၂
ၽုင်မႅင်းၵႅင်း
၁ ဢွၼ်ၵၼ်ပဝ်ႇၼႄးၶရႃႇ ၵႃႈၼိူဝ်လွႆၸိဢုၼ်ႇတႃႉ။ဢွၼ်ၵၼ်ႁဵတ်းသဵင်ဢၼ်ပၼ်သတိ ၵႃႈၼိူဝ်လွႆဢၼ်မူတ်းၸၢင်ႇၵဝ်ၼၼ်ႉတႃႉ။ႁႂ်ႈၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်သၼ်ႇသၼ်ႇသၢႆသၢႆသေ။လွင်ႈမၼ်းၸမ်းမိူဝ်ႉဝၼ်းထႃႇဝရႃႉၽြႃးမႃးလႄႈၸမ်ယဝ်ႉ။
၂ ပဵၼ်ဝၼ်းဢၼ်လပ်းသိင်ႇလပ်းႁုမ်း၊ ဝၼ်းဢၼ်ၽူၼ်ၵုၼ်ႈၽူၼ်ဢုမ်းလႄႈ လပ်းသိင်ႇၼႃႇတၼ်ၼႃႇဢေႃႈ။ၸိူဝ်ႉၼင်ႇဢၼ်ဢႃႇရူင်ႇသၢႆဢရွင်ႇၵၢင်ဝၼ်းၸွတ်ႇတူဝ်ႈၵႃႈၼိူဝ်လွႆတင်းလၢႆၼၼ်ႉ မဵဝ်းဢၼ်ၼမ်ၼႃႇလႄႈႁႅင်းယႂ်ႇၼၼ်ႉမႃးယူႇဢေႃႈ။မိူဝ်ႈၵွၼ်ႇဢွၼ်ၼႆႉၼၼ်ႉဢမ်ႇတွၼ်ႉပဵၼ်ၸိူဝ်ႉၼင်ႇၼၼ်။ၵမ်းလိုၼ်းၵူႈၸူဝ်ႈၵူႈပၢၼ်သိုပ်ႇသိုပ်ႇတၢမ်ႈတၢမ်ႈၵေႃႈ တၵ်းဢမ်ႇ လႆႈပဵၼ်။
၃ ၽႆးမႆႈၵႂႃႇယူႇၵႃႈတီႈၽၢႆႇၼႃႈၶဝ်လႄႈၵႃႈတီႈၽၢႆႇလင်ၵေႃႈပိဝ်ၽႆးလုၵ်ႉယူႇဢေႃႈ။မိူင်းဢၼ်မီးၵႃႈတီႈၽၢႆႇၼႃႈၶဝ်ၼၼ်ႉ ပဵၼ်ၸိူဝ်ႉၼင်ႇသူၼ်ဢူးယဵၼ်ႇဢေႇတိၼ်ႇဝႆႉလႄႈ ၵႃႈတီႈၽၢႆႇလင်ၶဝ်ၸမ်း ပဵၼ်ထိူၼ်ဢၼ်ၽဵဝ်ႈပႅတ်ႈယဝ်ႉၼၼ်ႉဢေႃႈ။
၄ လွင်ႈတၢင်းဢၼ် လႂ် ဢမ်ႇလႆႈလွတ်ႈသေၵႃႈၼႂ်းမိုဝ်းၶဝ်ၼၼ်ႉသေၸိူဝ်ႉသေပိူင်။ႁၢင်ႊၽၢင်ၶဝ်ၼၼ်ႉပဵၼ်မိူၼ်ၸိူဝ်ႉၼင်ႇႁၢင်ႊၽၢင်မႃႉလႄႈ ၶဝ်ၶုၼ်ႇလႅၼ်ႈမိူၼ်ၸိူဝ်ႉ ၼင်ႇတပ်ႉၵူၼ်းသိုၵ်းၶီႇမႃႉၼၼ်ႉဢေႃႈ။
