Chapter
၄
ၶတ်းၶဵင်ႇႁႅင်းတႃႉတၢင်းဢၼ်ၶိုၼ်းမႄးႁဵတ်း
၁ ရၢၼ်ႇသူႇမဵဝ်းယုတ တင်းမဵဝ်းပိၼ်ႇယႃႇမိၼ်ႇၸိူဝ်းၼၼ်ႉ လႆႈငိၼ်းလွင်ႈဢၼ်ၵူၼ်းမဵဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉ ဢွၼ်ၵၼ်တႄႇႁဵတ်းပိၵ်ႉမၢၼ်ႇပုၼ်ႈထႃႇဝရႃႉၽြႃးပဵၼ်ၸဝ်ႈမဵဝ်း ဢိ သရေႇလ ၼၼ်ႉလႄႈ
၂ ၶဝ်ဢွၼ်ၵၼ်မႃးၸူးတီႈၸေႇရုပပေႇလ တင်းၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ်မဵဝ်းပူႇမဵဝ်းပေႃႈၸိူဝ်းၼၼ်ႉလႄႈလၢတ်ႈဝႃႈ၊-ႁႂ်ႈႁဝ်းလႆႈတႄႇႁဵတ်းလူၺ်ႈၵၼ်တင်းသူသေၵမ်း။ႁဝ်းၵေႃႈဢွၼ်ၵၼ်ႁႃၽြႃးပဵၼ်ၸဝ်ႈသူ မိူၼ်ၸိူဝ်ႉၼင်ႇဢၼ်သူႁႃၼၼ်ႉဢေႃႈ။ႁဝ်းဢွၼ်ၵၼ်ပုၵ်ႉၸေႃႇယိၸ်ႉတီႈမၼ်းၸဝ်ႈယူႇၸႃႉၸဵမ်ၸူဝ်ႈပၢၼ်ဢေႇသရႁတ်ႉတုၼ်ႇၶုၼ်ႁေႃၶမ်းဢႃႇသုရိ ဢၼ်ဢဝ်ႁဝ်းမႃးၵႃႈတီႈမိူင်း ၼႆႉၼၼ်ႉဢေႃႈ။
၃ မိူဝ်ႈဢၼ်ဝႃႈၼင်ႇၼႆၸိုင် ၸေႇရုပပေႇလ ဢိၵ်ႇတင်း ယေႃးသု တင်းၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇလႄႈ ပဵၼ်ငဝ်ႈပဵၼ်ႁူဝ်မဵဝ်းပူႇမဵဝ်းပေႃႈ ဢိသရေႇလ ၸိူဝ်းၼၼ်ႉဢွၼ်ၵၼ်ၶိုၼ်းလၢတ်ႈတီႈၶဝ်လႄႈဝႃႈ၊-သူဢမ်ႇလႆႈၽွမ်ႉလႆႈပႃးလူၺ်ႈၵၼ်တင်းႁဝ်းလႄႈ တႄႇႁဵတ်းႁိူၼ်းပုၼ်ႈၽြႃးပဵၼ်ၸဝ်ႈႁဝ်း။တူဝ်ႁဝ်းတၵ်းတႄႇႁဵတ်းပုၼ်ႈထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလ ၸွမ်းၵႃႈၼင်ႇဢၼ် ၵုရု ၶုၼ်ႁေႃၶမ်းပေႇရသိ မီးဢမိင်ႉၼၼ်ႉဢေႃႈ၊ ဝႃႈၼင်ႇၼႆဢေႃႈ။
၄ မိူဝ်ႈၼၼ်ႉၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉ ဢွၼ်ၵၼ်ႁႂ်ႈႁႅင်းမိုဝ်းၵူၼ်းမဵဝ်းယုတဢူၼ်ႈၵႂႃႇယွမ်းၵႂႃႇလႄႈ ယႃႉယုၵ်ႉဢမူႉတၢင်းဢၼ်ၶဝ်တႄႇ ႁဵတ်းၼၼ်ႉသေလႄႈ
