Chapter
၅၀
၁ မိူဝ်ႈၼၼ်ႉ ယုဝ်းသႅပ်ႉ ၵုမ်ႇၶူမ်ၵႃႈၼိူဝ်ၼႃႈပေႃႈမၼ်း လႄႈႁွင်ႉႁႆႈယူႇၸုမ်ႇၼူမ်ႈယူႇဢေႃႈ။
၂ ယုဝ်းသႅပ်ႉမီးဢမိင်ႉတီႈၶႃႈမၼ်းၵူၼ်းမၼ်း ဢၼ်ပဵၼ်မေႃယႃတင်းလၢႆႁႂ်ႈၶဝ်ဢဝ်တင်း မဵဝ်းၼၢမ်ႇသႃႇတင်းလၢႆမႄးႁႅၼ်းတူဝ်တၢႆပေႃႈမၼ်းဝႆႉႁႂ်ႈဢမ်ႇလႆႈတူႇလႆႈၼဝ်ႈလႄႈ မေႃယႃၸိူဝ်းၼၼ်ႉၵေႃႈ ဢဝ်တင်းမဵဝ်းၼၢမ်ႇသႃႇတင်းလၢႆ မႄးႁႅၼ်းဝႆႉႁႂ်ႈဢမ်ႇလႆႈတူႇလႆႈၼဝ်ႈဢေႃႈ။
၃ ၸွမ်းၼင်ႇထုင်းၸၢမ်ႇမိူဝ်ႉဝၼ်း ဢၼ်ဢဝ်တင်းမဵဝ်းၼၢမ်ႇသႃႇမႄးႁႅၼ်းတူဝ်တၢႆဝႆႉႁႂ်ႈဢမ်လႆႈတူႇလႆႈၼဝ်ႈၼၼ်ႉထူၼ်ႈတဵမ်ယဝ်ႉသီႇသိပ်းဝၼ်းလႄႈ ၵူၼ်းဢေႇၵႅပ်ႉတုတင်းလၢႆ ဢွၼ်ၵၼ်ႁဵတ်း တၢင်း ဢၼ်ထိုင်ၸႂ်ႁွင်ႉႁႆႈၵွပ်ႈပိူဝ်ႈမၼ်းၼၼ်ႉၸဵတ်းသိပ်းဝၼ်းတဵမ်တဵမ်ဢေႃႈ။
၄ မိူဝ်ႈဢၼ်ဝၼ်းဢၼ်ထိုင်ၸႂ်ႁွင်ႉႁႆႈၼၼ်ႉ ပူၼ်ႉၵွႃႇယဝ်ႉၼၼ်ႉၸိုင်၊ယုဝ်းသႅပ်ႉ ႁွင်ႉဢဝ် ၵူၼ်းၼႂ်းႁေႃၶမ်းၵမ်ႈၽွင်ႈလႄႈလၢတ်ႈဝႃႈ၊-ပေႃးၵဝ်ၶႃႈလႆႈထူပ်းၵျေးၸူးသိုဝ်ႈၼႃႈတႂ်ႈတႃသူၸဝ်ႈ ၸိုင် လဝ်ႈလၢတ်ႈထိုင်ႁူၶုၼ် ႁေႃၶမ်းၽႃႇရေႃးလႄႈဝႃႈ၊-
၅ ပေႃႈၶဝ်ႈၸဝ်ႈႁႂ်ႈၶႃႈၸဝ်ႈတိူင်ႇဝႃႈဝႆႉလႄႈဝႃႈ၊- ၵဝ်တၵ်းတၢႆယဝ်ႉ။မႂ်းတၵ်းလႆႈဢဝ်ၵဝ်သၢင်း ၵျူဝ်ႇ ၵႃႈၼႂ်းၶုမ်ပႃႇႁဵဝ်ႈ ဢၼ်ၵဝ်လႆႈၶုတ်းဝႆႉယဝ်ႉပုၼ်ႈၵဝ်ၵႃႈတီႈမိူင်းၶႃႇၼၼ်ႇ ပုၼ်ႉဢေႃႈ၊ ဝႃႈ ၼင်ႇ ၼႆတီႈၶႃႈယဝ်ႉ။
၆ ပိူဝ်ႈၼႆလႄႈၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈလႆႈၶိုၼ်ႈၵွႃႇလႄႈ သၢင်းၵျူဝ်ႇပေႃႈၶႃႈၸဝ်ႈသေယဝ်ႉ၊ သမ်ႉၶိုၼ်းလူင်းမႃးၵႃႈတီႈၼႆႉသေၵမ်းတီႈၶႃႈ၊ဝႃႈၼင်ႇၼႆသေၵမ်း၊ဝႃႈၼင်ႇၼႆဢေႃႈ။
