၄
၁ မႂ်းၼၢင်းၼႆႉႁၢင်ႊလီဢေႃႈ။ၼၢင်းဢၼ်ၵဝ်ၸဝ်ႈႁၵ်ႉၼႃႇၼႆႉဢိူၺ်း။မႂ်းၼၢင်းႁၢင်ႊလီၼႃႇလူင်လၢင်ဢေႃႈ။မႂ်းၼၢင်း တဵမ်ဝႆႉတင်းမၢၵ်ႇတႃၼူၵ်ႉတူႈယူႇၵႃႈတီႈၽၢႆႇပုၼ်ႉၽႃႈႁူမ်ႇၼႃႈၼၼ်ႉလႄႈ ၶူၼ်ႁူဝ်မႂ်းၼၢင်းၵေႃႈမိူၼ်ၸိူဝ်ႉၼင်ႇၽုင်ပႄႉဢၼ်ၼွၼ်းယူႇ ၵႃႈၼိူဝ်ပဵမ်ႉ လွႆၵိလတ်ႉၼၼ်ႉဢေႃႈ။
၂ ၶဵဝ်ႈမႂ်းၼၢင်းၸိူဝ်းၼၼ်ႉၵေႃႈပဵၼ်ၸိူဝ်ႉၼင်ႇၽုင်သူဝ်း ဢၼ်ၵႅတ်းႁႆးၶူၼ်ယဝ်ႉလႄႈလုၵ်ႉသေၵႃႈတီႈဢၼ်ဢၢပ်ႇၼမ်ႉၼၼ်ႉ ၶိုၼ်းမႃးၼၼ်ႉလႄႈ ယင်းဢမ်ႇလုတ်ႈဢမ်ႇယွမ်းသေတူဝ်လႄႈၸၢင်ႊၵိူတ်ႇလဵင်ႉ လုၵ်ႈဢၼ်ၽႃၽႄၵူၺ်းၵူၺ်းမႃးၼၼ်ႉ ဢေႃႈ။
၃ သီႇသူပ်းမၼ်းၼၢင်းၵေႃႈမိူၼ်ၸိူဝ်ႉၼင်ႇၸိူၵ်ႈသၢႆဢၼ်လႅင်ႊၸွင်းႁွင်းဝႆႉၼၼ်ႉလႄႈသဵင်ၵႂၢမ်းမႂ်းၼၢင်းပဵၼ်ဢၼ်သႃႇယႃႇဝၢၼ်ႁူဢေႃႈ။ၵႅမ်ႈမႂ်းၼၢင်းဢၼ်မီးယူႇ ၵႃႈတီႈၽၢႆႇပုၼ်ႉၽႃႈႁူမ်ႇၼႃႈၼၼ်ႉၵေႃႈ မိူၼ်ၸိူဝ်ႉၼင်ႇၶႅပ်းမၢၵ်ႇၸင်ႈဝႆႉဢေႃႈ။
၄ ၶေႃးမႂ်းၼၢင်းၵေႃႈ မိူၼ်ၸိူဝ်ႉၼင်ႇတိူၵ်ႈတီႈတိုၵ်းသိုၵ်းၶုၼ်တႃႇဝိတ်ႉဢၼ်ဝႃႈတိူၵ်ႈၽၼ်ႇတႃႇလၢၵ်ႈၼၢၵ်ႈၸုမ်ႇ တီႈဢၼ်ဢဝ်ၶိူင်ႈႁႄႉလၢၵ်ႈၼၢၵ်ႈႁဵင်ၼိုင်ႈ ဢၼ်ပဵၼ်ၶိူ်င်ႈဢၼ်ႁႄႉဢၼ်ၵင်ႈၵူၺ်းၵူၺ်း ဢၼ်ၵူၼ်းသိုၵ်းဢၼ်ႁႅင်းယႂ်ႇ ၼႃႇသုင်းသွင်ႇၼၼ်ႉႁွႆႈဝႆႉၼၼ်ႉဢေႃႈ။
၅ တဝ်ႈၼူမ်းမႂ်းၼၢင်းသွင်လုၵ်ႈၼၼ်ႉ မိူၼ်ၸိူဝ်ႉၼင်ႇတိုင်ဢွၼ်ႇၽႃၽႄဢၼ်ၵိၼ်ယူႇၵႃႈၼႂ်းပႃႇမွၵ်ႇႁဵဝ်းငိုၼ်းၼၼ်ႉ ဢေႃႈ။
