၁၂
ရၢၼ်ႇသူဢိသရေလတေလႆႈၶၢမ်ႇတၢင်းဢၼ်ယႃႉလူႉလႅဝ်
၁ ၼုၵ်ႈၵပၢတ်ႈပျႃႇတိၵ်ႈ ထႃႇဝရႃႉၽြႃး ဢၼ်ၸၢပ်ႈသႅင်ႇလူၺ်ႈလွင်ႈမဵဝ်း ဢိသရေႇလ ဢၼ်ဝႃႈဢမိင်ႉဢၼ်ဝႃႈထႃႇဝရႃႉၽြႃး ဢၼ်ဢဝႃ်ႉၵၢင်ႁၢဝ်ၶဵင်ႈဝႆႉလႄႈၶျႃးငဝ်ႈႁၢၵ်ႈလိၼ်မိူင်း၊ ဢၼ်ႁဵတ်းပဵၼ်ဝိၺိၺ်ႇ ၵူၼ်းၵႃႈၼႂ်းၵူၼ်းၼၼ်ႉမီးဝႆႉၸမ်း၊-
၂ ၵဝ်တၵ်းႁႂ်ႈဝဵင်းယေႇရုသ လႅမ်ႇပဵၼ်ၵွၵ်းဢၼ်ဝင်ႇဝိဝင်ႇဝိူဝ်ႈယူႇတီႈမဵဝ်းၵူၼ်းတင်းသဵင်ႈတင်းလူင် ဢၼ်မီးၵႃႈတီႈႁိမ်းႁွမ်းလဵပ်ႈႁွပ်ႈမၼ်းၸိူဝ်းၼၼ်ႉဢေႃႈ။ၵႃႈတီႈမိူင်းယုတၵေႃႈ ၵဝ်တၵ်းႁႂ်ႈပဵၼ်မိူၼ်ၸိူဝ်ႉၼင်ႇၼၼ် ၼႂ်းမိူဝ်ႈဢၼ် ယင်းတိုၵ်ႉလွမ်ႉလဵပ်ႈႁွပ်ႈဝဵင်းယေႇရုသလႅမ်ႇဝႆႉ ယူႇၼၼ်ႉဢေႃႈ။
၃ ၼႂ်းမိူဝ်ႉဝၼ်းၼၼ်ႉၵဝ်တၵ်းႁႂ်ႈဝဵင်းယေႇရုသလႅမ်ႇ ၼၼ်ႉပဵၼ်မၢၵ်ႇႁိၼ်ဢၼ်ၼၵ်းၼႃတီႈမဵဝ်းၵူၼ်းတင်းသဵင်ႈတင်းလူင်လႄႈ ၶဝ်ၵႃႈဢၼ်ယုၵ်ႉယွင်ႈမၢၵ်ႇႁိၼ်ၼၼ်ႉၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်ႁၵ်းႁိၵ်းလူႉလႅဝ်ပႅတ်ႈဢေႃႈ။ၵူၼ်းလေႃးၵီႇၵူႈၸိူဝ်ႉၵူႈမဵဝ်းၼၼ်ႉ တၵ်းဢွၼ်ၵၼ်ၸူႉၵၼ်တုမ်ၵၼ် ယူႇၽၢႆႇၼိုင်ႈတင်းဝဵင်းၼၼ်ႉဢေႃႈ။
၄ ထႃႇဝရႃႉၽြႃးမီးဢမိင်ႉၸမ်း၊- ၼႂ်းမိူဝ်ႉဝၼ်းၼၼ်ႉၵဝ်တၵ်းပၼ်တၢမ်ႇႁႂ်ႈမႃႉမီးၼၼ်ႉမဝ်းမိင်းၵႂင်ၸႂ်ယုင်ႈၸႂ် ဢိၵ်ႇတင်းႁႂ်ႈၵူၼ်းသိုၵ်းၶီႇမႃႉတင်းလၢႆ ပဵၼ်ၵူၼ်းယွင်ႈၵူၼ်းမႃႈၵႂႃႇဢေႃႈ။ၵဝ်တၵ်းၽုၺ်ႇတႃမိုၼ်းတႃၵဝ် ၸူးၵူၼ်းမဵဝ်းယုတလႄႈ ပၼ်တၢမ်ႇႁႂ်ႈမႃႉၵႃႈဢၼ်မီးတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉတႃမွတ်ႇၵႂႃႇဢေႃႈ။
