Chapter
၉
ၵူၼ်းမဵဝ်းဢိသရေႇလတွင်းပၢၼ်ႇဢပျႅတ်ႈၶဝ်
၁ ၼႂ်းလိူၼ်ၼၼ်ႉသၢဝ်းသီႇဝၼ်းၼၼ်ႉ ၵူၼ်းမဵဝ်းဢိသရေႇလတင်းလၢႆဢွၼ်ၵၼ်ၵမ်တၢင်းၵိၼ်ယူႇ၊ ၼုင်ႈမႆႊၶူုဝ်းၼုင်ႈၼင်ပေႃယူႇ၊ ဢဝ်မုၼ်ႈလိၼ်တၢင်ႇသႂ်ႇၵႃႈၼိူဝ်တူဝ်ၸဝ်ႈၵဝ်ႇယူႇသေလႄႈ ၸူႉၵၼ်တုမ်ၵၼ်ၸုၵ်း ယူႇဢေႃႈ။
၂ မိူဝ်ႈၼၼ်ႉၶဝ်ၸိူဝ်းဢၼ်ပဵၼ်မဵဝ်းဢိသရေႇလၸႅတ်ႈၸႅတ်ႈၼၼ်ႉ ဢွၼ်ၵၼ်ၽႄတူဝ်ၸဝ်ႈၵဝ်ၽၢတ်ႇယၢၼ်ၵၼ်တင်း ၵူၼ်းတၢင်ႇၸိူဝ်ႉတၢင်ႇမဵဝ်းၵႃႈမီးၼၼ်ႉသေလႄႈ ၽုၺ်ႇဢွၵ်ႇၼႄပျႃးဢပျႅတ်ႈ ၶဝ် ဢိၵ်ႇတင်းဢပျႅတ်ႈပူႇမွၼ်ႇၶဝ်ဢေႃႈ။
၃ ၶဝ်ဢွၼ်ၵၼ်ၸုၵ်းယူႇၵႃႈၼႂ်းတီႈယူႇတ ူဝ်ၸဝ်ႈၵဝ်ႇသေလႄႈၽတ်းၵျၢမ်းလိၵ်ႈ ပိင်းၺၢပ်ႈတိထႃႇဝရႃႉၽြႃးၽြႃးပဵၼ်ၸဝ်ႈၶဝ်ၼႂ်းမိူဝ်ႉဝၼ်းသီႇပုၼ်ႊ ပုၼ်ႊၼိုင်ႈဢေႃႈ။ၶဝ်ဢွၼ်ၵၼ် ၽုၺ်ႇဢွၵ်ႇၼႄပျႃးတွင်းပၢၼ်ႇ ဢပျႅတ်ႈလႄႈၵူဝ်းၵႂၢႆႇႁဵတ်းဝၢတ်ႈတီႈထႃႇဝရႃႉၽြႃးၽြႃးပဵၼ်ၸဝ်ႈၶဝ် ၼႂ်းမိူဝ်ႉဝၼ်းသီႇပုၼ်ႊပုၼ်ႊၼိုင်ႈ ဢေႃႈ။
၄ မိူဝ်ႈၼၼ်ႉယေႃးသု၊ပႃႇၼိ၊ၵႃႇတမေႇလသေႇပၼိ၊ပုၼ်ႇၼိ၊သေႇရၽိ၊ ပႃႇၼိ၊ၶေႇၼၼိၵူၼ်းမဵဝ်းလေႇဝိၸိူဝ်းၼၼ်ႉ ဢွၼ်ၵၼ်ၸုၵ်းယူႇၵႃႈၼိူဝ်ႁၢၼ်ႈမႆႉလႄႈ ႁဵတ်းတင်းဢၼ်သဵင်ယႂ်ႇၼႃႇႁွင်ႉႁႃထႃႇဝရႃႉ ၽြႃးၽြႃးပဵၼ်ၸဝ်ႈၶဝ်ဢေႃႈ။
၅ လၢႆးသမ်ႉယေႃးသု၊ၵႃႇတမေႇလ၊ပႃႇၼိ၊ႁႃႇသပၼိ၊ သေႇရၽိ၊ႁေႃႇတိယ၊သေႇပၼိ၊ ပေႇသႁိၵူၼ်းမဵဝ်းလေႇဝိ ၸိူဝ်းၼၼ်ႉဢွၼ်ၵၼ်မွၵ်ႇလၢတ်ႈလႄႈဝႃႈ၊-ဢွၼ်ၵၼ်လုၵ်ႉလႄႈယွင်ႈယေႃးပၼ်တၢင်းလီတီႈ ထႃႇဝရႃႉၽြႃးၽြႃးပဵၼ်ၸဝ်ႈသူလႄႈဝႃႈ၊-ႁႂ်ႈမၼ်းၸဝ်ႈမီးမၢင်ႇၵလႃႇသိုပ်ႇသိုပ်ႇတၢမ်ႈတၢမ်ႈတႃႇသေႇဢမ်ႇထၢတ်ႇသေၵမ်းလူၺ်ႈ၊ဝႃႈၼင်ႇၼႆတႃႉ။ႁႂ်ႈၼႃႇမႃႉၸိုဝ်သဵင်ၸဝ်ႈႁဝ်းဢၼ်ယႂ်ႇသုင်လိူဝ်တွၼ်းၼႃသေ တၢင်းဢၼ်ပၼ်တၢင်းလီ၊တၢင်းဢၼ်ယွင်ႈယေႃး ၵူႈၸိူဝ်ႉၵူႈမဵဝ်းလႄႈမူၼ်ႈၽုင်းယႂ်ႇၼၼ်ႉမီးမၢင်ႇၵလႃႇသေၵမ်းလူၺ်ႈ။
