၄
တူၼ်ႈမႆႉ
၁ ၵဝ်ၶုၼ်လူင်ၼေႇပုၶတ်ႉၼေႇၸႃႇသင်ႇလၢတ်ႈၵႂႃႇတီႈၵူၼ်းၵူႈၸိူဝ်ႉၵူႈမဵဝ်းဢၼ်ယူႇၵူႈတီႈၵူႈလႅၼ်ၵႃႈၼိူဝ်ၼႃႈလိၼ်မိူင်းတင်းၼႃႈလႄႈလၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းတင်းသဵင်ႈတင်းလူင်ၼၼ်ႉဢေႃႈ။ႁႂ်ႈတၢင်းဢၼ်ၼိမ်ဢၼ်လီၵတ်းယဵၼ်ၶျၢမ်းသႃႇမီးၼမ်ၼႃႇတီႈသူသေၵမ်းလူၺ်ႈ။
၂ ၵဝ်မီးဢလူဝ်ႇၶႂ်ႈမွၵ်ႇလၢတ်ႈၼႄပျႃႉၼီႈမိၵ်ႈလၵ်ႉၶၼႃႇလွင်ႈတၢင်းဢၼ်လီဢၢမ်းဢၼ်ၽြႃးပဵၼ်ၸဝ်ႈဢၼ်မျၢတ်ႈသုင်ၼႃႇသေပိူၼ်ႈၼၼ်ႉႁဵတ်းတီႈၵဝ်ၼၼ်ႉဢေႃႈ။
၃ ၼီႈမိၵ်ႈလၵ်ႉၶၼႃႇမၼ်းၸဝ်ႈၸိူဝ်းၼၼ်ႉပဵၼ်ဢၼ်ယႂ်ႇၼႃႇလူင်လၢင်လႄႈလွင်ႈတၢင်းဢၼ်လီဢၢမ်းမၼ်းၸဝ်ႈၸိူဝ်းၼၼ်ႉၵေႃႈတဵမ်ဝႆႉတင်းတၼ်းၶူဝ်းဢေႃႈ။မိူင်းမၼ်းၸဝ်ႈၼၼ်ႉပဵၼ်မိူင်းထႃႇဝရႃႉလႄႈဢႃႇၼႃႇၸၢၵ်ႈမၼ်းၸဝ်ႈၵေႃႈတႄႇယူႇၵမႃ်ႇႇသိုပ်ႇသိုပ်ႇတၢမ်ႈတၢမ်ႈဢေႃႈ။
၄ ၵဝ်ၼေႇပုၶတ်ႉၼေႇၸႃႇၼႆႉယူႇတဵတ်ႇလီၼိမ်လီယူႇၵႃႈၼႂ်းႁၢင်ႈၼႂ်းႁေႃၵဝ်လႄႈၸေးၸိမ်ႇယႂ်ႇၼႃႇၵႃႈၼႂ်းႁေႃၶမ်းၵဝ်ယူႇလႄႈၽၼ်ႁၼ်တၢင်းဢၼ်ၽၼ်ႁၼ်ဢၼ်ႁႂ်ႈၵဝ်ၵူဝ်ႁႄၼၼ်ႉလႄႈ
၅ တၢင်းဢၼ်ၵဝ်ၶႆႈၸႂ်ဝူၼ်ႉၸႂ်ယူႇၵႃႈၼိူဝ်ၵူႇတီႈၼွၼ်းတင်းလၢႆဢိၵ်ႇတင်းရူႇပႃႇရုင်ႇဢၼ်ပေႃႇမႃးၵႃႈၼႂ်းၵွၵ်းႁူဝ်ၵဝ်ၸိူဝ်းၼၼ်ႉႁႂ်ႈၵဝ်ႁွတ်ႈထိုင်တၢင်းဢၼ်သၼ်ႇဝႆၶွၼ်းၶဝ်ႇယူႇဢေႃႈ။
၆ ပိူဝ်ႈၼႆလႄႈၵဝ်ပူင်ဢမိင်ႉႁႂ်ႈဢဝ်ပိင်ႇၺႃႇသိပႃႇပုလုၼ်ႇၵႃႈမီးသႂၢင်းၶဝ်ႈၵႃႈတီႈၵဝ်ဢေႃႈ။
၇ မိူဝ်ႈၼၼ်ႉမႃႇၵူႉပိင်ႇၺႃႇသိ၊မေႃပေႇတၢင်ႇ၊သြႃႇၶႃႇလတေႇ၊သြႃႇဢၼႃႇၵၢတ်ႉတိတင်းလၢႆဢွၼ်ၵၼ်ၶဝ်ႈမႃးလႄႈၵဝ်ၶိုၼ်းလၢတ်ႈတၢင်းဢၼ်ၽၼ်ႁၼ်ဢၼ်ၵဝ်ၽၼ်ႁၼ်ၼၼ်ႉတီႈၶဝ်ဢေႃႈ။ၵူၺ်းၵႃႈၶဝ်ၼၼ်ႉဢမ်ႇၽုၺ်ႇဢွၵ်ႇၼႄပျႃႉဢၼၢၵ်ႈမၼ်းလႆႈ။