၅ ၶုၼ်ယုတ တင်းလၢႆတၵ်းဢွၼ်ၵၼ်လၢတ်ႈၼႂ်းၸႂ်လႄႈဝႃႈ၊-ၵူၼ်းဝဵင်းယေႇရုသလႅမ်ႇၸိူဝ်းၼၼ်ႉပဵၼ်ဢဵၼ်ၵဝ်ႁႅင်းၵဝ်ၵွပ်ႈပိူဝ်ႈၽြႃးပဵၼ်ၸဝ်ႈၶဝ်၊ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉဢေႃႈ၊ ဝႃႈၼင်ႇၼႆ ဢေႃႈ။
၆ ၼႂ်းမိူဝ်ႉဝၼ်းၼၼ်ႉၵဝ်တၵ်းႁႂ်ႈၶုၼ်ယုတ ၸိူဝ်းၼၼ်ႉပဵၼ်ၸိူဝ်ႉၼင်ႇမေႃႈၽႆးၽၢင်ၽႆးၵႃႈၼႂ်းၵွင်ၽိုၼ်း ဢိၵ်ႇတင်းၸိူဝ်ႉၼင်ႇၵၢၼ်ႈၽႆးၵႃႈၼႂ်းလိုၼ်ႈၶဝ်ႈၼၼ်ႉလႄႈ ၶဝ်ၼၼ်ႉတၵ်းမႆႈမဵဝ်းၵူၼ်းတင်းသဵင်ႈတင်းလူင်ဢၼ်မီးၵႃႈတီႈႁိမ်းႁွမ်းလဵပ်ႈႁွပ်ႈ ၽၢႆႇၶႂႃၽၢႆႇသၢႆႉၶဝ်ၼၼ်ႉဢေႃႈ။ဝဵင်းယေႇရုသလႅမ်ႇၵေႃႈတၵ်းသမ်ႉၶိုၼ်းမီး တၢင်းဢၼ်တႄႇယူႇၵႃႈတီႈဢၼ်မၼ်းတႄႇယူႇၵဝ်ႇၵဝ်ႇဢၼ်ဝႃႈဝဵင်းယေႇရုသလိမ်ႇ ၼၼ်ႉ ဢေႃႈ။
၇ ထႃႇဝရႃႉၽြႃးတၵ်းၵႄႇသႄႇၶျွတ်ႈဢဝ်သုမ်ႉထဵင်ယုတတင်းလၢႆ ဢွၼ်တၢင်းပိူၼ်ႈႁႂ်ႈမုၼ်ၽုင်းမဵဝ်းၶုၼ်တႃႇဝိတ်ႉဢိၵ်ႇတင်းမုၼ်ၽုင်းၵူၼ်းဝဵင်း ယေႇရုသလႅမ်ႇၸိူဝ်းၼၼ်ႉ ဢမ်ႇလႆႈဢုပ်ႇဢၢတ်ႈယူႇၽၢႆႇၼိုင်ႈတင်းမိူင်းယုတဢေႃႈ။
၈ ၼႂ်းမိူဝ်ႉဝၼ်းၼၼ်ႉထႃႇဝရႃႉၽြႃးတၵ်းႁႄႉၵင်ႈပႂ်ႉၸွႆႈပႂ်ႉထႅမ် ၵူၼ်းဝဵင်းယေႇရုသလႅမ်ႇၸိူဝ်းၼၼ်ႉယူႇလႄႈ ၵေႃႉဢၼ်ႁႅင်းလဵၵ်ႉႁႅင်းၵေႇၼႂ်းမိူဝ်ႉဝၼ်းၼၼ်ႉ တၵ်းပဵၼ်ၸိူဝ်ႉၼင်ႇၶုၼ်တႃႇဝိတ်ႉလႄႈမဵဝ်းၶုၼ်တႃႇဝိတ်ႉ ၼၼ်ႉတၵ်းပဵၼ်ၸိူဝ်ႉၼင်ႇၽြႃးပဵၼ်ၸဝ်ႈ ဢိၵ်ႇတင်းၸိူဝ်ႉၼင်ႇတမၢၼ်ႇၵၢင်ႁၢဝ်ထႃႇဝရႃႉ ၽြႃးၼၼ်ႉၵႃႈတီႈၽၢႆႇၼႃႈၶဝ်ၼၼ်ႉဢေႃႈ။
၉ ၼႂ်းမိူဝ်ႉဝၼ်းၼၼ်ႉ ၵဝ်တၵ်းဢဝ်ႁႅင်းဢွၵ်ႇႁႂ်ႈလႆႈယႃႉၵူၼ်းၵူႈၸိူဝ်ႉၵူႈမဵဝ်းဢၼ်မႃးတိုၵ်းဝဵင်းယေႇရုသလႅမ်ႇ ၸိူဝ်းၼၼ်ႉပႅတ်ႈဢေႃႈ။