၆ ၸဝ်ႈႁဝ်းၵူၺ်းပဵၼ်ထႃႇဝရႃႉၽြႃးတီႈၶႃႈဢေႃႈ။ၸဝ်ႈႁဝ်းႁဵတ်းပဵၼ်ၵၢင်ႁၢဝ်ဢၼ်သုင်ၼႃႇသေပိူၼ်ႈ ဢိၵ်ႇတင်းပူဝ်ႇပႃႇမၼ်းၵႃႈမီး၊လိၼ်မိူင်းဢိၵ်ႇတင်းၵႃႈဢၼ်မီးၼိူဝ်မၼ်း၊ ပၢင်ႇလၢႆဢိၵ်ႈတင်းၵႃႈဢၼ်မီးၵႃႈၼႂ်းမၼ်းၼၼ်ႉသေလႄႈ ပႂ်ႉလူပႂ်ႉတူၺ်းလုမ်းလႃးယူႇၵူႈၸိူဝ်ႉၵူႈပိူင်တီႈၶႃႈဢေႃႈ။ပူဝ်ႇပႃႇၵၢင်ႁၢဝ်ၵႃႈမီးၼၼ်ႉ ဢွၼ်ၵၼ်ၵူဝ်းၵႂၢႆႇၸဝ်ႈႁဝ်းတီႈၶႃႈဢေႃႈ။
၇ ၸဝ်ႈႁဝ်းပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈ ဢၼ်လိူၵ်ႈၵဵပ်းဢဝ်ဢႃႇပႁမ်ႇလႄႈ ႁွင်ႉဢဝ်မၼ်းဢွၵ်ႇသေၼႂ်းဝဵင်းဢုရမိူင်းၶႃႇလတေႇ မႃးသေယဝ်ႉတၢင်ႇပၼ်ၸိုဝ်သဵင်မႂ်ႇ ဢႃႇပႁမ်ႇ လႄႈထူပ်းႁၼ်ၸႂ်သၽေႃးမၼ်းပဵၼ်ဢၼ်သိုဝ်ႈဢၼ်လီ ၵႃႈတီႈၽၢႆႇၼႃႈၸဝ်ႈႁဝ်းလႄႈ
၈ ႁဵတ်းပတိၺိၼ်ႇ လူၺ်ႈၵၼ်တင်းမၼ်းလူၺ်ႈလွင်ႈဢၼ်ၸဝ်ႈႁဝ်းတၵ်းဢဝ်မိူင်းၶႃႇၼၼိ၊ ၵူၼ်းႁိတ်ႉတိ၊ၵူၼ်းဢႃႇမေႃးရိ၊ ၵူၼ်းၽေႇရၸိ၊ ၵူၼ်းယေႇပုသိ၊ၵူၼ်းၵိရၵႃႇသိ ၸိူဝ်းၼၼ်ႉပၼ်တီႈမဵဝ်းၸိူဝ်ႉၶိူဝ်းမၼ်းဢေႃႈ။သႅတ်ႉၸႃႇၸဝ်ႈႁဝ်း ဢမ်ႇလူႉၵွပ်ႈပိူဝ်ႈၸဝ်ႈႁဝ်းပဵၼ်ဢၼ်သိုဝ်ႈလီတေႃႇလီၼၼ်ႉ တီႈၶႃႈဢေႃႈ။
၉ ၸဝ်ႈႁဝ်း ႁၼ်တၢင်းဢၼ်ၼိၵ်ႈၸၢၵ်ႈငႅၼ်းသေးဢၼ်ပူႇမွၼ်ႇၶႃႈၸဝ်ႈႁဝ်းၶဝ် လႆႈၶၢမ်ႇၵႃႈၼႂ်း မိူင်းဢေႇၵႅပ်ႉတုၼၼ်ႉလႄႈ ငိၼ်းသဵင်ဢၼ်ၶဝ်ႁွင်ႉသႅၼ်ႇၵႃႈတီႈ ႁိမ်းပၢင်ႇလၢႆႇဢေႇတုမ်ႇၼၼ်ႉတီႈၶႃႈဢေႃႈ။
၁၀ ၸဝ်ႈႁဝ်းၼႄပျႃးၼီႈမိၵ်ႈလ်ႈၶၼႃႇ လႂ်၊ လွင်ႈတၢင်းဢၼ်လီဢၢမ်း လႂ်၊ ၵႃႈၼိူဝ်ၶုၼ်ၽႃႇရေႃးဢိၵ်ႇတင်းၶႃႈမၼ်းၵူၼ်းမၼ်းတင်းသဵင်ႈတင်းလူင် ၵူၼ်းဝၢၼ်ႈၵူၼ်းမိူင်းၵွပ်ႈပိူဝ်ႈၸဝ်ႈႁဝ်း ႁူႉႁၼ်လွင်ႈဢၼ်ၶဝ်ၸွၵ်ႉၵႃးလူလၢႆႁဵတ်းပေႉႁဵတ်းၼႅင်ႇၶဝ်ၼၼ်ႉလႄႈ သတၢင်းသဵင်ၶၢဝ်ႇၸဝ်ႈႁဝ်း ၸွတ်ႇသႃႇႁူင်ႁၢင်းယူႇ တေႃႇထိုင်ႁွတ်ႈ ဝၼ်းမိူဝ်ႈၼႆႉတီႈၶႃႈဢေႃႈ။
