Chapter
၄
တၢင်းဢၼ်ၶတ်းၵၼ်တင်းတၢင်းဢၼ်ၶိုၼ်းတႄႇႁဵတ်း
၁ မိူဝ်ႈဢၼ် သၼ်ႇပႃႇလတ်ႉ ငိၼ်းလွင်ႈဢၼ်ႁဝ်းတႄႇႁဵတ်းလမ်းဝဵင်းၼၼ်ႉၸိုင်တေႃးသႃႉမၼ်းဢွၵ်ႇလႄႈမၼ်းမီးတၢင်းဢၼ် ၸႂ်မႆႈၶႆႈၸႃႉၼႃႇလူင်လၢင်သေယဝ်ႉ ႁဵတ်းပျၢၵ်ႈႁဵတ်းၶူဝ်တေႃႇၵူၼ်းယုတတင်းလၢႆသေလႄႈ လၢတ်ႈၵႃႈတီႈၽၢႆႇၼႃႈပီႈၼွင်ႉမၼ်း ဢိၵ်ႇတင်းတပ်ႉၵူၼ်းသိုၵ်းသမႃႇရိ တင်းလၢႆၸိူဝ်းၼၼ်ႉလႄႈ ဝႃႈ၊-
၂ ၵူၼ်းယုတဢၼ်ႁႅင်းလဵၵ်ႉႁႅင်းၵေႇၸိူဝ်းၼၼ်ႉတၵ်းဢွၼ်ၵၼ်ႁဵတ်းၸိူဝ်ႉၼင်ႇႁိုဝ်။ၶဝ်တၵ်းႁဵတ်းႁႂ်ႈတူဝ်ၸဝ်ႈၵဝ်ႇမီးတပ်ႉဢၼ်မၼ်ႈၶိူင်ႇႁိုဝ်။ၶဝ်တၵ်းပုၵ်ႉၸေႃႇယိၸ်ႉႁိုဝ်။ၶဝ်တၵ်းႁႂ်ႈယဝ်ႉႁႂ်ႈတူဝ်ႈၼႂ်းဝၼ်းလဵဝ်ၵူၺ်းႁိုဝ်။ၶဝ်တၵ်းဢဝ်မၢၵ်ႇႁိၼ်ဢၼ်ၽႆးမႆႈယဝ်ႉၸိူဝ်းၼၼ်ႉ ဢွၵ်ႇသေၵႃႈၼႂ်းၵွင်ၶီႈၽုၼ်ႇၶီႈလိၼ်ယိူဝ်ႈယႃႈယိူဝ်ႈယုၵ်းၼၼ်ႉလႄႈမႄးၵုမ်းမႄးႁဵတ်းႁိုဝ်၊ ဝႃႈၼင်ႇ ၼႆဢေႃ။
၃ တေႃႇၽိၵူၼ်းမဵဝ်းဢမ်ႇမုၼ်ႇမီးယူႇၵႃႈတီႈႁိမ်းမၼ်းလႄႈၶိုၼ်းလၢတ်ႈတီႈမၼ်းလႄႈဝႃႈ-ဢၼ်ၶဝ်တႄႇႁဵတ်းၼၼ်ႉ ပေႃးမႃထိူၼ်ႇၶိုၼ်ႈၵႃႈၼိူဝ်မၼ်းၵူၺ်းၵေႃႈ လမ်းမၢၵ်ႇႁိၼ်ၶဝ်ၼၼ်ႉတၵ်းၵိူၼ်ႇတူၵ်းပင်းတူၵ်းယူႇဢိူဝ်ႈ၊ဝႃႈၼင်ႇၼႆဢေႃႈ။
၄ ၽြႃးပဵၼ်ၸဝ်ႈႁဝ်းၶႃႈတီႈၶႃႈ။ထွမ်ႇငိၼ်းသေၵမ်းတီႈၶႃႈ။ၶႃႈၸဝ်ႈႁဝ်းၶဝ်လႆႈၶၢမ်ႇတၢင်းဢၼ်ႁဵတ်းဢမ်ႇပေႃးၼင်ႇႁိုဝ်တီႈၶႃႈဢေႃႈ။ႁႂ်ႈၵႂၢမ်းဢၼ်ၶဝ်သေႉသွမ်းၼၼ်ႉၶိုၼ်းတၢၵ်ႇႁွတ်ႈထိုင်ၵႃႈၼိူဝ်ႁူဝ်ၶဝ် သေၵမ်းလူၺ်ႈ။ႁႂ်ႈၶဝ်လႆႈၶၢမ်ႇတၢင်းဢၼ်ႁိမ်ၵႂႃႇၵႃႈၼႂ်းမိူင်းဢၼ်လႆႈသိမ်းဢဝ်ၵႂႃႇၼၼ်ႉသေၵမ်းလူၺ်ႈ။
