၃
၁ တူၺ်းလူ။ၵဝ်တၵ်းပွႆႇၸႂ်ႉတမၢၼ်ႇၵဝ်ဢၼ်တၵ်းမႄးသဵၼ်ႈတၢင်းဢၼ်ၵဝ်ၵႂႃႇၼၼ်ႉၵႃႈတီႈၽၢႆႇၼႃႈၵဝ်ဢေႃႈ။ၸဝ်ႈဢၼ်သူႁႃၼၼ်ႉတၵ်းၽုတ်းၽၢတ်းႁွတ်ႈမႃးၵႃႈတီႈပိၵ်ႉမၢၼ်ႇၸဝ်ႈၵမ်းလဵဝ်ဢေႃႈ။တမၢၼ်ႇပတိၺိၼ်ႇၸဝ်ႈ ဢၼ်သူထုၵ်ႇၸႂ်ၵျိူၵ်ႈၸႂ်ၼၼ်ႉတူၺ်းလူ။ၸဝ်ႈၼၼ်ႉတၵ်းႁွတ်ႈမႃးဢေႃႈ၊ဝႃႈၼင်ႇၼႆၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉ ဢေႃႈ။
၂ ၽူႈ လႂ်တၵ်းၵိုတ်းၶၢမ်ႇမိူဝ်ႉဝၼ်းဢၼ်မၼ်းၸဝ်ႈႁွတ်ႈမႃးၼၼ်ႉလႆႈ။ၽူႈ လႂ်တၵ်းၸုၵ်းၶၢမ်ႇၼႂ်းမိူဝ်ႈဢၼ်မၼ်းၸဝ်ႈပေႃႇမႃးၼၼ်ႉလႆႈ။ၸဝ်ႈၼၼ်ႉတၵ်းပဵၼ်မိူၼ်ၸိူဝ်ႉၼင်ႇၽႆးၵေႃႉဢၼ်ၶႃႈငိုၼ်း၊ သပ်ႉပျႃႇ ဢၼ်ၵူၼ်းသၵ်ႉၶူဝ်းသုင်းသွင်ႇၼၼ်ႉဢေႃႈ။
၃ မၼ်းၸဝ်ႈတၵ်းၼင်ႈယူႇမိူၼ်ၸိူဝ်ႉၼင်ႇ ၵေႃႉဢၼ်ၶႃႈငိုၼ်းလႄႈႁႂ်ႈမူတ်းသႂ်ၼၼ်ႉသေလႄႈ ၶႃႈၵူၼ်းမဵဝ်းလေႇဝိတင်းလၢႆ မိူၼ်ၸိူဝ်ႉၼင်ႇဢၼ်ၶႃႈငိုၼ်းၶႃႈၶမ်းလႄႈ ႁႂ်ႈမူတ်းသႂ်ၼၼ်ႉလႄႈ ၶဝ်ၼၼ်ႉတၵ်းပုၵ်ႉၸေႃႇၶိူင်ႈပုၵ်ႉၸေႃႇ ၸွမ်းလူၺ်ႈတၢင်းဢၼ်သိုဝ်ႈတေႃႇၼၼ်ႉတီႈ ထႃႇဝရႃႉၽြႃးဢေႃႈ။
၄ မိူဝ်ႈၼၼ်ႉၶိူင်ႈပုၵ်ႉၸေႃႇမဵဝ်းယုတတင်းဝဵင်းယေႇရုသလႅမ်ႇ ၸိူဝ်းၼၼ်ႉ တၵ်းပဵၼ်တီႈဢၼ် လီထုၵ်ႇၸႂ်ၵျိူၵ်ႈၸႂ်ထႃႇဝရႃႉၽြႃး မိူၼ်ၸိူဝ်ႉၼင်ႇဢၼ် ပဵၼ်ၼႂ်းၶိင်ႇမိူဝ်ႈၵွၼ်ႇဢွၼ်ၼႆႉၼၼ်ႉၶူပ်ႇ ပီႊမိူဝ်ႈမိုၼ်ႉၸိုၼ်ႉသိုၼ်းၼၼ်ႉဢေႃႈ။