၆ ၸူဝ်ႈဢၼ်မိူင်းဢမ်ႇပႆႇလႅင်းငဝ်းလပ်းသိင်ႇဢမ်ႇပႆႇပၢႆႈၵႂႃႇၼၼ်ႉၸိုင်ၵဝ်တူၵ်းၵႂႃႇၵႃႈ တီႈလွႆမုရၼ်ႇ ဢိၵ်ႇတင်းၵုင်းလေႃႇပၢၼ်ႇဢေႃႈ။
၇ ၼၢင်းဢၼ်ၵဝ်ၸဝ်ႈႁၵ်ႉၼႃႇၼႆႉဢိူၺ်း။မႂ်းၼၢင်းၼႆႉႁၢင်ႊလီၽၢင်လီတင်းတူဝ်တင်းၶိင်းဢေႃႈ။ဢမ်ႇမီးဢပျႅတ်ႈသေၸိူဝ်ႉသေပိူင်။
၈ လုၵ်ႉသေၵႃႈတီႈလွႆလေႇပၼုၼ်ႇ မႃးလူၺ်ႈၵၼ်တင်းၵဝ်ၸဝ်ႈသေၵမ်း။မေးဢၼ်ၵဝ်ၸဝ်ႈမၢႆဝႆႉၼႆႉဢိူၺ်း။လုၵ်ႉသေၵႃႈတီႈလွႆလေႇပၼုၼ်ႇ မႃးလူၺ်ႈၵၼ်တင်းၵဝ်ၸဝ်ႈသေၵမ်း။ယူႇၵႃႈၼိူဝ်ပၢႆၸိၵ်းလွႆဢႃႇမၼ၊ပၢႆၸိၵ်းလွႆသၼိရ၊လွႆႁေႇရမုၼ်ႇ၊ ႁူးထမ်ႈတီႈဢၼ်သၢင်ႇသီႈယူႇ၊ လွႆတီႈဢၼ်တူဝ်သိူဝ်ၸူမ်းယူႇၸိူဝ်း ၼၼ်ႉသေလႄႈလူတူၺ်းသေၵမ်း။
၉ ၼွင်ႉယိင်းၵဝ်ဢိူၺ်းမေးဢၼ်ၵဝ်ၸဝ်ႈမၢႆဝႆႉဢိူၺ်း။မႂ်းၼၢင်းၼႆႉႁိမ်ႁူင်ႇဢဝ်ႁူဝ်ၸႂ်ၵဝ်ၸဝ်ႈၵႂႃႇယဝ်ႉ။မႂ်းၼၢင်းဢဝ်တင်းမၢၵ်ႇတႃတူၺ်းပွၵ်ႈၼိုင်ႈ၊ ႁွႆႈၶေႃးႁွပ်ႈၼိုင်ႈၼၼ်ႉႁိမ်ႁူင်ႇဢဝ်ႁူဝ် ၸႂ်ၵဝ်ၸဝ်ႈၵႂႃႇယဝ်ႉ။
၁၀ ၼွင်ႉယိင်းၵဝ်ဢိူၺ်း။မေးဢၼ်ၵဝ်ၸဝ်ႈမၢႆဝႆႉဢိူၺ်း။မႅတ်ႈတႃႇမႂ်းၼၢင်းၼၼ်ႉယိင်ႈၶႅၼ်းလီတွၼ်းၼႃႇသေၼမ်ႉၸပိတ်ႉဢေႃႈ။တၢင်းဢၼ်ႁွမ်ဢၼ်ႁူၺ်းၼမ်ႉမၼ်းၼၢမ်ႇသႃႇ တီႈမႂ်းၼၢင်းၼၼ်ႉယိင်ႈၶႅၼ်းလီၼႃႇသေ မဵဝ်းၼၢမ်ႇသႃႇတင်းသဵင်ႈတင်း လူင်ဢေႃႈ။
