၂
တၢင်းၼွၼ်းၽၼ်ၼေႇပုၶတ်ႉၼေႇၸႃႇ
၁ ၼႂ်းပီႊဢၼ်ၼေႇပုၶတ်ႉၼေႇၸႃႇၸၢမ်ႇႁၢင်ႈၸၢမ်ႇႁေႃပီႊတုတိယၼၼ်ႉၼေႇပုၶတ်ႉၼေႇၸႃႇၼွၼ်းၽၼ်ႁၼ်လႄႈမီးတၢင်းဢၼ်တူၵ်းၸႂ်သေလႄႈၼွၼ်းဢမ်ႇလပ်းလႆႈ။
၂ မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉႁႂ်ႈႁွင်ႉဢဝ်မႃႇၵူႉပိင်ႇၺႃႇသိ၊မေႃပေႇတၢင်ႇ၊သြႃႇဢၼ်ၸၢင်ႊၸေႃႇၸၢင်ႈႁဵတ်း၊သြႃႇၶႃႇလတေႇတင်းလၢႆမႃးႁႂ်ႈၶဝ်ၶိုၼ်းလၢတ်ႈပၼ်ဢၼၢၵ်ႈတၢင်းဢၼ်ၽၼ်ႁၼ်ၼၼ်ႉတီႈၶုၼ်ႁေႃၶမ်းလႄႈၶဝ်ၼၼ်ႉဢွၼ်ၵၼ်ႁွတ်ႈမႃးၸွမ်းၵႃႈၼင်ႇဢၼ်ဢမိင်ႉၸဝ်ႈမီးၼၼ်ႉလႄႈၸုၵ်းယူႇၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။
၃ ၶုၼ်ႁေႃၶမ်းၵေႃႈလၢတ်ႈတီႈၶဝ်လႄႈဝႃႈ၊-ၵဝ်ၼွၼ်းၽၼ်ႁၼ်ယဝ်ႉ။ႁူဝ်ၸႂ်ၵဝ်မီးတၢင်းဢၼ်ၵႂင်ၸႂ်ယုင်ႈၸႂ်ယူႇၵွပ်ႈပိူဝ်ႈဢၼ်ဢမ်ႇႁူႉတၢင်းဢၼ်ၽၼ်ႁၼ်ၼၼ်ႉၶႂ်ႈဝႃႈသင်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၄ ပိင်ႇၺႃႇသိၶႃႇလတေႇၸိူဝ်းၼၼ်ႉၵေႃႈဢွၼ်ၵၼ်ဢဝ်ၽႃႇသႃႇၵႂၢမ်းသုရိလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ၸဝ်ႈၶုၼ်လူင်တီႈၶႃႈ။ႁႂ်ႈဢသၢၵ်ႈၸဝ်ႈႁဝ်းလိပ်းယူႇမၼ်ႈၶိူင်ႇသေၵမ်းလူၺ်ႈတီႈၶႃႈ။ၶႅၼ်းတေႃႈမီးဢမိင်ႉတၢင်းဢၼ်ၽၼ်ႁၼ်ၸဝ်ႈႁဝ်းတီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။ၶႃႈၸဝ်ႈႁဝ်းၶဝ်တၵ်းၽုၺ်ႇဢွၵ်ႇၼႄပျႃးဢၼၢၵ်ႈမၼ်းတီႈၶႃႈဢေႃႈ၊ဝႃႈၼင်ႇၼႆဢေႃႈ။
၅ ၶုၼ်ႁေႃၶမ်းၵေႃႈလၢတ်ႈတီႈပိင်ႇၺႃႇသိၶႃႇလတေႇၸိူဝ်းၼၼ်ႉလႄႈဝႃႈ၊-လွင်ႈဢၼ်ၼႆႉလပ်ႉႁၢႆၵႂႃႇသေၵႃႈတီႈၵဝ်ယဝ်ႉ။ပေႃးသူဢမ်ႇၽုၺ်ႇဢွၵ်ႇၼႄပျႃးတၢင်းဢၼ်ၽၼ်ႁၼ်ဢိၵ်ႇတင်းဢၼၢၵ်ႈမၼ်းၼၼ်ႉၸိုင်သူတၵ်းလႆႈၶၢမ်ႇတၢင်းဢၼ်တႅပ်းၽၼ်းပဵၼ်ပွတ်းပဵၼ်တွၼ်ႈပႅတ်ႈလႄႈႁိူၼ်းသူၵေႃႈတၵ်းလႆႈၶၢမ်ႇတၢင်းဢၼ်ႁဵတ်းႁႂ်ႈပဵၼ်ၵွင်ၶီႈဝူဝ်းၶီႈၵႂၢႆးပႅတ်ႈဢေႃႈ။
၆ ပေႃးသူၽုၺ်ႇဢွၵ်ႇၼႄပျႃးတၢင်းဢၼ်ၽၼ်ႁၼ်ဢိၵ်ႇတင်းဢၼၢၵ်ႈမၼ်းၸိုင်သူတၵ်းလႆႈၶၢမ်ႇဢဝ်တၢင်းဢၼ်မူၼ်ႁူမ်ႇဢိၵ်ႇတင်းသူးလၢပ်ႈတင်းမူၼ်ၵုင်ႇသရေႇၼမ်ၼႃႇတီႈၵဝ်ဢေႃႈ။ပိူဝ်ႈဢၼ်ပဵၼ်ၼင်ႇၼႆလႄႈဢွၼ်ၵၼ်ၽုၺ်ႇဢွၵ်ႇၼႄပျႃးတၢင်းဢၼ်ၽၼ်ႁၼ်ဢိၵ်ႇတင်းဢၼၢၵ်ႈမၼ်းတီႈၵဝ်တႃႉ၊ဝႃႈၼင်ႇၼႆဢေႃႈ။
