၁
ယုဝ်းၼပၢႆၽြႃးပဵၼ်ၸဝ်ႈ
၁ ၼုၵ်ႈၵပၢတ်ႈထႃႇဝရႃႉၽြႃးဢၼ်ႁွတ်ႈမႃးတီႈယုဝ်းၼလုၵ်ႈၸၢႆးဢမိတ်ႉတေႇၼၼ်ႉၸမ်း၊-
၂ မႂ်းလုၵ်ႉလႄႈၵႂႃႇၸူးၵႃႈတီႈဝဵင်းၼိၼေႇဝူၺ်ႇ ဝဵင်းလူင်ၼၼ်ႉသေလႄႈႁွင်ႉပၢဝ်ႇႁွင်ႉသေႃႇယူႇၽၢႆႇၼိုင်ႈတင်းမၼ်းတႃႉ။တူႉၸရိူၵ်ႈဢပျႅတ်ႈဢၼ်ၶဝ်ၼၼ်ႉႁဵတ်းၼၼ်ႉ ၶိုၼ်းမႃးႁွတ်ႈ ထိုင်ၵႃႈတီႈၽၢႆႇၼႃႈၵဝ်ယဝ်ႉ၊ဝႃႈၼင်ႇၼႆဢေႃႈ။
၃ ၵူၺ်းၵႃႈယုဝ်းၼၼၼ်ႉလုၵ်ႉလႄႈ ၵျၢမ်ႇပွင်ဢၢင်ႈတၵ်းဢွၵ်ႇသေၵႃႈတီႈၽၢႆႇၼႃႈထႃႇဝရႃႉၽြႃး ၵႂႃႇၸူးၵႃႈတီႈဝဵင်း တႃႇသု လႄႈ လူင်းၵႂႃႇႁွတ်ႈထိုင်ၵႃႈတီႈဝဵင်းယွပ်ႉပသေယဝ်ႉ ႁၼ်ႁိူဝ်းသၢင်းၽေႃးဢၼ်ၵႂႃႇၸူးၵႃႈတီႈဝဵင်းတႃႇသုလႄႈပၼ်ၵႃႈႁိူဝ်းသၢင်းၽေႃးသေလႄႈ ၶဝ်ႈလူင်းၵႃႈၼႂ်းႁိူဝ်းသၢင်းၽေႃးၼၼ်ႉႁႂ်ႈလႆႈၸွမ်းလူၺ်ႈၵၼ်တင်းၵူၼ်းႁိူဝ်းသၢင်းၽေႃးၸိူဝ်းၼၼ်ႉ ၵႂႃႇၽၢတ်ႇသေၵႃႈတီႈထႃႇဝရႃႉၽြႃးဢေႃႈ။
၄ ထႃႇဝရႃႉၽြႃး ပွႆႇၸႂ်ႉလူမ်းဢၼ်ႁႅင်းယႂ်ႇၼႃႇပဝ်ႇၸူးၵႃႈၼိူဝ်ပၢင်ႇလၢႆႇလႄႈ ပဵၼ်ၽူၼ်လူင်လူမ်းလူင်ၵႃႈတီႈပၢင်ႇလၢႆႇၼၼ်ႉထၼ်ႈပေႃး မိူၼ်ၼင်ႇႁၢင်ႊႁိူဝ်း သၢင်းၽေႃးတၵ်းလူႉတၵ်းလႅဝ်ဢေႃႈ။
၅ မိူဝ်ႈၼၼ်ႉၵူၼ်းႁိူဝ်းသၢင်းၽေႃးၸိူဝ်းၼၼ်ႉၵူဝ်ႁႄလႄႈ သႅၼ်ႇႁွင်ႉႁႃၽြႃးၶဝ်ႁင်းၽႂ်ႁင်းမၼ်းဢေႃႈ။ၶဝ်ဢွၼ်ၵၼ်ဢဝ်ၶူဝ်းလဵင်းဢၼ်မီးၵႃႈၼႂ်းႁိူဝ်းသၢင်းၽေႃးၸိူဝ်းၼၼ်ႉ ထႅမ်ႈတူၵ်းပႅတ်ႈၵႃႈၼႂ်းပၢင်ႇလၢႆႇ ႁႂ်ႈမၼ်းမဝ်မႃးဢေႃႈ။ယုဝ်းၼၸမ်း လူင်းၶဝ်ႈၵႃႈၼႂ်းတွင်ႉႁိူဝ်းသၢင်းၽေႃးလႄႈ ၼွၼ်းယူႇၵႃႈတီႈၼၼ်ႉလႄႈလပ်းယူႇဢေႃႈ။
