Chapter
၆
တၢင်းဢၼ်ၶတ်းၵၼ်တင်းတၢင်းဢၼ်ၶိုၼ်းတႄႇႁဵတ်း
၁ မိူဝ်ႈၼၼ်ႉသၼ်ႇပႃႇလတ်ႉဢိၵ်ႇတင်းတေႃႇၽိတင်းၵေႇသိမ်ႇ ၵူၼ်းဢႃႇရေႇပျႃႇတင်းရၢၼ်ႇသူႇႁဝ်းဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉ လႆႈငိၼ်းလွင်ႈဢၼ်ၵဝ်တႄႇႁဵတ်းလမ်းဝဵင်းလႄႈၵေႃလမ်းဝဵင်းပဵၼ်ဢၼ်လုင်ႇလီလွတ်ႈလီ၊ပိၵ်ႉသမ်ႉ ၵဝ်ဢမ်ႇပႆႇလႆႈပူၵ်းတင်ႈ ၽၵ်းတူဝဵင်းသေၵေႃႈ သၼ်ႇပႃႇလတ်ႉႉတင်းၵေႇသိမ်ႇသင်ႇလၢတ်ႈၶေႃႈၵႂၢမ်းမႃးတီႈၵဝ်လႄႈဝႃႈ၊-
၂ မႃးသေၵမ်း။ႁူပ်ႉထူပ်းၵၼ်တင်းႁဝ်းၵႃႈတီႈဝၢၼ်ႈဝၢၼ်ႈၼိုင်ႈၵႃႈၼႂ်းပၢင်ႇႁူၺ်ႈဢေႃႇၼေႃႇၼၼ်ႉသေၵမ်း၊ဝႃႈၼင်ႇၼႆလႄႈ သွင်ၶႃၼၼ်ႉမီးတၢင်းၵျၢမ်ႇတၢင်းပွင် ဢၼ်ၶႆႈႁဵတ်းဢၼ်ဢမ်ႇလီတီႈၵဝ်ဢေႃႈ။
၃ ၵဝ်ၵေႃႈပွႆႇၸႂ်ႉတမၢၼ်ႇၸူးတီႈသွင်ၶႃလႄႈဝႃႈ၊-ၵွပ်ႈပိူဝ်ႈဢၼ်ၵဝ်လႆႈၵိုတ်ႈႁၢပ်ႇဢမူႉဢၼ်ယႂ်ႇၼႃႇလူင်လၢင်လႄႈ ၵဝ်ဢမ်ႇလူင်းဢမ်ႇၵႂႃႇလႆႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈယင်းဢမ်ႇၵိုတ်ႈႁၢပ်ႇဢမူႉၼႆႉလႄႈ တၵ်းလႆႈလူင်းၵႂႃႇတီႈဢၼ်သူမီးၼၼ်ႉသေလႄႈႁႂ်ႈဢမူႉၼႆႉလႆႈၵိုတ်း ထၢတ်ႇၵႂႃႇ၊ဝႃႈၼင်ႇၼႆဢေႃႈ။
၄ ၼင်ႇၼၼ်လႄႈသွင်ၶႃၼၼ်ႉ ၶိုၼ်းသင်ႇလၢတ်ႈမႃးတီႈၵဝ်တေႃႇထိုင်ႁွတ်ႈသီႇပွၵ်ႈလႄႈ ၵဝ်ၵေႃႈၶိုၼ်းလၢတ်ႈမိူၼ်ၸိူဝ်ႉၼင်ႇပွၵ်ႈ ဢွၼ်တၢင်းၼၼ်ႉဢေႃႈ။
၅ လိုၼ်းၼၼ်ႉပွၵ်ႈပိၼ်ႇၸမသၼ်ႇပႃႇလတ်ႉပွႆႇၸႂ်ႉၶႃႈမၼ်းမႃး မိူၼ်ၸိူဝ်ႉၼင်ႇပွၵ်ႈဢွၼ်တၢင်းၼၼ်ႉဢေႃႈ။ၶႃႈမၼ်းၼၼ်ႉပႃးဢဝ်လိၵ်ႈ ဢၼ်ဢမ်ႇတူပ်ႉဢမ်ႇႁမ်းၼၼ်ႉမႃးဢေႃႈ။