၅ ၸၢင်ႈငႃဢဝ်ၶဝ်ၸိူဝ်းဢၼ်ဢွၼ်ႁူဝ်လႄႈ လၢတ်ႈဢမူႉႁႂ်ႈလႆႈႁႄႉၶႅၼ်တၢင်းၵျၢမ်ႇတၢင်းပွင်ၶဝ်ၼၼ်ႉ ၸႃႉၸဵမ်ၸူဝ်ႈပၢၼ်ၵုရုၶုၼ်ႁေႃၶမ်းပေႇရသိၼၼ်ႉတေႃႇထိုင်ႁွတ်ႈၸူဝ်ႈပၢၼ် တႃႇရိၶုၼ် ႁေႃၶမ်းပေႇရသိၼၼ်ႉဢေႃႈ။
၆ ၼႂ်းမိူဝ်ႈဢၼ်ဢႃႇသုၺ်ႇရု တႄႇၸႃႉၸၢမ်ႇႁၢင်ႈၸၢမ်ႇႁေႃၼၼ်ႉၶဝ်ဢွၼ်ၵၼ်ဢဝ်လိၵ်ႈ ဢၼ်လဝ်ႈလၢတ်ႈတၢင်ႇဢပျႅတ်ႈတီႈၵူၼ်းမိူင်းယုတ ဢိၵ်ႇတင်းၵူၼ်းဝဵင်းယေႇရုသလႅမ်ႇ တင်းလၢႆၼၼ်ႉပၼ်ၵႂႃႇဢေႃႈ။
၇ ၼႂ်းၸူဝ်ႈပၢၼ် ဢႃႇတၸေႇရိတ်ႉ ၼၼ်ႉ ပိသလမ်ႇ၊မိသရေႇတတ်ႉ၊ တပေႇလ ဢိၵ်ႇတင်းၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇလႄႈ ပဵၼ်ၵေႃႉသေႈဢၼ်ႁူမ်ႈပွင်းၵၼ်တင်းၶဝ်ၼၼ်ႉဢွၼ်ၵၼ်ဢဝ်လိၵ်ႈဢၼ်လဝ်ႈလၢတ်ႈဢၼ်ဢဝ်တင်း တူဝ်လိၵ်ႈဢႅၵ်ႉၶရႃႇသုရိတႅမ်ႈလႄႈဢဝ်တင်းၵႂၢမ်းၽႃႇသႃႇသုရိ လဝ်ႈလၢတ်ႈၼၼ်ႉပၼ်ၵႂႃႇတီႈဢႃႇတၸေႇရိတ်ႉ ၶုၼ်ႁေႃၶမ်းပေႇရ သိၼၼ်ႉဢေႃႈ။
၈ ရေႇႁူမ်ႇ ၵေႃႉဢၼ်ဢုပ်ႉၵႃႈၼိူဝ်တိူၵ်ႈလိၵ်ႈတင်းသိမသေႇ ၸရေးဝဵင်းၸိူဝ်းၼၼ်ႉႁဵတ်းရၢၼ်ႇတၢင်းၽိတ်းတီႈဝဵင်းယေႇရုသလႅမ်ႇ သေလႄႈပၼ်လိၵ်ႈဢၼ်ၸိူဝ်ႉၼင်ႇၼႆၵႂႃႇတီႈၶုၼ်လူင် ဢႃႇတၸေႇ ရိတ်ႉဢေႃႈ။
၉ လိၵ်ႈၼၼ်ႉၸိုင်ရေႇႁူမ်ႇ ၵေႃႉဢၼ်ဢုပ်ႉၵႃႈၼိူဝ်တိူၵ်ႈလိၵ်ႈ၊ သိမသေႇ၊ ၸရေးဝဵင်းဢိၵ်ႇတင်းၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇလႄႈ ပဵၼ်ၵေႃႉသေႈဢၼ်ႁူမ်ႈပွင်းၵၼ်တင်းၶဝ်ၼၼ်ႉ ၵူၼ်းမိူင်းတိၼေႇ၊ၵူၼ်းမိူင်းဢၽႃႇသသၵ်ႉ၊ ၵူၼ်းမိူင်းတႃႇပေႇလ၊ ၵူၼ်းမိူင်းဢၽႃႇရသ၊ၵူၼ်းမိူင်းဢႃႇၶေႇဝ၊ ၵူၼ်းမိူင်းပႃႇပုလုၼ်ႇ၊ၵူၼ်းမိူင်းသသၼၵ်ႉ၊ ၵူၼ်းမိူင်းတေႇႁဝ၊ၵူၼ်း မိူင်းဢေႇလမ်ႇ၊
