၉
သဵၼ်ႈတၢင်းဢၼ်ၵူၼ်းတလေႆႈၵႂႃႇၵူႈၵေႃႉ
၁ ၵဝ်ၶႆႈၸႂ်ဝူၼ်ႉၸႂ်ႁႂ်ႈလႆႈၸၢမ်းတူၺ်းလွင်ႈတၢင်းဢၼ်ဝႃႈမႃးၸိူဝ်းၼၼ်ႉၸမ်းၶဝ်ၸိူဝ်းဢၼ်သိုဝ်ႈတေႃႇ၊ၶဝ်ၸိူဝ်းဢၼ်မီးၺၢၼ်ႇဢိၵ်ႇတင်းလွင်ႈတၢင်းဢၼ်ၶဝ်ႁဵတ်းၸိူဝ်းၼၼ်ႉမီးယူႇၵႃႈၼႂ်းမိုဝ်းၽြႃးပဵၼ်ၸဝ်ႈဢေႃႈ။ၽူႈလႂ်ဢမ်ႇႁူႉလွင်ႈဢၼ်ပိူၼ်ႈတၵ်းႁၵ်ႉပႅင်းႁိုဝ်၊ပိူၼ်ႈတၵ်းၸင်းႁိုဝ်ဢၼ်ဝႃႈၼၼ်ႉလႆႈ။လွင်ႈတၢင်းၵႃႈမီးတင်းသဵင်ႈတင်းလူင်မီးၵႃႈတီႈဝၼ်းတႃမိူဝ်းၼႃႈၶဝ်ဢေႃႈ။
၂ လွင်ႈတၢင်းၵႃႈမီးႁွတ်ႈထိုင်ၵႃႈၼိူဝ်ၵူၼ်းတင်းသဵင်ႈတင်းလူင်မိူၼ်မိူၼ်ၵၼ်ဢေႃႈ။တီႈၵေႃႉဢၼ်တြႃးတီႈၵေႃႉဢၼ်ဢမ်ႇတြႃး၊ၵေႃႉဢၼ်လီလႄႈမူတ်းသႂ်ၵေႃႉဢၼ်ဢမ်ႇလီဢမ်ႇမူတ်းသႂ်၊ၵေႃႉဢၼ်ပုၵ်ႉၸေႃႇယိၸ်ႉ၊ၵေႃႉဢၼ်ဢမ်ႇပုၵ်ႉၸေႃႇယိၸ်ႉ၊ၵေႃႉဢၼ်ဢမ်ႇမီးဢပျႅတ်ႈ၊ၵေႃႉဢၼ်မီးဢပျႅတ်ႈ၊ၵေႃႉဢၼ်ၵိၼ်ႇဝႃႈဢိၵ်ႇတင်းၵေႃႉဢၼ်ၵူဝ်ႁႄတၢင်းဢၼ်ၵိၼ်ႇဝႃႈၸိူဝ်းၼၼ်ႉမိူၼ်မိူၼ်ၵၼ်ဢေႃႈ။
၃ လွင်ႈတၢင်းဢၼ်လီငိၼ်းၽၢၼ်ထိုင်ၸႂ်ၵႃႈဢၼ်ႁဵတ်းၵႃႈတီႈတႂ်ႈၵၢင်ဝၼ်းၼၼ်ႉလွင်ႈတၢင်းၸိူဝ်ႉလဵဝ်ပိူင်လဵဝ်မူၼ်ၵၼ်ႁွတ်ႈထိုင်ၵႃႈၼိူဝ်ၵူၼ်းတင်းသဵင်ႈတင်းလူင်ဢေႃႈ။ႁူဝ်ၸႂ်ၵူၼ်းႁဝ်းၼႆႉမီးတဵမ်ဝႆႉတင်းသၽေႃးတူႉၸရိူၵ်ႈဢမၢၼ်ႇၶၢၼ်ပဵၼ်လႄႈၸႂ်ဢၼ်ယွင်ႇဢၼ်မႃႈၼၼ်ႉမီးယူႇၵႃႈၼႂ်းႁူဝ်ၸႂ်ၶဝ်ၼႂ်းမိူဝ်ႈဢၼ်ဢသၢၵ်ႈၶဝ်ယင်းလိပ်းယူႇၼၼ်ႉသေလႄႈလိုၼ်းၼၼ်ႉၸင်ႇတၢႆၵႂႃႇတင်းသဵင်ႈဢေႃႈ။