၅ ယႃႇပေႁူမ်ႇငမ်းဝႆႉတူႉၸရိူၵ်ႈ ဢၼ်ၶဝ်ႁဵတ်းၼၼ်ႉသေၵမ်းတီႈၶႃႈ။ယႃႇပေႁႂ်ႈဢပျႅတ်ႈၶဝ်လႆႈမီးတၢင်းဢၼ်ၵႄႉမွတ်ႇပႅတ်ႈသေၵႃႈတီႈၽၢႆႇၼႃႈၸဝ်ႈႁဝ်းသေၵမ်းတီႈၶႃႈ။ၶဝ်ဢွၼ်ၵၼ်တိုၵ်းယူင်းတၢင်းၸႂ်မႆႈၶႆႈၸႃႉၸဝ်ႈႁဝ်း ၵႃႈတီႈၽၢႆႇၼႃႈၶဝ်ၸိူဝ်းဢၼ်တႄႇႁဵတ်း လမ်းဝဵင်းၼၼ်ႉယဝ်ႉလူင်ပေႇ။
၆ ၵူၺ်းၵႃႈႁဝ်းဢွၼ်ၵၼ်တႄႇႁဵတ်းလမ်းဝဵင်းယူႇလႄႈလမ်းဝဵင်းယဝ်ႉတူဝ်ႈတေႃႇထိုင်ႁွတ်ႈ ဢၼ်သုင်လမ်းဝဵင်းၶိုင်ႈၼိုင်ႈလဵပ်ႈႁွပ်ႈဝဵင်းၵွပ်ႈပိူဝ်ႈဢၼ် ၶဝ်ၸိူဝ်းဢၼ်တႄႇႁဵတ်းၼၼ်ႉမီးၸေႇတၼႃႇသေလႄႈႁဵတ်းၼၼ်ႉဢေႃႈ။
၇ မိူဝ်ႈဢၼ်သၼ်ႇပႃႇလတ်ႉ ဢိၵ်ႇတင်းတေႃႇၽိ တင်းၵူၼ်းဢႃႇရေႇပျႃႇ လႂ်၊ ၵူၼ်းဢမ်ႇမုၼ်ႇ လႂ်၊ၵူၼ်းဢႃႇၸုတ်ႉ လႂ်ၸိူဝ်းၼၼ်ႉ ငိၼ်းလွင်ႈဢၼ်ယင်းတိုၵ်ႉဢွၼ်ၵၼ်မႄးၵုမ်းမႄးႁဵတ်း လမ်းဝဵင်းယေႇရုသလႅမ်ႇလႄႈမႄးဢူတ်းမႄးယႃ တီႈဢၼ်ၵိူၼ်ႇပင်းလူႉလႅဝ်ၸိူဝ်း ၼၼ်ႉယူႇၼၼ်ႉၸိုင်
၈ ၶဝ်မီးၸႂ်တေႃးသႃႉ ၶႆႈၸႃႉၶႆႈၸဵတ်ႈၼႃႇလူင်လၢင်လႄႈ တိူင်ႇပၢင်ႇၵၼ်ႁႂ်ႈလႆႈၽွမ်ႉၵၼ်ၶီႇသိုၵ်းမႃးလႄႈ တိုၵ်းတေႃးဝဵင်းယေႇရုသလႅမ်ႇ လႄႈယႃႉဢမူႉၼၼ်ႉဢေႃႈ။
