Chapter
၅
ၼေႇႁမိၸွႆႈထႅမ်ၶဝ်ၸိူဝ်းဢၼ်ယၢၵ်ႈၽၢၼ်
၁ မိူဝ်ႈၼၼ်ႉ ၵူၼ်းတင်းလၢႆၸဵမ်ယိင်းၸဵမ်ၸၢႆးဢွၼ်ၵၼ်ပွင်ႉၶၢင်းပွင်ႉမိုၼ်ၼႃႇလူင်လၢင်လႄႈ တၢင်ႇဢပျႅတ်ႈတီႈၵူၼ်းယုတ ဢၼ်ပဵၼ်ပီႈၶဝ်ၼွင်ႉၶဝ်ၸိူဝ်းၼၼ်ႉ ဢေႃႈ။
၂ ၵမ်ႈၽွင်ႈလၢတ်ႈလႄႈဝႃႈ၊-ႁဝ်းဢိၵ်ႇလူၺ်ႈၵၼ်တင်း လုၵ်ႈၸၢႆးႁဝ်းလုၵ်ႈယိင်းႁဝ်းမီးၼမ်ၼႃႇဢေႃႈ။ႁႂ်ႈႁဝ်းလႆႈၶဝ်ႈပိူၵ်ႇၶဝ်ႈသၢၼ်ပုၼ်ႈဢၼ်ႁဝ်းတၵ်းၵိၼ်လႄႈ လဵင်ႉဢသၢၵ်ႈႁဝ်းၼၼ်ႉသေၵမ်း၊ဝႃႈ ၼင်ႇၼႆဢေႃႈ။
၃ ၵမ်ႈၽွင်ႈၵေႃႈဢွၼ်ၵၼ်လၢတ်ႈလႄႈဝႃႈ၊- ႁဝ်းၼႆႉဢဝ်ႁႆႊၼႃးသူၼ်ဢူးယဵၼ်ႇႁိူၼ်းႁဝ်းပွင်ႇၵမ်ႉဝႆႉ ႁႂ်ႈလႆႈၶဝ်ႈပိူၵ်ႇၶဝ်ႈသၢၼ်ၵွပ်ႈပိူဝ်ႈဢၼ်ပဵၼ်ၶိင်ႇၵႃႇလႃႉဢၼ်တၢင်းၵိၼ်ၵႃႈပႅင်းၼႆႉသေၵမ်း၊ ဝႃႈ ၼင်ႇၼႆဢေႃႈ။
၄ ၵမ်ႈၽွင်ႈၵေႃႈလၢတ်ႈလႄႈဝႃႈ၊-ပုၼ်ႈႁႆႊႁဝ်းၼႃးႁဝ်းသူၼ်ဢူးယဵၼ်ႇႁဝ်း ႁဝ်းလႆႈၵူႈဢဝ်ငိုၼ်းသေလႄႈ ႁႂ်ႈလႆႈပၼ်ၶွၼ်ႇတီႈၶုၼ်ႁေႃၶမ်း ဢေႃႈ။
၅ ပိၵ်ႉသမ်ႉဝႃႈၼိူဝ်ႉႁဝ်းလိူတ်ႈႁဝ်းၼႆႉပဵၼ်ၸိူဝ်ႉၼင်ႇၼိူဝ်ႉလိူတ်ႈပီႈႁဝ်းၼွင်ႉႁဝ်းၸိူဝ်းၼၼ်ႉယူႇ၊ လုၵ်ႈလၢင်းႁဝ်းၵေႃႈ ၵတ်းမေႃမူၼ်ၸိူဝ်ႉၼင်ႇလုၵ်ႈလၢင်းၶဝ်ၼၼ်ႉယူႇသေၵေႃႈ တူၺ်းလူ၊လုၵ်းလၢင်းႁဝ်းလႆႈၶၢမ်ႇႁဵတ်းၶႃႈပိူၼ်ႈလႄႈလုၵ်ႈယိင်းႁဝ်းၵမ်ႈၽွင်ႈယင်းပေႃးလႆႈၶၢမ်ႇႁဵတ်းၶႃႈပိူၼ်ႈယဝ်ႉ။ႁဝ်းဢမ်ႇထုတ်ႇၼုၵ်ႈဢဝ်ၶဝ်လႆႈ။ႁႆႊၼႃးသူၼ်ဢူးယဵၼ်ႇဢၼ်ႁဝ်းပိူင်ႇၼၼ်ႉ ႁွတ်ႈထိုင်ၵႃႈၼႂ်းမိုဝ်းပိူၼ်ႈယဝ်ႉလူင်ပေႇ၊ ဝႃႈၼင်ႇၼႆဢေႃႈ။
