၁၃
တၢင်းဢၼ်သုၵ်ႉသၢႆဢပျႅတ်ႈ
၁ ၼႂ်းမိူဝ်ႉဝၼ်းၼၼ်ႉၼမ်ႉမေႃႇဢွၵ်ႇႁူးတၵ်းမီးတၢင်းဢၼ်ၽုၺ်ႇပိုတ်ႇဝႆႉတီႈမဵဝ်းတႃႇဝိတ်ႉ ဢိၵ်ႇတင်းၵူၼ်းဝဵင်းယေႇရုသလႅမ်ႇ ၸိူဝ်းၼၼ်ႉ ပုၼ်ႈတူႉၸရိူၵ်ႈဢပျႅတ်ႈဢိၵ်ႇတင်း တၢင်းဢၼ်ၵူဝ်ႈၵိူၵ်ႇဝူၺ်ႇႁင်ႈၼၼ်ႉ ဢေႃႈ။
၂ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊-ၼႂ်းမိူဝ်ႉဝၼ်းၼၼ်ႉၵဝ်တၵ်းပႄႇၽဵဝ်ႈၼႃႇမႃႉၸိုဝ်သဵင်ရုၵ်ႉထူႉတင်းလၢႆ ပႅတ်ႈသေၵႃႈၼႂ်းမိူင်းၸဝ်ႈႁႂ်ႈထၼ်ႈပေႃးၽူႈ လႂ် ဢမ်ႇမၢတ်ႈဢမ်ႇတွင်းၼႂ်းၶိင်ႇမိူဝ်ႈၵမ်းလိုၼ်းၼၼ်ႉဢေႃႈ။ၵဝ်တၵ်းႁေႃႈၶဝ်ၸိူဝ်းဢၼ်ႁဵတ်းပရေႃးၽႅတ်ႈဢိၵ်ႇတင်းဝိၺိၺ်ႇ ဢၼ်ၵူဝ်ႈၵိူၵ်ႇ ၼၼ်ႉဢွၵ်ႇသေၵႃႈၼႂ်းမိူင်းၸဝ်ႈဢေႃႈ။
၃ မိူဝ်ႈၼၼ်ႉပေႃးၵူၼ်းသေၵေႃႉသေၵူၼ်း ယင်းႁဵတ်းပရေႃးၽႅတ်ႈယူႇၸိုင် ပေႃးမေႈဢၼ်ၵိူတ်ႇလဵင်ႉမၼ်းမႃးၼၼ်ႉ တၵ်းလၢတ်ႈတီႈမၼ်းလႄႈဝႃႈ၊-မႂ်းၼႆႉတၵ်းလႆႈၶၢမ်ႇတၢႆၵွပ်ႈပိူဝ်ႈဢၼ် မႂ်းဢိင်ၼႃႇမႃႉၸိုဝ်သဵင်ထႃႇဝရႃႉၽြႃးသေလႄႈ ႁေႃးလၢတ်ႈၵႂၢမ်းမူႉသႃႇၼၼ်ႉဢေႃႈ၊ ဝႃႈၼင်ႇၼႆသေလႄႈ ပေႃးမေႈဢၼ်ၵိူတ်ႇလဵင်ႉမၼ်းမႃးၼၼ်ႉတၵ်းဢွၼ်ၵၼ်တႅင်းမၼ်း ပွင်ႇပဵဝ်ၵႂႃႇၼႂ်းမိူဝ်ႈဢၼ်မၼ်း ယင်းတိုၵ်ႉႁဵတ်းပရေႃးၽႅတ်ႈ ယူႇၼၼ်ႉ ဢေႃႈ။
၄ ၼႂ်းမိူဝ်ႉဝၼ်းၼၼ်ႉပရေႃးၽႅတ်ႈတင်းလၢႆတၵ်းဢွၼ်ၵၼ်ဢူၵ်းဢၢႆၵွပ်ႈပိူဝ်ႈရူႇပႃႇရုင်ႇ ဢၼ်ၶဝ်ႁၼ်ၼၼ်ႉၼႂ်းမိူဝ်ႈဢၼ်ၶဝ်ႁေႃးလၢတ်ႈယူႇၼၼ်ႉ ႁင်းၽႂ်ႁင်းမၼ်းလႄႈ ၶဝ်တၵ်းဢမ်ႇၼုင်ႈဢမ်ႇမႆၶူဝ်းၼုင်ႈဢၼ်ၶူၼ်ႁူဝ်ယၢဝ်းၼႃႇၼၼ်ႉ ႁႂ်ႈလႆႈပႅတ်ႉလႅၼ်ပိူၼ်ႈ။
၅ မၼ်းတၵ်းလၢတ်ႈလႄႈဝႃႈ၊-ၵဝ်ၶႃႈၼႆႉဢမ်ႇဢမ်ႇၸႂ်ပရေႃးၽႅတ်ႈၶႃႈၵူၺ်း။ပဵၼ်ၵေႃႉဢၼ်ႁဵတ်းႁႆႈႁဵတ်းၼႃးဢေႃႈ။ၵဝ်ၶႃႈပဵၼ်ၵေႃႉဢၼ်လႆႈၶၢမ်ႇႁဵတ်းၶႃႈတီႈပိူၼ်ႈၸႃႉၸဵမ်မိူဝ်ႈဢၼ်ယင်းလဵၵ်ႉယင်းဢွၼ်ႇ ၼၼ်ႉၶႃႈယဝ်ႉ၊ဝႃႈၼင်ႇၼႆဢေႃႈ။