၇ ၶဝ်ၼၼ်ႉသမ်ႉၶိုၼ်းဢွၼ်ၵၼ်လဝ်ႈလၢတ်ႈပွၵ်ႈတုတိယထႅင်ႈလႄႈဝႃႈ၊-ၸဝ်ႈၶုၼ်လူင်တီႈၶႃႈ။ၶႅၼ်းတေႃႈမီးဢမိင်ႉတၢင်းဢၼ်ၽၼ်ႁၼ်ၸဝ်ႈႁဝ်းၼၼ်ႉတီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ။
၈ ၶႃႈၸဝ်ႈႁဝ်းၶဝ်တၵ်းၽုၺ်ႇဢွၵ်ႇၼႄပျႃးဢၼၢၵ်ႈမၼ်းတီႈၶႃႈဢေႃႈ၊ဝႃႈၼင်ႇၼႆသေယဝ်ႉ၊ၶုၼ်ႁေႃၶမ်းသမ်ႉၶိုၼ်းမီးဢမိင်ႉလႄႈဝႃႈ၊-ၵွပ်ႈပိူဝ်ႈဢၼ်လွင်ႈၼၼ်ႉလပ်ႉႁၢႆၵႂႃႇသေၵႃႈတီႈၵဝ်ယဝ်ႉလႄႈၵဝ်ႁူႉလွင်ႈဢၼ်သူၶႂ်ႈႁဵတ်းႁႂ်ႈမိုဝ်ႉဝၼ်းၶိင်ႇၵႃႇလႃႉပဵၼ်ဢၼ်ႁိုင်ဢၼ်ၼၢၼ်းၼၼ်ႉယူႇဢမၢၼ်ႇၶၢၼ်ပဵၼ်ယဝ်ႉ။
၉ ပေႃးသူၽုၺ်ႇဢွၵ်ႇၼႄပျႃးတၢင်းဢၼ်ၽၼ်ႁၼ်ၼၼ်ႉၸိုင်သူမီးတၢင်းၵျၢမ်ႇတၢင်းပွင်ဢၼ်လဵဝ်ၵၼ်လႄႈဢွၼ်ၵၼ်မႄးႁၢင်ႈမႄးပွင်ၵႂၢမ်းဢၼ်ၵူတ်ႉငွၵ်းလိင်ႉလႅၼ်ပုၼ်ႈဢၼ်တၵ်းလဝ်ႈလၢတ်ႈၵႃႈတီႈၽၢႆႇၼႃႈၵဝ်ႁႂ်ႈထၢၼ်ႈပေႃးတေႃႇထိုင်ႁွတ်ႈၶိင်ႇၵႃႇလႃႉၶၢႆႉပုတ်ႈၵႂႃႇၼၼ်ႉယဝ်ႉ။ပိူဝ်ႈၼႆလႄႈဢွၼ်ၵၼ်ၶိုၼ်းလၢတ်ႈတၢင်းဢၼ်ၽၼ်ႁၼ်ၼၼ်ႉတႃႉ။ပေႃးလၢတ်ႈၸိူဝ်ႉၼင်ႇၼၼ်ၸိုင်ၵဝ်တၵ်းႁူႉလွင်ႈဢၼ်သူတၵ်းၽုၺ်ႇဢွၵ်ႇၼႄပျႃးဢၼၢၵ်ႈမၼ်းလႆႈၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၀ သြႃႇၶႃႇလတေႇၸိူဝ်းၼၼ်ႉၵေႃႈသမ်ႉၶိုၼ်းလဝ်ႈလၢတ်ႈၵႃႈတီႈၽၢႆႇၼႃႈၶုၼ်ႁေႃၶမ်းလႄႈဝႃႈ၊-ၵေႃႉဢၼ်တၵ်းၵႄႈလိတ်ႈဢမူႉလွင်ႈတၢင်းၸဝ်ႈၶုၼ်လူင်လႆႈၼၼ်ႉၵႃႈၼိူဝ်လိၼ်မိူင်းၼႆႉဢမ်ႇမီးသေၵေႃႉသေၵူၼ်းတီႈၶႃႈ။ၶုၼ်ႁေႃၶမ်းပႃးလႂ်သေဢမ်ႇၵႃးပိၵ်ႉသမ်ႉမီးမုၼ်ၽုင်းတၼ်းၶူဝ်းဢၼ်ယႂ်ႇၼႃႇသေၵေႃႈဢမ်ႇတွၼ်ႉထၢမ်တီႈမႃႇၵူႉပိင်ႇၺႃႇသိ၊မေႃပေႇတၢင်ႇ၊သြႃႇၶႃႇလတေႇတင်းလၢႆၸိူဝ်းၼႆႉတီႈၶႃႈ။လွင်ႈတၢင်းဢၼ်ၸဝ်ႈလူင်တွင်ႈထၢမ်ၼႆႉပဵၼ်လွင်ႈတၢင်းဢၼ်လိုၵ်ႉဢၼ်လမ်ႇတီႈၶႃႈဢေႃႈ။
၁၁ လိူဝ်သေၽြႃးဢၼ်ဢမ်ႇယူႇလူၺ်ႈၼိူဝ်ႉလူၺ်ႈၼင်ၼၼ်ႉၵူၺ်းၽူႈလႂ်သေၵေႃႉသေၵူၼ်းဢမ်ႇၽုၺ်ႇဢွၵ်ႇၼႄပျႃးၵႃႈတီႈၽၢႆႇၼႃႈၸဝ်ႈၶုၼ်လူင်လႆႈတီႈၶႃႈ၊ဝႃႈၼင်ႇၼႆဢေႃႈ။
