၁၀
၁မိူၼ်ၼင်ႇမႅင်းမုၼ်းဢၼ်တၢႆၼၼ်ႉႁဵတ်းႁႂ်ႈၼမ်ႉမၼ်းၼၢမ်ႇသႃႇဢၼ်ႁွမ်ဢၼ်ႁူၺ်းၼၼ်ႉတူႇၵႂႃႇမဵၼ်ၵႂႃႇၼၼ်ႉတၢင်းဢၼ်မိူၵ်ႈဢိတ်းဢွၼ်ႇၼိုင်ႈၼၼ်ႉၸၢင်ႊႁဵတ်းႁႂ်ႈမူၼ်ႈသရေႇတင်းၺၢၼ်ႇဢၼ်ထိူၵ်ႈၵႃႈထိူၵ်ႈၶၼ်ၼႃႇၼၼ်ႉပဵၼ်လၢႆလၢႆၵႂႃႇဢေႃႈ။
၂ႁူဝ်ၸႂ်ၵေႃႉဢၼ်မီးၺၢၼ်ႇၼၼ်ႉၸၢင်ႊၵႂႃႇၽၢႆႇၶွၼ်လႄႈႁူဝ်ၸႂ်ၵေႃႉဢၼ်မိူၵ်ႈၼၼ်ႉၸမ်းၸၢၼ်းဢေႃႈ။
၃ၵေႃႉဢၼ်မိူၵ်ႈၼၼ်ႉၼႂ်းမိူဝ်ႈဢၼ်မၼ်းယင်းတိုၵ်ႉၵႂႃႇတၢင်းပႆတၢင်းယူႇၼၼ်ႉၸိုင်မၼ်းၸၢင်ႊလိုမ်းသတိလႄႈၸၢင်ႊၼႄပျႃႉပၼ်ပိူၼ်တၢင်ႇၵေႃႉလွင်ႈဢၼ်ဝႃႈမၼ်းပဵၼ်ၵေႃႉဢၼ်မိူၵ်ႈၼၼ်ႉဢေႃႈ။
၄ပေႃးၶုၼ်ၸႂ်မႆႈၶႆႈၸႃႉတီႈမႂ်းၸိုင်ယႃႇပေၶၢႆႉသေၵႃႈတီႈဢၼ်တူဝ်မႂ်းထုၵ်ႇယူႇၼၼ်ႉ။တၢင်းဢၼ်ယိူၼ်ႉၶၢမ်ႇၼၼ်ႉၸၢင်ႊၽေႇဢပျႅတ်ႈဢၼ်ယႂ်ႇၼႃႇၼၼ်ႉဢေႃႈ။
၅လွင်ႈတၢင်းဢၼ်ႁၢႆႉဢၼ်ယုတ်ႈဢၼ်ၵဝ်လႆႈႁၼ်ၵႃႈတႂ်ႈၵၢင်ဝၼ်းဢၼ်ဝႃႈလွင်ႈတၢင်းဢၼ်ၽိတ်းပိူင်ႈဢၼ်ပဵၼ်မႃးၵႃႈတီႈၶုၼ်ၼၼ်ႉၸမ်း၊
၆ၵေႃႉဢၼ်မိူၵ်ႈၼၼ်ႉလႆႈၶၢၼ်းဝႆႉယူႇၵႃႈတီႈတီႈဢၼ်သုင်လႄႈၶဝ်ၸိူဝ်းဢၼ်မၢၵ်ႈဢၼ်မီးၼၼ်ႉလႆႈၼင်ႈယူႇၵႃႈတီႈဢၼ်တႅမ်ႇဢေႃႈ။
၇ၵဝ်လႆႈႁၼ်ၶႃႈလႆႈၶီႇမႃႉလႄႈမူးမၢတ်ႈၽွင်းမိူင်းလႆႈပႆတိၼ်ၵႂႃႇၵႃႈၼိူဝ်လိၼ်မိူၼ်ၸိူဝ်ႉၼင်ႇၶႃႈၼၼ်ႉယဝ်ႉ။
