Chapter
၉
ဢေႇၸရသူးတွင်းပုၼ်ႈလွင်ႈတႄႇၼႃႈႁိူၼ်း
၁ ဢမူႉလွင်ႈတၢင်းၸိူဝ်းၼၼ်ႉ ယဝ်ႉတူဝ်ႈသေယဝ်ႉၶုၼ်တင်းလၢႆဢွၼ်ၵၼ်မႃးတီႈၵဝ်လႄႈ မွၵ်ႇလၢတ်ႈလႄႈဝႃႈ၊-ၵူၼ်းမဵဝ်းဢိသရေႇလတင်းလၢႆဢိၵ်ႇတင်းယိတ်ႉပရေႃးႁိၵ်ႈတင်း ၵူၼ်းမဵဝ်းလေႇဝိၸိူဝ်းၼၼ်ႉ ယင်းဢမ်ႇၽၢတ်ႇၽႄ ၵၼ်တင်းၵူၼ်းဢၼ်ယူႇၵဝ်ႇၵဝ်ႇၵႃႈတီႈမိူင်းၼႆႉၸိူဝ်းၼၼ်ႉလႄႈဢွၼ်ၵၼ်ၵမ်ၵျၢင်ႉတၢင်းၵမ်တၢင်းၵျၢင်ႉ ၵူၼ်းၶႃႇၼၼိ၊ ၵူၼ်းႁိတ်ႉတိ၊ၵူၼ်းၽေႇရသိ ၵူၼ်းယေႇပုသိ၊ၵူၼ်းဢမ်ႇမုၼ်ႇ၊ၵူၼ်းမေႃႇၽ၊ၵူၼ်းဢေႇၵိပ်ႉတု၊ၵူၼ်းဢႃႇမေႃးရိဢၼ်လီ ႁင်ႈဢဵတ်ႇသဵတ်ႇၸိူဝ်းၼၼ်ႉယူႇဢေႃႈ။
၂ လွင်ႈမၼ်းၸမ်းၶဝ်ဢဝ်လုၵ်ႈယိင်းၶဝ်ပုၼ်ႈတူဝ်ၸဝ်ႈၵဝ်ႇ ဢိၵ်ႇတင်း ပုၼ်ႈလုၵ်ႈၸၢႆးတူဝ်ၸဝ်ႈၵဝ်ႇသေလႄႈ မဵဝ်းဢၼ်မူတ်းၸၢင်ႇၼၼ်ႉမီးတၢင်းဢၼ်လေႃးလႄးလူၺ်ႈၵၼ်တင်း ၵူၼ်းဢၼ်ယူႇၵဝ်ႇၵဝ်ႇၵႃႈတီႈမိူင်းၼႆႉၸိူဝ်းၼၼ်ႉလႄႈၶုၼ်တင်းလၢႆ ဢိၵ်ႇတင်းၶဝ်ၸိူဝ်းဢၼ်မီးဢရႃႇၼၼ်ႉ ဢွၼ်ၵၼ်ႁဵတ်းဢမူႉတူႉၸရိူၵ်ႈ ၼႆႉၼႃႇသေပိူၼ်ႈယဝ်ႉလူင်ပေႇ၊ဝႃႈၼင်ႇၼႆဢေႃႈ။
၃ မိူဝ်ႈဢၼ်ၵဝ်ငိၼ်းၵႂၢမ်းၼၼ်ႉၸိုုင် ၵဝ်ၸၵ်ႉသိၵ်ႇၶူဝ်းၼုင်ႈၵဝ်တင်းၶူဝ်မႆႊၵဝ်လႄႈ ထူၺ်ႈၶူၼ်ႁူဝ်ၵဝ်တင်းၼူတ်ႇၵၢင်းၵဝ်ပႅတ်ႈသေလႄႈ ငိူဝ်ႈငဝ်ၵႂင်ၸႂ်လႄႈၼင်ႈယူႇ ဢေႃႈ။
၄ မိူဝ်ႈၼၼ်ႉၶဝ်ၸိူဝ်းဢၼ်ၵူဝ်ႁႄဢမိင်ႉၽြႃးပဵၼ်ၸဝ်ႈမဵဝ်းဢိသရေႇလ ထၢၼ်ႈပေႃးသၼ်ႇပေႃးဝႆယူႇၸိူဝ်းၼၼ်ႉၸူႉၵၼ်တုမ်ၵၼ် ၵႃႈတီႈၵဝ်ၵွပ်ႈပိူဝ်ႈ ဢပျႅတ်ႈၶဝ်ၸိူဝ်းဢၼ်လႆႈၶၢမ်ႇတၢင်း ဢၼ်သိမ်းဢဝ်ၵႂႃႇၸိူဝ်းၼၼ်ႉလႄႈ ၵဝ်ငိူဝ်ႈငဝ်ၵႂင်ၸႂ်လႄႈၼင်ႈယူႇတေႃႇထိုင်ႁွတ်ႈ ၶိင်ႇဢၼ်ပုၵ်ႉၸေႃႇယိၸ်ႉၶိင်ႇႁူဝ်ၶမ်ႈ ၼၼ်ႉဢေႃႈ။
