Chapter
၃
ရုထတင်းပေႃႇၸ တီႈတလၢင်းယဵပ်ႇၶဝ်ႈ
၁ မိူဝ်ႈၼၼ်ႉ မေႈၸဝ်ႈမၼ်းၼေႃးမိၼၼ်ႉထၢမ်တီႈမၼ်းလႄႈဝႃႈ၊-လုၵ်ႈယိင်းၵဝ်ဢိူၺ်း။လွင်ႈၼင်ႇႁိုဝ်မႂ်းတၵ်းလႆႈယူႇၼိမ်လီၵတ်းယဵၼ်ၶျၢမ်းသႃႇၸိုင် ၵဝ်ဢမ်ႇ ထုၵ်ႇလီႁႃႁိူၼ်းပုၼ်ႈမႂ်းႁိုဝ်။
၂ ပေႃႇၸဢၼ်ပဵၼ်ၸဝ်ႈၶႃႈမေႈယိင်း ဢၼ်မႂ်းႁဵတ်းၵေႃႉႁဵတ်းသေႈလူၺ်ႈၸိူဝ်းၼၼ်ႉႉပဵၼ်ပီႈပဵၼ်ၼွင်ႉႁဝ်းဢမ်ႇၸႂ်ႈႁိုဝ်။တူၺ်းလူး။ၶမ်ႈၼႆႉမၼ်းတၵ်းလၢင်ၶဝ်ႈမူႉယေႃး ၵႃႈတီႈတလၢင်းယဵပ်ႇ ၶဝ်ႈမၼ်းဢေႃႈ။
၃ မႂ်းဢၢပ်ႇၼမ်ႉသေလႄႈဢဝ်ၼမ်ႉမၼ်းႁွမ်တႃးလႄႈ ၼုင်ႈၶူဝ်းႁၢင်ႈၶိူင်ႈသေယဝ်ႉ လူင်းၵႂႃႇၵႃႈတီႈတလၢင်းယဵပ်ႇၶဝ်ႈၼၼ်ႉတႃႉ။ၸူဝ်ႈဢၼ်မၼ်းဢမ်ႇပႆႇၵိၼ်ပႆႇၶူပ်းယဝ်ႉၼၼ်ႉ မႂ်းယႃႇပေၼႄပျႃႉတူဝ်မႂ်း တီႈမၼ်းလႃးလႃး။
၄ မိူဝ်ႈဢၼ်မၼ်းၼွၼ်းၼၼ်ႉမႂ်းမၢတ်ႈတွင်းတီႈဢၼ်မၼ်းၼွၼ်းၼၼ်ႉသေလႄႈ မႂ်းၶဝ်ႈၵႂႃႇတဵတ်ႇတဵတ်ႇလႄႈ ၽုၺ်ႇပိုတ်ႇၽႃႈဢၼ်ႁူမ် တိၼ်မၼ်းၼၼ်ႉသေယဝ်ႉ၊ၶဝ်ႈၼွၼ်းတႃႉ။
၅ လွင်ႈဢၼ်မႂ်းတၵ်းလႆႈႁဵတ်းၸိူဝ်ႉၼင်ႇႁိုဝ်ဢၼ်ဝႃႈၼၼ်ႉ မၼ်းတၵ်းလၢတ်ႈတီႈမႂ်းဢေႃႈ၊ မိူဝ်ႈဢၼ်ဝႃႈၼင်ႇၼၼ်ၸိုင်၊မၼ်းၵေႃႈႁပ်ႉတုင်းဢဝ်လႄႈဝႃႈ၊-ၵဝ်ၶႃႈတၵ်းႁဵတ်းၸွမ်း ၵႃႈၼင်ႇဢၼ်မေႈႁဝ်းသင်ႇလၢတ်ႈဝႆႉၼၼ်ႉ ၶႃႈဢေႃႈ၊ဝႃႈၼင်ႇၼႆသေယဝ်ႉ၊
၆ လူင်းၸူးၵႃႈတီႈတလၢင်းယဵပ်ႇၶဝ်ႈၼၼ်ႉလႄႈ ႁဵတ်းၸွမ်းၵႃႈၼင်ႇဢၼ်ရ မေႈၸဝ်ႈမၼ်းသင်ႇလၢတ်ႈဝႆႉၼၼ်ႉဢေႃႈ။
၇ ပေႃႇၸၼၼ်ႉၵိၼ်ၶူပ်းယဝ်ႉလႄႈ သႂၢင်ႇၸႂ်သိူဝ်းၸႂ်ယူႇသေယဝ်ႉၵႂႃႇၼွၼ်းၵႃႈ တီႈႁိမ်းတီႈသုတ်းၵွင်ၶဝ်ႈၼၼ်ႉဢေႃႈ။ရုထ ၵေႃႈၵႂႃႇတဵတ်ႇတဵတ်ႇသုတ်ႉၸပ်းသုတ်ႉၸူးသေလႄႈ ၽုၺ်ႇပိုတ်ႇၽႃႈႁူမ်ႇဢၼ်ႁူမ်ႇတိၼ်မၼ်းၼၼ်ႉသေယဝ်ႉၶဝ်ႈၼွၼ်းဢေႃႈ။