၈ လိုၼ်းသုတ်းပိူၼ်ႈၼၼ်ႉတၢၼ်ႇယေႇလဢၼ်လႆႈၸိုဝ်လႆႈသဵင်ပေႇလတသႃႇၸႃႇၸွမ်းလူၺ်ႈၼႃႇမႃႉၸိုဝ်ႈသဵင်ၽြႃးဢၼ်ၵဝ်ၵူဝ်းၵႂၢႆႇၼၼ်ႉလႄႈတဵမ်ဝႆႉတင်းဝိၺိၺ်ႇၽြႃးဢၼ်မူတ်းၸၢင်ႇတင်းလၢႆၼၼ်ႉၶဝ်ႈမႃးတီႈၵဝ်လႄႈၵဝ်ၶိုၼ်းလၢတ်ႈတၢင်းဢၼ်ၵဝ်ၽၼ်ႁၼ်ၼၼ်ႉၵႃႈတီႈၽၢႆႇၼႃႈမၼ်းလႄႈဝႃႈ၊-
၉ ပေႇလတသႃႇၸႃႇဢၼ်ဢုပ်ႉၵႃႈၼိူဝ်မႃႇၵူႉပိင်ႇၺႃႇသိတင်းလၢႆၼႆႉဢိူၺ်း။ၵဝ်ႁူႉလွင်ႈဢၼ်မႂ်းမီးဝႆႉတင်းဝိၺိၺ်ႇၽြႃးဢၼ်မူတ်းၸၢင်ႇတင်းလၢႆၼၼ်ႉလႄႈလွင်ႈတၢင်းဢၼ်လိုၵ်ႉဢၼ်လမ်ႇၵႃႈမီးဢၼ်ပဵၼ်ဢၼ်ယၢပ်ႇၽိုတ်ႇၸႂ်မႂ်းသေၸိူဝ်ႉသပေိူင်ၼၼ်ႉယူႇဢေႃႈ။ပိူဝ်ႈၼႆလႄႈၽုၺ်ႇဢွၵ်ႇၼႄပျႃႉရူႇပႃႇရုင်ႇတၢင်းၽၼ်ႁၼ်ဢၼ်ၵဝ်လႆႈၽၼ်ႁၼ်ၼၼ်ႉဢိၵ်ႇတင်းဢၼၢၵ်ႈမၼ်းတႃႉ။
၁၀ ရူႇပႃႇရုင်ႇဢၼ်ပေႃႇမႃးၵႃႈၼႂ်းၵွၵ်းႁူဝ်ၵဝ်ၵႃႈၼိူဝ်ၵူႇတီႈၼွၼ်းၵဝ်ၼၼ်ႉၸမ်းၵဝ်လူတူၺ်းလႄႈမီးတူၼ်ႈမႆႉတူၼ်ႈၼိုင်ႈၵႃႈတီႈၶိုင်ႈၵၢင်လိၼ်မိူင်းတၢင်းသုင်မၼ်းပဵၼ်ဢၼ်သုင်ၼႃႇဢေႃႈ။
၁၁ တူၼ်ႈၼၼ်ႉယႂ်ႇမႃးလႄႈပဵၼ်ဢၼ်ၵႅၼ်ႇဢၼ်ၶႅင်ဢေႃႈ။ဢၼ်သုင်မၼ်းၶိုတ်ႉထိုငႃ်ႉၵၢင်ႁၢဝ်လႄႈပဵၼ်ဢၼ်မုင်ႈႁၼ်မၼ်းတေႃႇထိုင်ႁွတ်ႈၵႃႈတီႈႁိမ်းလႅၼ်သုတ်းလိၼ်မိူင်းဢေႃႈ။
၁၂ မႂ်ႊမၼ်းပဵၼ်ဢၼ်ႁၢင်ႊလီလႄႈမၢၵ်ႇမၼ်းလိူင်ႇၼမ်ၼႃႇလႄႈပဵၼ်ပုၼ်ႈဢၼ်သတ်ႉတဝႃႇတင်းသဵင်ႈတင်းလူင်တၵ်းၵိၼ်ဢေႃႈ။တရိၵ်ႈသၢၼ်ႇၵႃႈၼိူဝ်လိၼ်တင်းလၢႆဢွၼ်ၵၼ်သွၼ်ႈပိုင်ႈယူႇၵႃႈတီႈတႂ်ႈႁူမ်ႈမၼ်းလႄႈၼူၵ်ႉၵၢင်ႁၢဝ်တင်းလၢႆဢွၼ်ၵၼ်လိုဝ်ႈၸပ်းယူႇၵႃႈတီႈၵိင်ႇမၼ်းၶႃႊမၼ်းဢေႃႈ။သတ်ႉတဝႃႇတင်းသဵင်ႈတင်းလူင်လႆႈၵိၼ်တီႈမၼ်းဢေႃႈ။