၆ မိူဝ်ႈဢၼ်ၵဝ်ငိၼ်းၵႂၢမ်းဢၼ်ပွင်ႉၶၢင်းပွင်ႉမိုၼ်သေလႄႈ တၢင်ႇဢပျႅတ်ႈၼၼ်ႉၸိုင်ၵဝ်မီးၸႂ်ဢၼ်မႆႈဢၼ်ႁွၼ်ႉၼႃႇလူင်လၢင်လႄႈ ၶႆႈၸႂ်ဝူၼ်ႉၸႂ်ႁင်းၵူၺ်းတူဝ်ၸဝ်ႈၵဝ်ႇသေလႄႈသင်ႇသွၼ်မူးမၢတ်ႈၽွင်းမိူင်းတင်းလၢႆ ဢိၵ်ႇတင်းၶုၼ်ဢၼ်မီးဢရႃႇၸိူဝ်းၼၼ်ႉလႄႈဝႃႈ၊-
၇ သူၼႆႉဢွၼ်ၵၼ်ၵဵပ်းၵိၼ်ၶီႈငိုၼ်းၼမ်လူင်ၼမ်လၢင် တီႈပီႈတီႈၼွင်ႉသူလူင်ပေႇ၊ဝႃႈၼင်ႇၼႆသေယဝ်ႉ ၵဝ်ႁႂ်ႈၵူၼ်းၸူႉၵၼ်တုမ်ၵၼ်ပရိၵ်ႈသၢတ်ႈၵူၼ်းၼမ်ၼႃႇ၈သေလႄႈလၢတ်ႈဝႃႈ၊- ၵႃႈၼင်ႇဢၼ်ႁဝ်းတတ်ႈၼိုင်ႇလႆႈၼၼ်ႉ ႁဝ်းထုတ်ႇၼုၵ်ႈဢဝ်ၵူၼ်းယုတ ဢၼ်ပဵၼ်ပီႈႁဝ်းၼွင်ႉႁဝ်းဢၼ်လႆႈၶၢမ်ႇႁဵတ်းၶႃႈတီႈၵူၼ်းတၢင်ႇၸိူဝ်ႉ တၢင်ႇမဵဝ်းတင်းလၢႆၸိူဝ်းၼၼ်ႉမႃးသေယဝ်ႉ သူသမ်ႉတၵ်းၶၢႆပီႈၼွင်ႉသူထႅင်ႈ လူးၵွၼ်ႇႁိုဝ်။
၈ ၶဝ်တၵ်းလႆႈၶၢမ်ႇတၢင်းဢၼ်ၶၢႆပၼ်တီႈႁဝ်းထႅင်ႈလူးၵွၼ်ႇႁိုဝ်။မိူဝ်ႈဢၼ်ဝႃႈၼင်ႇၼႆၸိုင်ၶဝ်ၼၼ်ႉ ယင်းဢမ်ႇတၵ်းသဵင်လႄႈဢမ်ႇမီးၵႂၢမ်းဢၼ် တၵ်းၶိုၼ်းလၢတ်ႈသေၶေႃႈသေၵမ်း။