မွင်ၸႂ်ပုၼ်ႈၵေႃႉဢၼ်လႆႈၶၢမ်ႇတႅင်းပွင်ႇ
၁၀ ၵဝ်တၵ်းဢဝ်သၽေႃး တၢင်းဢၼ်ၶၢမ်ႇဢဝ်ၵျေးၸူးၸဝ်ႈ၊ သၽေႃးတၢင်းဢၼ်ႁဵတ်းသူးတွင်းပထၼႃႇၼၼ်ႉသွၼ်းလေႃႇသႂ်ႇပၼ်ၵႃႈၼိူဝ်မဵဝ်းၶုၼ် တႃႇဝိတ်ႉဢိၵ်ႇတင်းၵူၼ်းဝဵင်းယေႇရုသလႅမ်ႇ ၸိူဝ်းၼၼ်ႉလႄႈၶဝ်ၼၼ်ႉ တၵ်းလႆႈဢွၼ်ၵၼ်တူၺ်းႁၼ်ၵဝ်ဢၼ်ၶဝ်တႅင်းပွင်ႇၼႆႉဢေႃႈ။ၶဝ်တၵ်းဢွၼ်ၵၼ်ႁႆႈႁွင်ႉပွင်ႉၶၢင်းၵွပ်ႈပိူဝ်ႈမၼ်းမိူၼ်ၸိူဝ်ႉၼင်ႇ ပေႃႈႁႆႈႁွင်ႉပွင်ႉၶၢင်းၵွပ်ႈပိူဝ်ႈလုၵ်ႈၸၢႆးၵေႃႉလဵဝ်ၵူၺ်းၼၼ်ႉလႄႈၶဝ်တၵ်းဢွၼ်ၵၼ်ၸဵပ်းၸႂ်ၶူမ်ၸႂ် ၵွပ်ႈပိူဝ်ႈမၼ်းမိူၼ်ၸိူဝ်ႉၼင်ႇဢၼ်ပေႃႈၸဵပ်းၸႂ်ၶူမ်ၸႂ် ၵွပ်ႈပိူဝ်ႈလုၵ်ႈၸၢႆးတူၼ်ႈမၼ်း ၼၼ်ႉဢေႃႈ။
၁၁ ၼႂ်းမိူဝ်ႉဝၼ်းၼၼ်ႉတၵ်းမီးတၢင်းဢၼ်ႁႆႈႁွင်ႉပွင်ႉၶၢင်းဢၼ်ယႂ်ႇၼႃႇလူင်လၢင် ၵႃႈၼႂ်းဝဵင်း ယေႇရုသလႅမ်ႇ မိူၼ်ၸိူဝ်ႉၼင်ႇဢၼ်ႁႆႈႁွင်ႉပွင်ႉၶၢင်းၵႃႈတီႈဝဵင်းႁႃႇတတြိမ်ႇမုၼ်ႇ ၵႃႈၼႂ်းပၢင်ႇႁူၺ်ႈမေႇၵိတ်ႉတေႃႇ ၼၼ်ႉဢေႃႈ။
၁၂ မိူင်းတင်းမိူင်းတၵ်းႁႆႈႁွင်ႉပွင်ႉၶၢင်းၸွမ်းလူၺ်ႈမဵဝ်းၽႂ်မဵဝ်းမၼ်းယေႈမဵဝ်းယေႈတီႈဢေႃႈ။ပီႈၼွင်ႉၸိူဝ်ႉၶိူဝ်းၶုၼ်တႃႇဝိတ်ႉတီႈၼိုင်ႈ မေႈယိင်းၶဝ်တီႈၼိုင်ႈ၊ပီႈၼွင်ႉၸိူဝ်ႉၶိူဝ်းၼႃႇသၼ်ႇတီႈၼိုင်ႈ၊ မေႈယိင်း ၶဝ်တီႈၼိုင်ႈ၊
၁၃ ပီႈၼွင်ႉၸိူဝ်ႉၶိူဝ်းလေႇဝိတီႈၼိုင်ႈ၊ မေႈယိင်းၶဝ်တီႈၼိုင်ႈ၊ ပီႈၼွင်ႉၸိူဝ်ႉၶိူဝ်းဢၼ်ယင်းၵိုတ်းယင်းၵျၢၼ်ႇၵႃႈမီးၼၼ်ႉယေႈမဵဝ်းယေႈတီႈ၊ မေႈယိင်းၶဝ်ယေႈမဵဝ်းယေႈတီႈ တၵ်းဢွၼ်ၵၼ်ႁႆႈႁွင်ႉပွင်ႉၶၢင်းႁင်းၽႂ်ႁင်းမၼ်းဢေႃႈ။