Chapter
၁၃
တၢင်းဢၼ်ၶိုၼ်းပွင်မႄးႁဵတ်းၼေႇႁမိ တီႈလိုၼ်းသုတ်း
၁ ၼႂ်းဝၼ်းၼၼ်ႉ မိူဝ်ႈဢၼ်ၶဝ်ၽတ်း ၵျၢမ်းလိၵ်ႈပိင်းၺၢပ်ႈတိမုဝ်းသေႇ ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉၸိုင် ၶဝ်လႆႈႁၼ်တႅမ်ႈဝႆႉလွင်ႈဢၼ်ဝႃႈၵူၼ်းမဵဝ်းဢမ်ႇမုၼ်ႇတင်းၵူၼ်းမဵဝ်းမေႃႇၽ တင်းလၢႆဢမ်ႇမီးဢၶႂၢင်ႉ ဢၼ်လႆႈၶဝ်ႈၵႃႈၼႂ်းပရိၵ်ႈသၢတ်ႈၵူၼ်းၽြႃးပဵၼ် ၸဝ်ႈၸိူဝ်းၼၼ်ႉဢေႃႈ။
၂ လွင်ႈမၼ်းၸမ်းၶဝ်ၼၼ်ႉဢမ်ႇဢဝ်ၶဝ်ႈမုၼ်းတင်းၼမ်ႉလႄႈ ႁပ်ႉႁူဝ်တၢင်းၵူၼ်းမဵဝ်းဢိသရေႇလတင်းလၢႆ။ၶဝ်ဢွၼ်ၵၼ်ၸၢင်ႈငႃးဢဝ်ပႃႇလမ်ႇႁႂ်ႈလႆႈၵိၼ်ႇလႃႇမဵဝ်းဢိသရေႇလၶဝ်ဢေႃႈ။ၵူၺ်းၵႃႈၽြႃးပဵၼ်ၸဝ်ႈႁဝ်း ႁႂ်ႈၵႂၢမ်းဢၼ်ၶဝ်ၵိၼ်ႇလႃႇၼၼ်ႉပဵၼ်ၵႂၢမ်းဢၼ်ပၼ်တၢင်းလီသေဢေႃႈ။
၃ မိူဝ်ႈဢၼ်ၶဝ် လႆႈငိၼ်းၵႂၢမ်းတြႃးၼၼ်ႉၸိုင်ၶဝ်ဢွၼ်ၵၼ်ၽႄဢွၵ်ႇ ၶဝ်ၸိူဝ်းဢၼ်မဵဝ်းဢမ်ႇၸႅတ်ႈဢမ်ႇမၢၼ်ႇၵႃႈမီးၼၼ်ႉသေၵႃႈၼႂ်းမဵဝ်းဢိသရေႇလဢေႃႈ။
၄ မိူဝ်ႈဢွၼ်တၢင်းၼၼ်ႉ ယိတ်ႉပရေႃးႁိၵ်ႈဢေႇလျႃႇသိပ်ႉဢၼ်လႆႈဢုပ်ႉၵႃႈၼိူဝ်လုၵ်း ၵႃႈၼွၵ်ႈႁိူၼ်းၽြႃးပဵၼ်ၸဝ်ႈတင်းလၢႆဢေႃႈ။မၼ်းပဵၼ်ပီႈပဵၼ်ၼွင်ႉတေႃႇၽိ ဢေႃႈ။
၅ မၼ်းမႄးႁႅၼ်းလုၵ်းလူင်လႄႈဢဝ်ၶိူင်ႈပုၵ်ႉၸေႃႇၽေႃးၸဵၼ်ႇ လႂ်၊ ၼၢမ်ႇသႃႇ လႂ်၊ၶိူင်ႈယိပ်းၶိူင်ႈၵႅမ်း လႂ်၊ၶဝ်ႈပိူၵ်ႇၶဝ်ႈသၢၼ်၊ ၼမ်ႉၸပိတ်ႉ၊ ၼမ်ႉမၼ်းသိပ်းပုၼ်ႊပုၼ်ႊၼိုင်ႈဢၼ်လႆႈပၼ်တီႈၵူၼ်းမဵဝ်းလေႇဝိ၊ ၶဝ်ၸိူဝ်းဢၼ်မေႃႁဵတ်းၵႂၢမ်း လႂ်၊ၶဝ်ၸိူဝ်းဢၼ်ပႂ်ႉၽၵ်းတူ လႂ်ၸိူဝ်းၼၼ်ႉ ဢိၵ်ႇတင်းတၢင်းလူႇတၢင်းတၢၼ်းဢၼ်လႆႈလူႇတၢၼ်းတီႈယိတ်ႉပရေႃးႁိၵ်ႈတင်းလၢႆ လႂ်ၸိူဝ်းၼၼ်ႉ သႂ်ႇဝႆႉသိမ်းဝႆႉပုၼ်ႈတေႃႇၽိ ဢေႃႈ။
၆ ၼႂ်းၶိင်ႇမိူဝ်ႈၼၼ်ႉၵဝ်ဢမ်ႇမီးၵႃႈတီႈဝဵင်းယေႇရုသလႅမ်ႇၼႂ်းပီႊဢၼ် ဢႃႇတၸေႇရိတ်ႉၶုၼ်ႁေႃၶမ်းပႃႇပုလုၼ်ႇၸၢမ်ႇႁၢင်ႈၸၢမ်ႇႁေႃ သၢမ်သိပ်းပၢႆသွင်ပီႊၼၼ်ႉၵဝ်လႆႈၵႂႃႇတီႈၶုၼ်ႁေႃၶမ်းသေဢေႃႈ။
၇ ႁိုင်တၢၼ်ႇတၢၼ်ႇသေယဝ်ႉ ၵဝ်သမ်ႉလႆႈဢၶႂၢင်ႉတီႈၶုၼ်ႁေႃၶမ်းလႄႈ မိူဝ်ႈဢၼ်ၵဝ်ႁွတ်ႈထိုင်ၵႃႈတီႈႁိမ်းဝဵင်းယေႇရုသလႅမ်ႇၼၼ်ႉၸိုင် ၵဝ်လႆႈႁူႉလႆႈငိၼ်းလွင်ႈတူႉၸရိူၵ်ႈဢၼ်ဢေႇလျႃႇသိပ်ႉႁဵတ်းၵွပ်ႈပိူဝ်ႈတေႃႇၽိ ၼႂ်းတၢင်းဢၼ်မၼ်းမႄးႁႅၼ်း လုၵ်းၵႃႈၼႂ်းတမ်ႇတိူင်းႁိူၼ်း ၽြႃးပဵၼ်ၸဝ်ႈဝႆႉပုၼ်ႈမၼ်းၼၼ်ႉဢေႃႈ။
၈ မိူဝ်ႈၼၼ်ႉၵဝ်မီးၸႂ်ဢၼ်ၸဵပ်းၶိုၼ်ႈၼႃႇလူင်လၢင်လႄႈ ဢဝ်ဢုၵ်ႉၸႃႇၶူဝ်းလဵင်းတေႃႇၽိ ၵႃႈမီးဢွၵ်ႇပႅတ်ႈသေၵႃႈ ၼႂ်းလုၵ်းၼၼ်ႉသေယဝ်ႉ၊
၉ ၸီႇယၢင်ႇႁႂ်ႈလုၵ်းၶဝ်တင်းလၢႆမူတ်းသႂ်သေလႄႈ သမ်ႉဢဝ်ၶိူင်ႈပိူင်ႁိူၼ်းၽြႃးပဵၼ်ၸဝ်ႈ လႂ်၊ ၶိူင်ႈပုၵ်ႉၸေႃႇၽေႃးၸဵၼ်ႇ လႂ်၊ၼၢမ်ႇသႃႇလႂ်မႃးသႂၢင်းသႂ်ႇဝႆႉဢေႃႈ။
၁၀ ၵဝ်လႆႈႁူႉႁၼ်လွင်ႈဢၼ်ဝႃႈၶဝ်ဢမ်ႇပၼ်ၵူၼ်းမဵဝ်းလေႇဝိတင်းလၢႆၸိူဝ်းၼၼ်ႉဢၼ်ပဵၼ်ပုၼ်ႈတႃႇၶဝ်ၼၼ်ႉလႄႈ ၵူၼ်းမဵဝ်းလေႇဝိတင်းၶဝ်ၸိူဝ်းဢၼ်မေႃႁဵတ်းၵႂၢမ်းဢၼ်ပႂ်ႉဢမူႉၸဝ်ႈၸိူဝ်းၼၼ်ႉ ဢွၼ်ၵၼ်ဢွၵ်ႇပၢႆႈၸူးၵႃႈတီႈႁႆႊၶဝ်ၼႃး ၶဝ်ႁင်းၽႂ်ႁင်းမၼ်းသေဢေႃႈ။
