၃
ရူၵ်ႉထုၶမ်း
၁ ၶုၼ်လူင်ၼေႇပုၶတ်ႉၼေႇၸႃႇၼၼ်ႉႁဵတ်းရုၵ်ႉထုၶမ်းဢၼ်တၢင်းသုင်မၼ်းမီးႁူၵ်းသိပ်းသွၵ်ႇ၊တၢင်ႈၵႂၢင်ႈမၼ်းႁူၵ်းသွၵ်ႇၼၼ်ႉသေလႄႈဢဝ်ပူၵ်းတင်ႈဝႆႉၵႃႈတီႈၼႂ်းပၢင်ႇပဵင်းတုရုၵႃႈၼႂ်းမိူင်းပႃႇပုလုၼ်ႇၼၼ်ႉဢေႃႈ။
၂ ၶုၼ်လူင်ၼေႇပုၶတ်ႉၼေႇၸႃႇၼၼ်ႉပွႆႇၸႂ်ႉၵူၼ်းၵႂုႇႁွင်ႉဢဝ်ၸဝ်ႈၾ၊မဵဝ်ႉဝူၼ်ႇ၊ၸႅတ်ႈၵၢႆး၊ၵူၼ်းလူင်ဢၼ်ၸီႇယၢင်ႇတြႃး၊ဝူၼ်ႇၵဵပ်းၶွၼ်ႇၸဝ်ႈ၊မူးမၢတ်ႈၽွင်းမိူင်းဢၼ်ႁူႉဢမူႉတြႃး၊မူးမၢတ်ႈၽွင်းမိူင်းဢၼ်တိူင်ႇပၢင်ႇ၊ၵူၼ်းဢၼ်မီးဢရႃႇၵႃႈၼႂ်းဢိူင်ႇၼႂ်းၵျၢၵ်ႈမိူင်းၸဝ်ႈတင်းသဵင်ႈတင်းလူင်ၼၼ်ႉမႃးၸူႉၵၼ်တုမ်ၵၼ်ၵႃႈတီႈပွႆးဢၼ်ႁဵတ်းဢၼူႉမေႃးတၼႃႇလူႇတၢၼ်းရုၵ်ႉထု
၃ ဢၼ်ၶုၼ်လူင်ၼေႇပုၶတ်ႉၼေႇၸႃႇပူၵ်းတင်ႈဝႆႉၼၼ်ႉလႄႈ၊ၸဝ်ႈၾ၊မဵဝ်ႉဝူၼ်ႇ၊ၸႅတ်ႈၵၢႆး၊ၵူၼ်းလူင်ဢၼ်ၸီႇယၢင်ႇတြႃး၊ဝူၼ်ႇၵဵပ်းၶွၼ်ႇၸဝ်ႈ၊မူးမၢတ်ႈၽွင်းမိူင်းဢၼ်ႁူႉဢမူႉတြႃး၊မူးမၢတ်ႈၽွင်းမိူင်းဢၼ်တိူင်ႇပၢင်ႇ၊ၵူၼ်းဢၼ်မီးဢရႃႇၵႃႈၼႂ်းဢိူင်ႇၼႂ်းၵျၢၵ်ႈမိူင်းၸဝ်ႈတင်းသဵင်ႈတင်းလူင်ၼၼ်ႉဢွၼ်ၵၼ်မႃးၸူႉၵၼ်တုမ်ၵၼ်ၵႃႈတီႈပွႆးဢၼ်ႁဵတ်းဢၼူႉမေႃးတၼႃႇလူႇတၢၼ်းရုၵ်ႉထုဢၼ်ၶုၼ်လူင်ၼေႇပုၶတ်ႉၼေႇၸႃႇပူၵ်းတင်ႈဝႆႉၼၼ်ႉဢေႃႈ။
၄ ၶဝ်ၼၼ်ႉဢွၼ်ၵၼ်ၸုၵ်းယူႇၵႃႈတီႈၽၢႆႇၼႃႈရုၵ်ႉထုဢၼ်ၶုၼ်လူင်ၼေႇပုၶတ်ႉၼေႇၸႃႇပူၵ်းတင်ႈဝႆႉၼၼ်ႉဢေႃႈ။မိူဝ်ႈၼၼ်ႉၵူၼ်းဢၼ်ပၢဝ်ႇဢၼ်သေႃႇၵေႃႉၼိုင်ႈႁွင်ႉပၢဝ်ႇႁွင်ႉသေႃႇလႄႈဝႃႈ၊-ၵူၼ်းမဵဝ်းဢၼ်လၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းၶဝ်ဢိူၺ်း။