၁၀ တင်းၵူၼ်းတၢင်ႇၸိူဝ်ႉတၢင်ႇမဵဝ်းဢၼ်ၶုၼ်ဢႃႇသၼပ်ႉပႃႇ ဢၼ်ယႂ်ႇမျၢတ်ႈဢဝ်မႃးလႄႈၶျႃးတီႈယူႇဝႆႉၵႃႈတီႈဝၢၼ်ႈ ဝဵင်းသမႃႇရိ ဢိၵ်ႇတင်းမိူင်းဢၼ်မီးၵႃႈတီႈ ၽၢႆႇဝၼ်းတူၵ်းၼမ်ႉႁွင်ႊၼၼ်ႉ ၸိူဝ်းၼၼ်ႉဢွၼ်ၵၼ်တႅမ်ႈဢေႃႈ။
၁၁ လၢၵ်ႈၶၢမ်ႇလိၵ်ႈဢၼ်ၶဝ်ပၼ်ၵႂႃႇတီႈၶုၼ်လူင်ဢႃႇတၸေႇရိတ် ၼၼ်ႉဝႃႈၸမ်း၊-ၶႃႈၸဝ်ႈႁဝ်းၶဝ်ဢၼ်ယူႇၵႃႈတီႈၽၢႆႇဝၼ်းတူၵ်းၼမ်ႉႁွင်ႊၸိူဝ်းၼႆႉ လဝ်ႈလၢတ်ႈၼႂ်းဝၼ်းဢၼ် ၸိူဝ်းၼႆႉတီႈၶႃႈဢေႃႈ။
၁၂ ၶႅၼ်းတေႃႈႁႂ်ႈၸဝ်ႈၶုၼ်လူင်ႁူႉလွင်ႈဢၼ်ၵူၼ်းမဵဝ်း ယုတ ဢၼ်လုၵ်ႉသေၵႃႈတီႈၸဝ်ႈႁဝ်းႁွတ်ႈမႃးၵႃႈတီႈဝဵင်း ယေႇရုသလႅမ်ႇ တီႈဢၼ်ၶႃႈၸဝ်ႈႁဝ်းၶဝ်ယူႇၼႆႉၸိူဝ်းၼၼ်ႉ တႄႇႁဵတ်းဝဵင်းဢၼ်ႁၢႆႉယုတ်ႈလႄႈၸၢင်ႊလုၵ်ႉၽိုၼ်ႉယူႇသေလႄႈ ၶျႃးငဝ်ႈႁၢၵ်ႈလမ်းဝဵင်းလႄႈၸမ်ႈတၵ်းယဝ်ႉတၵ်း တူဝ်ႈၼၼ်ႉသေၵမ်းတီႈၶႃႈ။
၁၃ ၶႅၼ်းတေႃႈႁႂ်ႈၸဝ်ႈၶုၼ်လူင်ႁူႉလွင်ႈဢၼ် ပေႃးသမ်ႉၶိုၼ်းတႄႇႁဵတ်းဝဵင်းၼၼ်ႉလႄႈ ယဝ်ႉတူဝ်ႈယဝ်ႉၸိုင် ၶဝ်တၵ်းဢမ်ႇသၢၵ်ႈဢမ်ႇပၼ်ၶွၼ်ႇဝၢၼ်ႈၶွၼ်ႇမိူင်း၊ ၶွၼ်ႇၵႃႉၶွၼ်ၶၢႆ၊ၶွၼ်ႇတႃႈၶွၼ်ႇၵၢင်လႄႈ ဢၵျူဝ်းၶုၼ်ႁေႃၶမ်းၵူႈၸူဝ်ႈၵူႈပၢၼ် တၵ်းလူႉၶႃႈဢေႃႈ။
၁၄ ၵွပ်ႈပိူဝ်ႈဢၼ်ၶႃႈၸဝ်ႈႁဝ်းၶဝ်ပဵၼ်ၵေႃႉဢၼ်လႆႈၶၢမ်ႇတၢင်းဢၼ်လဵင်ႉဢၼ်လူလူၺ်ႈႁေႃၸဝ်ႈယူႇလႄႈ ဢမ်ႇထုၵ်ႇလီႁၼ်တၢင်းဢၼ်မုၼ်ၽုင်းၸဝ်ႈၶုၼ်လူင်သုတ်ႈၵႂႃႇယွမ်းၵႂႃႇၼၼ်ႉလႄႈ ၶႃႈၸဝ်ႈႁဝ်းၶဝ်ပွႆႇၸႂ်ႉလႄႈလဝ်ႈလၢတ်ႈပၼ်ငိၼ်းၵႂႃႇတီႈၸဝ်ႈၶုၼ်လူင် ႁႂ်ႈလႆႈၸႅတ်ႈထၢမ်ၸႅတ်ႈတူၺ်း လိၵ်ႈဢၼ်မၢတ်ႈမၢႆလူၺ်ႈလွင်ႈပူႇၸဝ်ႈ မွၼ်ႇၸဝ်ႈၼၼ်ႉတီႈၶႃႈဢေႃႈ။
