၃
ယုဝ်းၼၵွႃႇဝဵင်းၼိၼေႇဝူၺ်ႇ
၁ ၼုၵ်ႈၵပၢတ်ႈ ထႃႇဝရႃႉၽြႃးဢၼ်ႁွတ်ႈမႃးတီႈ ယုဝ်းၼ ပွၵ်ႈတုတိယၸမ်း၊-
၂ မႂ်းလုၵ်ႉလႄႈၵႂႃႇၸူးၵႃႈတီႈဝဵင်း ၼိၼေႇဝူၺ်ႇ ဝဵင်းလူင်ၼၼ်ႉသေလႄႈႁွင်ႉပၢဝ်ႇႁွင်ႉသေႃႇၸွမ်း ၵႃႈၼင်ႇဢၼ်ၵဝ်သင်ႇလၢတ်ႈ ဝႆႉၼၼ်ႉတႃႉ၊ဝႃႈၼင်ႇၼႆဢေႃႈ။
၃ မိူဝ်ႈၼၼ်ႉယုဝ်းၼလုၵ်ႉလႄႈ ၵႂႃႇၸူးၵႃႈတီႈဝဵင်းၼိၼေႇဝူၺ်ႇၼၼ်ႉၸွမ်းၵႃႈၼင်ႇဢၼ်ဢမိင်ႉထႃႇဝရႃႉၽြႃးမီးၼၼ်ႉဢေႃႈ။ဝဵင်းၼိၼေႇဝူၺ်ႇ ၼၼ်ႉပဵၼ်ဝဵင်းဢၼ်ယႂ်ႇၼႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈလႄႈပဵၼ်ဝဵင်းဢၼ်ၵႂၢင်ႈ ၸူဝ်ႈတႃႇၶၢဝ်းတၢင်းသၢမ်ဝၼ်းဢေႃႈ။
၄ ယုဝ်းၼၼၼ်ႉၸင်ႇၸႃႉႁဵတ်းတၢင်းဢၼ်ၶဝ်ႈၵႂႃႇၵႃႈၼႂ်းဝဵင်းၸူဝ်ႈတႃႇၶၢဝ်းတၢင်းဝၼ်းၼိုင်ႈလႄႈ ႁွင်ႉပၢဝ်ႇႁွင်ႉလၢတ်ႈလႄႈဝႃႈ၊-ပေႃးပူၼ်ႉသေသီႇသိပ်းဝၼ်းယဝ်ႉၸိုင်ဝဵင်းၼိၼေႇဝူၺ်ႇ ၼႆႉတၵ်းႁွတ်ႈထိုင်တၢင်းလူႉတၢင်းလႅဝ်ဢေႃႈ၊ ဝႃႈၼင်ႇၼႆဢေႃႈ။
၅ မိူဝ်ႈၼၼ်ႉ ၵူၼ်းဝဵင်းၼိၼေႇဝူၺ်ႇၸိူဝ်းၼၼ်ႉယုမ်ႇဢမိင်ႉၽြႃးပဵၼ်ၸဝ်ႈလႄႈ ၸႃႉၸဵမ်ၵေႃႉယႂ်ႇတေႃႇထိုင်ႁွတ်ႈၵေႃႉလဵၵ်ႉႁွင်ႉပၢဝ်ႇႁွင်ႉသေႃႇၶိင်ႇမိူဝ်ႈဢၼ်ၵမ် တၢင်းၵိၼ်လႄႈၼုင်ႈၼင်ပေႃဢေႃႈ။
၆ သတၢင်းသဵင်ၶၢဝ်ႇၼၼ်ႉႁွတ်ႈထိုင်ၵႃႈတီႈၶုၼ်လူင် ၼိၼေႇဝူၺ်ႇလႄႈမၼ်းၼၼ်ႉ လူင်းသေၵႃႈၼိူဝ်ပလၢင်ႇမၼ်းလႄႈထွတ်ႇၶူဝ်းၼုင်ႈၶုၼ်သေယဝ်ႉ ၼုင်ႈၶူဝ်းၼင်ပေႃသေ လႄႈၼင်ႈယူႇၵႃႈၼႂ်းတဝ်ႈဢေႃႈ။