၅ ဢမိင်ႉၸဝ်ႈမီးၸမ်းမိူဝ်ႈဢၼ်သူလႆႈငိၼ်းတၢင်းဢၼ်ပဝ်ႇႁႆႇၸႃႉၸဵမ်ၼႄးၶရႃႇတိင်ႇပီႇတရေႃးၵွင်ၶဵတ်ႇလႄႈတူႇရိယႃႇၵူႈၸိူဝ်ႉၵူႈမဵဝ်းၼၼ်ႉၸိုင်သူတၵ်းလႆႈဢွၼ်ၵၼ်ၶုပ်ႉမူပ်ႇၵူဝ်းၵႂၢႆႇရုၵ်ႉထုၶမ်းဢၼ်ၶုၼ်လူင်ၼေႇပုၶတ်ႉၼေႇၸႃပူၵ်းတင်ႈဝႆႉၼႆႉဢေႃႈ။
၆ ႁႂ်ႈဢဝ်ၵေႃႉဢၼ်ဢမ်ႇၶုပ်ႉမူပ်ႇဢမ်ႇၵူဝ်းၵႂၢႆႇၼၼ်ႉလႆႈၶၢမ်ႇထႅမ်ႈၶျႃးတူၵ်းသႂ်ႇၵႃႈၼႂ်းမုၵ်ႉၽႆးဢၼ်လုၵ်ႉမႆႈယူႇၼၼ်ႉၵမ်းလဵဝ်သေ၊ဝႃႈၼင်ႇၼႆဢေႃႈ။
၇ ပိူဝ်ႈၼႆလႄႈမိူဝ်ႈဢၼ်ၵူၼ်းမဵဝ်းၵႃႈမီးၼၼ်ႉငိၼ်းသဵင်တၢင်းဢၼ်ပဝ်ႇႁႆႇၸႃႉၸဵမ်ၼႄးၶရႃႇတိင်ႇပီႇတရေႃးၵွင်ၶဵတ်ႇလႄႈတူႇရိယႃႇၵူႈၸိူဝ်ႉၵူႈမဵဝ်းၼၼ်ႉၸိုင်ၵူၼ်းၵူႈၸိူဝ်ႉၵူႈမဵဝ်းဢၼ်လၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းတင်းသဵင်တင်းလူင်ၼၼ်ႉဢွၼ်ၵၼ်ၶုပ်ႉမူပ်ႇလႄႈၵူဝ်းၵႂၢႆႇရုၵ်ႉထုၶမ်းဢၼ်ၶုၼ်လူင်ၼေႇပုၶတ်ႉၼေႇၸႃႇပူၵ်းတင်ႈဝႆႉၼၼ်ႉဢေႃႈ။
၈ မိူဝ်ႈၼၼ်ႉၵမ်းလဵဝ်ၵူၼ်းၶႃႇလတေႇၵမ်ႈၽွင်ႈဢွၼ်ၵၼ်သုတ်ႉၸပ်းသုတ်ႉၸူးလႄႈတၢင်ႇဢပျႅတ်ႈတီႈၵူၼ်းယုတတင်းလၢႆသေလႄႈလဝ်ႈလၢတ်ႈတီႈၶုၼ်လူင်ၼေႇပုၶတ်ႉၼေႇၸႃႇလႄႈဝႃႈ၊-
၉ ၸဝ်ႈၶုၼ်လူင်တီႈၶႃႈ။ႁႂ်ႈဢသၢၵ်ႈၸဝ်ႈႁဝ်းလိပ်းယူႇတႃႇသေႇမၼ်ႈၶိူင်ႇသေၵမ်းလူၺ်ႈတီႈၶႃႈ။ၸဝ်ႈၶုၼ်လူင်တီႈၶႃႈ။
