၇
ၸွမ်းၼင်ႇတြႃးတင်းၵရုၼႃႇ
၁ ၼႂ်းၶူပ်ႇပီႊဢၼ်ၶုၼ်လူင်တႃႇရိ ၼင်ႈႁၢင်ႈၼင်ႈႁေႃသီႇပီႊလိူၼ်ၼဝမ ဢၼ်လႆႈၸိုဝ်ၶိသလုသိဝၼ်းၼၼ်ႉၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈ ၸႃႇၶရိ ဢေႃႈ။
၂ မိူဝ်ႈၼၼ်ႉၶဝ်ၸိူဝ်းယူႇၵႃႈတီႈဝဵင်းပေႇသလၼၼ်ႉပွႆႇၸႂ်ႉသရေၸႃႇ ဢိၵ်ႇတင်း ရေႇၵိမ်ႇမေႇလိၵ်ႉတင်းၵူၼ်းၶဝ်တင်းလၢႆၵႂႃႇ ႁႂ်ႈလႆႈႁဵတ်းတၢင်းဢၼ် သူးတွင်းၵႃႈတီႈၽၢႆႇၼႃႈထႃႇဝရႃႉၽြႃး
၃ ဢိၵ်ႇတင်းႁႂ်ႈလႆႈလဝ်ႊထၢမ်တီႈ ယိတ်ႉပရေႃးႁိၵ်ႈႁိူၼ်းၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးတင်းလၢႆ ဢိၵ်ႇတင်းပရေႃးၽႅတ်ႈၸိူဝ်းၼၼ်ႉလႄႈဝႃႈ၊-ၼႂ်းလိူၼ်ပိၼ်ႇၸမၵဝ်ၶႃႈတၵ်းလႆႈႁွင်ႉသေလႄႈ ၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်မိူၼ်ၸိူဝ်ႉၼင်ႇ ဢၼ်ႁဵတ်းမႃးပီႊမိူင်းၼမ်ၼႃႇၼၼ်ႉၶႃႈႁိုဝ်၊ဝႃႈၼင်ႇၼႆၼၼ်ႉဢေႃႈ။
၄ မိူဝ်ႈၼၼ်ႉၼုၵ်ႈၵပၢတ်ႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးႁွတ်ႈမႃးတီႈၵဝ်လႄႈဝႃႈၸမ်း၊-မႂ်းလၢတ်ႈတီႈယိတ်ႉပရေႃးႁိၵ်ႈတင်းလၢႆ ဢိၵ်ႇတင်းၵူၼ်းဝၢၼ်ႈ ၵူၼ်းမိူင်းတင်းသဵင်ႈတင်းလူင်လႄႈဝႃႈ၊-
၅ ယၢမ်းမိူဝ်ႈဢၼ်သူၵမ်တၢင်းၵိၼ်လႄႈႁွင်ႉႁႆႈပွင်ႉၶၢင်းယူႇၼႂ်းလိူၼ်ပိၼ်ႇၸမ တင်းလိူၼ်သတ်ႉတမၸဵတ်းသိပ်းပီႊတဵမ်တဵမ်ၼၼ်ႉၸိုင် သူဢွၼ်ၵၼ်ၵမ်တၢင်းၵိၼ်တီႈၵဝ် ၼႆႉဢမၢၼ်ႇၶၢၼ်ပဵၼ်ႁိုဝ်။
၆ ယၢမ်းမိူဝ်ႈဢၼ်သူၵိၼ်ၶူပ်းလႄႈသူတ်ႉဢိုၵ်ႉၼၼ်ႉ သူဢွၼ်ၵၼ်ၵိၼ်ၶူပ်းၸွမ်းၼင်ႇ ဢလူဝ်ႇသူဢမ်ႇၸႂ်ႈႁိုဝ်။
၇ ဢမိင်ႉဢၼ်ထႃႇဝရႃႉၽြႃးဢဝ်ပရေႃးၽႅတ်ႈ မိူဝ်ႈၵွၼ်ႇဢွၼ်ၼႆႉၸိူဝ်းၼၼ်ႉမွၵ်ႇလၢတ်ႈဝႆႉၼႂ်းမိူဝ်ႈဢၼ်ဝဵင်းယေႇရုသလႅမ်ႇ ယင်းမီးၽူႈမီးၵူၼ်းၼမ်ၼႃႇၵိုၼ်းၼႃႇ လႆႈလီလႆႈပဵၼ်လႄႈဝဵင်းဢၼ်မီးၵႃႈတီႈလဵပ်ႈႁွပ်ႈမၼ်းတင်းလၢႆ ဢိၵ်ႇတင်းမိူင်းပွတ်းတၢင်းၸၢၼ်း တင်းၵႃႈတီႈတႂ်ႈတီႈပၢင်ႇတီႈပဵင်းမီးၽူႈမီးၵူၼ်းၼမ်ၵိုၼ်းၼႃႇၼၼ်ႉ ၸိူဝ်းၼၼ်ႉတဵမ်ထူၼ်ႈယဝ်ႉဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။
