၉
ဢိသရေႇလတေလႆႈၶၢမ်ႇယႃႉလႅဝ်
၁ လၢႆးသမ်ႉၵဝ်ႁၼ် ထႃႇဝရႃႉၽြႃး ၸုၵ်းယူႇၵႃႈၼိူဝ်ယိတ်ႉပလၢင်ႇလႄႈမီးဢမိင်ႉလႄႈဝႃႈ၊ ပေႃႉယႅၼ်ႉၶိုဝ်ႇၽၵ်းတူႁႂ်ႈသဝ်ၽၵ်းတူသၼ်ႇၶွၼ်းလႄႈ ဢဝ်ၶဝ်ၵိူၼ်ႇပင်းတူၵ်းသႂ်ႇၵႃႈၼိူဝ်ႁူဝ်ၵူၼ်းၵႃႈမီးတႃႉ။ၵဝ်တၵ်းဢဝ်လုၵ်ႈၶဝ်လၢင်းၶဝ် တၢႆလူၺ်ႈလၢပ်ႇလူၺ်ႈလႅဝ်းဢေႃႈ။ၵေႃႉဢၼ်ဢွၵ်ႇပၢႆႈၼၼ်ႉဢမ်ႇလႆႈဢွၵ်ႇပၢႆႈ။
၂ ၵေႃႉဢၼ်လွတ်ႈဢွၵ်ႇၼၼ်ႉဢမ်ႇလႆႈလွတ်ႈဢွၵ်ႇ။ပိၵ်ႉသမ်ႉ ၶဝ်ၶုတ်းၶုမ်ၶုတ်းႁူးပွင်ႇၶဝ်ႈႁွတ်ႈထိုင်ၵႃႈၼႂ်းမိူင်းမရၼႃႉသေၵေႃႈ ၶႅၼ်မိုဝ်းၵဝ်တၵ်းၼုၵ်ႈဢဝ်ၶဝ်ဢွၵ်ႇသေၵႃႈၼႂ်းၼၼ်ႉဢေႃႈ။ပိၵ်ႉသမ်ႉၶဝ်ၶိုၼ်ႈၵႃႈၼိူဝ်ၾႃႉၵၢင်ႁၢဝ်သေၵေႃႈၵဝ်တၵ်းၶျႃးၶဝ်တူၵ်းသေၵႃႈတီႈ ၼၼ်ႉဢေႃႈ။
၃ ပိၵ်ႉသမ်ႉၶဝ်တဵတ်ႇမႅပ်းယူႇၵႃႈၼိူဝ်ပၢႆၸိၵ်းပၢႆလွႆ ၵရမေႇလ သေၵေႃႈၵဝ်တၵ်းႁႃလႄႈဢဝ်ၶဝ်ဢွၵ်ႇသေၵႃႈတီႈၼၼ်ႉဢေႃႈ။ပိၵ်ႉသမ်ႉၶဝ်တဵတ်ႇမႅပ်းသေမၢၵ်ႇတႃၵဝ်လႄႈ ယူႇၵႃႈတီႈတႂ်ႈပိုၼ်ႉၼမ်ႉသမ်ႇမုၵ်ႉတြႃႇသေၵေႃႈ ၵဝ်တၵ်းသင်ႇလၢတ်ႈၼၵႃးလႄႈႁႂ်ႈ မၼ်းၶူပ်းၶဝ်ဢေႃႈ။
၄ ပိၵ်ႉသမ်ႉၶဝ်ၶၢမ်ႇတၢင်းဢၼ်သိမ်းဢဝ်ၵႂႃႇ ၵႃႈတီႈၽၢႆႇၼႃႈရၢၼ်ႇသူႇၶဝ်ၸိူဝ်းၼၼ်ႉသေၵေႃႈ ၵဝ်တၵ်းသင်ႇလၢတ်ႈလၢပ်ႈလႅဝ်း ၵႃႈၼႂ်းတီႈၼၼ်ႉလႄႈႁႂ်ႈဢဝ်ၶဝ်တၢႆဢေႃႈ။ၵဝ်တၵ်းဢဝ်တႃၵဝ်ယႅၵ်ႉတူၺ်းၶဝ်ႁႂ်ႈလႆႈႁဵတ်းၵျေးၸူးဢမ်ႇၸႂ်ႈ၊ ႁႂ်ႈလႆႈႁဵတ်းဢပျႅတ်ႈသႂ်ႇၵူၺ်းဢေႃႈ။
၅ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးပဵၼ်ၸဝ်ႈၼၼ်ႉပဵၼ်ၸဝ်ႈဢၼ်တိူဝ်ႉသႂ်ႇလိၼ်မိူင်းလႄႈ လိၼ်မိူင်းပဵၼ်ၼမ်ႉၵႂႃႇလႄႈ ၶဝ်ၵႃႈဢၼ်ယူႇၵႃႈၼိူဝ်မၼ်းၼၼ်ႉလႆႈၶၢင်းၶီၶၢင်းၽၢၼ်ယူႇၼၼ်ႉဢေႃႈ။တၵ်းလုၵ်ႉမိူၼ်ၸိူဝ်ႉၼင်ႇၼမ်ႉႁွင်ႊလူင်ၼၼ်ႉလႄႈ ၵမ်းလိုၼ်းယွမ်းတူၵ်းၵႂႃႇမိူၼ်ၸိူဝ်ႉၼင်ႇၼမ်ႉႁွင်ႈဢေႇၵႅပ်ႉတုၼၼ်ႉဢေႃႈ။