၄ ၵေႃႉဢၼ်ၶဝ်ႈပႃးၼႂ်းၶဝ်ၸိူဝ်းဢၼ်ဢသၢၵ်ႈယင်းလိပ်းယူႇၼၼ်ႉမီးတီႈဢၼ်မုင်ႈထႃႈမွင်းထႃႈလႄႈမႃဢၼ်ဢသၢၵ်ႈယင်းလိပ်းယူႇၼၼ်ႉယိင်ႈၶႅၼ်းလီၼႃႇသေသၢင်ႇသီႈဢၼ်တၢႆၼၼ်ႉဢေႃႈ။
၅ ၶဝ်ၸိူဝ်းဢၼ်ဢသၢၵ်ႈယင်းလိပ်းယူႇၼၼ်ႉႁူႉလွင်ႈဢၼ်ၶဝ်တၵ်းလႆႈတၢႆၼၼ်ႉယူႇဢေႃႈ။ၶဝ်ၸိူဝ်းဢၼ်တၢႆယဝ်ႉၼၼ်ႉၸမ်းဢမ်ႇႁူႉလွင်ႈတၢင်းသေၸိူဝ်ႉသေပိူင်လႃးလႃး။ၶဝ်ဢမ်ႇၶၢမ်ႇမီးဢၵျူဝ်းဢပျႅတ်ႈထႅင်ႈယဝ်ႉ။ပိူၼ်ႈၸၢင်ႊဢွၼ်ၵၼ်လူင်လိုမ်းၶဝ်ပႅတ်ႈဢေႃႈ။
၆ တၢင်းဢၼ်ႁၵ်ႉၶဝ်၊တၢင်းဢၼ်ၸင်းၶဝ်၊တၢင်းသီႇၵေႉႁႄႈတႃၶဝ်ၵေႃႈလူႉၵႂႃႇႁၢႆၵႂႃႇလႄႈၶဝ်ယင်းဢမ်ႇမီးပုၼ်ႈမီးတႃႇလူၺ်ႈၵၼ်တင်းပိူၼ်ႈတၢင်ႇၵေႃႉၵႃႈၼႂ်းလွင်ႈတၢင်းဢၼ်ႁဵတ်းၵႃႈတီႈတႂ်ႈၵၢင်ဝၼ်းၼႆႉၸိူဝ်းၼၼ်ႉယဝ်ႉ။
၇ ၵႂႃႇတႃႉ။မီးတၢင်းဢၼ်ၸူမ်းသိူဝ်းသေလႄႈၵိၼ်တၢင်းၵိၼ်တၢင်းၶူပ်းမႂ်းတႃႉ။မီးတင်းၸႂ်ဢၼ်သိူဝ်းသႂၢင်ႇသိူဝ်းလႄႈသူတ်ႉၵိၼ်ၼမ်ႉၸပိတ်ႉမႂ်းတႃႉ။ၽြႃးပဵၼ်ၸဝ်ႈႁပ်ႉတုင်းဢဝ်လွင်ႈတၢင်းဢၼ်မႂ်းႁဵတ်းၸိူဝ်းၼၼ်ႉယဝ်ႉ။
၈ ႁႂ်ႈၶူဝ်းၼုင်ႈတၢင်းမႆမႂ်းၽိူၵ်ႇၶၢဝ်ယူႇသေႇသေႇသေၵမ်း။ၵွၵ်းႁူဝ်မႂ်းၵေႃႈယႃႇပေႁႂ်ႈၼမ်ႉမၼ်းလႆႈယူတ်းလႆႈႁႅင်ႈသေၵမ်း။
၉ ၸူမ်းသိူဝ်းသႂၢင်ႇၸႂ်လူၺ်ႈၵၼ်တင်းမေႈမႂ်းဢၼ်မႂ်းႁၵ်ႉၼႃႇၼၼ်ႉၸူဝ်ႈဢသၢၵ်ႈဢႃႉၼတ်ႉတႃႉဢၼ်မၼ်းၸဝ်ႈဢိတ်းလူပၼ်တီႈမႂ်းၵႃႈတီႈတႂ်ႈၵၢင်ဝၼ်းၼႆႉၼၼ်ႉတဵမ်တဵမ်ထူၼ်ႈထူၼ်ႈလႄႈႁႂ်ႈၸူဝ်ႈဢသၢၵ်ႈဢႃႉၼတ်ႉတႃႉမႂ်းပူၼ်ႉၵႂႃႇတႃႉ။ဢၼ်ၼႆႉၸမ်းပဵၼ်ပုၼ်ႈပဵၼ်တႃႇဢၼ်မႂ်းလႆႈၶၢမ်ႇဢဝ်ၵႃႈၼႂ်းၸူဝ်ႈဢၼ်ဢသၢၵ်ႈမႂ်းယင်းလိပ်းယူႇၼၼ်ႉလႄႈမႂ်းၶတ်းၸႂ်ဢဝ်ႁႅင်းဢွၵ်ႇႁဵတ်းၵႃႈတီႈတႂ်ႈၵၢင်ဝၼ်းၼႆႉ၁၀ ၼၼ်ႉဢေႃႈ။
၁၀ လွင်ႈတၢင်းဢၼ်လီပွင်လီႁဵတ်းၵႃႈမီးၼၼ်ႉၸိုင်ၶတ်းၸႂ်ဢဝ်ႁႅင်းဢွၵ်ႇလႄႈပွင်ႁဵတ်းတႃႉ။လွင်ႈမၼ်းၸမ်းၵႃႈတီႈမိူင်းမရၼႃႉဢၼ်ဝႃႈတီႈဢၼ်မႂ်းယင်းတိုၵ်ႉၵႂႃႇၸူးယူႇၼၼ်ႉဢမ်ႇမီးတၢင်းဢၼ်ပွင်ဢၼ်ႁဵတ်း၊တၢင်းဢၼ်ၵျၢမ်ႇဢၼ်ပွင်၊ဢတၢတ်ႈဢၼ်ႁူႉဢၼ်ၸၢင်ႊဢိၵ်ႇတင်းပိင်ႇၺႃႇလူင်ပေႇ။
၁၁ လၢႆးသမ်ႉၵဝ်ဝၢႆႇၶိုၼ်းလႄႈလူတူၺ်းၵႃႈတီႈတႂ်ႈၵၢင်ဝၼ်းၼႆႉလႄႈလႆႈႁၼ်လွင်ႈဢၼ်၊တၢင်းၶႄႉၶဵင်ႇၶုၼ်ႇလႅၼ်ႈၼၼ်ႉဢမ်ႇမီးတီႈၵေႃႉဢၼ်ၶၼ်ၽႂ်းတၢင်းဢၼ်တိုၵ်းသိုၵ်းၼၼ်ႉဢမ်ႇမီးတီႈၵေႃႉဢၼ်ႁႅင်းယႂ်ႇၼႃႇၼၼ်ႉ၊တၢင်းၵိၼ်တၢင်းၶူပ်းဢမ်ႇမီးတီႈၵေႃႉဢၼ်မီးၺၢၼ်ႇၼၼ်ႉ၊ၸေးၸိမ်ႇဢမ်ႇမီးတီႈၵေႃႉဢၼ်ၺၢၼ်ႇလီၼၼ်ႉ၊တၢင်းဢၼ်လႆႈၼႃႈလႆႈတႃတီႈပိူၼ်ႈၼၼ်ႉဢမ်ႇမီးတီႈၵေႃႉဢၼ်လၵ်းလႅမ်ၼၼ်ႉ။ၶိင်ႇမၼ်းၶႃႇမၼ်းဢိၵ်ႇတင်းတၢင်းဢၼ်သၢင်ႇထုၵ်ႇၼၼ်ႉၸၢင်ႊပဵၼ်တီႈၵူၼ်းတင်းသဵင်ႈတင်းလူင်ဢေႃႈ။
၁၂ ၵူၼ်းၸိုင်ဢမ်ႇၸၢင်ႊႁူႉၶိင်ႇႁူႉမိူဝ်ႈတူဝ်ၸဝ်ႈၵဝ်ႇ။ပႃၸိုင်ၸၢင်ႊၶမ်ၼႂ်းၶႄဢၼ်ႁူမ်ႇသုမ်ႇမႅၼ်ႈၼၼ်ႉလႄႈၼူၵ်ႉၵေႃႈၸၢင်ႊထုၵ်ႇၶဵၼ်းမႅၼ်ႈၵႃႈတီႈတူင်ႇႁဵဝ်ႉဢေႃႈ။ၵူၼ်းႁဝ်းၼႆႉၵေႃႈၸၢင်ႊႁွတ်ႈထိုင်ၵႃႈၼႂ်းတူင်ႇႁဵဝ်ႉၼႂ်းမိူဝ်ႈဢၼ်ၽေးႁွတ်ႈထိုင်ၼၼ်ႉလႄႈၶီႉၶႃႉထုၵ်ႇၶဵၼ်းမႅၼ်ႈၵမ်းလဵဝ်ဢေႃႈ။
