၁
မႅင်းၵႅင်း
၁ ၼုၵ်ႈၵပၢတ်ႈ ထႃႇဝရႃႉၽြႃး ဢၼ်ႁွတ်ႈမႃးတီႈ
ယုဝ်းဢေႇလ လုၵ်ႈၸၢႆးပေႇသူၺ်ႇလ ၼၼ်ႉၸမ်း၊ ၵူၼ်းၸိူဝ်းဢၼ်ဢသၢၵ်ႈယႂ်ႇၶဝ်ဢိူၺ်း။
၂ ဢွၼ်ၵၼ်ထွမ်ႇငိၼ်းတႃႉ။ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ၶဝ်ဢိူၺ်း။ဢွၼ်ၵၼ်ႁႄႈႁူသူတႃႉ။လွင်ႈတၢင်းၸိူဝ်ႉၼင်ႇၼႆၼႆႉယၢမ်ႈပဵၼ်ၼႂ်းၸူဝ်ႈပၢၼ်သူႁိုဝ်။ယၢမ်ႈ ပဵၼ်ၼႂ်းၸူဝ်ႈပၢၼ်ပူႇသူမွၼ်ႇသူႇႁိုဝ်။
၃ ဢွၼ်ၵၼ်မွၵ်ႇလၢတ်ႈတီႈလုၵ်ႈသူလၢင်းသူတႃႉ။ႁႂ်ႈလုၵ်ႈသူလၢင်းသူၸိူဝ်းၼၼ်ႉ ဢွၼ်ၵၼ်မွၵ်ႇလၢတ်ႈတီႈ လုၵ်ႈၶဝ်လၢင်းၶဝ်တႃႉ။ႁႂ်ႈလုၵ်ႈၶဝ်လၢင်းၶဝ်ၸိူဝ်းၼၼ်ႉဢွၼ်ၵၼ်မွၵ်ႇလၢတ်ႈ တီႈၶဝ်ၸိူဝ်းဢၼ်သိုပ်ႇၵႂႃႇတၢမ်းၵႂႃႇ ၸိူဝ်းၼၼ်ႉတႃႉ။
၄ လွင်ႈတၢင်းဢၼ် မႅင်းၵႅင်းၵႃႇၸမ်ႇဝႆႉၵိုတ်းဝႆႉၵျၢၼ်ႇၼၼ်ႉၸိုင် မႅင်းၵႅင်းဢရႃႇၽၵိၼ်ပႅတ်ႈဢေေႃႈ။လွင်ႈတၢင်းဢၼ်မႅင်းၵႅင်းဢရႃႇၽဝႆႉၵိုတ်းဝႆႉၵျၢၼ်ႇၼၼ်ႉၸိုင် မႅင်းၵႅင်းယႃႇလိၵ်ႉၵိၼ်ပႅတ်ႈဢေႃႈ။လွင်ႈတၢင်းဢၼ် မႅင်းၵႅင်းယႃႇလိၵ်ႉဝႆႉၵိုတ်းဝႆႉၵျၢၼ်ႇၼၼ်ႉၸိုင်မႅင်းၵႅင်းၶႃႇသိၵၵိၼ်ပႅတ်ႈဢေႃႈ။
၅ ၵူၼ်းဢၼ်ၵိၼ်လဝ်ႈပူၼ်ႉလိူဝ်ၶဝ်ဢိူၺ်း။ဢွၼ်ၵၼ်တိုၼ်ႇလႄႈႁႆႈႁွင်ႉတႃႉ။ၵူၼ်းဢၼ်ၵိၼ်ၼမ်ႉၸပိတ်ႈပူၼ်ႉလိူဝ်ၶဝ်ဢိူၺ်း။ဢွၼ်ၵၼ်ႁွင်ႉႁႆႈပွင်ႉၶၢင်းၵွပ်ႈပိူဝ်ႈဢၼ်ၼမ်ႉၸပိတ်ႈဢၼ်ဝၢၼ်ႈၼၼ်ႉ ထၢတ်ႇၵႂႃႇသေ ၵႃတီႈသူပ်းသူၼၼ်ႉတႃႉ။