၁၁ ၸဝ်ႈႁဝ်းၽႃႇၼမ်ႉပၢင်ႇလၢႆႇၵႃႈတီႈၽၢႆႇၼႃႈၶဝ်ၼၼ်ႉလႄႈ ႁႂ်ၶဝ်ၼၼ်ႉလႆႈပႆၵႂႃႇၵႃႈၼိူဝ်လိၼ်ၵႃႈၼႂ်းၵၢင်ပၢင်ႇလၢႆႇ တီႈၶႃႈဢေႃႈ။ၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းၸိူဝ်းၼၼ်ႉၸမ်းၸဝ်ႈႁဝ်းဢဝ်ထႅမ်ႈတူၵ်းသႂ်ႇၵႃႈၼႂ်းၼမ်ႉဢၼ်လိုၵ်ႉဢၼ်လမ်ႇၼၼ်ႉ မိူၼ်ၸိူဝ်ႉၼင်ႇဢၼ်ဢဝ်မၢၵ်ႇႁိၼ်ထႅမ်ႈတူၵ်းသႂ်ႇ ၵႃႈၼႂ်းၼမ်ႉဢၼ်ယႂ်ႇၼႃႇၼၼ်ႉတီႈၶႃႈဢေႃႈ။
၁၂ ၼွၵ်ႈသေၼၼ်ႉၶိင်ႇၵၢင်ဝၼ်းၸဝ်ႈႁဝ်းဢဝ်တင်းသဝ်မွၵ်ႇၵုမ်ႈလႄႈ ၶိင်ႇၵၢင်ၶိုၼ်းၸဝ်ႈႁဝ်းဢဝ်သဝ်ၽႆး ဢၼ်ႁႂ်ႈသဵၼ်ႈတၢင်းဢၼ်ၶဝ်ၵႂႃႇၼၼ်ႉ လႅင်းၼၼ်ႉလႄႈဢဝ်ၶဝ်ၵႂႃႇသူင်ႇတီႈၶႃႈဢေႃႈ။
၁၃ တူဝ်ၸဝ်ႈႁဝ်းၵေႃႈ လူင်းမႃးၵႃႈၼိူဝ်လွႆသိၼႃႇလႄႈလၢတ်ႈတေႃႇၶဝ်ၼၼ်ႉသေၵႃႈၼိူဝ်ၾႃႉၵၢင်ႁၢဝ်သေလႄႈဢဝ်လွင်ႈတၢင်းဢၼ်ၸီႇယၢင်ႇဝႆႉ ဢၼ်မၢၼ်ႇဢၼ်မႅၼ်ႈတြႃးၸဝ်ႈဢၼ်ၸိုဝ်ႈၸႂ်ႈသိုဝ်ႈတေႃႇထုင်းၾိင်ႈတြႃးတင်းပိင်းၺၢပ်ႈၸဝ်ႈတင်းလၢႆ ပၼ်တီႈၶႃႈ ဢေႃႈ။
၁၄ ၸဝ်ႈႁဝ်းၽုၺ်ႇဢွၵ်ႇၼႄပျႃးမိူဝ်ႉဝၼ်းၵမ်သိၼ်ၸဝ်ႈႁဝ်းဢၼ်မူတ်းၸၢင်ႇၼၼ်ႉလႄႈ ဢဝ်ၶႃႈၸဝ်ႈမုဝ်းသေႇသေလႄႈ သင်ႇလၢတ်ႈဝႆႉၼႄးဢူႉပတေႇ လႂ်၊ ထုင်းၾိင်ႈတြႃး လႂ်၊တြႃးၸဝ်ႈ လႂ်၊တီႈၶႃႈဢေႃႈ။
၁၅ ၸဝ်ႈႁဝ်း ဢဝ်ၶဝ်ႈမုၼႃ်းႉၵၢင်ႁၢဝ်ပၼ်တီႈၶဝ်ပုၼ်ႈတၢင်းဢၼ်ၶဝ်တွင်ႉမႆႈသႆႈလိူတ်ႇၼၼ်ႉလႄႈ ဢဝ်ၼမ်ႉဢၼ်ၸဝ်ႈႁဝ်း ႁႂ်ႈဢွၵ်ႇၵႃႈၼႂ်းမၢၵ်ႇႁိၼ်ၼၼ်ႉပၼ်ပုၼ်ႈတၢင်းဢၼ်ၶဝ်ယၢၵ်ႈၼမ်ႉၶေႃးႁႅင်ႈၼၼ်ႉ တီႈၶႃႈဢေႃႈ။ၸဝ်ႈႁဝ်းမီးဢမိင်ႉႁႂ်ႈၶဝ်လႆႈသိမ်းဢဝ်မိူင်းဢၼ်ၸဝ်ႈႁဝ်းယုၵ်ႉမိုဝ်းၸဝ်ႈႁဝ်းသေလႄႈ ၵိၼ်ႇဝႃႈလွင်ႈ ဢၼ်တၵ်းပၼ်တီႈၶဝ်ၼၼ်ႉတီႈၶႃႈဢေႃႈ။
၁၆ ၵူၺ်းၵႃႈၶဝ်ဢိၵ်ႇတင်းပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼၼ်ႉဢွၼ်ၵၼ်မီးမႃႇၼႃႉပူၵ်းပႅၼ်လႄႈ ႁႂ်ႈလမ်းၶေႃးၶဝ်ၵႅၼ်ႇၶႅင်သေလႄႈယင်းဢမ်ႇထွမ်ႇဢဝ်ပိင်းၺၢပ်ႈၸဝ်ႈႁဝ်းတင်းလၢႆလႄႈ တွပ်ႇထဵင်ပႅတ်ႈတီႈၶႃႈဢေႃႈ။