၁၃ လၢႆးသမ်ႉၵဝ်ႁၼ်ၼႂ်းရူႇပႃႇရုင်ႇဢၼ်ပေႃႇမႃးၵႃႈၼႂ်းၵွၵ်းႁူဝ်ၵဝ်ၵႃႈၼိူဝ်ၵူႇတီႈၼွၼ်းၵဝ်ၼၼ်ႉလႄႈၵေႃႉဢၼ်လႆႈပႂ်ႉၵေႃႉဢၼ်မူတ်းၸၢင်ႇၼၼ်ႉၵေႃႉၼိုင်ႈလူင်းသေၵႃႈၼိူဝ်ၵၢင်ႁၢဝ်မႃးလႄႈႁွင်ႉပၢဝ်ႇႁွင်ႉသေႃႇလႄႈဝႃႈ၊-
၁၄ ပွမ်ႈတူၼ်ႈမႆႉၼၼ်ႉလူမ်ႉပႅတ်ႈလႄႈတႅပ်းၽၼ်းၵိင်ႇမၼ်းၶႃႈမၼ်းပႅတ်ႈတႃႉ။တိုတ်ႈႁွတ်ႈဢဝ်မႂ်ႊမၼ်းပႅတ်ႈလႄႈဢဝ်မၢၵ်ႇမၼ်းၽၢဝ်ပိုၼ်ပႅတ်ႈတႃႉ။ႁႂ်ႈတရိၵ်ႈသၢၼ်ႇတင်းလၢႆဢွၼ်ၵၼ်ဢွၵ်ႇသေၵႃႈတီႈတႂ်ႈမၼ်းလႄႈႁႂ်ႈၼူၵ်ႉတင်းလၢႆဢွၼ်ၵၼ်ဢွၵ်ႇသေၵႃႈၼႂ်းၵိင်ႇမၼ်းၶႃႊမၼ်းၵႂႃႇသေ။
၁၅ ၼႂ်းဝႃႈၼၼ်သေၵေႃႈႁႂ်ႈတေႃႁၢၵ်ႈမၼ်းဢၼ်ၸပ်းလိၼ်ၼၼ်ႉမီးတၢင်းဢၼ်မတ်ႉၽုၵ်ႈဝႆႉလူၺ်ႈၸိူၵ်ႈလဵၵ်းၸိူၵ်ႈတွင်းလိူင်ၵႃႈၼႂ်းတူၼ်ႈယိူဝ်ႈတူၼ်ႈယႃႈဢၼ်ၼုမ်ႇလီၶဵဝ်လီၼၼ်ႉလႄႈၵိုတ်းၵျၢၼ်ႇဝႆႉတႃႉ။ႁႂ်ႈမၼ်းလႆႈၶၢမ်ႇတၢင်းဢၼ်ယမ်းၽူၼ်ယမ်းၼၢႆးလႄႈႁူမ်ႈပွင်းလူၺ်ႈၵၼ်တင်းတရိၵ်ႈသၢၼ်ႇတင်းလၢႆယူႇၵႃႈတီႈယိူဝ်ႈတီႈယႃႈၵႃႈၼိူဝ်လိၼ်မိူင်းတႃႉ။
၁၆ ႁႂ်ႈၸႂ်သၽေႃးၵူၼ်းႁၢႆသေၵႃႈတီႈမၼ်းလႄႈႁႂ်ႈမၼ်းတဵမ်ဝႆႉတင်းၸႂ်တရိၵ်ႈသၢၼ်ႇတႃႉ။ႁႂ်ႈပဵၼ်ၸိူဝ်ႉၼင်ႇၼႆတီႈမၼ်းၸဵတ်းပီႊတဵမ်တဵမ်တႃႉ။
၁၇ လွင်ႈမၼ်းၸမ်းလွင်ႈၼင်ႇႁိုဝ်ၶဝ်ၸိူဝ်းဢၼ်ဢသၢၵ်ႈလိပ်းယူႇၼၼ်ႉတၵ်းလႆႈမီးဢၶႂၢင်ႉဢၼ်လႆႈႁူႉလွင်ႈဢၼ်ၽြႃးဢၼ်သုင်ၼႃႇသေပိူၼ်ႈၼၼ်ႉဢုပ်ႉပိူင်ႇမိူင်းလေႃးၵီႇဢိၵ်ႇတင်းလွင်ႈဢၼ်မၼ်းၸဝ်ႈဢဝ်မၼ်းပၼ်တီႈၶဝ်ၸိူဝ်းဢၼ်မၼ်းၸဝ်ႈမီးဢလူဝ်ႇၶႂ်ႈပၼ်တင်းလွင်ႈဢၼ်မၼ်းၸဝ်ႈယုၵ်ႉယွင်ႈၵေႃႉဢၼ်ယုတ်ႈဢၼ်ယွမ်းၼၼ်ႉဝႆႉၵႃႈၼိူဝ်မၼ်းၼၼ်ႉၸိုင်ၶဝ်ၸိူဝ်းဢၼ်ပႂ်ႉၼၼ်ႉဢွၼ်ၵၼ်ၸီႇယၢင်ႇၸိူဝ်ႉၼင်ႇၼႆယဝ်ႉ။ၶဝ်ၸိူဝ်းဢၼ်မူတ်းၸၢင်ႇၼၼ်ႉဢွၼ်ၵၼ်ပၼ်ဢမိင်ႉတႅပ်းတတ်းဝႆႉယဝ်ႉဝႃႈၼင်ႇၼႆဢေႃႈ။