၅ ၵဝ်တၵ်းသုတ်ႉၸပ်းသုတ်ႉၸူး ႁႂ်ႈလႆႈၸႅတ်ႈထၢမ်ႇၸီႇယၢင်ႇသူဢေႃႈ။ၵဝ်တၵ်းပဵၼ်သၢၵ်ႈသေႇ ဢၼ်ၶၼ်ဢၼ်ၽႂ်းယူႇၽၢႆႇၼိုင်ႈတင်း ၵေႃႉဢၼ်ၸၢင်ႊၸေႃႉၸၢင်ႊႁဵတ်း ၵေႃႉဢၼ်ၽိတ်းပိူင်ႈမေးပိူၼ်ႈ ၵေႃႉဢၼ်ႁဵတ်းတၢင်းဢၼ်ၵိၼ်ႇဝႃႈဢၼ်ဢမ်ႇၸိုဝ်ႈဢမ်ႇၸႂ်ႈ၊ ၵေႃႉဢၼ်ယင်းဢမ်ႇပၼ်ၵႃႈၸၢင်ႈၶၼ်ငႃၵူၼ်း ဢၼ်ၵိၼ်ၸၢင်ႈၵိၼ်ငႃးၼၼ်ႉလႄႈၼိၵ်ႈၸၢၵ်ႈငႅၼ်းသေး၊ ၵေႃႉဢၼ်ၼိၵ်ႈၸၢၵ်ႈငႅၼ်းသေးမေႈမုၵ်ႉမေႈမၢႆႈ ဢိၵ်ႇတင်းလုၵ်ႈဢွၼ်ႇဢၼ်ၽၢၼ်ပေႃႈၽၢၼ်မေႈ၊ၵေႃႉဢၼ်ၸီႇယၢင်ႇဢမ်ႇၸွမ်းၼင်ႇတြႃးတီႈၶႅၵ်ႇဢႃႇၵၼ်ႇတူႉ၊ ၵေႃႉဢၼ်ဢမ်ႇၵူဝ်ဢမ်ႇႁႄၵဝ်ၸိူဝ်းၼၼ်ႉဢေႃႈ၊ ဝႃႈၼင်ႇၼႆၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉဢေႃႈ။
ဢမ်ႇလူႇသိပ်းပုၼ်ႊပုၼ်ႊၼိုင်ႈလႄႈယႃႉပတိၺိၼ်ႇ
၆ ၵဝ်ၼႆႉပဵၼ်ထႃႇဝရႃႉၽြႃးလႄႈ ဢမ်ႇမီးတၢင်းဢၼ်ၶၢႆႉဢၼ်ပုတ်ႈ။ပိူဝ်ႈၼႆလႄႈၵူၼ်းမဵဝ်းယႃႇၵုပ်ႉတင်းလၢႆၶဝ်ဢိူၺ်း။သူဢမ်ႇႁွတ်ႈထိုင်တၢင်းဢၼ်သုမ်းဢၼ် ၸွမ်းလႆႈ။
၇ ဢဝ်ၵႃႈတီႈၸႃႉၸဵမ်ၸူဝ်ႈပၢၼ်ပူႇသူမွၼ်ႇသူၼၼ်ႉလႄႈ သူဢွၼ်ၵၼ်ပႄႇပႅတ်ႈထုင်းၾိင်ႈတြႃးဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉလႄႈ ဢမ်ႇပႂ်ႉၵမ်ပႂ်ႉၸွမ်းဢွၼ်ၵၼ်ၶိုၼ်းမႃးၸူးတီႈၵဝ်တႃႉ။ၵဝ်ၵေႃႈတၵ်းၶိုၼ်းမႃးၸူးတီႈသူဢေႃႈ၊ ဝႃႈၼင်ႇၼႆၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉဢေႃႈ။
