၅
လိၵ်ႈတႅမ်ႈၼိူဝ်ၽု
၁ ၽဝ်ႇၼိုင်ႈၶုၼ်လူင်ပေႇလသႃႇၸႃႇၶၢမ်ႇပွႆးဢၼ်ယႂ်ႇၼႃႇလူင်လၢင်ပုၼ်ႈမူးမၢတ်ႈၽွင်းမိူင်းႁဵင်ၼိုင်ႈလႄႈသူတ်ႉၵိၼ်ၼမ်ႉၸပိတ်ႈၵႃႈတီႈၽၢႆႇၼႃႈၶဝ်ႁဵင်ၼိုင်ႈၼၼ်ႉဢေႃႈ။
၂ ၶုၼ်ပေႇလသႃႇၸႃႇၼၼ်ႉၼႂ်းမိူဝ်ႈဢၼ်မၼ်းယင်းတိုၵ်ႉၸိမ်းတူၺ်းၼမ်ႉၸပိတ်ႈယူႇၼၼ်ႉၸိုင်မၼ်းမီးဢမိင်ႉႁႂ်ႈဢဝ်ၵွၵ်းၶမ်းၵွၵ်းငိုၼ်းဢၼ်ၸဝ်ႈပေႃႈမၼ်းၼေႇပုၶတ်ႉၼေႇၸႃႇႁိမ်ဢဝ်ၵႃႈၼႂ်းပိၵ်ႉမၢၼ်ႇဝဵင်းယေႇရုသလႅမ်ႇမႃးၸိူဝ်းၼၼ်ႉဢေႃႈ။
၃ မၼ်းႁႂ်ႈတူဝ်မၼ်းဢိၵ်ႇတင်းမူးမၢတ်ႈၽွင်းမိူင်းမၼ်း၊ၼၢင်းႁေႃၶမ်းမၼ်း၊ၸိူင်ႉၼၢင်းမၼ်းတင်းလၢႆလႆႈဢဝ်သူတ်ႉၵိၼ်လႄႈၶဝ်ၵေႃႈဢွၼ်ၵၼ်ဢဝ်ၵွၵ်းၶမ်းဢၼ်သိမ်းဢဝ်သေၵႃႈၼႂ်းတိူၵ်ႈၽၼ်ႇတႃႇပိၵ်ႉမၢၼ်ႇၽြႃးပဵၼ်ၸဝ်ႈဝဵင်းယေႇရုသလႅမ်ႇမႃးၸိူဝ်းၼၼ်ႉလႄႈသူတ်ႉၵိၼ်ဢေႃႈ။ၶုၼ်လူင်၊မူးမၢတ်ႈၽွင်းမိူင်း၊ၼၢင်းႁေႃၶမ်း၊ၸိူင်ႉၼၢင်းၸိူဝ်းၼၼ်ႉဢွၼ်ၵၼ်ဢဝ်သူတ်ႉၵိၼ်ဢေႃႈ။
၄ ၶဝ်ၼၼ်ႉဢွၼ်ၵၼ်သူတ်ႉၵိၼ်ၼမ်ႉၸပိတ်ႈသေလႄႈယွင်ႈယေႃးၽြႃးၶမ်း၊ၽြႃးငိုၼ်း၊ၽြႃးတွင်းလိူင်၊ၽြႃးလဵၵ်း၊ၽြႃးမႆႉ၊ၽြႃးမၢၵ်ႇႁိၼ်တင်းလၢႆၸိူဝ်းၼၼ်ႉဢေႃႈ။
၅ ၼႂ်းၶိင်ႇမိူဝ်ႈၼၼ်ႉၵမ်းလဵဝ်ၼိဝ်ႉမိုဝ်းၵူၼ်းပေႃႇမႃးလႄႈတႅမ်ႈတူဝ်လိၵ်ႈဢႅၵ်ႉၶရႃႇတၢင်ႇသႂ်ႇဝႆႉၵႃႈတီႈဢၢင်းၵတေႇၽႃႇဢုတ်ႇႁေႃၶမ်းၶုၼ်လူင်ၵႃႈၼိူဝ်ၶူင်ႇတီႈတႆႈၽႆးၼၼ်ႉဢေႃႈ။