၆ ၵႄႇႁိူဝ်းသၢင်းၽေႃးၼၼ်ႉ မႃးၸူးၵႃႈတီႈမၼ်းလႄႈလၢတ်ႈဝႃႈ၊-ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းၼွၼ်းလပ်းယူႇၸိူဝ်ႉၼင်ႇၼႆ။လုၵ်ႉတႃႉ။သူးတွင်းတီႈၽြႃးမႂ်းတႃႉ။ၽြႃးမႂ်းၸၢင်ႊၶေး ၶုၵ်းၸႂ်လႆႈၶႆႈၸႂ်ထူပ်းႁဝ်းလႄႈႁဝ်းတၵ်းဢမ်ႇလႆႈလူႉလႆႈလႅဝ်ဢေႃႈ၊ ဝႃႈၼင်ႇၼႆဢေႃႈ။
၇ လိုၼ်းၼၼ်ႉၶဝ်ၼင်ႇၵၼ်ၵၼ် လၢတ်ႈၵၼ်လႄႈဝႃႈ၊-မႃးမႃးဢိူၺ်း။တူၵ်းလိၵ်ႈၸႃႇၵွၵ်ႈႁႂ်ႈလႆႈႁူႉလွင်ႈဢၼ်ဢမူႉၼႆႉႁွတ်ႈထိုင်ၵႃႈၼိူဝ်ႁဝ်း ၵွပ်ႈပိူဝ်ႈဢပျႅတ်ႈၽူႈ လႂ်ၼၼ်ႉတႃႉႁဝ်း၊ဝႃႈၼင်ႇၼႆသေယဝ်ႉတူၵ်းၸႃႇၵွၵ်ႈၵၼ်လႄႈလိၵ်ႈၸႃႇၵွၵ်ႈတူၵ်းတီႈယုဝ်းၼဢေႃႈ။
၈ ၶဝ်သမ်ႉတွင်ႈထၢမ်တီႈမၼ်းလႄႈဝႃႈ၊- မွၵ်ႇလၢတ်ႈလွင်ႈဢၼ်ဢမူႉၼႆႉႁွတ်ႈထိုင်ၵႃႈၼိူဝ်ႁဝ်း ၵွပ်ႈပိူဝ်ႈဢၼ် လႂ်ၼၼ်ႉသေၵမ်း။မႂ်းႁဵတ်းၵၢၼ်ႁဵတ်းငၢၼ်းၵႃႈသင်။
မႂ်းလုၵ်ႉသေၵႃႈတီႈ လႂ်မႃး။မိူင်းမႂ်းပဵၼ်မိူင်း လႂ်။မႂ်းပဵၼ်ၵူၼ်းမဵဝ်းၵႃႈသင်၊ မိူဝ်ႈဢၼ်ဝႃႈၼင်ႇၼႆၸိုင်၊မၼ်း ၶိုၼ်းလၢတ်ႈတီႈၶဝ်လႄႈဝႃႈ၊-
