Chapter
၈
ဢေႇၸရၽတ်းဢၢၼ်ႇပတိၺိၺ်ႇတြႃး
၁ မိူဝ်ႈဢၼ်ႁွတ်ႈထိုင်လိူၼ်သတ်ႉတမလႄႈ ၵူၼ်းမဵဝ်းဢိသရေႇလ တူၵ်းတီႈတူၵ်းလႅၼ်ႇၵႃႈၼႂ်းဝၢၼ်ႈၼႂ်းဝဵင်းတီႈယူႇၶဝ်ယဝ်ႉၼၼ်ႉၸိုင် ၵူၼ်းတင်းသဵင်ႈတင်းလူင် ဢွၼ်ၵၼ်မႃးၸူႉတုမ်ႇၵၼ်ၵႃႈတီႈၵၢင်ပၢင်ႇတီႈဢၼ်မီးၵႃႈတီႈၽၢႆႇၼႃႈၽၵ်းတူၼမ်ႉၼၼ့် မိူၼ်ၸိူဝ်ႉၼင်ႇဢၼ် ပဵၼ်တူဝ်လဵဝ်ၸႂ်လဵဝ်ၵၼ်ၵူၺ်းၼၼ်ႉဢေႃႈ။ၶဝ်ၼၼ်ႉဢွၼ်ၵၼ်လၢတ်ႈတီႈဢေႇၸရ သြႃႇမေႃၵျၢမ်းၼၼ်ႉ ႁႂ်ႈမၼ်းဢဝ်ၵျၢမ်းလိၵ်ႈပိင်းၺၢပ်ႈတိမုဝ်းသေႇ ဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈမဵဝ်း ဢိသရေႇလၼၼ်ႉမႃးဢေႃႈ။
၂ ၼႂ်းလိူၼ်သတ်ႉတမဝၼ်းပထမၼၼ်ႉယိတ်ႉပရေႃးႁိၵ်ႈဢေႇၸရ ဢဝ်လိၵ်ႈပိင်းၺၢပ်ႈတိ မႃးၵႃႈတီႈၽၢႆႇၼႃႈပရိၵ်ႈသၢတ်ႈၵူၼ်းၸၢႆးၵူၼ်းယိင်း ၵႃႈဢၼ်ထွမ်ႇလႆႈႁူႉလႆႈၸိူဝ်းၼၼ်ႉလႄႈၽတ်းရွတ်ႈၵႃႈတီႈၼႂ်းၵၢင်ပၢင်ႇ ဢၼ်မီးၵႃႈတီႈၽၢႆႇၼႃႈၽၵ်းတူၼမ်ႉ ၸႃႉၸဵမ်ၶိင်ႇၵၢင်ၼႂ်တေႃႇထိုင်ႁွတ်ႈၶိင်ႇၵၢင်ဝၼ်းတဵင်ႈၵႃႈတီႈၽၢႆႇၼႃႈၵူၼ်းၸၢႆးၵူၼ်းယိင်းဢၼ်ႁူႉထွမ်ႇပွင်ႇလႅင်းလႆႈၸိူဝ်းၼၼ်ႉဢေႃႈ။
၃ ၵူၼ်းတင်းသဵင်ႈတင်းလူင် ဢွၼ်ၵၼ်ဢဝ်ႁူၶဝ်ထွမ်ႇငိၼ်းၵႂၢမ်းၵျၢမ်းလိၵ်ႈပိင်းၺၢပ်ႈတိ ၸေးၸေးၸွတ်ႇ ၸွတ်ႇဢေႃႈ။