၁၀ ဢမိင်ႉၸဝ်ႈႁဝ်းဢၼ်ဝႃႈၵူၼ်းတင်းလၢႆၸိူဝ်းဢၼ်ငိၼ်းသဵင်တၢင်းဢၼ်ပဝ်ႇႁႆႇၸႃႉၸဵမ်ၼႄးၶရႃႇတိင်ႇပီႇတရေႃးၵွင်ၶဵတ်ႇတူႇရိယႃႇၵူႈၸိူဝ်ႉၵူႈမဵဝ်းၼၼ်ႉတၵ်းလႆႈဢွၼ်ၵၼ်ၶုပ်ႉမူပ်ႇၵူဝ်းၵႂၢႆႇရုၵ်ႉထုၶမ်းဢေႃႈ။
၁၁ ႁႂ်ႈဢဝ်ၵေႃႉဢၼ်ဢမ်ႇၶုပ်ႉမူပ်ႇ၊ဢမ်ႇၵူဝ်းၵႂၢႆႇၼၼ်ႉလႆႈၶၢမ်ႇထႅမ်ႈၶျႃးတူၵ်းၵႃႈၼႂ်းမုၵ်ႉၽႆးဢၼ်လုၵ်ႉမႆႈယူႇၼၼ်ႉသေ၊ဝႃႈၼင်ႇၼႆၼၼ်ႉမီးယဝ်ႉတီႈၶႃႈဢေႃႈ။
၁၂ မီးၵူၼ်းယုတဢၼ်ၸဝ်ႈႁဝ်းၶၢၼ်းဝႆႉႁႂ်ႈပဵၼ်ဝူၼ်ႇၵႃႈၼႂ်းမိူင်းပႃႇပုလုၼ်ႇဢၼ်ဝႃႈသႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၸိူဝ်းၼၼ်ႉ၊ၸဝ်ႈၶုၼ်လူင်တီႈၶႃႈၶဝ်ၼၼ်ႉဢမ်ႇႁဵတ်းပမႃႇၼႃႉတီႈဢမိင်ႉၸဝ်ႈႁဝ်းၶႃႈ။ဢမ်ႇႁဵတ်းဝၢတ်ႈတီႈၽြႃးၸဝ်ႈႁဝ်းၸိူဝ်းၼၼ်ႉၶႃႈ။ရုၵ်ႉထုၶမ်းဢၼ်ၸဝ်ႈႁဝ်းပူၵ်းတင်ႈဝႆႉၼႆႉၵေႃႈၶဝ်ဢမ်ႇၵူဝ်းၵႂၢႆႇတီႈၶႃႈ၊ဝႃႈၼင်ႇၼႆဢေႃႈ။
၁၃ မိူဝ်ႈၼၼ်ႉၶုၼ်လူင်ၼေႇပုၶတ်ႉၼေႇၸႃႇၸႂ်မႆႈၶႆႈၸႃႉလႄႈဢၢႆႁႅင်းတေႃးသႃႉမၼ်းဢွၵ်ႇႁႅင်းယႂ်ႇၼႃႇလူင်လၢင်သေလႄႈမီးဢမိင်ႉႁႂ်ႈႁွင်ႉဢဝ်သႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၶဝ်မႃးလႄႈၶဝ်ဢွၼ်ၵၼ်ႁွင်ႉဢဝ်ၶဝ်ၼၼ်ႉမႃးတီႈၶုၼ်ႁေႃၶမ်းၸွမ်းၵႃႈၼင်ႇဢၼ်မီးဢမိင်ႉၼၼ်ႉဢေႃႈ။
၁၄ ၼေႇပုၶတ်ႉၼေႇၸႃႇၼၼ်ႉမီးဢမိင်ႉတီႈၶဝ်လႄႈဝႃႈ၊-သႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၶဝ်ဢိူၺ်း။သူမီးတၢင်းၵျၢမ်ႇတၢင်းပွင်ဢၼ်သူတၵ်းဢမ်ႇႁဵတ်းဝၢတ်ႈတီႈၽြႃးၵဝ်လႄႈဢမ်ႇၵူဝ်းၵႂၢႆႇရုၵ်ႉထုၶမ်းဢၼ်ၵဝ်ပူၵ်းတင်ႈဝႆႉၼၼ်ႉႁိုဝ်။
