၅
ၽူႈဢၼ်ဢုပ်ႉပိူင်ႇတၵ်းဢွၵ်ႇသေဝဵင်းပႅတ်ႉလိႁႅမ်ႇ
၁ မိူဝ်ႈလဵဝ်ၼႆႉၸမ်း၊ လုၵ်ႈယိင်းဢၼ်ပဵၼ်မုၵ်ႉပဵၼ်ၸိူဝ်းဝႆႉၼႆႉဢိူၺ်း။ၸူႉၵၼ်တုမ်ၵၼ်ပဵၼ်မုၵ်ႉပဵၼ်ၸိူဝ်းယူႇတႃႉ။ပိူၼ်ႈလွမ်ႉႁွပ်ႈႁဝ်းဝႆႉယဝ်ႉ။ၶဝ်ဢဝ်ၶွၼ်ႉဝၢႆပေႃႉယႅၼ်ႉသႂ်ႇၵႅမ်ႈၶုၼ်ဢိသရေႇလယဝ်ႉလူင်ပေႇ။
၂ ဝဵင်းပႅတ်ႉလိႁႅမ်ႇဢေႇၽရတ်ႉဢိူၺ်း။ပိၵ်ႉသမ်ႉမႂ်းၼႆႉပဵၼ်ဝဵင်းလဵၵ်ႉဝဵင်းၼွႆႉၼႂ်းမိူင်းယုတ သေၵေႃႈၸဝ်ႈဢၼ်တုၵ်းလႆႈဢုပ်ႉပိူင်ႇမဵဝ်းဢိသရေႇလ ၼၼ်ႉတၵ်းပေႃႇမႃးၵႃႈၼႂ်းမႂ်းပုၼ်ႈၵဝ်ဢေႃႈ။ၸဝ်ႈၼၼ်ႉပဵၼ်ၸဝ်ႈဢၼ်ပေႃႇမႃးၸႃႉၸဵမ်ၵၢပ်ႈၵမႃ်ႇႇမိူဝ်ႈမိုၼ်ႉၸိုၼ်ႉသိုၼ်းၼၼ်ႉ ဢေႃႈ။
၃ ဢိသရေလၼၼ်ႉတၵ်းလႆႈၶၢမ်ႇတၢင်းဢၼ်ၸုၼ်ႉပႅတ်ႈတေႃႇထိုင်ႁွတ်ႈ ၶိင်ႇမိူဝ်ႈဢၼ်မေႈယိင်းဢၼ်ၶၢမ်ႇဝူၺ်ႇတ ၼႃႇတၢင်းဢၼ်ၵိူတ်ႇလဵင်ႉလုၵ်ႈၼၼ်ႉတေႃႇပေႃးၵိူတ်ႇလဵင်ႉယဝ်ႉလႄႈ ပီႈမၼ်းၼွင်ႉမၼ်းဢၼ်ယင်းၵိုတ်းယင်းၵျၢၼ်ႇ ၸိူဝ်းၼၼ်ႉ တင်းလၢႆတေႃႇပေႃးၶိုၼ်းမႃးၸူး ၵႃႈတီႈမဵဝ်းဢိသရေႇလၼၼ်ႉဢေႃႈ။
၄ ၸဝ်ႈၼၼ်ႉတၵ်းၸုၵ်းယူႇလႄႈဢိင်တၢင်းၵတ်ႉတၢင်းၶၼ်ထႃႇဝရႃႉၽြႃး ဢိၵ်ႇတင်းတၼ်းၶူဝ်းဢႃႇၼူႉၽေႃႇၼႃႇမႃႉၸိုဝ်သဵင်ထႃႇဝရႃႉၽြႃး ၽြႃးပဵၼ်ၸဝ်ႈမၼ်းၼၼ်ႉသေယဝ်ႉ လဵင်ႉထိင်းၽုင်သူဝ်းမၼ်းတင်းလၢႆဢေႃႈ။ၶဝ်ၵေႃႈတၵ်းတႄႇယူႇဢေႃႈ။လွင်ႈမၼ်းၸမ်း၊ ၸဝ်ႈၼၼ်ႉတၵ်းဢုပ်ႉပိူင်ႇတေႃႇထိုင်ႁွတ်ႈ တီႈသုတ်းလိၼ်မိူင်းဢေႃႈ။