၇ ယုဝ်းသႅပ်ႉ ၶိုၼ်ႈၵွႃႇႁႂ်ႈလႆႈသၢင်းၵျူဝ်ႇပေႃႈမၼ်းလႄႈၶႃႈၵူၼ်းၶုၼ်ႁေႃၶမ်းၽႃႇရေႃး ဢၼ်ပဵၼ် ၶဝ် ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းႁေႃၶမ်း တင်းသဵင်ႈတင်းလူင်တင်းၶဝ်ၸိူဝ်းဢၼ် ပဵၼ်ၵႄႇပဵၼ်ႁူဝ် ၼႂ်းမိူင်း ဢေႇၵႅပ်ႉတု တင်းသဵင်ႈတင်းလူင်၊
၈ ဢိၵ်ႇတင်းၵူၼ်းႁိူ်ၼ်းၵူၼ်းယေးယုဝ်းသႅပ်ႉ တင်းသဵင်ႈတင်းလူင်၊ၵူၼ်းႁိူၼ်းၵူၼ်းယေးပီႈဢၢႆႈမၼ်းတင်းၵူၼ်းႁိူၼ်းၵူၼ်းယေးပေႃႈမၼ်းတင်းလၢႆၼၼ်ႉ ဢွၼ်ၵၼ်ၸွမ်းၵွႃႇလူၺ်ႈၵၼ်တင်းမၼ်းဢေႃႈ။ၶဝ်ႁႂ်ႈလုၵ်ႈဢွၼ်ႇၶဝ်တင်းၽုင်သူဝ်းၽုင်ဝူဝ်းၶဝ်ၵူၺ်း ၵိုတ်းၵျၢၼ်ႇယူႇၵႃႈၼႂ်းမိူင်း ၵေႃႇသိၼ်ႇၼၼ်ႉဢေႃႈ။
၉ ၼင်ႇၼၼ်လႄႈလေႃႉရထႃးလႂ်ၵူၼ်းသိုၵ်းၶီႇမႃႉလႂ် ဢွၼ်ၵၼ်ၸွမ်းလူၺ်ႈၵၼ်တင်းယုဝ်းသႅပ်ႉ ၶိုၼ်ႈၵွႃႇဢေႃႈ။ပဵၼ်တပ်ႉပဵၼ်တႃႇဢၼ်ယႂ်ႇ ၵႂၢင်ႈၼမ်ၼႃႇလူင်လၢင်ဢေႃႈ။
၁၀ ၶဝ်ႁွတ်ႈထိုင်ၵႃႈတီႈတလၢင်းယဵပ်ႇၶဝ်ႈဢႃႇတတ်ႉ ဢၼ်မီးယူႇၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇ ၼၼ်ႉလႄႈသမ်ႉဢွၼ်ၵၼ်ႁဵတ်းတၢင်းဢၼ်ပေႃႉဢူၵ်းႁွင်ႉႁႆႈ ဢၼ်ယႂ်ႇၼႃႇဢေႃႈ။ ယုဝ်းသႅပ်ႉ ၼၼ်ႉၵွပ်ႈပိူဝ်ႈပေႃႈမၼ်းၼၼ်ႉလႄႈ ႁဵတ်းတၢင်းဢၼ်ထိုင်ၸႂ် ႁွင်ႉႁႆႈၸဵတ်းဝၼ်းတဵမ် တဵမ် ဢေႃႈ။
၁၁ မိူဝ်ႈဢၼ်ၵူၼ်းၶႃႇၼၼိ ဢၼ်ပဵၼ်ၵူၼ်းမိူင်းၼၼ်ႉၸိူဝ်းၼၼ်ႉႁၼ်တၢင်းဢၼ်ၶဝ်ထိုင်ၸႂ် ႁွင်ႉ ႁႆႈၵႃႈတီႈတလၢင်းယဵပ်ႇၶဝ်ႈဢႃႇတတ်ႉ ၸိူဝ်ႉၼင်ႇၼၼ်ၼၼ်ႉၸိုင်ၶဝ်လၢတ်ႈဝႃႈ၊-ပဵၼ်တၢင်း ဢၼ်ၵူၼ်းဢေႇၵႅပ်ႉတုၶဝ်ထိုင်ၸႂ်ႁွင်ႉႁႆႈယႂ်ႇၼႃႇၵႃႈတီႈၼႆႉဢေႃႈ။ပိူဝ်ႈၼႆလႄႈၶဝ်ႁွင်ႉႁိၵ်ႈ တီႈဢၼ်မီးယူႇႁိမ်းၽၢႆႇပုၼ်ႉ ၼမ်ႉႁွင်ႊယေႃးတၢၼ်ႇ ၼၼ်ႉဝႃႈ ဢပေႇလမိၸရိမ်ႇ ဝႃႈၼႆ ဢေႃႈ။
၁၂ လုၵ်ႈၸၢႆးမၼ်းၸိူဝ်းၼၼ်ႉဢွၼ်ၵၼ်ႁဵတ်းၸွမ်း ၵႃႈၼင်ႇဢၼ်ပေႃႈၶဝ် သင်ႇလၢတ်ႈဝႆႉၼၼ်ႉ ဢေႃႈ။
၁၃ လုၵ်ႈၸၢႆးမၼ်းၸိူဝ်းၼၼ်ႉဢွၼ်ၵၼ်ဢဝ်မၼ်းၵွႃႇၵႃႈတီႈမိူင်းၶႃႇၼၼ်ႇ လႄႈသၢင်းၵျူဝ်ႇ ၵႃႈၼႂ်းႁူးလဝ်ႇ ဢၼ်မီးၵႃႈၼႂ်းတူင်ႈၼႃးမၵ်ႉပေႇလၽၢႆႇဝၼ်းဢွၵ်ႇမမ်ႇရေႇ ဢၼ် ဢႃႇပြႁမ်ႇ သိုဝ်ႉ ဢဝ်ၵႃႈတီႈဢေႇၽရုၼ်ႇ ၵူၼ်းႁိတ်ႉတိ ပုၼ်ႈဢၼ်တၵ်းပဵၼ်ပႃႇႁဵဝ်ႈဢၼ်တူဝ်ၸဝ်ႈၵဝ်တၵ်းပိူင်ႇ ၼၼ်ႉဢေႃႈ။
၁၄ ယုဝ်းသႅပ်ႉ သၢင်းၵျူဝ်ႇပေႃႈမၼ်းသေယဝ်ႉပႃးဢဝ်ၸႃႉၸဵမ်ပီႈဢၢႆႈမၼ်းတင်းလၢႆလႄႈ ၶဝ် ၸိူဝ်း ဢၼ်ၸွမ်းၶိုၼ်ႈၵွႃႇလူၺ်ႈၵၼ်တင်းမၼ်း ႁႂ်ႈလႆႈသၢင်းၵျူဝ်ႇပေႃႈမၼ်းၸိူဝ်းၼၼ်ႉ တင်းသဵင်ႈတင်းလူင်ၶိုၼ်းမိူဝ်းၵွႃႇၵႃႈတီႈမိူင်းဢေႇၵႅပ်ႉတု သေဢေႃႈ။
ယုဝ်းသႅပ်ႉပၼ်ၵတိတီႈပီႈၸၢႆးမၼ်းတင်းလၢႆ
၁၅ ပီႈၸၢႆးယုဝ်းသႅပ်ႉ ၸိူဝ်းၼၼ်ႉႁၼ်လွင်ႈဢၼ်ပေႃႈၶဝ်တၢႆယဝ်ႉၼၼ်ႉသေယဝ်ႉလၢတ်ႈလႄႈဝႃႈ၊- ယုဝ်းသႅပ်ႉတၵ်းၸင်းႁဝ်းလႄႈ တွပ်ႇတႅၼ်းပၼ်ၵႃႈဢၼ်ႁဝ်းႁဵတ်းႁုၵ်းႁဵတ်းႁၢႆႉဝႆႉတီႈမၼ်း မိူဝ်ႈ ဢွၼ်တၢင်းၼၼ်ႉႁိုဝ် ဢမ်ႇႁူႉ၊ဝႃႈၼင်ႇၼႆလႄႈ