၁၈ ၵဝ်ၶုၼ်လူင်ၼေႇပုၶတ်ႉၼေႇၸႃႇလႆႈၽၼ်ႁၼ်တၢင်းဢၼ်ၽၼ်ႁၼ်ၸိူဝ်ႉၼင်ႇၼၼ်ယဝ်ႉ။မိူဝ်ႈလဵဝ်ၼႆႉၸိုင်ပေႇလတသႃႇၸႃႇဢိူၺ်း၊ၽုၺ်ႇဢွၵ်ႇၼႄပျႃးဢၼၢၵ်ႈမၼ်းၵွပ်ႈပိူဝ်ႈဢၼ်ပိင်ႇၺႃႇသိၵႃႈဢၼ်မီးၵႃႈၼႂ်းမိူင်းၵဝ်ၼႆႉဢမ်ႇၽုၺ်ႇဢွၵ်ႇၼႄပျႃႉဢၼၢၵ်ႈမၼ်းတီႈၵဝ်လႆႈၼၼ်ႉတႃႉ။မႂ်းၼႆႉတဵမ်ဝႆႉတင်းဝိၺိၺ်ႇၽြႃးဢၼ်မူတ်းၸၢင်ႇတင်းလၢႆၼၼ်ႉလႄႈၽုၺ်ႇဢွၵ်ႇၼႄပျႃးလႆႈဢေႃႈ၊ဝႃႈၼင်ႇၼႆဢေႃႈ။
တၢၼ်ႇယေႇလလၢတ်ႈၼႄဢၼၢၵ်းဢထိၵ်ႈပေႇတၢင်းၼွၼ်းၽၼ်
၁၉ မိူဝ်ႈၼၼ်ႉတၢၼ်ႇယေႇလဢၼ်မီးၸိုဝ်မီးသဵင်ပေႇလတသႃႇၸႃႇၼၼ်ႉမီးတၢင်းဢၼ်ဢၢမ်းၼႃႇၵႂင်ၸႂ်ယုင်ႈၸႂ်ၵႂႃႇၵမ်းဢွၼ်ႇၼိုင်ႈလႄႈမႆႈၸႂ်ၶီႈၸႂ်ယူႇဢေႃႈ။ၶုၼ်ႁေႃၶမ်းမီးဢမိင်ႉလႄႈဝႃႈ၊-ပေႇလတသႃႇၸႃႇဢိူၺ်း။ယႃႇပမေႆႈၸႂ်ႁွၼ်ႉၸႂ်ၵွပ်ႈပိူဝ်ႈတၢင်းဢၼ်ၽၼ်ႁၼ်ဢိၵ်ႇတင်းဢၼၢၵ်ႈမၼ်းၼၼ်ႉ၊ဝႃႈၼင်ႇၼႆဢေႃႈ။
၂၀ ပေႇလတသႃႇၸႃႇၵေႃႈလဝ်ႈလၢတ်ႈလႄႈဝႃႈ၊-ၸဝ်ႈၶုၼ်လူင်တီႈၶႃႈ။ႁႂ်ႈတၢင်းဢၼ်ၽၼ်ႁၼ်ၼႆႉႁွတ်ႈထိုင်ၵႃႈၼိူဝ်ၶဝ်ၸိူဝ်းဢၼ်ၸင်းၸဝ်ႈႁဝ်းၼၼ်ႉသေၵမ်းလူၺ်ႈ။ႁႂ်ႈဢၼၢၵ်ႈမၼ်းႁွတ်ႈထိုင်ၵႃႈၼိူဝ်ရၢၼ်ႇသူႇၸဝ်ႈႁဝ်းၸိူဝ်းၼၼ်ႉသေၵမ်းလူၺ်ႈ။တူၼ်ႈမႆႉဢၼ်ၸဝ်ႈႁဝ်းၼွၼ်းၽၼ်ႁၼ်ဢၼ်ယႂ်ႇမႃးလႄႈပဵၼ်ဢၼ်ၵႅၼ်ႇဢၼ်ၶႅင်သေလႄႈဢၼ်သုင်မၼ်းၶိုတ်ႉထိုငႃ်ႉၵၢင်ႁၢဝ်လႄႈပဵၼ်ဢၼ်မုင်ႈႁၼ်ၵႃႈၼိူဝ်ၼႃႈလိၼ်တင်းၼႃႈ၊
