Chapter
၂
ၶုၼ်ႁေႃၶမ်းဢႃႇတၸေႇရိတ်ႉပွႆႇၸႂ်ႉၼေႇႁမိၵႂႃႇဝဵင်းယေႇရုသလႅမ်ႇ
၁ ၼႂ်းပီႊဢၼ်ၶုၼ်လူင်ဢႃႇတၸေႇရိတ်ႉ ၸၢမ်ႇႁၢင်ႈၸၢမ်ႇႁေႃသၢဝ်းပီႊလိူၼ်ၼိသၼ်ႇၼၼ်ႉ ၵဝ်ယိပ်းၵမ်ဢဝ်ၼမ်ႉၸပိတ်ႉ ဢၼ်တၢင်ႇဝႆႉၵႃႈတီႈၽၢႆႇၼႃႈၶုၼ်ႁေႃၶမ်းၼၼ်ႉသေလႄႈသၢၵ်ႈဢေႃႈ။မိူဝ်ႈဢွၼ်တၢင်းၼၼ်ႉ ပိူဝ်ႈဢၼ်ၵဝ်ဢမ်ႇတွၼ်ႉၼႄၼႃႈဢၼ်လူႉႁဵဝ်ႇၸွပ်ႈတီႈၽၢႆႇၼႃႈၸဝ်ႈသပွေၵ်ႈလႄႈ ၶုၼ်ႁေႃၶမ်းမီး ဢမိင်ႉလႄႈဝႃႈ၊-
၂ မႂ်းၼႆႉယူႇလီၵိၼ်ဝၢၼ်ယူႇလႄႈၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၼႃႈ လူႉႁဵဝ်ႇၸွပ်ႈယူႇ။မိူၼ်ၼင်ႇႁၢင်ႊ မႂ်းၸႂ်လဵၵ်ႉငိၼ်းၽၢၼ်ထိုင်ၸႂ်ယူႇလူင်ပေႇ၊ဝႃႈၼင်ႇၼႆလႄႈ ၵဝ်ၵူဝ်ႁႄၼႃႇလူင်လၢင်လႄႈလၢတ်ႈတီႈၶုၼ်ႁေႃၶမ်းလႄႈဝႃႈ၊-ႁႂ်ႈဢသၢၵ်ႈၸဝ်ႈၶုၼ်လူင် လိပ်းယူႇတႃႇသေႇသေၵမ်းလူၺ်ႈတီႈၶႃႈ။
၃ ၵွပ်ႈပိူဝ်ႈဝဵင်းဢၼ် ပႃႇႁဵဝ်ႈသၢင်းၶႅင်းပူႇမွၼ်ႇၶႃႈၸဝ်ႈမီးၼၼ်ႉလူႉယူႇႁၢမ်းယူႇသေလႄႈ ၽၵ်းတူဝဵင်းတင်းလၢႆၵေႃႈၽႆးမႆႈပႅတ်ႈယဝ်ႉလႄႈ ၼႃႈၶႃႈၸဝ်ႈယင်းဢမ်ႇလူႉႁဵဝ်ႇၸွပ်ႈလႄႈတၵ်းလႆႈယူႇၸိူဝ်ႉၼင်ႇႁိုဝ်ၶႃႈ၊ မိူဝ်ႈဢၼ် ဝႃႈၼင်ႇၼႆၸိုင်ၶုၼ်ႁေႃၶမ်းထၢမ်လႄႈဝႃႈ၊-
၄ မႂ်းၶႂ်ႈလဝ်ႈယွၼ်းဢဝ်ၸိူဝ်ႉၼင်ႇႁိုဝ်၊ ဝႃႈၼင်ႇၼႆလႄႈၵဝ်သူးတွင်းတီႈၽြႃးပဵၼ်ၸဝ်ႈ ၸဝ်ႈၽုင်ႇၵၢင်ႁၢဝ်သေ ယဝ်ႉလဝ်ႈလၢတ်ႈတီႈၶုၼ်ႁေႃၶမ်းလႄႈဝႃႈ၊-
