၁
ႁွင်ႉႁႂ်ႈၶိုၼ်းမႃးတူးၽြႃး
၁ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈပရေႃးၽႅတ်ႈၸႃႇၶရိလုၵ်ႈၸၢႆးပႃႇရၶိ လုၵ်ႈၸၢႆးဢိတေႃႇၼႂ်းၶူပ်ႇပီႊဢၼ်ၶုၼ်လူင်တႃႇရိ ၸၢမ်ႇႁၢင်ႈၸၢမ်ႇႁေႃသွင်ပီႊ လိူၼ်ဢထမၼၼ်ႉလႄႈဝႃႈၸမ်း၊-
၂ ထႃႇဝရႃႉၽြႃးၸႂ်မႆႈၶႆႈၸႃႉတေႃႇပူႇမႂ်းမွၼ်ႇမႂ်းၼႃႇလူင်လၢင်ယဝ်ႉ။ၼႂ်းဝႃႈၼၼ်သေၵေႃႈမႂ်းလၢတ်ႈတီႈၶဝ်လႄႈဝႃႈ၊ ၸဝ်ႈ ပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊-
၃ ဢွၼ်ၵၼ်ၶိုၼ်းမႃးၸူးၵႃႈတီႈၵဝ်တႃႉ၊ ဝႃႈၼင်ႇၼႆၸဝ်ႈပူဝ်ႇပႃႇၵၢင်ႁၢဝ်ထႃႇ ဝရႃႉၽြႃးမီးဢမိင်ႉဢေႃႈ။ၵဝ်ၵေႃႈတၵ်းၶိုၼ်းမႃးၸူးၵႃႈတီႈသူဢေႃႈ၊ ဝႃႈၼင်ႇၼႆၸဝ်ႈ ပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉဢေႃႈ။
၄ ယႃႇပေဢွၼ်ၵၼ်ႁဵတ်းၸိူဝ်ႉၼင်ႇပူႇသူမွၼ်ႇသူဢၼ် ပရေႃးၽႅတ်ႈမိူဝ်ႈၵွၼ်ႇဢွၼ်ၸိူဝ်းၼၼ်ႉ။ဢွၼ်ၵၼ်ႁွင်ႉမွၵ်ႇႁွင်ႉလၢတ်ႈတီႈၶဝ်လႄႈဝႃႈ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊-မိူဝ်ႈလဵဝ်ၼႆႉဢွၼ်ၵၼ်ပႄႇပႅတ်ႈသဵၼ်ႈတၢင်းဢၼ်ဢမ်ႇလီ ဢိၵ်ႇတင်းတၢင်းၵမ်တၢင်းၵျၢင်ႉဢၼ်ဢမ်ႇလီသူၸိူဝ်းၼၼ်ႉတႃႉ၊ ဝႃႈၼင်ႇၼႆသေၵေႃႈ ၶဝ်ဢမ်ႇငိၼ်း၊ၶဝ်ဢမ်ႇထွမ်ႇဢဝ်ၵႂၢမ်းၵဝ်ၸိူဝ်းၼၼ်ႉ၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၅ ပူႇသူႇမွၼ်ႇသူၼၼ်ႉမီးၵႃႈ လႂ်။ပရေႃးၽႅတ်ႈၸိူဝ်းၼၼ်ႉဢသၢၵ်ႈလိပ်းယူႇတႃႇသေႇႁိုဝ်။ၵႂၢမ်းၵဝ်တင်းလၢႆဢိၵ်ႇတင်းပိင်းၺၢပ်ႈၵဝ် ဢၼ်ၵဝ်သင်ႇလၢတ်ႈဝႆႉတီႈၶႃႈၵဝ်ပရေႃးၽႅတ်ႈၸိူဝ်းၼၼ်ႉ ၶိုတ်းထိုင်ပူႇသူမွၼ်ႇသူၸိူဝ်းၼၼ်ႉယဝ်ႉဢမ်ႇၸႂ်ႈႁိုဝ်။ၶဝ်ၼၼ်ႉၶုၵ်းၸႂ်လႆႈၶႆႈၸႂ် ထူပ်းလႄႈလၢတ်ႈဝႃႈ၊-