၉ ၵဝ်ပဵၼ်ၵူၼ်းမဵဝ်းႁေႇပႄးဢေႃႈ။ၵဝ်ပဵၼ်ၵေႃႉဢၼ်ၵူဝ်ယမ်ထႃႇဝရႃႉၽြႃးၽြႃးပဵၼ်ၸဝ်ႈ ၸဝ်ႈၵၢင်ႁၢဝ်ဢၼ်ႁဵတ်းပဵၼ်ၼမ်ႉပၢင်ႇလၢႆႇတင်းလိၼ်မိူင်းၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊ ၵူၼ်းၸိူဝ်းၼၼ်ႉၵူဝ်ႁႄၼႃႇလူင်လၢင်လႄႈ ဢွၼ်ၵၼ်တွင်ႈထၢမ်တီႈမၼ်းလႄႈဝႃႈ၊-
၁၀ ဢၼ်မႂ်းႁဵတ်းၼၼ်ႉပဵၼ်ၸိူ်ဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။လွင်ႈမၼ်းၸမ်း ၵူၼ်းၸိူဝ်းၼၼ်ႉ လႆႈႁူႉလွင်ႈဢၼ်မၼ်းဢွၵ်ႇပၢႆႈသေၵႃႈတီႈ ထႃႇဝရႃႉၽြႃးမႃးၸွမ်းၵႃႈၼင်ႇဢၼ်မၼ်းလႆႈမွၵ်ႇလၢတ်ႈတီႈၶဝ်ယဝ်ႉၼၼ်ႉဢေႃႈ။
၁၁ မိူဝ်ႈၼၼ်ႉ ၵွပ်ႈပိူဝ်ႈဢၼ်လူမ်းလူင်လႅင်းလူင်ၵႃႈတီႈပၢင်ႇလၢႆႇၼၼ်ႉ ယိင်ႈၶႅၼ်းလုၵ်ႉၶိုၼ်ႈယႂ်ႇတွၼ်းမႃးၼႃႇလႄႈၶဝ်ၼၼ်ႉထၢမ်တီႈမၼ်းလႄႈဝႃႈ၊-ႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ်တီႈမႂ်းႁႂ်ႈပၢင်ႇလၢႆႇ ပေႃးပဵၼ်ဢၼ်ၼိမ်ဢၼ်လီမႃးတီႈႁဝ်း၊ မိူဝ်ႈဢၼ်ဝႃႈၼင်ႇၼႆ ၸိုင်၊မၼ်းၼၼ်ႉၶိုၼ်းလၢတ်ႈတီႈၶဝ်လႄႈဝႃႈ၊-
၁၂ ယုၵ်ႉဢဝ်ၵဝ်သေလႄႈ ထႅမ်ႈၶျႃးတူၵ်းသႂ်ႇၵႃႈၼႂ်းပၢင်ႇလၢႆႇတႃႉ။ပေႃးႁဵတ်းၸိူ်ဝ်ႉၼင်ႇၼၼ်ၸိုင်ပၢင်ႇလၢႆႇတၵ်းပဵၼ်ဢၼ်ၼိမ်ဢၼ်လီမႃးတီႈသူဢေႃႈ။ၵဝ်ႁူႉလွင်ႈဢၼ်ၽူၼ်လူင်လူမ်းလူင် ဢၼ်ယႂ်ႇၼႃႇၼႆႉႁွတ်ႈထိုင်ၵႃႈ ၼိူဝ်သူၵွပ်ႈပိူဝ်ႈၵဝ်ၵူၺ်းၼၼ်ႉဢေႃႈ။
