၁၀
ရူႇပႃႇရုင်တၢၼ်ႇယေႇလ
၁ ၼႂ်းပီႊဢၼ်ၵုရုၶုၼ်ႁေႃၶမ်းပေႇရသိၸၢမ်ႇႁၢင်ႈၸၢမ်ႇႁေႃသၢမ်ပီႊၼၼ်ႉတၢၼ်ႇယေႇလဢၼ်မီးၸိုဝ်ဝႃႈပေႇလတသႃႇၸႃႇၼၼ်ႉလႆႈၶၢမ်ႇပျႃႇတိၵ်ႈၸဝ်ႈဢေႃႈ။ပျႃႇတိၵ်ႈၸဝ်ႈၼၼ်ႉပဵၼ်ဢၼ်မၢၼ်ႇမႅၼ်ႈၸိုဝ်ႈၸႂ်ႈလႄႈၸၢပ်ႈသႅင်ႇၵၼ်တၢင်းဢၼ်တိုၵ်းသိုၵ်းဢၼ်ယႂ်ႇၼႃႇၼၼ်ႉဢေႃႈ။မၼ်းႁူႉၸႅင်ႈလွင်ႈတၢင်းၼၼ်ႉလႄႈႁူႉသၢႆငၢႆရူႇပႃႇရုင်ႇၼၼ်ႉဢေႃႈ။
၂ ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉၵဝ်တၢၼ်ႇယေႇလၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်သၢဝ်းဢဵတ်းဝၼ်းတဵမ်တဵမ်ဢေႃႈ။
၃ၸူဝ်ႈဢၼ်ဢမ်ႇပႆႇၸေးသၢဝ်းဢဵတ်းဝၼ်းၼၼ်ႉၸိုင်ၵဝ်ဢမ်ႇၵိၼ်ၶဝ်ႈမုၼ်းဢၼ်လီဢၼ်ဝၢၼ်။ၼိူဝ်ႉႉဢိၵ်ႇတင်းၼမ်ႉၸပိတ်ႈၵေႃႈဢမ်ႇလႆႈၶဝ်ႈၵႃႈၼႂ်းသူပ်းၵဝ်။
၄ ဢမ်ႇႁဵတ်းတၢင်းဢၼ်တႃးၼမ်ႉမၼ်းလႃးလႃး။ၼႂ်းဝၼ်းလိူၼ်ပထမသၢဝ်းသီႇဝၼ်းၼၼ်ႉၵဝ်ယင်းတိုၵ်ႉမီးယူႇၵႃႈတီႈႁိမ်းၼမ်ႉႁွင်ႊလူင်ဢၼ်ဝႃႈႁိတၵေႇၸၼၼ်ႉလႄႈ
၅ ဢဝ်တႃၵဝ်ႁႅၼ်တူၺ်းလႄႈႁၼ်ၵူၼ်းဢၼ်ၼုင်ႈမႆႊပိၵ်ႉၶျေႃးသေလႄႈႁတ်ႉသၢႆဢႅဝ်ၶမ်းလွတ်ႈငၢၼ်ႇဢုၽတ်ႉယူႇၼၼ်ႉၵေႃႉၼိုင်ႈဢေႃႈ။တူဝ်မၼ်းၼၼ်ႉပဵၼ်ၸိူဝ်ႉၼင်ႇသႅင်မျၢၵ်ႈရွႆးလႄႈၼႃႈမၼ်းပဵၼ်ၸိူဝ်ႉၼင်ႇသၢႆဢရွင်ႇၽႆးမႅပ်ႈၼၼ်ႉဢေႃႈ။
၆ မၢၵ်ႇတႃမၼ်းပဵၼ်ၸိူဝ်ႉၼင်ႇဝၢၼ်ႇၽႆးတဵၼ်းဢၼ်လုၵ်ႉႁိူဝ်ႈၼႃႇၼၼ်ႉလႄႈတိၼ်မၼ်းမိုဝ်းမၼ်းၼၼ်ႉမီးဢရွင်ႇႁၢင်ႊၽၢင်တွင်းလိူင်ဢၼ်ၸင်ႇဢူမႂ်ႇမႂ်ႇၼၼ်ႉဢေႃႈ။သဵင်ၵႂၢမ်းမၼ်းပဵၼ်ၸိူဝ်ႉၼင်ႇသဵင်မုၵ်ႉၵူၼ်းၸိူဝ်းၵူၼ်းဢၼ်ၼမ်ၼႃႇၼၼ်ႉဢေႃႈ။
