၇
၁ လုၵ်ႈယိင်းၶုၼ်ဢိူၺ်း။တိၼ်မႂ်းၼၢင်းၼၼ်ႉတိုဝ်းၶႅပ်းတိၼ်ယူႇသေလႄႈ ပဵၼ်ဢၼ်ႁၢင်ႊလီႁၢင်ႊငၢမ်းၼႃႇလူင်လၢင်ဢေႃႈ။ပွတ်းဢႅဝ်မႂ်းၼၢင်းၼၼ်ႉပဵၼ်ၸိူဝ်ႉၼင်ႇရတ်ႇတၼႃႇသႅင်လီ ဢၼ်ၵေႃႉဢၼ်လၵ်းလႅမ် ၸၢင်ႊမေႃမႄးႁဵတ်းဝႆႉၼၼ်ႉဢေႃႈ။
၂ တွင်ႉၼွႆႉမႂ်းၼၢင်းၼၼ်ႉပဵၼ်ၵွၵ်းဢၼ်တဵမ်ဝႆႉတင်းၼမ်ႉၸပိတ်ႉဢၼ်လေႃးလူၺ်ႈၵၼ်တင်း ယႃႈဢၼ်ႁွမ်ဢၼ်ႁူၺ်းၼၼ်ႉလႄႈ တွင်ႉမႂ်းၼၢင်းပဵၼ်ၵွင်ၶဝ်ႈပိူၵ်ႇဢၼ်ဢဝ်မွၵ်ႇႁဵဝ်း ငိုၼ်းႁၢင်ႈၶိူင်ႈဝႆႉၼၼ်ႉဢေႃႈ။
၃ တဝ်ႈၼူမ်းမႂ်းၼၢင်းသွင်လုၵ်ႈၼၼ်ႉ မိူၼ်ၸိူဝ်ႉၼင်ႇတိုင်ဢွၼ်ႇဢၼ်ၽႃၽႄ ၼၼ်ႉဢေႃႈ။
၄ ၶေႃးမႂ်းၼၢင်းၼၼ်ႉပဵၼ်ၸိူဝ်ႉၼင်ႇထဵင်လင်ငႃးၸၢင်ႉၼၼ်ႉဢေႃႈ။မၢၵ်ႇတႃမႂ်းၼၢင်းၼၼ်ႉပဵၼ်ၸိူဝ်ႉၼင်ႇၼမ်ႉၼွင်ၵႃႈတီႈ ဝဵင်းႁေႇသၽုၼ်ႇၵႃႈႁိမ်းၽၵ်းတူပႃႇသရပ်ႉပိမ်ႇၸိူဝ်းၼၼ်ႉလႄႈ ၶူႈလင်မႂ်းၼၢင်းၼၼ်ႉ ပဵၼ်ၸိူဝ်ႉၼင်ႇထဵင်လင် လေႇပၼုၼ်ႇဢၼ်ဝၢႆႇၼႃႈတေႃႇဝဵင်းထမ်ႇမသႅတ်ႉၼၼ်ႉဢေႃႈ။
၅ ၵွၵ်းႁူဝ်မႂ်းၼၢင်းၼၼ်ႉ မိူၼ်ၵၼ်တင်းလွႆၵရမေႇလလႄႈ ၶူၼ်ႁူဝ်မႂ်းၼၢင်းၼၼ်ႉႁၢင်ႈၶိူင်ႈဢၼ်လႅင်ႊၵမ်ႇဝႆႉၼၼ်ႉဢေႃႈ။ၶုၼ်လူင်မီးတၢင်းဢၼ်လႆႈၶၢမ်ႇတၢင်းဢၼ်မတ်ႉၽုၵ်ႇဝႆႉ လူၺ်ႈၶူၼ်ႁူဝ်ဢၼ်ၽၼ်ႈဢၼ်ၽိူဝ်ၼၼ်ႉယဝ်ႉ။
၆ ၼၢင်းဢၼ်ၵဝ်ႁၵ်ႉၼႆႉဢိူၺ်း။မႂ်းၼၢင်းပဵၼ်ဢၼ်ႁၢင်ႊလီၼႃႇလူင်လၢင် ပုၼ်ႈဢၼ်ၵဝ်တၵ်းလႆႈမူၼ်ႈပျေႃႇလႄႈ တဵမ်ဝႆႉတင်းလၢၵ်ႈၶၼႃႇ ဢၼ်လီႁၵ်ႉလီပႅင်း ၼၼ်ႉဢေႃႈ။
၇ တၢင်းဢၼ်သုင်မႂ်းၼၢင်းၼၼ်ႉမိူၼ်ၸိူဝ်ႉၼင်ႇတူၼ်ႈထၼ်းလႄႈတဝ်ႈၼူမ်းမႂ်းၼၢင်းၼၼ်ႉ မိူၼ်ၸိူဝ်ႉၼင်ႇပုၵ်ႉမၢၵ်ႇၸပိတ်ႉဢေႃႈ။
