းပီႊဢၼ်ယေႃႇယၵိမ်ႇၶုၼ်ႁေႃၶမ်းယုတၸၢမ်ႇႁၢင်ႈၸၢမ်ႇႁေႃပီႊတတိယၼၼ်ႉၼေႇပုၶတ်ႉၼေႇၸႃႇၶုၼ်ႁေႃၶမ်းပႃႇပုလုၼ်ႇၶီႇသိုၵ်းမႃးၵႃႈတီႈဝဵင်းယေႇရုသလႅမ်ႇလႄႈလွမ်ႉဝဵင်းဝႆႉဢေႃႈ။
၂ ထႃႇဝရႃႉၽြႃးဢဝ်ယေႃႇယၵိမ်ႇဢိၵ်ႇတင်းၶိူင်ႈပိူင်ပိၵ်ႉမၢၼ်ႇၸဝ်ႈၵမ်ႈၽွင်ႈဢၢပ်ႈပၼ်ၵႃႈၼႂ်းမိုဝ်းမၼ်းၼၼ်ႉလႄႈမၼ်းဢဝ်ၸိူဝ်းၼၼ်ႉၵႂႃႇၵႃႈတီႈၵျွင်းၽြႃးမၼ်းဢၼ်မီးၵႃႈၼႂ်းဝဵင်းသိၼႃႇၼၼ်ႉသေလႄႈသႂၢင်းသႂ်ႇဝႆႉၵႃႈၼႂ်းတိူၵ်ႈၽၼ်ႇတႃႇၽြႃးမၼ်းဢေႃႈ။
၃မိူဝ်ႈၼၼ်ႉၶုၼ်ႁေႃၶမ်းႁွင်ႉဢဝ်ဢႃႇသပေႇၼတ်ႉၵေႃႉဢၼ်လႆႈဢုပ်ႉၵႃႈၼိူဝ်ၵူၼ်းထိင်းၼၢင်းၼၼ်ႉလႄႈမီးဢမိင်ႉႁႂ်ႈမၼ်းလိူၵ်ႈၵဵပ်းဢဝ်ၵႃႈၼႂ်းၸိူဝ်ႉၶိူဝ်းၶုၼ်ဢိၵ်ႇတင်းၵႃႈၼႂ်းမူးမၢတ်ႈၽွင်းမိူင်းမဵဝ်းဢိသရေႇလၼၼ်ႉၵမ်ႈၽွင်ႈ၊ဢၼ်ဝႃႈၽူႈမၢဝ်ႇဢၼ်ၵၢင်းလွတ်ႈတင်းလၵ်ၶၼႃႇဢၼ်ဢမ်ႇလီလႄႈ
၄ မီးႁၢင်ႊၽၢင်ဢၼ်ႁၢင်ႊလီႁၢင်ႊငၢမ်းဢၼ်ၸၢင်ႊမေႃတၢင်းၵတ်ႉတၢင်းၶၼ်ယူႇ၊ၸၢပ်ႈလူၺ်ႈၺၢၼ်ႇဢၼ်လီယူႇ၊ၸၵ်းၽႄႁူႉဢတၢတ်ႈပိင်ႇၺႃႇၵူႈၸိူဝ်ႉၵူႈပိူင်သေလႄႈတတ်ႈၼိုင်ႇလႆႈႁႂ်ႈလႆႈၸုၵ်းၶႃးၸႃးယူႇၵႃႈၼႂ်းႁေႃၸဝ်ႈၸိူဝ်းၼၼ်ႉမႃးႁႂ်ႈသွၼ်ဢဝ်တၢင်းၸၢင်ႊတၢင်းမေႃဢိၵ်ႇတင်းၵႂၢမ်းၽႃႇသႃႇၶႃႇလတေႇၼၼ်ႉဢေႃႈ။
၅ ၶုၼ်ႁေႃၶမ်းၸီႇယၢင်ႇဝႆႉႁႂ်ႈဢဝ်ပုၼ်ႈတႃႇယေႈဝၼ်းယေႈဝၼ်းၵႃႈၼႂ်းတၢင်းၵိၼ်တၢင်းၶူပ်းၶုၼ်ႁေႃၶမ်းဢိၵ်ႇတင်းၵႃႈၼႂ်းၼမ်ႉၸပိတ်ႈဢၼ်ၶုၼ်ၼၼ်ႉသူတ်ႉၵိၼ်ၼၼ်ႉပၼ်တီႈၶဝ်ၵူႈဝၼ်းလႄႈလဵင်ႉလူၶဝ်သၢမ်ပီႊသေယဝ်ႉႁႂ်ႈၶဝ်လႆႈၸုၵ်းၶႃးၸႃးယူႇၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
