၆
ဢမူႉၼိူဝ်ဢိသရေႇလ
၁ ဢွၼ်ၵၼ်ထွမ်ႇငိၼ်းဢမိင်ႉထႃႇဝရႃႉၽြႃးတႃႉ။မႂ်းလုၵ်ႉလႄႈ ထူပ်းတြႃးၵၼ်တင်းလွႆလူင်တင်းလၢႆလႄႈႁႂ်ႈလွႆဢွၼ်ႇတင်းလၢႆဢွၼ်ၵၼ်ငိၼ်းၵႂၢမ်းမႂ်းသေ။
၂ လွႆတင်းလၢႆၶဝ်ဢိူၺ်း။မၢၵ်ႇႁိၼ်မၢၵ်ႇၽႃဢၼ်ပဵၼ်ငဝ်ႈႁၢၵ်ႈလိၼ်မိူင်းၶဝ်ဢိူၺ်း။ဢွၼ်ၵၼ်ထွမ်ႇငိၼ်းဢမူႉတၢင်းဢၼ်ထႃႇဝရႃႉၽြႃးထူပ်းတြႃးၼႆႉတႃႉ။ထႃႇဝရႃႉၽြႃးမီးတီႈဢၼ်လီထူပ်းတြႃးၵၼ်တင်း ၵူၼ်းမဵဝ်းမၼ်းၸဝ်ႈတင်းလၢႆလႄႈ မၼ်းၸဝ်ႈတၵ်းလၢတ်ႈၵၼ်ထဵင် ၵၼ်တင်းမဵဝ်းဢိသရေႇလဢေႃႈ။
၃ ၵူၼ်းၵဝ်တင်းလၢႆၶဝ်ဢိူၺ်း။ၵဝ်သမ်ႉႁဵတ်းၵႃႈသင်တီႈမႂ်းယဝ်ႉ။ၵဝ်ယၢမ်ႈၼိၵ်ႈၸၢၵ်ႈငႅၼ်းသေးမႂ်းၸိူဝ်ႉၼင်ႇႁိုဝ်ယဝ်ႉ။ၶၢမ်ႇသၢၵ်ႈ သေႇယူႇၽၢႆႇၼိုင်ႈတင်းၵဝ်တႃႉ။
၄ ၵဝ်ၼုၵ်ႈဢဝ်မႂ်းဢွၵ်ႇသေၵႃႈၼႂ်းမိူင်းဢေႇၵႅပ်ႉတု မႃးလႄႈ ထုတ်ႇဢဝ်မႂ်းဢွၵ်ႇသေ ၵႃႈၼႂ်းတီႈဢၼ်ၶၢမ်ႇႁဵတ်းၶႃႈၼၼ်ႉမႃးယဝ်ႉယဝ်ႉ။ၵဝ်ဢဝ်မုဝ်းသေႇ၊ဢႃႇရုၼ်ႇတင်းမိရိဢမ်ႇ ၸိူဝ်းၼၼ်ႉပွႆႇၸႂ်ႉဢွၼ်ႁူဝ်မႂ်းယဝ်ႉယဝ်ႉ။
၅ ၵူၼ်းၵဝ်တင်းလၢႆၶဝ်ဢိူၺ်း။ၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းဢၼ်ပႃႇလၵ်ႉ ၶုၼ်လူင်မေႃႇၽ တိူင်ႇပၢင်ႇလၢတ်ႈၸႃၵၼ်ၼၼ်ႉဢိၵ်ႇတင်း ၵႂၢမ်းဢၼ်ပႃႇလမ်ႇလုၵ်ႈၸၢႆးပေႃႇရၶိုၼ်းလၢတ်ႈတီႈမၼ်းၼၼ်ႉ တင်းလွင်ႈတၢင်းဢၼ်ပဵၼ်မႃးၼႂ်း ၸူဝ်ႈဢၼ်ဢဝ်ၵႃႈတီႈၸႃႉၸဵမ်ဝဵင်းသိတ်ႉတိမ်ႇတေႃႇထိုင်ႁွတ်ႈဝဵင်းၵိလၵႃႇလၼၼ်ႉ ႁႂ်ႈသူလႆႈႁူႉၸႅင်ႈတၢင်းဢၼ်သိုဝ်ႈတေႃႇ ထႃႇဝရႃႉၽြႃး ၸိူဝ်း ၼၼ်ႉတႃႉ။