၉ ၵူၺ်းၵႃႈႁဝ်းသူးတွင်းတီႈၽြႃးပဵၼ်ၸဝ်ႈႁဝ်းသေလႄႈ ဢွၼ်ၵၼ်ၶၢၼ်းဝႆႉၶဝ်ၸိူဝ်းဢၼ်တၵ်းပႂ်ႉယူႇဝၼ်းဝၼ်းၶိုၼ်းၶိုၼ်းဢမ်ႇ ထၢတ်ႇၼၼ်ႉဢေႃႈ။
၁၀ ၵူၼ်းယုတၵမ်ႈၽွင်ႈဢွၼ်ၵၼ်လၢတ်ႈလႄႈဝႃႈ၊-ၶဝ်ၸိူဝ်းဢၼ်လႆႈႁၢပ်ႇလႆႈပႃးၸိူဝ်းၼၼ်ႉႁႅင်းသဵင်ႈၵႂႃႇယဝ်ႉ။ၶီႈၽုၼ်ႇၶီႈလိၼ်ယိူဝ်ႈယႃႈယိူဝ်ႈယုၵ်းၼမ်ၼႃႇထၢၼ်ႈပေႃးႁဝ်းဢမ်ႇတတ်ႈၼိုင်ႇလႆႈႁဵတ်းႁႂ်ႈလမ်းဝဵင်းယဝ်ႉတူဝ်ႈယဝ်ႉ၊ ဝႃႈၼင်ႇၼႆ ဢေႃႈ။
၁၁ ရၢၼ်ႇသူႇႁဝ်းၸိူဝ်းၼၼ်ႉဢွၼ်ၵၼ်လၢတ်ႈလႄႈဝႃႈ၊-ၶဝ်တၵ်းဢမ်ႇႁူႉၶဝ်တၵ်းဢမ်ႇႁၼ်တေႃႇထိုင်ႁွတ်ႈ ႁဝ်းပေႃးၶဝ်ႈႁွတ်ႈၶဝ်ႈထိုင်ၵႃႈၼႂ်းၵၢင်ၶဝ်ၵႂႃႇသေလႄႈ ၶႃႈၽၼ်းဢဝ်ၶဝ်တၢႆလႄႈ ႁႂ်ႈတၢင်းႁဵတ်းတၢင်းသၢင်ႈၶဝ်လႆႈထၢတ်ႇၵႂႃႇဢေႃႈ၊ ဝႃႈၼင်ႇ ၼႆဢေႃႈ။
၁၂ ၵူၼ်းယုတဢၼ်ယူႇၵႃႈတီႈႁိမ်းၶဝ်ၸိူဝ်းၼၼ်ႉၵေႃႈမႃးလႄႈ မွၵ်ႇလၢတ်ႈတီႈႁဝ်းသိပ်းပွၵ်ႈသိပ်းၽဝ်ႇလႄႈဝႃႈ၊- ၶဝ်ၼၼ်ႉတၵ်းလုၵ်ႉသေၵႃႈတီႈတီႈယူႇၶဝ်ၵူႈတီႈၵူႈလႅၼ်မႃးတိုၵ်းသူဢေႃႈ၊ ဝႃႈၼင်ႇၼႆ ဢေႃႈ။
၁၃ ၵွပ်ႈပိူဝ်ႈၼင်ႇၼၼ်လႄႈၵႃႈၼႂ်းတီႈဢၼ်တႅမ်ႈၵႃႈတီႈၽၢႆႇလင်လမ်းဝဵင်း၊ ၵႃႈတီႈဢၼ်ပၢင်ႇဢၼ်ပဵင်းၸိူဝ်းၼၼ်ႉ ၵဝ်ၶၢၼ်းၵူၼ်းဢၼ်ပႃးလၢၵ်ႈၼၢၵ်ႈလၢပ်ႇႁွၵ်ႇၵၢင်ႇတင်းလၢႆၼၼ်ႉ ဝႆႉၸွမ်းလူၺ်ႈမဵဝ်းၸိူဝ်ႉ ၶိူဝ်းၽႂ်မဵဝ်းၸိူဝ်ႉၶိူဝ်းမၼ်းဢေႃႈ။