၆ ၵႂၢမ်းလိၵ်ႈၼၼ်ႉမီးဝႆႉဝႃႈၸမ်း၊- ၵူၼ်းၵူႈၸိူဝ်ႉၵူႈမဵဝ်းဢွၼ်ၵၼ်လၢတ်ႈလွင်ႈဢၼ်မႂ်း ဢိၵ်ႇတင်းၵူၼ်းယုတတင်းလၢႆမီးတၢင်းၵျၢမ်ႇတၢင်းပွင် တၵ်းလုၵ်ႉၽိုၼ်ႉၼၼ်ႉဢေႃႈ။ၵေႇသိမ်ႇၵေႃႈ ၶၢမ်ႇသၢၵ်ႈသေႇၸိူဝ်ႉၼင်ႇၼၼ်ဢေႃႈ။မႅၼ်ႈၵၼ်တင်းၵႂၢမ်းၼၼ်ႉလႄႈ မႂ်းတႄႇႁဵတ်းလမ်းဝဵင်းၵွပ်ႈပိူဝ်ႈမႂ်းမီးဢလူဝ်ႇၶႂ်ႈပဵၼ်ၶုၼ်ႁေႃၶမ်းၶဝ်ဢေႃႈ။
၇ မႂ်းၶၢၼ်းယိတ်ႉပရေႃးႁိၵ်ႈတင်းလၢႆဝႆႉ ႁႂ်ႈလႆႈဢဝ်လွင်ႈမႂ်းႁေႃးလၢတ်ႈၵႃႈၼႂ်းဝဵင်းယေႇရုသလႅမ်ႇ လႄႈဝႃႈ၊-ၵႃႈတီႈမိူင်းယုတ မီးၶုၼ်ႁေႃၶမ်းယဝ်ႉ၊ ဝႃႈၼင်ႇၼႆၼၼ်ႉဢေႃႈ။မီးတီႈဢၼ်တၵ်းလႆႈလဝ်ႈလၢတ်ႈတီႈၶုၼ်ႁေႃၶမ်း ၸွမ်းၵႃႈၼင်ႇဢၼ်ၵႂၢမ်းၼၼ်ႉမီးၼၼ်ႉဢေႃႈ။ပိူဝ်ႈဢၼ်ပဵၼ်ၼင်ႇၼႆလႄႈတေႃႈလဵဝ်ၼႆႉမႃး လႄႈ တိူင်ႇပၢင်ႇၵၼ်တႃႉႁဝ်း၊ဝႃႈၼင်ႇၼႆဢေႃႈ။
၈ မိူဝ်ႈၼၼ်ႉၵဝ်ပွႆႇၸႂ်ႉၵႂႃႇတီႈမၼ်းလႄႈဝႃႈ၊-ၵႂၢမ်းဢၼ်မႂ်းလၢတ်ႈၼၼ်ႉဢမ်ႇမၢၼ်ႇဢမ်ႇမႅၼ်ႈသေၶေႃႈသေၵမ်း။မႂ်းဢဝ်ၵႃႈၼႂ်းႁူဝ်ၸႂ်မႂ်းၵျၢမ်ႇပွင်ၵူၺ်းဢေႃႈ၊ ဝႃႈ ၼင်ႇၼႆဢေႃႈ။
၉ ၶဝ်ၸိူဝ်းၼၼ်ႉဢွၼ်ၵၼ်လွၵ်ႇငိူတ်ႈႁဝ်းလႄႈၶဝ်ထၢင်ႇဝႃႈ တၵ်းႁဵတ်းႁႂ်ႈႁႅင်းမိုဝ်းႁဝ်းတၵ်းဢူၼ်ႈၵႂႃႇယွမ်းၵႂႃႇလႄႈ ႁႂ်ႈဢမူႉၼၼ်ႉဢမ်ႇယဝ်ႉတူဝ်ႈလႆႈၼၼ်ႉဢေႃႈ။ၵူၺ်းၵႃႈၵွပ်ႈပိူဝ်ႈၵႂၢမ်းၼၼ်ႉလႄႈႁႅင်းမိုဝ်းၵဝ်ယိင်ႈၶႅၼ်းယႂ်ႇမႃးတူဝ်းမႃးဢေႃႈ။