၆ မၼ်းၸဝ်ႈ ႁဵတ်းလုၵ်းႁၢၼ်ႉၼိူဝ်ၸဝ်ႈၵႃႈၼိူဝ်ၾႃႉၵၢင်ႁၢဝ်လႄႈ တႄႇႁဵတ်းငဝ်ႈၺၢၵ်ႈၸဝ်ႈၵႃႈၼိူဝ်လိၼ်မိူင်းဢေႃႈ။မၼ်းၸဝ်ႈႁွင်ႉဢဝ်ၼမ်ႉသမ်ႇမုၵ်ႉတြႃႇလႄႈဢဝ်သွၼ်းလေႃႇသႂ်ႇၵႃႈၼိူဝ်ၼႃႈလိၼ်မိူင်းဢေႃႈ။မၼ်းၸဝ်ႈမီး ၼႃႇမႃႉၸို်ဝ်ႈသဵင်ထႃႇဝရႃႉၽြႃးဢေႃႈ။
၇ ၵူၼ်းမဵဝ်းဢိသရေႇလတင်းလၢႆၶဝ်ဢိူၺ်း။သူပဵၼ်ၸိူဝ်ႉၼင်ႇၵူၼ်းမဵဝ်းၵုသ ၸိူဝ်းၼၼ်ႉတီႈၵဝ်ဢမ်ႇၸႂ်ႈႁိုဝ်၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။ ၵဝ်ၼုၵ်ႈဢဝ်မဵဝ်းဢိသရေႇလ ဢွၵ်ႇသေၵႃႈၼႂ်းမိူင်းဢေႇၵႅပ်ႉတုၵူၼ်း ၽိလိတ်ႉတိ တင်းလၢႆဢွၵ်ႇသေၵႃႈၼႂ်းမိူင်းၵပ်ႉတေႃႇရ၊ ၵူၼ်းသုရိ တင်းလၢႆဢွၵ်ႇသေၵႃႈၼႂ်းမိူင်းၵိရ မႃးယဝ်ႉဢမ်ႇၸႂ်ႈႁိုဝ်။
၈ တႃၸဝ်ႈထႃႇဝရႃႉၽြႃးလူတူၺ်းသိုင်ႇၸိုင်ႈဝၢၼ်ႈမိူင်း ဢၼ်မီးဢပျႅတ်ႈၼၼ်ႉလႄႈ ၵဝ်တၵ်းပႄႇမၼ်းပႅတ်ႈသေၵႃႈၼိူဝ် လိၼ်မိူင်းဢေႃႈ။ၼႂ်းဝႃႈၼၼ်သေၵေႃႈၵဝ်တၵ်းဢမ်ႇယႃႉမဵဝ်းယႃႇၵုပ်ႉပႅတ်ႈမူတ်းမူတ်းသဵင်ႈသဵင်ႈ ဝႃႈၼင်ႇၼႆ ထႃႇဝရႃႉၽြႃးမီးဢမိင်ႉဢေႃႈ။
၉ တူၺ်းလူ။ၵဝ်တၵ်းမီးဢမိင်ႉလႄႈၶိုင်မဵဝ်းဢိသရေႇလ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းမိူၼ်ၸိူဝ်ႉၼင်ႇဢၼ် ဢဝ်ၶိုင်ၶိုင်ၶဝ်ႈသၢၼ်ၼၼ်ႉ ဢေႃႈ။
၁၀ ဢမ်ႇလႆႈတူၵ်းၵႃႈတီႈလိၼ်သမေဵတ်ႉ။ၵူၼ်းၵဝ်ၵႃႈဢၼ်မီးဢပျႅတ်ႈၼမ်ၼႃႇလႄႈ လၢတ်ႈလႄႈဝႃႈ၊ၽေးဢူးပၢတ်ႈၼၼ်ႉ တၵ်းဢမ်ႇၶိုတ်းႁဝ်းလႆႈဢမ်ႇထူပ်းႁဝ်းလႆႈဝႃႈၼင်ႇၼႆၼၼ်ႉ တၵ်းလႆႈတၢႆလူၺ်ႈလၢပ်ႇလူၺ်ႈလႅဝ်းဢေႃႈ။
ဢိသရေႇလလႆႈၶၢမ်ႇၵႄႇၶျွတ်ႈဢဝ်