၁၂ ၵွပ်ႈပိူဝ်ႈၵႂၢမ်းၼၼ်ႉလႄႈၶုၼ်ႁေႃၶမ်းၸႂ်မႆႈၶႆႈၸႃႉလႄႈဢၢႆႁႅင်းတေႃးသႃႉဢွၵ်ႇႁႅင်းၼႃႇလူင်လၢင်သေလႄႈမီးဢမိင်ႉႁႂ်ႈပႄႇၽဵဝ်ႈပႅတ်ႈပိင်ႇၺႃႇသိၵႃႈဢၼ်မီးၵႃႈၼႂ်းဝဵင်းပႃႇပုလုၼ်ႇၼၼ်ႉဢေႃႈ။
၁၃ ဢဝ်ဢမိင်ႉၸဝ်ႈလွင်ႈဢၼ်တၵ်းလႆႈဢဝ်ပိင်ႇၺႃႇသိတင်းလၢႆတၢႆၼၼ်ႉသင်ႇလၢတ်ႈသေယဝ်ႉမိူဝ်ႈဢၼ်ၶဝ်ဢွၼ်ၵၼ်ႁႃႁႂ်ႈလႆႈဢဝ်တၢၼ်ႇယေႇလဢိၵ်ႇတင်းၵေႃႉဢၼ်ႁူမ်ႈပွင်းၵၼ်တင်းမၼ်းၸိူဝ်းၼၼ်ႉတၢႆၼၼ်ႉၸိုင်၊
၁၄ တၢၼ်ႇယေႇလပႃးတင်းသတိပိင်ႇၺႃႇသေလႄႈလၢတ်ႈၵႂၢမ်းတေႃႇၵၼ်တင်းဢႃႇရွၵ်ႉၵူဝ်ႇရၢမ်ႇတေႃႇမူးဢၼ်ဢွၵ်ႇႁႂ်ႈလႆႈပႄႇၽဵဝ်ႈပိင်ႇၺႃႇသိပႃႇပုလုၼ်ႇတင်းလၢႆပႅတ်ႈၼၼ်ႉဢေႃႈ။
၁၅ မၼ်းတွင်ႈထၢမ်တီႈဢႃႇရွၵ်ႉၵူဝ်ႇရၢမ်ႇတေႃႇမူးၶုၼ်ႁေႃၶမ်းလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဢမိင်ႉၶုၼ်ႁေႃၶမ်းၼၼ်ႉၶၼ်ၽႂ်းထၢၼ်ႇၼႆႉ၊ဝႃႈၼင်ႇၼႆလႄႈဢႃႇရွၵ်ႉၼၼ်ႉမွၵ်ႇလၢတ်ႈလွင်ႈမၼ်းတီႈတၢၼ်ႇယေႇလသေယဝ်ႉ၊
၁၆ တၢၼ်ႇယေႇလၼၼ်ႉၶဝ်ႈၵႃႈၼႂ်းႁေႃလႄႈၶဝ်ႈယွၼ်းဢဝ်တီႈၶုၼ်ႁေႃၶမ်းႁႂ်ႈမၼ်းပၼ်ၶိင်ႇမိုဝ်ႉဝၼ်းဢၼ်တေလႆႈၽုၺ်ႇဢွၵ်ႇၼႄပျႃးဢၼၢၵ်ႈတီႈၶုၼ်ႁေႃၶမ်းၼၼ်ႉဢေႃႈ။
၁၇ မိူဝ်ႈၼၼ်ႉတၢၼ်ႇယေႇလၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းလႄႈမွၵ်ႇလၢတ်ႈပၼ်ငိၼ်းလွင်ႈၼၼ်ႉတီႈၵေႃႉသေႈမၼ်းႁႃႇၼၼိ၊မိသေႇလ၊ၸႃႇၸရိၸိူဝ်းၼၼ်ႉ၊လွင်ႈၼင်ႇႁိုဝ်ၶဝ်တၵ်းဢွၼ်ၵၼ်သူးတွင်းႁႂ်ႈလႆႈၶၢမ်ႇဢဝ်ၵျေးၸူးၵရူႉၼႃႇၽြႃးပဵၼ်ၸဝ်ႈၽုင်ႇၵၢင်ႁၢဝ်
၁၈ ၼႂ်းလွင်ႈတၢင်းဢၼ်လိုၵ်ႉဢၼ်လမ်ႇၼၼ်ႉႁႂ်ႈတၢၼ်ႇယေႇလဢိၵ်ႇတင်းၵေႃႉသေႈမၼ်းၸိူဝ်းၼၼ်ႉဢမ်ႇလႆႈတၢႆလူၺ်ႈၵၼ်တင်းပိင်ႇၺႃႇသိပႃႇပုလုၼ်ႇၸိူဝ်းၼၼ်ႉဢေႃႈ။
၁၉ မိူဝ်ႈၼၼ်ႉလွင်ႈတၢင်းဢၼ်လိုၵ်ႉဢၼ်လမ်ႇၼၼ်ႉထၢင်ႇသႃးပေႃႇမႃးတီႈတၢၼ်ႇယေႇလၼႂ်းပျႃႇတိၵ်ႈရူႇပႃႇရုင်ႇၶိင်ႇၵၢင်ၶိုၼ်းဢေႃႈ။