၆ ၵဝ်တၵ်းလႆႈပႃးဢဝ်ၵႃႈသင်သေလႄႈသုတ်ႉၸပ်းသုတ်ႉၸူးၵႃႈတီႈ ၽၢႆႇၼႃႈထႃႇဝရႃႉၽြႃးလႄႈၶုပ်ႉမူပ်ႇၵူဝ်းၵႂၢႆႇၵႃႈတီႈၽၢႆႇၼႃႈၽြႃး ဢၼ်သုင်ၼႃႇသေပိူၼ်ႈၼၼ်ႉ။တၵ်းလႆႈပႃးဢဝ်ယိၸ်ႉဢၼ်တုတ်ႇၽႆးဢိၵ်ႇတင်းဝူဝ်းဢွၼ်ႇ ဢၼ်ၶွပ်ႈၶူပ်ႇတင်းလၢႆသေလႄႈ သုတ်ႉၸပ်းသုတ်ႉၸူးၵႃႈတီႈၽၢႆႇၼႃႈမၼ်းၸဝ်ႈ ႁိုဝ်။
၇ ထႃႇဝရႃႉၽြႃးတၵ်းထုၵ်ႇၸႂ်ၵျိူၵ်ႈၸႂ်သူဝ်းပေႃႈပဵၼ်ႁဵင်ပဵၼ်ႁဵင်ဢိၵ်ႇတင်း ႁွင်ႊၵႄးၼမ်ႉမၼ်းပဵၼ်မိုၼ်ႇပဵၼ်မိုၼ်ႇၼၼ်ႉႁိုဝ်။ၵဝ်တၵ်းလႆႈဢဝ်လုၵ်ႈၸၢႆးတူၼ်ႈၵဝ်ပုၵ်ႉၸေႃႇပုၼ်ႈဢၼ်ၵဝ်ပူၼ်ႉလိူဝ်ၼၼ်ႉလႄႈ ဢဝ်မၢၵ်ႇတွင်ႉၵဝ်ပုၵ်ႉၸေႃႇ ပုၼ်ႈဢပျႅတ်ႈၸႂ်ဝိၺိၺ်ႇၵဝ် ၼၼ်ႉႁိုဝ်။
၈ ၵူၼ်းဢိူၺ်း။မၼ်းၸဝ်ႈၼႄပျႃးလွင်ႈတၢင်းဢၼ်လီဢၼ်ငၢမ်းတီႈမႂ်းယဝ်ႉယဝ်ႉ။ၼွၵ်ႈသေတၢင်းဢၼ်ႁဵတ်းၸွမ်းၼင်ႇတြႃး၊ တၢင်းဢၼ်ထုၵ်ႇၸႂ်ၵျိူၵ်ႈၸႂ်ၵရူႉၼႃႇ တၢင်းဢၼ်မီးၸႂ်ဢၼ်ၶျႃးတႅမ်ႇသေလႄႈၵႂႃႇမႃးယူႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈမႂ်းၼၼ်ႉထႃႇဝရႃႉၽြႃးယင်းယွၼ်းဢဝ်ၵႃႈသင်လူးၵွၼ်ႇ။
ဢမူႉဢိသရေလ လႄႈတၢမ်ႇ
၉ ၼုၵ်ႈၵပၢတ်ႈထႃႇဝရႃႉၽြႃး သႅၼ်ႇႁွင်ႉၸူးၵႃႈတီႈဝဵင်းယူႇလႄႈ ၵေႃႉဢၼ်မီးပိင်ႇၺႃႇၼၼ်ႉတၵ်းရူဝ်ႇသေႇၵူဝ်ယမ်ၼႃႇမႃႉၸိုဝ်သဵင်မၼ်းၸဝ်ႈဢေႃႈ။ဢွၼ်ၵၼ်ထွမ်ႇငိၼ်းၶွၼ်ႉဝၢႆဢၼ်သင်ႇသွၼ်သုင်းမႃႉၼၼ်ႉ ဢိၵ်ႇတင်းလွင်ႈဢၼ်ၽူႈ လႂ်ဢဝ်မၼ်းၸီႇယၢင်ႇၼၼ်ႉ တႃႉ။
၁၀ ၵႃႈၼႂ်းႁိူၼ်းၶဝ်ၸိူဝ်းဢၼ်ဢမ်ႇတြႃးၼၼ်ႉယင်းမီးဢုၵ်ႉၸႃႇၸေးၸိမ်ႇဢၼ်ဢမ်ႇတြႃး ဢိၵ်ႇတင်းၵွၵ်းတူင်ဢၼ်လဵၵ်ႉဢၼ်ဢွၼ်ႇ ဢၼ်လီႁင်ႈဢဵတ်ႇသဵတ်ႇ ၼၼ်ႉလူးၵွၼ်ႇႁိုဝ်။