၁၆ ၶဝ်ပွႆႇၸႂ်ႉၵူၼ်းၵွႃႇတီႈယုဝ်းသႅပ်ႉလႄႈ ႁႂ်ႈလႆႈလဝ်ႈလၢတ်ႈလႄႈဝႃႈ၊- ပေႃႈၸဝ်ႈႁဝ်းၼၼ်ႉသင်ႇလၢတ်ႈဝႆႉတီႈၶႃႈၸဝ်ႈႁဝ်းၶဝ်တင်းလၢႆ မိူဝ်ႈ ဢၼ်မၼ်းဢမ်ႇပႆႇတၢႆၼၼ်ႉလႄႈဝႃႈ၊-
၁၇ သူတၵ်းလႆႈလဝ်ႈလၢတ်ႈတီႈယုဝ်းသႅပ်ႉ ၸိူဝ်ႉၼင်ႇႁိုဝ်ဝႃႈၼႆၸမ်း၊ပိူဝ်ႈဢၼ်ပီႈဢၢႆႈမႂ်းၸိူဝ်း ၼၼ်ႉ လႆႈႁဵတ်းလွင်ႈတၢင်းဢၼ်ဢမ်ႇလီတီႈမႂ်းဝႆႉၼၼ်ႉ ပွႆႇလွတ်ႈတၢင်းဢၼ်ၶဝ်ၽိတ်းပိူင်ႈမႂ်းဢိၵ်ႇတင်းဢပျႅတ်ႈၶဝ်ၼၼ်ႉသေၵမ်း၊ ဝႃႈၸိူဝ်ႉၼင်ႇၼႆဝႆႉတီႈၶႃႈလႄႈ တေႃႈလဵဝ်ၼႆႉၶႅၼ်းတေႃႈပွႆႇ လွတ်ႈ တင်းဢၼ်ၶႃႈၽြႃးပဵၼ်ၸဝ်ႈပေႃႈၸဝ်ႈႁဝ်းၸိူဝ်းၼႆႉၽိတ်းပိူင်ႈၼၼ်ႉသေၵမ်းတီႈၶႃႈ၊ ဝႃႈၼင်ႇ ၼႆဢေႃႈ။မိူဝ်ႈဢၼ်ၶဝ်လဝ်ႈလၢတ်ႈၸိူဝ်ႉၼင်ႇၼၼ် ၼၼ်ႉၸိုင်၊ယုဝ်းသႅပ်ႉ ၼမ်ႉတႃတူၵ်းယူႇဢေႃႈ။
၁၈ ပီႈဢၢႆႈမၼ်းၸိူဝ်းၼၼ်ႉၵေႃႈ ဢွၼ်ၵၼ်ၵွႃႇလႄႈၶုပ်ႉမူပ်ႇၵႃႈတီႈၽၢႆႇၼႃႈမၼ်းလႄႈလဝ်ႈလၢတ်ႈလႄႈဝႃႈ၊-တူၺ်းတီႈၶႃႈလူႊ၊ ၶႃႈၸဝ်ႈၸိူဝ်းၼႆႉပဵၼ်ၶႃႈၸဝ်ႈႁဝ်းတီႈၶႃႈ ဢေႃႈ၊ဝႃႈၼင်ႇၼႆဢေႃႈ။
၁၉ ယုဝ်းသႅပ်ႉ ၵေႃႈလၢတ်ႈတီႈၶဝ်လႄႈဝႃႈ၊-ယႃႇပေမႆႈၸႂ်။ၵဝ်ၶႃႈပဵၼ်တၢင်တူဝ်ၽြႃး ပဵၼ်ၸဝ်ႈ ႁိုဝ်။
၂၀ ပိၵ်ႉသမ်ႉသူၵျၢမ်ႇပွင်ႁဵတ်းႁုၵ်းႁဵတ်းႁၢႆႉတီႈၵဝ်ၶႃႈသေၵေႃႈ ၽြႃးပဵၼ်ၸဝ်ႈၵျၢမ်ႇပွင်တၵ်းႁဵတ်း ၵျေးၸူး ႁႂ်ႈဢသၢၵ်ႈၵူၼ်းၼမ်ၼႃႇ လႆႈၵတ်းယဵၼ်ၶျၢမ်းသႃႇ ၵႃႈၼင်ႇဢၼ်ပဵၼ်ယဝ်ႉဝၼ်းမိူဝ်ႈ ၼႆႉၼၼ်ႉ ဢေႃႈ။
၂၁ ပိူဝ်ႈၼႆလႄႈယႃႇပေမႆႈၸႂ်။ၵဝ်ၶႃႈတၵ်းလဵင်ႉလူသူဢိၵ်ႇတင်း လုၵ်ႈဢွၼ်ႇလၢင်းဢွၼ်ႇသူတင်းလၢႆဢေႃႈ၊ ဝႃႈၼင်ႇၼႆလႄႈႁႂ်ႈၶဝ်ပျေႇၸႂ်ၼိမ်ၸႂ်မႃးလႄႈလၢတ်ႈၵႂၢမ်းမႅတ်ႈတႃႇတေႃႇၶဝ်ဢေႃႈ။
