Chapter
၃
တၢင်းဢၼ်ၵူၼ်းလႆႈတူၵ်းသုမ်း
၁ ငူးၼႆႉ လၵ်းလႅမ်ၼႃႇသေ တရိၵ်ႈသၢၼ်ႇၵႃႈဢၼ်ထႃႇဝရႃႉၽြႃးပဵၼ်ၸဝ်ႈ ၽၢၼ်ႇႁဵတ်းပဵၼ်မႃးတင်းသဵင်ႈ တင်းလူင်ၼၼ်ႉဢေႃႈ။မၼ်းထၢမ်တီႈၵူၼ်းယိင်းၼၼ်ႉလႄႈဝႃႈ၊-သူတၵ်းဢမ်ႇလႆႈၵိၼ်မၢၵ်ႇတူၼ်ႈဢၼ်မီးၵႃႈၼႂ်းသူၼ်ဢူးယဵၼ်ႇၼႆႉ၊ဝႃႈၼႆ၊ ၸွင်ႇၽြႃးပဵၼ်ၸဝ်ႈမီးဢမိင်ႉဝႆႉတႄႉႁိုဝ်ႉ၊ ဝႃႈၼင်ႇၼႆဢေႃႈ။
၂ ၵူၼ်းယိင်းၼၼ်ႉၵေႃႈလၢတ်ႈတီႈငူးၼၼ်ႉလႄႈဝႃႈ၊-ႁဝ်းမီးဢၶႂၢင်ႉဢၼ်လႆႈၵိၼ် မၢၵ်ႇတူၼ်ႈၵႃႈဢၼ်မီးၼႂ်းသူၼ်ဢူးယဵၼ်ႇၼႆႉယူႇဢေႃႈ။
၃ ၵူၺ်းၵႃႈမၢၵ်ႇတူၼ်ႈဢၼ်မီးၵႃႈၼႂ်း ၶိုင်ႈၵၢင် သူၼ်ဢူးယဵၼ်ႇၼႆႉၸမ်း၊ၽြႃးပဵၼ်ၸဝ်ႈမီးဢမိင်ႉဝႆႉဝႃႈ၊-သူယႃႇပေၵိၼ်၊သူယႃႇပေတိူဝ်ႉပေယိပ်း။
၄ ပေႃးဢမ်ႇၼၼ်သူတၵ်းတၢႆဢေႃႈ၊ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။ငူးၼၼ်ႉၵေႃႈလၢတ်ႈတီႈၵူၼ်းယိင်းၼၼ်ႉလႄႈဝႃႈ၊- သူတၵ်းတၢႆဢမၢၼ်ႇၶၼ်ပဵၼ်ဢမ်ႇၸႂ်ႈ။
၅ လွင်ႈမၼ်းၸမ်းၽြႃးပဵၼ်ၸဝ်ႈႁူႉလွင်ႈဢၼ်ဝႃႈ၊ ၼႂ်းဝၼ်းဢၼ်သူၵိၼ်မၢၵ်ႇၼၼ်ႉမၢၵ်ႇတႃသူတၵ်းၽုၺ်ႇလႅင်းမႃးလႄႈ သူတၵ်းပဵၼ်ၸိူဝ်ႉၼင်ႇၽြႃးပဵၼ်ၸဝ်ႈသေယဝ်ႉ၊ ႁူႉလွင်ႈဢၼ်လီလွင်ႈ ဢၼ်ဢမ်ႇလီၼၼ်ႉဢေႃႈ၊ ဝႃႈၼင်ႇၼႆဢေႃႈ။
၆ မိူဝ်ႈဢၼ်ၵူၼ်းယိင်းၼၼ်ႉ ႁၼ်မၢၵ်ႇတူၼ်ႈၼၼ်ႉပဵၼ်ဢၼ်လီၵိၼ်လီၶူပ်း၊ ဢၼ်ႁၢင်ႊလီထုၵ်ႇတႃ၊ မၢၵ်ႇတူၼ်ႈဢၼ်လီထုၵ်ႇၸႂ်ၵျိူၵ်ႈၸႂ် ပုၼ်ႈဢၼ်တၵ်းႁႂ်ႈၺၢၼ်ႇပိင်ႇၺႃႇယႂ်ႇၽႄႈၼမ်မႃးၼၼ်ႉၸိုင်၊ မၼ်းဢဝ်မၢၵ်ႇတူၼ်ႈၼၼ်ႉလႄႈၵိၼ်ဢေႃႈ။တီႈၽူဝ်မၼ်းၵေႃႈ မၼ်းဢဝ်ပၼ်လႄႈ ၽူဝ်မၼ်းၵေႃႈၵိၼ်ဢေႃႈ။