၆ မိူၼ်ၸိူဝ်ႉၼင်ႇဢၼ်ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးတၢင်းၵျၢမ်ႇတၢင်းပွင်တၵ်းႁဵတ်းတီႈႁဝ်းၸွမ်း ၵႃႈၼင်ႇသဵၼ်ႈတၢင်းဢၼ်ႁဝ်းၵႂႃႇတင်းလၢႆဢိၵ်ႇတင်း ၸွမ်းၵႃႈၼင်ႇဢၼ်တၢင်းၵမ်တၢင်းၵျၢင်ႉၸိူဝ်းၼၼ်ႉသေလႄႈ မၼ်းၸဝ်ႈႁဵတ်းတီႈႁဝ်းယဝ်ႉ၊ ဝႃႈၼင်ႇၼႆဢမ်ႇၸႂ်ႈႁိုဝ်၊ဝႃႈၼႆမၼ်းၸဝ်ႈမီးဢမိင်ႉဢေႃႈ၊ဝႃႈၼင်ႇၼႆဢေႃႈ။
ၵေႃႉဢၼ်ၸုၵ်းၵႄႈၵၢင်တူၼ်ႈမုရတု
၇ ၼႂ်းၶူပ်ႇပီႊ ဢၼ်ၶုၼ်လူင်တႃႇရိၸၢမ်ႇႁၢင်ႈၸၢမ်ႇႁေႃသွင်ပီႊ လိူၼ်ဢေႇၵႃႇတသမ ဢၼ်ဝႃႈလိူၼ်သေႇပတ်ႉ သၢဝ်းပၢႆသီႇဝၼ်းၼၼ်ႉၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈပရေႃးၽႅတ်ႈၸႃႇၶရိ လုၵ်ႈၸၢႆး ပႃႇရၶိလုၵ်ႈၸၢႆးဢိတေႃႇ ၼၼ်ႉလႄႈ
၈ ရူႇပႃႇရုင်ႇဢၼ်ၵဝ်လႆႈႁၼ်ၶိင်ႇၵၢင်ၶိုၼ်းၼၼ်ႉၸမ်း၊ ၵူၼ်းၵေႃႉၼိုင်ႈ ဢၼ်ၶီႇမႃႉလႅင်ၼၼ်ႉပေႃႇမႃးလႄႈၸုၵ်းယူႇၵႃႈၼႂ်းၵၢင်တူၼ်ႈမုရတု ဢၼ်မီးၵႃႈၼႂ်းၶူင်ႈႁူၺ်ႈၼၼ်ႉႉၸိူဝ်းၼၼ်ႉဢေႃႈ။ၵႃႈတီႈၽၢႆႇလင်မၼ်းၼၼ်ႉမီးမႃႉ ဢၼ်လႅင်ႊမႃႉဢၼ်ၵမ်ႇ၊မႃႉဢၼ်ၽိူၵ်ႇဢေႃႈ။
၉ မိူဝ်ႈၼၼ်ႉၵဝ်ထၢမ်ႇလႄႈဝႃႈ၊- ၸဝ်ႈၵဝ်ၶႃႈဢိူၺ်း၊ ၶဝ်ၼၼ်ႉၸမ်းပဵၼ်ၽူႈ လႂ်၊ မိူဝ်ႈဢၼ်ဝႃႈၼင်ႇၼႆၸိုင်တမၢၼ်ႇၵၢင်ႁၢဝ် ဢၼ်လၢတ်ႈၵႂၢမ်းတေႃႇၵၼ်တင်းၵဝ်ၼၼ်ႉၶိုၼ်းလၢတ်ႈလႄႈဝႃႈ၊-ၵဝ်တၵ်းၼႄပျႃႉလွင်ႈဢၼ်ၶဝ်ၼၼ်ႉပဵၼ်ၽူႈ လႂ်ၼၼ်ႉဢေႃႈ၊ ဝႃႈၼင်ႇၼႆ သေယဝ်ႉ၊ ၵေႃႉဢၼ်ၸုၵ်းယူႇၵႃႈၼႂ်းၵၢင်တူၼ်ႈမုရတုၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊-
၁၀ ၶဝ်ၼႆႉပဵၼ်ၵေႃႉဢၼ် ထႃႇဝရႃႉၽြႃးပွႆႇၸႂ်ႉ ႁႂ်ႈလႆႈၵႂႃႇၵႃႈၼိူဝ်လိၼ် မိူင်းၵူႈတီႈၵူႈလႅၼ်ဢေႃႈ၊ဝႃႈၼင်ႇၼႆဢေႃႈ။
၁၁ ၶဝ်ၼၼ်ႉၵေႃႈၶိုၼ်းလဝ်ႈလၢတ်ႈတီႈ တမၢၼ်ႇၵၢင်ႁၢဝ်ထႃႇဝရႃႉၽြႃးဢၼ်ၸုၵ်းယူႇၵႃႈၼႂ်းၵၢင်တူၼ်ႈ မုရတု ၸိူဝ်းၼၼ်ႉၼၼ်ႉလႄႈဝႃႈ၊-ႁဝ်းၶႃႈလႄႇၵႂႃႇၵႃႈၼိူဝ်လိၼ်မိူင်းၵူႈတီႈၵူႈလႅၼ်ယဝ်ႉၶႃႈယဝ်ႉ။တူၺ်းၶႃႈလူး။လိၼ်မိူင်းတင်းသဵင်ႈတင်းမူတ်း တႄႇၼိမ်ယူႇ၊ မီးတၢင်းဢၼ်တဵတ်ႇလီၼိမ်လီယူႇၶႃႈဢေႃႈ၊ဝႃႈၼင်ႇၼႆ ဢေႃႈ။