၆ ၼႂ်းၶဝ်ၼၼ်ႉပႃးတၢၼ်ႇယေႇလ၊ႁႃႇၼၼိ၊မိသေႇလ၊ဢႃႇၸရိဢၼ်ပဵၼ်ၵူၼ်းမဵဝ်းယုတဢေႃႈ။ၵေႃႉဢၼ်လႆႈဢုပ်ႉၵႃႈၼိူဝ်ၵူၼ်းထိင်းၼၢင်းၼၼ်ႉတၢင်ႇၸိုဝ်ပၼ်သဵင်တီႈၶဝ်ၼၼ်ႉလႄႈ
၇ တၢၼ်ႇယေႇလၸိုင်လႆႈၸိုဝ်ပေႇလတသႃႇၸႃႇ၊ႁႃႇၼၼိလႆႈၸိုဝ်သႃႇတရိၵ်ႉမိသေႇလလႆႈၸိုဝ်မေႇသိၵ်ႉ၊ဢႃႇၸရိလႆႈၸိုဝ်ဢႃႇပေႇတၼေႇၵေႃႇဢေႃႈ။
၈ တၢၼ်ႇယေႇလၸမ်းမီးတၢင်းၵျၢမ်ႇတၢင်းပွင်တၵ်းဢမ်ႇႁႂ်ႈတူဝ်ၸဝ်ႈၵဝ်ႇၵူဝ်ႈၵိူၵ်ႇလူၺ်ႈတၢင်းၵိၼ်တၢင်းၶူပ်းၶုၼ်ႁေႃၶမ်းဢိၵ်ႇတင်းၼမ်ႉၸပိတ်ႉဢၼ်ၶုၼ်သူတၵ်းၵိၼ်ၼၼ်ႉၵူဝ်ႈၵိူၵ်ႇဝႃႈၼႆလႄႈယွၼ်းဢၶႂၢင်ႉတီႈၵေႃႉဢၼ်လႆႈဢုပ်ႉၵႃႈၼိူဝ်ၵူၼ်းထိင်းၼၢၼ်းၼၼ်ႉႁႂ်ႈတူဝ်မၼ်းဢမ်ႇလႆႈၵူဝ်ႈၵိူၵ်ႇဢေႃႈ။
၉ ပိၵ်ႉသမ်ႉၽြႃးပဵၼ်ၸဝ်ႈပွင်ႁဵတ်းပွင်မႄးႁႂ်ႈတၢၼ်ႇယေႇလလႆႈထူပ်းၵျေးၸူးဢိၵ်ႇတင်းတၢင်းဢၼ်ႁၵ်ႉဢိတ်းလူသိုဝ်ႈၼႃႈတႂ်ႈတႃၵေႃႉဢၼ်လႆႈဢုပ်ႉၵႃႈၼိူဝ်ၵူၼ်းထိင်းၼၢင်းၼၼ်ႉသေၵေႃႈၵေႃႉဢၼ်လႆႈဢုပ်ႉၵႃႈၼိူဝ်ၵူၼ်းထိင်းၼၢင်းၼၼ်ႉလၢတ်ႈတီႈတၢၼ်ႇယေႇလလႄႈဝႃႈ၊-ၵဝ်ၵူဝ်ႈႁႄၸဝ်ႈၵဝ်ၶုၼ်ႁေႃၶမ်းဢၼ်ၸီႇယၢင်ႇဝႆႉတၢင်းၵိၼ်တၢင်းၶူပ်းသူၼၼ်ႉဢေႃႈ။