၆ လွင်ႈမၼ်းၸမ်းမဵဝ်းၵူၼ်းဢၼ်ႁႅင်းယႂ်ႇၼႃႇလႄႈ ၼမ်ၼႃႇထၢၼ်ႈပေႃးဢမ်ႇၼပ်ႉဢမ်ႇဢၢၼ်ႇလႆႈၼၼ်ႉ ၶိုၼ်ႈမႃးၵႃႈၼိူဝ်မိူင်းၵဝ်ယဝ်ႉ။ၶဵဝ်ႈမဵဝ်းၶဝ်ၼၼ်ႉပဵၼ်ၸိူဝ်ႉၼင်ႇၶဵဝ်ႈသၢင်ႇသီႈလႄႈ ငႃးမၼ်းၵေႃႈမိူၼ်ၸိူဝ်ႉၼင်ႇငႃးသၢင်ႇသီႈမေႈ ၼၼ်ႉဢေႃႈ။
၇ မၼ်းယႃႉတူၼ်ႈၶိူဝ်းမၢၵ်ႇၸပိတ်ႈၵဝ်လႄႈ ႁႂ်ႈတူၼ်ႈမၢၵ်ႇလိူဝ်ႇသၢင်းၽေႃးၵဝ် ႁၵ်းလႅဝ်ပႅတ်ႈယဝ်ႉ။မၼ်းထၢၵ်ႇပႅတ်ႈပွၵ်ႇပႅတ်ႈပိူၵ်ႇမၼ်းလႄႈဢဝ်လူမ်ႉပႅတ်ႈယဝ်ႉ။မၼ်းႁႂ်ႈၵိင်ႇမၼ်းၶႃႊမၼ်းပဵၼ် ဢၼ်ၽိူၵ်ႇဢၼ်ၶၢဝ်ဝႆႉဢေႃႈ။
၈ ႁႆႈႁွင်ႉၶၢင်းၶီၶၢင်းၽၢၼ်မိူၼ်ၸိူဝ်ႉၼင်ႇလုၵ်ႈယိင်းသၢဝ် ဢၼ်ဢဝ်ၼင်ပေႃႁတ်ႉဢႅဝ်မၼ်း ၵွပ်ႈပိူဝ်ႈၽူဝ်မၼ်းဢၼ်သွင်ႇမင်ႇၵလႃႇႁူမ်ႈပွင်းၵၼ်တင်းမၼ်း ၸဵမ်မိူဝ်ႈဢၼ်ဢသၢၵ်ႈမၼ်းယင်း လဵၵ်ႉယင်းဢွၼ်ႇၼၼ်ႉတႃႉ။
၉ ၶိူင်ႈပုၵ်ႉၸေႃႇၽေႃးၸဵၼ်ႇဢိၵ်ႇတင်းၶိူင်ႈပုၵ်ႉၸေႃႇဢၼ်သွၼ်းလေႃႇၼၼ်ႉထၢတ်ႇၵႂႃႇသေၵႃႈတီႈႁိူၼ်းထႃႇဝရႃႉၽြႃးလႄႈ ယိတ်ႉပရေႃးႁိၵ်ႈဢၼ်ဝႃႈ ၶဝ်ၸိူဝ်းဢၼ်ပႂ်ႉဢမူႉထႃႇဝရႃႉၽြႃးၼၼ်ႉဢွၼ်ၵၼ်ႁႆႈႁွင်ႉပွင်ႉၶၢင်းယူႇဢေႃႈ။
၁၀ ၼႃးလူႉၵႂႃႇယဝ်ႉ။လိၼ်တမ်ႇၼွႆႉမွင်ၸႂ်ဢေႃႈ။လွင်ႈမၼ်းၸမ်းၶဝ်ႈပိူၵ်ႇလူႉၵႂႃႇဢေႃႈ။ၼမ်ႉၸပိတ်ႈဢၼ်ဝၢၼ်သဵင်ႈၵႂႃႇယဝ်ႉ။ၼမ်ႉမၼ်းယွမ်းၵႂႃႇယဝ်ႉ။
၁၁ ၵူၼ်းဢၼ်ႁဵၼ်းၶဝ်ဢိူၺ်း။ဢွၼ်ၵၼ်မီးတၢင်းဢၼ်ဢူၵ်းဢၼ်ဢၢႆလႄႈ ၵူၼ်းဢၼ်လုမ်းလႃးသူၼ်ဢူးယဵၼ်ႇတူၼ်ႈၶိူဝ်းမၢၵ်ႇၸပိတ်ႈၶဝ်ဢိူၺ်း။ႁွင်ႉႁႆႈပွင်ႉၶၢင်းပုၼ်ႈၶဝ်ႈၵျုင်တင်းၶဝ်မူႉယေႃးတႃႉ။လွင်ႈမၼ်းၸမ်း မၢၵ်ႇႁူင်းဢၼ်လႆႈပၢတ်ႇ ၵႃႈၼႂ်းတူင်ႈၼႃး ၼၼ်ႉလူႉၵႂႃႇယဝ်ႉ။