၂၀ မိူဝ်ႈၼၼ်ႉတၢၼ်ႇယေႇလယွင်ႈယေႃးၵျေးၸူးၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်လႄႈတၢၼ်ႇယေႇလလဝ်ႈလၢတ်ႈလႄႈဝႃႈ၊-ႁႂ်ႈၼႃႇမႃႉၸိုဝ်သဵင်ၽြႃးပဵၼ်ၸဝ်ႈမီးမင်ႇၵလႃႇထႃႇဝရႃႉသေၵမ်းလူၺ်ႈ။လွင်ႈမၼ်းၸမ်းမၼ်းၸဝ်ႈၼႆႉတဵမ်ဝႆႉတင်းပိင်ႇၺႃႇဢိၵ်ႇတင်းတၢင်းၵတ်ႉတၢင်းၶၼ်ဢေႃႈ။
၂၁ မၼ်းၸဝ်ႈႁႂ်ႈၶိင်ႇၵႃႇလႃႉဢူႉတူႉၶၢႆႉပုတ်ႈဢေႃႈ။မၼ်းၸဝ်ႈၶျႃးၶုၼ်ႁေႃၶမ်းတူၵ်းလႄႈယုၵ်ႉယွင်ႈၶုၼ်ႁေႃၶမ်းဢေႃႈ။
၂၂ မၼ်းၸဝ်ႈပၼ်ပိင်ႇၺႃႇတီႈၶဝ်ၸိူဝ်းဢၼ်မီးပိင်ႇၺႃႇၼၼ်ႉလႄႈပၼ်တၢင်းဢၼ်ၶုတ်းမူင်ႇၸီးၸွင်ႁူႉၸႅင်ႈတီႈၶဝ်ၸိူဝ်းဢၼ်မီးၺၢၼ်ႇၼၼ်ႉဢေႃႈ။မၼ်းၸဝ်ႈၼႄပျႃးလွင်ႈတၢင်းဢၼ်လိုၵ်ႉလမ်ႇသိူင်ႇဢမ်ၸိူဝ်းၼၼ်ႉဢေႃႈ။မၼ်းၸဝ်ႈႁူႉႁၼ်ၵႃႈဢၼ်မီးၵႃႈၼႂ်းလပ်းသိင်ႇၼၼ်ႉလႄႈဢၼ်လႅင်းတႄႇယူႇၵႃႈၼႂ်းမၼ်းၸဝ်ႈဢေႃႈ။ၽြႃးပဵၼ်ၸဝ်ႈပူႇမွၼ်ႇၶႃႈၸဝ်ႈတီႈၶႃႈ။
၂၃ ၶႃႈၸဝ်ႈယွင်ႈယေႃးၵျေးၸူးၸဝ်ႈႁဝ်းလႄႈႁဵတ်းပထၼႃႇတီႈၸဝ်ႈႁဝ်းဢၼ်ဢိတ်းလူပၼ်ပိင်ႇၺႃႇဢိၵ်ႇတင်းတၢင်းၵတ်ႉတၢင်းၶၼ်တီႈၶႃႈၸဝ်ႈလႄႈႁႂ်ႈၶႃႈၸဝ်ႈႁူႉလွင်ႈတၢင်းဢၼ်ၶႃႈၸဝ်ႈႁဝ်းၶဝ်လဝ်ႈယွၼ်းဢဝ်တီႈၸဝ်ႈႁဝ်းၼၼ်ႉတီႈၶႃႈဢေႃႈ။လွင်ႈမၼ်းၸမ်းၸဝ်ႈႁဝ်းႁႂ်ႈၶႃႈၸဝ်ႈႁဝ်းၶဝ်ႁူႉဢမူႉလွင်ႈတၢင်းၶုၼ်ႁေႃၶမ်းၼႆႉတီႈၶႃႈယဝ်ႉ၊ဝႃႈၼင်ႇၼႆသေယဝ်ႉ၊
၂၄ တၢၼ်ႇယေႇလၵႂႃႇၸူးၵႃႈတီႈဢႃႇရွၵ်ႉဢၼ်ၶုၼ်ႁေႃၶမ်းၶၢၼ်းဝႆႉႁႂ်ႈလႆႈပႄႇၽဵဝ်ႈပႅတ်ႈပိင်ႇၺႃႇသိပႃႇပုလုၼ်ႇၸိူဝ်းၼၼ်ႉလႄႈလၢတ်ႈလႄႈဝႃႈ၊-ယႃႇပေဢဝ်ပိင်ႇၺႃႇသိပႃႇပုလုၼ်ႇၸိူဝ်းၼၼ်ႉတၢႆသေၵမ်းၶႃႈ။ဢဝ်ၵဝ်ၶႃႈသႂၢင်းၶဝ်ႈၵႃႈတီႈၶုၼ်ႁေႃၶမ်းသေၵမ်းၶႃႈ။ၵဝ်ၶႃႈတၵ်းၽုၺ်ႇဢွၵ်ႇၼႄပျႃးဢၼၢၵ်ႈမၼ်းတီႈၶုၼ်ႁေႃၶမ်းၶႃႈဢေႃႈ၊ဝႃႈၼင်ႇၼႆဢေႃႈ။
တၢၼ်ႇယေႇလၽုၺ်ႇဢွၵ်ႇဢၼၢၵ်ႈတၢင်းၼွၼ်းၽၼ်
၂၅ မိူဝ်ႈၼၼ်ႉဢႃႇရွၵ်ႉၼၼ်ႉႁိပ်ႈၼႅတ်ႈဢဝ်တၢၼ်ႇယေႇလသႂၢင်းၶဝ်ႈၵႃႈတီႈၽႆႇၼႃႈၶုၼ်ႁေႃၶမ်းသေလႄႈလဝ်ႈလၢတ်ႈလႄႈဝႃႈ၊-ၶႃႈၸဝ်ႈထူပ်းႁၼ်ၵူၼ်းဢၼ်တၵ်းၽုၺ်ႇဢွၵ်ႇၼႄပျႃးဢၼၢၵ်ႈမၼ်းတီႈၸဝ်ႈႁဝ်းလႆႈၼၼ်ႉၵေႃႉၼိုင်ႈၵႃႈၼႂ်းမဵဝ်းယုတဢၼ်လႆႈၶၢမ်ႇတၢင်းဢၼ်သိမ်းဢဝ်မႃးၸိူဝ်းၼၼ်ႉတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၂၆ ၶုၼ်ႁေႃၶမ်းၵေႃႈၶိုၼ်းလၢတ်ႈလႄႈထၢမ်တီႈတၢၼ်ႇယေႇလဢၼ်လႆႈၸိုဝ်ပေႇလတသႃႇၸႃႇၼၼ်ႉလႄႈဝႃႈ၊-မႂ်းမွၵ်ႇလၢတ်ႈပၼ်တၢင်းဢၼ်ၽၼ်ႁၼ်ၼၼ်ႉဢိၵ်ႇတင်းဢၼၢၵ်ႈမၼ်းလႆႈႁိုဝ်ဝႃႈၼင်ႇၼႆသေယဝ်ႉ၊တၢၼ်ႇယေႇလလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-
၂၇ လွင်ႈတၢင်းဢၼ်လိုၵ်ႉဢၼ်လမ်ႇဢၼ်ၸဝ်ႈႁဝ်းထၢမ်ႇၼၼ်ႉၸိုင်ပိင်ႇၺႃႇသိ၊မေႃပေႇတၢင်ႇသြႃႇမႃႇၵု၊သြႃႇဢၼႃႇၵၢတ်ႈတိတင်းလၢႆဢမ်ႇၽုၺ်ႇဢွၵ်ႇၼႄပျုးတီႈၸဝ်ႈၶုၼ်လူင်လႆႈၶႃႈ။
၂၈ ၽြႃးပဵၼ်ၸဝ်ႈဢၼ်ၽုၺ်ႇဢွၵ်ႇၼႄပျႃးလွင်ႈတၢင်းဢၼ်လိုၵ်ႉဢၼ်လမ်ႇတင်းလၢႆၼၼ်ႉသူႇၼိုင်ႈမီးယူႇၵႃႈၼိူဝ်ၽုင်ႇၵၢင်ႁၢဝ်လႄႈမၼ်းၸဝ်ႈမွၵ်ႇလၢတ်ႈပၼ်ငိၼ်းလွင်ႈတၢင်းဢၼ်တၵ်းပဵၼ်မႃးၶိင်ႇၵႃႇလႃႉၵမ်းလိုၼ်းပုၼ်ႈတီႈၶုၼ်လူင်ၼေႇပုၶတ်ႉၼေႇၸႃႇတီႈၶႃႈဢေႃႈ။
၂၉ တၢင်းဢၼ်ၸဝ်ႈႁဝ်းၽၼ်ႁၼ်ဢိၵ်ႇတင်းရူႇပႃႇရုင်ႇၵႃႈၼႂ်းၵွၵ်းႁူဝ်ၸဝ်ႈႁဝ်းၵႃႈၼိူဝ်ၵူႇတီႈၼွၼ်းၸဝ်ႈႁဝ်းၼၼ်ႉၸမ်းၸဝ်ႈၶုၼ်လူင်တီႈၶႃႈၸဝ်ႈႁဝ်းၶႆႈၸႂ်ဝူၼ်ႉၸႂ်လႄႈမုင်ႈမွင်းလွင်ႈတၢင်းဢၼ်တၵ်းပဵၼ်မႃးမိူဝ်ႈၵမ်းလိုၼ်းၼၼ်ႉတီႈၶႃႈဢေႃႈ။ၽြႃးဢၼ်ၽုၺ်ႇဢွၵ်ႇၼႄပျႃးလွင်ႈတၢင်းဢၼ်လိုၵ်ႉဢၼ်လမ်ႇတင်းလၢႆၼၼ်ႉၼႄပျႃးလွင်ႈတၢင်းဢၼ်တၵ်းပဵၼ်မႃးမိူဝ်ႈၵမ်းလိုၼ်းၼၼ်ႉတီႈၸဝ်ႈႁဝ်းတီႈၶႃႈဢေႃႈ။
၃၀ ၵွပ်ႈပိူဝ်ႈဢၼ်ၶႃႈၸဝ်ႈယိင်ႈၶႅၼ်းမီးပိင်ႇၺႃႇလိူဝ်တွၼ်းၼႃႇသေၵူၼ်းသတ်ႉတဝႃႇတၢင်ႇၵေႃႉတၢင်ႇၵူၼ်းၼၼ်ႉလႄႈလွင်ႈတၢင်းဢၼ်လိုၵ်ႉဢၼ်လမ်ႇၼႆႉၸႅင်ႈမႃးလႅင်းမႃးတီႈၶႃႈၸဝ်ႈဢမ်ႇၸႂ်ႈၶႃႈ။လွင်ႈၼင်ႇႁိုဝ်ၸဝ်ႈၶုၼ်လူင်တၵ်းလႆႈႁူႉဢၼၢၵ်ႈမၼ်းလႄႈၸဝ်ႈႁဝ်းတၵ်းလႆႈႁူႉၸႅင်ႈတၢင်းဢၼ်ထၢင်ႇဢၼ်ထိူမ်ႁူဝ်ၸဝ်ႈႁဝ်းၼၼ်ႉၵူၺ်းၸိုင်ၸင်ႇပဵၼ်တီႈၶႃႈဢေႃႈ။
၃၁ ၸဝ်ႈၶုၼ်လူင်တီႈၶႃႈ။ၸဝ်ႈႁဝ်းလူတူၺ်းလႄႈႁၼ်ရုၵ်ႉထူႉလူင်တီႈၶႃႈဢေႃႈ။ရုၵ်ႉထူႉဢၼ်ယႂ်ႇသုင်လႄႈတဵမ်ဝႆႉတင်းငဝ်းဢရွင်ႇဢၼ်ႁိူဝ်ႈႁိူင်းႁႅင်းၼႃႇလူင်လၢင်ၼၼ်ႉၸုၵ်းတင်ႈယူႇၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။ႁၢင်ႊၽၢင်မၼ်းပဵၼ်ဢၼ်လီၵူဝ်လီႁႄဝႆႉတီႈၶႃႈဢေႃႈ။