၇ ၵဝ်တၢၼ်ႇယေႇလၵေႃႉလဵဝ်ၵူၺ်းလႆႈႁၼ်ပျႃႇတိၵ်ႈရူႇပႃႇရုင်ႇၼၼ်ႉလႄႈၶဝ်ၸိူဝ်းဢၼ်ပႃးလူၺ်ႈၵၼ်တင်းၵဝ်ၼၼ်ႉဢမ်ႇလႆႈႁၼ်ပျႃႇတိၵ်ႈၼၼ်ႉ။တင်းဢၼ်ၵူဝ်ႁႄသၼ်ႇဝႆၼႃႇလူင်လၢင်ၼၼ်ႉတူၵ်းႁွတ်ႈၵႃႈၼိူဝ်ၶဝ်လႄႈၶဝ်ဢွၼ်ၵၼ်ဢွၵ်ႇပၢႆႈႁႂ်ႈလႆႈတဵတ်ႇမႅပ်းယူႇဢေႃႈ။
၈ ၵဝ်ၸမ်းၵိုတ်းၵျၢၼ်ႇယူႇၵေႃႉလဵဝ်ၵူၺ်းလႄႈႁၼ်ရူႇပႃႇရုင်ႇဢၼ်ယႂ်ႇၼႃႇလူင်လၢင်ၼၼ်ႉသေယဝ်ႉႁႅင်းဢူၼ်ႈႁႅင်းယွမ်းၵႂႃႇလႄႈၼႃႈၵဝ်ႁဵဝ်ႇၸွပ်ႈလူႉၵႂႃႇသေလႄႈတၢင်းၵတ်ႉတၢင်းၶၼ်ဢမ်ႇၵိုတ်းၵျၢၼ်ႇဝႆႉတီႈၵဝ်လႃးလႃး။
၉ ၵူၺ်းၵႃႈၵဝ်လႆႈငိၼ်းသဵင်ၵႂၢမ်းၵေႃႉၼၼ်ႉလႄႈၼႂ်းမိူဝ်ႈဢၼ်ၵဝ်လႆႈငိၼ်းသဵင်ၵႂၢမ်းၵေႃႉၼၼ်ႉၼၼ်ႉၸိုင်ၵဝ်ၼွၼ်းၼူၵ်ႇၼႃႇယူႇ၊ဢူပ်ႇပူၵ်ႇယူႇသေလႄႈဢဝ်ၼႃႈငူပ်ႉလိၼ်ယူႇဢေႃႈ။
၁၀ မိူဝ်ႈၼၼ်ႉမိုဝ်းၶွၼ်ၼိုင်ႈတိူဝ်ႉထုၵ်ႇယုၵ်ႉယွင်ႈၵဝ်လႄႈၵဝ်မီးတၢင်းဢၼ်ၵူင်ႇယူင်ႇယူႇၵႃႈၼိူဝ်ႁူဝ်ၶဝ်ႇၵဝ်ဢိၵ်ႇတင်းၽႃႇမိုဝ်းၵဝ်ဢေႃႈ။
၁၁ မၼ်းၵေႃႈလၢတ်ႈတီႈၵဝ်လႄႈဝႃႈ၊-တၢၼ်ႇယေႇလၵေႃႉဢၼ်လီႁၵ်ႉလီပႅင်းၼႆႉဢိူၺ်း။မၢတ်ႈတွင်းၵႂၢမ်းဢၼ်ၵဝ်တၵ်းလၢတ်ႈတီႈမႂ်းၼၼ်ႉလႄႈလုၵ်ႉၸုၵ်းယူႇတႃႉ။ၵဝ်လႆႈၶၢမ်ႇတၢင်းဢၼ်ပွႆၸႂ်ႉမႃးၸူးတီႈမႂ်းမိူ်ဝ်ႈလဵဝ်ၼႆႉယဝ်ႉ။မိူဝ်ႈဢၼ်မၼ်းဝႃႈၼင်ႇၼႆယဝ်ႉၼၼ်ႉၸိုင်ၵဝ်သၼ်ႇသၼ်ႇသၢႆသၢႆသေလႄႈလုၵ်ႉၸုၵ်းယူႇဢေႃႈ။