၁၁ ၵဝ်တၢင်ႇဢပျႅတ်ႈတီႈၶုၼ်ဢၼ်မီးဢရႃႇတင်းလၢႆလႄႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁိူၼ်းၽြႃးပဵၼ်ၸဝ်ႈ လႆႈၶၢမ်ႇတၢင်းဢၼ်ၸုၼ်ႉပႅတ်ႈ၊ ဝႃႈၼင်ႇၼႆသေလႄႈႁႂ်ႈၶဝ်ၸူႉၵၼ်တုမ်ၵၼ်သေယဝ်ႉ သမ်ႉၶိုၼ်းၶၢၼ်းၶဝ်ဝႆႉၵႃႈတီႈၽႂ်တီႈ မၼ်းဢေႃႈ။
၁၂ မိူဝ်ႈၼၼ်ႉၵူၼ်းယုတတင်းလၢႆသမ်ႉၶိုၼ်းဢွၼ်ၵၼ်ဢဝ်ၶဝ်ႈပိူၵ်ႇၶဝ်ႈသၢၼ်၊ၼမ်ႉၸပိတ်ႉ၊ၼမ်ႉမၼ်းသိပ်းပုၼ်ႊပုၼ်ႊၼိုင်ႈ မႃးတီႈတိူၵ်ႈၽၼ်ႇတႃႇ ၸဝ်ႈဢေႃႈ။
၁၃ ၵဝ်ၶၢၼ်းၽူႈပႂ်ႉထိင်းၽၼ်ႇတႃႇဝႆႉၵႃႈၼိူဝ်တိူၵ်ႈၽၼ်ႇတႃႇၸဝ်ႈတင်းလၢႆဢၼ်ပဵၼ် ယိတ်ႉပရေႃးႁိၵ်ႈသေႇလမိ၊ ၸႃႇတုၵ်ႉဢၼ်ပဵၼ်ၵူၼ်းမေႃၵျၢမ်း၊ ပေႇတႃႇယဢၼ်ပဵၼ်ၵူၼ်းမဵဝ်းလေႇဝိ၊ ႁႃႇၼၼ်ႇ ဢၼ်ပဵၼ်လုၵ်ႈၸၢႆးၸၵ်ႉၵုရ၊လုၵ်ႈၸၢႆးမတ်ႉတၼိၸိူဝ်းၼၼ်ႉဢေႃႈ။လွင်ႈမၼ်းၸမ်းၶဝ်ၼၼ်ႉမီးသရေႇလူၺ်ႈလွင်ႈဢၼ်ပႂ်ႉသႅတ်ႈၸႃႇၼၼ်ႉလႄႈ လႆႈႁဵတ်းဢမူႉ တၢင်းဢၼ်မႅင်ႇပၼ်ၽႄပၼ်တီႈပီႈၶဝ်ၼွင်ႉၶဝ်ဢေႃႈ။
၁၄ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၵွပ်ႈပိူဝ်ႈလွင်ႈတၢင်းၼၼ်ႉလႄႈ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈႁဝ်းသေၵမ်းတီႈၶႃႈ။ယႃႇပေၶေႇမွတ်ႇထူမွတ်ႇပႅတ်ႈၵျေးၸူးဢၼ်ၶႃႈၸဝ်ႈႁဝ်း လႆႈႁဵတ်းပုၼ်ႈႁိူၼ်းၽြႃးပဵၼ်ၸဝ်ႈၵဝ်ၶႃႈဢိၵ်ႇတင်းပုၼ်ႈတၢင်းဢၼ်ပႂ်ႉ ဢမူႉႁိူၼ်းၸဝ်ႈၼၼ်ႉသေၵမ်းတီႈၶႃႈ။