၈ မိူဝ်ႈၼၼ်ႉၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈၸႃႇၶရိလႄႈဝႃႈၸမ်း၊-ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉလႄႈဝႃႈ၊-
၉ ဢွၼ်ၵၼ်ၸီႇယၢင်ႇတြႃးမႅၼ်ႈ ၸွမ်းၼင်ႇတြႃးတႃႉ။ဢွၼ်ၵၼ်မီးၸႂ်ၵရူႉၼႃႇတၢင်း ဢၼ်ဢိတ်းလူႁၵ်ႉပႅင်းလႄႈၵေႃႉၼိုင်ႈလႄႈ ၵေႃႉၼိုင်ႈႁဵတ်းၵျေးၸူးတီႈၵၼ်တႃႉ။
၁၀ ယႃႇပေၼိၵ်ႈၸၢၵ်ႈငႅၼ်းသေးမေႈမုၵ်ႉမေႈမၢႆႈ၊ ၵေႃႉဢၼ်ၽၢၼ်ပေႃႈၽၢၼ်မေႈ၊ၵူၼ်းတၢင်ႇဝၢၼ်ႈတၢင်ႇမိူင်း၊ ၵေႃႉဢၼ် ယၢၵ်ႈဢၼ်ၽၢၼ်ၼၼ်ႉၸိူဝ်းၼၼ်ႉ။
၁၁ ၵေႃႉၼိုင်ႈလႄႈၵေႃႉၼိုင်ႈယႃႇပေၵျၢမ်ႇပွင် တၢင်းၵျၢမ်ႇတၢင်းပွင်ဢၼ်ဢမ်ႇလီတီႈၵၼ်ဝႃႈၼင်ႇၼႆသေၵေႃႈ၊ ၶဝ်ဢမ်ႇမီးဢလူဝ်ႇၶႂ်ႈထွမ်ႇဢဝ်လႄႈဢွၼ်ၵၼ်ဝၢႆႇလင်ၵွင်လင် ပၼ်လႄႈႁဵတ်းၶတ်းႁဵတ်းတႃႉယူႇဢေႃႈ။
၁၂ ဢွၼ်ၵၼ်ဢိုတ်းႁူၶဝ်ဝႆႉႁႂ်ႈၶဝ်ဢမ်ႇငိၼ်းဢေႃႈ။ဢွၼ်ၵၼ်ႁႂ်ႈႁူဝ်ၸႂ်ၶဝ်ၵႅၼ်ႇၶႅင် မိူၼ်ၸိူဝ်ႉၼင်ႇသႅင်ၸိင်ႇၼၼ်ႉႁႂ်ႈဢမ်ႇလႆႈငိၼ်းၵႂၢမ်းတြႃး ဢိၵ်ႇတင်း ၵႂၢမ်းဢၼ်ဝိၺိၺ်ႇၸဝ်ႈပူဝ်ႇပႃႇၵၢင်ႁဝ်ထႃႇဝရႃႉၽြႃး ဢဝ်ပရေႃးၽႅတ်ႈမိူဝ်ႈၵွၼ်ႇဢွၼ်ၼႆႉၸိူဝ်းၼၼ်ႉ လၢတ်ႈဝႆႉၼၼ်ႉဢေႃႈ။ပိူဝ်ႈၼႆလႄႈ တၢင်းၸႂ်မႆႈၶႆႈၸႃႉဢၼ်ႁႅင်းယႂ်ႇၼႃႇလူင်လၢင်ဢွၵ်ႇသေ ၵႃႈတီႈၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉ ၽြႃးမႃးဢေႃႈ။
၁၃ မိူၼ်ၸိူဝ်ႉၼင်ႇဢၼ်မၼ်းႁွင်ႉသႅၼ်ႇလႄႈၶဝ်ဢမ်ႇထွမ်ႇငိၼ်းၼၼ်ႉ၊ လၢႆးသမ်ႉၶဝ်တၵ်းႁွင်ႉသႅၼ်ႇလႄႈ ၵဝ်ၵေႃႈယင်းဢမ်ႇထွမ်ႇဢမ်ႇငိၼ်းလႄႈတၵ်းယူႇဢေႃႈ၊ ဝႃႈၼင်ႇၼႆလႄႈၸဝ်ႈပူဝ်ႇပႃႇၵၢင် ႁၢဝ်ထႃႇဝရႃႉၽြႃးမီးဢမိင်ႉဢေႃႈ။
၁၄ ၵဝ်တၵ်းဢဝ်လူမ်းၽိဝ်ႁုင်ပတ်ႉထူဝ်းဢဝ်ၶဝ် ၸၢတ်ႇပိုၼ်ပႅတ်ႈၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း ဢၼ်ၶဝ်ဢမ်ႇႁူႉၸိူဝ်းၼၼ်ႉဢေႃႈ။ပိူဝ်ႈၼႆလႄႈ မိူင်းၶဝ်ၼၼ်ႉမီးတၢင်းဢၼ်သိတ်ႇၵူၼ်းယဵၼ်ၵူၼ်းယူႇသေလႄႈ ၽူႈ လႂ်ဢမ်ႇၵႂႃႇဢမ်ႇမႃးၵႃႈၼႂ်းမၼ်းသေၵေႃႉသေၵူၼ်း။ၶဝ်ႁႂ်ႈမိူင်းဢၼ်သႃႇယႃႇလီငၢမ်းၼၼ်ႉ ပဵၼ်တီႈဢၼ်ပႄႇၽဵဝ်ႈပႅတ်ယဝ်ႉလူင်ပေႇ၊ဝႃႈၼင်ႇၼႆဢေႃႈ။