Chapter
၁
တၢင်းသူးတွင်းၼေႇႁမိ
၁ ၵႂၢမ်းဢၼ် ၼေႇႁမိ လုၵ်ႈၸၢႆးႁႃႇၶလိ ဝႃႈၼၼ်ႉၸမ်း၊ ၼႂ်းပီႊဢၼ်ၶုၼ်လူင်ဢႃႇတၸေႇရိတ်ႉၸၢမ်ႇႁၢင်ႈၸၢမ်ႇႁေႃသၢဝ်းပီႊ လိူၼ်ၶိသလု ၼၼ်ႉၼႂ်းမိူဝ်ႈဢၼ်ၵဝ်ယင်းတိုၵ်ႉမီးယူႇၵႃႈၼႂ်းသုသၼ်ႇ ႁေႃၸဝ်ႈ ၼၼ်ႉၸိုင်
၂ ၼွင်ႉၸၢႆးၵဝ်ႁႃႇၼၼိ တင်းၵူၼ်းယုတၵမ်ႈၽွင်ႈႁွတ်ႈမႃးလႄႈ ၵဝ်တွင်ႈထၢမ်လွင်ႈၵူၼ်းယုတဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇ ဢၼ်လွတ်ႈဢွၵ်ႇလႄႈ ယင်းၵိုတ်းယင်းၵျၢၼ်ႇယူႇၸိူဝ်းၼၼ်ႉဢိၵ်ႇတင်းလွင်ႈဝဵင်းယေႇရုသလႅမ်ႇ ၼၼ်ႉတီႈၶဝ်သေယဝ်ႉ ၶဝ်ဢွၼ်ၵၼ်ၶိုၼ်းလၢတ်ႈတီႈၵဝ်လႄႈဝႃႈ
၃ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇ ဢၼ်ယင်းၵိုတ်းယင်းၵျၢၼ်ႇယူႇၵႃႈၼႂ်းမိူင်းၼၼ်ႉ ၶဝ်လႆႈၶၢမ်ႇတၢင်းဢၼ်ယၢပ်ႇၸႂ်ၶၢၼ်ၸႂ်၊ တၢင်းဢၼ်သေႉဢၼ်သွမ်းယႂ်ႇၼႃႇလူင်လၢင်ဢေႃႈ။လမ်းဝဵင်း ယေႇရုသလႅမ်ႇ ၵေႃႈၵိူၼ်ႇပင်းယူႇ ၽၵ်းတူဝဵင်းတင်းလၢႆၵေႃႈ ၽႆးမႆႈသဵင်ႈယဝ်ႉ၊ဝႃႈၼင်ႇၼႆဢေႃႈ။
၄ မိူဝ်ႈဢၼ်ၵဝ်ငိၼ်းၵႂၢမ်းၼၼ်ႉၸိုင် ၵဝ်ၼင်ႈလႄႈႁႆႈႁွင်ႉပွင်ႉၶၢင်းယူႇၶိင်ႇၵႃႇလႃႉႁိုင်တၢၼ်ႇတၢၼ်ႇလႄႈ ၵမ်တၢင်းၵိၼ်ယူႇသေယဝ်ႉ သူးတွင်းၵႃႈတီႈၽၢႆႇၼႃႈၽြႃးပဵၼ်ၸဝ်ႈၸဝ်ႈ ၽုင်ႇၵၢင်ႁၢဝ်လႄႈဝႃႈၸမ်း၊-