၄ ဢေႇၸရသြႃႇဢၼ်မေႃၵျၢမ်းၼၼ်ႉၸုၵ်းယူႇၵႃႈၼိူဝ်ပလၢင်ႇမႆႉၸဵင်ႇ တီႈဢၼ်ႁေႃးတြႃးဢၼ်ၶဝ်ဢွၼ်ၵၼ်ႁဵတ်းၼၼ်ႉသေလႄႈ မတ်ႉတိသိ၊သေႇမ၊ဢၼႃႇယ၊ဢုရိယ၊ ႁိလၶိ၊မႃႇသေႇလ၊ၸိူဝ်းၼၼ်ႉ ၸုၵ်းယူႇၵႃႈတီႈၽၢႆႇတၢင်းၶႂႃမၼ်းလႄႈ ပေႇတႃႇယ၊မိသေႇလ၊မႃႇလၶိ၊ႁႃႇသုမ်ႇ၊ ႁႃႇသပတႃႇၼ၊ၸႃႇၶရိ၊ မေႇသုလမ်ႇ၊ ၸိူဝ်းၼၼ်ႉၸုၵ်းယူႇၵႃႈတီႈ ၽၢႆႇတၢင်းသၢႆႉမၼ်းဢေႃႈ။
၅ ၼင်ႇၼၼ်လႄႈဢေႇၸရၼၼ်ႉ ၸုၵ်းယူႇၵႃႈတီႈဢၼ်သုင်လႄႈ ၵူၼ်းတင်းသဵင်းတင်းလူင်တူၺ်းႁၼ်မၼ်းလႆႈဢေႃႈ။မၼ်းၽုၺ်ႇလိတ်ႈၵျၢမ်းလိၵ်ႈ သိုဝ်ၼႃႈတႂ်ႈတႃၵူၼ်းတင်းသဵင်ႈ တင်းလူင်ဢေႃႈ။
၆ ၵူၼ်းတင်းသဵင်ႈတင်းလူင်ၵေႃႈဢွၼ်ၵၼ်လုၵ်ႉၸုၵ်းဢေႃႈ။ဢေႇၸရၼၼ်ႉယွင်ႈယေႃးပၼ်တၢင်းလီတီႈထႃႇဝရႃႉၽြႃး ၽြႃးပဵၼ်ၸဝ်ႈဢၼ်ယႂ်ႇမျၢတ်ႈၼႃႇၼၼ်ႉဢေႃႈ။ၵူၼ်းတင်းသဵင်ႈတင်းလူင်ဢွၼ်ၵၼ်ယုၵ်ႉမိုဝ်းၶဝ်သေလႄႈ ႁပ်ႉတုင်းဢဝ်လႄႈဝႃႈ၊-ဢႃမိၼ်၊ဢႃမိၼ်၊ဝႃႈၼင်ႇၼႆလႄႈ ၵူမ်ႈၵွမ်းႁူဝ်ၶုပ်ႉမူပ်ႇၵႃႈၼိူဝ်လိၼ်ယူႇသေလႄႈ ၵူဝ်းၵႂၢႆႇထႃႇဝရႃႉ ၽြႃးဢေႃႈ။
၇ ယေႃးသု၊ပႃႇၼိ၊သေႇရၽိ၊ယႃႇမိၼ်ႇ၊ဢၵ်ႉၵုၵ်ႉ၊သပ်ႉပေႇသေႇ၊ႁေႃႇတိယ၊မႃႇသေႇယ၊ ၵေႇလိတ၊ဢႃႇၸရိ၊ယေႃႇၸပတ်ႉ၊ႁႃႇၼၼ်ႇ၊ပေႇလႃႇယ၊ဢိၵ်ႇတင်း ၵူၼ်းမဵဝ်းလေႇဝိ ၸိူဝ်းၼၼ်ႉၵေႃႈဢွၼ်ၵၼ်ၽုၺ်ႇဢွၵ်ႇၼႄပျႃးဢၼၢၵ်ႈၵျၢမ်းလိၵ်ႈပိင်းၺၢပ်ႈတိတီႈၵူၼ်းတင်းလၢႆဢေႃႈ။ၵူၼ်းတင်းလၢႆၸိူဝ်း ၼၼ်ႉၵေႃႈဢွၼ်ၵၼ်ၸုၵ်းယူႇဢေႃႈ။
၈ ၼင်ႇၼၼ်လႄႈၶဝ်ဢွၼ်ၵၼ်ၽတ်းရွတ်ႈ ၵျၢမ်းလိၵ်ႈပိင်းၺၢပ်ႈတိၽြႃးပဵၼ်ၸဝ်ႈသေႇၶျႃႇလီငၢမ်းလႄႈ ၽုၺ်ႇဢွၵ်ႇဢၼၢၵ်ႈမၼ်းသေလႄႈႁဵတ်းႁႂ်ႈၵူၼ်းတင်းလၢႆႁူႉတီႈဢၼ်ၽတ်းဢၼ်ရွတ်ႈၼၼ်ႉဢေႃႈ။
၉ ၼေႇႁမိ ၶုၼ်ဢၼ်ဢုပ်ႉၵႃႈၼိူဝ်မိူင်းဢိၵ်ႇတင်းယိတ်ႉပရေႃးႁိၵ်ႈဢေႇၸရသြႃႇမေႃၵျၢမ်းတင်းၵူၼ်းမဵဝ်း လေႇဝိ ဢၼ်သင်ႇသွၼ်တီႈၵူၼ်းတင်းလၢႆၸိူဝ်းၼၼ်ႉလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊-ဝၼ်းမိူဝ်ႈၼႆႉ ပဵၼ်ဝၼ်းဢၼ်မူတ်းၸၢင်ႇ ပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈသူဢေႃႈ။ယႃႇပေဢွၼ်ၵၼ်ႁဵတ်းတၢင်းဢၼ်ၶၢင်းၶီၶၢင်းၽၢၼ်ႇ တၢင်းဢၼ်ႁႆႈႁွင်ႉပွင်ႉမိုၼ်။လွင်ႈမၼ်းၸမ်းၵူၼ်းတင်းသဵင်ႈတင်းလူင်ဢွၼ်ၵၼ်ႁႆႈႁွင်ႉၼႂ်းမိူဝ်ႈဢၼ်ငိၼ်းၵႂၢမ်းၵျၢမ်းလိၵ်ႈပိင်း ၺၢပ်ႈတိၼၼ်ႉဢေႃႈ၊ဝႃႈၼင်ႇၼႆဢေႃႈ။
၁၀ မၼ်းသမ်ႉလၢတ်ႈတီႈၶဝ်လႄႈဝႃႈ၊-ဢွၼ်ၵၼ်ၵႂႃႇလႄႈၵိၼ်တၢင်းၵိၼ်တၢင်းၶူပ်းဢၼ်ပီးလီမၼ်းလီတႃႉ။ဢွၼ်ၵၼ်သူတ်ႉၵိၼ်ၼမ်ႉဢၼ်ဝၢၼ်လီၸဵမ်းလီတႃႉ။ဢွၼ်ၵၼ်ပၼ်ပုၼ်ႈပၼ်တႃႇ တီႈၶဝ်ၸိူဝ်းဢၼ်ဢမ်ႇမီးၵႃႈသင်သေၸိူဝ်ႉသေပိူင်ၼၼ်ႉတႃႉ။ဝၼ်းမိူဝ်ႈၼႆႉပဵၼ်ဝၼ်းဢၼ်မူတ်းၸၢင်ႇပုၼ်ႈၸဝ်ႈၽြႃးႁဝ်းဢေႃႈ။ယႃႇပေဢွၼ်ၵၼ်ငိၼ်းၶီငိၼ်းၽၢၼ်။လွင်ႈမၼ်းၸမ်းဢၶႂၢင်ႉတၢင်းဢၼ်ၸူမ်းသိူဝ်း ဢၼ်ထႃႇဝရႃႉၽြႃးပၼ်ၼၼ်ႉပဵၼ်ႁႅင်းတၼ်းၶူဝ်းသူဢေႃႈ၊ဝႃႈၼင်ႇၼႆဢေႃႈ။
၁၁ ၼင်ႇၼၼ်လႄႈ ၵူၼ်းမဵဝ်းလေႇဝိၸိူဝ်းၼၼ်ႉႉလၢတ်ႈလႄႈဝႃႈ၊-ၵွပ်ႈပိူဝ်ႈဢၼ်ဝၼ်းၼႆႉပဵၼ်ဝၼ်းဢၼ်မူတ်းၸၢင်ႇလႄႈ ဢွၼ်ၵၼ်ယူႇသိတ်ႇသိတ်ႇယဵၼ်ယဵၼ်တႃႉ။ယႃႇပေဢွၼ်ၵၼ်ငိၼ်းၶီငိၼ်းၽၢၼ်၊ဝႃႈၼင်ႇၼႆလႄႈ ႁႂ်ႈၵူၼ်းတင်းသဵင်ႈတင်းလူင်ၼၼ်ႉ တဵတ်ႇ ယဵၼ်ဢေႃႈ။