၁၇ ၶဝ်ဢမ်ႇၶုၵ်းၸႂ်လႆႈၶႆႈၸႂ်ထူပ်း လွင်ႈတၢင်းဢၼ်လီဢၢမ်းတင်းလၢႆ ဢၼ်ၸဝ်ႈႁဝ်းႁဵတ်းၵႃႈၼႂ်းၶဝ်ၼၼ်ႉလႄႈ ႁဵတ်းႁႂ်ႈလမ်းၶေႃးၶဝ်ၵႅၼ်ႇၶႅင်သေလႄႈ တွပ်ႇထဵင်ပူၼ်ႉလိူဝ်ဢႃႇၼႃႇၸဝ်ႈယူႇသေလႄႈ ဢွၼ်ၵၼ်ယုၵ်ႉယွင်ႈၵူၼ်းၵေႃႉၼိုင်ႈ ႁႂ်ႈပဵၼ်ငဝ်ႈႁဵတ်းႁူဝ်ၶဝ်ႁႂ်ႈလႆႈၶိုၼ်းမိူဝ်းၸူး ၵႃႈတီႈဢၼ်ၶဝ်ၶၢမ်ႇႁဵတ်းၶႃႈၼၼ်ႉတီႈၶႃႈဢေႃႈ။ၼႂ်းဝႃႈၼၼ်သေၵေႃႈၸဝ်ႈႁဝ်းပဵၼ်ၽြႃးဢၼ်ၸၢင်ႈပွႆႇလွတ်ႈဢပျႅတ်ႈ ၽြႃးဢၼ်ၸၢင်ႊႁဵတ်းၵျေးၸူးလႄႈ တဵမ်ဝႆႉတင်းတၢင်းႁၵ်ႉမႅတ်ႈတႃႇၵရူႉၼႃႇ၊ ၽြႃးဢၼ်မၢၵ်ႇမီးလိူင်ႇၼမ်ဝႆႉတင်းတၢင်းဢၼ်ၸႂ်ယႂ်ႇၸႂ်ယၢဝ်း၊ တၢင်းဢၼ်ၸၢင်ႈႁဵတ်းၵရူႉၼႃႇ တၢင်းဢၼ်ဢိတ်းလူလႄႈၸဝ်ႈႁဝ်းဢမ်ႇၸုၼ်ႉ ဢမ်ႇပႅတ်ႈၶဝ်တီႈၶႃႈ။
၁၈ ထၢၼ်ႇၼၼ်ႉႉၵူၺ်းဢမ်ႇၵႃးမိူဝ်ႈဢၼ်ၶဝ်သွၼ်းလေႃႇႁဵတ်းဝူဝ်းဢွၼ်ႇသေလႄႈ လၢတ်ႈဝႃႈ၊- ဢၼ်ၼႆႉပဵၼ်ၽြႃးသူဢၼ်ၼုၵ်ႈဢဝ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးၼၼ်ႉယဝ်ႉ၊ ဝႃႈၼင်ႇၼႆသေလႄႈ ႁဵတ်းတၢင်းဢၼ်ၽိတ်းပိူင်ႈၸဝ်ႈႁဝ်းၼႃႇ လူင်လၢင်ၼၼ်ႉၸိုင်၊
၁၉ ၸဝ်ႈႁဝ်းပဵၼ်ၽြႃးဢၼ်ၸၢင်ႈဢိတ်းလူႁၵ်ႉပႅင်းလိူဝ်တွၼ်းၼႃႇလူင်လၢင်လႄႈ ၸဝ်ႈႁဝ်း ယင်းဢမ်ႇၸုၼ်ႉဢမ်ႇပႅတ်ႈၶဝ်ဝႆႉၵႃႈၼႂ်းထိူၼ်ႇ ၼၼ်ႉတီႈၶႃႈ။
၂၀ သဝ်မွၵ်ႇၵုမ်ႈဢမ်ႇႁၢႆသေၶိင်ႇၵၢင်ဝၼ်းႁႂ်ႈလႆႈၼႄပျႃႉသဵၼ်ႈတၢင်းၶဝ်ယူႇလႄႈ သဝ်ၽႆးဢမ်ႇႁၢႆသေၶိင်ႇၵၢင်ၶိုၼ်း ႁႂ်ႈသဵၼ်ႈတၢင်းဢၼ်ၶဝ်ၵႂႃႇၼၼ်ႉလႅင်းယူႇတီႈၶႃႈဢေႃႈ။ၸဝ်ႈႁဝ်းပၼ်ဝိၺိၺ်ႇၸဝ်ႈဢၼ်လီဢၼ်ငၢမ်း ပုၼ်ႈဢၼ်တၵ်းသင်ႇသွၼ်ၶဝ်တီႈၶႃႈဢေႃႈ။ၸဝ်ႈႁဝ်းဢမ်ႇယုၵ်ႉဢဝ်သိမ်းဢဝ်ၶဝ်ႈမုၼ်းမၼ်ႇၼႃႉသေၵႃႈတီႈသူပ်းၶဝ်လႄႈ ဢဝ်ၼမ်ႉပၼ်ပုၼ်ႈတၢင်းဢၼ် ၶဝ်ယၢၵ်ႈၼမ်ႉၶေႃးႁႅင်ႈၼၼ်ႉတီႈၶႃႈဢေႃႈ။