၁၀ မီးဝၼ်းၼိုင်ႈၵဝ်ၶဝ်ႈၵႂႃႇၵႃႈၼႂ်းႁိူၼ်းသေႇမႃႇယ လုၵ်ႈၸၢႆးတေႇၸႃႇယ ဢၼ်ပဵၼ်လုၵ်ႈၸၢႆးမႁေႇတပေႇလ တီႈဢၼ်မၼ်းတဵတ်ႇမႅပ်းယူႇၼၼ်ႉလႄႈ မၼ်းၼၼ်ႉလၢတ်ႈလႄႈဝႃႈ၊- ႁဝ်းဢွၼ်ၵၼ်ၸူႉၵၼ်တုမ်ၵၼ်ၵႃႈၼႂ်းႁိူၼ်းၽြႃးပဵၼ်ၸဝ်ႈ ၵႃႈတီႈၼႂ်းပိၵ်ႉမၢၼ်ႇၸဝ်ႈသေလႄႈ ဢိုတ်းၽၵ်းတူပိၵ်ႉမၢၼ်ႇမၼ်းၸဝ်ႈဝႆႉတႃႉႁဝ်း။ၶဝ်တၵ်းဢွၼ်ၵၼ်မႃးႁႂ်ႈလႆႈဢဝ်ၸဝ်ႈႁဝ်းတၢႆဢေႃႈ။တၵ်းမႃးၶိင်ႇၵၢင်ၶိုၼ်းႁႂ်ႈလႆႈဢဝ်ၸဝ်ႈႁဝ်း တၢႆဢေႃႈ၊ဝႃႈၼင်ႇၼႆဢေႃႈ။
၁၁ ၵဝ်ၵေႃႈၶိုၼ်းလၢတ်ႈလႄႈဝႃႈ၊-ၵူၼ်းၸိူဝ်ႉၼင်ႇၵဝ်ၼႆႉတၵ်းလႆႈပၢႆႈႁိုဝ်။ၽူႈ လႂ်ဢၼ်ပဵၼ်ၵူၼ်းမိူၼ်ၸိူဝ်ႉၼင်ႇၵဝ်ၼႆႉ တၵ်းၶဝ်ႈၵႃႈၼႂ်းပိၵ်ႉမၢၼ်ႇၸဝ်ႈသေလႄႈ ႁႂ်ႈဢသၢၵ်ႈတူဝ်ၸဝ်ႈၵဝ်ႇလႆႈၵတ်းယဵၼ်ၶျၢမ်းသႃႇၼၼ်ႉ။ၵဝ်ဢမ်ႇၶဝ်ႈၵူၺ်း၊ ဝႃႈၼင်ႇၼႆဢေႃႈ။
၁၂ ၵဝ်ႁူႉသၢႆငၢႆလွင်ႈဢၼ်ၽြႃးပဵၼ်ၸဝ်ႈ ဢမ်ႇပွႆႇၸႂ်ႉမၼ်းမႃးႁႂ်ႈလႆႈႁေႃးလၢတ်ႈယူႇၽၢႆႇၼိုင်ႈတင်းၵဝ်ၸိူဝ်ႉၼင်ႇၼၼ်။ၵွပ်ႈပိူဝ်ႈဢၼ် တေႃႇၽိ တင်း သၼ်ႇပႃႇလတ်ႈ ၸၢင်ႈငႃးဢဝ်မၼ်းၼၼ်ႉ ၵူၺ်းဢေႃႈ။
၁၃ လွင်ႈဢၼ်ၸၢင်ႈငႃးဢဝ်မၼ်းၼၼ်ႉၸမ်းပဵၼ်လွင်ႈဢၼ်တၵ်းႁႂ်ႈၵဝ်ၵူဝ်ႁႄလႄႈ ႁဵတ်းၸိူဝ်ႉၼင်ႇၼၼ်သေလႄႈ ၽိတ်းပိူင်ႈၸဝ်ႈၽြႃးသေယဝ်ႉမီးလွင်ႈဢၼ်တၵ်းလႆႈလၢတ်ႈ ဢၼ်ဢမ်ႇလီဢမ်ႇငၢမ်းလႄႈ လႆႈဢၶႂၢင်ႉဢၼ်တၵ်းသေႉတၵ်းသွမ်းတီႈၵဝ်ဢေႃႈ။
၁၄ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၶႅၼ်းတေႃႈမၢတ်ႈတွင်းတေႃႇၽိ တင်းသၼ်ႇပႃႇလတ်ႈၸွမ်းလူၺ်ႈတၢင်းဢၼ်ၶဝ်ႁဵတ်းၸိူဝ်ႉၼင်ႇၼၼ် ဢိၵ်ႇတင်းၼေႃႇတိပရေႃးၽိတ်ႈမေႈယိင်း တင်းပရေႃးၽိတ်ႈဢၼ်လွၵ်ႇငိူတ်ႈၶႃႈၸဝ်ႈတင်းလၢႆၸိူဝ်းၼၼ်ႉသေၵမ်းတီႈၶႃႈ။