၆ ၼင်ႇၼၼ်လႄႈၶုၼ်ႁေႃၶမ်းႁၼ်ပၢႆမိုဝ်းဢၼ်တႅမ်ႈဝႆႉၸိူဝ်ႉၼင်ႇၼၼ်ၼၼ်ႉသေယဝ်ႉၼႃႈမၼ်းႁဵဝ်ႇၸွပ်ႈၵႂႃႇလႄႈမၼ်းႁွတ်ႈထိုင်တၢင်းဢၼ်မႆႈၸႂ်ႁွၼ်ႉၸႂ်သေလႄႈမီးတၢင်းဢၼ်ပဵၼ်ၸိူဝ်ႉၼင်ႇဢႅဝ်မၼ်းႁၢမ်ႉတၵ်းပုတ်းတၵ်းၶၢတ်ႇၵႂႃႇလႄႈႁူဝ်ၶဝ်ႇမၼ်းၼင်ႇၵၼ်ၵၼ်တုမ်ႉၵၼ်လေႃႇၵၼ်ယူႇဢေႃႈ။
၇ ၵမ်းၼၼ်ႉၶုၼ်လူင်ႁွင်ႉသႅၼ်ႇလႄႈဝႃႈ၊-ႁွင်ႉဢဝ်မေႃပေႇတၢင်ႇ၊သြႃႇၶႃႇလတေႇ၊သြႃႇဢၼႃႇၵၢတ်ႉတိတင်းလၢႆမႃးတႃႉ၊ဝႃႈၼင်ႇၼႆသေယဝ်ႉၶုၼ်လူင်မီးဢမိင်ႉတီႈပိင်ႇၺႃႇသိမိူင်းပႃႇပုလုၼ်ႇၸိူဝ်းၼၼ်ႉလႄႈဝႃႈ၊-ႁႂ်ႈၵေႃႉဢၼ်ၽတ်းလိၵ်ႈၼႆႉလႄႈၽုၺ်ႇဢွၵ်ႇၼႄပျႃႉဢထိၵ်ႈပေႇမၼ်းတီႈၵဝ်ၼၼ်ႉလႆႈၶၢမ်ႇတၢင်းဢၼ်ဢဝ်ၶူဝ်းဢၼ်လႅင်ႊၵမ်ႇၼုင်ႈမႆႊပၼ်လႄႈဢဝ်ၸရွႆႇၶမ်းႁွႆႈသႂ်ႇပၼ်ၵႃႈတီႈၶေႃးမၼ်းသေလႄႈပဵၼ်ၶုၼ်တတိယၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈသေ၊ဝႃႈၼင်ႇၼႆဢေႃႈ။
၈ ပိၵ်ႉသမ်ႉပိင်ႇၺႃႇသိၶုၼ်လူင်တင်းသဵင်ႈတင်းလူင်ဢွၼ်ၵၼ်ႁွတ်ႈမႃးသေၵေႃႈၶဝ်ဢမ်ႇဢွၼ်ၵၼ်ၽတ်းလိၵ်ႈၼၼ်ႉလႆႈ၊ဢမ်ႇႁေႃးလၢတ်ႈဢၼၢၵ်ႈဢထိၵ်ႈပေႇမၼ်းတီႈၶုၼ်ႁေႃၶမ်းလႆႈ။
၉ မိူဝ်ႈၼၼ်ႉၶုၼ်လူင်ပေႇလသႃႇၸႃႇၼၼ်ႉမီးတၢင်းဢၼ်မႆႈၸႂ်ႁွၼ်ႉၸႂ်၊တၢင်းဢၼ်ၼႃႈႁဵဝ်ႇၸွပ်ႈယူႇလႄႈမူးမၢတ်ႈၽွင်းမိူင်းမၼ်းတင်းလၢႆဢွၼ်ၵၼ်ၵႂင်ၸႂ်ယုင်ႈၸႂ်ယူႇဢေႃႈ။
၁၀ မိူဝ်ႈၼၼ်ႉၼၢင်းႁေႃၶမ်းႁူႉငိၼ်းၵႂၢမ်းၶုၼ်ႁေႃၶမ်းဢိၵ်ႇတင်းၵႂၢမ်းမူးမၢတ်ႈၽွင်းမိူင်းမၼ်းၸိူဝ်းၼၼ်ႉသေယဝ်ႉၶဝ်ႈၸူးၵႃၼႂ်းပွႆးၸဝ်ႈလႄႈၼၢင်းႁေႃၶမ်းၼၼ်ႉလဝ်ႈလၢတ်ႈလႄႈဝႃႈ၊-ၸဝ်ႈၶုၼ်လူင်တီႈၶႃႈ။ႁႂ်ႈဢသၢၵ်ႈၸဝ်ႈလိပ်းယူႇတႃႇသေႇမၼ်ႈၶိူင်ႇသေၵမ်းလူၺ်ႈ။