၂၁ သီႇသိပ်းပီႊတဵမ်တဵမ်ၸဝ်ႈႁဝ်းလဵင်ႉလူၶဝ်ႁႂု်ႈၶဝ်ဢမ်ႇလႆႈလူဝ်ႇထႅင်ႈ သေၸိူဝ်ႉသေပိူင်လႃးလႃးတီႈၶႃႈဢေႃႈ။ၶူဝ်းၼုင်ႈၶူဝ်းမႆႊၶဝ်ဢမ်ႇလႆႈၵဝ်ႇလႆႈမွင်ႇ လႄႈတိၼ်ၶဝ်ၵေႃႈဢမ်ႇလႆႈၵႂ်ႈလႆပွင်းတီႈၶႃႈ။
၂၂ လိုၼ်းၼၼ်ႉ ၸဝ်ႈႁဝ်းဢဝ်သိုင်ႇၸိုင်ႈဝၢၼ်ႈမိူင်းတင်းလၢႆဢိၵ်ႇတင်းၵူၼ်းတၢင်ႇၸိူဝ်ႉတၢင်ႇမဵဝ်းၸိူဝ်းၼၼ်ႉဢၢပ်ႈပၼ်တီႈၶဝ်လႄႈ ဢဝ်ၽႄမႅင်ႇပၼ်ၸွမ်းလူၺ်ႈပုၼ်ႈတႃႇၽႂ်ပုၼ်ႈတႃႇမၼ်းသေလႄႈ ၶဝ်ဢွၼ်ၵၼ်သိမ်းဢဝ်မိူင်းသိႁုၼ်ႇ ဢၼ်ၶုၼ်ႁေႃၶမ်းႁေႇသၽုၼ်ႇဢုပ်ႉပိူင်ႇဢိၵ်ႇတင်းမိူင်းဢေႃႇၶ ဢၼ်ၶုၼ်ႁေႃၶမ်း ပႃႇသၼ်ႇဢုပ်ႉပိူင်ႇၼၼ်ႉတီႈၶႃႈဢေႃႈ။
၂၃ ၸဝ်ႈႁဝ်းႁႂ်ႈလုၵ်ႈၶဝ်လၢၼ်ၶဝ်ၼမ်ၼႃႇလူင်လၢင် မိူၼ်ၸိူဝ်ႉၼင်ႇလၢဝ်ႈၵၢင်ႁၢဝ်ၼၼ်ႉလႄႈ ဢဝ်ၶဝ်သႂၢင်းၶဝ်ႈၵႃႈၼႂ်းမိူင်းဢၼ်ၸဝ်ႈႁဝ်းဝႆႉၵတိ တီႈပူႇၶဝ်မွၼ်ႇၶဝ်လူၺ်ႈလွင်ႈဢၼ်ၶဝ်တၵ်းလႆႈၶဝ်လႄႈသိမ်းဢဝ်ၼၼ်ႉတီႈ ၶႃႈဢေႃႈ။
၂၄ ၼင်ႇၼၼ်လႄႈ ၶဝ်ၸိူဝ်းဢၼ်ပဵၼ်လုၵ်ႈပဵၼ်လၢၼ်တင်းလၢႆဢွၼ်ၵၼ်ၶဝ်ႈလႄႈ သိမ်းဢဝ်မိူင်းလႄႈ ၸဝ်ႈႁဝ်းႁႂ်ႈၵူၼ်းဝၢၼ်ႈၵူၼ်းမိူင်းဢၼ်ဝႃႈၵူၼ်းၶႃႇၼၼိၸိူဝ်းၼၼ်ႉ တူၵ်းၵႃႈတီႈၽၢႆႇၼႃႈၶဝ်သေလႄႈ ဢဝ်ၶုၼ်ႁေႃၶမ်းၶဝ်ၸိူဝ်းၼၼ်ႉဢိၵ်ႇတင်းၵူၼ်းဝၢၼ်ႈၵူၼ်းမိူင်း ၵူႈၸိူဝ်ႉၵူႈမဵဝ်းၸိူဝ်းၼၼ်ႉဢၢပ်ႈပၼ်ၵႃႈတီႈမိုဝ်းၶဝ်ႁႂ်ႈၶဝ်လႆႈႁဵတ်းၸွမ်း ၵႃႈၼင်ႇဢၼ် ၶဝ်ၶႂ်ႈႁဵတ်းၼၼ်ႉတီႈၶႃႈဢေႃႈ။
၂၅ ၼင်ႇၼၼ်လႄႈၶဝ်ဢွၼ်ၵၼ်သိမ်းဢဝ်ဝဵင်းဢၼ်မၼ်ႈၶိူင်ႇ လႂ်၊ မိူင်းဢၼ်ၶွၼ်ႇၼမ်ႉမၼ်းလိၼ်လီလႄႈ လႆႈႁိူၼ်းလႆႈယေးဢၼ်တဵမ်ဝႆႉတင်းၶွင်ၶူဝ်းဢၼ်လီဢၼ်ငၢမ်း ၵူႈၸိူဝ်ႉၵူႈပိူင် လႂ်၊ၼမ်ႉမေႃႇဢၼ်ၶူတ်ႉယဝ်ႉ လႂ်၊ သူၼ်ဢူးယဵၼ်ႇၸပိတ်ႉ လႂ် သူၼ်ဢူးယဵၼ်ႇသၼ်ႇလုၼ်ႇ လႂ်တူၼ်ႈမႆႉဢၼ်မၢၵ်ႇမၢၵ်ႇၼမ်ၼႃႇ လႂ်ၸိူဝ်းၼၼ်ႉသေယဝ်ႉ လႆႈၵိၼ်လႆႈၶူပ်းဢိမ်ႇဢိမ်ႇတဵမ်တဵမ်သေလႄႈ ၼိူဝ်ႉပီးလီမၼ်းလီမႃးလႄႈ ဢွၼ်ၵၼ်မူၼ်ႈပျေႃႇၵႃႈၼႂ်းတၢင်းဢၼ်ၵျေးၸူးၸဝ်ႈလိူင်ႇၼမ်ယႂ်ႇၼႃႇၼၼ်ႉ တီႈၶႃႈဢေႃႈ။