၅ ၶဝ်ဢွၼ်ၵၼ်မေႃးသဵင်လႄႈ ဝႅၼ်ၵျွၵ်းဝႅၼ်ႁူင်ၵႃႈၼိူဝ်ပၢႆလွႆၸိၵ်းလွႆတင်းလၢႆလႄႈ ႁဵတ်းသဵင်လင်သဵင်မေႃးယူႇမိူၼ်ၸိူဝ်ႉၼင်ႇသဵင်လေႃႉရထႃး ဢိၵ်ႇတင်းမိူၼ်ၸိူဝ်ႉၼင်ႇသဵင်ႆးဢၼ်မႆႈယိူဝ်ႈႁႅင်ႈယိူဝ်ႈႁွင် တင်းမိူၼ်ၸိူဝ်ႉၼင်ႇသဵင်မုၵ်ႉၵူၼ်းၸိူဝ်းၵူၼ်းဢၼ်ႁႅင်းယႂ်ႇၼႃႇၼၼ်ႉၶၢင်းတပ်ႉၶၢင်းငႃးႁႂ်ႈလႆႈတိုၵ်းသိုၵ်းၼၼ်ႉဢေႃႈ။
၆ မဵဝ်းၵူၼ်းတင်းလၢႆသၼ်ႇသၼ်ႇသၢႆသၢႆယူႇ ၵႃႈတီႈၽၢႆႇၼႃႈၶဝ်ၼၼ်ႉလႄႈ ၼႃႈၶဝ်တင်းသဵင်ႈတင်းလူင်ႁိဝ်ႇ ၵႂႃႇႁႅင်ႈၵႂႃႇဢေႃႈ။
၇ ၶဝ်ၼၼ်ႉၶုၼ်ႇလႅၼ်ႈမိူၼ်ၸိူဝ်ႉၼင်ႇၵူၼ်းသိုၵ်းလႄႈ ၶိုၼ်ႈလမ်းဝဵင်းမိူၼ်ၸိူဝ်ႉၼင်ႇႁူဝ်ႁၢၼ်ၵူၼ်းသိုၵ်းဢေႃႈ။ၶဝ်ၼၼ်ႉယင်းဢမ်ႇယႃႉမုၵ်ႉၶဝ်ၸိူဝ်းၶဝ်လႄႈ ၸွမ်းသဵၼ်ႈတၢင်းၶဝ်ၵႂႃႇယူႇသိုဝ်ႈသိုဝ်ႈႁင်း ၽႂ်ႁင်းမၼ်းဢေႃႈ။
၈ ၸိူဝ်းၼိုင်ႈလႄႈၸိူဝ်းၼိုင်ႈယင်းဢမ်ႇတွၵ်ႈၵၼ်ဢီးၵၼ်လႄႈ ၸွမ်းသဵၼ်ႈတၢင်းၽႂ်သဵၼ်ႈတၢင်းမၼ်းဢေႃႈ။ပိၵ်ႉသမ်ႉၶဝ်တိူဝ်ႉသႂ်ႇၶူမ်းလၢပ်ႇၶူမ်းလႅဝ်းသေၵေႃႈဢမ်ႇလႆႈၶၢမ်ႇတၢင်းဢၼ်တိူဝ်ႉ ဢၼ်မၢတ်ႇ။
၉ ၶဝ်ၶုၼ်လႅၼ်ႈၵႂႃႇၵႂႃႇၶိုၼ်းၶိုၼ်းၵႃႈၼႂ်းဝဵင်းယူႇ၊ ၶၢမ်ႈလမ်းဝဵင်းယူႇ မိူၼ်ၸိူဝ်ႉၼင်ႇၽူႈလၵ်ႉၼၼ်ႉဢေႃႈ။လိၼ်မိူင်းတူင်ႉၼိုင်ႈယူႇၵႃႈတီႈၽၢႆႇၼႃႈၶဝ်လႄႈ ၾႃႉၵၢင်ႁၢဝ်ၵေႃႈသၼ်ႇဝႆၶွၼ်းၶဝ်ႇယူႇဢေႃႈ။ၵၢင်ဝၼ်း ဢိၵ်ႇတင်းလိူၼ်လပ်းသိင်ႇၵႂႃႇလႄႈ လၢဝ်တင်းလၢႆယင်းဢမ်ႇႁိူဝ်ႈလႅင်းလႄႈယူႇဢေႃႈ။
၁၀ ထႃႇဝရႃႉၽြႃးၵေႃႈ ၵိဝ်သဵင်ၸဝ်ႈ ၵႃႈတီႈၽၢႆႇၼႃႈတပ်ႉမၼ်းၸဝ်ႈလႄႈ တပ်ႉမၼ်းၸဝ်ႈၼၼ်ႉယႂ်ႇၶိုၵ်ႉၼႃႇလူင်လၢင်ဢေႃႈ။တပ်ႉၼၼ်ႉၸီႇယၢင်ႇၸွမ်းၵႃႈၼင်ႇဢၼ်ၵႂၢမ်းမၼ်းၸဝ်ႈမီးၼၼ်ႉလႄႈ တၼ်းၶူဝ်းယႂ်ႇ ၼႃႇဢေႃႈ။