ဢသၢၵ်ႈယုဝ်းသႅပ်ႉသုတ်းသဵင်ႈ
၂၂ ၼင်ႇၼၼ်လႄႈယုဝ်းသႅပ်ႉ တင်းၵူၼ်းႁိူၼ်းၵူၼ်းယေးပေႃႈမၼ်းၸိူဝ်းၼၼ်ႉယူႇၵႃႈတီႈမိူင်း ဢေႇၵႅပ်ႉတု လႄႈယုဝ်းသႅပ်ႉ ၵေႃႈဢသၢၵ်ႈၶိုတ်းထိုင်ပၢၵ်ႇပၢႆသိပ်းပီႊ ဢေႃႈ။
၂၃ ယုဝ်းသႅပ်ႉ လႆႈႁၼ်လုၵ်ႈလၢင်း ဢေႇၽရိမ်ႇဢေႃႈ။လုၵ်ႈလၢင်းမႃႇၶိရ ဢၼ်ပဵၼ်လုၵ်ႈၸၢႆးမၼႃႇသေႇ ၼၼ်ႉၵေႃႈလႆႈၵိူတ်ႇလဵင်ႉၵႃႈၼိူဝ်ႁူဝ်ၶဝ်ႇမၼ်းဢေႃႈ။
၂၄ ယုဝ်းသႅပ်ႉ ၵေႃႈလၢတ်ႈတီႈပီႈဢၢႆႈမၼ်းၸိူဝ်းၼၼ်ႉလႄႈဝႃႈ၊-ၵဝ်ၶႃႈတၵ်းတၢႆယဝ်ႉ။ၽြႃးပဵၼ် ၸဝ်ႈ တၵ်းမႃးလူႈမႃးတူၺ်းသူဢမၢၼ်ႇၶၼ်ပဵၼ်လႄႈ ဢဝ်သူဢွၵ်ႇသေၵႃႈၼႂ်းမိူင်းၼႆႉၵွႃႇ ႁႂ်ႈႁွတ်ႈထိုင်ၵႃႈတီႈမိူင်းဢၼ်မၼ်းၸဝ်ႈတိူင်ႇဝႃႈဝႆႉတီႈ ဢႃႇပြႁမ်ႇ၊ ဢိၸၵ်ႉတင်း ယႃႇၵုပ်ႉ ၸိူဝ်း ၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၅ ၵမ်းၼၼ်ႉယုဝ်းသႅပ်ႉ ႁႂ်ႈၵူၼ်းမဵဝ်းဢိသရေႇလ တင်းလၢႆႁဵတ်းတၢင်းဢၼ်ၵိၼ်ႇဝႃႈလႄႈဝႃႈ၊- ၽြႃးပဵၼ်ၸဝ်ႈတၵ်းမႃးလူႈမႃးတူၺ်းသူဢမၢၼ်ႇၶၼ်ပဵၼ်ဢေႃႈ။သူတၵ်းလႆႈဢဝ်လုပ်ႇဢဝ်လၢဝ်ႈ ၵဝ် ၶႃႈဢွၵ်ႇသေၵႃႈၼႂ်းမိူင်းၼႆႉၶိုၼ်းၶိုၼ်ႈၵွႃႇဢေႃႈ၊ ဝႃႈၼင်ႇၼႆဢေႃႈ။
၂၆ ၼင်ႇၼၼ်လႄႈယုဝ်းသႅပ်ႉ ဢသၢၵ်ႈလႆႈပၢၵ်ႇပၢႆသိပ်းပီႊလႄႈတၢႆသေဢေႃႈ။ၶဝ်ဢဝ်တင်းမဵဝ်း ၼၢမ်ႇသႃႇတင်းလၢႆမႄးႁႅၼ်းတူဝ်တၢႆမၼ်းဝႆႉ ႁႂ်ႈဢမ်ႇလႆႈတူႇလႆႈၼဝ်ႈသေယဝ်ႉ ဢဝ်သႂၢင်းဝႆႉၵႃႈၼႂ်းၵွမ်ႇၵႃႈတီႈမိူင်းဢေႇၵႅပ်ႉတု ၼၼ်ႉဢေႃႈ။