၁၅ ၼႂ်းၶိင်ႇၵႃႇလႃႉမိူဝ်ႈၼၼ်ႉၵႃႈၼႂ်းမိူင်းယုတ ၼၼ်ႉၵဝ်လႆႈႁၼ်ၵမ်ႈၽွင်ႈ ယဵပ်ႇၼူတ်ႈမၢၵ်ႇၸပိတ်ႉၼႂ်းဝၼ်းၵမ်သိၼ်ယူႇ၊ ဢဝ်လိုၼ်ႈၶဝ်ႈသႂၢင်းၶဝ်ႈယူႇ၊ဢဝ်ၶူဝ်းတၢင်ႇၵႃႈၼိူဝ်မႃႉလီႈယူႇသေလႄႈ ဢဝ်ၼမ်ႉၸပိတ်ႉ၊မၢၵ်ႇလိူဝ်ႇသၢင်းၽေႃး၊ ၶူဝ်းႁၢပ်ႇၶူဝ်းပႃးၵူႈၸိူဝ်ႉၵူႈမဵဝ်းမႃးၵႃႈၼႂ်းဝဵင်းယေႇရုသလႅမ်ႇ ဝၼ်းၵမ်သိၼ်ၼၼ်ႉလႄႈ ၵဝ်ၶၢမ်ႇသၢၵ်ႈသေႇယူႇၽၢႆႇၼိုင်ႈတင်းၶဝ်ၼႂ်းဝၼ်းဢၼ် ၶဝ်ၶၢႆတၢင်းၵိၼ်တၢင်းၶူပ်းယူႇၼၼ်ႉဢေႃႈ။
၁၆ ၵူၼ်းတုရုဢၼ်ယူႇၵႃႈတီႈၼၼ်ႉၸိူဝ်းၼၼ်ႉၵေႃႈဢွၼ်ၵၼ်ဢဝ်ပႃ လႂ် ဢုၵ်ႉၸႃႇၶူဝ်းလဵင်းၵူႈၸိူဝ်ႉၵူႈပိူင်မႃးလႄႈ ၶၢႆပၼ်တီႈၵူၼ်းမဵဝ်းယုတတင်းလၢႆၵႃႈၼႂ်းဝဵင်းယေႇရုသလႅမ်ႇၼႂ်းဝၼ်းၵမ်သိၼ်ဢေႃႈ။
၁၇ မိူဝ်ႈၼၼ်ႉ ၵဝ်တၢင်ႇဢပျႅတ်ႈတီႈမူးမၢတ်ႈၽွင်းမိူင်းယုတတင်းလၢႆလႄႈဝႃႈ၊- တူႉၸရိူၵ်ႈဢၼ်သူႁဵတ်းလႄႈယႃႉဝၼ်းၵမ်သိၼ်ၼႆႉၸမ်း ပဵၼ်ၸိူဝ်ႉၼင်ႇႁိုဝ်။
၁၈ ပူႇသူမွၼ်ႇသူၼၼ်ႉ ႁဵတ်းၸိူဝ်ႉၼင်ႇၼႆလႄႈၽြႃးပဵၼ်ၸဝ်ႈႁဝ်း ႁႂ်ႈတုၵ်ႉၶႃႉတၢင်းၽၢၼ်ဢၼ်ယႂ်ႇၼႃႇၵႃႈမီးၼႆႉႁွတ်ႈထိုင်ၵႃႈၼိူဝ်ႁဝ်း ဢိၵ်ႇတင်းၵႃႈၼိူဝ်ဝဵင်းၼႆႉယဝ်ႉဢမ်ႇၸႂ်ႈႁိုဝ်။သူယႃႉဝၼ်းၵမ်သိၼ်ၼႆႉလႄႈတၵ်းႁႂ်ႈတၢင်းၸႂ်မႆႈၶႆႈၸႃႉၸဝ်ႈဢၼ်ယိင်ႈၶႅၼ်းယႂ်ႇၼႃႇၼၼ်ႉႁွတ်ႈထိုင်ၵႃႈၼိူဝ်မဵဝ်းဢိသရေႇလဢေႃႈ၊ ဝႃႈ ၼင်ႇၼႆသေလႄႈ