၇ လိုၼ်းၼၼ်ႉမၢၵ်ႇတႃသွင်ၶႃၽုၺ်ႇလႅင်းလႄႈ သွင်ၶႃႁူႉႁၼ်မႃးလွင်ႈဢၼ်ဝႃႈ ၶဝ်မီးယူႇတူဝ်ပူၺ်ၼၼ်ႉသေယဝ်ႉၶဝ်ဢဝ်မႂ်ႊတူၼ်ႈမၢၵ်ႇလိူဝ်ႇသၢင်းၽေႃး ယဵပ်ႉၸပ်းၵၼ်သေလႄႈ ႁဵတ်း ဢၼ်ႁူမ်ႇတူဝ်ၸဝ်ႈၵဝ်ႇဢေႃႈ။
၈ သွင်ၶႃၼၼ်ႉ ငိၼ်းသဵင်ထႃႇဝရႃႉၽြႃးပဵၼ်ၸဝ်ႈ လႄႇၵွႃႇလႄႇမႃးယူႇၵႃႈၼႂ်းသူၼ်ဢူးယဵၼ် ၼႂ်း ၶိင်ႇၵၢင်ဝၼ်းဢူၼ်ႈၼၼ်ႉၸိုင်၊ သွင်ၶႃၽူဝ်မေးဢွၼ်ၵၼ်ပၢႆတဵတ်ႇမႅပ်းယူႇၵႃႈၼႂ်းတူၼ်ႈမႆႉသူၼ်ဢူးယဵၼ်ႇ ႁႂ်ႈလႆႈ လွတ်ႈသေဢထၢမ်ႇတေႃႇၸဝ်ႈဢေႃႈ။
၉ ထႃႇဝရႃႉၽြႃးပဵၼ်ၸဝ်ႈၵေႃႈႁွင်ႉၵူၼ်းၸၢႆးၼၼ်ႉလႄႈဝႃႈ၊- မႂ်းမီးၵႃႈ လႂ်၊ဝႃႈၼင်ႇၼႆဢေႃႈ။
၁၀ မၼ်းၵေႃႈလဝ်ႈလၢတ်ႈလႄႈဝႃႈ၊- ၶႃႈၸဝ်ႈငိၼ်းသဵင်ၸဝ်ႈႁဝ်းၵႃႈၼႂ်းသူၼ်ဢူးယဵၼ်ႇလႄႈ ၵဝ် ၶႃႈၵူဝ်ႁႄ ၵွပ်ႈပိူဝ်ႈဢၼ်ၵဝ်ၶႃႈမီးယူႇတူဝ်ပူၺ်လႄႈတဵတ်ႇမႅပ်းယူႇတီႈၶႃႈဢေႃႈ၊ ဝႃႈၼင်ႇ ၼႆဢေႃႈ။
၁၁ မၼ်းၸဝ်ႈၵေႃႈထၢမ်လႄႈဝႃႈ၊- ၽူႈလႂ်လၢတ်ႈမႂ်း လွင်ႈဢၼ်မႂ်းယူႇတူဝ်ပူၺ်ယူႇၼၼ်ႉ။မႂ်းၵိၼ်မၢၵ်ႇတူၼ်ႈဢၼ်ၵဝ်ပိင်းၺၢပ်ႈဝႆႉဝႃႈ ယႃႇပေၵိၼ် ဝႃႈၼင်ႇၼႆၼၼ်ႉယဝ်ႉႁိုဝ်ႉ၊ ဝႃႈၼင်ႇၼႆဢေႃႈ။
၁၂ ၵူၼ်းၸၢႆးၼၼ်ႉၵေႃႈလၢတ်ႈလႄႈဝႃႈ၊- ၵူၼ်းယိင်းဢၼ်ၸဝ်ႈႁဝ်းဢၢပ်ႈပၼ်တီႈၶႃႈၸဝ်ႈၼၼ်ႉ၊မၼ်းပၼ်မၢၵ်ႇတူၼ်ႈၼၼ်ႉတီႈၶႃႈၸဝ်ႈလႄႈ ၶႃႈၸဝ်ႈလႆႈၵိၼ် မႅၼ်ႈတီႈၶႃႈယဝ်ႉ၊ဝႃႈၼင်ႇ ၼႆဢေႃႈ။