၈ၵေႃႉဢၼ်ၶုတ်ႉၶုမ်ၶုတ်ႉလုၵ်းၼၼ်ႉတၵ်းတူၵ်းသႂ်ႇၵႃႈၼႂ်းၶုမ်ၼႂ်းလုၵ်းၼၼ်ႉလႄႈၵေႃႉဢၼ်ယႃႉႁူဝ်ႉဝၢင်းပွင်ႇၼၼ်ႉတၵ်းလႆႈၶၢမ်ႇတၢင်းဢၼ်ငူးတွတ်ႇဢေႃႈ။
၉ၵေႃႉဢၼ်ၶၢႆႉဢွင်ႈၶၢႆႉတီႈမၢၵ်ႇႁိၼ်မၢၵ်ႇၽႃၼၼ်ႉတၵ်းလႆႈၶၢမ်ႇဢၼ်ၸဵပ်းဢၼ်သႅပ်ႇလႄႈၵေႃႉဢၼ်ၽႃႇၽိုၼ်းၵေႃႈတၵ်းလႆႈၶၢမ်ႇတၢင်းဢၼ်တိူဝ်ႉဢၼ်မၢတ်ႇဢေႃႈ။
၁၀ ယၢမ်းမိူဝ်ႈဢၼ်တႃမၢတ်ႇပူမ်လႄႈဢမ်ႇၽၢႆယဝ်ႉၼၼ်ႉပေႃးဢမ်ႇလပ်ႉၶိုၼ်းၸိုင်တၵ်းလႆႈယိင်ႈၶႅၼ်းဢဝ်ႁႅင်းဢွၵ်ႇလႄႈယုၵ်ႉသႂ်ႇဢေႃႈ။တၢင်းဢၼ်ၵတ်ႉၶႅၼ်ႇၸၢင်ႊပၼ်ဢၶႂၢင်ႉဢၼ်လႆႈပေႉဢမူႉလႄႈၵျေးၸူးယႂ်ႇဢေႃႈ။
၁၁ ပေႃးလႆႈၶၢမ်ႇငူးတွတ်ႇၸူဝ်ႈဢၼ်မေႃငူးယင်းဢမ်ႇပႆႇလႆႈၸေႃႉလႆႈႁဵတ်းၸိုင်ဢမ်ႇမီးဢၵျူဝ်းတီႈၵေႃႉဢၼ်မေႃငူးၼၼ်ႉ။
၁၂ ၵႂၢမ်းၵေႃႉဢၼ်မီးၺၢၼ်ႇၼၼ်ႉသေႇၶျႃႇလီငၢမ်းလႄႈသူပ်းၵေႃႉဢၼ်မိူၵ်ႈၼၼ်ႉၸမ်းၸၢင်ႊဢိုၼ်ၵိၼ်တူဝ်မၼ်းဢေႃႈ။
၁၃ ငဝ်ႈၵႂၢမ်းသူပ်းမၼ်းၼၼ်ႉပဵၼ်တၢင်းဢၼ်မိူၵ်ႈလႄႈတီႈသုတ်းၵႂၢမ်းသူပ်းမၼ်းၼၼ်ႉပဵၼ်တၢင်းဢၼ်ယွင်ႇဢၼ်မႃႈဢၼ်ၸၢင်ႊႁဵတ်းဢပျႅတ်ႈၼၼ်ႉဢေႃႈ။
၁၄ ၵေႃႉဢၼ်မိူၵ်ႈၼၼ်ႉၸၢင်ႊသူပ်းၼမ်ၵႂၢမ်းၼမ်ဢေႃႈ။ၵူၺ်းၵႃႈၵူၼ်းဢမ်ႇလၢတ်ႈလွင်ႈတၢင်းဢၼ်တၵ်းပဵၼ်မႃးၵမ်းလိုၼ်းၼၼ်ႉလႆႈ။လွင်ႈဢၼ်တၵ်းပဵၼ်မိူဝ်ႈၵမ်းလိုၼ်းၼၼ်ႉၸိုင်ၽူႈလႂ်လၢတ်ႈလႆႈ။
၁၅ တၢင်းဢၼ်ၵေႃႉဢၼ်မိူၵ်ႈၶတ်းၸႂ်ဢဝ်ႁႅင်းဢွၵ်ႇႁဵတ်းၼၼ်ႉၸၢင်ႊႁႂ်ႈမၼ်းယၢပ်ႇၸႂ်ၶၢၼ်ၸႂ်ၵွပ်ႈပိူဝ်ႈဢၼ်မၼ်းဢမ်ႇႁူႉသဵၼ်ႈတၢင်းဢၼ်ၵႂႃႇၸူးၵႃႈတီႈဝဵင်းၼၼ်ႉဢေႃႈ။