၉ ၵဝ်ၵေႃႈလၢတ်ႈလႄႈဝႃႈ၊-လွင်ႈတၢင်းဢၼ်သူႁဵတ်းၼႆႉဢမ်ႇလီလူင်ပေႇ။သူထုၵ်ႇလီၸွမ်းသဵၼ်ႈတၢင်းဢၼ်ၵူဝ်ႁႄၽြႃးပဵၼ်ၸဝ်ႈသေလႄႈ တၵ်းလႆႈလွတ်ႈတၢင်းဢၼ်ၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ပဵၼ်ရၢၼ်ႇသူႇႁဝ်း တၵ်း လႆႈသေႉသွမ်းႁဝ်းၼၼ်ႉဢမ်ႇၸႂ်ႈႁိုဝ်။
၁၀ ၵဝ်ဢိၵ်ႇတင်းၼွင်ႉၸၢႆးၵဝ်၊ ၵူၼ်းၵဝ်ၸိူဝ်းၼႆႉၵေႃႈလႆႈပၼ်ၵူႈပၼ်ယိမ်ငိုၼ်းၶဝ်ႈပိူၵ်ႇၶဝ်ႈသၢၼ်တီႈၶဝ်ယူႇဢေႃႈ။ၵူၺ်းၵႃႈဢွၼ်ၵၼ်ၵိုတ်းသဝ်း တၢင်းဢၼ်ၵိၼ်ၶီႈငိုၼ်းလူင် လူင်လၢင်လၢင်ၼၼ်ႉတႃႉႁဝ်း။
၁၁ ဝၼ်းမိူဝ်ႈၼႆႉဢွၼ်ၵၼ်ဢဝ်ႁႆႊၼႃးၶဝ်၊ သူၼ်ဢူးယဵၼ်ႇၸပိတ်ႉၶဝ်၊သူၼ်ဢူးယဵၼ်ႇသၼ်ႇလုၼ်ႇၶဝ်၊ ႁိူၼ်းယေးၶဝ်ဢိၵ်ႇတင်းငိုၼ်းၶဝ်ႈပိူၵ်ႇၶဝ်သၢၼ်၊ၼမ်ႉၸပိတ်ႉၼမ်ႉမၼ်း ဢၼ်သူၽႃႇၵဵပ်းဢဝ်တီႈၶဝ်ယဝ်ႉၼၼ်ႉ ပၢၵ်ႇပုၼ်ႊပုၼ်ႊၼိုင်ႈၼၼ်ႉၶိုၼ်းပၼ်ၶဝ်သေၵမ်း၊မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ဢွၼ်ၵၼ်ႁပ်ႉတုင်းဢဝ်လႄႈဝႃႈ၊-ႁဝ်းၶႃႈတၵ်းၶိုၼ်း ပၼ်ဢေႃႈ။
၁၂ တၵ်းဢမ်ႇယွၼ်းဢဝ်ၵႃႈသင်၊တၵ်းႁဵတ်းၸွမ်း ၵႃႈၼင်ႇဢၼ်ၸဝ်ႈႁဝ်းမီးဢမိင်ႉၼၼ်ႉဢေႃႈ၊ဝႃႈၼင်ႇၼႆဢေႃႈ။မိူဝ်ႈၼၼ်ႉၵဝ်ႁွင်ႉဢဝ်ယိတ်ႉပရေႃးႁိၵ်ႈတင်းလၢႆမႃးလႄႈ ၵူၼ်းတင်းလၢႆတိူင်ႇဝႃႈၵိၼ်ႇဝႃႈ လွင်ႈဢၼ်ၶဝ်တၵ်းလႆႈႁဵတ်းၸွမ်းၵႃႈၼင်ႇဢၼ်ဝႆႉၵတိၼၼ်ႉသေလႄႈ ၵဝ်ၽႅတ်းသၼ်ႇပိၵ်ႇသိူဝ်ႈၵဝ်လႄႈလၢတ်ႈဝႃႈ၊-