၁၅ ပေႃးႁဵတ်းၸိူဝ်ႉၼင်ႇၼၼ်ၸိုင် ၸဝ်ႈၶုၼ်လူင်တၵ်းထူပ်းႁၼ်ၵႃႈၼႂ်းလိၵ်ႈဢၼ်မၢတ်ႈမၢႆဝႆႉၼၼ်ႉလႄႈ ႁူႉလွင်ႈဢၼ်ဝဵင်းၼႆႉပဵၼ်ဝဵင်းဢၼ်ၸၢင်ႊလုၵ်ႉၽိုၼ်ႉ၊ ဝဵင်းဢၼ်ၸၢင်ႊယႃႉယူၵ်ႉဢၵျူဝ်းၶုၼ်ႁေႃၶမ်းတင်းဢၵျူဝ်းသိုင်ႇၸိုင်ႈဝၢၼ်ႈမိူင်းၸဝ်ႈလႄႈ လုမ်းလႃးတၢင်းၵျၢမ်ႇတၢင်းပွင်ဢၼ်လုၵ်ႉၽိုၼ်ႉ ၵႃႈၼႂ်းမၼ်းၶိင်ႇၵႃႇလႃႉမိူဝ်ႈၵွၼ်ႇဢွၼ်ၼႆႉၼၼ်ႉလႄႈ လႆႈၶၢမ်ႇတၢင်းဢၼ်တိုၵ်းဢၼ်ယႃႉ ၵွပ်ႈပိူဝ်ႈလွင်ႈတၢင်းၼၼ်ႉတီႈၶႃႈဢေႃႈ။
၁၆ ၶႃႈၸဝ်ႈႁဝ်းၶဝ်လဝ်ႈလၢတ်ႈပၼ်ငိၼ်း လွင်ႈဢၼ်ပေႃးသမ်ႉၶိုၼ်းတႄႇႁဵတ်းဝဵင်းၼၼ်ႉလႄႈ လမ်းဝဵင်းယဝ်ႉတူဝ်ႈယဝ်ႉၸိုင် ၸဝ်ႈႁဝ်းတၵ်းဢမ်ႇလႆႈဢုပ်ႉပိူင်ႇၵႃတီႈၽၢႆႇဝၼ်းတူၵ်းၼမ်ႉႁွင်ႊၼႆႉၼၼ်ႉတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၇ လိၵ်ႈဢၼ်ၶုၼ်ႁေႃၶမ်း ၶိုၼ်းပၼ်ၵႂႃႇတီႈရေႇႁူမ်ႇၵေႃႉဢၼ်ဢုပ်ႉၵႃႈၼိူဝ်တိူၵ်ႈလိၵ်ႈတင်းသိမသေႇ ၸရေးဝဵင်းတင်း ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇလႄႈပၼ်ၵေႃႉသေႈႁူမ်ႈပွင်းၵၼ်တင်း ၶဝ်ၸိူဝ်းဢၼ်ယူႇၵႃႈတီႈဝဵင်းသမႃႇရိ ဢိၵ်ႇတင်းၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇလႄႈယူႇၵႃႈတီႈၽၢႆႇဝၼ်းတူၵ်းၼမ်ႉႁွင်ႊၼၼ်ႉလႄႈဝႃႈၸမ်း၊-ႁႂ်ႈသူၵတ်းယဵၼ်ၶျၢမ်းသႃႇသေၵမ်းလူၺ်ႈ။ၵဝ်တႅမ်ႈဢၼ်ၸိူဝ်းၼႆႉဢေႃႈ။
၁၈ လိၵ်ႈဢၼ်သူင်ႇမႃးပၼ်တီႈၵဝ်ၼၼ်ႉၸိုင် ၶိုၼ်းပျၢၼ်ႇဢၼၢၵ်ႈမၼ်းသေလႄႈ ၽတ်းၵႃႈတီႈၽၢႆႇၼႃႈၵဝ်ယဝ်ႉ။ ၵဝ်မီးဢမိင်ႉသေလႄႈ ဢွၼ်ၵၼ်ၸႅတ်ႈထၢမ်ၸႅတ်ႈတူၺ်းလႄႈ လႆႈႁူႉလွင်ႈဢၼ်ဝဵင်းၼၼ်ႉၸၢင်ႊၶၼ်းၽိုၼ်ႉၶိုၼ်းႁဵတ်း တီႈၶုၼ်ႁေႃၶမ်းၼမ်ၼႃႇမိူဝ်ႈၵွၼ်ႇဢွၼ်ၼႆႉၼၼ်ႉ လွင်ႈဢၼ်ပဵၼ်ဝဵင်းဢၼ်ႁဵတ်း တၢင်းဢၼ်လုၵ်ႉၽိုၼ်ႉ၊
