၃
ႁွင်ႉသၢၵ်ႈသေႇတေႃႇဢိသရေလ
၁ ၵူၼ်းမဵဝ်းဢိသရေႇလတင်းလၢႆၶဝ်ဢိူၺ်း။ဢွၼ်ၵၼ်ထွမ်ႇငိၼ်းၵႂၢမ်းထႃႇဝရႃႉၽြႃး ဢဝ်လွင်ႈသူဢၼ်ဝႃႈၵူၼ်းမဵဝ်းဢၼ် ၵဝ်ၼုၵ်ႈဢဝ်ဢွၵ်ႇသေ ၵႃႈၼႂ်းမိူင်းဢေႇၵႅပ်ႉတုမႃးတင်းသဵင်ႈတင်းလူင်သေလႄႈ မီးဢမိင်ႉ ၼၼ်ႉတႃႉ။
၂ ၵႃႈၼႂ်းမဵဝ်းၵူၼ်းတင်းသဵင်ႈတင်းလူင်ဢၼ်ယူႇၵႃႈၼိူဝ်လိၼ်မိူင်းၼႆႉၼၼ်ႉၵဝ်ႁပ်ႉတုင်းဢဝ်သူမဵဝ်းလဵဝ်ၵူၺ်းဢေႃႈ။ပိူဝ်ႈၼႆလႄႈၵဝ်တၵ်းပၼ်တၢမ်ႇ ဢပျႅတ်ႈသူၵႃႈမီးၼၼ်ႉတီႈသူဢေႃႈ။
၃ ၵူၼ်းသွင်ၵေႃႉပေႃးၸႂ်သၽေႃးဢမ်ႇမိူၼ်ၵၼ်ၸိုင် တၵ်းႁူမ်ႈပွင်း လူၺ်ႈၵၼ်သေလႄႈၵႂႃႇတၢင်းပႆတၢင်းလႆႈႁိုဝ်။
၄ သၢင်ႇသီႈၼၼ်ႉ ပေႃးတီႈလီႈတီႉဢဝ်ဢမ်ႇမီးၸိုင်တၵ်းႁွင်ႉၶင်းၵႃႈၼႂ်းထိူၼ်ႇႁိုဝ်။သၢင်ႇသီႈၼုမ်ႇၼၼ်ႉပေႃးဢမ်ႇတီႉဢဝ် လွင်ႈတၢင်းသေၸိူဝ်ႉသေပိူင်ယဝ်ႉၸိုင် တၵ်း ႁဵတ်းသဵင်ၵႃႈၼႂ်းၶုမ်မၼ်းႁူးမၼ်းႁိုဝ်။
၅ ပေႃးဢမ်ႇၵၢင်ဝႆႉၸိုင် ၼူၵ်ႉတၵ်းထုၵ်ႇၶဵၼ်းမႅၼ်ႈၵႃႈၼႂ်းတူင်ႇႁဵဝ်ႉတူင်ႇၶိုမ်းၵႃႈၼိူဝ်ၼႃႈလိၼ်ႁိုဝ်။ၸူဝ်ႈဢၼ်ဢမ်ႇပႆႇလႆႈလွင်ႈတၢင်းသေၸိူဝ်ႉသေပိူင်ၼၼ်ႉၸိုင် တူင်ႇႁဵဝ်ႉတူင်ႇၶိုမ်းတၵ်းမီးတၢင်းဢၼ်ထွတ်ႇထူၺ်ႈဢွၵ်ႇသေ ၵႃႈတီႈ လိၼ်ၼၼ်ႉႁိုဝ်။
၆ ပေႃးပဝ်ႇၼႄးၶရႃႇၵႃႈၼႂ်းဝဵင်းၸိုင်ၵူၼ်းဝဵင်းတင်းလၢႆ ယင်းဢမ်ႇၵူဝ်ဢမ်ႇႁႄလႄႈ တၵ်းယူႇႁိုဝ်။ထႃႇဝရႃႉၽြႃးယင်းဢမ်ႇၸီႇယၢင်ႇလႄႈၽေးသေၸိူဝ်ႉသေပိူင် တၵ်းႁွတ်ႈထိုင်ၵႃႈၼႂ်းၶူးၼႂ်းဝဵင်းႁိုဝ်။