ၺၢၼ်ႇလီသေဢၼ်မိူၵ်ႈ
၁၃ ၺၢၼ်ႇဢၼ်ၵဝ်ႁၼ်ၵႃႈတီႈတႂ်ႈၵၢင်ဝၼ်းလႄႈလီယွင်ႈယေႃးၼႃႇၸမ်း၊မီးဝဵင်းဢွၼ်ႇဢၼ်ၵူၼ်းဝဵင်းၵေႇၼၼ်ႉဝဵင်းၼိုင်ႈဢေႃႈ။
၁၄ ၶုၼ်ႁေႃၶမ်းလူင်ပႃးၼိုင်ႈမႃးလႄႈလွမ်ႉဝႆႉသေယဝ်ႉတႄႇႁဵတ်းတပ်ႉဢၼ်ယႂ်ႇၼႃႇတင်းလၢႆၵႃႈၼွၵ်ႈဝဵင်းဢေႃႈ။
၁၅ ၵေႃႉဢၼ်ယၢၵ်ႈဢၼ်ၽၢၼ်ၵေႃႉၼိုင်ႈဢၼ်မီးၺၢၼ်ႇၼၼ်ႉမီးယူႇၵႃႈၼႂ်းဝဵင်းၼၼ်ႉလႄႈမၼ်းၼၼ်ႉဢဝ်တင်းၺၢၼ်ႇမၼ်းသေလႄႈၵႄႇသႄႇဢဝ်ဝဵင်းၼၼ်ႉလွတ်ႈဢေႃႈ။ၵူၺ်းၵႃႈၽူႈလႂ်သေၵေႃႉသေၵူၼ်းဢမ်ႇၶုၵ်းၸႂ်လႆႈၶႆႈၸႂ်ထူပ်းၵေႃႉဢၼ်ယၢၵ်ႈဢၼ်ၽၢၼ်ၼၼ်ႉ။
၁၆ မိူဝ်ႈၼၼ်ႉၵဝ်ဝႃႈၸမ်း၊ၺၢၼ်ႇယိင်ႈၶႅၼ်းလီမျၢတ်ႈလိူဝ်တွၼ်းၼႃႇသေႁႅင်းဢေႃႈ။ၼႂ်းဝႃႈၼၼ်သေၵေႃႈၶဝ်ဢွၼ်ၵၼ်ႁဵတ်းဢမ်ႇပေႃးၼင်ႇႁိုဝ်တီႈၺၢၼ်ႇၵေႃႉဢၼ်ယၢၵ်ႈဢၼ်ၽၢၼ်ၼၼ်ႉလႄႈဢမ်ႇဢွၼ်ၵၼ်ထွမ်ႇဢဝ်ၵႂၢမ်းမၼ်း။
၁၇ ထုၵ်ႇလီဢွၼ်ၵၼ်ထွမ်ႇဢဝ်ၵႂၢမ်းဢၼ်ၵေႃႉဢၼ်မီးၺၢၼ်ႇဢၼ်လၢတ်ႈတဵတ်ႇတဵတ်ႇၼိမ်ၼိမ်ၼၼ်ႉလိူဝ်တွၼ်းၼႃႇသေထွမ်ႇဢဝ်သဵင်ၵေႃႉဢၼ်ဢုပ်ႉပိူင်ႇဢၼ်ႁွင်ႉပၢဝ်ႇႁွင်ႉသေႃႇၵႃႈၼႂ်းၶဝ်ၸိူဝ်းဢၼ်မိူၵ်ႈၼၼ်ႉဢေႃႈ။
၁၈ ၺၢၼ်ႇယိင်ႈၶႅၼ်းလီၼႃႇသေလၢၵ်ႈၼၢၵ်ႈဢၼ်တိုၵ်းသိုၵ်းၼၼ်ႉဢေႃႈ။ၵႃႈဢၼ်ႁဵတ်းတူႉၸရိူၵ်ႈၼၼ်ႉၵေႃႈၸၢင်ႊယႃႉၽဵဝ်ႈလွင်ႈတၢင်းဢၼ်လီဢၼ်ငၢမ်းပႅတ်ႈၼမ်ၼႃႇဢေႃႈ။