၁၉ မိူဝ်ႈဢၼ်ၸႃႉငႃလပ်းသိင်ႇဝွၼ်ႉဝႅၼ်ႉတီႈၽၵ်းတူဝဵင်းယေႇရုသလႅမ်ႇ တင်းလၢႆၼႂ်းဝၼ်းၽိတ်ႉၼၼ်ႉၸိုင် ၵဝ်ၸီႇယၢင်ႇႁႂ်ႈဢိုတ်းႁပ်းၽၵ်းတူၸိူဝ်းၼၼ်ႉဝႆႉလႄႈ မီးဢမိင်ႉဝႆႉႁႂ်ႈဢမ်ႇလႆႈၽုၺ်ႇတေႃႇထိုင်ႁွတ်ႈထၼ်ႈပေႃး ပူၼ်ႉဝၼ်းၵမ်သိၼ်ၼၼ်ႉသေလႄႈ ၶၢၼ်းၶႃႈၵူၼ်းၵဝ်ၵမ်ႈၽွင်ႈဝႆႉၵႃႈတီႈၽၵ်းတူၸိူဝ်းၼၼ်ႉ ႁႂ်ႈဢမ်ႇလႆႈဢဝ်ၶူဝ်းႁၢပ်ႇၶူဝ်းပႃးၶဝ်ႈၵႃႈၼႂ်းဝၼ်းၵမ်သိၼ်ၼၼ်ႉဢေႃႈ။
၂၀ လိုၼ်းၼၼ်ႉၸဝ်ႈၵုၼ်ႇၸဝ်ႈသႅၼ်းဢိၵ်ႇတင်း ၶဝ်ၸိူဝ်းဢၼ်ၶၢႆၶူဝ်းၶၢႆလဵင်းၵူႈၸိူဝ်ႉၵူႈပိူင်ၸိူဝ်းၼၼ်ႉလႆႈဢွၼ်ၵၼ်ၼွၼ်းၵႃႈတီႈၼွၵ်ႈဝဵင်းယေႇရုသလႅမ်ႇပွၵ်ႈၼိုင်ႈသွင်ပွၵ်ႈဢေႃႈ။
၂၁ ၵဝ်ၵေႃႈပၼ်သတိတီႈၶဝ်လႄႈ လၢတ်ႈတီႈၶဝ်လႄႈဝႃႈ၊-ႁဵတ်းသင်လႄႈသူဢွၼ်ၵၼ်ၼွၼ်းၵႃႈတီႈလဵပ်ႈႁွပ်ႈလမ်းဝဵင်းၼႆႉ။ၵမ်းလိုၼ်းပေႃးသူႁဵတ်းၸိူဝ်ႉၼင်ႇၼၼ်ထႅင်ႈၸိုင်ၵဝ်တၵ်းတီႉဢဝ်သူဢေႃႈ၊ ဝႃႈၼင်ႇၼႆဢေႃႈ။ၸႃႉၸဵမ်မိူဝ်ႈၼၼ်ႉၵႂႃႇလႄႈၶဝ်ယင်းဢမ်ႇဢွၼ် ၵၼ်မႃးၼႂ်းဝၼ်းၵမ်သိၼ်လႄႈယူႇဢေႃႈ။
၂၂ ၵဝ်ၸီႇယၢင်ႇႁႂ်ႈၵူၼ်းမဵဝ်းလေႇဝိတင်းလၢႆ ႁႂ်ႈတူဝ်ၸဝ်ႈၵဝ်ႇမူတ်းသႂ်သေလႄႈ မႃးပႂ်ႉၽၵ်းတူႁႂ်ႈဝၼ်းၵမ်သိၼ်လႆႈမူတ်းၸၢင်ႇဢေႃႈ။ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈႁဝ်း ၵွပ်ႈပိူဝ်ႈလွင်ႈတၢင်းၼၼ်ႉလႄႈၶႅၼ်းတေႃႈဢိတ်းလူၵႄႇသႄႇၶျွတ်ႈဢဝ်ၶႃႈၸဝ်ႈႁဝ်း ၸွမ်းၵႃႈၼင်ႇဢၼ်ၵူႉရူႉၼႃႇၸဝ်ႈၼမ်ၼႃႇၼၼ်ႉသေၵမ်းတီႈၶႃႈ။