၁၅ မိူဝ်ႈလဵဝ်ၼႆႉမိူဝ်ႈဢၼ်သူလႆႈငိၼ်းသဵင်တၢင်းဢၼ်ပဝ်ႇႁႆႇၸႃႉၸဵမ်ၼႄးၶရႃႇတိင်ႇပီႇတရေႃးၵွင်ၶဵတ်ႇလႄႈတူႇရိယႃႇၵူႈၸိူဝ်ႉၵူႈမဵဝ်းၸိူဝ်းၼၼ်ႉပေႃးသူမႄးႁႅၼ်းဝႆႉႁႂ်ႈလႆႈၶုပ်ႉမူပ်ႇလႄႈၵူဝ်းၵႂၢႆႇရုၵ်ႉထုဢၼ်ၵဝ်ႁဵတ်းၼႆႉၸိုင်လီယဝ်ႉ။ပေႃးဢမ်ႇၵူဝ်းၵႂၢႆႇၸိုင်တၵ်းလႆႈဢဝ်သူထႅမ်ႈတူၵ်းသႂ်ႇၵႃႈၼႂ်းမုၵ်ႉၽႆးဢၼ်လုၵ်ႉမႆႈယူႇၼၼ်ႉၵမ်းလဵဝ်ဢေႃႈ။ၽြႃးဢၼ်တၵ်းၵႄႇသႄႇဢဝ်သူလွတ်ႈသေၵႃႈၼႂ်းမိုဝ်းၵဝ်ၼႆႉၸမ်းမီးၽြႃးဢၼ်လႂ်၊ဝႃႈၼင်ႇၼႆဢေႃႈ။
၁၆ သႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၸိူဝ်းၼၼ်ႉၵေႃႈလဝ်ႈလၢတ်ႈတီႈၶုၼ်လူင်ၼေႇပုၶတ်ႉၼေႇၸႃႇလႄႈဝႃႈ၊-ၶႃႈၸဝ်ႈႁဝ်းၶဝ်ဢမ်ႇမီးလွင်ႈဢၼ်တၵ်းလႆႈၶိုၼ်းလၢတ်ႈလူၺ်ႈလွင်ႈတီႈႁဵင်းၼႆႉတီႈၸဝ်ႈႁဝ်းၶႃႈတီႈၶႃႈ။
၁၇ ပေႃးၽြႃးပဵၼ်ၸဝ်ႈၸဝ်ႈၶႃႈၸဝ်ႈႁဝ်းၶဝ်ၵူဝ်းၵႂၢႆႇၼၼ်ႉၵႄႇသႄႇၼုၵ်ႈဢဝ်ၶႃႈၸဝ်ႈႁဝ်းၶဝ်ဢွၵ်ႇသေၵႃႈၼႂ်းမုၵ်ႉၽႆးဢၼ်လုၵ်ႉမႆႈယူႇၼၼ်ႉလႆႈၸိုင်ၵႃႈၼႂ်းမိုဝ်းၸဝ်ႈႁဝ်းၵေႃႈမၼ်းၸဝ်ႈတၵ်းၵႄႇသႄႇၼုၵ်ႈဢဝ်ၶႃႈၸဝ်ႈႁဝ်းလႆႈယူႇတီႈၶႃႈဢေႃႈ။
၁၈ ပိၵ်ႉသမ်ႉဢမ်ႇပဵၼ်ၸိူဝ်ႉၼင်ႇၼၼ်သေၵေႃႈၸဝ်ႈၶုၼ်လူင်တီႈၶႃႈ၊ႁႂ်ႈၸဝ်ႈႁဝ်းလႆႈႁူႉလွင်ႈဢၼ်ဝႃႈၶႃႈၸဝ်ႈႁဝ်းၶဝ်ဢမ်ႇႁဵတ်းဝၢတ်ႈတီႈၽြႃးၸဝ်ႈႁဝ်းၸိူဝ်းၼၼ်ႉလႄႈဢမ်ႇၵူဝ်းၵႂၢႆႇရုၵ်ႉထုဢၼ်ၸဝ်ႈႁဝ်းပူၵ်းတင်ႈဝႆႉၼႆႉၼၼ်ႉတီႈၶႃႈ၊ဝႃႈၼင်ႇၼႆဢေႃႈ။