၈ ၵဝ်ၸဝ်ႈလႆႈလၢတ်ႈလႄႈဝႃႈ ၵဝ်တၵ်းၶိုၼ်ႈတူၼ်ႈထၼ်းၼၼ်ႉလႄႈ ယိပ်းၵမ်ၵၢၼ်ႈတွင်ထၼ်းဢေႃႈ၊ဝႃႈၼင်ႇၼႆလႄႈလၢႆးသမ်ႉ တဝ်ႈၼူမ်းမႂ်းၼၢင်းၼၼ်ႉပဵၼ်ၸိူဝ်ႉၼင်ႇပုၵ်ႉမၢၵ်ႇၸပိတ်ႉဝႆႉလႄႈ ဢၢႆဢၼ်မၼ်းၼၢင်းထူၺ်ႈၸႂ်ၼၼ်ႉပဵၼ်ၸိူဝ်ႉၼင်ႇ ဢၢႆမၢၵ်ႇဢိုၼ်ႈဝၢၼ်ၼၼ်ႉ ဢေႃႈ။
၉ သူပ်းမႂ်းၼၢင်းၵေႃႈပဵၼ်ၸိူဝ်ႉၼင်ႇၼမ်ႉၸပိတ်ႉဢၼ်လီၼႃႇသေပိူၼ်ႈ ဢၼ်ၸၢင်ႊလႆႈၶဝ်ႈၵႂႃႇယူႇသိုဝ်ႈသိုဝ်ႈပုၼ်ႈ ၼၢင်းဢၼ်ၵဝ်ၸဝ်ႈႁၵ်ႉၼႃႇၼၼ်ႉလႄႈ ၸၢင်ႊလႆႈၶဝ်ႈၵႂႃႇၵႃႈၼႂ်းသူပ်းၶဝ်ၸိူဝ်းဢၼ်ၼွၼ်းလပ်းၼၼ်ႉၼိမ်ၼိမ်လီလီဢေႃႈ။
ႁၢင်ႊၽၢင်လီငၢမ်းလုၵ်ႉပႂ်ႉမႂ်ႇ
၁၀ ၵဝ်ပဵၼ်တီႈဢၼ် ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉပိူင်ႇလႄႈမၼ်းၸဝ်ႈၸင်ႇၸွမ်းဢလူဝ်ႇၵဝ်ဢေႃႈ။
၁၁ မႃးသေၵမ်းတီႈၶႃႈ။ၸဝ်ႈဢၼ်ၶႃႈၼၢင်းႁၵ်ႉပႅင်းၼႃႇတီႈၶႃႈဢိူၺ်း။ႁဝ်းဢွၼ်ၵၼ်ဢွၵ်ႇၵႂႃႇၵႃႈတီႈထိူၼ်ႇလႄႈ ႁႂ်ႈပူၼ်ႉၶိုၼ်းၵႃႈၼႂ်းဝၢၼ်ႈၸိူဝ်းၼၼ်ႉတႃႉႁဝ်း။
၁၂ ဢွၼ်ၵၼ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ၵႂႃႇၵႃႈတီႈသူၼ်ဢူးယဵၼ်ႇၸပိတ်ႉတႃႉႁဝ်း။ဢွၼ်ၵၼ်လူတူၺ်းလွင်ႈဢၼ်တူၼ်ႈၶိူဝ်းမၢၵ်ႇၸပိတ်ႉၽူၵ်ႈလီႁႅင်းလီႁိုဝ်၊ ဢမ်ႇၽူၵ်ႈလီဢမ်ႇႁႅင်းလီႁိုဝ်၊မွၵ်ႇမၼ်းၵီႈယဝ်ႉႁိုဝ်၊ ဢမ်ႇပႆႇၵီႈႁိုဝ်၊တူၼ်ႈမၢၵ်ႇၸင်ႈမွၵ်ႇယဝ်ႉႁိုဝ်၊ ဢမ်ႇပႆႇမွၵ်ႇႁိုဝ်ၼၼ်ႉတႃႉႁဝ်း။ၵႃႈတီႈၼၼ်ႉၶႃႈၼၢင်းၸဝ်ႈတၵ်းဢဝ်မႅတ်ႈတႃႇၶႃႈၼၢင်းၸဝ်ႈဢၢပ်ႈပၼ်တီႈၸဝ်ႈႁဝ်း တီႈ ၶႃႈဢေႃႈ။
၁၃ တူၼ်ႈယႃႈဢၶျူဝ်ႇတင်းလၢႆႁွမ်ႁူၺ်းလႄႈၵႃႈတီႈႁိမ်းၽၵ်းတူႁဝ်းၶႃႈၼၼ်ႉ မီးမဵဝ်းမၢၵ်ႇဢၼ်ဝၢၼ်ဢၼ်ၵဝ်ႇဢၼ်မႂ်ႇၵူႈၸိူဝ်ႉၵူႈမဵဝ်း ဢၼ်ၶႃႈၼၢင်းၸဝ်ႈလႆႈသိမ်းဝႆႉပုၼ်ႈၸဝ်ႈၶုၼ်လူင်ၼၼ်ႉတီႈၶႃႈယဝ်ႉ။ၸဝ်ႈဢၼ်ၵဝ်ႁၵ်ႉပႅင်းၼႃႇဢိူၺ်း။