၁၁ ယႃႇပေႇမီးတၢင်းဢၼ်မႆႈၸႂ်ႁွၼ်ႉၸႂ်သေၵမ်းၶႃႈ။ၵူၼ်းဢၼ်တဵမ်ဝႆႉတင်းဝိၺိၺ်ႇၽြႃးဢၼ်မူတ်းၸၢင်ႇတင်းလၢႆၼၼ်ႉၵေႃႉၼိုင်ႈမီးယူႇၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈႁဝ်းယူႇဢေႃႈ။ၼႂ်းၸူဝ်ႈပၢၼ်ၸဝ်ႈပေႃႈၸဝ်ႈႁဝ်းၼၼ်ႉလႆႈထူပ်းတၢင်းၵတ်ႉတၢင်းၶၼ်ၺၢၼ်ႇပိင်ႇၺႃႇဢၼ်မိူၼ်ၸိူဝ်ႉၼင်ႇပိင်ႇၺႃႇၽြႃးတင်းလၢႆၼၼ်ႉၵႃႈၼႂ်းၵူၼ်းၵေႃႉၼၼ်ႉၶႃႈဢေႃႈ။ၸဝ်ႈပေႃႈၸဝ်ႈႁဝ်းၼေႇပုၶတ်ႉၼေႇၸႃႇဢဝ်ၵေႃႉၼၼ်ႉၶၢၼ်းဝႆႉႁႂ်ႈပဵၼ်ၵေႃႉဢၼ်ဢုပ်ႉၵႃႈၼိူဝ်မႃႇၵူႉပိင်ႇၺႃႇသိ၊မေႃပေႇတၢင်ႇ၊သြႃႇၶႃႇလတေႇ၊သြႃႇဢၼႃႇၵၢတ်ႉတိတင်းလၢႆၶႃႈဢေႃႈ။
၁၂ လွင်ႈမၼ်းၸမ်းလၢႆႈထူပ်းၸႂ်ဝိၺိၺ်ႇဢၼ်လၢၵ်ႇလၢႆးဢိၵ်ႇတင်းၺၢၼ်ႇပိင်ႇၺႃႇ၊တၢင်းဢၼ်မွၵ်ႇလၢတ်ႈဢၼၢၵ်ႈတၢင်းဢၼ်ၽၼ်ႁၼ်၊တၢင်းဢၼ်ၽုၺ်ႇဢွၵ်ႇၼႄပျႃးလွင်ႈတၢင်းဢၼ်လိုၵ်ႉလမ်ႇယၢပ်ႇၽိုတ်ႇတၢင်းဢၼ်တၢင်းဢၼ်ၵႄႈလိတ်ႈပုၵ်ႉသႃႇတၢင်းဢၼ်တွင်ႈဢၼ်ထၢမ်ၼၼ်ႉၵႃႈၼႂ်းၵေႃႉၼၼ်ႉဢၼ်ဝႃႈတၢၼ်ႇယေႇလဢၼ်ၶုၼ်ႁေႃၶမ်းၼၼ်ႉဢိတ်းလူပၼ်ၸိုဝ်ပၼ်သဵင်ပေႇလတၸႃႇသႃႇၼၼ်ႉတီႈၶႃႈဢေႃႈ။ပေႃးၸဝ်ႈႁဝ်းႁွင်ႉတၢၼ်ႇယေႇလၸိုင်မၼ်းတၵ်းၽုၺ်ႇဢွၵ်ႇၼႄပျႃႉဢၼၢၵ်ႈမၼ်းလႆႈတီႈၶႃႈဢေႃႈ၊ဝႃႈၼင်ႇၼႆလႄႈတၢၼ်ႇယေႇလၵေႃႈလႆႈၶၢမ်ႇတၢင်းဢၼ်ႁွင်ႉသႂၢင်းၶဝ်ႈၸူးၵႃႈတီႈၶုၼ်ႁေႃၶမ်းဢေႃႈ။