၅ ပေႃးဢလူဝ်ႇၸဝ်ႈၶုၼ်လူင်မီးလႄႈ ၶႃႈၸဝ်ႈလႆႈထူပ်းၵျေးၸူးသိုဝ်ႈၼႃႈတႂ်ႈတႃႈၸဝ်ႈႁဝ်းၸိုင် ၶႅၼ်းတေႃႈပွႆႇၸႂ်ႉၶႃႈၸဝ်ႈၵႂႃႇၵႃႈတီႈမိူင်းယုတ ၸူးၵႃႈတီႈဝဵင်းတီႈဢၼ် ပႃႇႁဵဝ်ႈသၢင်းၶႅင်းပူႇမွၼ်ႇၶႃႈၸဝ်ႈ မီးၼၼ်ႉလႄႈ ႁႂ်ႈလႆႈမႄးၵုမ်းမႄးႁဵတ်းဝဵင်းၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။
၆ မိူဝ်ႈၼၼ်ႉၼႂ်းမိူဝ်ႈဢၼ်ၼၢင်းႁေႃၶမ်းယင်းတိုၵ်ႉၼင်ႈယူႇၵႃႈတီႈႁိမ်းမၼ်းၸဝ်ႈၼၼ်ႉၸိုင်ၶုၼ်ႁေႃၶမ်းမီးဢမိင်ႉတီႈၵဝ်လႄႈဝႃႈ၊-ပေႃးမႂ်းၵႂႃႇၸိုင် တၵ်းႁိုင်ၵႃႈႁိုဝ်၊တၵ်းၶိုၼ်းမႃးမိူဝ်ႈ လႂ်၊ဝႃႈၼင်ႇၼႆလႄႈ ၶုၼ်ႁေႃၶမ်းမီးဢလူဝ်ႇၶႂ်ႈပွႆႇၸႂ်ႉၵဝ်ၵႂႃႇလႄႈ ၵဝ်လႆႈမၵ်းၶဵၼ်းဝႆႉမိုဝ်ႉမၼ်းဝၼ်းမၼ်းဢေႃႈ။
၇ ၵဝ်သမ်ႉလဝ်ႈယွၼ်းတီႈၶုၼ်ႁေႃၶမ်းလႄႈဝႃႈ၊-ပေႃးဢလူဝ်ႇၸဝ်ႈၶုၼ်လူင်မီးၸိုင် ၶႅၼ်းတေႃႈဢိတ်းလူပၼ်လိၵ်ႈဢမိင်ႉၸဝ်ႈ တီႈၶႃႈၸဝ်ႈႁဝ်းၼႆႉ ပုၼ်ႈမဵဝ်ႉဝုၼ်ႇ ဢၼ်မီးၵႃႈတီႈၽၢႆႇပုၼ်ႉၼမ်ႉႁွင်ႈၸိူဝ်းၼၼ်ႉၼင်ႇႁိုဝ်ၶဝ်တၵ်းဢမ်လႆႈႁႄႉလႆႈႁၢမ်ႈလႄႈ ပၼ်ၶႃႈၸဝ်ႈၵႂႃႇတေႃႇထိုင်ႁွတ်ႈမိူင်းယုတပုၼ်ႉသေၵမ်းတီႈၶႃႈ။
၈ လိၵ်ႈဢမိင်ႉၸဝ်ႈတင်းၽိုၼ်ဢၼ်ႁႂ်ႈ ဢႃႇသပ်ႉၵူၼ်းပႂ်ႉသူၼ်ဢူးယဵၼ်ႇၸဝ်ႈၼၼ်ႉ ႁႂ်ႈမၼ်းပၼ်မႆႉၸိင်ပုၼ်ဢၼ်တၵ်းႁဵတ်း သဝ်ၽၵ်းတူတိူၵ်ႈတီႈတိုၵ်းသိုၵ်းၵႃႈတီႈပိၵ်ႉမၢၼ်ႇၸဝ်ႈ တင်းၶိုဝ်ႇၽၵ်းတူဢိၵ်ႇတင်းပုၼ်ႈလမ်းဝဵင်း