၇ မၼ်းဢဝ်တင်းဢႃႇၼႃႇၶုၼ်လူင်၊ ဢႃႇၼႃႇမူးမၢတ်ႈၽွင်းမိူင်းတင်းလၢႆမွၵ်ႇလၢတ်ႈသတၢင်းသဵင်ၶၢဝ်ၵႃႈၼႂ်းဝဵင်း ၼိၼေႇဝူၺ်ႇတင်းဝဵင်းလႄႈႁႂ်ႈပၢဝ်ႇႁႂ်ႈသေႃႇလႄႈဝႃႈ၊-ယႃႇပေႁႂ်ႈၵူၼ်းသတ်ႉတဝႃႇ၊တရိၵ်ႈသၢၼ်ႇၽုၼ်သူဝ်းၽုင်ဝူဝ်းတင်းလၢႆ ၸိမ်းတူၺ်းသေၸိူဝ်ႉသေပိူင်လႃးလႃး။ယႃႇပေႁႂ်ႈၵိၼ်တၢင်းၵိၼ်တၢင်းၶူပ်း။ယႃႇပေႁႂ်ႈ ၵိၼ်ၼမ်ႉၵိၼ်ၼၢႆး။
၈ ႁႂ်ႈၵူၼ်းသတ်ႉတဝႃႇဢိၵ်ႇတင်းတရိၵ်ႈသၢၼ်ႇ ဢွၼ်ၵၼ်ၼုင်ႈၶူဝ်းၼုင်ႈၼင်ပေႃသေ။ႁႂ်ႈဢွၼ်ၵၼ်ဝႄႈပႅတ်ႈ သဵၼ်ႈတၢင်းဢၼ်ႁၢႆႉမိူၵ်ႈဢၼ်ၶဝ်ၸွမ်းဢိၵ်ႇတင်း ဢမူႉဢႃႉထမ်ႇမႃႉဢၼ်ၶဝ်ႁဵတ်းၼၼ်ႉႁင်းၽႂ်ႁင်းမၼ်းသေ။
၉ လွင်ႈၼင်ႇႁိုဝ်တၵ်းၵၢင်းလွတ်ႈတၢင်းဢၼ်လူႉဢၼ်လႅဝ်ၸိုင် ၽူႈ လႂ်တၵ်းႁူႉလွင်ႈဢၼ်ၽြႃးပဵၼ်ၸဝ်ႈတၵ်းၶၢႆႉပုတ်ႈသေလႄႈ ၶုၵ်းၸႂ်လႆႈမႆႈၸႂ်ၵွပ်ႈလႄႈဝႄႈပိူင်ႈၵႂႃႇသေ ၵႃႈတီႈဢၼ်ဢၢႆႁႅင်းတၢင်းၸႂ်မႆႈၶႆႈၸႃႉမၼ်းၸဝ်ႈၼၼ်ႉႁိုဝ်၊ ဢမ်ႇ ဝႄႈပိူင်ႈႁိုဝ်ၼၼ်ႉလႆႈဝႃႈၼင်ႇၼႆဢေႃႈ။
၁၀ မိူဝ်ႈၼၼ်ႉၽြႃးပဵၼ်ၸဝ်ႈ ႁၼ်တၢင်းၵမ်တၢင်းၵျၢင်ႉဢၼ်ၶဝ်ဝႄႈပႅတ်ႈသဵၼ်ႈတၢင်းဢၼ်ႁၢႆႉမိူၵ်ႈ ဢၼ်ၶဝ်ၸွမ်းၼၼ်ႉသေယဝ်ႉ၊ ၽြႃးပဵၼ်ၸဝ်ႈမီးၸႂ်ဢိတ်းလူလူၺ်ႈလွင်ႈၽေးတၢမ်ႇဢၼ်မၼ်းၸဝ်ႈဝႃႈတၵ်းႁဵတ်းတီႈၶဝ်ၼၼ်ႉလႄႈယင်းဢမ်ႇပၼ်ၽေးပၼ်တၢမ်ႇၼၼ်ႉလႄႈယူႇဢေႃႈ။