၁၁ မိူဝ်ႉဝၼ်းထႃႇဝရႃႉၽြႃးၼၼ်ႉယႂ်ႇၼႃႇလႄႈ ပဵၼ်ဝၼ်းဢၼ် လီၵူဝ်လီႁႄၼႃႇလူင်လၢင်ဢေႃႈ။ၽူႈ လႂ်တၵ်းၸုၵ်းၶၢမ်ႇယူႇလႆႈ။
သိၵ်ႇႁူဝ်ၸႂ်
၁၂ ပိူဝ်ႈၼႆလႄႈ ထႃႇဝရႃႉၽြႃးမီးဢမိင်ႉၸမ်း တေႃႈလဵဝ်ၼႆႉပႃးတင်းႁူဝ်ၸႂ်သဵင်ႈသဵင်ႈ ဢိၵ်ႇတင်းတၢင်းဢၼ်ၵမ်တၢင်းၵိၼ်၊ တၢင်းဢၼ်ႁႆႈဢၼ်ႁွင်ႉ၊တၢင်းဢၼ်ပွင်ႉၶၢင်းပွင်ႉမိူၼ်ႇသေလႄႈဢွၼ်ၵၼ်ၶိုၼ်ႈမႃးၸူး ၵႃႈတီႈၵဝ်တႃႉ။
၁၃ ယင်းဢမ်ႇၸၵ်ႉဢမ်ႇသိၵ်ႇၶူဝ်းၼုင်ႈသူလႄႈ တၵ်းသိၵ်ႇႁူဝ်ၸႂ်သူသေလႄႈဢွၼ်ၵၼ်ၶိုၼ်းမႃးၸူးၵႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈသူတႃႉ။မၼ်းၸဝ်ႈ မီးၸႂ်သၽေႃးဢၼ်ၸၢင်ႊဢိတ်းလူႁၵ်ႉပႅင်း၊ ၸႂ်သၽေႃးဢၼ်တဵမ်ဝႆႉတင်းမိတ်ႉတႃႇၵရူႉၼႃႇ၊ၸႂ်သၽေႃးဢၼ်ယႂ်ႇဢၼ်ယၢဝ်း၊ ၸႂ်သၽေႃးဢၼ်ၶႂ်ႈႁဵတ်းၵျေးၸူး၊ ၸႂ်သၽေႃးဢၼ်ၸၢင်ႊၶုၵ်းၸႂ်လႆႈမႆႈၸႂ်လူၺ်ႈတၢင်းဢၼ်ပၼ်ဢပျႅတ်ႈၼၼ်ႉဢေႃႈ။
၁၄ ၽူႈ လႂ်ႁူႉလွင်ႈဢၼ်မၼ်းၸဝ်ႈ တၵ်းသမ်ႉၶိုၼ်းမႃးလႄႈ ၶုၵ်းၸႂ်လႆႈမႆႈလူၺ်ႈသေလႄႈႁႂ်ႈတၢင်းလီမင်ႇၵလႃႇဢၼ်ဝႃႈၶိူင်ႈပုၵ်ႉၸေႃႇၽေႃးၸဵၼ်ႇ ဢိၵ်ႇတင်းၶိူင်ႈပုၵ်ႉၸေႃႇ ဢၼ်သွၼ်းလေႃႇတီႈထႃႇဝရႃႉၽြႃးၽြႃးပဵၼ်ၸဝ်ႈသူၼၼ်ႉၸိူဝ်းၼၼ်ႉ ၵိုတ်းၵျၢၼ်ႇဝႆႉႁိုဝ် ဢမ်ႇၵိုတ်းၵျၢၼ်ႇဝႆႉႁိုဝ်ၼၼ်ႉလႆႈ။
၁၅ ဢွၼ်ၵၼ်ပဝ်ႇၼႄးၶရႃႇၵႃႈၼိူဝ်လွႆၸိဢုၼ်ႇတႃႉ။ဢွၼ်ၵၼ်ၶၢၼ်းၶိင်ႇမိူဝ်ႉဝၼ်းဢၼ်တၵ်းလႆႈဝႄႈလႆႈၵမ် တၢင်းၵိၼ်တၢင်းၶူပ်းၼၼ်ႉဝႆႉတႃႉ။ဢွၼ်ၵၼ်ၶၢၼ်းၶိင်ႇမိူဝ်ႉဝၼ်းဢၼ်တၵ်း လႆႈၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ၼၼ်ႉတႃႉ။