၈ ၵူၺ်းၵႃႈသူဢွၼ်ၵၼ်ထၢမ်လႄႈဝႃႈ၊-ၶႃႈၸဝ်ႈႁဝ်းၶဝ်တၵ်းလႆႈႁဵတ်းၸိူဝ်ႉၼင်ႇႁိုဝ်ၶိုၼ်းမႃးၸူးတီႈၶႃႈဝႃႈၼင်ႇၼႆလူင်ပေႇ။ၵူၼ်းၸိုင် တၵ်းလႆႈႁိမ်ႁူင်ႇဢဝ်ဢုၵ်ႉၸႃႇၽြႃးပဵၼ်ၸဝ်ႈႁိုဝ်။ၵူၺ်းၵႃႈသူဢွၼ်ၵၼ်ႁိမ်ႁူင်ႇဢဝ်ဢုၵ်ႉၸႃႇၵဝ်ယဝ်ႉ။ၼႂ်းဝႃႈၼၼ်သေၵေႃႈသူဢွၼ်ၵၼ်ထၢမ်လႄႈဝႃႈ၊-ၶႃႈၸဝ်ႈႁဝ်းၶဝ်ႁဵတ်းၸိူဝ်ႉၼင်ႇႁိုဝ်ႁိမ်ႁူင်ႇဢဝ်တီႈၶႃႈ၊ဝႃႈၼင်ႇၼႆဢေႃႈ။သူဢွၼ်ၵၼ်ႁိမ်ႁူင်ႇဢဝ်သိပ်းပုၼ်ႈပုၼ်ႈၼိုင်ႈၸိူဝ်းၼၼ်ႉ ဢိၵ်ႇတင်းၶိူင်ႈ ပုၵ်ႉၸေႃႇၸိူဝ်းၼၼ်ႉယဝ်ႉ။
၉ သူလႆႈၶၢမ်ႇဢႃႉမင်ႇၵလႃႇတၢင်းဢၼ်ၵိၼ်ႇဢၼ်ဝႃႈယဝ်ႉ။လွင်ႈမၼ်းၸမ်းသူၵႃႈပဵၼ်ၵူၼ်းဝၢၼ်ႈၵူၼ်းမိူင်းၼႆႉ ဢွၼ်ၵၼ်ႁိမ်ႁူင်ႇဢဝ်ဢုၵ်ႉၸႃႇၵဝ်ယဝ်ႉ။
၁၀ ဢွၼ်ၵၼ်ဢဝ်သိပ်းပုၼ်ႈပုၼ်ႈၼိုင်ႈၵႃႈမီးၼၼ်ႉသႂၢင်းၶဝ်ႈၵႃႈၼႂ်းတိူၵ်ႈၽၼ်ႇတႃႇႁႂ်ႈတၢင်းၵိၼ်တၢင်းၶူပ်းလႆႈမီးၵႃႈၼႂ်းႁိူၼ်းၵဝ်တႃႉ။ဢွၼ်ၵၼ်ၸၢမ်းတူၺ်း ၸိူဝ်ႉၼင်ႇၼၼ်ႁႂ်ႈလႆႈႁူႉလွင်ႈဢၼ်ၵဝ်တၵ်းၽုၺ်ႇႁူးလၢင်းတဵၼ် ၾႃႉၵၢင်ႁၢဝ်တင်းလၢႆသေလႄႈ ဢဝ်တၢင်းလီမင်ႇၵလႃႇသွၼ်းလေႃႇထၼ်ႈပေႃးလူၼ်ႉပေႃးလိူဝ်ႁိုဝ်၊တၵ်းဢမ်ႇၽုၺ်ႇႁိုဝ်ၼၼ်ႉတႃႉ၊ ဝႃႈၼင်ႇၼႆၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉ ၽြႃးမီးဢမိင်ႉဢေႃႈ။