၁၃ ၶုၼ်ႁေႃၶမ်းထၢမ်တီႈတၢၼ်ႇယေႇလလႄႈဝႃႈ၊-မႂ်းၸႂ်ႈတၢၼ်ႇယေႇလဢၼ်ၶဝ်ႈပႃးၼႂ်းမုၵ်ႉၵူၼ်းၸိူဝ်းၵူၼ်းယုတဢၼ်ၸဝ်ႈပေႃႈၵဝ်ၶုၼ်ႁေႃၶမ်းသိမ်းဢဝ်ဢွၵ်ႇသေၵႃႈၼႂ်းမိူင်းယုတမႃးၸိူဝ်းၼၼ်ႉႁိုဝ်။
၁၄ ၵဝ်ငိၼ်းသတၢင်းသဵင်ၶၢဝ်ႇမႂ်းလွင်ႈဢၼ်မႂ်းမီးဝႆႉတင်းဝိၺိၺ်ႇၽြႃးတင်းလၢႆဢိၵ်ႇတင်းလွင်ႈဢၼ်လႆႈထူပ်းတၢင်းၵတ်ႉတၢင်းၶၼ်ၺၢၼ်ႇပိင်ႇၺႃႇဢၼ်လၢၵ်ႇလၢႆးၵႃႈၼႂ်းမႂ်းၼၼ်ႉယဝ်ႉ။
၁၅ ပိၵ်ႉသမ်ႉဢဝ်မေႃပေႇတၢင်ႇဢိၵ်ႇတင်းပိင်ႇၺႃႇသိတင်းလၢႆမႃးသႂၢင်းၶဝ်ႈတီႈၵဝ်ႁႂ်ႈၶဝ်ၽတ်းလိၵ်ႈၼၼ်ႉလႄႈၽုၺ်ႇဢွၵ်ႇၼႄပျႃးဢၼၢၵ်ႈမၼ်းတီႈၵဝ်သေၵေႃႈၶဝ်ၼၼ်ႉဢမ်ႇဢွၼ်ၵၼ်ၽုၺ်ႇဢွၵ်ႇၼႄပျႃႉဢၼၢၵ်ႈမၼ်းလႆႈ။
၁၆ ၵဝ်လႆႈငိၼ်းလွင်ႈဢၼ်မႂ်းၽုၺ်ႇဢွၵ်ႇၼႄပျႃႉဢၼၢၵ်ႈတင်းလၢႆလႄႈၵႄႈလိတ်ႈပုၵ်ႉသႃႇတၢင်းဢၼ်တွင်ႈထၢမ်တင်းလၢႆၼၼ်ႉယဝ်ႉ။ပေႃးမႂ်းၽတ်းလိၵ်ႈၼၼ်ႉလႄႈၽုၺ်ႇဢွၵ်ႇၼႄပျႃႉဢၼၢၵ်ႈမၼ်းတီႈၵဝ်လႆႈၸိုင်မႂ်းတၵ်းလႆႈၶၢမ်ႇတၢင်းဢၼ်ဢဝ်ၶူဝ်းဢၼ်လႅင်ႊၵမ်ႇၼုင်ႈမႆႊပၼ်လႄႈဢဝ်ၸရွႆႇၶမ်းႁွႆႈသႂ်ႇပၼ်တီႈၶေႃးသေလႄႈပဵၼ်ၶုၼ်တတိယၵႃႈၼႂ်းသိုင်ႇၸိုင်ႈဝၢၼ်ႈမိူ်င်းၸဝ်ႈဢေႃႈ၊ဝႃႈၼင်ႇၼႆဢေႃႈ။
၁၇ တၢၼ်ႇယေႇလၵေႃႈလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ႁႂ်ႈသူးလၢပ်ႈၸဝ်ႈၼၼ်ႉမီးတီႈၸဝ်ႈႁဝ်းသေၵမ်းတီႈၶႃႈ။ဢဝ်လွင်ႈတၢင်းဢၼ်ၶႆႈပၼ်ၸိူဝ်းၼၼ်ႉပၼ်တီႈပိူၼ်ႈတၢင်ႇၵေႃႉသေၵမ်းတီႈၶႃႈ။ၵူၺ်းၵႃႈၶႃႈၸဝ်ႈတၵ်းၽတ်းလိၵ်ႈၼၼ်ႉတီႈၸဝ်ႈၶုၼ်လူင်လႄႈၽုၺ်ႇဢွၵ်ႇၼႄပျႃႉဢၼၢၵ်ႈမၼ်းတီႈၸဝ်ႈႁဝ်းတီႈၶႃႈဢေႃႈ။