၂၆ ၵူၺ်းၵႃႈ ၶဝ်ဢမ်ႇထွမ်ႇဢဝ်ဢမိင်ႉၸဝ်ႈလႄႈ လုၵ်ႉၽိုၼ်ႉၸဝ်ႈႁဝ်းသေလႄႈ ဢဝ်ၸဝ်ႈႁဝ်းပႅတ်ႈဝႆႉၵႃႈတီႈၽၢႆႇတၢင်းလင်ၶဝ်တီႈၶႃႈဢေႃႈ။ၶဝ်ဢွၼ်ၵၼ်ဢဝ်ပရေႃးၽႅတ်ႈၸဝ်ႈႁဝ်း ဢၼ်သင်ႇသွၼ်သုင်းမႃႉပၼ်ၶဝ်ႁႂ်ႈၶဝ်ၶိုၼ်းမႃးၸူးတီႈၸဝ်ႈႁဝ်းၸိူဝ်းၼၼ်ႉ တၢႆလႄႈ ႁဵတ်းတၢင်းဢၼ်ၽိတ်းပိူင်ႈၸဝ်ႈႁဝ်းၼႃႇလူင် လၢင်တီႈၶႃႈဢေႃႈ။
၂၇ ပိူဝ်ႈၼႆလႄႈၸဝ်ႈႁဝ်းဢဝ်ၶဝ်ဢၢပ်ႈပၼ်ႈၵႃႈၼႂ်းမိုဝ်းရၢၼ်ႇသူႇၶဝ် ဢၼ်ယႃႉယုၵ်ႉၶဝ်ယူႇၸိူဝ်းၼၼ်ႉတီႈၶႃႈဢေႃႈ။ယၢမ်းမိူဝ်ႈဢၼ်ၶဝ်လႆႈၶၢမ်ႇတုၵ်ႉၶႃႉတၢင်းၽၢၼ်လႄႈ ႁွင်ႉသႅၼ်ႇတီႈၸဝ်ႈႁဝ်းၼၼ်ႉၸိုင် ၸဝ်ႈႁဝ်းယူႇၵႃႈၼိူဝ်ၽုင်ႇၵၢင်ႁၢဝ်သေလႄႈထွမ်ႇငိၼ်းသေယဝ်ႉ ၸဝ်ႈႁဝ်းႁဵတ်းႁႂ်ႈၵျေးၸူးဢၼ်ၵႄႇသႄႇၶျွတ်ႈဢဝ်ၼၼ်ႉ ႁႂ်ႈၶဝ်လွတ်ႈဢွၵ်ႇသေၵႃႈၼႂ်းမိုဝ်းရၢၼ်ႇသူႇၶဝ် ၸွမ်းၵႃႈၼင်ႇဢၼ်ၵျေးၸူးၵရူႉၼႃႇၸဝ်ႈႁဝ်းလိူင်ႇၼမ်ၼၼ်ႉတီႈၶႃႈဢေႃႈ။
၂၈ လၢႆးသမ်ႉ မိူဝ်ႈဢၼ်ၶဝ်လႆႈၵတ်းယဵၼ်ၶျၢမ်းသႃႇၼၼ်ႉၸိုင်၊ၶဝ်သမ်ႉၶိုုၼ်းႁဵတ်း တူႉၸရိူၵ်ႈၵႃႈတီႈၽၢႆႇၼႃႈၸဝ်ႈႁဝ်းထႅင်ႈတီႈၶႃႈဢေႃႈ။ပိူဝ်ႈၼႆလႄႈၸဝ်ႈႁဝ်းသမ်ႉၶိုၼ်းဢဝ်ၶဝ်ဢၢပ်ႈပၼ် ၵႃႈၼႂ်းမိုဝ်းရၢၼ်ႇသူႇၶဝ်ႁႂ်ႈၶဝ်လႆႈၶၢမ်ႇပိူၼ်ႈဢုပ်ႉပိူင်ႇၶဝ်ၼၼ်ႉ တီႈၶႃႈဢေႃႈ။ယၢမ်းမိူဝ်ႈဢၼ်ၶဝ်သမ်ႉၶိုၼ်းမႃးလႄႈ ႁွင်ႉသႅၼ်ႇတီႈၸဝ်ႈႁဝ်းၼၼ်ႉၸိုင် ၸဝ်ႈႁဝ်းယူႇၵႃႈၼိူဝ်ၽုင်ႇၵၢင်ႁၢဝ်သေလႄႈ ထွမ်ႇငိၼ်းသေယဝ်ႉသမ်ႉၵႄႇသႄႇၶျွတ်ႈဢဝ်ၶဝ်ၶိူဝ်းၶိူဝ်းယႂ်းယႂ်း ၸွမ်းၵႃႈၼင်ႇဢၼ်ၵရူႉၼႃႇ ၸဝ်ႈႁဝ်းမီးၼၼ်ႉတီႈၶႃႈဢေႃႈ။
၂၉ ပိၵ်ႉသမ်ႉၸဝ်ႈႁဝ်းသင်ႇသွၼ်သုင်းမႃႉၶဝ် ႁႂ်ႈၶဝ်ၶိုၼ်းၵမ်ၶိုၼ်းၵျၢင်ႉတြႃးၸဝ်ႈႁဝ်းသေၵေႃႈ ၶဝ်ဢွၼ်ၵၼ်ႁဵတ်းတၢင်းဢၼ်မႃႇၼႃႉပူၵ်းပႅၼ်လႄႈဢမ်ႇထွမ်ႇဢမ်ႇဢဝ်တီႈၶႃႈ။ၶဝ်ဢွၼ်ၵၼ်လုၵ်ႉၽိုၼ်ႉပူၼ်ႉလိူဝ် လွင်ႈတၢင်းဢၼ်ၸဝ်ႈႁဝ်းၸီႇယၢင်ႇဝႆႉ ဢၼ်ပဵၼ်တၢင်းဢၼ်ဢသၢၵ်ႈလိပ်းတီႈၵေႃႉဢၼ်ၵမ်ၵျၢင်ႉၼၼ်ႉတီႈၶႃႈဢေႃႈ။ၶဝ်ဢွၼ်ၵၼ်ဝၢႆလင်ႈပႅတ်ႈၸဝ်ႈႁဝ်းသေလႄႈ ႁႂ်ႈလမ်းၶေႃးၶဝ်ၵႅၼ်ႇၶႅင်လႄႈ ယင်းဢမ်ႇထွမ်ႇဢမ်ႇဢဝ်လႄႈ ယူႇတီႈၶႃႈ ဢေႃႈ။