၁၄ ၵဝ်လူတူၺ်းသေလႄႈလုၵ်ႉလႄႈလၢတ်ႈတီႈမူးမၢတ်ႈၽွင်းမိူင်း၊ ၶုၼ်ဢၼ်မီးဢရႃႇ၊ ၵူၼ်းတင်းလၢႆဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉလႄႈဝႃႈ၊-ယႃႇပေၵူဝ်ႁႄၶဝ်။ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်းထႃႇဝရႃႉၽြႃး ဢၼ်ယႂ်ႇမျၢတ်ႈလႄႈလီၵူဝ်လီႁႄၼၼ်ႉတႃႉ။ဢွၼ်ၵၼ်တိုၵ်းပုၼ်ႈပီႈၼွင်ႉသူ၊လုၵ်ႈၸၢႆးသူ၊လုၵ်ႈယိင်းသူ၊မေးသူ၊ႁိူၼ်းယေးသူတႃႉဝႃႈၼင်ႇၼႆဢေႃႈ။
၁၅ မိူဝ်ႈဢၼ်ရၢၼ်ႇသူႇႁဝ်းၸိူဝ်းၼၼ်ႉႉ ႁူႉငိၼ်းလွင်ႈဢၼ်ႁဝ်းလႆႈသတိလႄႈၽြႃးပဵၼ်ၸဝ်ႈ ယႃႉတၢင်းၵျၢမ်ႇတၢင်းပွင်ၶဝ်ၼၼ်ႉၸိုင်ႁဝ်းၵႃႈမီးဢွၼ်ၵၼ် သမ်ႉၶိုၼ်းတႄႇၶိုၼ်းႁဵတ်းၵႃႈတီႈလမ်းဝဵင်းတီႈ တၢင်းႁဵတ်းၽႂ်တၢင်းႁဵတ်းမၼ်းၼၼ်ႉဢေႃႈ။
၁၆ ၸႃႉၸဵမ်ႇၶိင်ႇၼၼ်ႉၵႂႃႇ ၶႃႈၵဝ်ၵူၼ်းၵဝ်ၶိုင်ႈၼိုင်ႈဢွၼ်ၵၼ်ႁဵတ်းတၢင်းႁဵတ်းလႄႈ ၶိုင်ႈၼိုင်ႈဢွၼ်ၵၼ်ယိပ်းၵမ်ႁွၵ်ႇ၊ၶိူင်ႈႁႄႉလၢၵ်ႈၼၢၵ်ႈ၊ၵၢင်ႇ၊သိူဝ်ႈၶႅပ်းလဵၵ်း၊ ယူႇဢေႃႈ။ၶုၼ်တင်းလၢႆယူႇၵႃႈတီႈၽၢႆႇလင်ၵူၼ်းမဵဝ်း ယုတ ၵႃႈမီးၼၼ်ႉဢေႃႈ။
၁၇ ၶဝ်ၸိူဝ်းဢၼ်တႄႇႁဵတ်းလမ်းဝဵင်းဢိၵ်ႇတင်းၶဝ်ၸိူဝ်းဢၼ်ႁၢပ်ႇဢၼ်ပႃးၸိူဝ်းၼၼ်ႉႁၢပ်ႇယူႇပႃးယူႇသေလႄႈ ၵူႈၵေႃႉၵူႈၵူၼ်းဢွၼ်ၵၼ်ဢဝ်မိုဝ်းၶွၼ်ၼိုင်ႈၵူၺ်းႁဵတ်းလႄႈ ဢဝ်မိုဝ်း ၶွၼ်ႇၼိုင်ႈယိပ်းၵမ်လၢၵ်ႈၼၢၵ်ႈယူႇဢေႃႈ။
၁၈ ၶဝ်ၵႃႈဢၼ်တႄႇႁဵတ်းၸိူဝ်းၼၼ်ႉဢွၼ်ၵၼ်ဢဝ် လၢပ်ႇမတ်ႉႁွႆႈဝႆႉၵႃႈတီႈဢႅဝ်ယူႇသေလႄႈတႄႇႁဵတ်းဢေႃႈ။ၵေႃႉဢၼ်ပဝ်ႇၼႄးၶရႃႇၼၼ်ႉၵေႃႈ ၸုၵ်းယူႇၵႃႈတီႈႁိမ်း ၵဝ်ဢေႃႈ။