တၢင်းဢၼ်တႄႇႁဵတ်းလမ်းဝဵင်းယဝ်ႉတူဝ်
၁၅ ႁိုင်ႁႃႈသိပ်းပၢႆသွင်ဝၼ်းၼႂ်းလိူၼ်ဢေႇလုလ သၢဝ်း ႁႃႈဝၼ်းၼၼ်ႉလမ်းဝဵင်းယဝ်ႉတူဝ်ႈဢေႃႈ။
၁၆ မိူဝ်ႈဢၼ်ရၢၼ်ႇသူႇႁဝ်း တင်းသဵင်ႈတင်းလူင် လႆႈငိၼ်းလွင်ႈမၼ်းၼၼ်ႉၸိုင် ၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ယူႇၵႃႈတီႈလဵပ်ႈႁွပ်ႈႁဝ်းၸိူဝ်းၼၼ်ႉ ၵူဝ်ႁႄလႄႈ ဢွၼ်ၵၼ်မီးတၢင်းဢၼ် ၶျႃးတူၵ်းတီႈတႅမ်ႇသိုဝ်ႈၼႃႈတႂ်ႈတႃတူဝ်ၸဝ်ႈၵဝ်ႇဢေႃႈ။လွင်ႈမၼ်းၸမ်းၶဝ်ႁူႉသၢႆငၢႆလွင်ႈဢၼ်ဢမူႉၼၼ်ႉ ယဝ်ႉတူဝ်ႈလူၺ်ႈဢၶႂၢင်ႉၽြႃး ပဵၼ်ၸဝ်ႈႁဝ်းၼၼ်ႉဢေႃႈ။
၁၇ ၼႂ်းၶိင်ႇၵႃႇလႃႉမိူဝ်ႈၼၼ်ႉမူးမၢတ်ႈၽွင်းမိူင်းယုတ တင်းလၢႆပၼ်လိၵ်ႈမႅတ်ႈတႃႇၵႂႃႇတီႈတေႃႇၽိၼမ်ၼႃႇလႄႈ လိၵ်ႈတေႃႇၽိၵေႃႈ ၶိုၼ်းတွပ်ႇမႃးတီႈၶဝ်ၼမ်ၼႃႇဢေႃႈ။
၁၈ ၵူၼ်းယုတၼမ်ၼႃႇၶၢမ်ႇသႅတ်ႉၸႃႇတီႈတေႃႇၽိ ၵွပ်ႈပိူဝ်ႈဢၼ်မၼ်းပဵၼ်လုၵ်ႈၶူၺ်သေႇၵၼိလုၵ်ႈၸၢႆးဢႃႇရႃႇ ဢိၵ်ႇတင်းၵွပ်ႈပိူဝ်ႈဢၼ် ယေႃးႁၼၼ်ႇ လုၵ်ႈၸၢႆးမၼ်းၼၼ်ႉ ပဵၼ်ၵူပ်းပဵၼ်ၵူႈ လူၺ်ႈၵၼ်တင်းလုၵ်ႈယိင်းမေႇသုလမ်ႇလုၵ်ႈၸၢႆးပေႇရၶိၼၼ်ႉဢေႃႈ။
၁၉ ၶဝ်ၼၼ်ႉဢွၼ်ၵၼ်ဢဝ် လွင်ႈတၢင်းဢၼ်လီဢၼ်ငၢမ်းဢၼ်တေႃႇၽိ ႁဵတ်းၸိူဝ်းၼၼ်ႉၶိုၼ်းလၢတ်ႈတီႈၵဝ်လႄႈၵႂၢမ်းၵဝ်ၵေႃႈ ၶဝ်ဢဝ်ၶိုၼ်းလၢတ်ႈတီႈတေႃႇၽိဢေႃႈ။တေႃႇၽိ ၵေႃႈပၼ်လိၵ်ႈဢၼ်တၵ်းႁႂ်ႈၵဝ်ၵူဝ်ႁႄမၼ်းၼၼ်ႉမႃးဢေႃႈ။