၅ ထႃႇဝရႃႉၽြႃးၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်ၽြႃးဢၼ်ယႂ်ႇမျၢတ်ႈလႄႈလီရူဝ်ႇသေႇၵူဝ်ယမ်ၽြႃး ဢၼ်ပႂ်ႉၸွမ်းပတိၺိၼ်ႇၵရူႉၼႃႇလႄႈ ႁႂ်ႈၶဝ်ၸိူဝ်းဢၼ်ႁၵ်ႉပႅင်းၸဝ်ႈႁဝ်းလႄႈၵမ်ၵျၢင်ႉပိင်းၺၢပ်ႈၸဝ်ႈႁဝ်းၸိူဝ်းၼၼ်ႉ တႄႇယူႇၼၼ်ႉ တီႈၶႃႈ၊
၆ ၶႅၼ်းတေႃႈႁႄႈႁူၸဝ်ႈႁဝ်းလႄႈ ၽုၺ်ႇတႃႈမိုၼ်းတႃႈၸဝ်ႈႁဝ်းႁႂ်ႈလႆႈငိၼ်းၵႂၢမ်းပထၼႃႇၶႃႈၸဝ်ႈႁဝ်း ဢၼ်ၶႃႈၸဝ်ႈသူးတွင်းယူႇ ၵႃႈတီႈၽၢႆႇၼႃႈၸဝ်ႈႁဝ်းၵူႈဝၼ်းၵူႈၶိုၼ်း ပုၼ်ႈၵူၼ်းမဵဝ်း ဢိသရေႇလ တင်းလၢႆၼၼ်ႉသေၵမ်းၶႃႈ။ၶႃႈၸဝ်ႈၽုၺ်ႇဢွၵ်ႇၼႄပျႃးတွင်းပၢၼ်ႇဢပျႅတ်ႈ ၵူၼ်းမဵဝ်းဢိသရေႇလတင်းလၢႆ ဢၼ်ၶႃႈၸဝ်ႈႁဝ်းၶဝ်လႆႈၽိတ်းပိူင်ႈမႅၼ်ႈ ၸဝ်ႈႁဝ်းၼၼ်ႉသေၵမ်းတီႈၶႃႈ။
၇ ၶႃႈၸဝ်ႈႁဝ်းဢိၵ်ႇတင်း မဵဝ်းၸိူဝ်ႉၶိူဝ်းပေႃႈၶႃႈၸဝ်ႈႁဝ်းၼႆႉ ၽိတ်းပိူင်ႈတီႈၶႃႈယဝ်ႉ။ၶႃႈၸဝ်ႈႁဝ်းၶဝ်ၽိတ်းပိူင်ႈၸဝ်ႈႁဝ်းလႄႈႁဵတ်းမႅၼ်ႈ လွင်ႈတၢင်းဢၼ်ႁၢႆႉယုတ်ႈၼႃႇလူင်လၢင်ၼၼ်ႉလႄႈယင်းဢမ်ႇပႂ်ႉပိင်းၺၢပ်ႈတြႃး၊ ထုင်းၾိင်ႈတြႃးတၢင်းဢၼ်ၸဝ်ႈႁဝ်းၸီႇယၢင်ႇဝႆႉတင်းလၢႆဢၼ်ၸဝ်ႈႁဝ်းသင်ႇလၢတ်ႈဝႆႉတီႈၶႃႈၸဝ်ႈမုဝ်းသေႇ ၼၼ်ႉလႄႈယူႇတီႈၶႃႈယဝ်ႉ။
၈ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၵတိၸဝ်ႈ ဢၼ်ၸဝ်ႈႁဝ်းဝႆႉတီႈၶႃႈၸဝ်ႈႁဝ်းမုဝ်းသေႇၼၼ်ႉဝႃႈ၊- ပေႃးသူပူၼ်ႉလိူဝ်ၸိုင်ၵဝ်တၵ်းႁႂ်ႈသူၽၢတ်ႇၽႄၵၼ်ၵႂႃႇၵႃႈၼႂ်းၵူၼ်းတၢင်ႇၸိူဝ်ႉ တၢင်ႇမဵဝ်းတင်းလၢႆဢေႃႈ။