၆ ပိူၼ်ႈတၵ်းထၢမ်ႇတီႈမၼ်းလႄႈဝႃႈ ႁွႆးတၢမ်ႇဢၼ်ပေႃႇဢွၵ်ႇမႃးၵႃႈၼႂ်းမိုဝ်းမႂ်းၸိူဝ်းၼၼ်ႉၸမ်း ပဵၼ်ၵႃႈသင်ဝႃႈၼင်ႇၼႆသေယဝ်ႉ မၼ်းတၵ်းၶိုၼ်းလၢတ်ႈလႄႈဝႃႈ ႁွႆးတၢမ်ႇၼႆႉၸမ်း ပဵၼ်ႁွႆးတၢမ်ႇဢၼ်ၵဝ်ၶႃႈလႆႈၶၢမ်ႇၵႃႈၼႂ်းႁိူၼ်းၵေႃႉသေႈၵဝ်ၶႃႈၸိူဝ်းၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။
ၸဝ်ႈသူဝ်းတၢႆလႄႈသူဝ်းၽၢတ်ႇၽႄ
၇ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉၸမ်း၊-လၢပ်ႇ လႅဝ်းဢိူၺ်း။တိုၼ်မႃးယူႇၽၢႆႇၼိုင်ႈတင်းၵေႃႉဢၼ်လဵင်ႉသူဝ်းထိင်းသူဝ်းၵဝ်၊ ၵေႃႉဢၼ်ပဵၼ်ဢၼ်ႁူမ်ႈဢၼ်ပွင်းလူၺ်ႈၵၼ်တင်းၵဝ်ၼၼ်ႉတႃႉ။ပေႃႉယႅၼ်ႉၵေႃႉဢၼ်လဵင်ႉသူဝ်းထိင်းသူဝ်းၼၼ်ႉတၢႆတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင် သူဝ်းတင်းလၢႆၼၼ်ႉတၵ်းလႆႈၽၢတ်ႇၽႄၵၼ်မိူဝ်းၵႂႃႇဢေႃႈ။ၵႃႈၼိူဝ်သူဝ်းဢွၼ်ႇတင်းလၢႆၵေႃႈ ၵဝ်တၵ်းဢဝ်မိုဝ်းၵဝ်တၢင်ႇသႂ်ႇ လူးၵွၼ်ႇဢေႃႈ။
၈ ထႃႇဝရႃႉၽြႃးမီးဢမိင်ႉၸမ်း၊-ၵႃႈၼႂ်းမိူင်းၸဝ်ႈတင်းမိူင်းၼၼ်ႉ သွင်ပုၼ်ႈ တၵ်းလႆႈၶၢမ်ႇတၢင်းဢၼ်ပႄႇတႅပ်းပႅတ်ႈသေလႄႈ ဢဝ်တၢႆပႅတ်ႈလႄႈပုၼ်ႈၼိုင်ႈၵူၺ်း တၵ်းလႆႈၵိုၼ်းၵျၢၼ်ႇဝႆႉဢေႃႈ။
၉ ၵဝ်တၵ်းႁႂ်ႈပုၼ်ႈတတိယ ၼၼ်ႉပႆလတ်းၵႂႃႇၵႃႈၼႂ်းၵၢငႆ်းဢေႃႈ။ၵဝ်တၵ်းၶႃႈၶဝ်မိူၼ်ၸိူဝ်ႉၼင်ႇဢၼ်ၶႃႈငိုၼ်းၼၼ်ႉလႄႈ ၸၢမ်းတူၺ်းၶဝ်မိူၼ်ၸိူဝ်ႉၼင်ႇဢၼ်ၸၢမ်းတူၺ်းၶမ်းၼၼ်ႉဢေႃႈ။ၶဝ်ၼၼ်ႉတၵ်းႁဵတ်းပထၼႃႇတီႈၼႃႇမႃႉၸိုဝ်သဵင်ၵဝ်လႄႈ ၵဝ်တၵ်းထွမ်ႇဢဝ်ၵႂၢမ်းၶဝ်ဢေႃႈ။ၵဝ်တၵ်းႁွင်ႉႁိၵ်ႈၶဝ်မဵဝ်းၵူၼ်းၵဝ်လႄႈၶဝ်ၵေႃႈတၵ်းဢွၼ်ၵၼ်ႁပ်ႉတုင်းဢဝ်လႄႈဝႃႈ၊-ထႃႇဝရႃႉၽြႃးၼၼ်ႉပဵၼ်ၽြႃးပဵၼ်ၸဝ်ႈႁဝ်းဢေႃႈ၊ ဝႃႈၼင်ႇၼႆဢေႃႈ။