၂၁ ဢၼ်မႂ်ႊမၼ်းပဵၼ်ဢၼ်ႁၢင်ႊလီလႄႈမၢၵ်ႇမၼ်းလိူင်ႇၼမ်ၼႃႇလႄႈပဵၼ်ပုၼ်ႈဢၼ်သတ်ႉတဝႃႇတင်းသဵင်ႈတင်းလူင်တၵ်းၵိၼ်ဢၼ်တရိၵ်ႈသၢၼ်ႇၵႃႈၼိူဝ်လိၼ်တင်းလၢႆဢွၼ်ၵၼ်ယူႇၵႃႈတီႈတႂ်ႈမၼ်းလႄႈၼူၵ်ႉၵၢင်ႁၢဝ်တင်းလၢႆသွၼ်ႈပိုင်ႈလိုဝ်ႈၸပ်းယူႇၵႃႈတီႈၵိင်ႇမၼ်းၶႃႈမၼ်းၼၼ်ႉၸဝ်ႈၶုၼ်လူင်တီႈၶႃႈ၊ပဵၼ်ၸဝ်ႈႁဝ်းဢၼ်ယႂ်ႇသုင်ႇမႃးလႄႈတဵမ်ဝႆႉတင်းႁႅင်းတီႈၶႃႈဢေႃႈ။
၂၂ မူၼ်ၸေးၸိမ်ႇၸဝ်ႈႁဝ်းပဵၼ်ဢၼ်ယႂ်ႇသုင်လႄႈႁွတ်ႈထိုင်ၵႃႈတီႃႈႉၵၢင်ႁၢဝ်ယူႇသေလႄႈဢႃႇၼႃႇၸၢၵ်ႈၸဝ်ႈႁဝ်းႁွတ်ႈထိုင်ၵႃႈတီႈႁိမ်းလႅၼ်သုတ်းလိၼ်မိူင်းပုၼ်ႉတီႈၶႃႈဢေႃႈ။
၂၃ ၼႂ်းလွင်ႈတၢင်းဢၼ်ၸဝ်ႈၶုၼ်လူင်ၽၼ်ႁၼ်ၵေႃႉဢၼ်လႆႈပႂ်ႉ၊ၵေႃႉဢၼ်မူတ်းၸၢင်ႇၵေႃႉၼိုင်ႈလူင်းသေၵႃႈၼိူဝ်ၵၢင်ႁၢဝ်မႃးလႄႈႁွင်ႉပၢဝ်ႇႁွင်ႉသေႃႇလႄႈဝႃႈ၊-ပွမ်ႈတူၼ်ႈမႆႉၼၼ်ႉလူမ်ႉလႄႈယႃႉပႅတ်ႈတႃႉ။ၼႂ်းဝႃႈၼၼ်သေၵေႃႈႁႂ်ႈတေႃႁၢၵ်ႈမၼ်းဢၼ်ၸပ်းလိၼ်ၼၼ်ႉမီးတၢင်းဢၼ်မတ်ႉၽုၵ်ႈဝႆႉလူၺ်ႈၸိူၵ်ႈလဵၵ်းၸိူၵ်ႈတွင်းလိူင်ၵႃႈၼႂ်းတူၼ်ႈယိူဝ်ႈတူၼ်ႈယႃႈဢၼ်ၼုမ်ႇလီၶဵဝ်လီၼၼ်ႉလႄႈၵိုတ်းၵျၢၼ်ႇဝႆႉတႃႉ။
၂၄ ႁႂ်ႈမၼ်းလႆႈၶၢမ်ႇတၢင်းဢၼ်ယမ်းၽူၼ်ယမ်းၼၢႆးလႄႈႁူမ်ႈပွင်းလူၺ်ႈၵၼ်တင်းတရိၵ်ႈသၢၼ်ႇၵႃႈၼိူဝ်လိၼ်တင်းလၢႆတေႃႇထိုင်ႁွတ်ႈထၢၼ်ႈပေႃးပဵၼ်ၸိူဝ်ႉၼင်ႇၼၼ်တီႈမၼ်းၸဵတ်းပီႊတဵမ်တဵမ်တႃႉ၊ဝႃႈၼင်ႇၼႆၼၼ်ႉၼၼ်ႉၸဝ်ႈၶုၼ်လူင်တီႈၶႃႈ၊ဢၼၢၵ်ႈမၼ်းဢိၵ်ႇတင်းဢမိင်ႉဢၼ်ၽြႃးဢၼ်သုင်ၼႃႇသေပိူၼ်ႈၸီႇယၢင်ႇဝႆႉလႄႈႁွတ်ႈထိုင်ၵႃႈၼိူဝ်ၸဝ်ႈၵဝ်ၶႃႈၸဝ်ႈၶုၼ်လူင်ၼၼ်ႉၸမ်း
၂၅ ၸဝ်ႈႁဝ်းတၵ်းလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈသေၵႃႈၼႂ်းမုၵ်ႉၵူၼ်းၸိူဝ်းၵူၼ်းလႄႈတူၵ်းတီႈယူႇတီႈသဝ်းလူၺ်ႈၵၼ်တင်းတရိၵ်ႈသၢၼ်ႇၵႃႈၼိူဝ်လိၼ်တင်းလၢႆသေလႄႈၵိၼ်ယိူဝ်ႈၵိၼ်ယႃႈမိူၼ်ၸိူဝ်ႉၼင်ႇဝူဝ်