၁၃ ထႃႇဝရႃႉၽြႃးပဵၼ်ၸဝ်ႈၵေႃႈ ထၢမ်တီႈၵူၼ်းယိင်းၼၼ်ႉလႄႈဝႃႈ၊-မႂ်းႁဵတ်းၸိူဝ်ႉၼင်ႇႁိုဝ်ယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်ၵူၼ်းယိင်းၼၼ်ႉၵေႃႈလဝ်ႈလၢတ်ႈလႄႈဝႃႈ၊-ငူးပႅတ်ႉလႅၼ်ၶႃႈၸဝ်ႈလႄႈ ၶႃႈၸဝ်ႈၵိၼ်မႅၼ်ႈတီႈၶႃႈယဝ်ႉ၊ဝႃႈၼင်ႇၼႆဢေႃႈ။
၁၄ ထႃႇဝရႃႉၽြႃးပဵၼ်ၸဝ်ႈ မီးဢမိင်ႉတီႈငူးၼၼ်ႉလႄႈဝႃႈ၊-ပိူဝ်ႈဢၼ်မႂ်းႁဵတ်းဢမူႉၼႆႉလႄႈမႂ်းတၵ်းလႆႈၶၢမ်ႇတၢင်းၵိၼ်ႇတၢင်းဝႃႈ ၼႃႇသေတူဝ်ယဵၼ်ႇငႄႈဢိၵ်ႇတင်းတူဝ်ႁၢႆႉၵႃႈၼိူဝ်လိၼ် တင်းသဵင်ႈတင်းလူင်ဢေႃႈ။မႂ်းတၵ်းလႆႈဢဝ်တွင်ႉလိူၼ်ႈၵွႃႇလႄႈ ၵိၼ်မုၼ်ႈလိၼ် ယူႇၸူဝ်ႈဢသၢၵ်ႈဢေႃႈ။
၁၅ ၵဝ်တၵ်းႁႂ်ႈမႂ်းတင်းၵူၼ်းယိင်း၊ၸိူဝ်ႉၶိူဝ်းမႂ်းတင်းၸိူဝ်ႉၶိူဝ်းၵူၼ်းယိင်း ဝႆႉတၢင်းၽိတ်းတီႈၵၼ်ဢေႃႈ။မၼ်းတၵ်းၶိုတ်ႈႁူဝ်မႂ်းဢေႃႈ။မႂ်းၵေႃႈတၵ်းတွတ်ႇသူၼ်ႈတိၼ်မၼ်းဢေႃႈ၊ ဝႃႈၼင်ႇ ၼႆဢေႃႈ။
၁၆ မၼ်းၸဝ်ႈ မီးဢမိင်ႉတီႈၵူၼ်းယိင်းၼၼ်ႉလႄႈဝႃႈ၊-ၵဝ်တၵ်းႁႂ်ႈဝူၺ်ႇတၼႃႇ ဢၼ်ပႃးပတိၵ်ႈသၼ်ႇထေႇၼၼ်ႉယႂ်ႇၼမ်ၼႃႇတီႈမႂ်းဢေႃႈ။မႂ်းတၵ်းလႆႈၶၢမ်ႇဝူၺ်ႇတၼႃႇဢၼ်ယၢပ်ႇၼႃႇၼၼ်ႉလႄႈ ၵိူတ်ႇလဵင်ႉလုၵ်ႈလဵင်ႉလၢင်းဢေႃႈ။မႂ်းတၵ်းလႆႈၸွမ်းဢလူဝ်ႇၽူဝ်မႂ်းလႄႈၶၢမ်ႇတၢင်းဢၼ်မၼ်းဢုပ်ႉပိူင်ႇဢေႃႈ၊ ဝႃႈၼင်ႇၼႆဢေႃႈ။
၁၇ မၼ်းၸဝ်ႈ မီးဢမိင်ႉတီႈၵူၼ်းၸၢႆးၼၼ်ႉလႄႈဝႃႈ၊-ပိူဝ်ႈဢၼ် မႂ်းထွမ်ႇဢဝ်ၵႂၢမ်းမေးမႂ်းလႄႈ ၵိၼ်မၢၵ်ႇတူၼ်ႈ ဢၼ်ၵဝ်ပိင်းၺၢပ်ႈဝႃႈ ဢမ်ႇလႆႈၵိၼ်ၼၼ်ႉလႄႈ လိၼ်ၼႆႉ လႆႈၶၢမ်ႇတၢင်းၵိၼ်ႇ တၢင်းဝႃႈၵွပ်ႈပိူဝ်ႈမႂ်းယဝ်ႉ။
၁၈ လိၼ်တၵ်းႁႂ်ႈတူၼ်ႈၼၢမ်ၵူႈၸိူဝ်ႉၵူႈပိူင်ဢွၵ်ႇမႃးပုၼ်ႈမႂ်းဢေႃႈ။မႂ်းတၵ်းလႆႈၵိၼ်မၢၵ်ႇၽၵ်းယိူဝ်ႈ ၽၵ်းၶဵဝ် ဢၼ်ပဵၼ်မႃးၵႃႈၼိူဝ်လိၼ်ၼၼ်ႉဢေႃႈ။