၁၁ ၵဝ်တၵ်းသင်ႇသွၼ်သုင်းမႃႉတူဝ်ဢၼ်ၸၢင်ႊၶူပ်းၵိၼ်ၼၼ်ႉပုၼ်ႈသူလႄႈ မၼ်းၼၼ်ႉဢမ်ႇလႆႈယႃႉမၢၵ်ႇလိၼ်ႁူင်းလိၼ်သူပႅတ်ႈ။တိၼ်မၢၵ်ႇတူၼ်ႈၶိူဝ်းမၢၵ်ႇၸပိတ်ႈသူၼၼ်ႉတၵ်းဢမ်ႇလူၼ်ႉတူၵ်းႁူင်ႈတူၵ်းၵႃႈၼႂ်းသူၼ်ဢူးယဵၼ်ႇၸပိတ်ႈသူၸူဝ်ႈဢၼ်မၼ်းဢမ်ႇပႆႇၵႄႇပႆႇသုၵ်းၼၼ်ႉ၊ ဝႃႈၼင်ႇၼႆၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉဢေႃႈ။
၁၂ ၵူၼ်းၵူႈၸိူဝ်ႉၵူႈမဵဝ်း တၵ်းဢွၼ်ၵၼ်ႁွင်ႉႁိၵ်ႈသူၵေႃႉဢၼ်မီးမင်ႇၵလႃႇလႄႈ မိူင်းသူၵေႃႈတၵ်းပဵၼ်မိူင်းဢၼ်လီထုၵ်ႇၸႂ်ၵျိူၵ်ႈၸႂ်ဢေႃႈ၊ ဝႃႈၼင်ႇၼႆၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉဢေႃႈ။
ဢိသရေႇလလၢတ်ႈပူၼ်ႉလၢတ်ႈလိူဝ်ၽြႃး
၁၃ သူဢွၼ်ၵၼ် လၢတ်ႈၵႂၢမ်းႁတ်းႁတ်းႁၢၼ်ႁၢၼ်ၼႃႇလူင်လၢင်ယူႇၽၢႆႇၼိုင်ႈတင်းၵဝ်ယဝ်ႉ၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။ၵူၺ်းၵႃႈသူထၢမ်လႄႈဝႃႈ၊- ၶႃႈၸဝ်ႈႁဝ်းၶဝ်ဢွၼ်ၵၼ်လၢတ်ႈမႅၼ်ႈၸိူဝ်ႉၼင်ႇႁိုဝ်ယူႇ ၽၢႆႇၼိုင်ႈတင်းၸဝ်ႈႁဝ်းတီႈၶႃႈ၊ ဝႃႈ ၼင်ႇၼႆလူင်ပေႇ။
၁၄ သူဢွၼ်ၵၼ်လၢတ်ႈလႄႈဝႃႈ၊-တၢင်းဢၼ်ၵိုတ်ႈႁၢပ်ႇပွင်ႁဵတ်း ဢမူႉထႃႇဝရႃႉၽြႃးၼၼ်ႉဢမ်ႇမီးဢၵျူဝ်း။ၵွပ်ႈပိူဝ်ႈဢၼ်ႁဝ်းပႂ်ႉၵၼ်ပႂ်ႉၸွမ်းလွင်ႈတၢင်းဢၼ်မၼ်းၸဝ်ႈ ၸီႇယၢင်ႇႁဵတ်းထုင်းဝႆႉၼၼ်ႉသေလႄႈ ၵႂႃႇမႃးတမ်ႇၼွႆႉမွင်ၸႂ်ယူႇၵႃႈတီႈၽၢႆႇၼႃႈၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးၼၼ်ႉလႄႈ မီးၵျေးၸူးၵႃႈသင်။