၁၂ ၵူၼ်းတင်းသဵင်ႈတင်းလူင်ၼၼ်ႉ ၵွပ်ႈပိူဝ်ႈဢၼ်ၶဝ်ႁူႉၸႅင်ႈ ၵႂၢမ်းဢၼ်ႁေႃးလၢတ်ႈတီႈၶဝ်ၼၼ်ႉလႄႈၶဝ်ဢွၼ်ၵၼ်ၵႂႃႇ ႁႂ်ႈလႆႈႁဵတ်းတၢင်းဢၼ်ၵိၼ်ဢၼ်ၶူပ်း တၢင်းဢၼ်ပၼ်ပုၼ်ႈပၼ်တႃႇတၢင်းဢၼ်ၸူမ်းဢၼ်သိူဝ်းၼႃႇလူင်လၢင်ၼၼ်ႉဢေႃႈ။
၁၃ ၼႂ်းဝၼ်းတုတိယၼၼ်ႉ ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်မဵဝ်းပူႇမဵဝ်းပေႃႈ ၼႂ်းၵူၼ်းတင်းသဵင်ႈတင်းလူင်ဢိၵ်ႇတင်းယိတ်ႉပရေႃးႁိတ်ႈတင်းလၢႆ တင်းၵူၼ်းလေႇဝိတင်းလၢႆၸိူဝ်းၼၼ်ႉ ဢွၼ်ၵၼ်ၸူႉၵၼ်တုမ်ၵၼ်ၵႃႈတီႈဢေႇၸရသြႃႇမေႃၵျၢမ်း ၼၼ်ႉသေလႄႈ ႁႂ်ႈလႆႈထွမ်ႇငိၼ်းၵႂၢမ်းၵျၢမ်းပိင်းၺၢပ်ႈတိ ၸေးၸေးၸွတ်ႇ ၸွတ်ႇဢေႃႈ။
၁၄ ၶဝ်ဢွၼ်ၵၼ်ထူပ်းႁၼ်ဢၼ်တႅမ်ႈဝႆႉမီးယူႇၵႃႈၼႂ်းၵျၢမ်းပိင်းၺၢပ်ႈတိၼၼ်ႉ လူၺ်ႈလွင်ႈဢၼ်ထႃႇဝရႃႉၽြႃးဢဝ်မုဝ်းသေႇ ၸီႇယၢင်ႇဝႆႉႁႂ်ႈၵူၼ်းမဵဝ်းဢိသရေႇလ တင်းလၢႆဢွၼ်ၵၼ်ယူႇၵႃႈၼႂ်းသုမ်ႉၼႂ်းထဵင်မိူဝ်ႈဢၼ်ၶဝ်ယင်းတိုၵ်ႉၶၢမ်ႇပွႆးၼႂ်းလိူၼ် သတ်ႉတမၼၼ်ႉယူႇလႄႈ ႁႂ်ႈၶဝ်ဢွၼ်ၵၼ်ပဝ်ႇသေႃႇၵႃႈၼႂ်းဝဵင်းယေႇရုသလႅမ်ႇ ဢိၵ်ႇတင်းဝၢၼ်ႈဝဵင်းၵႃႈမီးလႄႈ ဝႃႈ၊-
၁၅ လွင်ႈၼင်ႇႁိုဝ်တၵ်းလႆႈႁဵတ်းသုမ်ႉထဵင်တင်းလၢႆၸွမ်းၵႃႈၼင်ႇဢၼ်ပႃးၼႂ်းၵျၢမ်းလိၵ်ႈၼၼ်ႉၸိုင်ဢွၼ်ၵၼ်ဢွၵ်ႇၸူးၵႃႈတီႈလွႆလႄႈဢဝ်ၵိင်ႇမႆႉၶႃႊမႆႉသၼ်ႇလုၼ်ႇ၊ၵိင်ႇမႆႉၶႃႊမႆႉသၼ်ႇလုၼ်ထိူၼ်ႇ၊ ၵိင်ႇမႆႉၶႃႊမႆႉမုရတု၊ ၵၢၼ်ႈမႂ်ႊတွင်ထၢၼ်း တင်းၵိင်ႇမႆႉၶႃႊမႆႉဢၼ်ၽိူဝ်ၼႃလီပူင်းလီၼၼ်ႉမႃးႁႂ်ႈလႆႈႁဵတ်းသုမ်ႉႁဵတ်းထဵင်ၸွမ်းၵႃႈၼင်ႇဢၼ်တႅမ်ႈဝႆႉၼၼ်ႉဢေႃႈ။