၁၉ ၸူဝ်ႈဢၼ်မႂ်းဢမ်ႇပႆႇၶိုၼ်းၸူးၵႃႈတီႈလိၼ် ဢၼ်မႂ်းဢွၵ်ႇမႃးၼၼ်ႉ ႁိူဝ်ႇတၵ်းဢွၵ်ႇၵႃႈတီႈၼႃႈၽၢၵ်ႇမႂ်းလႄႈၸင်ႇမႂ်းတၵ်းလႆႈၵိၼ်တၢင်းၵိၼ်မႂ်းဢေႃႈ။လွင်ႈမၼ်းၸမ်းမႂ်းပဵၼ်မုၼ်ႈလိၼ်လႄႈ တၵ်းလႆႈၶိုၼ်းၵွႃႇၸူးၵႃႈတီႈမုၼ်ႈလိၼ်ဢေႃႈ၊ဝႃႈၼင်ႇၼႆဢေႃႈ။
၂၀ မိူဝ်ႈၼၼ်ႉ ၵူၼ်းၸၢႆးၼၼ်ႉႁွင်ႉႁိၵ်ႈၸိုဝ်ႈမေးမၼ်းဝႃႈ၊ဢေးဝ၊ဝႃႈၼႆဢေႃႈ။လွင်ႈမၼ်းၸမ်းမၼ်းတၵ်းပဵၼ်မေႈၵူၼ်း ဢၼ်ဢသၢၵ်ႈလိပ်းယူႇတင်းသဵင်ႈတင်းလူင်ၼၼ်ႉဢေႃႈ။
၂၁ ထႃႇဝရႃႉၽြႃးပဵၼ်ၸဝ်ႈၵေႃႈ ဢဝ်ၼင်ႁဵတ်းၶူဝ်းၼုင်ႈပုၼ်ႈ ဢႃႇတမ်ႇ ဢိၵ်ႇတင်းမေးမၼ်းၼၼ်ႉသေယဝ်ႉႁႂ်ႈသွင်ၶႃၼုင်ႈဢေႃႈ။
၂၂ ထႃႇဝရႃႉၽြႃးပဵၼ်ၸဝ်ႈဝႃႈ၊- တူၺ်းလူႊၵူၼ်းၼႆႉပဵၼ်ၸိူဝ်ႉၼင်ႇႁဝ်းသပေႃးပႃးလႄႈ ၸၢင်ႊ ႁူႉဢၼ်လီဢၼ်ဢမ်ႇလီၼၼ်ႉယဝ်ႉ။တေႃႈလဵဝ်ၼႆႉၵူဝ်မၼ်းတၵ်းယိုၼ်ႈမိုဝ်းမၼ်းလႄႈ ဢဝ်မၢၵ်ႇတူၼ်ႈဢသၢၵ်ႈၼၼ်ႉၵိၼ်သေယဝ်ႉ ဢသၢၵ်ႈတၵ်းလိပ်းထႃႇဝရႃႉဢေႃႈ၊ ဝႃႈ ၼင်ႇၼႆသေယဝ်ႉ၊
၂၃ ၼင်ႇႁိုဝ်မၼ်းတၵ်းႁဵတ်းၵႃႈတီႈလိၼ်ဢၼ်မၼ်းဢွၵ်ႇမႃးၼၼ်ႉၸိုင်၊ ထႃႇဝရႃႉၽြႃးပဵၼ်ၸဝ်ႈ ႁႂ်ႈမၼ်းဢွၵ်ႇသေၵႃႈၼႂ်းသူၼ်ဢူးယဵၼ်ႇ ဢေႇတိၼ်ႇၼၼ်ႉၵွႃႇဢေႃႈ။
၂၄ ဝၢႆးသေမၼ်းၸဝ်ႈႁေႃႈၵူၼ်းဢွၵ်ႇၵွႃႇယဝ်ႉ၊ မၼ်းၸဝ်ႈဢဝ် ၶေႇရူႉၽိမ်ႇတင်းလၢပ်ႇဢၼ်မၢပ်ႈ မႅပ်ႈၼၼ်ႉ ဝႆႉၵႃႈတီႈၽၢႆႇဝၼ်းဢွၵ်ႇသူၼ်ဢူးယဵၼ်ႇဢေႇတိၼ်ႇႁႂ်ႈလႆႈပႂ်ႉသဵၼ်ႈတၢင်းဢၼ်တၵ်း ႁွတ်ႈထိုင်တူၼ်ႈဢသၢၵ်ႈၼၼ်ႉဢေႃႈ။