၃၀ ပိၵ်ႉသမ်ႉၸဝ်ႈႁဝ်းယိူၼ်ႉၶၢမ်ႇၶဝ်ပီႊၼမ်ၼႃႇလႄႈဢဝ်ဝိၺိၺ်ႇၸဝ်ႈႁဝ်း ဢၼ်မီးတီႈပရေႃးၽိတ်ႈၸဝ်ႈႁဝ်းၸိူဝ်းၼၼ်ႉ သင်ႇသွၼ်သုင်းမႃႉၶဝ်သေၵေႃႈၶဝ်ဢမ်ႇထွမ်ႇဢမ်ႇဢဝ်တီႈၶႃႈ။ပိူဝ်ႈၼႆလႄႈၸဝ်ႈႁဝ်းဢဝ်ၶဝ်ဢၢပ်ႈပၼ် ၵႃႈၼႂ်းမိုဝ်းၵူၼ်းဝၢၼ်ႈၵူၼ်းမိူင်း တင်းလၢႆၸိူဝ်းၼၼ်ႉတီႈၶႃႈဢေႃႈ။
၃၁ ၼႂ်းဝႃႈၼၼ်သေၵေႃႈ ၵွပ်ႈပိူဝ်ႈဢၼ်ၵရူႉၼႃႇၸဝ်ႈႁဝ်းလိူင်ႇၼမ်ၼၼ်ႉလႄႈ ၸဝ်ႈႁဝ်း ဢမ်ႇယႃႉၽဵဝ်ႈၶဝ်ပႅတ်ႈမူတ်းမူတ်းသဵင်ႈသဵင်ႈ၊ ၸဝ်ႈႁဝ်းဢမ်ႇၸုၼ်ႉဢမ်ႇပႅတ်ႈၶဝ်တီႈၶႃႈ။လွင်ႈမၼ်းၸမ်း ၸဝ်ႈႁဝ်းပဵၼ်ၽြႃးဢၼ်တဵမ်ဝႆႉတင်းတၢင်းဢၼ်ႁၵ်ႉဢိတ်းလူ၊ တၢင်းဢၼ်မီးမႅတ်ႈတႃႇ ၵရူႉၼႃႇတီႈၶႃႈဢေႃႈ။
၃၂ ပိူဝ်ႈၼႆလႄႈၽြႃးပဵၼ်ၸဝ်ႈႁဝ်းၶႃႈၽြႃးဢၼ်ယႂ်ႇမျၢတ်ႈၼႃႇလႄႈ တဵမ်ဝႆႉတင်းမႁႃႇတၼ်းၶူဝ်းလႄႈ လီၵူဝ်လီႁႄဢၼ်ပႂ်ႉပတိၺိၼ်ႇၵရူႉၼႃႇၸဝ်ႈတီႈၶႃႈ။ယႃႇပေမၢတ်ႈၽေးတၢမ်ႇၵႃႈမီးဢၼ်တူၵ်းႁွတ်ႈၵႃႈၼိူဝ် ၶုၼ်ႁေႃၶမ်းၶႃႈၸဝ်ႈႁဝ်းၶဝ် လႂ်မူးမၢတ်ႈၽွင်းမိူင်းၶႃႈၸဝ်ႈႁဝ်းၶဝ်၊ ယိတ်ႉပရေႃးႁိၵ်ႈၶႃႈၸဝ်ႈႁဝ်းၶဝ်၊ ပရေႃးၽႅတ်ႈၶႃႈၸဝ်ႈႁဝ်းၶဝ်၊ပူႇပေႃႈၶႃႈၸဝ်ႈႁဝ်းၶဝ်တင်းၵူၼ်းၸဝ်ႈႁဝ်းတင်းသဵင်ႈတင်းလူင်ၸိူဝ်းၼၼ်ႉ ၸႃႉၸဵမ်မိူဝ်ႈၸူဝ်ႈပၢၼ်ၶုၼ်ႁေႃၶမ်းဢႃႇသုရိ တင်းလၢႆတေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉၸိူဝ်းၼၼ်ႉ ပဵၼ်ဢၼ်လဵၵ်ႉဢၼ်ဢွၼ်ႇသေ ၵမ်းတီႈၶႃႈ။
