၅
တၢင်းၼွၼ်းၽၼ်ဢၼ်ယၢပ်ႇၸႂ်
၁ ၼွင်ႉယိင်းၵဝ်ၸဝ်ႈဢိူၺ်း။မေးဢၼ်ၵဝ်ၸဝ်ႈမၢႆဝႆႉဢိူၺ်း။ၵဝ်ၸဝ်ႈၶဝ်ႈၵႃႈၼႂ်းသူၼ်ဢူးယဵၼ်ၵဝ်ၸဝ်ႈယဝ်ႉ။ၵဝ်ၸဝ်ႈသိမ်းဢဝ်မဵဝ်းမုရၢၼ်ႇၵဝ်ၸဝ်ႈဢိၵ်ႇတင်းမဵဝ်းၼၢမ်ႇသႃႇၵဝ်ၸဝ်ႈယဝ်ႉ။ၵဝ်ၸဝ်ႈလႆႈၵိၼ်ႁူဝ်ၼမ်ႉႁူင်းၽိုင်ႈၵဝ်ၸဝ်ႈ လူၺ်ႈၵၼ်တင်းၼမ်ႉၽိုင်ႈၵဝ်ၸဝ်ႈယဝ်ႉ။ၵဝ်ၸဝ်ႈလႆႈသူတ်ႉလႆႈၵိၼ်ၼမ်ႉၸပိတ်ႉ ၵဝ်ၸဝ်ႈလူၺ်ႈၵၼ်တင်းၼမ်ႉၼူမ်းၵဝ်ၸဝ်ႈယဝ်ႉ။ၵေႃႉသေႈၵဝ်တင်းလၢႆၶဝ်ဢိူၺ်း။ဢွၼ်ၵၼ်ၵိၼ်တႃႉ။ၵေႃႉဢၼ်ႁူမ်ႈပွင်း ၵၼ်တင်းၵဝ်ၶဝ်ဢိူၺ်း။ဢွၼ်ၵၼ်သူတ်ႉၵိၼ်တႃႉ။ဢွၼ်ၵၼ်သူတ်ႉၵိၼ်ဢိမ်ႇဢိမ်ႇတဵမ်တဵမ်တႃႉ။
၂ ပိၵ်ႉသမ်ႉ ၵဝ်ၼွၼ်းလပ်းယူႇသေၵေႃႈႁူဝ်ၸႂ်ၵဝ်တိုၼ်ႇယူႇဢေႃႈ။ပဵၼ်သဵင်ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉတွႆႇယူႇသေလႄႈဝႃႈ၊-ၼွင်ႉယိင်းၵဝ်ၸဝ်ႈဢိူၺ်း၊ၼၢင်းဢၼ်ၵဝ်ၸဝ်ႈႁၵ်ႉၼႃႇဢိူၺ်း။ၼူၵ်ႉတူႈၵဝ်ၸဝ်ႈဢိူၺ်း။ၵေႃႉဢၼ်ၸေးၸုမ်ႇၵဝ်ၸဝ်ႈဢိူၺ်း။ၽုၺ်ႇပၼ်တီႈၵဝ်ၸဝ်ႈသေၵမ်း။ၵွၵ်းႁူဝ်ၵဝ်ၸဝ်ႈၼႆႉယမ်းၼမ်ႉၼၢႆးလႄႈ ၶူၼ်ႁူဝ်ၵဝ်ၸဝ်ႈၼႆႉယမ်းမဵတ်ႉၼမ်ႉၼၢႆး ဢၼ်ၸၢင်ႊယွတ်ႇတူၵ်းၶိင်ႇၵၢင်ၶိုၼ်းၼၼ်ႉယဝ်ႉ၊ ဝႃႈၼင်ႇ ၼႆယူႇဢေႃႈ။