၁၉ မိူဝ်ႈၼၼ်ႉၶုၼ်လူင်ၼေႇပုၶတ်ႉၼေႇၸႃႇၼၼ်ႉတဵမ်ဝႆႉတင်းဢၢႆႁႅင်းတေႃးသႃႉတၢင်းၸႂ်မႆႈၶႆႈၸႃႉဢၼ်ႁႅင်းယႂ်ႇၼႃႇလူင်လၢင်ၼၼ်ႉလႄႈၶၢႆႉပုတ်ႉၼႃႈမၼ်းတေႃႇသႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၸိူဝ်းၼၼ်ႉသေယဝ်ႉဢွၵ်ႇသူပ်းမီးဢမိင်ႉႁႂ်ႈၵူၼ်းမၼ်းႁဵတ်းႁႂ်ႈမုၵ်ႉၽႆးၼၼ်ႉယိင်ႈၶႅၼ်းမႆႈလိူဝ်တွၼ်းၼႃႇသမေိူဝ်ႈဢွၼ်တၢင်းၼၼ်ႉၸဵတ်းပုၼ်ႊဢေႃႈ။
၂၀ မၼ်းသမ်ႉမီးဢမိင်ႉတီႈႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇၵမ်ႈၽွင်ႈႁႂ်ႈၶဝ်မတ်ႉၽုၵ်ႈဢဝ်သႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၸိူဝ်းၼၼ်ႉထႅမ်ႈတူၵ်းသႂ်ႇၵႃႈၼႂ်းမုၵ်ႉၽႆးဢၼ်လုၵ်ႉမႆႈယူႇၼၼ်ႉလႄႈ
၂၁ ၵူၼ်းၸိူဝ်းၼၼ်ႉလႆႈၶၢမ်ႇတၢင်းဢၼ်မတ်ႉၽုၵ်ႈဢဝ်ပႃးလူၺ်ႈၵၼ်တင်းၵူၼ်၊သိူဝ်ႈ၊သိူဝ်ႈယၢဝ်း၊ၶူဝ်းၼုင်ႈၶဝ်သေလႄႈထႅမ်ႈတူၵ်းသႂ်ႇၵႃႈၼႂ်းမုၵ်ႉၽႆးဢၼ်လုၵ်ႉမႆႈယူႇၼၼ်ႉဢေႃႈ။
၂၂ ၵွပ်ႈပိူဝ်ႈဢၼ်ဢမိင်ႉၶုၼ်ႁေႃၶမ်းႁိပ်ႈၼႅတ်ႈလႄႈမုၵ်ႉၽႆးၼၼ်ႉမႆႈၼႃႇလူင်လၢင်လႄႈပိဝ်ၽႆးႁုပ်ႈမႆႈသႂ်ႇၶဝ်ၸိူဝ်းဢၼ်တိုတ်ႉၸၼ်သႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၸိူဝ်းၼၼ်ႉလႄႈတၢႆဢေႃႈ။
၂၃ ၶဝ်သၢမ်ၵေႃႉသႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၸိူဝ်းၼၼ်ႉၸမ်းလႆႈၶၢမ်ႇတၢင်းဢၼ်မတ်ႉၽုၵ်ႈယူႇသေလႄႈတူၵ်းႁွတ်ႈၵႃႈၼႂ်းမုၵ်ႉၽႆးဢၼ်လုၵ်ႉမႆႈႁႅင်းယႂ်ႇၼႃႇလူင်လၢင်ၼၼ်ႉဢေႃႈ။