၃၃ ၸဝ်ႈႁဝ်းၸမ်းႁဵတ်းၸွမ်းတြႃးၼႂ်းၵႃႈဢၼ်ႁွတ်ႈထိုင်ၵႃႈၼိူဝ်ၶႃႈၸဝ်ႈႁဝ်းၶဝ်ၼၼ်ႉ တီႈၶႃႈဢေႃႈ။ၶႃႈၸဝ်ႈႁဝ်းၶဝ်ဢွၼ်ၵၼ်ႁဵတ်းဢၼ်ဢမ်ႇတြႃးတီႈၶႃႈယဝ်ႉ။ၸဝ်ႈႁဝ်းၸီႇယၢင်ႇၸွမ်းတြႃးၵူၺ်းတီႈၶႃႈယဝ်ႉ။ၶုၼ်ႁေႃၶမ်းၶႃႈၸဝ်ႈႁဝ်းၶဝ်၊မူးမၢတ်ႈၽွင်းမိူင်းၶႃႈၸဝ်ႈႁဝ်းၶဝ်၊ ယိတ်ႉပရေႃးႁိၵ်ႈၶႃႈၸဝ်ႈႁဝ်းၶဝ်၊ ပူႇပေႃႈၶႃႈၸဝ်ႈႁဝ်းၶဝ်ၸိူဝ်းၼၼ်ႉဢမ်ႇဢွၼ် ၵၼ်ပႂ်ႉၵမ်ပႂ်ႉၸွမ်းတြႃးၸဝ်ႈႁဝ်းတီႈၶႃႈ။
၃၄ ၶဝ်ဢမ်ႇဢွၼ်ၵၼ်ထွမ်ႇဢဝ်ပိင်းၺၢပ်ႈၸဝ်ႈႁဝ်း ဢိၵ်ႇတင်းလွင်ႈတၢင်းဢၼ်ၶၢမ်ႇသၢၵ်ႈသေႇဢၼ်ၸဝ်ႈႁဝ်းၶၢမ်ႇ သၢၵ်ႈသေႇယူႇၽၢႆႇၼိုင်ႈတင်းၶဝ်ၼၼ်ႉတီႈၶႃႈ။
၃၅ ၶဝ်လႆႈယူႇၵႃႈၼႂ်းသိုင်ႇၸိုင်ႈဝၢၼ်ႈမိူင်း ဢၼ်ၸဝ်ႈႁဝ်းႁဵတ်းၵျေးၸူးဢၼ်ယႂ်ႇၼႃႇသေလႄႈ ဢၢပ်ႈပၼ်တီႈၶဝ်ဢၼ်မိူင်းလီမိူင်းငၢမ်း ဢၼ်ၸဝ်ႈႁဝ်းဢိတ်းလူပၼ်တီႈၶဝ်ၼၼ်ႉသေလႄႈ ၶဝ်ဢမ်ႇၵိုတ်ႈဢမ်ႇႁၢပ်ႇဢမူႉၸဝ်ႈႁဝ်းတီႈၶႃႈ။ၶဝ်ယင်းဢမ်ႇပႄႇပႅတ်ႈတူႉၸရိူၵ်ႈဢၼ်ၶဝ်ႁဵတ်းၼၼ်ႉတီႈၶႃႈ။
၃၆ တူၺ်းတီႈၶႃႈလူ။ၶႃႈၸဝ်းႁဝ်းၶဝ် ပဵၼ်ၶႃႈၸႂ်ႉၶႃႈသွႆယူႇဝၼ်းမိူဝ်ႈၼႆႉလႄႈလႆႈၶၢမ်ႇႁဵတ်းၶႃႈယူႇ ၵႃႈၼႂ်းမိူင်းဢၼ်ၸဝ်ႈႁဝ်းပၼ်တီႈပူႇမွၼ်ႇၶႃႈၸဝ်ႈႁဝ်းၶဝ် ႁႂ်ႈလႆႈၵိၼ်မၢၵ်ႇမၼ်းႁူင်းမၼ်းဢိၵ်ႇတင်း ဢၼ်လီဢၼ်ငၢမ်းမၼ်းၸိူဝ်းၼၼ်ႉယူႇတီႈၶႃႈဢေႃႈ။
၃၇ ၵွပ်ႈပိူဝ်ႈဢပျႅတ်ႈၶႃႈၸဝ်ႈႁဝ်းၶဝ်လႄႈတၢင်းဢၼ်ယႂ်ႇတူဝ်းတွၼ်းမႃးၵႃႈတီႈမိူင်းၼႆႉၼၼ်ႉ လႆႈပဵၼ်ပုၼ်ႈၶုၼ်ႁေႃၶမ်းမိူင်းၼႆႉဢၼ်ၸဝ်ႈႁဝ်းၶၢၼ်းဝႆႉၵႃႈၼိူဝ်ႁဝ်းၶႃႈ ဢၼ်လႆႈဢုပ်ႉပိူင်ႇတူဝ်ၶႃႈၸဝ်ႈႁဝ်းၶဝ် ဢိၵ်ႇတင်းတရိၵ်ႈသၢၼ်ႇၶႃႈၸဝ်ႈႁဝ်းၶဝ်လႄႈ ၶႃႈၸဝ်ႈႁဝ်းၶဝ်လႆႈၶၢမ်ႇတၢင်းဢၼ်ယၢၵ်ႈၽၢၼ်ၶၢၼ်ၸႂ်ၼႃႇလူင်လၢင်တီႈၶႃႈဢေႃႈ၊ ဝႃႈၼင်ႇ ၼႆဢေႃႈ။
၃၈ ၵွပ်ႈပိူဝ်ႈၼင်ႇၼၼ်လႄႈႁဝ်းဢွၼ်ၵၼ်ႁဵတ်းသႅတ်ႈၸႃႇဢၼ်မၼ်ႈဢၼ်ၶိူင်ႇသေလႄႈ တႅမ်ႈမၢႆဝႆႉသေယဝ်ႉ ၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်ႁဝ်းၵူၼ်းမဵဝ်းလေႇဝိ ယိတ်ႉပရေႃးႁိၵ်ႈႁဝ်းၸိူဝ်းၼၼ်ႉ ဢွၼ်ၵၼ်တွၵ်ႇတၼ်းသိၵ်ႈဢေႃႈ။