၃၂ ရုၵ်ႉထူႉၼၼ်ႉၵွၵ်းႁူဝ်မၼ်းပဵၼ်ၶမ်းလွတ်ႈငၢၼ်ႇလႄႈႁူဝ်ဢူၵ်းမၼ်းတင်းၶႅၼ်မိုဝ်းမၼ်းသွင်ၶွၼ်ၼၼ်ႉပဵၼ်ငိုၼ်းတီႈၶႃႈဢေႃႈ။တွင်ႉမၼ်းၶႃႈမၼ်းသွင်ၶွၼ်ၼၼ်ႉပဵၼ်တွင်းလိူင်တီႈၶႃႈဢေႃႈ။
၃၃ ပွင်ႈၵၢဝ်ႈမၼ်းသွင်ၶွၼ်ၼၼ်ႉပဵၼ်လဵၵ်းလႄႈတိၼ်မၼ်းပဵၼ်လဵၵ်းပွတ်းၼိုင်ႈလိၼ်ပွတ်းၼိုင်ႈတီႈၶႃႈဢေႃႈ။
၃၄ ၸဝ်ႈႁဝ်းလူတူၺ်းယူႇတေႃႇထိုင်ႁွတ်ႈမၢၵ်ႇႁိၼ်လုၵ်ႈၼိုင်ႈဢၼ်ယင်းဢမ်ႇဢဝ်မိုဝ်းတွင်ႈႁဵတ်းလႄႈပဵၼ်မႃးၵူၺ်းမၼ်းၼၼ်ႉတိူဝ်ႉထုၵ်ႇသႂ်ႇရုၵ်ႉထူႉၼၼ်ႉၵႃႈတီႈတိၼ်မၼ်းဢၼ်ပဵၼ်လဵၵ်းဢိၵ်ႇတင်းလိၼ်ၼဵဝ်ၼၼ်ႉလႄႈႁၵ်းႁိၵ်းပႅတ်ႈၵႂႃႇၼၼ်ႉဢေႃႈ။
၃၅ မိူဝ်ႈၼၼ်ႉလဵၵ်း၊လိၼ်ၼဵဝ်၊တွင်းလိူင်၊ငိုၼ်း၊ၶမ်းၸိူဝ်းၼၼ်ႉႁၵ်းႁိၵ်းပဵၼ်မုၼ်ႈလႅဝ်ၵႂႃႇၼင်ႇၵၼ်လႄႈပဵၼ်ၸိူဝ်ႉၼင်ႇမုၼ်ႈတလၢင်းယဵပ်ႇၶဝ်ႈၼႂ်းၶိင်ႇႁႅင်ႈၼၼ်ႉသေလႄႈလူမ်းပတ်ႉထူဝ်းၽူင်ႉပိဝ်ၵႂႃႇလႄႈဢမ်ႇမီးတီႈဢၼ်တၵ်းတႄႇယူႇသဝ်းယူႇလႃးလႃး။မၢၵ်ႇႁိၼ်ဢၼ်တိူဝ်ႉထုၵ်ႇသႂ်ႇရုၵ်ႉထူႉၼၼ်ႉၸမ်းယႂ်ႇၽႄႈၵႂၢင်ႈမႃးပဵၼ်လွႆလူင်ၵႂႃႇလႄႈလူၼ်ႉတဵမ်ၵႃႈၼိူဝ်ၼႃႈလိၼ်မိူင်းတၢင်းၼႃႈတီႈၶႃႈဢေႃႈ။
၃၆ ဢၼ်ၼႆႉၸမ်းပဵၼ်တၢင်းဢၼ်ၸဝ်ႈႁဝ်းၽၼ်ႁၼ်ၼၼ်ႉတီႈၶႃႈဢေႃႈ။မိူဝ်ႈလဵဝ်ၼႆႉၶႃႈၸဝ်ႈႁဝ်းၶဝ်တၵ်းၽုၺ်ႇဢွၵ်ႇၼႄပျႃးဢၼၢၵ်ႈမၼ်းၵႃႈတီႈၽၢႆႇၼႃႈၸဝ်ႈၶုၼ်လူင်တီႈၶႃႈဢေႃႈ။
၃၇ ၸဝ်ႈၶုၼ်လူင်တီႈၶႃႈ။ၸဝ်ႈႁဝ်းၼႆႉပဵၼ်ၶုၼ်ႁေႃၶမ်းၼိူဝ်ၶုၼ်ႁေႃၶမ်းတင်းလၢႆတီႈၶႃႈဢေႃႈ။ၽြႃးပဵၼ်ၸဝ်ႈၽုင်ႇၵၢင်ႁၢဝ်ၼၼ်ႉဢဝ်သိုင်ႇၸိုင်ႈဝၢၼ်ႈမိူင်းဢိၵ်ႇလူၺ်ႈၵၼ်တင်းတၼ်းၶူဝ်းဢႃႇၼူႉၽေႃႇတၢင်းၵတ်ႉတၢင်းၶၼ်၊မုၼ်သရေႇပၼ်တီႈၸဝ်ႈႁဝ်းတီႈၶႃႈယဝ်ႉ။
၃၈ ၵႃႈပဵၼ်တီႈဢၼ်လုၵ်ႈၵူၼ်းဢိၵ်ႇတင်းတရိၵ်ႈသၢၼ်ႇၵႃႈၼိူဝ်လိၼ်တင်းၼူၵ်ႉၵႃႈၼိူဝႃ်ႉၵၢင်ႁၢဝ်ၸိူဝ်းၼၼ်ႉယူႇသဝ်းၼၼ်ႉမၼ်းၸဝ်ႈဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၸဝ်ႈႁဝ်းလႄႈႁႂ်ႈၸဝ်ႈႁဝ်းမီးဢၶႂၢင်ႉဢၼ်လႆႈဢုပ်ႉပိူင်ႇၶဝ်တင်းသဵင်ႈတင်းလူင်တီႈၶႃႈဢေႃႈ။ၸဝ်ႈႁဝ်းပဵၼ်ၵွၵ်းႁူဝ်ၶမ်းမၼ်းၼၼ်ႉတီႈၶႃႈဢေႃႈ။