၇ ထႃႇဝရႃႉၽြႃး ယင်းဢမ်ႇၽုၺ်ႇဢွၵ်ႇၼႄပျႃႉတီႈၶႃႈမၼ်းၸဝ်ႈ ပရေႃးၽႅတ်ႈတင်းလၢႆလႄႈ မၼ်းၸဝ်ႈဢမ်ႇၸီႇယၢင်ႇလွင်ႈတၢင်းသေၸိူဝ်ႉသေပိူင်။
၈ မိူဝ်ႈဢၼ်သၢင်ႇသီႈႁွင်ႉၶင်းၼၼ်ႉၸိုင် ၽူႈ လႂ်ယင်းဢမ်ႇၵူဝ်ဢမ်ႇႁႄလႄႈတၵ်းယူႇႁိုဝ်။မိူဝ်ႈဢၼ်ထႃႇဝရႃႉၽြႃးမီးဢမိင်ႉၼၼ်ႉၸိုင် ၽူႈ လႂ်ယင်းဢမ်ႇႁဵတ်းပရေႃးၽႅတ်ႈလႄႈ တၵ်းယူႇႁိုဝ်။
၉ တၵ်းလႆႈႁွင်ႉပၢဝ်ႇႁွင်ႉလၢတ်ႈၵႃႈၼႂ်းႁေႃၶမ်းဝဵင်းဢႃႇလုတ်ႉ ဢိၵ်ႇတင်း ၵႃႈၼႂ်းႁေႃၶမ်းမိူင်းဢေႇၵႅပ်ႉတုၸိူဝ်းၼၼ်ႉလႄႈဝႃႈၸမ်း သူၸူႉၵၼ်တုမ်ၵၼ်ၵႃႈၼိူဝ်လွႆသမႃႇရိ တင်းလၢႆလႄႈလူတူၺ်းလွင်ႈတၢင်းဢၼ်ႁူၼ်ႁၢၼ်ဢူၼ်ဢိၼ်မေႃးမေး ၵႃႈၼႂ်းဝဵင်းၼၼ်ႉဢိၵ်ႇတင်းလွင်ႈတၢင်း ဢၼ်ၼိၵ်ႈၸၢၵ်ႈငႅၼ်း သေးၵႃႈၼႂ်းၵၢင်ဝဵင်းၼၼ်ႉတႃႉ။
၁၀ ၶဝ်ၼၼ်ႉဢၼ်ပဵၼ်ၶဝ်ၸိူဝ်းဢၼ်ၸၢင်ႊဢွၼ်ၵၼ် ဢဝ်ဢုၵ်ႉၸႃႇဢၼ်ႁိတ်းပေႉႁဵတ်းၼႅင်ႇလႄႈႁိမ်ႁူင်ႇဢဝ်မႃးလႄႈ သိမ်းဝႆႉၵႃႈၼႂ်းႁေႃၶမ်းၼၼ်ႉၸိူဝ်းၼၼ်ႉဢမ်ႇႁူႉ တၢင်းဢၼ်ၸၢင်ႊႁဵတ်းၸွမ်းၼင်ႇတြႃးၼၼ်ႉလႃးလႃး၊ ဝႃႈၼင်ႇၼႆ ထႃႇဝရႃႉၽြႃးမီးဢမိင်ႉဢေႃႈ။
၁၁ ပိူဝ်ႈၼႆလႄႈၸဝ်ႈထႃႇဝရႃႉၽြႃးမီးဢမိင်ႉၸမ်းရၢၼ်ႇသူႇ တၵ်းမီးမႃးလႄႈလွမ်ႉလဵပ်ႈႁွပ်ႈမိူင်းဝႆႉသေလႄႈ ဢွၼ်ၵၼ်ၶျႃးတၢင်းၵတ်ႉတၢင်းၶၼ်မႂ်းတူၵ်းတီႈတႅမ်ႇလႄႈ ႁိမ်ဢဝ်ယႃႉၽဵဝ်ႈ ႁေႃၶမ်းမႂ်းတင်းလၢႆပႅတ်ႈဢေႃႈ။