းၼၼ်ႉလႄႈၶၢမ်ႇတၢင်းဢၼ်ယမ်းၽူၼ်ယမ်းၼၢႆးယူႇသေလႄႈပဵၼ်ၸိူဝ်ႉၼင်ႇၼၼ်တီႈၸဝ်ႈႁဝ်းၸဵတ်းပီႊတဵမ်တဵမ်တေႃႇထိုင်ႁွတ်ႈၸဝ်ႈႁဝ်းႁူႉၸႅင်ႈလွင်ႈဢၼ်ၽြႃးဢၼ်သုင်ၼႃႇသေပိူၼ်ႈၼၼ်ႉဢုပ်ႉပိူင်ႇမိူင်းလေႃးၵီႇလႄႈပၼ်တီႈၵေႃႉဢၼ်မၼ်းၸဝ်ႈမီးဢလူဝ်ႇၶႂ်ႈပၼ်ၼၼ်ႉဢေႃႈ။
၂၆ လွင်ႈတၢင်းဢၼ်ၶဝ်ဢွၼ်ၵၼ်ၸီႇယၢင်ႇႁႂ်ႈတေႃႁၢၵ်ႈမၼ်းၵိုတ်းၵျၢၼ်ႇဝႆႉၼၼ်ႉၸမ်းလိုၼ်းသေဢၼ်ၸဝ်ႈႁဝ်းႁူႉလွင်ႈဢၼ်ၽုင်ႇၵၢင်ႁၢဝ်ဢုပ်ႉပိူင်ႇၼၼ်ႉယဝ်ႉၼၼ်ႉၸိုင်သိုင်ႇၸိုင်ႈဝၢၼ်ႈမိူင်းၸဝ်ႈႁဝ်းတၵ်းတႄႇယူႇၵႃႈၼႂ်းမိုဝ်းၸဝ်ႈႁဝ်းတီႈၶႃႈဢေႃႈ။
၂၇ ပိူဝ်ႈၼႆလႄႈၸဝ်ႈၶုၼ်လူင်တီႈၶႃႈ၊ၶႅၼ်းတေႃႈထုၵ်ႇၸႂ်ၵျိူၵ်ႈၸႂ်တၢင်းဢၼ်ၶႃႈၸဝ်ႈပၼ်တၢင်းၵျၢမ်ႇတၢင်းပွင်ၼႆႉသေလႄႈဢဝ်တၢင်းဢၼ်ႁဵတ်းၸွမ်းၼင်ႇတြႃးပႄႇတႅပ်းဢပျႅတ်ႈၸဝ်ႈႁဝ်းပႅတ်ႈလႄႈဢဝ်တၢင်းဢၼ်ႁၵ်ႉဢိတ်းလူၶဝ်ၸိူဝ်းဢၼ်မီးတုၵ်ႉၶႃႉတၢင်းၽၢၼ်ၼၼ်ႉပႄႇတႅပ်းတူႉၸရိူၵ်ႈၸဝ်ႈႁဝ်းပႅတ်ႈသေၵမ်းတီႈၶႃႈ။ၵတ်းယဵၼ်ၶျၢမ်းသႃႇၸဝ်ႈႁဝ်းၸၢင်ႈၶေးတၵ်းယဵၼ်တၵ်းယဝ်ႉထႅင်ႈတီႈၶႃႈဢေႃႈ၊ဝႃႈၼင်ႇၼႆဢေႃႈ။
တၢင်းၼွၼ်းၽၼ်တဵမ်ထူၼ်ႈ
၂၈ လွင်ႈဢၼ်ဢမူႉလွင်ႈတၢင်းၼႆႉၵူႈၸိူဝ်ႉၵူႈပိူင်ႁွတ်ႈထိုင်ၵႃႈၸိူဝ်းၶုၼ်လူင်ၼေႇပုၶတ်ႉၼေႇၸႃႇၸမ်းပူၼ်ႉသိပ်းသွင်လိူၼ်သေယဝ်ႉ
၂၉ မၼ်းၽၢႆႈသၢင်းၵျၢၼ်ႇယူႇၵႃႈၼိူဝ်ႁေႃၸဝ်ႈၵႃႈၼႂ်းဝဵင်းပႃႇပုလုၼ်ႇယူႇသေလႄႈဢွၵ်ႇသူပ်းလၢတ်ႈလႄႈဝႃႈ၊-
၃၀ ဝဵင်းၼႆႉၸမ်းပဵၼ်ဝဵင်းပႃႇပုလုၼ်ႇဢၼ်ၵဝ်ဢဝ်တၼ်းၶူဝ်းဢႃႇၼူႉၽေႃႇၵဝ်တႄႇႁဵတ်းဝႆႉပုၼ်ႈဢၼ်ၸိူဝ်ႉၶိူဝ်းၶုၼ်တၵ်းယူႇတၵ်းသဝ်းဢိၵ်ႇတင်းပုၼ်ႈဢၼ်တၵ်းယုၵ်ႉယွင်ႈမူၼ်သႅငမူၼ်ၶမ်းၵဝ်ဢမ်ႇၸႂ်ႁိုဝ်၊ဝႃႈၼင်ႇၼႆဢေႃႈ။