၁၀ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမၼ်းၸဝ်ႈတၵ်းလႆႈႁၼ်ၼႃႈသူပဵၼ်ဢၼ်ႁၢင်ႊၸႃႉႁၢင်ႊႁၢႆႉလိူဝ်တွၼ်းၼႃႇသေႇၽူႈမၢဝ်ႇဢၼ်ဢသၢၵ်ႈဢရွႆႇတၢၼ်ႇပဵင်းၵၼ်တင်းသူၼၼ်ႉၼင်ႇႁိုဝ်။ပေႃးပဵၼ်ၸိူဝ်ႉၼင်ႇၼၼ်ၸိုင်သူတၵ်းႁႂ်ႈၵွၵ်းႁူဝ်ၵဝ်ၼႆႉပဵၼ်ဢၼ်ယေႃႇဢၼ်သေပုၼ်ႈသူတီႈၶုၼ်ႁေႃၶမ်းဢေႃႈ၊ဝႃႈၼင်ႇၼႆဢေႃႈ။
၁၁ မိူဝ်ႈၼၼ်ႉတၢၼ်ႇယေႇလလၢတ်ႈတီႈၸတေႃႇၵႄးၵေႃႉဢၼ်လႆႈဢုပ်ႉၵႃႈၼိူ်ဝ်ၵူၼ်းထိင်းၼၢၼ်းဢၼ်ၶၢၼ်းဝႆႉႁႂ်ႈလူတူၺ်းတၢၼ်ႇယေႇလ၊ႁႃႇၼၼိ၊မိသေႇလ၊ဢႃႇၸရိၸိူဝ်းၼၼ်ႉၼၼ်ႉလႄႈဝႃႈ၊-
၁၂
ၸၢမ်းတူၺ်းၶႃႈၸဝ်ႈႁဝ်းၸိူဝ်းၼႆႉသိပ်းဝၼ်းတဵမ်တဵမ်လႄႈႁႂ်ႈၶဝ်ပၼ်ၽၵ်းယိူဝ်ႈၽၵ်းၶဵဝ်ဢိၵ်ႇတင်းၼမ်ႉၵူၺ်းပုၼ်ႈ
၁၃ ဢၼ်ႁဝ်းၶႃႈတၵ်းၵိၼ်သေၵမ်း။လိုၼ်းၼၼ်ႉႁႂ်ႈၸႅတ်ႈတူၺ်းၼႃႈႁဝ်းၶႃႈတင်းၼႃႈၽူႈမၢဝ်ႇဢၼ်ၵိၼ်တၢင်းၵိၼ်တၢင်းၶူပ်းၶုၼ်ႁေႃၶမ်းၸိူဝ်းၼၼ်ႉၵႃႈတီႈၽၢႆႇၼႃႈၸဝ်ႈႁဝ်းသေၵမ်း။
၁၄ ၶႅၼ်းတေႃႈၸီႇယၢင်ႇတီႈၶႃႈၸဝ်ႈႁဝ်းၸိူဝ်းၼႆႉၸွမ်းၵႃႈၼင်ႇဢၼ်ၸဝ်ႈႁဝ်းႁၼ်ၼၼ်ႉသေၵမ်း၊ဝႃႈၼင်ႇၼႆသေယဝ်ႉမၼ်းၼၼ်ႉႁပ်ႉတုင်းဢဝ်လွင်ႈတၢင်းၼၼ်ႉလႄႈၸၢမ်းတူၺ်းၶဝ်သိပ်းဝၼ်းဢေႃႈ။
၁၅ ၸေးသိပ်းဝၼ်းသေယဝ်ႉၼႃႈၶဝ်ၼၼ်ႉယိင်ႈၶႅၼ်းပဵၼ်ဢၼ်ႁၢင်ႊလီလႄႈပီးလီမၼ်းလီလိူဝ်တွၼ်းၼႃႇသေၼႃႈၽူႈမၢဝ်ႇဢၼ်ၵိၼ်တၢင်းၵိၼ်တၢင်းၶူပ်းၶုၼ်ႁေႃၶမ်းၸိူဝ်းၼၼ်ႉဢေႃႈ။
၁၆ မိူဝ်ႈၼၼ်ႉၸတေႃႇၵႄးၼၼ်ႉၼုၵ်ႈသိမ်းဢဝ်တၢင်းၵိၼ်တၢင်းၶူပ်းၶဝ်ဢိၵ်ႇတင်းၼမ်ႉၸပိတ်ႈပုၼ်ႈဢၼ်ၶဝ်တၵ်းၵိၼ်ၼၼ်ႉလႄႈဢဝ်ၽၵ်းယိူဝ်ႈၽၵ်းၶဵဝ်ၵုၺ်းလဵင်ႉလူၶဝ်ဢေႃႈ။