၁၅ မိူဝ်ႈလဵဝ်ၼႆႉႁဝ်းဢွၼ်ၵၼ်ႁွင်ႉႁိၵ်ႈၵေႃႉဢၼ်မႃႇၼႃႉပူၵ်းပႅၼ်ၼၼ်ႉဝႃႈ ၵေႃႉဢၼ်မီးမင်ႇၵလႃႇ၊ ၶဝ်ၸိူဝ်းဢၼ်ႁဵတ်းတူႉၸရိူၵ်ႈၼၼ်ႉဝႃႈၸၢင်ႊႁဵတ်းလႆႈပဵၼ်လႆႈဢမၢၼ်ႇၶၢၼ်ပဵၼ်ဢေႃႈ။ပိၵ်ႉသမ်ႉၶဝ်ႁဵတ်းတၢင်းဢၼ်ၸၢမ်းတူၺ်း ၽြႃးပဵၼ်ၸဝ်ႈယူသေၵေႃႈၶဝ်ၸၢင်ႊလႆႈၵတ်းယဵၼ်ၶျၢမ်းသႃႇယူႇ ဢမၢၼ်ႇၶၢၼ်ပဵၼ်ဢေႃႈ၊ဝႃႈၼင်ႇၼႆယဝ်ႉ။
ဢၼ်ၵိုတ်းဢၼ်ၵျၼ်ႇဢၼ်မီးသႅတ်ႉၸႃႇ
၁၆ မိူဝ်ႈၼၼ်ႉ ၶဝ်ၸိူဝ်းဢၼ်ၵူဝ်ႁႄထႃႇဝရႃႉၽြႃးၼၼ်ႉၵေႃႉၼိုင်ႈလႄႈၵေႃႉၼိုင်ႈ လၢတ်ႈၵၼ်ၸႃၵၼ်ဢေႃႈ။ထႃႇဝရႃႉၽြႃးထွမ်ႇငိၼ်းဢေႃႈ။လိၵ်ႈဢၼ်မၢတ်ႈဝႆႉတွင်းဝႆႉၼၼ်ႉ မီးတၢင်းဢၼ်တႅမ်ႈမၢႆဝႆႉယူႇၵႃႈတီႈၽၢႆႇၼႃႈမၼ်းၸဝ်ႈ ပုၼ်ႈၶဝ်ၸိူဝ်းဢၼ်ၵူဝ်ႁႄထႃႇဝရႃႉၽြႃးလႄႈ ၶုၵ်းၸႂ်လႆႈၶႆႈၸႂ်ထူပ်း ၼႃႇမႃႉၸိုဝ်သဵင် မၼ်းၸဝ်ႈၼၼ်ႉဢေႃႈ။
၁၇ ၶဝ်ၼၼ်ႉတၵ်းပဵၼ်ဢုၵ်ႉၸႃႇၵဝ်ၼႂ်းမိူဝ်ႉဝၼ်း ဢၼ်ၵဝ်ၸီႇယၢင်ႇၽၼ်ႇတႃႇဢၼ်ၵဝ်ထိူၵ်ႈပိူင်ႇၼၼ်ႉဝႆႉၼၼ်ႉဢေႃႈ။ၵဝ်တၵ်းသေလၢႆၶဝ်ၼၼ်ႉမိူၼ်ၸိူဝ်ႉၼင်ႇဢၼ် ပေႃႈသေလၢႆလုၵ်ႈၸၢႆးဢၼ်ႁဵတ်းပွင်ဢမူႉပေႃႈယူႇၼၼ်ႉဢေႃႈ၊ ဝႃႈၼင်ႇၼႆၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉဢေႃႈ။
၁၈ မိူဝ်ႈၼၼ်ႉသူတၵ်းသမ်ႉဢွၼ်ၵၼ်ၸၵ်းၽႄလႄႈ ႁူႉၵေႃႉဢၼ်သိုဝ်ႈတေႃႇ၊ ၵေႃႉဢၼ်ဢမ်ႇသိုဝ်ႈတေႃႇ၊ ၵေႃႉဢၼ်ပွင်ႁဵတ်းဢမူႉၽြႃးပဵၼ်ၸဝ်ႈ ၵေႃႉဢၼ်ဢမ်ႇပွင်ႁဵတ်းၼၼ်ႉဢေႃႈ။