၁၉ တၢင်းဢၼ်ၵျၢမ်ႇပွင်တၢင်းဢၼ်ၶတ်းၵၼ်တင်းၶုၼ်ၼၼ်ႉၵႃႈၼႂ်းမၼ်း၊ လွင်ႈဢၼ်ၶုၼ်ႁေႃၶမ်း ဢၼ်တၼ်းၶူဝ်းယႂ်ႇၼႃႇ ဢၼ်ဢုပ်ႉပိူင်ႇၽၢႆႇဝၼ်းတူၵ်းၼမ်ႉႁွင်ႊ တင်းသဵင်ႈတင်းမူတ်း လႄႈ
၂၀ ၶၢမ်ႇဢဝ်ၶွၼ်ႇဝၢၼ်ႈၶွၼ်ႇမိူင်း၊ၶွၼ်ႇၵႃႉၶွၼ်ႇၶၢႆ ၶွၼ်ႇတႃႈၶွၼ်ႇၵၢင်ၸိူဝ်းၼၼ်ႉယၢမ်ႈယူႇၵႃႈၼႂ်း ဝဵင်းယေႇရုသလႅမ်ႇၼၼ်ႉဢေႃႈ။
၂၁ ပိူဝ်ႈၼႆလႄႈသူဢွၼ်ၵၼ်မီးဢမိင်ႉ ႁႂ်ႈၶဝ်ၵိုတ်းသဝ်းသေလႄႈ ယင်းဢမ်ႇတႄႇဢမ်ႇႁဵတ်းဝဵင်းလႄႈ ယူႇတေႃႇထိုင်ႁွတ်ႈၵဝ်မီး ဢမိင်ႉၼၼ်ႉတႃႉ။
၂၂ ဢွၼ်ၵၼ်ႁဵတ်းသတိယႃႇႁႂ်ႈလႆႈထိူင်းလႆႈၼၢၼ်းၼႂ်းဢမူႉၼႆႉတႃႉ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ဢၵျူဝ်းၶုၼ်ႁေႃၶမ်းၵူႈၸူဝ်ႈၵူႈပၢၼ်တၵ်းလႆႈ လူႉၼင်ႇႁိုဝ်၊ဝႃႈၼင်ႇၼႆဢေႃႈ။
၂၃ ၽတ်းလၢၵ်ႈၶၢမ်ႇလိၵ်ႈၶုၼ်လူင်ဢႃႇတၸေႇရိတ်ႉ ၼၼ်ႉၵႃႈတီႈၽၢႆႇၼႃႈရေႇႁူမ်ႇတင်း ၸရေးဝဵင်းသိမသေႇ ဢိၵ်ႇတင်းၵေႃႉသေႈဢၼ်ႁူမ်ႈပွင်းၵၼ်တင်း ၶဝ်ၼၼ်ႉသေယဝ်ႉၶဝ်ၼၼ်ႉဢွၼ်ၵၼ်ၵႂႃႇၸူးၵႃႈတီႈဝဵင်းယေႇရုသလႅမ်ႇ တီႈဢၼ်ၵူၼ်းမဵဝ်းယုတ တင်းလၢႆမီးၼၼ်ႉၶၼ်ၶၼ်ၽႂ်းၽႂ်းလႄႈ ႁဵတ်းပေႉႁဵတ်းၼႅင်ႇႁႂ်ႈၶဝ်ၵိုတ်းသဝ်းသေဢေႃႈ။
၂၄ ၼင်ႇၼၼ်လႄႈ တၢင်းဢၼ်တႄႇႁဵတ်းႁိူၼ်းၽြႃးပဵၼ်ၸဝ်ႈၵႃႈတီႈဝဵင်းယေႇရုသလႅမ်ႇ ၼၼ်ႉလႆႈထၢတ်ႇၵႂႃႇလႄႈ ဢမ်ႇလႆႈႁဵတ်းလႆႈသၢင်ႈတေႃႇထိုင်ႁွတ်ႈတႃႇရိၶုၼ်ႁေႃၶမ်း ပေႇရသိ ၸၢမ်ႇႁၢင်ႈၸၢမ်ႇႁေႃသွင်ပီႊၼၼ်ႉဢေႃႈ။