၃၁ ၼႂ်းမိူဝ်ႈဢၼ်ၶုၼ်ႁေႃၶမ်းယင်းတိုၵ်ႉဢွၵ်ႇသူပ်းလၢတ်ႈၵႂၢမ်းၼၼ်ႉယူႇၼၼ်ႉသဵင်ဢၼ်လူင်းသေၵႃႈၼိူဝ်ၵၢင်ႁၢဝ်မႃးလႄႈဝႃႈၼၼ်ႉၸမ်း၊-ၶုၼ်လူင်ၼေႇပုၶတ်ႉၼေႇၸႃႇဢိူၺ်း။ၵဝ်မီးဢမိင်ႉဝႆႉတီႈမႂ်းယဝ်ႉယဝ်ႉ။သိုင်ႇၸိုင်ႈဝၢၼ်ႈမိူင်းမႂ်းၼႆႉသုတ်ႉၶၢႆႉဢွၵ်ႇသေၵႃႈၼႂ်းမိုဝ်းမႂ်းၵႂႃႇယဝ်ႉ။
၃၂ မႂ်းတၵ်းလႆႈၶၢမ်ႇတၢင်းဢၼ်ႁေႃႈမႂ်းဢွၵ်ႇပႅတ်ႈသေၵႃႈၼႂ်းမုၵ်ႉၵူၼ်းၸိူဝ်းၵူၼ်းလႄႈတူၵ်းတီႈယူႇတီႈသဝ်းလူၺ်ႈၵၼ်တင်းတရိၵ်ႈသၢၼ်ႇၵႃႈၼိူဝ်လိၼ်တင်းလၢႆသေလႄႈၵိၼ်ယိူဝ်ႈယႃႈမိူၼ်ၸိူဝ်ႉဝူဝ်းၼၼ်ႉလႄႈပဵၼ်ၸိူဝ်ႉၼင်ႇၼႆတီႈမႂ်းၸဵတ်းပီႊတဵမ်တဵမ်တေႃႇထိုင်ႁွတ်ႈမႂ်းႁူႉၸႅင်ႈလွင်ႈဢၼ်ၽြႃးဢၼ်သုင်ၼႃႇသေပိူၼ်ႈၼၼ်ႉဢုပ်ႉပိူင်ႇမိူင်းလေႃးၵီႇလႄႈပၼ်တီႈၵေႃႉဢၼ်မၼ်းၸဝ်ႈမီးဢလူဝ်ႇၶႂ်ႈပၼ်ၼၼ်ႉဝႃႈၼင်ႇၼႆလႄႈ
၃၃ လွင်ႈတၢင်းၼၼ်ႉပဵၼ်တီႈၼေႇပုၶတ်ႉၼေႇၸႃႇၼႂ်းၶိင်ႇမိူဝ်ႈၼၼ်ႉၵမ်းလဵဝ်လႄႈမၼ်းလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈသေၵႃႈၼႂ်းမုၵ်ႉၵူၼ်းၸိူဝ်းၵူၼ်းလႄႈၵိၼ်ယိူဝ်ႈယႃႈယူႇမိူၼ်ၸိူဝ်ႉၼင်ႇဝူဝ်းၼၼ်ႉလႄႈၶၢမ်ႇတၢင်းဢၼ်ယမ်းၽူၼ်ယမ်းၼၢႆးယူႇတေႃႇထိုင်ႁွတ်ႈထၢၼ်ႈပေႃးၶူၼ်တူဝ်ၶူၼ်ၶိင်းမၼ်းပဵၼ်ၸိူဝ်ႉၼင်ႇၶူၼ်လၢင်းတႃႉၶမ်းဢိၵ်ႇတင်းၼဵပ်ႉတိၼ်ၼဵပ်ႉမိုဝ်းမၼ်းပဵၼ်ၸိူဝ်ႉၼင်ႇတိၼ်ၼူၵ်ႉၼၼ်ႉဢေႃႈ။