၈ မိူဝ်ႈၶိင်ႇတဵင်ႈၶိုၼ်း ၵူၼ်းၸၢႆးၼၼ်ႉတူၵ်းၸႂ်လႄႈဝၢႆႇတူၺ်းသေယဝ်ႉ လႆႈႁၼ်မေႈယိင်းၵေႃႉၼိုင်ႈမီးၵႃႈတီႈပၢႆတိၼ်မၼ်းၼၼ်ႉလႄႈ၊မၼ်းထၢမ်ဝႃႈ၊-မႂ်းပဵၼ်ၽူႈ လႂ်၊ဝႃႈၼႆဢေႃႈ။
၉ မၼ်းၵေႃႈလၢတ်ႈဝႃႈ၊-ၶႃႈၸဝ်ႈပဵၼ်ရုထ မေႈယိင်းၶႃႈၸဝ်ႈႁဝ်းၶႃႈဢေႃႈ။ၶႅၼ်းတေႃႈဢဝ်ၽႃႈႁူမ်ႇၸဝ်ႈႁဝ်း ႁူမ်ႇၶႃႈၸဝ်ႈႁဝ်းသေၵမ်းၶႃႈ။ၸဝ်ႈႁဝ်း ပဵၼ်ၵေႃႉဢၼ်ပိူင်ႇထုတ်ႇဢဝ်ၶႃႈၸဝ်ႈၶႃႈဢေႃႈ။မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈလၢတ်ႈ လႄႈဝႃႈ၊-
၁၀ လုၵ်ႈယိင်းၵဝ်ဢိူၺ်း။ႁႂ်ႈထႃႇဝရႃႉၽြႃးပၼ်တၢင်းလီတီႈမႂ်းသေၵမ်းလူၺ်ႈ။မႂ်းယင်းဢမ်ႇၸွမ်းလင်ၽူႈမၢဝ်ႇဢၼ်ယၢၵ်ႈဢၼ်ၽၢၼ်၊ ၽူႈမၢဝ်ႇဢၼ်ၸၢင်ႊမၢၵ်ႈၸၢင်ႊမီး၊သေၵေႃႉသေၵူၼ်းလႄႈ ၵျေးၸူးဢၼ်မႂ်းႁဵတ်းတီႈၵဝ်ၵမ်းလိုၼ်းၼႆႉ ယိင်ႈၶႅၼ်းယႂ်ႇၼႃႇသေ ၵျေးၸူးဢၼ်မႂ်းႁဵတ်းၵမ်းဢွၼ်တၢင်းၼၼ်ႉယဝ်ႉ။
၁၁ တေႃႈလဵဝ်ၼႆႉယႃႇပေမႆႈၸႂ်။လုၵ်ႈယိင်းၵဝ်ဢိူၺ်း။ၵဝ်တၵ်းႁဵတ်းၸွမ်းၵႃႈဢၼ်မႂ်းယွၼ်းၼၼ်ႉဢေႃႈ။ဝဵင်းဢၼ်ၵူၼ်းမဵဝ်းၵဝ်ယူႇၼႆႉတင်းဝဵင်း ႁူႉလွင်ႈဢၼ်မႂ်းပဵၼ် မေႈယိင်းဢၼ်တဵမ်ဝႆႉတင်းသီႇလႃႉၼၼ်ႉဢေႃႈ။
၁၂ ၵဝ်ၼႆႉ ပဵၼ်ၵေႃႉဢၼ် ပိူင်ႇထုတ်ႇဢဝ် ၸႂ်ႈတႄႉတႄႉဢေႃႈ။ၵူၺ်းၵႃႈၵေႃႉဢၼ်ယိင်ႈၶႅၼ်းပိူင်ႇထုတ်ႇဢဝ်ၼၼ်ႉယင်းမီးယူႇၵေႃႉၼိုင်ႈလူးၵွၼ်ႇဢေႃႈ။ၶိုၼ်းၼႆႉ ၼွၼ်းၵႃႈတီႈၼႆႉလူးၵွၼ်ႇတႃႉ။