၁၉ ၵဝ်ၵေႃႈလၢတ်ႈတီႈမူးမၢတ်ႈၽွင်းမိူင်းၶုၼ်ဢၼ်မီးဢရႃႇ ၶုၼ်တင်းလၢႆ ၵႃႈဢၼ်ၵိုတ်းဢၼ်ၵျၢၼ်ၸိူဝ်းၼၼ်ႉလႄႈဝႃႈ၊-တၢင်းႁဵတ်းၼႆႉယႂ်ႇၼႃႇလူင်လၢင်ဢေႃႈ။ႁဝ်းလႆႈႁဵတ်းၵႃႈၼိူဝ်လမ်းဝဵင်းယေႈ ၵေႃႉယေႈတီႈၵႆၵၼ်ယၢၼ်ၵၼ်ဢေႃႈ။
၂၀ ပိူဝ်ႈဢၼ်ပဵၼ်ၼင်ႇၼႆလႄႈ သူမီးၵႃႈတီႈ လႂ်သေဢမ်ႇဝႃႈပေႃးငိၼ်းသဵင်ပဝ်ႇၶရႃႇၸိုင် ဢွၼ်ၵၼ်လုၵ်ႉလႄႈမႃးၸူႉၵၼ်တုမ်ၵၼ်ၵႃႈတီႈႁဝ်းၼႆႉတႃႉ။ၽြႃးပဵၼ်ၸဝ်ႈႁဝ်းတၵ်းၸွႆႈသိုၵ်းထႅမ်သိုၵ်းယူႇၽၢႆႇႁဝ်းဢေႃႈ၊ ဝႃႈၼင်ႇၼႆဢေႃႈ။
၂၁ ၼင်ႇၼၼ်လႄႈ ႁဝ်းဢွၼ်ၵၼ်ႁဵတ်းတၢင်းႁဵတ်းဢေႃႈ။ၵူၼ်းၶိုင်ႈၼိုင်ႈၼၼ်ႉယိပ်းၵမ်လၢၵ်ႈၼၢၵ်ႈႁွၵ်ႇယူႇ ၸႃႉၸဵမ်မိူဝ်ႈမိူင်းၸႃႉလႅင်းလႄႈတေႃႇထိုင်ႁွတ်ႈ ၶိင်ႇဢၼ်လၢဝ်ဢွၵ်ႇၼၼ်ႉဢေႃႈ။
၂၂ မိူဝ်ႈၼၼ်ႉၵေႃႈၵဝ်လၢတ်ႈတီႈၵူၼ်းတင်းလၢႆလႄႈဝႃႈ၊-ႁႂ်ႈၵူႈၵေႃႉၵူႈၵူၼ်းဢိၵ်ႇလူၺ်ႈၵၼ်တင်း ၶႃႈၶဝ်ၵူၼ်းၶဝ်ၼွၼ်းၵႃႈၼႂ်းဝဵင်းယေႇရုသလႅမ်ႇ ၶိင်ႇၵၢင်ၶိုၼ်းႁႂ်ႈလႆႈပဵၼ်ၵေႃႉဢၼ်ပႂ်ႉပုၼ်ႈႁဝ်းၶိင်ႇၵၢင်ၶိုၼ်းလႄႈ လႆႈႁဵတ်းလႆႈသၢင်ႈၶိင်ႇၵၢင်ဝၼ်းသေ၊ဝႃႈၼင်ႇၼႆဢေႃႈ။
၂၃ ၼင်ႇၼၼ်လႄႈၼွၵ်ႈသေ ပုၼ်ႈတၢင်းဢၼ်တၵ်းသၵ်ႉၶူဝ်းၼုင်ႈၼၼ်ႉၵဝ်ဢိၵ်ႇတင်းၼွင်ႉၸၢႆးၵဝ်၊ၶႃႈၵဝ်၊ ၵူၼ်းၵဝ်၊ႁူဝ်ႁၢၼ်ၵူၼ်းသိုၵ်းဢၼ်ၸွမ်းလင်ၵဝ်ၸိူဝ်းၼၼ်ႉ ယင်းဢမ်ႇထွတ်ႇၶူဝ်းၼုင်ႈတူဝ်ၸဝ်ႈၵဝ်ႇလႄႈယူႇဢေႃႈ။