၁၆ မိူင်းဢိူၺ်း။ပေႃးၶုၼ်ႁေႃၶမ်းမႂ်းပဵၼ်လုၵ်ႈဢွၼ်ႇလႄႈမူးမၢတ်ႈၽွင်းမိူင်းမႂ်းတင်းလၢႆၵိၼ်ၶူပ်းၶိင်ႇၵၢင်ၼႂ်ၸဝ်ႉၸဝ်ႉၸိုင်မႂ်းမီးဢႃႉမၢင်ႇၵလႃႇဢေႃႈ။
၁၇ မိူင်းဢိူၺ်း။ပေႃးၶုၼ်ႁေႃၶမ်းမႂ်းပဵၼ်လုၵ်ႈၶုၼ်လႄႈမူးမၢတ်ႈၽွင်းမိူင်းမႂ်းတင်းလၢႆၵိၼ်ၶူပ်းၼႂ်းမိူဝ်ႈဢၼ်ၶိင်ႇမၼ်းထုၵ်ႇၼၼ်ႉၸိုင်ပဵၼ်ဢၼ်ႁႂ်ႈလႆႈထိင်းဢဵၼ်ထိင်းႁႅင်းလႄႈဢမ်ႇၸႂ်ႈၵိၼ်ပူၼ်ႉၵိၼ်လိူဝ်ၸိုင်မႂ်းမီးမၢင်ႇၵလႃႇဢေႃႈ။
၁၈ ၵွပ်ႈပိူဝ်ႈတၢင်းဢၼ်ၶၢၼ်ႉဢၼ်ဢိူၼ်ၼႃႇလူင်လၢင်ၼၼ်ႉလႄႈႁိူၼ်းၸၢင်ႊၽင်ႉဢူႉလူႉလႅဝ်ဢေႃႈ။ၵွပ်ႈပိူဝ်ႈဢၼ်ယင်းဢမ်ႇဢဝ်မိုဝ်းပွင်ႁဵတ်းပွင်မႄးၼၼ်ႉလႄႈႁိူၼ်းၸၢင်ႊၽူၼ်ႁူဝ်ႈဢေႃႈ။
၁၉ ႁဵတ်းပွႆးႁဵတ်းလၢမ်းႁႂ်ႈလႆႈမူၼ်ႈပျေႃႇလႄႈၼမ်ႉၸပိတ်ႉၵေႃႈၸၢင်ႊႁႂ်ႈသႂၢင်ႇသိူဝ်းဢေႃႈ။ငိုၼ်းၸမ်းၸၢင်ႊပေႉၼႅင်ႇၵူႈၸိူဝ်ႉၵူႈပိူင်ဢေႃႈ။
၂၀ ယႃႇပေၵိၼ်ႇပလေႃႇၶုၼ်ႁေႃၶမ်းယူႇၵႃႈၼႂ်းၸႂ်မႂ်းလႃးလႃးလႄႈယႃႇပေၵိၼ်ႇပလေႃႇၵူၼ်းမၢၵ်ႈၵူၼ်းမီးယူႇၵႃႈၼႂ်းလုၵ်းတီႈၼွၼ်းမႂ်းလႃးလႃး။လွင်ႈမၼ်းၸမ်းၼူၵ်ႉဢၼ်ၵႂႃႇမႃးၵႃႈၼိူဝႃ်ႉၵၢင်ႁၢဝ်ၼၼ်ႉတၵ်းပႃးဢဝ်သဵင်ၼၼ်ႉၵႂႃႇလႄႈတူဝ်ဢၼ်မီးပိၵ်ႇၼၼ်ႉတၵ်းၶိုၼ်းလၢတ်ႈၼႄလွင်ႈတၢင်းဢၼ်မႂ်းလၢတ်ႈၼၼ်ႉဢေႃႈ။