၁၁ ၵဝ်မီးယႃႇၸူႇဢၼ်ဢမ်ႇတြႃးဢိၵ်ႇတင်း ထူင်ဢၼ်သႂ်ႇလုၵ်ႈၶၼ်ဢၼ်ၵူတ်ႉဢၼ်လိင်ႇၸိူဝ်းၼၼ်ႉယူႇသေလႄႈတၵ်းပဵၼ်ၵေႃႉဢၼ် မူတ်းသႂ်လႆႈႁိုဝ်။
၁၂ သထေးၵူၼ်းဝဵင်းၸိူဝ်းၸၢင်ႊႁဵတ်းဢႃႉထမ်ႇမႃႉလႄႈ ၶဝ်ၸိူဝ်းဢၼ် ယူႇၵႃႈၼႂ်းဝဵင်းၼၼ်ႉၸၢင်ႊသုင်းတိုဝ်းမူႉသႃႇယူႇသေလႄႈ လိၼ်ႉဢၼ်မီးၵႃႈၼႂ်းသူပ်းၶဝ်ၼၼ်ႉ ၸၢင်ႊပႅတ်ႉၸၢင်ႊလႅၼ်ဢေႃႈ။
၁၃ ပိူဝ်ႈၼႆၸင်ႇ ၵဝ်တၵ်းပၼ်တၢမ်ႇ ဢၼ်ၸဵပ်းဢၼ်သႅပ်ႇၼႃႇလူင်လၢင်တီႈမႂ်း ႁႂ်ႈမႂ်းလႆႈၶၢမ်ႇတၢင်းဢၼ်ပႄႇၽဵဝ်ႈပႅတ်ႈၵွပ်ႈပိူဝ်ႈဢပျႅတ်ႈမႂ်းဢေႃႈ။
၁၄ မႂ်းၵိၼ်လႄႈဢမ်ႇလႆႈဢိမ်ႇလႆႈတဵမ်။တၢင်းဢၼ်ၶျႃးမႂ်းတူၵ်းတီႈတႅမ်ႇၼၼ်ႉတၵ်းလႆႈမီးၵႃႈၼႂ်းမႂ်းဢေႃႈ။မႂ်းဢဝ်ၵႂႃႇလႄႈဢမ်ႇလႆႈၵႄႇသႄႇဢဝ်လွတ်ႈ။လွင်ႈတၢင်းဢၼ်မႂ်းၵႄႇသႄႇဢဝ်လွတ်ႈၼၼ်ႉၵေႃႈ ၵဝ်တၵ်းဢဝ်ဢၢပ်ႈ ပၼ်တီႈၽေးလၢပ်ႇၽေးလႅဝ်းဢေႃႈ။
၁၅ မႂ်းဝၢၼ်ႇၸိူဝ်ႉဝၢၼ်ႇၽၼ်းလႄႈဢမ်ႇလႆႈပၢတ်ႇဢဝ်ထိူဝ်ဢဝ်။မႂ်းယဵပ်ႇၼူတ်ႈမၢၵ်ႇသၼ်ႇလုၼ်ႇလႄႈ ဢမ်ႇလႆႈဢဝ်ၼမ်ႉမၼ်းၼၼ်ႉလုပ်ႈတႃးတူဝ်မႂ်း။မႂ်းယဵပ်ႇၼူတ်ႈမၢၵ်ႇၸပိတ်ႈလႄႈ ဢမ်ႇလႆႈသူတ်ႉၵိၼ်ၼမ်ႉၸပိတ်ႈၼၼ်ႉ။
၁၆ လွင်ႈမၼ်းၸမ်း၊မႂ်းၸၢင်ႊပႂ်ႉၵမ်ပႂ်ႉထုင်းၾိင်ႈတၢင်းဢၼ်ၶုၼ်ဢေႃႇမရိၸီႇယၢင်ႇဝႆႉၸိူဝ်းၼၼ်ႉ ဢိၵ်ႇတင်းတၢင်းၵမ်တၢင်းၵျၢင်ႉ ဢၼ်မဵဝ်းၶုၼ်ဢႃႇႁပ်ႉၵမ်ၵျၢင်ႉၵႃႈမီးၼၼ်ႉလႄႈ ၸွမ်းၵႂႃႈၵႃႈၼႂ်းသဵၼ်ႈတၢင်းဢၼ်ၶဝ်တိုၵ်းယူင်းၸူဝ်းၸဝ်ၸိူဝ်းၼၼ်ႉဢေႃႈ။ပိူဝ်ႈၼႆလႄႈၵဝ်တၵ်းႁႂ်ႈမႂ်း ပဵၼ်တီႈဢၼ်သိတ်ႇၵူၼ်းယဵၼ်ၵူၼ်းလႄႈ ႁႂ်ႈၵူၼ်းဝဵင်းၸိူဝ်းၼၼ်ႉပဵၼ်တီႈဢၼ်ႁဵတ်းသဵင်သီႉသီႉသေႃႉသေႃႉသေလႄႈ မႂ်းတၵ်းလႆႈၶၢမ်ႇတၢင်းဢၼ်ၵူၼ်းၵဝ်တင်းလၢႆသေႉသွမ်းဢေႃႈ။