၁၁ မေးဢၼ်ၵဝ်ၸဝ်ႈမၢႆဝႆႉဢိူၺ်း။သီႇသူပ်းမႂ်းၼၢင်းၼၼ်ႉၸၢင်ႊယွတ်ႇႁူဝ်ႈယူႇ ၸိူဝ်ႉၼင်ႇႁူဝ်ၼမ်ႉႁူင်းၽိုင်ႈလႄႈ ၵႃႈတီႈတ်ႂလိၼ်မႂ်းၼၢင်းၼၼ်ႉမီးၼမ်ႉၼူမ်းဢိၵ်ႇတင်းၼမ်ႉၽိုင်ႈဢေႃႈ။တၢင်းဢၼ်ႁွမ်ႇဢၼ်ႁူၺ်းၶူဝ်းၼုင်ႈတၢင်းမႆႊမႂ်းၼၢင်းၵေႃႈ မိူၼ်ၸိူဝ်ႉၼင်ႇတၢင်းဢၼ်ႁွမ်ဢၼ်ႁူၺ်းလေႇပၼုၼ်ႇ ၼၼ်ႉ ဢေႃႈ။
၁၂ ၼွင်ႉယိင်းဢဝ်ၸဝ်ႈမေးဢၼ်ၵဝ်ၸဝ်ႈမၢႆဝႆႉၼၼ်ႉပဵၼ်သူၼ်းဢူးယဵၼ်ႇၸပိတ်ႉ ဢၼ်လွမ်ႉႁူဝ်ႉဝႆႉ၊ၼမ်ႉၼွင်ဢၼ်ဢိုတ်းဝႆႉႁပ်းဝႆႉ၊ ၼမ်ႉဢွၵ်ႇႁူးဢၼ်တွၵ်ႇတၼ်းသိၵ်ႈဝႆႉဢေႃႈ။
၁၃ တူၼ်ႈၵႃႈဢွၼ်ႇမႂ်းၸိူဝ်းၼၼ်ႉပႃးပႃႇမၢၵ်ႇၸင်ႈ ဢၼ်ၸၢင်ႊမၢၵ်ႇမၢၵ်ႇဢၼ်ဝၢၼ်၊ပႃႇႁႅၼ်ႇၼႃႇ ဢၼ်လေႃးၵၼ်တင်းတူၼ်ႈၼႃႇတု၊
၁၄ မဵဝ်းတူၼ်ႈၼႃႇတု၊ တူၼ်ႈၵုရၵုမ၊တူၼ်ႈဢွႆႈ၊ တူၼ်ႈၵဵင်ႁွမ်၊မဵဝ်းတူၼ်ႈလေႃႇပၢၼ်ႇ၊တူၼ်ႈမုရၢၼ်ႇ၊ တူၼ်ႈဢၵျေႃႇဢိၵ်ႇတင်း မဵဝ်းတူၼ်ႈၼၢမ်ႇသႃႇဢၼ်မျၢတ်ႈ ၼႃႇသေပိူၼ်ႈၵႃႈမီးဢေႃႈ။
၁၅ မႂ်းၼၢင်းပဵၼ်ၼမ်ႉၼွင်ၵႃႈၼႂ်းသူၼ်ဢူးယဵၼ်ႇ၊ ၼမ်ႉဢွၵ်ႇႁူးဢၼ်လႆယူႇ၊ၼမ်ႉႁွင်ႊၼမ်ႉၵေးဢၼ်လႆဢွၵ်ႇသေ ၵႃႈၼႂ်းလွႆလေႇပၼုၼ်ႇ မႃးၼၼ်ႉဢေႃႈ။
၁၆ လူမ်းတၢင်းႁွင်ႇဢိူၺ်း။တိုၼ်ႇသေၵမ်း။လူမ်းတၢင်းၸၢၼ်းဢိူၺ်း။မႃးသေၵမ်း။ဢွၼ်ၵၼ်ထူဝ်းမႃးၵႃႈၼိူဝ်သူၼ်ဢူးယဵၼ်ႇၵဝ်ၸဝ်ႈ ႁႂ်ႈဢၢႆဢၼ်ႁွမ်ဢၼ်ႁူၺ်းမၼ်းမိုတ်းမိူဝ်ၵႂႃႇသေၵမ်း။ႁႂ်ႈၸဝ်ႈဢၼ်ၵဝ်ႁၵ်ႉပႅင်းၼၼ်ႉ ၶဝ်ႈၵႃႈၼႂ်းသူၼ်ဢူးယဵၼ်မၼ်းၸဝ်ႈလႄႈ ၵိၼ်မၢၵ်ႇမၼ်းဢၼ်ဝၢၼ်ဢၼ်ၸဵမ်းၼၼ်ႉသေၵမ်းလူၺ်ႈ။