၁၆ ဢွၼ်ၵၼ်ႁွင်ႉဢဝ်ၵူၼ်းတင်းလၢႆမႃးလႄႈ ႁႂ်ႈပရိၵ်ႈသၢတ်ႈတင်းလၢႆမူတ်းၸၢင်ႇတႃႉ။ႁႂ်ႈၶဝ်ၸိူဝ်းဢၼ်ဢသၢၵ်ႈယႂ်ႇတင်းလၢႆဢိၵ်ႇတင်းၶဝ်ၸိူဝ်းဢၼ်ယင်းလဵင်ႉယင်းၼုမ်ႇတင်းၶဝ်ၸိူဝ်းဢၼ် ယင်းၵိၼ်ၼူမ်းယူႇၸိူဝ်းၼၼ်ႉမႃးၸူႉၵၼ်တုမ်ၵၼ်တႃႉ။ႁႂ်ႈၽူႈမၢဝ်ႇဢၼ်သွင်ႇမင်ႇၵလႃႇၼၼ်ႉဢွၵ်ႇသေၵႃႈၼႂ်းလုၵ်ႈမၼ်းလႄႈ ႁႂ်ႈလုၵ်ႈယိင်းသၢဝ်ဢၼ်သွင်မင်ႇၵလႃႇၼၼ်ႉ ဢွၵ်ႇသေၵႃႈၼႂ်းၽႃႈ ၵင်ႈဢၼ်လပ်ႉၵင်ႈမၼ်းဝႆႉၼၼ်ႉသေ။
၁၇ ႁႂ်ႈယိတ်ႉပရေႃးႁိၵ်ႈ တင်းလၢႆၶဝ်ၸိူဝ်းဢၼ်ပႂ်ႉဢမူႉထႃႇဝရႃႉၽြႃးၼၼ်ႉဢွၼ်ၵၼ်ႁႆႈႁွင်ႉၵႃႈတီႈ ၵႄႈဝူင်ႈၵၢင်ၼႃႈႁိူၼ်းၸဝ်ႈဢိၵ်ႇတင်းယိတ်ႉပလၢင်ႇယူႇသေလႄႈလဝ်ႈဝႃႈ၊-ထႃႇဝရႃႉၽြႃးတီႈၶႃႈ။ၶႅၼ်းတေႃႈဢိတ်းလူၵူၼ်းၸဝ်ႈႁဝ်းတင်းလၢႆသေၵမ်းတီႈၶႃႈ။ယႃႇပေဢဝ်ဢမူၺ်ႇၸဝ်ႈႁဝ်းဢၢပ်ႈပၼ်တီႈတၢင်းဢၼ်သေႉ ဢၼ်သွမ်းႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ လႆႈဢုပ်ႉပိူင်ႇၶဝ်သေၵမ်းတီႈၶႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ တၵ်းလႆႈဢွၼ်ၵၼ်လၢတ်ႈလႄႈဝႃႈ၊-ၽြႃးပဵၼ်ၸဝ်ႈၶဝ်ၸမ်းမီးၵႃႈ လႂ်၊ဝႃႈၼင်ႇၼႆႁိုဝ်တီႈၶႃႈ။
ၽြႃးပဵၼ်ၸဝ်ႈဢိူဝ်ႉ
၁၈ ပေႃးႁဵတ်းၸိူဝ်ႉၼင်ႇၼၼ်ၸိုင်ထႃႇဝရႃႉၽြႃး တၵ်းမီးၸႂ်ဢၼ်ၶႂ်ႈၸွႆႈၶႂ်ႈထႅမ် မိူင်းမၼ်းၸဝ်ႈ ႁႅင်းယႂ်ႇၼႃႇလႄႈ တၵ်းၵႄႇသႄႇဢိတ်းလူၵူၼ်းမၼ်းၸဝ်ႈတင်း လၢႆၼၼ်ႉဢေႃႈ။