၁၂ တူၼ်ႈၶိူဝ်းမၢၵ်ႇၸပိတ်ႈႁဵဝ်ႇၸွပ်ႈလႄႈ တူၼ်ႈမၢၵ်ႇလိူဝ်ႇသၢင်းၽေႃးယူတ်းႁႅင်ႈယဝ်ႉ။တူၼ်ႈမၢၵ်ႇၸင်ႈ၊ တူၼ်ႈထၼ်း၊ တူၼ်ႈမၢၵ်ႇၶီႈၼူ၊တူၼ်ႈမႆႉထိူၼ်ႇၵႃႈမီးၵေႃႈႁဵဝ်ႇၸွပ်ႈၵႂႃႇယဝ်ႉ။လွင်ႈတၢင်းဢၼ်လီၸူမ်းလီသိူဝ်းၼၼ်ႉ ယူတ်းႁႅင်ႈၵႂႃႇသေၵႃႈတီႈလုၵ်ႈၵူၼ်းတင်းလၢႆ ဢမၢၼ်ႇၶၢၼ်ပဵၼ်ယဝ်ႉ။
၁၃ ယိတ်ႉပရေႃးႁိၵ်ႈၶဝ်ဢိူၺ်း။ဢွၼ်ၵၼ်ဢဝ်ၶူဝ်းၼုင်ႈၼင်ပေႃႁတ်ႉဢႅဝ်သူသေလႄႈႁွင်ႉႁႆႈတႃႉ။သူၸိူဝ်းဢၼ်ပႂ်ႉဢမူႉယိတ်ႉပလၢင်ႇၸဝ်ႈၶဝ်ဢိူၺ်း။ဢွၼ်ၵၼ်ပွင်ႉၶင်းတႃႉ။သူၸိူဝ်းဢၼ်ပႂ်ႉဢမူႉၽြႃးပဵၼ်ၸဝ်ႈၵဝ်ၶဝ်ဢိူၺ်း။ဢွၼ်ၵၼ်မႃးလႄႈၼုင်ႈၶူဝ်းၼုင်ႈၼင်ပေႃယူသေလႄႈ ၼွၼ်းယူႇတင်းၶိုၼ်းတႃႉ။လွင်ႈမၼ်းၸမ်းၶိူင်ႈပုၵ်ႉၸေႃႇၽေႃးၸဵၼ်ႇ ဢိၵ်ႇတင်းၶိူင်ႈပုၵ်ႉၸေႃႇဢၼ်သွၼ်းလေႃႇၼၼ်ႉ ဢမ်ႇလႆႈမီးတၢင်းဢၼ်ဢဝ်သၢၵ်ႈဢဝ်ၵၢပ်ႈၵႃႈတီႈ ႁိူၼ်းၽြႃးပဵၼ်ၸဝ်ႈသူယဝ်ႉ လူင် ပေႇ။
၁၄ ဢွၼ်ၵၼ်ၶၢၼ်းၶိင်ႇမိူဝ်ႉဝၼ်းဢၼ်မူတ်းၸၢင်ႇဢၼ်တၵ်းလႆႈဝႄႈ လႆႈၵမ်တၢင်းၵိၼ်တၢင်းၶူပ်းၼၼ်ႉဝႆႉတႃႉ။ဢွၼ်ၵၼ်ႁွင်ႉပၢဝ်ႇႁွင်ႉသေႃႇၶိင်ႇမိူဝ်ႉဝၼ်းဢၼ်တၵ်းလႆႈၵမ်ၵျၢင်ႉၵႅၼ်ႇၵႅၼ်ႇၶႅင်ၶႅင်ၼၼ်ႉတႃႉ။ႁႂ်ႈၶဝ်ၸိူဝ်းဢၼ်ဢသၢၵ်ႈယႂ်ႇ ဢိၵ်ႇတင်းၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင် မႃးၸူးၵၼ်တုမ်ၵၼ်ၵႃႈတီႈႁိူၼ်းထႃႇဝရႃႉၽြႃး ၽြႃးပဵၼ်ၸဝ်ႈသူသေလႄႈသႅၼ်ႇ ႁွင်ႉႁႃထႃႇဝရႃႉၽြႃးတႃႉ။