၁၂ လၢႆးသမ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးလဝ်ႈထၢမ်ႇ လႄႈဝႃႈ၊-ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးတီႈၶႃႈ။ၸဝ်ႈႁဝ်းယင်းဢမ်ႇဢိတ်းလူဝဵင်းယေႇရုသလႅမ်ႇ ဢိၵ်ႇတင်းဝဵင်းယုတတင်းလၢႆဢၼ်ၸဝ်ႈႁဝ်းၸႂ်မႆႈၶႆႈၸႃႉတေႃႇၸဵတ်းသိပ်းပီႊ တဵမ်တဵမ်ၼၼ်ႉလႄႈ
၁၃ တၵ်းယူႇၶိင်ႇၵႃႇလႃႉႁိုင်ၵႃႈႁိုဝ်တီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ထႃႇဝရႃႉၽြႃးဢဝ်တင်းၵႂၢမ်းဢၼ်လီၵႂၢမ်းဢၼ်ႁႂ်ႈထုၵ်ႇၸႂ်ၵျိူၵ်ႈၸႂ်ၼၼ်ႉ ၶိုၼ်းလၢတ်ႈတမၢၼ်ႇၵၢင်ႁၢဝ် ဢၼ်လၢတ်ႈတေႃႇၵၼ်တင်းၵဝ်ၼၼ်ႉ ဢေႃႈ။
၁၄ တမၢၼ်ႇၵၢင်ႁၢဝ်ဢၼ်လၢတ်ႈတေႃႇၵၼ်တင်းၵဝ်ၼၼ်ႉၵေႃႈလၢတ်ႈတီႈၵဝ်လႄႈဝႃႈ၊-မႂ်းႁွင်ႉမွၵ်ႇႁွင်ႉလၢတ်ႈလႄႈဝႃႈ၊-ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊-ၵဝ်မီးၸႂ်ဢၼ်ႁၵ်ႉပႅင်းၶႅၼ်ဝႆႉႁဵင်းယႂ်ႇၼႃႇလူင်လၢင်သေလႄႈ ႁၵ်ႉပႅင်းၶႅၼ်ဝႆႉပုၼ်ႈဝဵင်းယေႇရုသလႅမ်ႇဢိၵ်ႇတင်းလွႆၸိဢုၼ်ႇဢေႃႈ။
၁၅ ၵဝ်ၸႂ်မႆႈၶႆႈၸႃႉတေႃႇၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ယူႇၼိမ်ၼိမ်လီလီၸိူဝ်းၼၼ်ႉၼႃႇလူင်လၢင်ဢေႃႈ။လွင်ႈမၼ်းၸမ်း မိူဝ်ႈဢၼ်ၵဝ် မႆႈၸႂ်ၶႆႈၸႃႉတေႃႇဢိတ်းၼိုင်ႈၼၼ်ႉၸိုင် ၶဝ်ၽွမ်ႉၵၼ် ၼိၵ်ႈၸၢၵ်ႈငႅၼ်းသေးမၼ်း ယဝ်ႉ။ပိူဝ်ႈၼႆလႄႈထႃႇဝရႃႉၽြႃးမီးဢမိင်ႉၸမ်း၊-
၁၆ ၵဝ်မီးတင်းၸႂ်ဢၼ်ၶႆႈႁဵတ်းၵျေးၸူးသေလႄႈ ၶိုၼ်းမႃးၸူးၵႃႈတီႈဝဵင်းယေႇရုသလႅမ်ႇယဝ်ႉ။တၵ်းလႆႈတႄႇႁဵတ်းႁိူၼ်းၵဝ်ၵႃႈၼႂ်းဝဵင်းၼႆႉလႄႈ တၵ်းလႆႈဢဝ်ၸိူၵ်ႈတႅၵ်ႈၶိုပ်ႈၵႃႈၼိူဝ်ဝဵင်းယေႇရုသလႅမ်ႇဢေႃႈ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉ ဢေႃႈ။