၅ ၸဝ်ႈၼၼ်ႉတၵ်းပဵၼ်လွင်ႈဢၼ်တၢင်းၽိတ်းယဵၼ်ဢေႃႈ။မိူဝ်ႈဢၼ်ၵူၼ်းဢႃႇသုရိမႃးၵႃႈတီႈမိူင်းႁဝ်းလႄႈ ယဵပ်ႇယမ်ႈၽုင်ႇပိၵ်ႉမၢၼ်ႇႁဝ်းၸိူဝ်းၼၼ်ႉၸိုင် ႁဝ်းတၵ်းႁႂ်ႈၵူၼ်းဢၼ်လဵင်ႉသူဝ်းထိင်းသူဝ်းၸဵတ်းပႃး ဢိၵ်ႇတင်းၵူၼ်းဢၼ်ပဵၼ်ငဝ်ႈပဵၼ်ႁူဝ်ပႅတ်ႈပႃး ပေႃႇဢွၵ်ႇမႃးယူႇၽၢႆႇၼိုင်ႈတင်းမၼ်းဢေႃႈ။
၆ ၶဝ်ၼၼ်ႉပႄႇၽဵဝ်ႈမိူင်းဢႃႇသုရိဢိၵ်ႇတင်းမိူင်းၼိမ်ႇရေႃႇတ ၵႃႈၼႂ်းႁူးၽၵ်းတူဝဵင်းၶဝ်ၼၼ်ႉပႅတ်ႈလူၺ်ႈလၢပ်ႇလူၺ်ႈလႅဝ်းလႄႈ ၸဝ်ႈၼၼ်ႉတၵ်းၵႄႇသႄႇဢဝ်ႁဝ်းလွတ်ႈသေၵႃႈၼႂ်းမိုဝ်းၵူၼ်း ဢႃႇသုရိ ၼႂ်းမိူဝ်ႈဢၼ်မၼ်းၶီႇသိုၵ်းမႃးၵႃႈၼႂ်းမိူင်းႁဝ်းလႄႈ ယဵပ်ႇယမ်ႈၵႃႈၼႂ်းၶွပ်ႇၼမ်ႉလႅၼ်လိၼ်ႁဝ်းၼၼ်ႉ ဢေႃႈ။
၇ ၵူၼ်းမဵဝ်းယႃႇၵုပ်ႉဢၼ်ၵိုတ်းဝႆႉၵျၢၼ်ႇဝႆႉၸိူဝ်းၼၼ်ႉ တၵ်းယူႇၵႃႈၼႂ်းၵၢင်ၵူၼ်းတၢင်ၸိူဝ်ႉတၢင်ႇမဵဝ်းၼမ်ၼႃႇလႄႈ ပဵၼ်ၸိူဝ်ႉၼင်ႇၼမ်ႉၼၢႆးဢၼ်ထႃႇဝရႃႉၽြႃးပၼ်ဢိၵ်ႇတင်း ၸိူဝ်ႉၼင်ႇႁႃႇၽူၼ်ဢၼ်ဢမ်ႇပႂ်ႉထႃႈၵူၼ်းဢမ်ႇၸွမ်းဢလူဝ်ၵူၼ်းသေလႄႈ တူၵ်းၵႃႈ ၼိူဝ်တူၼ်ႈယိူဝ်ႈတူၼ်ႈယႃႈၼၼ်ႉဢေႃႈ။
၈ ၵူၼ်းမဵဝ်းယႃႇၵုပ်ႉ ဢၼ်ၵိုတ်းဝႆႉၵျၢၼ်ႇဝႆႉၸိူဝ်းၼၼ်ႉ တၵ်းလႆႈယူႇၵႃႈၼႂ်း ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၵႃႈၼႂ်းၵၢင်မဵဝ်းၵူၼ်းၼမ်ၼႃႇလႄႈ ပဵၼ်ၸိူဝ်ႉၼင်ႇသၢင်ႇသီႈၵႃႈၼႂ်းတူဝ်ထိူၼ်ႇႁၢႆႉတင်းလၢႆ ဢိၵ်ႇတင်းသၢင်ႇသီႈၼုမ်ႇၵႃႈၼႂ်းၽုင်သူဝ်းၸိူဝ်းၼၼ်ႉဢေႃႈ။ပေႃးမၼ်းၶဝ်ႈမႃးၸိုင် မၼ်းၸၢင်ႊယဵပ်ႇသေလႄႈၶူပ်းၵိၼ်သိၵ်ႇယႃႉထၼ်ႈပေႃး ၽူႈ လႂ်ဢမ်ႇၵႄႇသႄႇၼုၵ်ႈဢဝ်လႆႈ ဢေႃႈ။