၁၅ ၵွပ်ႈပိူဝ်ႈမိူဝ်ႉဝၼ်းၼၼ်ႉလႄႈမီးဢႃႉမင်ႇၵလႃႇဢေႃႈ။မိူဝ်ႉဝၼ်းထႃႇဝရႃႉၽြႃးၸမ်ယဝ်ႉ။တၵ်းႁွတ်ႈမႃးၸိူဝ်ႉၼင်ႇ ၽေးတၢင်းဢၼ်ၸဝ်ႈ ဢၼၼ်ႇတတၼ်းၶူဝ်းယႃႉပႅတ်ႈၼၼ်ႉဢေႃႈ။
၁၆ တၢင်းၵိၼ်တၢင်းၶူပ်းႁဝ်းၼၼ်ႉ ထၢတ်ႇၵႂႃႇသေၵႃႈတီႈသိုဝ်ႈၼႃႈတႂ်ႈတႃႁဝ်းယဝ်ႉဢမ်ႇၸႂ်ႈႁိုဝ်။လွင်ႈတၢင်းဢၼ်လီၸူမ်းသိူဝ်းသႂၢင်ႇၸႂ်ထၢတ်ႇၵႂႃႇသေ ၵႃႈတီႈႁိူၼ်း ၽြႃးပဵၼ်ၸဝ်ႈႁဝ်းယဝ်ႉဢမ်ႇၸႂ်ႈႁိုဝ်။
၁၇ ၸိူဝ်ႉၽၼ်းတင်းလၢႆၼဝ်ႈၵႂႃႇၵႃႈတႂ်ႈၽၢၼ်ႈလိၼ်ဢေႃႈ။ယွင်ႊၶဝ်ႈယေးၶဝ်ႈလူႉၵႂႃႇလႄႈ တိူၵ်ႈၽၼ်ႇတႃႇတင်းလၢႆၵိူၼ်ႇပင်းၵွပ်ႈပိူဝ်ႈဢၼ် တူၼ်ႈၶဝ်ႈႁဵဝ်ႇႁႅင်ႈၵႂႃႇၼၼ်ႉဢေႃႈ။
၁၈ တရိၵ်ႈသၢၼ်ႇတင်းလၢႆ ၶၢင်းၶီၶၢင်းၽၢၼ်ၼႃႇလူင်လၢင်ဢေႃႈ။ၽုင်သူဝ်းတင်းလၢႆယၢပ်ႇၸႂ်ၶၢၼ်ၸႂ်ၵွပ်ႈပိူဝ်ႈတီႈဢၼ်ၵိၼ်ယူႇသေႇသေႇၼၼ်ႉ ဢမ်ႇမီးၼၼ်ႉ လႄႈၽုင်သူဝ်းတင်းလၢႆၵေႃႈလူႉၵႂႃႇဢေႃႈ။
၁၉ ထႃႇဝရႃႉၽြႃးတီႈၶႃႈ။ၶႃႈၸဝ်ႈႁွင်ႉသႅၼ်ႇႁွင်ႉႁႃၸဝ်ႈႁဝ်းတီႈၶႃႈဢေႃႈ။ၽႆးလၢမ်းၽႆးၵိၼ်ၵႃႈတီႈဢၼ်ၵိၼ်ယူႇသေႇသေႇ ၵႃႈၼႂ်းထိူၼ်ႇၸိူဝ်းၼၼ်ႉလႄႈပိဝ်ၽႆးမႆႈတူၼ်ႈမႆႉတူၼ်ႈထိူၼ်ႇၵႃႈမီးၼၼ်ႉ ပႅတ်ႈတီႈၶႃႈယဝ်ႉ။
၂၀ တူဝ်ထိူၼ်ႇႁၢႆႉတင်းလၢႆၵေႃႈ ဢွၼ်ၵၼ်ႁွင်ႉသႅၼ်ႇႁွင်ႉႁႃတီႈၸဝ်ႈႁဝ်းတီႈၶႃႈဢေႃႈ။ၼမ်ႉႁွင်ႊၼမ်ႉၵႄးတင်းလၢႆယူတ်းႁႅင်ႈၵႂႃႇလႄႈ ၽႆးမႆႈၵႃႈတီႈဢၼ်ၵိၼ်ယူႇသေႇသေႇၵႃႈၼႂ်းထိူၼ်ႇၸိူဝ်းၼၼ်ႉတီႈၶႃႈယဝ်ႉ။