၉ ၵူၺ်းၵႃႈပေႃးသူသမ်ႉၶိုၼ်းမႃးတီႈၵဝ်လႄႈ သမ်ႉၶိုၼ်းပႂ်ႉၸွမ်းပိင်းၺၢပ်ႈၵဝ်တင်းလၢႆႁႂ်ႈလႆႈၵမ်ၵျၢင်ႉၸိုင်၊ ပိၵ်ႉသမ်ႉသူဢၼ်ပဵၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ် ႁေႃႈဢွၵ်ႇပႅတ်ႈၼၼ်ႉမီးယူႇၵႃႈၼႂ်းတီႈဢၼ်ၵႆသေပိူၼ်ႈ တႂ်ႈၽႃႉၵၢင်ႁၢဝ်ၼၼ်ႉသေၵေႃႈ ၵဝ်တၵ်းသိမ်းဢဝ်သေၵႃႈတီႈၼၼ်ႉလႄႈဢဝ်မႃးၸူးၵႃႈတီႈ တီႈဢၼ်ၵဝ်လိူၵ်ႈၵဵပ်းဢဝ်ပုၼ်ႈဢၼ်ၼႃႇမႃႉၸိုဝ်သဵင်ၵဝ် တၵ်းတႄႇယူႇၼႆႉဢေႃႈ၊ ဝႃႈၼင်ႇၼႆၼၼ်ႉသေၵမ်းတီႈၶႃႈ။
၁၀ မိူဝ်ႈလဵဝ်ၼႆႉၸိုင်ၶဝ်ၸိူဝ်းၼႆႉပဵၼ်ၶႃႈၸဝ်ႈႁဝ်း၊ ၵူၼ်းၸဝ်ႈႁဝ်းဢၼ်ၸဝ်ႈႁဝ်းဢဝ်တင်းမႁႃႇတၼ်းၶူဝ်းၸဝ်ႈႁဝ်း ဢိၵ်ႇတင်းမိုဝ်းၸဝ်ႈႁဝ်း ဢၼ်ႁႅင်းယႂ်ႇၼႃႇၼၼ်ႉၵႄႇသႄႇၼုၵ်ႈ ဢဝ်ၼၼ်ႉတီႈၶႃႈဢေႃႈ။
၁၁ ထႃႇဝရႃႉၽြႃးတီႈၶႃႈ။ၶႅၼ်းတေႃႈဢဝ်ႁူၸဝ်ႈႁဝ်း ထွမ်ႇငိၼ်းၵႂၢမ်းပထၼႃႇဢၼ်ၶႃႈၸဝ်ႈႁဵတ်းဢိၵ်ႇတင်းၵႂၢမ်းပထၼႃႇဢၼ်ၶႃႈၸဝ်ႈႁဝ်းၶဝ် ဢၼ်ၶႂ်ႈရူဝ်ႇသေႇၵူဝ်ယမ်ၼႃႇမႃႉၸိုဝ်သဵင်ၸဝ်ႈႁဝ်းၸိူဝ်းၼႆႉႁဵတ်းၼၼ်ႉသေၵမ်းတီႈၶႃႈ။ၶႅၼ်းတေႃႈပၼ် တၢင်းလီတီႈၶႃႈၸဝ်ႈႁဝ်းၼႆႉဝၼ်ႈမိူဝ်ႈၼႆႉသေၵမ်းတီႈၶႃႈ။ၶႅၼ်းတေႃႈဢိတ်းလူၸွႆႈထႅမ်ႁႂ်ႈလႆႈၼႃႈလႆႈတႃႈ တီႈၽၢႆႇၼႃႈၵူၼ်းတင်းလၢႆၼႆႉသေၵမ်းတီႈၶႃႈဝႃႈၼင်ႇၼႆဢေႃႈ။မိူဝ်ႈၼၼ်ႉၵဝ်လႆႈပဵၼ်ၵေႃႉဢၼ်ယိပ်းၵွၵ်းၶုၼ်ႁေႃၶမ်းယူႇဢေႃႈ။