၁၃ ႁႂ်ႈၽြႃးပဵၼ်ၸဝ်ႈၽႅတ်းသၼ်ႇပႅတ်ႈၶဝ်ၸိူဝ်းဢၼ်ႁႂ်ႈၵတိၼႆႉလူႉၼၼ်ႉ ဢွၵ်ႇပႅတ်ႈသေၵႃႈၼႂ်းႁိူၼ်းၸဝ်ႈဢိၵ်ႇတင်း ဢမူႉၸဝ်ႈၸိူဝ်ႉၼင်ႇၼႆသေၵမ်းလူၺ်ႈ။ႁႂ်ႈၶဝ်ၼၼ်ႉလႆႈၶၢမ်ႇတၢင်းဢၼ်ၽႅတ်းသၼ်ႇပႅတ်ႈၸိူဝ်ႉၼင်ႇၼႆလႄႈ ပဵၼ်ဢၼ်ပဝ်ႇလၢပ်ႈသေၵမ်းလူၺ်ႈ၊ဝႃႈၼင်ႇၼႆသေယဝ်ႉပရိၵ်ႈသၢတ်ႈတင်းသဵင်ႈတင်းလူင်ၼၼ်ႉဢွၼ်ၵၼ်ႁပ်ႉတုင်း ဢဝ်လႄႈဝႃႈ၊- ဢႃႈမိၼ်ႈ၊ဝႃႈၼင်ႇၼႆလႄႈယွင်ႈယေႃးထႃႇဝရႃႉၽြႃးဢေႃႈ။ၵူၼ်းတင်းလၢႆၵေႃႈဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ဝႆႉၵတိၼၼ်ႉဢေႃႈ။
၁၄ ၼွၵ်ႈသေၼၼ်ႉ ၼႂ်းၶိင်ႇဢၼ်ၵဝ်လႆႈၶၢမ်ႇဢဝ်ဢရႃႇမဵဝ်ႉဝုၼ်ႇၸႃႉၸဵမ်ပီႊဢၼ်ၶုၼ်လူင် ဢႃႇတၸေႇရိတ်ႉၸၢမ်ႇႁၢင်ႈၸၢမ်ႇႁေႃသၢဝ်းပီႊတေႃႇထိုင်ႁွတ်ႈ သၢမ်သိပ်းပၢႆသွင်ပီႊၼၼ်ႉတဵမ်တဵမ်၊ၵဝ်ဢိၵ်ႇတင်း ၼွင်ႉၸၢႆးၵဝ်တင်းလၢႆ ယင်းဢမ်ႇၵိၼ်တၢင်းၵိၼ်ဢၼ်သၢၵ်ႈ ပုၼ်ႈမဵဝ်ႉဝုၼ်ႇ။
၁၅ မဵဝ်ႉဝုၼ်ႇဢွၼ်တၢင်းၸိူဝ်းၼၼ်ႉၸမ်းၶဝ်ဢွၼ်ၵၼ် ၶၢမ်ႇဢဝ်တၢင်းဢၼ်လဵင်ႉဢၼ်လူတီႈၵူၼ်းတင်းလၢႆဢေႃႈ။ယေႈဝၼ်းယေႈဝၼ်းၶဝ်ဢွၼ်ၵၼ်ၶၢမ်ႇဢဝ်ၶဝ်ႈမုၼ်းတင်းၼမ်ႉၸပိတ်ႉဢိၵ်ႇတင်းငိုၼ်းသီႇသိပ်းၵျၢပ်ႈသၶေႇလဢေႃႈ။ၵူၼ်းၸႂ်ႉၵူၼ်းသွႆၵူၼ်းဢွၼ်ႇၸၢႆးၶဝ်ၼၼ်ႉၵေႃႈ ႁဵတ်းၶုၼ်ဝႆႉဢႃႇၼႃႇ ၵႃႈၼိူဝ်ၵူၼ်းတင်းလၢႆဢေႃႈ။ၵဝ်ၸမ်းၵွပ်ႈပိူဝ်ႈဢၼ် ၵူဝ်ႁႄၽြႃးပဵၼ်ၸဝ်ႈၼၼ်ႉလႄႈ ဢမ်ႇႁဵတ်း ၸိူဝ်ႉၼင်ႇၼၼ်။