၁၉ ထႃႇဝရႃႉၽြႃးတၵ်းၶိုၼ်းဢိူဝ်ႉလႄႈမီးဢမိင်ႉတီႈၵူၼ်းမၼ်းၸဝ်ႈ တင်းလၢႆသေလႄႈဝႃႈ၊-တူၺ်းလူ။ၵဝ်တၵ်းပၼ်ၶဝ်ႈပိူၵ်ႇၶဝ်ႈသၢၼ်၊ ၼမ်ႉၸပိတ်ႈ၊ၼမ်ႉႉမၼ်းမႃးတီႈသူလႄႈ သူတၵ်းလႆႈဢိမ်ႇလႆႈတဵမ်ဢေႃႈ။ၵမ်းလိုၼ်းၵဝ်တၵ်းဢမ်ႇဢဝ်သူဢၢပ်ႈပၼ်ႁႂ်ႈပဵၼ်တီႈဢၼ် ၵူၼ်းတၢင်ႇၸိူဝ်ႉတၢင်ႇၶိူဝ်းသေႉသွမ်း။
၂၀ ၵဝ်တၵ်းၶၢမ်ႇဢဝ်ၵူၼ်းတပ်ႉၼႃႈတၢင်းႁွင်ႇၸိူဝ်းၼၼ်ႉ ဝႆႉၵႃႈတီႈၵႆယၢၼ်ၵၼ်တင်းသူလႄႈ ႁေႃႈၶဝ်ဢွၵ်ႇပႅတ်ႈၸူး ၵႃႈၼႂ်းတီႈဢၼ်ႁႅင်ႈဢၼ်ႁွင်လႄႈၽူႈ လႂ်ဢမ်ႇယူႇဢမ်ႇသဝ်းၼၼ်ႉဢေႃႈ။ႁူဝ်တပ်ႉမၼ်းတၵ်းဝၢႆႇၼႃႈတေႃႇပၢင်ႇလၢႆႇၼႃႈဝၼ်းဢွၵ်ႇယူႇ၊ ႁၢင်တပ်ႉမၼ်းတၵ်းဝၢႆႇၼႃႈတေႃႇပၢင်လၢႆႇၼႃႈဝၼ်းတူၵ်းယူႇသေဢေႃႈ။ဢၢႆဢၼ်မဵၼ်တူႇမၼ်းတၵ်းဢွၵ်ႇလႄႈ ဢၢႆဢၼ်မဵၼ်ၼဝ်ႈမၼ်းတၵ်းမိုတ်းမိူဝ်ၵႂႃႇၵွပ်ႈပိူဝ်ႈဢၼ်မၼ်းၸဝ်ႈႁဵတ်း လွင်ႈတၢင်းဢၼ်ယႂ်ႇ ၼႃႇလူင်လၢင်ၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၁ မိူင်းၸဝ်ႈဢိူၺ်း။ယႃႇပေမႆႈၸႂ်။မီးတၢင်းဢၼ်ၸူမ်းသိူဝ်းလႄႈသႂၢင်ႇၸႂ်တႃႉ။ထႃႇဝရႃႉၽြႃးတၵ်းႁဵတ်းလွင်ႈတၢင်းဢၼ်ယႂ်ႇၼႃႇလူင်လၢင်ဢေႃႈ။
၂၂ တူဝ်ထိူၼ်ႇႁၢႆႉၶဝ်ဢိူၺ်း။ယႃႇပေမႆႈၸႂ်။တူၼ်ႈယိူဝ်ႈတူၼ်ႈယႃႈ ၵႃႈတီႈထိူၼ်ႇတီႈၶိူဝ်းၼၼ်ႉဢွၵ်ႇမႃးယူႇ၊တူၼ်ႈမႆႉတူၼ်ႈတွၵ်ႇမၢၵ်ႇမၢၵ်ႇယူႇ၊ တူၼ်ႈမၢၵ်ႇလိူဝ်ႇသၢင်းၽေႃးဢိၵ်ႇတင်း တူၼ်ႈၶိူဝ်းမၢၵ်ႇၸပိတ်ႈၵေႃႈ ၽူၵ်ႈလီႁႅင်းလီမႃးယူႇဢေႃႈ။