၁၇ လၢႆးသမ်ႉမႂ်းႁွင်ႉမွၵ်ႇႁွင်ႉလၢတ်ႈလႄႈဝႃႈ၊-ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊-ဝၢၼ်ႈဝဵင်းၵဝ်ၸိူဝ်းၼၼ်ႉ တၵ်းသတ်ႉတၵ်းတဵမ်ဝႆႉတင်းတၢင်းဢၼ်လႆႈလီလႆႈပဵၼ်ဢေႃႈ။ထႃႇဝရႃႉၽြႃးတၵ်းႁႂ်ႈလွႆၸိဢုၼ်ႇၼၼ်ႉ မီးတၢင်းဢၼ်ပျေႇၸႂ်ၼိမ်ၸႂ်လႄႈမၼ်းၸဝ်ႈတၵ်းလိူၵ်ႈၵဵပ်းဢဝ်လုမ်းလႃး ဝဵင်းယေႇရုသလႅမ်ႇ လူးၵွၼ်ႇဝႃႈၼင်ႇၼႆယဝ်ႉ၊ဝႃႈၼင်ႇၼႆဢေႃႈ။
ၶဝ်လႅမ်သီႇလႅမ်ႈလႄႈၵူၼ်းမေႃႁဵတ်းသီႇၵေႃႉ
၁၈ လၢႆးသမ်ႉ ၵဝ်ဢဝ်တႃၵဝ်ႁႅၼ်တူၺ်းလႄႈႁၼ်ၶဝ်လႅမ်သီႇလႅမ်ႈဢေႃႈ။
၁၉ ၵဝ်တွင်ႈထၢမ်တီႈတမၢၼ်ႇၵၢင်ႁၢဝ်ဢၼ် လၢတ်ႈတေႃႇၵၼ်တင်းၵဝ်ၼၼ်ႉလႄႈဝႃႈ၊-ဢၼ်ၸိူဝ်းၼႆႉၼႆႉၸမ်းပဵၼ်ၵႃႈသင်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၶိုၼ်းလၢတ်ႈလႄႈဝႃႈ၊-ဢၼ်ၸိူဝ်းၼႆႉပဵၼ်ၶဝ်လႅမ်ဢၼ်ႁႂ်ႈမိူင်းယုတ၊ မိူင်းဢိသရေႇလ၊ဝဵင်းယေႇရုသလႅမ်ႇ ၸိူဝ်းၼၼ်ႉၽၢတ်ႇၽႄၵၼ်ၵႂႃႇၵူႈ တီႈၵူႈလႅၼ်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၀ ထႃႇဝရႃႉၽြႃးၵေႃႈ ၼႄပျႃႉၵူၼ်းဢၼ်ၸၢင်ႊႁဵတ်းမေႃႁဵတ်း သီႇၵေႃႉတီႈၵဝ်ဢေႃႈ။
၂၁ ၵဝ်ၵေႃႈလဝ်ႈထၢမ်လႄႈဝႃႈ၊-ၶဝ်ၼႆႉမႃးႁႂ်ႈလႆႈႁဵတ်းၵႃႈသင်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်မၼ်းလၢတ်ႈလႄႈဝႃႈ၊-ၶဝ်လႅမ်ၸိူဝ်းၼၼ်ႉပဵၼ်ၶဝ်လႅမ်ဢၼ်ႁႂ်ႈၵူၼ်းမိူင်းယုတ တင်းလၢႆၽၢတ်ႇၽႄၵၼ်ၵႂႃႇထၼ်ႈပေႃး ၽူႈ လႂ်ဢမ်ႇႁတ်းငွၵ်ႈႁူဝ်ႁႅၼ်ႁူဝ်တူၺ်းဢေႃႈ။ၵူၼ်းၸိူဝ်းၼႆႉၸမ်းပဵၼ်ၵေႃႉဢၼ်မႃးႁႂ်ႈလႆႈလွၵ်ႇငိူတ်ႈၶဝ်ၼၼ်ႉလႄႈ ၶျႃးၶဝ်လႅမ်ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ပတ်ႉသႆႈတိုၵ်းတေႃးမိူင်းယုတ ႁႂ်ႈၽၢတ်ႇၽႄၵၼ်ၵႂႃႇၸိူဝ်းၼၼ်ႉတူၵ်းတီႈတႅမ်ႇပႅတ်ႈဢေႃႈ၊ဝႃႈၼင်ႇၼႆဢေႃႈ။