တင်းပုၼ်ႈႁိူၼ်းဢၼ်ၶႃႈၸဝ်ႈတၵ်းယူႇၼၼ်ႉၵေႃႈ ၶႅၼ်းတေႃႈႁႂ်ႈမၼ်းဢိတ်းလူပၼ်သေၵမ်းတီႈၶႃႈဝႃႈၼင်ႇၼႆလႄႈ ၶုၼ်ႁေႃၶမ်းၵေႃႈဢိတ်းလူပၼ်ၵွပ်ႈပိူဝ်ႈၵျေးၸူးတၼ်းၶူဝ်း မိုဝ်းၽြႃးပဵၼ်ၸဝ်ႈဢၼ်မီးယူႇၵႃႈၼိူဝ်ၵဝ်ၼၼ်ႉဢေႃႈ။
၉ မိူဝ်ႈၼၼ် ၵဝ်ႁွတ်ႈထိုင်ၵႃႈတီႈမဵဝ်ႉဝုၼ်ႇ ၽၢႆႇဝၼ်း
တူၵ်းၼမ်ႉႁွင်ႈၸိူဝ်းၼၼ်ႉလႄႈ ဢဝ်လိၵ်ႈဢမိင်ႉၸဝ်ႈၶုၼ်ႁေႃၶမ်းဢွၵ်ႇၼႄပျႃႉတီႈၶဝ်ဢေႃႈ။တပ်ႉမူး လႂ်တင်း ႁူဝ်ႁၢၼ်ၶီႇမႃႉ လႂ်ၵေႃႈ ၶုၼ်ႁေႃၶမ်းပွႆႇၸႂ်ႉၸွမ်း လူၺ်ႈၵၼ်တင်းၵဝ်ဢေႃႈ။
၁၀ မိူဝ်ႈဢၼ်သၼ်ႇပႃႇလတ်ႉၵူၼ်းႁေႃႇရၼိဢိၵ်ႇတင်းတေႃႇၽိ ၵေႃႉဢၼ်ပဵၼ်ၶႃႈလႄႈ ပဵၼ်ၵူၼ်းမဵဝ်းဢမ်ႇမုၼ်ႇၼၼ်ႉငိၼ်းလွင်ႈဢၼ်ၵူၼ်းၵေႃႉၼိုင်ႈမႃး ႁႂ်ႈလႆႈပွင်ႁဵတ်းလုမ်းလႃးဢၵျူဝ်းၵူၼ်းမဵဝ်းဢိသရေႇလ တင်းလၢႆၼၼ်ႉၸိုင် သွင်ၶႃၼၼ်ႉၽိတ်းၸႂ်ၸဵပ်းၸႂ်ၼႃႇလူင်လၢင်ဢေႃႈ။
ၼေႇႁမိၸႅတ်ႈတူၺ်းလမ်းဝဵင်းယေႇရုသလႅမ်ႇ
၁၁ ၵဝ်ႁွတ်ႈထိုင်ၵႃႈတီႈဝဵင်းယေႇရုသလႅမ်ႇ လႄႈယူႇသၢမ်ဝၼ်းသေယဝ်ႉ၊
၁၂ ၵဝ်ဢိၵ်ႇတင်းၶဝ်ၸိူဝ်းဢၼ်ပႃးတီႈၵဝ်ၼၼ်ႉၵမ်ႈၽွင်ႈလုၵ်ႉၶိင်ႇၵၢင်ၶိုၼ်းသေလႄႈ ယင်းဢမ်ႇမွၵ်ႇဢမ်ႇလၢတ်ႈတီႈၽႂ် လွင်ႈဢၼ်ၽြႃးပဵၼ်ၸဝ်ႈၵဝ်သႂၢင်းပၼ်ၵႃႈၼႂ်းႁူဝ်ၸႂ်ၵဝ် ႁႂ်ႈလႆႈပွင်လႆႈႁဵတ်းပုၼ်ႈဝဵင်းယေႇရုသလႅမ်ႇ ၼၼ်ႉလႄႈၼွၵ်ႈသမေႃႉဢၼ်ၵဝ် ၶီႇၼၼ်ႉ