၃၉ လိုၼ်းၸဝ်ႈႁဝ်းၼႆႉၼၼ်ႉသိုင်ႇၸိုင်ႈဝၢၼ်ႈမိူင်းဢၼ်ႇဢမ်ႇမျၢတ်ႈတၢၼ်ႇသိုင်ႇၸိုင်ႈဝၢၼ်ႈမိူင်းၸဝ်ႈႁဝ်းၼႆႉမိူင်းၼိုင်ႈတၵ်းပေႃးပဵၼ်မႃးတီႈၶႃႈဢေႃႈ။လိုၼ်းၼၼ်ႉသိုင်ႇၸိုင်ႈဝၢၼ်ႈမိူင်းတတိယဢၼ်ဝႃႈသိုင်ႇၸိုင်ႈဝၢၼ်ႈမိူင်းတွင်းလိူင်ဢၼ်လႆႈဢုပ်ႉပိူင်ႇၵႃႈၼိူဝ်ၼႃႈလိၼ်တၢင်းၼႃႈၼၼ်ႉတၵ်းပေႃႇပဵၼ်မႃးတီႈၶႃႈဢေႃႈ။
၄၀ သိုင်ႇၸိုင်ႈဝၢၼ်ႈမိူင်းၸတုၵ်ႉထၼၼ်ႉတၵ်းပဵၼ်ဢၼ်ၵႅၼ်ႇဢၼ်ၶႅင်မိူၼ်ၸိူဝ်ႉၼင်ႇလဵၵ်းၼၼ်ႉလႄႈတၵ်းႁဵတ်းတၢင်းဢၼ်ယႃႉႁၵ်းတင်းသဵင်ႈတင်းလူင်ၸိူဝ်းၼႆႉတႅၵ်ႇလႅဝ်ပႅတ်ႈမိူၼ်ၸိူဝ်ႉၼင်ႇဢၼ်လဵၵ်းယႃႉႁၵ်းၵူႈၸိူဝ်ႉၵူႈပိူင်ႈၼၼ်ႉလႄႈပေႉၼႅင်ႇလႆႈၼၼ်ႉတီႈၶႃႈဢေႃႈ။
၄၁ ၵႃႈၼင်ႇဢၼ်ၸဝ်ႈၽၼ်ႁၼ်တိၼ်မၼ်းဢိၵ်ႇတင်းၼိဝ်ႉတိၼ်မၼ်းပဵၼ်လိၼ်ၼဵဝ်ၸဝ်ႈမေႃႈပွတ်းၼိုင်ႈလဵၵ်းပွတ်းၼိုင်ႈၼၼ်ႉတၵ်းပဵၼ်သိုင်ႇၸိုင်ႈဝၢၼ်ႈမိူင်းဢၼ်ၼင်ႇၵၼ်ၵၼ်ၽၢတ်ႇၽႄၵၼ်တီႈၶႃႈဢေႃႈ။ၵူၺ်းၵႃႈၵွပ်ႈပိူဝ်ႈဢၼ်ၸဝ်ႈႁဝ်းၽၼ်ႁၼ်ဢိၵ်ႇတင်းလိၼ်ၼဵဝ်ဢၼ်ၽဝ်လေႃးလေးၵၼ်ယူႇၼၼ်ႉလႄႈတၵ်းမီးတၢင်းၵတ်ႉတၢင်းၶၼ်လဵၵ်းဢၼ်ၵႅၼ်ႇၶႅင်တီႈၶႃႈဢေႃႈ။
၄၂ မႅၼ်ႈၸွမ်းၵႃႈၼင်ႇဢၼ်ၼိဝ်ႉမၼ်းပဵၼ်လဵၵ်းပွတ်းၼိုင်ႈလိၼ်ပွတ်းၼိုင်ႈၼၼ်ႉလႄႈသိုင်ႇၸိုင်ႈဝၢၼ်ႈမိူင်းၼၼ်ႉတၵ်းမီးတၢင်းဢၼ်ၵႅၼ်ႇၶႅင်ၽၢၵ်ႇၼိုင်ႈဢိၵ်ႇတင်းတၢင်းဢၼ်ႁၵ်းႁိၵ်းၵႂႃႇၽၢၵ်ႇၼိုင်ႈတီႈၶႃႈဢေႃႈ။
၄၃ မႅၼ်ႈၸွမ်းၵႃႈၼင်ႇဢၼ်ၸဝ်ႈႁဝ်းၽၼ်ႁၼ်လဵၵ်းဢိၵ်ႇတင်းလိၼ်ၼဵဝ်ဢၼ်ၽဝ်လေႃးလေးၵၼ်ယူႇၼၼ်ႉလႄႈၶဝ်ၼၼ်ႉတၵ်းလေႃးလေးလူၺ်ႈၵၼ်တင်းၵူၼ်းတၢင်ႇၸိူဝ်ႉတၢင်ႇမဵဝ်းဢေႃႈ။ၵူၺ်းၵႃႈၶဝ်ၼၼ်ႉတၵ်းဢမ်ႇၽွမ်ႉသဵင်ပဵင်းပၢၵ်ႇပဵၼ်ဢၼ်ၼိုင်ႈဢၼ်လဵဝ်ၵၼ်မိူၼ်ၸိူဝ်ႉၼင်ႇဢၼ်လဵၵ်းတင်းလိၼ်ၼဵဝ်ဢမ်ႇပဵၼ်ဢၼ်ၼိုင်ႈဢၼ်လဵဝ်ၵၼ်လႆႈၼၼ်ႉတီႈၶႃႈဢေႃႈ။