၁၁ ၼႂ်းမိူဝ်ႉဝၼ်းၼၼ်ႉ ၵဝ်တၵ်းၶိုၼ်းမႄးၵုမ်းမႄးႁဵတ်းသုမ်ႉထဵင်တႃႇဝိတ်ႉ ဢၼ်လူမ်ႉလႄႈမီးယူႇၼၼ်ႉႁႂ်ႈတီႈဢၼ်တႅၵ်ႇဢႃႈမၼ်းၸိူဝ်းၼၼ်ႉ ၶိုၼ်းငီႇငႅၼ်ႈၵၼ်သေလႄႈၶိုၼ်းတႄႇၶိုၼ်းႁဵတ်း တီႈဢၼ်ၵိူၼ်ႇပင်းလူႉလႅဝ်မၼ်းတင်းလၢႆလႄႈ ႁႂ်ႈမၼ်ႈၶိူင်ႇတင်ႈသိုဝ်ႈယူႇမိူၼ်ၸိူဝ်ႉၼင်ႇဢၼ်မီးမိူဝ်ႈဢွၼ်တၢင်းၼႆႉၼၼ်ႉ
၁၂ ႁႂ်ႈၶဝ်လႆႈသိမ်းဢဝ်ၸႃႉၸဵမ်ၵူၼ်းမဵဝ်းဢေႇတုမ်ႇ ဢၼ်ၵိုတ်းဢၼ်ၵျၢၼ်ႇဝႆႉၼၼ်ႉ ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ၶၢမ်ႇတၢင်းဢၼ်ဢဝ်ၼႃႇမႃႉၸိုဝ်သဵင်ၵဝ်ႁွင်ႉႁိၵ်ႈ ၵႃႈမီးတင်းသဵင်ႈတင်းလူင်ၼၼ်ႉမႃးဢေႃႈ၊ဝႃႈၼင်ႇၼႆထႃႇဝရႃႉၽြႃးဢၼ်ၸီႇယၢင်ႇလွင်ႈတၢင်းသဵင်ႈၼၼ်ႉမီးဢမိင်ႉဢေႃႈ။
၁၃ ထႃႇဝရႃႉၽြႃးမီးဢမိင်ႉၸမ်း၊ ၶိင်ႇမိူဝ်ႉဝၼ်းၵေႃႉဢၼ်ထႆၼႃးၼၼ်ႉ တၵ်းၶိုတ်းၵေႃႉဢၼ်ပၢတ်ႇၶဝ်ႈၼၼ်ႉလႄႈၵေႃႉဢၼ်ၼူတ်ႈမၢၵ်ႇၸပိတ်ႈၼၼ်ႉ တၵ်းၶိုတ်းၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်း၊ဢၼ်လွႆတင်းလၢႆတၵ်းယွတ်ႇႁူဝ်ႈဢွၵ်ႇ ၼမ်ႉၸပိတ်ႈဢၼ်ဝၢၼ်လႄႈၵုင်းၵႃႈမီးတၵ်းၸိုမ်းပဵၼ်ၼမ်ႉၵႂႃႇၼၼ်ႉ တၵ်းႁွတ်ႈမႃး ဢေႃႈ။
၁၄ ၵဝ်တၵ်းဢဝ်ၵူၼ်းၵဝ်ၵူၼ်းမဵဝ်းဢိသရေႇလဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇ ၸိူဝ်းၼၼ်ႉၶိုၼ်းမႃးလႄႈ ၶဝ်ၼၼ်ႉတၵ်းဢွၼ်ၵၼ်မႄးၵုမ်းမႄးႁဵတ်း ဝဵင်းဢၼ်လူႉလႅဝ်ၸိူဝ်းၼၼ်ႉသေလႄႈယူႇၵႃႈၼႂ်းဝဵင်းၸိူဝ်းၼၼ်ႉဢေႃႈ။ ၶဝ်တၵ်းဢွၼ်ၵၼ်ၽုၵ်ႇသူၼ်ဢူးယဵၼ်ႇၸပိတ်ႈတင်းလၢႆလႄႈ သူတ်ႉၵိၼ်ၼမ်ႉၸပိတ်ႈဢေႃႈ။ၶဝ်တၵ်းဢွၼ်ၵၼ်လုမ်းလႃးႁႆႊၼႃး လႄႈၵိၼ်မၢၵ်ႇမၼ်းႁူင်းမၼ်းဢေႃႈ။
၁၅ ၵဝ်တၵ်းဢဝ်ၶဝ်ၽုၵ်ႇဝႆႉၵႃႈၼႂ်းမိူင်းၶဝ်ၼၼ်ႉလႄႈ ၵမ်းလိုၼ်းၶဝ်တၵ်းဢမ်ႇလႆႈၶၢမ်ႇ တၢင်းဢၼ်ၽူႈ လႂ်ၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းၶဝ်ၼၼ်ႉ၊ဝႃႈၼင်ႇၼႆ ထႃႇဝရႃႉၽြႃးမီးဢမိင်ႉဢေႃႈ။