၁၆ ၼွၵ်ႈသေၼၼ်ႉၵဝ်တႄႇႁဵတ်းလမ်းဝဵင်းယူႇတိၵ်းတိၵ်းဢေႃႈ။ႁဝ်းဢမ်ႇႁဵတ်းတၢင်းဢၼ်သိုဝ်ႉဢဝ်ႁႆႊၼႃးပိူၼ်ႈလႃးလႃး။ၵဝ်ဢိၵ်ႇတင်းၶႃႈၵူၼ်းၵဝ်တင်းသဵင်ႈတင်းလူင် ဢွၼ်ၵၼ်ၽွမ်ႉႁူမ်ႈၸွႆႈထႅမ်ပွင်ႁဵတ်း ဢမူႉတၢင်းဢၼ်တႄႇႁဵတ်းလမ်းဝဵင်း ၵူၺ်းဢေႃႈ။
၁၇ ၼွၵ်ႈသေၼၼ်ႉၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်ယူႇၵႃႈတီႈလဵပ်ႈႁွပ်ႈႁဝ်းဢၼ်မႃးၸူးၵႃႈတီႈၵဝ်ၸိူဝ်းၼၼ်ႉဢိၵ်ႇတင်း ၵူၼ်းမဵဝ်းယုတတင်းၶုၼ်ဢၼ်မီးဢရႃႇတင်းလၢႆ ဢၼ်ၵိၼ်ၵႃႈတီႈၽိူၼ်တီႈၵိၼ်ၵဝ်ၼၼ်ႉမီးပၢၵ်ႇပၢႆႁႃႈသိပ်းၵေႃႉဢေႃႈ။
၁၈ ၼႂ်းယေႈဝၼ်းယေႈဝၼ်း လႆႈၸီႇယၢင်ႇမႄးႁႅၼ်းဝူဝ်းတူဝ်ၼိုင်ႈဢိၵ်ႇတင်း သူဝ်းဢၼ်လိူၵ်ႈၵဵပ်းဢဝ်ႁူၵ်းတူဝ်လႄႈၵႆႇၼမ်ၼႃႇၵေႃႈလႆႈမႄးႁႅၼ်းပုၼ်ႈၵဝ်ဢေႃႈ။သိပ်းဝၼ်းယေႈပွၵ်ႈ လႆႈဢဝ်ၼမ်ႉၸပိတ်ႉဢၼ်ၼမ်ၼႃႇၵူႈၸိူဝ်ႉၵူႈမဵဝ်းတၢင်ႇတမ်းဢေႃႈ။သဵင်ႈထၢၼ်ႇၼၼ်ႉသေၵေႃႈ ၵဝ်ဢမ်ႇယွၼ်းဢဝ်ၸရိပ်ႈမဵဝ်ႉဝုၼ်ႇၵွပ်ႈပိူဝ်ႈဢၼ် ၵၢၼ်တၢင်းႁဵတ်းဢၼ်ၼၵ်းၼႃမီးယူႇၵႃႈၼိူဝ်ၵူၼ်းတင်းလၢႆၼၼ်ႉဢေႃႈ။
၁၉ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်း ၵႃႈဢၼ်ၶႃႈၸဝ်ႈႁဵတ်းပုၼ်ႈၵူၼ်းတင်းလၢႆ ၸိူဝ်းၼႆႉလႄႈႁဵတ်းၵျေးၸူးသေၵမ်းတီႈၶႃႈ။