၁၈ ၸဝ်ႈၶုၼ်လူင်တီႈၶႃႈ။ၽြႃးပဵၼ်ၸဝ်ႈဢၼ်သုင်ၼႃသေပိူၼ်ႈၼၼ်ႉဢိတ်းလူပၼ်သိုင်ႇၸိုင်ႈဝၢၼ်မိူင်းၸဝ်ႈဢိၵ်ႇတင်းမုၼ်ၽုင်းၶမ်းၸဝ်ႈၵုင်ႇသရေႇၸဝ်ႈတင်းဢႃႇၼူႉၽေႃႇၸဝ်ႈတီႈၸဝ်ႈပေႃႈၸဝ်ႈႁဝ်းၶုၼ်လူင်ၼေႇပုၶတ်ႉၼေႇၸႃႇၼၼ်ႉတီႈၶႃႈဢေႃႈ။
၁၉ ၵွပ်ႈပိူဝ်ႈမုၼ်ၽုင်းၶမ်းၸဝ်ႈဢၼ်မၼ်းၸဝ်ႈဢိတ်းလူပၼ်ၼၼ်ႉလႄႈၵူၼ်းၵူႈၸိူဝ်ႉၵူႈမဵဝ်းဢၼ်လၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းတင်းသဵင်ႈတင်းလူင်ၼၼ်ႉဢွၼ်ၵၼ်ၵူဝ်ႁႄသၼ်ႇဝႆယူႇၵႃႈတီႈၽၢႆႇၼႃႈမၼ်းၸဝ်ႈတီႈၶႃႈဢေႃႈ။မၼ်းၸဝ်ႈဢဝ်ၶဝ်ၸိူဝ်းဢၼ်မၼ်းၸဝ်ႈၶႂ်ႈဢဝ်တၢႆၼၼ်ႉတၢႆလႄႈႁႂ်ႈၶဝ်ၸိူဝ်းဢၼ်မၼ်းၸဝ်ႈၶႂ်ႈႁႂ်ႈဢသၢၵ်ႈလိပ်းၼၼ်ႉဢသၢၵ်ႈလိပ်းယူႇတီႈၶႃႈဢေႃႈ။မၼ်းၸဝ်ႈဢဝ်ၶဝ်ၸိူဝ်းဢၼ်မၼ်းၸဝ်ႈၶႂ်ႈယုၵ်ႉယွင်ႈၼၼ်ႉယုၵ်ႉယွင်ႈလႄႈဢဝ်ၶဝ်ၸိူဝ်းဢၼ်မၼ်းၸဝ်ႈၶႂ်ႈၶျႃးတူၵ်းတီႈတႅမ်ႇၼၼ်ႉၶျႃးတူၵ်းတီႈတႅမ်ႇတီႈၶႃႈဢေႃႈ။
၂၀ မိူဝ်ႈဢၼ်မၼ်းၸဝ်ႈမီးၸႂ်မၢၼ်ႇမႃႇၼႃႉလႄႈမီးတၢင်းဢၼ်ၸႂ်ၵႅၼ်ႇၸႂ်ၶႅင်ထၼ်ႈပေႃးႁဵတ်းဢမ်ႇပေႃးၼင်ႇႁိုဝ်တီႈပိူၼ်ႈၼၼ်ႉၸိုင်မၼ်းၸဝ်ႈလႆႈၶၢမ်ႇတၢင်းဢၼ်ဢဝ်တူၵ်းလူင်းသေၵႃႈၼိူဝ်ႁေႃၶမ်းလႄႈမုၼ်ၽုင်းတၼ်းၶူဝ်းမၼ်းၸဝ်ႈလပ်ႉႁၢႆၵႂႃႇတီႈၶႃႈဢေႃႈ။