၁၃ ပိၵ်ႉသမ်ႉဝႃႈၼင်ႇၼႆသေၵေႃႈ၊ၵူၼ်းႁိူဝ်းသၢင်းၽေႃးၸိူဝ်းၼၼ်ႉဢွၼ်ၵၼ်ၽၢႆးႁိူဝ်းယၢပ်ႇၸႂ်ၼႃႇလူင်လၢင် ႁႂ်ႈလႆႈႁွတ်ႈထိုင်ၵႃႈတီႈၽင်ႇဢေႃႈ။ၵူၺ်းၵႃႈၵွပ်ႈပိူဝ်ႈဢၼ်လူမ်းလူင်လႅင်းလူင် ယိင်ႈၶႅၼ်းလုၵ်ႉၶိုၼ်ႈယႂ်ႇတွၼ်းမႃးယူႇၽၢႆႇၼိုင်ႈတင်းၶဝ်ၼၼ်ႉလႄႈၶဝ်ဢမ်ႇတတ်ႈၼိုင်ႇလႆႈ။
၁၄ ပိူဝ်ႈၼႆလႄႈ ၶဝ်ဢွၼ်ၵၼ်ႁွင်ႉသႅၼ်ႇတီႈထႃႇဝရႃႉၽြႃးလႄႈဝႃႈ၊-ထႃႇဝရႃႉၽြႃးတီႈၶႃႈ။ႁဝ်းၶႃႈတွင်းပၢၼ်ႇတီႈၶႃႈဢေႃႈ။ႁဝ်းၶႃႈတွင်းပၢၼ်ႇတီႈၶႃႈဢေႃႈ။ႁဝ်းၶႃႈတွင်းပၢၼ်ႇ ႁႂ်ႈႁဝ်းၶႃႈ ဢမ်ႇလႆႈၶၢမ်ႇတၢင်းလူႉတၢင်းလႅဝ်ၵွပ်ႈပိူဝ်ႈဢသၢၵ်ႈၵေႃႉၼႆႉ ဢိၵ်ႇတင်းႁႂ်ႈဢမ်ႇဢဝ်ဢပျႅတ်ႈ ဢၼ်ထွၵ်ႇလိူတ်ႈၵေႃႉဢၼ်ဢမ်ႇမီးဢပျႅတ်ႈၼၼ်ႉ တၢင်ႇသႂ်ႇၵႃႈၼိူဝ်ႁဝ်းၶႃႈတီႈၶႃႈဢေႃႈ။
၁၅ ထႃႇဝရႃႉၽြႃးတီႈၶႃႈ ၸဝ်ႈႁဝ်းႁဵတ်းၸွမ်းၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးၼၼ်ႉတီႈၶႃႈယဝ်ႉ၊ ဝႃႈၼင်ႇၼႆသေယဝ်ႉ၊ဢွၼ်ၵၼ်ယုၵ်ႉဢဝ် ယုဝ်းၼ သေလႄႈထႅမ်ႈၶျႃးတူၵ်းသႂ်ႇၵႃႈၼႂ်းပၢင်ႇလၢႆႇဢေႃႈ။
မိူဝ်ႈၼၼ်ႉ ပၢင်ႇလၢႆႇထၢတ်ႇယဵၼ်သေ တၢင်းဢၼ်မၼ်းလုၵ်ႉၶိုၼ်ႈပဵၼ်ၸွၼ်ပဵၼ်ၸႅၼ်ဝႆႉၼၼ်ႉဢေႃႈ။
၁၆ ၵူၼ်းၸိူဝ်းၼၼ်ႉၵေႃႈ ၵူဝ်ႁႄထႃႇဝရႃႉၽြႃးၼႃႇလူင်လၢင်လႄႈ ဢွၼ်ၵၼ်ပုၵ်ႉၸေႃႇယိၸ်ႉသေလႄႈဝႆႉၵတိသႅတ်ႉၸႃႇဢေႃႈ။
၁၇ ထႃႇဝရႃႉၽြႃးၶၢၼ်းပႃလူင်ႁႂ်ႈဢိုၼ်ယုဝ်းၼ ၼၼ်ႉဝႆႉလႄႈ ယုဝ်းၼ ၼၼ်ႉလႆႈယူႇၵႃႈၼႂ်းတွင်ႉပႃလူင်ၼၼ်ႉသၢမ်ဝၼ်းသၢမ်ၶိုၼ်း တဵမ်တဵမ်ဢေႃႈ။