၁၃ ၵဝ်ယင်းဢမ်ႇပႃးၽုင်မႃႉသေတူဝ်လႄႈၼႂ်းၶိင်ႇၵၢင်ၶိုၼ်း ၵဝ်ဢွၵ်ႇၽၵ်းတူၶူင်ႈႁူၺ်ႈလႄႈၵႂႃႇၽၢႆႇတၢင်းၼမ်ႉမေႃႇၼၵႃး တေႃႇထိုင်ႁွတ်ႈၽၵ်းတူၶီႈဝူဝ်းသေလႄႈ လူတူၺ်းလမ်းဝဵင်းယေႇရုသလႅမ်ႇ ဢၼ်ၵိူၼ်ႇပင်းယဝ်ႉၼၼ်ႉဢေႃႈ။ၽၵ်းတူမၼ်းတင်းလၢႆ ၵေႃႈၽႆးမႆႈပႅတ်ႈယဝ်ႉၼၼ်ႉဢေႃႈ။
၁၄ သမ်ႉပူၼ်ႉၸူးၵႃႈတီႈၽၵ်းတူၼမ်ႉမေႃႇဢွၵ်ႇႁူး ဢိၵ်ႇတင်းၼမ်ႉၼွင်ၶုၼ်ႁေႃၶမ်းဢေႃႈ။
၁၅ ၵွပ်ႈပိူဝ်ႈဢၼ်ဢမ်ႇမီးတၢင်းဢၼ်မႃႉ ၵႂႃႇလႆႈၼၼ်ႉလႄႈ ၼႂ်းၶိင်ႇၵၢင်ၶိုၼ်းၼၼ်ႉသမ်ႉတႆႇလတ်းၵႂႃႇၸွမ်းၵႃႈတီႈႁိမ်းၼမ်ႉၼွင်လႄႈ လူတူၺ်းလမ်းဝဵင်းသေယဝ်ႉ သမ်ႉဝၢႆႇၶိုၼ်းလႄႈၶဝ်ႈၽၵ်းတူၶူင်ႈ ႁူၺ်ႈသေလႄႈၶိုၼ်းမႃးဢေႃႈ။
၁၆ ၶုၼ်ဢရႃႇသိ တင်းလၢႆဢမ်ႇႁူႉလွင်ႈဢၼ်ၵဝ်ၵႂႃႇၵႃႈတီႈ လႂ်၊ လွင်ႈဢၼ်ၵဝ်ႁဵတ်းၸိူဝ်ႉၼင်ႇႁိုဝ်ၼၼ်ႉ။ၵဝ်ယင်းဢမ်ႇပႆႇမွၵ်ႇလၢတ်ႈလွင်ႈတီႈႁဵင်းၼၼ်ႉတီႈ ၵူၼ်းယုတ ယိတ်ႉပရေႃးႁိၵ်ႈ၊မူးမၢတ်ႈၽွင်းမိူင်း၊ ၶုၼ်ဢရႃႇသိဢိၵ်ႇတင်းၶဝ်ၸိူဝ်းဢၼ်သၢင်ႈႁဵတ်းၸိူဝ်းၼၼ်ႉသေၵေႃႉသေ ၵူၼ်းလႄႈယူႇဢေႃႈ။
၁၇ လိုၼ်းၼၼ်ႉၵဝ်လၢတ်ႈတီႈၶဝ်လႄႈဝႃႈ၊- သူလႆႈႁူႉလႆႈႁၼ်လွင်ႈဢၼ်ႁဝ်းၼႆႉၶၢမ်ႇတုၵ်ႉၶႃႉတၢင်းဢၼ်ၶၢၼ်ၸႂ် လွင်ႈဢၼ်ဝဵင်း ယေႇရုသလႅမ်ႇလူႉယူႇႁၢမ်းယူႇ၊ လွင်ႈဢၼ်ၽၵ်းတူဝဵင်းတင်းလၢႆႆးမႆႈပႅတ်ႈယဝ်ႉၼၼ်ႉယူႇဢေႃႈ။မႃးမႃးဢိူၺ်း။ဢွၼ်ၵၼ်မႄးတႄႇမႄးႁဵတ်းဝဵင်းယေႇရုသလႅမ်ႇ ႁႂ်ႈႁဝ်းၵၢင်းလွတ်ႈတင်းတၢင်းဢၼ်သေႉသွမ်းတႃႉ၊ ဝႃႈ ၼင်ႇၼႆသေယဝ်ႉ