၂၁ မၼ်းတၵ်းၶၢမ်ႇတၢင်းဢၼ်ႁေႃႈဢွၵ်ႇပႅတ်ႈသေၵႃႈၼႂ်းမုၵ်ႉၵူၼ်းၸိူဝ်းၵူၼ်းလႄႈတဵမ်ဝႆႉတင်းသၽေႃးတရိၵ်ႈသၢၼ်ႇတီႈၶႃႈဢေႃႈ။မၼ်းၸဝ်ႈတူၵ်းတီႈယူႇတီႈသဝ်းလူၺ်ႈၵၼ်တင်းလီႈဢၼ်ရိူင်းတင်းလၢႆယူႇ၊ၵိၼ်ယိူဝ်ႈၵိၼ်ယႃႈမိူၼ်ၸိူဝ်ႉၼင်ႇဝူဝ်းၼၼ်ႉယူႇသေလႄႈတူဝ်မၼ်းၸဝ်ႈလႆႈၶၢမ်ႇတၢင်းဢၼ်ယမ်းၽူၼ်ယမ်းၼၢႆးယူႇတေႃႇထိုင်ႁွတ်ႈမၼ်းၸဝ်ႈႁူႉၸႅင်ႈလွင်ႈဢၼ်ၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉဢုပ်ႉပိူင်ႇမိူင်းလေႃးၵီႇလႄႈဢၢပ်ႈပၼ်တီႈၵေႃႉဢၼ်မၼ်းၸဝ်ႈမီးဢလူဝ်ႇၶႂ်ႈပၼ်ၼၼ်ႉတီႈၶႃႈဢေႃႈ။
၂၂ ပေႇလသႃႇၸႃႇဢၼ်ပဵၼ်လုၵ်ႈၸၢႆးမၼ်းၸဝ်ႈၼၼ်ႉတီႈၶႃႈ။ပိၵ်ႉသမ်ႉၸဝ်ႈႁဝ်းႁူႉလွင်ႈတၢင်းၼၼ်ႉၵူႈၸိူဝ်ႉၵူႈပိူင်သေၵေႃႈၸဝ်ႈႁဝ်းယင်းဢမ်ႇၶျႃးႁူဝ်ၸႂ်ၸဝ်ႈႁဝ်းတူၵ်းတီႈတႅမ်ႇလႄႈႁဵတ်းၶတ်းၵၼ်တင်းၸဝ်ႈၽုင်ႇၵၢင်ႁၢဝ်ယူႇသေလႄႈႁႂ်ႈဢဝ်ၵွၵ်းပိၵ်ႉမၢၼ်ႇမၼ်းၸဝ်ႈၸိူဝ်းၼၼ်ႉမႃးသႂၢင်းၶဝ်ႈၵႃႈတီႈၽၢႆႇၼႃႈၸဝ်ႈႁဝ်းလႄႈတူဝ်ၸဝ်ႈႁဝ်းဢိၵ်ႇတင်းမူးမၢတ်ႈၽွင်းမိူင်းၸဝ်ႈႁဝ်းၼၢင်းႁေႃၶမ်းၸဝ်ႈႁဝ်းၸိူင်ႉၼၢင်းၸဝ်ႈႁဝ်းၸိူဝ်းၼၼ်ႉဢွၼ်ၵၼ်ဢဝ်ၵွၵ်းၸိူဝ်းၼၼ်ႉသူတ်ႉၵိၼ်ၼမ်ႉၸပိတ်ႈလႄႈ
၂၃ ဢွၼ်ၵၼ်ယွင်ႈယေႃးၽြႃးငိုၼ်း၊ၽြႃးၶမ်း၊ၽြႃးတွင်းလိူင်၊ၽြႃးလဵၵ်း၊ၽြႃးမႆႉ၊ၽြႃးမၢၵ်ႇႁိၼ်ဢၼ်မၢၵ်ႇတႃဢမ်ႇႁၼ်၊ႁူဢမ်ႇငိၼ်း၊ဢမ်ႇႁူႉၵႃႈသင်လႃးလႃးၸိူဝ်းၼၼ်ႉသေလႄႈယင်းဢမ်ႇယွင်ႈယေႃးၽြႃးပဵၼ်ၸဝ်ႈဢၼ်ဢုပ်ႉပိူင်ႇဢသၢၵ်ႈတၢင်းဢၼ်ထူၺ်ႈၸႂ်ၶဝ်ထူၺ်ႈၸႂ်ဢွၵ်ႇၸဝ်ႈႁဝ်း၊ဢၼ်ၸီႇယၢင်ႇသဵၼ်ႈတၢင်းၵႃႈဢၼ်ၸဝ်ႈႁဝ်းၸွမ်းၼၼ်ႉလႄႈယူႇယဝ်ႉတီႈၶႃႈလူင်ပေႇ။