၁၆ ၼင်ႇၼၼ်လႄႈၵူၼ်းတင်းလၢႆဢွၼ်ၵၼ်ဢွၵ်ႇၵႂႃႇလႄႈဢဝ်ၵိင်ႇမႆႉၶႃႊမႆႉမႃးသေလႄႈ ႁဵတ်းသုမ်ႉႁဵတ်းထဵင်ၵႃႈၼိူဝ်မုင်းႁိူၼ်း ၵႃႈၼႂ်းဝၢင်းၶဝ်၊ၵႃၼႂ်းတမ်ႇတိူင်းႁိူၼ်းၽြႃးပဵၼ်ၸဝ်ႈၵႃႈတီႈၼႂ်းၵၢင်ပၢင်ႇၽၵ်းတူၼမ်ႉဢိၵ်ႇတင်း ၵႃႈတီႈၼႂ်းၵၢင်ပၢင်ႇၽၵ်းတူဢေႇၽ ရိမ်ႇၼၼ်ႉဢေႃႈ။
၁၇ ပရိၵ်ႈသၢတ်ႈတင်းသဵင်ႈတင်းလူင်ဢွၼ်ၵၼ်ဢွၵ်ႇမႃးသေ ၵႃႈၼႂ်းမုၵ်ႉၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉလႄႈ ဢွၼ်ၵၼ်ႁဵတ်းသုမ်ႉထဵင်သေလႄႈၼင်ႈယူႇၵႃႈတႂ်ႈသုမ်ႉထဵင်ၸိူဝ်းၼၼ်ႉဢေႃႈ။ၸႃႉၸဵမ်ၸူဝ်ႈပၢၼ်ယေႃးသုလုၵ်ႈၸၢႆးၼုၼ်ႇတေႃႇထိုင်ႁွတ်ႈဝၼ်းၼၼ်ႉ ၵူၼ်းမဵဝ်းဢိသရေႇလ တင်းလၢႆ ဢမ်ႇတွၼ်ႉဢွၼ်ၵၼ်ႁဵတ်းၸိူဝ်ႉၼင်ႇၼၼ်သေၽဝ်ႇသပွေၵ်ႈ။ၶဝ်ဢွၼ်ၵၼ်ၸူမ်းသိူဝ်းၼႃႇ လူင်လၢင်ဢေႃႈ။
၁၈ ၸႃႉၸဵမ်ဝၼ်းပထမတေႃႇထိုင်ႁွတ်ႈဝၼ်းတီႈသုတ်းၼၼ်ႉ ဝၼ်းၼိုင်ႈယဝ်ႉဝၼ်းၼိုင်ႈမၼ်းၽတ်းရွတ်ႈ ၵျၢမ်းလိၵ်ႈပိင်းၺၢပ်ႈတိၽြႃးပဵၼ်ၸဝ်ႈယူႇဢေႃႈ။ၶဝ်ဢွၼ်ၵၼ်ၶၢမ်ႇပွႆးၼၼ်ႉၸဵတ်းဝၼ်းတဵမ်တဵမ်လႄႈ ၼႂ်းဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉ ၶဝ်ဢွၼ်ၵၼ်ၶၢမ်ႇပွႆးထမ်ႇမႃႉ ၸွမ်းၵႃႈၼင်ႇဢၼ်တြႃးၸဝ်ႈမီးၼၼ်ႉဢေႃႈ။