၁၈ ၽုၺ်ႇလၢတ်ႈပၼ်ပၼ်ၶဝ်လွင်ႈဢၼ်ၵျေးၸူးမိုဝ်းၽြႃးပဵၼ်ၸဝ်ႈႁဵတ်း ဢၼ်လီဢၼ်ငၢမ်းတီႈၵဝ်ဢိၵ်ႇတင်း လွင်ႈၵႂၢမ်းဢၼ်ၶုၼ်ႁေႃၶမ်းမီးဢမိင်ႉတီႈၵဝ်ၼၼ်ႉလႄႈ ၶဝ်ဢွၼ်ၵၼ်ၶိုၼ်းလၢတ်ႈလႄႈဝႃႈ၊-ႁဝ်းဢွၼ်ၵၼ်လုၵ်ႉလႄႈမႄးတႄႇမႄးႁဵတ်းတႃႉႁဝ်း၊ဝႃႈၼင်ႇၼႆသေလႄႈ ၵေႃႉၼိုင်ႈတိုၵ်းယူင်းၸူဝ်းဢဝ်ၵေႃႉၼိုင်ႈ ႁႂ်ႈဢမူႉဢၼ်လီဢၼ်ငၢမ်းၼၼ်ႉ လႆႈယဝ်ႉလႆႈတူဝ်ႈဢေႃႈ။
၁၉ မိူဝ်ႈဢၼ် သၼ်ႇပႃႇလတ်ႉၵူၼ်းႁေႃႇရၼိ၊တေႃႇၽိ ၵေႃႉဢၼ်ပဵၼ်ၶႃႈလႄႈပဵၼ်ၵူၼ်းဢမ်ႇမုၼ်ႇ တင်းၵေႇသိမ်ႇၵူၼ်းဢႃႇရေႇပျႃႇၸိူဝ်းၼၼ်ႉငိၼ်းလွင်ႈၼၼ်ႉၸိုင် ၶဝ်ဢွၼ်ၵၼ်ႁဵတ်းပျၢၵ်ႈႁဵတ်းၶူဝ်လႄႈႁဵတ်းဢမ်ႇၼပ်ႉဢမ်ႇၶၢၼ်းတီႈႁဝ်းလႄႈဝႃႈ၊-သူတၵ်းဢွၼ်ၵၼ်ႁဵတ်းၸိူဝ်ႉၼင်ႇႁိုဝ်။သူတၵ်းလုၵ်ႉၽိုၼ်ႉၶုၼ်ႁေႃၶမ်းႁိုဝ်၊ဝႃႈၼင်ႇၼႆဢေႃႈ။
၂၀ ၵဝ်ၵေႃႈၶိုၼ်းလၢတ်ႈတီႈၶဝ်လႄႈဝႃႈ၊-ၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်ၼၼ်ႉတၵ်းပၼ်ဢၶႂၢင်ႉတီႈႁဝ်းဢေႃႈ။ပိူဝ်ႈၼႆလႄႈႁဝ်းဢၼ်ပဵၼ်ၶႃႈမၼ်းၸဝ်ႈၸိူဝ်းၼႆႉ တၵ်းဢွၼ်ၵၼ်လုၵ်ႉလႄႈမႄးတႄႇမႄးႁဵတ်းဢေႃႈ။သူၸမ်းဢမ်ႇမီးပုၼ်ႈမီးတႃႇဢမ်ႇမီးတီႈဢၼ်ဢုပ်ႉဢၼ်ပိူင်ႇ၊ ဢမ်ႇမီးတီႈမၢတ်ႈမၢႆပုၼ်ႈဢၼ်တၵ်းၶုၵ်းၸႂ်ႇလႆႈၶႆႈၸႂ်ထူပ်းၵႃႈၼႂ်းဝဵင်းယေႇရုသလႅမ်ႇ ၼႆႉလႃးလႃး၊ဝႃႈၼင်ႇၼႆဢေႃႈ။