၂၄ ပိူဝ်ႈၼႆလႄႈၸဝ်ႈၼၼ်ႉပွႆႇၸႂ်ႉပၢႆမိုဝ်းမၼ်းၼၼ်ႉမႃးလႄႈတႅမ်ႈလိၵ်ႈၼၼ်ႉဝႆႉတီႈၶႃႈဢေႃႈ။
၂၅ ၵႂၢမ်းလိၵ်ႈဢၼ်တႅမ်ႈဝႆႉၼၼ်ႉဝႃႈၸမ်း၊မေႇၼေႇ၊မေႇၼေႇ၊တေႇၵလ၊ဢုၽႃႇၸႅၼ်ႇ၊ဝႃႈၼင်ႇၼႆတီႈၶႃႈဢေႃႈ။
၂၆ ဢၼၢၵ်ႈဢထိၵ်ႈပေႇဢၼ်ဝႃႈမေႇၼေႇၼၼ်ႉၸမ်းၽြႃးပဵၼ်ၸဝ်ႈၼပ်ႉဢၢၼ်ႇသိုင်ႇၸိုင်ႈဝၢၼ်ႈမိူင်းၸဝ်ႈႁဝ်းလႄႈႁႂ်ႈမၼ်းသုတ်းၵႂႃႇၵွႆၵႂႃႇတီႈၶႃႈဢေႃႈ။
၂၇ ဢၼၢၵ်ႈဢထိၵ်ႈပေႇဢၼ်ဝႃႈတေႇၵလၼၼ်ႉၸမ်းမၼ်းၸဝ်ႈဢဝ်ယႃႇၸူႇၸင်ႈႁိဝ်ႈၸဝ်ႈႁဝ်းလႄႈထူပ်းႁၼ်လွင်ႈဢၼ်ၸဝ်ႈႁဝ်းယွမ်းၵႂႃႇၼၼ်ႉတီႈၶႃႈဢေႃႈ။
၂၈ ဢၼၢၵ်ႈဢထိၵ်ႈပေႇဢၼ်ဝႃႈၽေႇရိတ်ႉၼၼ်ႉၸမ်းမၼ်းၸဝ်ႈၽႄဢဝ်သိုင်ႇၸိုင်ႈဝၢၼ်ႈမိူင်းၸဝ်ႈႁဝ်းလႄႈဢၢပ်ႈပၼ်တီႈၵူၼ်းမေႇတိ၊ၵူၼ်းပေႇရသိၸိူဝ်းၼၼ်ႉတီႈၶႃႈဢေႃႈ၊ဝႃႈၼင်ႇၼႆဢေႃႈ။
၂၉ မိူဝ်ႈၼၼ်ႉၶုၼ်လူင်ပေႇလသႃႇၸႃႇမီးဢမိင်ႉလႄႈၶဝ်ဢွၼ်ၵၼ်ဢဝ်ၶူဝ်းဢၼ်လႅင်ႊၵမ်ႇၼုင်ႈမႆပၼ်တၢၼ်ႇယေႇလလႄႈဢဝ်ၸရွႆႇၶမ်းႁွႆႈသႂ်ႇပၼ်ၵႃႈတီႈၶေႃးမၼ်းသေယဝ်ႉဢဝ်လွင်ႈမၼ်းႁွင်ႉပၢဝ်ႇႁွင်ႉသေႃႇလူၺ်ႈလွင်ႈဢၼ်မၼ်းပဵၼ်ၶုၼ်တတိယၵႃႈၼႂ်းသိုင်ႇၸိုင်ႈဝၢၼ်ႈမိူင်းၸဝ်ႈၼၼ်ႉဢေႃႈ။
၃၀ ၼႂ်းၶိုၼ်းၼၼ်ႉၵမ်းလဵဝ်ပေႇလသႃႇၸႃႇၶုၼ်ႁေႃၶမ်းၶႃႇလတေႇၼၼ်ႉသုမ်းဢသၢၵ်ႈလႄႈၶုၼ်တႃႇရိမဵဝ်းမေႇတိၼၼ်ႉသိမ်းဢဝ်သိုင်ႇၸိုင်ႈဝၢၼ်ႈမိူင်းၸဝ်ႈၼၼ်ႉၼႂ်းပီႊဢၼ်ဢသၢၵ်ႈမၼ်းလႆႈႁူၵ်းသိပ်းပၢႆသွင်ပီႊၼၼ်ႉဢေႃႈ။