၅ ၶိင်ႇဢၼ်ပုၵ်ႉၸေႃႇယိၸ်ႉၶိင်ႇႁူဝ်ၶမ်ႈၼၼ်ႉ ၵဝ်လုၵ်ႉသေၵႃႈတီႈတၢင်းဢၼ်ၵဝ်တမ်ႇၼွႆႉမွင်ၸႂ်ၼၼ်ႉလႄႈ ပႃးဢဝ်ၶူဝ်းၼုင်ႈၵဝ် ဢိၵ်ႇတင်းၶူဝ်းမႆႊၵဝ်ဢၼ်ၸၵ်ႉသိၵ်ႇယဝ်ႉၼၼ်ႉသေလႄႈ ၶုပ်ႉၶဝ်ႇၵၢဝ်ႈတဝ်လႄႈၵီႈၽႃႇမိုဝ်းၸူးထႃႇဝရႃႉၽြႃးၽြႃးပဵၼ် ၸဝ်ႈၵဝ်သေလႄႈသူးတွင်းလႄႈဝႃႈ၊-
၆ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။ၶႃႈၸဝ်ႈဢူၵ်းဢၢႆလႄႈၼႃႈလႅင်ႊယူႇသေလႄႈဢမ်ႇႁတ်းမုင်ႈတူၺ်းၸဝ်ႈႁဝ်းတီႈၶႃႈဢေႃႈ။ ၽြႃးပဵၼ်ၸဝ်ႈၵဝ်ၶႃႈတီႈၶႃႈ။တူႉၸရိူၵ်ႈဢၼ်ၶႃႈၸဝ်ႈႁဝ်းၶဝ်ႁဵတ်းမႅၼ်ႈၸိူဝ်းၼႆႉ ယႂ်ႇမႃးၽႄႈမႃးထုမ်ႈႁူမ်ႇၵႃႈၼိူဝ်ႁူဝ်ၶႃႈၸဝ်ႈႁဝ်းၶဝ်လႄႈ ဢပျႅတ်ႈၶႃႈၸဝ်ႈႁဝ်းၶဝ်ဢၼ်ယႂ်ႇၼႃႇၼၼ်ႉ ယႂ်ႇၽႄႈတူဝ်းတွၼ်းၶိုတ်းထိုငႃ်ႉၵၢင်ႁၢဝ်တီႈၶႃႈဢေႃႈ။
၇ ၶႃႈၸဝ်ႈႁဝ်းၶဝ် ၽိတ်းပိူင်ႈၼႃႇလူင်လၢင်ၸႃႉၸဵမ်ၸူဝ်ႈပူႇမွၼ်ႇလႄႈ တေႃႇထိုင်ႁွတ်ႈဝၼ်းမိူဝ်ႈၼႆႉတီႈၶႃႈယဝ်ႉ။ၵွပ်ႈပိူဝ်ႈဢပျႅတ်ႈတူဝ်ၸဝ်ႈၵဝ်ႇတင်းလၢႆလႄႈၶႃႈၸဝ်ႈႁဝ်းဢိၵ်ႇတင်း ၶုၼ်ႁေႃၶမ်းၶႃႈၸဝ်ႈႁဝ်းၶဝ်တင်းလၢႆတင်း ယိတ်ႉပရေႃးႁိၵ်ႈၶႃႈၸဝ်ႈႁဝ်းၶဝ်ၸိူဝ်းၼၼ်ႉလႆႈဢွၼ်ၵၼ်ၶၢမ်ႇတၢင်းဢၼ်ဢဝ်ဢၢပ်ႈၵႃႈၼႂ်းမိုဝ်းၶုၼ်ႁေႃၶမ်းတၢင်ႇသိုင်ႇတၢင်ႇမိူင်း တၢင်းဢၼ်ဢဝ်တၢႆလူၺ်ႈလၢပ်ႇလူၺ်ႈလႅဝ်း၊ တၢင်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇ တၢင်းဢၼ်လႆႈၶၢမ်ႇတၢင်းဢၼ်ႁိမ်ႁူင်ႇ၊တၢင်းဢၼ်ၼႃႈလူႉမိူၼ်ၸိူဝ်ႉ ၼင်ႇဢၼ်ပဵၼ်ဝၼ်းမိူဝ်ႈၼႆႉၼၼ်ႉတီႈၶႃႈဢေႃႈ။