၂၃ ၼႂ်းၶိင်ႇၵႃႇလႃႉမိူဝ်ႈၼၼ်ႉ ၵဝ်ႁၼ်ၵူၼ်းယုတဢၼ်ပဵၼ်ၵူပ်းပဵၼ်ၵူႈလူၺ်ႈၵၼ်တင်း လုၵ်ႈယိင်းမဵဝ်းဢႃႇၸုတ်ႉ မဵဝ်းဢမ်ႇမုၼ်ႇ မဵဝ်းမေႃႇၽ ၼၼ်ႉၵမ်ႈၽွင်ႈ ဢေႃႈ။
၂၄ လုၵ်ႈၶဝ်လၢၼ်ၶဝ်ၼၼ်ႉ မေႃလၢတ်ႈၵႂၢမ်းဢႃႇၸုတ်ႉယေႈၶိုင်ႈၵူၺ်းလႄႈ ယင်းဢမ်ႇမေႃလၢတ်ႈၵႂၢမ်းယုတလႄႈ လၢတ်ႈၸွမ်းၵႂၢမ်းၽႃႇသႃႇမဵဝ်းၽႂ် မဵဝ်းမၼ်းဢေႃႈ။ၵဝ်တၢင်ႇဢပျႅတ်ႈတီႈၶဝ်လႄႈသေႉသွမ်းၶဝ်ဢေႃႈ။
၂၅ ၵဝ်ပေႃႉယႅၼ်ႉၵမ်ႈၽွင်ႈလႄႈထူၺ်ႈၶူၼ်ႁူဝ်ၶဝ်ပႅတ်ႈသေလႄႈႁႂ်ႈၶဝ်တိူင်ႇဝႃႈၵိၼ်ႇဝႃႈတီႈၽြႃးပဵၼ်ၸဝ်ႈလႄႈဝႃႈ၊- သူၼႆႉဢမ်ႇလႆႈဢဝ်လုၵ်ႈယိင်းသူႇပၼ်တီႈလုၵ်ႈၸၢႆးၶဝ်ၼၼ်ႉ။ဢမ်ႇလႆႈသိမ်းဢဝ်လုၵ်ႈယိင်းၶဝ်ပုၼ်ႈလုၵ်ႈၸၢႆးသူ ဢိၵ်ႇတင်းပုၼ်ႈ တူဝ်သူ။
၂၆ သေႃးလမုၼ်ႇၶုၼ်ႁေႃၶမ်းဢိသရေႇလၼၼ်ႉႁဵတ်းၸိူဝ်ႉၼင်ႇၼၼ်လႄႈႁွတ်ႈထိုင်တၢင်းဢၼ်ၽိတ်းပိူင်ႈဢမ်ႇၸႂ်ႈႁိုဝ်။ပိၵ်ႉသမ်ႉၵႃႈၼႂ်းၵူႈသိုင်ႇၵူႈမိူင်းၶုၼ်ႁေႃၶမ်း ဢၼ်မိူၼ်ၵၼ်တင်းမၼ်းၼၼ်ႉဢမ်ႇမီးလႄႈ မၼ်းပဵၼ်ၵေႃႉဢၼ်ထုၵ်ႇၸႂ်ၵျိူၵ်ႈၸႂ်ၽြႃးပဵၼ်ၸဝ်ႈတေႃႇထိုင်ႁွတ်ႈထၼ်ႈပေႃး ၽြႃးပဵၼ်ၸဝ်ႈႁႂ်ႈမၼ်းပဵၼ်ၶုၼ်ႁေႃၶမ်းဢိသရေႇလသေၵေႃႈ မေႈယိင်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ ဢွၼ်ၵၼ်ႁႂ်ႈမၼ်း ၽိတ်းပိူင်ႈလူင်ပေႇ။