၂၄ မိူဝ်ႈၼၼ်ႉၶုၼ်လူင်ၼေႇပုၶတ်ႉၼေႇၸႃႇၼၼ်ႉမီးတၢင်းဢၼ်ဢၢမ်းၼႃႇၵႂင်ၸႂ်ယုင်ႈၸႂ်ယူႇသေလႄႈလုၵ်ႉၶၼ်ၶၼ်ၽႂ်းၽႂ်းလႄႈထၢမ်တီႈမူးမၢတ်ႈၽွင်းမိူင်းဢၼ်တိူင်ႇပၢင်ႇၸိူဝ်းၼၼ်ႉလႄႈဝႃႈ၊-ႁဝ်းမတ်ႉၽုၵ်ႈဢဝ်ၵူၼ်းသၢမ်ၵေႃႉထႅမ်ႈတူၵ်းသႂ်ႇၵႃႈၼႂ်းၽႆးဢမ်ႇၸႂ်ႈႁိုဝ်၊ဝႃႈၼင်ႇၼႆလႄႈၶဝ်ၼၼ်ႉၵေႃႈဢွၼ်ၵၼ်ၶိုၼ်းလၢတ်ႈတီႈၶုၼ်ႁေႃၶမ်းလႄႈဝႃႈ၊-ၸႂ်ႈတီႈၶႃႈယဝ်ႉၸဝ်ႈၶုၼ်လူင်တီႈၶႃႈ၊ဝႃႈၼင်ႇၼႆဢေႃႈ။
၂၅ မၼ်းၸဝ်ႈမီးဢမိင်ႉလႄႈဝႃႈ၊-တူၺ်းလူ။ၵဝ်ႁၼ်ၵူၼ်းသီႇၵေႃႉယင်းဢမ်ႇမီးတၢင်းဢၼ်မတ်ႉဢၼ်ၽုၵ်ႈလႄႈပႆၵႂႃႇပႆမႃးယူႇၵႃႈၼႂ်းၵၢင်ၽႆးလႄႈၵၢင်းလွတ်ႈတင်းၽေးဢူးပၢတ်ႈၽႆးယူႇလူင်ပေႇ။ၵေႃႉၸတုၵ်ႉထၼၼ်ႉမီးႁၢင်ႊၽၢင်လုၵ်ႈၽြႃးပဵၼ်ၸဝ်ႈဢေႃႈ၊ဝႃႈၼင်ႇၼႆသေယဝ်ႉ၊
၂၆ ၼေႇပုၶတ်ႉၼေႇၸႃႇသုတ်ႉၸပ်းသုတ်ႉၸူးၵႃႈတီႈႁိမ်းပၢၵ်ႇမုၵ်ႉၽႆးဢၼ်လုၵ်ႉယူႇၼၼ်ႉသေလႄႈမီးဢမိင်ႉလႄႈဝႃႈ၊-သႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇ၊ၶႃႈၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉဢိူၺ်း။ဢွၼ်ၵၼ်ဢွၵ်ႇမႃးၵႃႈတီႈၼႆႉတႃႉ၊ဝႃႈၼင်ႇၼႆလႄႈသႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၸိူဝ်းၼၼ်ႉဢွၼ်ၵၼ်ဢွၵ်ႇသေၵႃႈၼႂ်းၽႆးၼၼ်ႉမႃးဢေႃႈ။
၂၇ မိူဝ်ႈၼၼ်ႉၸဝ်ႈၾ၊မဵဝ်ႉဝူၼ်ႇ၊ၸႅတ်ႈၵၢႆး၊ၵူၼ်းလူင်ဢၼ်ၸီႇယၢင်ႇတြႃး၊ဢတႂၢင်းဝူၼ်ႇတင်းလၢႆဢွၼ်ၵၼ်ဢုမ်ႇလွမ်ႉႁွပ်ႈသေလႄႈလူတူၺ်းၶဝ်လႄႈႁၼ်လွင်ႈဢၼ်ၽႆးဢမ်ႇမႆႈတူဝ်ၶဝ်၊သဵၼ်ႈၶူၼ်ႁူဝ်ၶဝ်ၵေႃႈဢမ်ႇၶႅမ်ႈသသေဵၼ်ႈ၊သိူဝ်ႈယၢဝ်းၶဝ်ၵေႃႈဢမ်ႇမီးတၢင်းဢၼ်လူႉၵႂႃႇပိူင်ႈၵႂႃႇ၊ဢၢႆဢၼႆ်းမႆႈၵေႃႈဢမ်ႇမီးလႃးလႃးၼၼ်ႉဢေႃႈ။