၂၃ ၵူၼ်းဝဵင်းၸိဢုၼ်ႇၶဝ်ဢိူၺ်း။ဢွၼ်ၵၼ်ၸူမ်းသိူဝ်းလႄႈပိုင်ႈဢိင်ထႃႇဝရႃႉၽြႃးၽြႃးပဵၼ်ၸဝ်ႈသူသေလႄႈ သႂၢင်ႇၸႂ်သိူဝ်းၸႂ်ယူႇတႃႉ။လွင်ႈမၼ်းၸမ်းမၼ်းၸဝ်ႈတၵ်းႁႂ်ႈၽူၼ်ႁူဝ်ပီႊတူၵ်းမၢၼ်ႇလီမႅၼ်ႈလီလႄႈ ႁႂ်ႈၽူၼ်ဢၼ်ယႂ်ႇၼႃႇဢၼ်ဝႃႈၽူၼ်ႁူဝ်ပီႊ ဢိၵ်ႇတင်းၽူၼ်ႁၢင်ပီႊၸိူဝ်းၼၼ်ႉတူၵ်းပုၼ်ႈသူ မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉဢေႃႈ။
၂၄ တလၢင်းယဵပ်ႇၶဝ်ႈတင်းလၢႆတၵ်းတဵမ်ဝႆႉတင်းၶဝ်ႈပိူၵ်ႇလႄႈ ၶိူင်ႈဢၼ်ၼူတ်ႈမၢၵ်ႇၸိူဝ်းၼၼ်ႉၵေႃႈ တၵ်းလူၼ်ႉဝႆႉတင်းၼမ်ႉၸပိတ်ႈတင်းၼမ်ႉမၼ်း ဢေႃႈ။
၂၅ ၼင်ႇၼၼ်လႄႈၶဝ်တၵ်းဢဝ်ၶူပ်ႇပီႊဢၼ်မႅင်းၵႅင်းဢရႃႇၽႃႉ၊မႅင်းၵႅင်းယႃႇလိၵ်ႉ၊မႅင်းၵႅင်းၶႃႇသိလ၊မႅင်းၵႅင်းၵႃႇၸမ်ႇ ဢၼ်ဝႃႈမႁႃႇပူဝ်ႇပႃႇၵဝ်ဢၼ်ၵဝ်ပွႆႇၸႂ်ႉၸူးတီႈသူၸိူဝ်းၼၼ်ႉၶူပ်းၵိၼ်ၼၼ်ႉ ၶိုၼ်းပၼ်တီႈ သူၼမ်ၼႃႇဢေႃႈ။
၂၆ သူတၵ်းလႆႈၵိၼ်ၼမ်ၼႃႇလႄႈဢိမ်ႇတဵမ်ဢေႃႈ။သူတၵ်းယွင်ႈယေႃးၼႃႇမႃႉၸိုဝ်ႈသဵင်ထႃႇဝရႃႉၽြႃး ၽြႃးပဵၼ်ၸဝ်ႈသူ ဢၼ်ႁဵတ်းလွင်ႈ တၢင်းဢၼ်လီဢၢမ်းၼႃႇတီႈသူၼၼ်ႉဢေႃႈ။
၂၇ ၵမ်းလိုၼ်းၵူၼ်းၵဝ်တင်းလၢႆ ဢမ်ႇလႆႈမီးတၢင်းဢၼ်ဢူၵ်းဢၼ်ဢၢႆ။သူတၵ်းလႆႈႁူႉလွင်ႈဢၼ်ၵဝ်မီးယူႇၵႃႈၼႂ်းၵၢင်မဵဝ်းဢိသရေႇလ ဢိၵ်ႇတင်းလွင်ႈဢၼ်ၵဝ်ပဵၼ်ထႃႇဝရႃႉၽြႃးၽြႃးပဵၼ်ၸဝ်ႈသူလႄႈ ဢမ်ႇမီးၽြႃးတၢင်ႇသူႇတၢင်ႇပႃးၼၼ်ႉဢေႃႈ။ၵမ်းလိုၼ်းၵူၼ်းၵဝ်တင်းလၢႆဢမ်ႇလႆႈမီးတၢင်းဢၼ်ဢူၵ်းဢၼ်ဢၢႆ။
ဝၼ်းၽြႃးပဵၼ်ၸဝ်ႈ