၃ ၶႃႈၼၢင်းၸဝ်ႈၶုၼ်လူင်ထွတ်ႇသိူဝ်ႈတေႃသိူဝ်ႈပုတ်းယဝ်ႉတီႈၶႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈတၵ်းၶိုၼ်းလႆႈၼုင်ႈတီးၶႃႈ။တိၼ်ၶႃႈၼၢင်းၸဝ်ႈၶုၼ်လူင်ၵေႃႈသုၵ်ႉယဝ်ႉတီႈၶႃႈယဝ်ႉ။ၵွပ်ႈပိူဝ်ႈၸိူဝ်ႉၼင်ႇႁိုဝ်ႇလႄႈ တၵ်းလႆႈႁႂ်ႈသမ်ႉၶိုၼ်းၵူဝ်ႈၵိူၵ်ႇတီႈၶႃႈ။
၄ ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉ ဢဝ်မိုဝ်းမၼ်းၸဝ်ႈၸူၵ်းၶဝ်ႈၵႃႈၼႂ်းႁူးၽၵ်းတူလႄႈ ၵဝ်မီးၸႂ်ဢၼ်ႁၵ်ႉပႅင်းမၼ်းၸဝ်ႈၼႃႇလူင်လၢင်သေလႄႈ
၅ ၵဝ်လုၵ်ႉႁႂ်ႈလႆႈၽုၺ်ႇၽၵ်းတူ ပၼ်တီႈၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉလႄႈ ၼမ်ႉမၼ်းမုရၢၼ်ႇတူၵ်းသေၵႃႈတီႈမိုဝ်းၵဝ်၊ၼမ်ႉမၼ်းမုရၼ်ႇ ၸႅတ်ႈၸႅတ်ႈတူၵ်းသေၵႃႈတီႈၼိဝ်ႉမိုဝ်းၵဝ်တင်းလၢႆ သႂ်ႇၵႃႈၼိူဝ်သဝ်ၵိူၼ်ႇၽၵ်းတူယူႇ ၸိၵ်ႉၸိၵ်ႉဢေႃႈ။
၆ မိူဝ်ႈဢၼ်ၵဝ်ၽုၺ်ႇပၼ်တီႈဢၼ်ၵဝ်ႁၵ်ႉပႅင်းၼႃႇၼၼ်ႉၸိုင်ၸဝ်ႈဢၼ်ၵဝ်ႁၵ်ႉပႅင်းၼႃႇၼၼ်ႉသမ်ႉဝၢႆႇၶိုၼ်းလႄႈဢွၵ်ႇၵႂႃႇယဝ်ႉယဝ်ႉ။ႁူဝ်ၸႂ်ၵဝ်ဢူၼ်ႈၵႂႃႇၵွပ်ႈပိူဝ်ႈၵႂၢမ်းမၼ်းၸဝ်ႈလႄႈ ၵဝ်ႁႃမၼ်း ၸဝ်ႈသေၵေႃႈဢမ်ႇထူပ်း။
၇ ၵဝ်ႁွင်ႉသေၵေႃႈမၼ်းၸဝ်ႈဢမ်ႇဢိူဝ်။ၶဝ်ၸိူဝ်းဢၼ်ပႂ်ႉၵၢင်ဢၼ်လႄႇၵႃႈၼႂ်းဝဵင်းၼၼ်ႉထူပ်းၵဝ်သေယဝ်ႉ ဢွၼ်ၵၼ်ပေႃႉယႅၼ်ႉၵဝ်ႁႂ်ႈၵဝ်ၸဵပ်းသႅပ်ႇၼႃႇလူင်လၢင်လႄႈ ၶဝ်ၸိူဝ်းဢၼ်ပႂ်ႉလမ်းဝဵင်းၼၼ်ႉ ဢွၼ်ၵၼ်ႁိမ်ဢဝ်ၽႃႈႁူမ်ႇၼႃႈၵဝ်ဢေႃႈ။