၂၇ ႁဝ်းတၵ်းလႆႈထွမ်ႇဢဝ်ၵႂၢမ်းသူသေလႄႈႁဵတ်းတူႉၸရိူၵ်ႈ ဢၼ်ယႂ်ႇၵႃႈမီးၼႆႉဢၼ်ဝႃႈတၢင်းဢၼ်ႁူမ်ႈပွင်းပဵၼ်ၵူပ်းပဵၼ်ၵူႈ လူၺ်ႈၵၼ်တင်းမေႈယိင်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉလႄႈ ၽိတ်း ပိူင်ႈၽြႃးပဵၼ်ၸဝ်ႈႁိုဝ်၊ဝႃႈၼင်ႇၼႆဢေႃႈ။
၂၈ ၵွပ်ႈပိူဝ်ႈဢၼ်လုၵ်ႈၸၢႆးယေႃႇယတဢၼ်ပဵၼ်လုၵ်ႈၸၢႆးဢေႇလျႃႇသိပ်ႉ ၶုၼ်ယိတ်ႉပရေႃးႁိၵ်ႈၼၼ်ႉၵေႃႉၼိုင်ႈပဵၼ်လုၵ်ႈၶူၺ်သၼ်ႇပႃႇလတ်ႉၵူၼ်းႁေႃႇရၼိ ၼၼ်ႉလႄႈၵဝ်ႁေႃမၼ်းၼၼ်ႉဢွၵ်ႇပႅတ်ႈသေဢေႃႈ။
၂၉ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၵွပ်ႈပိူဝ်ႈဢၼ်ၶဝ်ၼၼ်ႉႁဵတ်းႁႂ်ႈဢရႃႇယိတ်ႉပရေႃးႁိၵ်ႈ ဢိၵ်ႇတင်းပတိၺိၼ်ႇဢၼ်ႁဵတ်းလူၺ်ႈၵၼ်တင်းယိတ်ႉပရေႃးႁိၵ်ႈတင်းၵူၼ်းမဵဝ်းလေႇဝိၼၼ်ႉၵူဝ်ႈၵိူၵ်ႇၼၼ်ႉလႄႈ ၶႅၼ်းတေႃႈမၢတ်ႈတွင်းၶဝ်ၼၼ်ႉသေၵမ်းတီႈၶႃႈ။
၃၀ ၼင်ႇၼၼ်လႄႈ ၵဝ်ႁႂ်ႈၶဝ်မူတ်းသႂ်ၵၢင်းလွတ်ႈတင်းၵူၼ်းတၢင်ႇၸိူဝ်ႉတၢင်ႇမဵဝ်းသေလႄႈၶၢၼ်းယိတ်ႉပရေႃးႁိၵ်ႈဢိၵ်ႇတင်းၵူၼ်းမဵဝ်းလေႇဝိ ၸိူဝ်းၼၼ်ႉဝႆႉပဵၼ်မုၵ်ႉပဵၼ်ၸိူဝ်း ပုၼ်ႈတၢင်းႁဵတ်းၽႂ်တၢင်းႁဵတ်းမၼ်း၊
၃၁ ဢိၵ်ႇတင်း ပုၼ်ႈဢၼ်တၵ်းပုၵ်ႉၸေႃႇၽိုၼ်း ဢိၵ်ႇတင်း မၢၵ်ႇဢၼ်မၢၵ်ႇဢွၼ်တၢင်းၼႂ်းၶိင်ႇဢၼ်မၵ်းၶၢၼ်း ဝႆႉၼၼ်ႉဢေႃႈ။ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၶႅၼ်းတေႃႈ ၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈႁဝ်းပုၼ်ႈဢၼ်လီဢၼ်ငၢမ်းသေၵမ်းတီႈၶႃႈ။