၄၄ ၼႂ်းၸူဝ်ႈပၢၼ်ၶုၼ်ႁေႃၶမ်းၸိူဝ်းၼၼ်ႉၽြႃးပဵၼ်ၸဝ်ႈၽုင်ႇၵၢင်ႁၢဝ်တၵ်းႁႂ်ႈသိုင်ႇၸိုင်ႈဝၢၼ်ႈမိူင်းဢၼ်ဢမ်ႇႁွတ်ႈထိုင်တၢင်းဢၼ်လူႉလႅဝ်လႆႈၼၼ်ႉဢၼ်ၼိုင်ႈတႄႇပဵၼ်ဢေႃႈ။မိူင်းၼၼ်ႉယင်းဢမ်ႇလႆႈႁွတ်ႈထိုင်ၵႃႈၼႂ်းမိုဝ်းၵူၼ်းတၢင်ႇၸိူဝ်ႉတၢင်ႇမဵဝ်းလႄႈတၵ်းႁၵ်းႁိၵ်းသိုင်ႇၸိုင်ႈဝၢၼ်ႈမိူင်းဢၼ်ဝႃႈမႃးယဝ်ႉၸိူဝ်းၼၼ်ႉလူႉလႅဝ်ပႅတ်ႈသေလႄႈတႄႇယူႇတႃႇသေႇမၼ်ႈၶိူင်ႇတီႈၶႃႈဢေႃႈ။
၄၅ ၵွပ်ႈပိူဝ်ႈဢၼ်ၸဝ်ႈၽၼ်ႁၼ်မၢၵ်ႇႁိၼ်လုၵ်ႈၼိုင်ႈဢၼ်ဢမ်ႇဢဝ်မိုဝ်းတွင်ႈႁဵတ်းပဵၼ်မႃးၵူၺ်းမၼ်းလႄႈငၢၵ်ႈၵွၵ်းၽၢတ်ႇသေၵႃႈၼိူဝ်လွႆလူင်းမႃးသေလႄႈႁၵ်းႁိၵ်းလဵၵ်းတွင်းလိူင်၊လိၼ်ၼဵဝ်၊ငိုၼ်းၶမ်းၸိူဝ်းၼၼ်ႉပႅတ်ႈၼၼ်ႉလႄႈၽြႃးပဵၼ်ၸဝ်ႈဢၼ်ယႂ်ႇမျၢတ်ႈၼႃႇၼၼ်ႉမွၵ်ႇလၢတ်ႈလွင်ႈတၢင်းဢၼ်တၵ်းပဵၼ်မႃးမိူဝ်ႈၵမ်းလိုၼ်းပူၼ်ႉၼၼ်ႉတီႈၸဝ်ႈၶုၼ်လူင်တီႈၶႃႈဢေႃႈ။တၢင်းဢၼ်ၽၼ်ႁၼ်ၸဝ်ႈႁဝ်းမၼ်ႈၶိူင်ႇလႄႈဢၼၢၵ်ႈမၼ်းၵေႃႈမၢၼ်ႇမႅၼ်ႈတီႈၶႃႈဢေႃႈ၊ဝႃႈၼင်ႇၼႆဢေႃႈ။
၄၆ မိူဝ်ႈၼၼ်ႉၶုၼ်လူင်ၼေႇပုၶတ်ႉၼေႇၸႃႇၶုပ်ႉမူပ်ႇလႄႈဝႆႈၵူဝ်းၵႂၢႆႇတၢၼ်ႇယေႇလသေလႄႈၸီႉယၢင်ႇႁႂ်ႈဢဝ်ၶိူင်ႈတၢၵ်းပုၵ်ႉၸေႃႇဢိၵ်ႇတင်းမဵဝ်းၼၢမ်ႇသႃႇသၢၵ်ႈၵၢပ်ႈတီႈမၼ်းလႄႈၶုၼ်ႁေႃၶမ်းလၢတ်ႈတီႈတၢၼ်ႇယေႇလလႄႈဝႃႈ၊-
၄၇ ၵွပ်ႈပိူဝ်ႈဢၼ်ၸဝ်ႈၽုၺ်ႇဢွၵ်ႇၼႄပျႃးလွင်ႈတၢင်းဢၼ်လိုၵ်ႉဢၼ်လမ်ႇၼႆႉလႆႈလႄႈၽြႃးပဵၼ်ၸဝ်ႈၸဝ်ႈၼၼ်ႉပဵၼ်ၽြႃးၼိူဝ်ၽြႃးတင်းလၢႆ၊ၸဝ်ႈၼိူဝ်ၶုၼ်ႁေႃၶမ်းတင်းလၢႆ၊ၸဝ်ႈဢၼ်ၽုၺ်ႇဢွၵ်ႇၼႄပျႃးလွင်ႈတၢင်းဢၼ်လိုၵ်ႉဢၼ်လမ်ႇတင်းလၢႆဢေႃႈ၊ဝႃႈၼင်ႇၼႆသေယဝ်ႉ၊
၄၈ ၶုၼ်ႁေႃၶမ်းယုၵ်ႉယွင်ႈတၢၼ်ႇယေႇလသေလႄႈပၼ်သူးလၢပ်ႈဢၼ်ယႂ်ႇၼႃႇလူင်လၢင်လႄႈၶၢၼ်းမၼ်းဝႆႉႁႂ်ႈပဵၼ်ဝုၼ်ႇလူင်ၼႂ်းမိူင်းပႃႇပုလုၼ်ႇဢိၵ်ႇတင်းဝုၼ်ႇဢၼ်ဢုပ်ႉၵႃႈၼိူဝ်ပိင်ႇၺႃႇသိပႃႇပုလုၼ်ႇတင်းလၢႆဢေႃႈ။
၄၉ မိူဝ်ႈၼၼ်ႉတၢၼ်ႇယေႇလလဝ်ႈယွၼ်းတီႈၶုၼ်ႁေႃၶမ်းလႄႈၶုၼ်ႁေႃၶမ်းၼၼ်ႉၶၢၼ်းသႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၸိူဝ်းၼၼ်ႉဝႆႉႁႂ်ႈပဵၼ်ဝုၼ်ႇၼႂ်းမိူင်းပႃႇပုလုၼ်ႇလႄႈတၢၼ်ႇယေႇလၸမ်းလႆႈယူႇၵႃႈၼႂႂ်းၽၵ်းတူၼႃႈႁေႃၶမ်းဢေႃႈ။