၈ လုၵ်ႈယိင်းဝဵင်းယေႇရုသလႅမ်ႇၶဝ်ဢိူၺ်း။ၵဝ်တိူင်ႇဝႃႈၵိၼ်ႇဝႃႈတီႈသူပေႃးသူထူပ်းႁၼ်ၸဝ်ႈ ဢၼ်ၵဝ်ႁၵ်ႉပႅင်းၼႃႇၼၼ်ႉၸိုင် သူတၵ်းလႆႈဢွၼ်ၵၼ်မွၵ်ႇလၢတ်ႈလွင်ႈ ဢၼ်ၵဝ်မီးတၢင်းဢၼ်ၸႂ်ၸဵပ်းၸႂ်ၶိုၼ်ႈလူၺ်ႈတၢင်းႁၵ်ႉမႅတ်ႈတႃႇၼၼ်ႉတီႈမၼ်းၸဝ်ႈဢေႃႈ။
၉ မေႈယိင်း ဢၼ်ႁၢင်ႊလီလိူဝ်တွၼ်းၼႃႇသမေေႈယိင်းတင်းလၢႆၼႆႉဢိူၺ်း။ၸဝ်ႈဢၼ်မႂ်းႁၵ်ႉပႅင်းၼႃႇၼၼ်ႉယိင်ႈၶႅၼ်းလိူဝ်တွၼ်းၼႃႇသေ ၸဝ်ႈဢၼ်ပိူၼ်ႈတၢင်ႇၵေႃႉႁၵ်ႉပႅင်းၼႃႇၼၼ်ႉၸိူဝ်ႉၼင်ႇႁိုဝ်။လွင်ႈၼင်ႇႁိုဝ်တၵ်းလႆႈတိူင်ႇဝႃႈၵိၼ်ႇဝႃႈတီႈႁဝ်း ၸိူဝ်ႉၼင်ႇၼၼ်ၸိုင်ၸဝ်ႈဢၼ်မႂ်းႁၵ်ႉပႅင်းၼႃႇၼၼ်ႉ ယိင်ႈၶႅၼ်းလိူဝ်တွၼ်းၼႃႇသေ ၸဝ်ႈဢၼ်ပိူၼ်ႈတၢင်ႇၵေႃႉႁၵ်ႉပႅင်းၼႃႇၼၼ်ႉၸိူဝ်ႉၼင်ႇႁိုဝ်။
၁၀ ၸဝ်ႈဢၼ်ႁၵ်ႉပႅင်းၼႃႇၼၼ်ႉတဵမ်ဝႆႉတင်းႁၢင်ႊၽၢင်ဢၼ်ၶၢဝ်၊ ႁၢင်ႊၽၢင်ဢၼ်လႅင်ႊလႄႈ ပဵၼ်ဢၼ်ထွတ်ႈဢၼ်မျၢတ်ႈ ပဵၼ်ၸိၵ်းပဵၼ်ၸွမ်ၵႃႈၼႂ်းၵူၼ်း မိူင်းၼိုင်ႈဢေႃႈ။
၁၁ ၵွၵ်းႁူဝ်မၼ်းၸဝ်ႈၼၼ်ႉမိူၼ်ၸိူဝ်ႉၼင်ႇၶမ်းလွတ်ႈငၢၼ်ႇဢေႃႈ။ၶူၼ်ႁူဝ်မၼ်းၸဝ်ႈၼၼ်ႉၼႃတၼ်လႄႈ လမ်မိူၼ်ၸိူဝ်ႉၼင်ႇႁၢင်ႊၽၢင်ၵႃလူင်ၼၼ်ႉ ဢေႃႈ။