၁၂ ထႃႇဝရႃႉၽြႃးမီးဢမိင်ႉၸမ်း၊ မိူၼ်ၸိူဝ်ႉၼင်ႇၵူၼ်းဢၼ်လဵင်ႉသူဝ်းထိင်းသူဝ်းၼုၵ်ႈဢဝ်တိတ်သွင်ၶွၼ် ဢမ်ႇၼၼ်မႂ်ႊႁူပွတ်းၼိုင်ႈဢွၵ်ႇသေၵႃႈၼႂ်းသူပ်းသၢင်ႇသီႈၼၼ်ႉလႄႈ ၵူၼ်းမဵဝ်းဢိသရေႇလ ဢၼ်ၼင်ႈယူႇၵႃႈတီႈၸဵင်ႇၵူႇတီႈၼွၼ်းၵႃႈၼႂ်းဝဵင်းသမႃႇရိ ဢိၵ်ႇတင်းၵႃႈၼိူဝ်ၽႃႈၵွပ်းၵႃႈတီႈဝဵင်းထမ်ႇမသႅတ်ႉ ၸိူဝ်းၼၼ်ႉ တၵ်းလႆႈၶၢမ်ႇ တၢင်းဢၼ်ၼုၵ်ႈဢဝ်ဢေႃႈ။
၁၃ ၸဝ်ႈထႃႇဝရႃႉၽြႃးၽြႃးပဵၼ်ၸဝ်ႈပူဝ်ႇပႃႇၵၢင်ႁၢဝ်မီးဢမိင်ႉၸမ်း၊ သူဢွၼ်ၵၼ်ထွမ်ႇငိၼ်းလႄႈ ၶၢမ်ႇသၢၵ်ႈသေႇယူႇၽၢႆႇၼိုင်ႈ တင်းမဵဝ်းယႃႇၵုပ်ႉတႃႉ။
၁၄ ၼႂ်းမိူဝ်ႉဝၼ်းဢၼ်ၵဝ်ပၼ်တၢမ်ႇဢပျႅတ်ႈမဵဝ်းဢိသရေႇလ ၵႃႈၼိူဝ်မၼ်းၼၼ်ႉၵဝ်တၵ်းပၼ်တၢမ်ႇဢပျႅတ်ႈတီႈယိတ်ႉပလၢင်ႇပေႇသလ တင်းလၢႆဢမၢၼ်ႇၶၢၼ်ပဵၼ်လႄႈ ၶဝ်လႅမ်ယိတ်ႉပလၢင်ႇမၼ်းတၵ်းလႆႈၶၢမ်ႇတၢင်းဢၼ်တႅပ်းၶၢတ်ႇလႄႈ တူၵ်းပႅတ်ႈၵႃႈၼိူဝ်လိၼ်ဢေႃႈ။
၁၅ ၵဝ်တၵ်းတိူဝ်ႉထုၵ်ႇသႂ်ႇႁေႃၸဝ်ႈဢၼ်ယူႇၼႂ်းမိူဝ်ႈၶိင်ႇၵတ်း ဢိၵ်ႇတင်း ႁေႃၸဝ်ႈဢၼ်ယူႇၼႂ်းမိူဝ်ႈၶိင်ႇမႆႈၸိူဝ်ႈၼၼ်ႉလႄႈႁိူၼ်းဢၼ်ယဝ်ႉတူဝ်ႈလူၺ်ႈငႃးၸၢင်ႉၸိူဝ်းၼၼ်ႉ တၵ်းလႆႈလူႉလႆႈလႅဝ်ဢေႃႈ။ႁိူၼ်းယႂ်ႇႁိူၼ်းလူင်တင်းလၢႆၵေႃႈတၵ်းလႆႈသုမ်းလႆႈၸွမ်းဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။