၁၂ မိူဝ်ႈၼၼ်ႉမၼ်းၵေႃႈလၢတ်ႈတီႈၵဝ်လႄႈဝႃႈ၊-တၢၼ်ႇယေႇလဢိူၺ်း။ယႃႇပေၵူဝ်ပေႁႄ။ၸႃႉၸႅမ်ဝၼ်းပထမဢၼ်မႂ်းဝႆႉၸႂ်မႂ်းႁႂ်ႈလႆႈႁူႉၸႅင်ႈလႄႈဢဝ်သင်ႇသွၼ်သုင်းမႃႉတူဝ်ၸဝ်ႈၵဝ်ႇၵႃႈတီႈၽၢႆႇၼႃႈၽြႃးပဵၼ်ၸဝ်ႈမႂ်းၼၼ်ႉလႄႈမၼ်းၸဝ်ႈထွမ်ႇငိၼ်းၵႂၢမ်းမႂ်းယဝ်ႉ။ၵွပ်ႈပိူဝ်ႈၵႂၢမ်းမႂ်းၼၼ်ႉလႄႈၵဝ်ႁွတ်ႈမႃးယဝ်ႉ။
၁၃ ၶုၼ်ဢၼ်ဢုပ်ႉပိူင်ႇမိူင်းပေႇရသိၸမ်းႁၢမ်ႈတပ်ႉႁႄႉၶႅၼ်ၵဝ်ယူႇသၢဝ်းဢဵတ်းဝၼ်းတဵမ်တဵမ်ဢေႃႈ။ၵမ်းလိုၼ်းမိၵ်ႉၶေႇလဢၼ်ၶဝ်ႈပႃးၵႃႈၼႂ်းၶုၼ်ဢၼ်မျၢတ်ႈၼႃႇသေပိူၼ်ႈၸိူဝ်းၼၼ်ႉမႃးၸွႆႈမႃးထႅမ်ၵဝ်လႄႈၵဝ်ၵေႃႈလႆႈၵိုတ်းသဝ်းယူႇၵႃႈတီႈႁိမ်းၶုၼ်လူင်ပေႇရသိတင်းလၢႆၵႃႈတီႈၼၼ်ႈဢေႃႈ။
၁၄ မိူဝ်ႈလဵဝ်ၼႆႉၸမ်းၵဝ်ႁွတ်ႈမႃးႁႂ်ႈမႂ်းလႆးႁူႉၸႅင်ႈလွင်ႈတၢင်းဢၼ်တၵ်းပဵၼ်မႃးတီႈၵူၼ်းမဵဝ်းလဵဝ်ၵၼ်တင်းမႂ်းၸိူဝ်းၼၼ်ႉၼႂ်းၶိင်ႇၵႃႇလႃႉမိုဝ်ႉဝၼ်းၵမ်းလိုၼ်းၼၼ်ႉယဝ်ႉ။ပျႃႇတိၵ်ႈရူႇပႃႇရုင်ႇၼႆႉၸၢပ်ႈသႅင်ႇၵၼ်တင်းၶိင်ႇၵႃႇလႃႉမိုဝ်ႉဝၼ်းယၢဝ်းယိုၼ်းၼႃႇဢေႃႈ၊ဝႃႈၼင်ႇၼႆဢေႃႈ။
၁၅ မိူဝ်ႈဢၼ်မၼ်းလၢတ်ႈၸိူဝ်ႉၼင်ႇၼၼ်တီႈၵဝ်ယဝ်ႉၼၼ်ႉၸိုင်ၵဝ်ဢဝ်ၼႃႈၵဝ်ၵူမ်ႈၸူးလိၼ်ယူႇလႄႈဢမ်ႇလၢတ်ႈၵႂၢမ်းလႄႈယူႇဢေႃႈ။
၁၆ မိူဝ်ႈၼၼ်ႉၵေႃႉဢၼ်မိူၼ်ၸိူဝ်ႉၼင်ႇႁၢင်ႊၽၢင်လုၵ်ႈၵူၼ်းၼၼ်ႉဢဝ်မိုဝ်းမၼ်းတိူဝ်ႉထုၵ်ႇသႂ်ႇသီႇသူပ်းၵဝ်လႄႈၵဝ်ၽုၺ်ႇသူပ်းၵဝ်လဝ်ႈလၢတ်ႈတီႈၵေႃႉဢၼ်ၸုၵ်းယူႇၵႃႈတီႈၽၢႆႇၼႃႈၵဝ်ၼၼ်ႉလႄႈဝႃႈ၊-ၸဝ်ႈၵဝ်ၶႃႈဢိူၺ်း။တုၵ်ႉၶႃႉဝူၺ်ႇတၼႃႇၵဝ်ၶႃႈၶိုၼ်းမႃးႁွတ်ႈထိုင်ၵႃႈၼိူဝ်ၵဝ်ၶႃႈၵွပ်ႈပိူဝ်ႈရူႇပႃႇရုင်ႇလႄႈၵဝ်ၶႃႈဢမ်ႇမီးႁႅင်းလႃးလႃးၶႃႈယဝ်ႉ။ၶႃႈၸဝ်ႈႁဝ်းၼႆႉတၵ်းလၢတ်ႈၵႂၢမ်းတေႃႇၵၼ်ၸဝ်ႈႁဝ်းလႆႈၸိူဝ်ႉၼင်ႇႁိုဝ်ၶႃႈ။
၁၇ မိူဝ်ႈလဵဝ်ၼႆႉၵဝ်ၶႃႈဢမ်ႇမီးႁႅင်းလႃးလႃးယဝ်ႉ။ဢသၢၵ်ႈၵဝ်ၶႃႈၵေႃႈဢမ်ႇၵိုတ်းၵျၢၼ်ႇဝႆႉတီႈၵဝ်ၶႃႈၶႃႈယဝ်ႉ၊ဝႃႈၼင်ႇၼႆဢေႃႈ။
၁၈ လိုၼ်းၼၼ်ႉၵေႃႉဢၼ်မီးႁၢင်ႊၽၢင်ၵူၼ်းၼၼ်ႉသမ်ႉမႃးတိူဝ်ႉထုၵ်ႇၵဝ်သေလႄႈပၼ်ႁႅင်းတီႈၵဝ်သေယဝ်ႉလၢတ်ႈတီႈၵဝ်လႄႈဝႃႈ၊-ၵေႃႉဢၼ်လီႁၵ်ႉလီပႅင်းၼႃႇဢိူၺ်း။
၁၉ ယႃႇပေၵူဝ်ပေႁႄ။ႁႂ်ႈမီးတၢင်းဢၼ်ၼိမ်သေၵမ်းလူၺ်ႈ။မီးႁႅင်းၼမ်ၼမ်တႃႉ၊ဝႃႈၼင်ႇၼႆဢေႃႈ။မၼ်းဝႃႈၸိူဝ်ႉၼင်ႇၼၼ်သေယဝ်ႉၵဝ်လႆႈႁႅင်းမႃးလႄႈလၢတ်ႈလႄႈဝႃႈ၊-ၸဝ်ႈၵဝ်ၶႃႈဢိူၺ်း။မီးဢမိင်ႉသေၵမ်းၶႃႈ။ၸဝ်ႈႁဝ်းပၼ်ႁႅင်းတီႈၵဝ်ၶႃႈယဝ်ႉ၊ဝႃႈၼင်ႇၼႆဢေႃႈ။
၂၀ ၵေႃႉၼၼ်ႉၵေႃႈလၢတ်ႈလႄႈဝႃႈ၊-မႂ်းႁူႉၸႅင်ႈလွင်ႈဢၼ်ၵဝ်လႆႈမႃးၵႃႈတီႈမႂ်းၵွပ်ႈပိူဝ်ႈၸိူဝ်ႉၼင်ႇႁိုဝ်ၼၼ်ႉႁိုဝ်။ၵဝ်တၵ်းလႆႈၶိုၼ်းမိူဝ်းၵႂႃႇမိူဝ်ႈလဵဝ်ၼႆႉႁႂ်ႈလႆႈတိုၵ်းတေႃးၶုၼ်ပေႇရသိၼၼ်ႉဢေႃႈ။လိုၼ်းသေဢၼ်ၵဝ်ၶိုၼ်းမိူဝ်းယဝ်ႉၼၼ်ႉၶုၼ်ႁေႇလသၼၼ်ႉတၵ်းပေႃႇမႃးဢေႃႈ။
၂၁ ၵူၺ်းၵႃႈၵဝ်တၵ်းၼႄပျႃးလွင်ႈဢၼ်မၢတ်ႈမၢႆတႅမ်ႈဝႆႉၵႃႈၼႂ်းသမ်ႇမႃႇၵျၢမ်းလိၵ်ႈၼၼ်ႉလူးၵွၼ်ႇဢေႃႈ။ၼွၵ်ႈသမေိၵ်ႉၶေႇလၶုၼ်သူၼၼ်ႉဢမ်ႇမီးၵေႃႉဢၼ်ဢဝ်ႁႅင်းဢွၵ်ႇယူႇၽၢႆႇၵဝ်ၼႂ်းဢမူႉၼႆႉသေၵေႃႉသေၵူၼ်းလႃးလႃး။