၁၃ ပေႃးမၼ်းၶႂ်ႈဢဝ်တၢင်းဢၼ်ပိူင်ႇထုတ်ႇဢဝ်ၸိုင်၊ႁႂ်ႈမၼ်းႁဵတ်းဢဝ်တႃႉ။ပေႃးမၼ်းဢမ်ႇၶႂ်ႈပိူင်ႇထုတ်ႇဢဝ်မႂ်းၸိုင်ၵႃႈၼင်ဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ ၵဝ်တၵ်းပိူင်ႇထုတ်ႇဢဝ်မႂ်းဢေႃႈ။ၼွၼ်းယူႇတီႈၼႆႉတေႃႇထိုင်ႁွတ်ႈၶိင်ႇၵၢင်ၼႂ်တႃႉ၊ဝႃႈၼင်ႇၼႆဢေႃႈ။
၁၄ မၼ်းၵေႃႈၼွၼ်းၵႃႈတီႈႁိမ်းတိၼ်မၼ်း တေႃႇထိုင်ႁွတ်ႈၶိင်ႇၵၢင်ၼႂ်သေယဝ်ႉ လုၵ်ႉမိူဝ်ႈဢၼ်ဢမ်ႇပႆႇတၼ်းႁွတ်ႈထိုင်ၶိင်ႇမိူင်းလႅင်းဢၼ်ၵေႃႉၼိုင်ႈလႄႈ ၵေႃႉၼိုင်ႈတူၺ်းႁၼ်ၵၼ်ၼၼ်ႉဢေႃႈ။လွင်ႈမၼ်းၸမ်းမၼ်းလၢတ်ႈဝႃႈ၊- ယႃႇပေႁႂ်ႈၽူႈ လႂ်လႆႈႁူႉလွင်ႈဢၼ်ဝႃႈမေႈယိင်းမႃးၵႃႈတီႈ တလၢင်းယဵပ်ႇၶဝ်ႈၼႆႉသေၵမ်း၊ ဝႃႈၼင်ႇၼႆဝႆႉဢေႃႈ။
၁၅ မၼ်းသမ်ႉလၢတ်ႈထႅင်ႈလႄႈဝႃႈ၊-ဢဝ်ၽႃႈမႆႊမႂ်းသိူဝ်ႇၵႃႈၼႆႉတႃႉ၊ဝႃႈၼင်ႇၼႆလႄႈမၼ်းၵေႃႈႁဵတ်းၸွမ်းဢေႃႈ။မၼ်းဢဝ်ၶဝ်ႈမူႉယေႃး ႁူၵ်းပေႇသႂ်ႇပၼ်ဢေႃႈ။
၁၆ မၼ်းႁၢပ်ႇဢဝ်ၵႂႃႇၵႃႈၼႂ်းဝဵင်းဢေႃႈ။မိူဝ်ႈဢၼ်ႁွတ်ႈထိုင်ၵႃႈတီႈမေႈၸဝ်ႈမၼ်းၼၼ်ႉၸိုင်မေႈၸဝ်ႈမၼ်းၼၼ်ႉထၢမ်လႄႈဝႃႈ၊-လုၵ်ႈယိင်းၵဝ်ဢိူၺ်း။ပဵၼ်မႃးၸိူဝ်ႉၼင်ႇႁိုဝ်တီႈမႂ်း၊ဝႃႈၼင်ႇၼႆလႄႈ မၼ်းၵေႃႈမွၵ်ႇလၢတ်ႈတင်းသဵင်ႈၵႃႈဢၼ်ၵေႃႉၼၼ်ႉႁဵတ်းတီႈမၼ်းၼၼ်ႉဢေႃႈ။
၁၇ မၼ်းယင်းလၢတ်ႈဝႃႈ၊-ၵေႃႉၼၼ်ႉဢဝ်ၶဝ်ႈမူႉယေႃးႁူၵ်းပေႇပၼ်တီႈၵဝ်ၶႃႈလႄႈဝႃႈ၊-မႂ်းယႃႇပမေိူဝ်းၵႂႃႇၸူးမေႈၸဝ်ႈမႂ်းတိၼ်လၢႆမိုဝ်းပဝ်ႇ၊ဝႃႈၼင်ႇၼႆၶႃႈယဝ်ႉ။
၁၈ ၼေႃးမိၵေႃႈလၢတ်ႈဝႃႈ၊-လုၵ်ႈယိင်းၵဝ်ဢိူၺ်း။ယူႇၼိမ်ၼိမ်လီလီ တေႃႇထိုင်ႁွတ်ႈထၢၼ်ႈပေႃး လႆႈႁူႉလွင်ႈဢၼ်ဢမူႉၼႆႉ တၵ်းယဝ်ႉတူဝ်ႈၸိူဝ်ႉၼင်ႇႁိုဝ်ၼၼ်ႉတႃႉ။ၵူၼ်းၸၢႆးၼႆႉတၵ်းဢမ်ႇယူႇၼိမ်ၼိမ်တေႃႇထိုင်ႁွတ်ႈထၢၼ်ႈပေႃး ႁႂ်ႈဢမူႉၼႆႉယဝ်ႉတူဝ်ႈၼႂ်းဝၼ်းမိူဝ်ႈၼႆႉ၊ဝႃႈၼင်ႇၼႆဢေႃႈ။