၂၈ ၶုၼ်လူင်ၼေႇပုၶတ်ႉၼေႇၸႃႇၵေႃႈမီးဢမိင်ႉလႄႈဝႃႈ၊-ႁႂ်ႈၽြႃးပဵၼ်ၸဝ်ႈသႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၼၼ်ႉမီးမင်ႇၵလႃႇသေၵမ်းလူၺ်ႈ။မၼ်းၸဝ်ႈၼၼ်ႉပွႆႇၸႂ်ႉတမၢၼ်ႇၵၢင်ႁၢဝ်မႃးၵႄႇသႄႇၶျွတ်ႈဢဝ်ၶႃႈမၼ်းၸဝ်ႈဢၼ်ယုမ်ႇမၢတ်ႈၸႂ်လီႈလူၺ်ႈမၼ်းၸဝ်ႈလႄႈပူၼ်ႉလိူဝ်ဢမိင်ႉၶုၼ်လူင်သေလႄႈဢဝ်တူဝ်ၶၼ်ႇထႃႇၶဝ်ဢၢပ်ႈပၼ်ႁႂ်ႈဢမ်ႇလႆႈႁဵတ်းဝတ်ႈၵူဝ်းၵႂၢႆႇၽြႃးတၢင်ႇသူႇတၢင်ႇပႃးၼွၵ်ႈသေၽြႃးပဵၼ်ၸဝ်ႈၶဝ်ၼၼ်ႉယဝ်ႉ။
၂၉ ပိူဝ်ႈၼႆလႄႈၵဝ်ပူင်ဢမိင်ႉလႄႈဝႃႈ၊-ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းဢၼ်လၢတ်ႈၵႂၢမ်းၽႃႇသႃႇၶေႃၶေႃႁင်းၽႂ်ႁင်းမၼ်းၼၼ်ႉ၊ၵေႃႉဢၼ်လၢတ်ႈၵႂၢမ်းဢၼ်ၽိတ်းပိူင်ႈတီႈၽြႃးပဵၼ်ၸဝ်ႈသႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇၼႆႉၼၼ်ႉတၵ်းလႆႈၶၢမ်ႇတၢင်းဢၼ်တႅပ်းၽၼ်းပဵၼ်ပွတ်းပဵၼ်တွၼ်ႈလႄႈႁိူၼ်းမၼ်းၵေႃႈတၵ်းလႆႈႁႂ်ႈပဵၼ်ၵွင်ၶီႈဝူဝ်းပႅတ်ႈဢေႃႈ၊ဝႃႈၼင်ႇၼႆဢေႃႈ။
၃၀ လွင်ႈမၼ်းၸမ်းတၢင်းဢၼ်ၵႄႇသႄႇၶျွတ်ႈဢဝ်ဢၼ်ထၢၼ်ႇၼႆႉၸိုင်ၼွၵ်ႈသေၽြႃးပဵၼ်ၸဝ်ႈၼၼ်ႉၽြႃးသူႇလႂ်ပႃးလႂ်ဢမ်ႇတတ်ႈၼိုင်ႇလႆႈဝႃႈၼင်ႇၼႆသေယဝ်ႉ၊ၶုၼ်ႁေႃၶမ်းယုၵ်ႉယွင်ႈသႃႇတရိၵ်ႉ၊မေႇသိၵ်ႉ၊ဢပေႇတၼေႇၵေႃႇဝႆႉၵႃႈၼႂ်းမိူင်းပႃႇပုလုၼ်ႇဢေႃႈ။