၂၈ လိုၼ်းၼၼ်ႉၸင်ႇ ၵဝ်တၵ်းဢဝ်ဝိၺိၺ်ႇၵဝ်သွၼ်းလေႃႇၵႃႈၼိူဝ်မဵဝ်းၵူၼ်း တင်းသဵင်ႈတင်းလူင်ဢေႃႈ။လုၵ်ႈလၢင်းသူႇၼၼ်ႉ တၵ်းလႆႈဢဝ်တင်းၺၢၼ်ႇပရေႃးၽႅတ်ႈႁေႃးလၢတ်ႈဢေႃႈ။ၵူၼ်းထဝ်ႈၵူၼ်းၵႄႇသူၼၼ်ႉ တၵ်းလႆႈၼွၼ်းၽၼ်ႁၼ်ၼီႈမိၵ်ႈတင်းလၢႆဢေႃႈ။ၵူၼ်းၼုမ်ႇၵူၼ်းၵမ်သူၼၼ်ႉၵေႃႈတၵ်းလႆႈႁၼ် ရူႇပႃႇရုင်ႇပျႃႇတိၵ်ႈၸဝ်ႈဢေႃႈ။
၂၉ ၼႂ်းၶိင်ႇမိူဝ်ႈၼၼ်ႉၵေႃႈၵဝ်တၵ်းသွၼ်းလေႃႇဝိၺိၼ်ၵဝ် ၵႃႈၼိူဝ်ၵူၼ်းၸၢႆးၵူၼ်းယိင်း ဢၼ်ႁဵတ်းပွင်ဢမူႉၵဝ်ၸိူဝ်းၼၼ်ႉဢေႃႈ။
၃၀ ၵဝ်တၵ်းၼႄပျႃး လွင်ႈတၢင်းဢၼ်လီဢၢမ်းတင်းလၢႆၵႃႈၼိူဝ်ၾႃႉၵၢင်ႁၢဝ် ဢိၵ်ႇတင်းၸႃႉၸဵမ်လိူတ်ႈလႄႈပိဝ်ၽႆးသဝ်ၵွၼ်းၽႆး၊ ပူၵ်ႉပႃႉၼီႈမိၵ်ႈတင်းလၢႆၵႃႈတႂ်ႈ ၼိူဝ်လိၼ်မိူင်းၼႆႉဢေႃႈ။
၃၁ ၸူဝ်ႈဢၼ်ဝၼ်းယႂ်ႇဝၼ်းလူင်ဢၼ်လီၵူဝ်လီႁႄထႃႇဝရႃႉၽြႃးၼၼ်ႉ ဢမ်ႇပႆႇႁွတ်ႈမႃးၼၼ်ႉၸိုင် ၵၢင်ဝၼ်းတၵ်းပဵၼ်ဢၼ်လပ်းသိင်ႇၽိတ်းၽိတ်းၵႂႃႇဢေႃႈ။လိူၼ်ၵေႃႈတၵ်းပဵၼ် လိူတ်ႈၵႂႃႇဢေႃႈ။
၃၂ မိူဝ်ႈၼၼ်ႉၶဝ်ၸိူဝ်းဢၼ်ႁဵတ်းသူးတွင်းပထၼႃႇတီႈ ၼႃႇမႃႉၸိုဝ်သဵင်ထႃႇဝရႃႉၽြႃးၵႃႈမီးၸိူဝ်းၼၼ်ႉတၵ်းလႆႈႁွတ်ႈထိုင် တၢင်းဢၼ်ၵႄႇသႄႇၶျွတ်ႈဢဝ်ဢေႃႈ။လွင်ႈမၼ်းၸမ်းၵႃႈတီႈလွႆၸိဢုၼ်ႇဝဵင်းယေႇရုသလႅမ်ႇ ၼၼ်ႉတၵ်းလႆႈမီးၶဝ်ၸိူဝ်းဢၼ်လွတ်ႈဢွၵ်ႇၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉၼၼ်ႉဢိၵ်ႇတင်း ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇဢၼ်ထႃႇဝရႃႉၽြႃးႁွင်ႉဢဝ်ၼၼ်ႉဢေႃႈ။