၉ မႂ်းတၵ်းဢဝ်မိုဝ်းမႂ်းယုၵ်ႉယွင်ႈယူႇၽၢႆႇၼိုင်ႈတင်း ၶဝ်ၸိူဝ်းဢၼ် ႁဵတ်းၶတ်းၵၼ်တင်းမႂ်းၼၼ်ႉလႄႈ ရၢၼ်ႇသူႇမႂ်းတင်းသဵင်ႈတင်းလူင် တၵ်းဢွၼ်ၵၼ်သုမ်းၸွမ်းဢေႃႈ။
၁၀ ထႃႇဝရႃႉၽြႃးမီးဢမိင်ႉၸမ်း၊ ၼႂ်းမိူဝ်ႉဝၼ်းၼၼ်ႉၵဝ်တၵ်းပႄႇၽဵဝ်ႈမႃႉမႂ်းတင်းလၢႆ ပႅတ်ႈသေၵႃႈၼႂ်းမႂ်းလႄႈယႃႉၽဵဝ်ႈလေႃႉရထႃးမႂ်းတင်းလၢႆပႅတ်ႈဢေႃႈ။
၁၁ ၵဝ်တၵ်းပႄႇၽဵဝ်ႈဝဵင်းၼႂ်းမိူင်းမႂ်းတင်းလၢႆပႅတ်ႈလႄႈ ၵိူၼ်ႇယႃႉ တိူၵ်ႈတီႈတိုၵ်းသိုၵ်းမႂ်းၵႃႈမီးပႅတ်ႈဢေႃႈ။
၁၂ ၵဝ်တၵ်းပႄႇၽဵဝ်ႈၶဝ်ၸိူဝ်းဢၼ်ႁဵတ်းၽိူဝ်ႉၼၼ်ႉ ပႅတ်ႈသေၵႃႈတီႈၼႂ်းမိုဝ်းမႂ်းလႄႈ မႂ်းတၵ်းဢမ်ႇလႆႈမီးၵေႃႉဢၼ်ႁေႃး လၢတ်ႈပေႇတၢင်ႇၼၼ်ႉသေၵေႃႉသေၵူၼ်း။
၁၃ ၵဝ်တၵ်းပႄႇၽဵဝ်ႈရုၵ်ႉထူႉသၢင်းထူႉမႂ်း ဢၼ်တွင်ႈႁဵတ်းၶႅၵ်းႁဵတ်းၸိူဝ်းၼၼ်ႉဢိၵ်ႇတင်း သဝ်တီႈၵူဝ်းၵႂၢႆႇမႂ်းတင်းလၢႆပႅတ်ႈသေၵႃႈၼႂ်းၵၢင်မႂ်းလႄႈ ၵမ်းလိုၼ်းမႂ်းဢမ်ႇလႆႈၵူဝ်းၵႂၢႆႇ လွင်ႈတၢင်းဢၼ်မႂ်းဢဝ်မိုဝ်းမႂ်းႁဵတ်းၼၼ်ႉ။
၁၄ တူၼ်ႈဢႃႇသရႃႉမႂ်းတင်းလၢႆၵေႃႈၵဝ်တၵ်းထွတ်ႇထူၺ်ႈဢွၵ်ႇသေၵႃႈၼႂ်းၵၢင်မႂ်းလႄႈယႃႉၽဵဝ်ႈဝဵင်းမႂ်းတင်းလၢႆပႅတ်ႈဢေႃႈ။
၁၅ ၵဝ်တၵ်းပႃးတၢင်းၶႆႈၸႃႉၶႆႈၸိတ်ႈဢိၵ်ႇတင်း ဢၢႆႁႅင်းတေႃးသႃႉတၢင်းၸႂ်မႆႈၶႆႈၸႃႉၵဝ်သေလႄႈ ၸီႇယၢင်ႇတၢမ်ႇဢပျႅတ်ႈတီႈၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ဢမ်ႇထွမ်ႇဢမ်ႇဢဝ်ၵႂၢမ်းၸိူဝ်းၼၼ်ႉဢေႃႈ။