၃၄ မိူဝ်ႈဢၼ်ၶိင်ႇၵႃႇလႃႉမိုဝ်ႉဝၼ်းၼၼ်ႉၸေးယဝ်ႉၼၼ်ႉၵဝ်ၼေႇပုၶတ်ႉၼေႇၸႃႇၼႆႉဢဝ်တႃႁႅၼ်တူၺ်းၵႃႈၼိူဝႃ်ႉၵၢင်ႁၢဝ်လႄႈသမ်ႉၶိုၼ်းလႆႈသတိမႃးသေယဝ်ႉပၼ်တၢင်းလီတီႈၽြႃးဢၼ်မျၢတ်ႈသုင်ၼႃႇသေပိူၼ်ႈၼၼ်ႉလႄႈယွင်ႈယေႃးႁဵတ်းထေႃးပၼႃႇတီႈၽြႃးဢၼ်ဢသၢၵ်ႈလိပ်းယူႇထႃႇဝရႃႉၼၼ်ႉဢေႃႈ။လွင်ႈမၼ်းၸမ်းဢႃႇၼႃႇၸၢၵ်ႈမၼ်းၸဝ်ႈၼၼ်ႉပဵၼ်ဢႃႇၼႃႇၸၢၵ်ႈထႃႇဝရႃႉလႄႈသိုင်ႇၸိုင်ႈဝၢၼ်ႈမိူင်းမၼ်းၸဝ်ႈၼၼ်ႉတႄႇယူႇၵူႈၵမႃ်ႇႇသိုပ်ႇသိုပ်ႇတၢမ်းတၢမ်းဢေႃႈ။
၃၅ ၵူၼ်းလိၼ်မိူင်းတင်းသဵင်ႈတင်းလူင်ဢွၼ်ၵၼ်ပဵၼ်ၸိူဝ်ႉၼင်ႇဢၼ်ဢမ်ႇၸႂ်ႈၵႃႈသင်ၼၼ်ႉၵႃႈတီႈၽၢႆႇၼႃႈမၼ်းၸဝ်ႈလႄႈမၼ်းၸဝ်ႈၸီႇယၢင်ႇပွင်ႁဵတ်းပွင်မႄးတီႈပူဝ်ႇပႃႇၵၢင်ႁၢဝ်တင်းလၢႆဢိၵ်ႇတင်းတီႈၵူၼ်းလိၼ်မိူင်းတင်းလၢႆၸွမ်းၵႃႈၼင်ႇဢၼ်မၼ်းၸဝ်ႈမီးဢလူဝ်ႇၼၼ်ႉဢေႃႈ။ၽူႈလႂ်ဢမ်ႇႁႄႉၶႅၼ်မိုဝ်းမၼ်းၸဝ်ႈလႆႈသေၵေႃႉသေၵူၼ်း။ဢမ်ႇမီးၵေႃႉဢၼ်ထၢမ်တီႈမၼ်းၸဝ်ႈလႄႈဝႃႈ၊-တၵ်းႁဵတ်းၸိူဝ်ႉၼင်ႇႁိုဝ်တီႈၶႃႈဝႃႈၼင်ႇၼႆၼၼ်ႉလႃးလႃး။
၃၆ မိူဝ်ႈၼၼ်ႉၵမ်းလဵဝ်ၶိုၼ်းပဵၼ်ၸႂ်ပၵတိပၵ်းၵဝ်ႇပိူင်ၵဝ်ႇမႃးလႄႈသမ်ႉၶိုၼ်းတဵမ်ဝႆႉတင်းမုၼ်ၽုင်းဢိၵ်ႇတင်းဢႃႇၼူႉၽေႃႇၵဝ်ပုၼ်ႈသရေႇသိုင်ႇၸိုင်ႈဝၢၼ်ႈမိူင်းၵဝ်လႄႈဢတႂၢင်းဝူၼ်ႇၵဝ်ဢိၵ်ႇတင်းမူးမၢတ်ႈၽွင်းမိူင်းၵဝ်တင်းလၢႆဢွၼ်ၵၼ်ၶဝ်ႈၸူးတီႈၵဝ်လႄႈၵဝ်သမ်ႉၶိုၼ်းတႄႇယူႇၵႃႈၼႂ်းဢႃႇၼႃႇၸၢၵ်ႈၵဝ်လႄႈမုၼ်ဢႃႇၼူႉၽေႃႇၵဝ်ၵေႃႈယႂ်ႇၽႄႈတူဝ်းတွၼ်းမႃးဢေႃႈ။
၃၇ မိူဝ်ႈလဵဝ်ၼႆႉၵဝ်ၼေႇပုၶတ်ႉၼေႇၸႃႇၼႆႉႁဵတ်းထေႃးပၼႃႇယွင်ႈယေႃးၸဝ်ႈၶုၼ်လူင်ၽုင်ႇၵၢင်ႁၢဝ်ဢေႃႈ။လွင်ႈတၢင်းဢၼ်မၼ်းၸဝ်ႈၸီႇယၢင်ႇႁဵတ်းပဵၼ်ၸိူဝ်းၼၼ်ႉတဵမ်ဝႆႉတင်းသႅတ်ႉၸႃႇလႄႈသဵၼ်ႈတၢင်းဢၼ်မၼ်းၸဝ်ႈၵႂႃႇမႃးၸိူဝ်းၼၼ်ႉမႅၼ်ႈၸွမ်းၼင်ႇတြႃးဢေႃႈ။မၼ်းၸဝ်ႈဢဝ်ၵေႃႉဢၼ်မႃႇၼႃႉပူၵ်းပႅၼ်ၼၼ်ႉၶျႃးတူၵ်းတီႈတႅမ်ႇလႆႈယူႇဢေႃႈ၊ဝႃႈၼင်ႇၼႆဢေႃႈ။