၁၂ မၢၵ်ႇတႃမၼ်းၸဝ်ႈၼၼ်ႉမိူၼ်ၸိူဝ်ႉၼင်ႇၼူၵ်ႉတူႈ ၵႃႈတီႈႁိမ်းၼမ်ႉႁွင်ႊၼမ်ႉၵေး ဢၼ်ဢၢပ်ႇၼမ်ႉၼူမ်းသေလႄႈ မူပ်ႇယူႇသူတ်ႇသူတ်ႇၵွင်ႇၵွင်ႇၵႃႈတီႈ ႁိမ်းၼမ်ႉႁွင်ႊၼမ်ႉၵႄးဢၼ်တဵမ်ဝႆႉၼၼ်ႉဢေႃႈ။
၁၃ ၵႅမ်ႈမၼ်းၸဝ်ႈၼၼ်ႉပဵၼ်ၸိူဝ်ႉၼင်ႇပႃႇၼၢမ်ႇသႃႇ ပႃႇမွၵ်ႇဢၼ်ႁွမ်ဢၼ်ႁူၺ်းၼၼ်ႉလႄႈ သီႇသူပ်းမၼ်းၸဝ်ႈၼၼ်ႉ ပဵၼ်ၸိူဝ်ႉၼင်ႇမွၵ်ႇႁဵဝ်းငိုၼ်းဢၼ်ယွတ်ႇႁူဝ်ႈ ၼမ်ႉမၼ်းမုရၢၼ်ႇၸႅတ်ႈၸႅတ်ႈယူႇၼၼ်ႉဢေႃႈ။
၁၄ မိုဝ်းမၼ်းၸဝ်ႈၼၼ်ႉ ပဵၼ်ၸိူဝ်ႉၼင်ႇလၢၵ်ႈၸွပ်ႇၶမ်းဢၼ်ၵႂၢင်းသႂ်သႅင်ၶရုသုလိတ်ႉၼၼ်ႉလႄႈ တွင်ႉမၼ်းၸဝ်ႈပဵၼ်ၸိူဝ်ႉၼင်ႇငႃးၸၢင်ႉ ဢၼ်ၶၢဝ်ဢၼ်လီႁၢင်ႈၶိူင်ႈသႂ်ႇ သႅင်ၼီႇလႃႇၼၼ်ႉဢေႃႈ။
၁၅ တိၼ်မၼ်းၸဝ်ႈၼၼ်ႉမိူၼ်ၸိူဝ်ႉၼင်ႇသဝ်ႁိၼ်ၽိူၵ်ႇႁိၼ်ၶၢဝ် ဢၼ်တၢင်ႇသႂ်ႇဝႆႉၵႃႈၼိူဝ်တီႈၶၢမ်ႇတိၼ်သဝ်ၶမ်းလွတ်ႈငၢၼ်ႇ ၼၼ်ႉလႄႈၼႃႈမၼ်းၸဝ်ႈၼၼ်ႉ ပဵၼ်ၸိူဝ်ႉၼင်ႇလွႆလေႇပၼုၼ်ႇလႄႈမျၢတ်ႈလီ ၸိူဝ်ႉၼင်ႇတူၼ်ႈဢႃႇရိတ်ႉၸိူဝ်းၼၼ်ႉဢေႃႈ။
၁၆ သူပ်းမၼ်းၸဝ်ႈၼၼ်ႉဝၢၼ်ၼႃႇလူင်လၢင်လႄႈ မၼ်းၸဝ်ႈတဵမ်ဝႆႉတင်းမူၼ်ႈၵုင်ႇၵႃႈဢၼ်လီႁၵ်ႉလီပႅင်းၼႃႇလူင်လၢင်ၼၼ်ႉဢေႃႈ။လုၵ်ႈယိင်းဝဵင်းယေႇရုသလႅမ်ႇၶဝ်ဢိူၺ်း။ၵေႃႉဢၼ်ဝႃႈၼႆႉၸမ်းပဵၼ်ၸဝ်ႈဢၼ်ၵဝ်ႁၵ်ႉပႅင်းၼႃႇ၊ပဵၼ်ၵေႃႉပဵၼ်သေႈၵဝ်ဢေႃႈ။