၁၇ ၽြႃးပဵၼ်ၸဝ်ႈဢိတ်းလူပၼ်တၢင်းၵတ်ႉတၢင်းၶၼ်ဢိၵ်ႇပႃးၺၢၼ်ႇဢၼ်ၶုတ်းမူင်ႇၸီးၸွင်ႇလႄႈႁူႉဢတၢတ်ႈပိင်ႇၺႃႇဢၼ်လၢၵ်ႇလၢႆးၵူႈၸိူဝ်ႉၵူႈပိူင်လႆႈၼၼ်ႉတီႈၵူၼ်းဢွၼ်ႇသီႇၵေႃႉၼၼ်ႉဢေႃႈ။
၁၈ တၢၼ်ႇယေႇလၵေႃႈတဵမ်ဝႆႉတင်းၺၢၼ်ႇဢၼ်ႁူႉပျႃႇတိၵ်ႈရူႇပႃႇရုင်ႇဢိၵ်ႇတင်းတၢင်းဢၼ်ၼွၼ်းၽၼ်ႁၼ်တင်းလၢႆလႆႈၼၼ်ႉဢေႃႈ။မိူဝ်ႈဢၼ်မိုဝ်ႉဝၼ်းဢၼ်ၶုၼ်ႁေႃၶမ်းၶၢၼ်းဝႆႉႁႂ်ႈလႆႈဢဝ်ၶဝ်သႂၢင်းၶဝ်ႈၵႃႈၼႂ်းၶုၼ်ႁေႃၶမ်းၼၼ်ႉၸေးယဝ်ႉၼၼ်ႉၸိုင်ၵေႃႉဢၼ်ဢုပ်ႈၵႃႈၼိူဝ်ၵူၼ်းထိင်းၼၢင်းၼၼ်ႉႁွင်ႉဢဝ်ၵူၼ်းဢွၼ်ႇၸိူဝ်းၼၼ်ႉသႂၢင်းၶဝ်ႈၵႃႈတီႈၽၢႆႇၼႃႈၼေႇပုၶတ်ႉၼေႇၸႃႇဢေႃႈ။
၁၉ ၶုၼ်ႁေႃၶမ်းတိူင်ႇပၢင်ႇတွင်ႈထၢမ်ၵၼ်တင်းၶဝ်ၼၼ်ႉသေယဝ်ႉၵေႃႉဢၼ်မိူၼ်ႈၵၼ်တင်းတၢၼ်ႇယေႇလ၊ႁႃႇၼၼိ၊မိသေႇလ၊ဢႃႇၸရိၼၼ်ႉဢမ်ႇမီးၵႃႈၼႂ်းၶဝ်တင်းသဵင်ႈတင်းလူင်ၼၼ်ႉသေၵေႃႉသေၵူၼ်း။ပိူဝ်ႈၼႆလႄႈၶဝ်လႆႈဢရႃႇဢၼ်ၸုၵ်းၶႃးၸႃးယူႇၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
၂၀ ၼႂ်းလွင်ႈတၢင်းဢၼ်ၸၢပ်ႈသႅင်ႇၵၼ်တင်းဢတၢတ်ႈပိင်ႇၺႃႇၵႃႈဢၼ်ၶုၼ်ႁေႃၶမ်းတွင်ႈထၢမ်လူၺ်ႈလွင်ႈမၼ်းတၢင်းမၼ်းတီႈၶဝ်ၼၼ်ႉမၼ်းထူပ်းႁၼ်လွင်ႈဢၼ်ၶဝ်ၼၼ်ႉယိင်ႈၶႅၼ်းၸၢင်ႊမေႃလိူဝ်တွၼ်းၼႃႇသေမႃႇၵူႉပိင်ႇၺႃႇသိဢိၵ်ႇတင်းမေႃပေႇတၢင်ႇၵႃႈဢၼ်မီးၵႃႈၼႂ်းမိူင်းၸဝ်ႈၵူႈတီႈၵူႈလႅၼ်ၼၼ်ႉသိပ်းပုၼ်ႈၼၼ်ႉဢေႃႈ။
၂၁ တၢၼ်ႇယေႇလၼၼ်ႉမီးယူႇတေႃႇထိုင်ႁွတ်ႈၶုၼ်လူင်ၸၢမ်ႇႁၢင်ႈၸၢမ်ႇႁေႃပီႊပထမႃႉၼၼ်ႉဢေႃႈ။