၈ မိူဝ်ႈလဵဝ်ၼႆႉ ၵႅပ်ႉဢွၼ်ႇၵမ်းဢွၼ်ႇၼိုင်ႈၼႆၵေႃႈ ၵျေးၸူးၸဝ်ႈ ဢၼ်ၶႃႈၸဝ်ႈႁဝ်းၶဝ်ယင်းၵိုတ်းယင်းၵျၢၼ်ႇယူႇၸိူဝ်းၼႆႉလႆႈၵၢင်းလွတ်ႈတင်းၽေးသေလႄႈလႆႈယူႇၵႃႈတီႈ ထႃႇၼႃႉဢၼ်မူတ်းၸၢင်ႇၸဝ်ႈၼႆႉသေလႄႈၽြႃးပဵၼ်ၸဝ်ႈႁဝ်းၶႃႈ ႁႂ်ႈမၢၵ်ႇတႃၶႃႈၸဝ်ႈႁဝ်းၶဝ်လႅင်းလႄႈ ပၼ်ဢၶႂၢင်ႉဢၼ်လႆႈသမ်ႉၶိုၼ်းထူၺ်ႈ ၸႂ်ယူႇဢေႃႈ။
၉ ပိၵ်ႉသမ်ႉႁဝ်းၶႃႈလႆႈၶၢမ်ႇႁဵတ်းၶႃႈယူႇၵေႃႈၸဝ်ႈႁဝ်းၶႃႈ ဢမ်ႇၸုၼ်ႉပႅတ်ႈႁဝ်းၶႃႈတီႈၶႃႈလႄႈ ဢိတ်းလူပၼ်ၸႂ်ၸေႇတၼႃႇႁဵတ်းၵျေးၸူးတီႈၶႃႈၸဝ်ႈႁဝ်းၶဝ်ႈၽၢႆႇၼႃႈၶုၼ်ႁေႃၶမ်းပေႇရသိ လႄႈႁႂ်ႈမၼ်းပၼ်ၶႃႈၸဝ်ႈႁဝ်းၶဝ်ႁႂ်ႈလႆႈသမ်ႉၶိုၼ်းထူၺ်ႈၸႂ် ႁႂ်ႈလႆႈသမ်ႉၶိုၼ်းပုၵ်းၶိုၼ်းတင်ႈ ႁိူၼ်းၽြႃးပဵၼ်ၸဝ်ႈႁဝ်းၶႃႈလႄႈ မႄးၵုမ်းမႄးႁဵတ်းတီႈဢၼ်ၵိူၼ်ႇပင်းလူႉလႅဝ်ၼၼ်ႉ ဢိၵ်ႇတင်း ႁႂ်ႈလႆႈပၼ်လမ်းဢုတ်ႇလမ်းႁိၼ်ၵႃႈတီႈဝဵင်းယေႇရုသလႅမ်ႇမိူင်းယုတ ပုၼ်ႈ ၶႃႈယဝ်ႉ။
၁၀ မိူဝ်ႈလဵဝ်ၼႆႉၵေႃႈၽြႃးပဵၼ်ၸဝ်ႈႁဝ်းၶႃႈတီႈၶႃႈ။ ႁဵတ်းမႅၼ်ႈၸိူဝ်ႉၼင်ႇၼၼ်ယဝ်ႉလႄႈတၵ်းလႆႈလဝ်ႈလၢတ်ႈၸိူဝ်ႉၼင်ႇႁိုဝ်တီႈၶႃႈ။ ၶႃႈၸဝ်ႈႁဝ်းၶဝ်ဢွၼ်ၵၼ်ၸုၼ်ႉပႅတ်ႈ ၵႂၢမ်းပိင်းၺၢပ်ႈၸဝ်ႈႁဝ်းဢၼ်ၸဝ်ႈႁဝ်းဢဝ်ၶႃႈၸဝ်ႈႁဝ်း ပရေႃးၽိတ်ႈတင်းလၢႆသေ လႄႈသင်ႇလၢတ်ႈဝႆႉဝႃႈ၊-
၁၁ မိူင်းဢၼ်သူတၵ်းၵႂႃႇသိမ်းဢဝ်ၼၼ်ႉ ပဵၼ်မိူင်းဢၼ်ၵူဝ်ႈၵိူၵ်ႇလူၺ်ႈတၢင်းဢၼ်ဝူၺ်ႇဢၼ်ႁင်ႈၵူၼ်းမိူင်း ဢိၵ်ႇတင်းလူၺ်ႈလွင်ႈတၢင်းဢၼ်လီႁင်ႈဢဵတ်ႇသဵတ်ႇ ဢၼ်တဵမ်ဝႆႉၵႃႈၼႂ်းမိူင်းၸႃႉၸဵမ်ၽၢႆႇၼိုင်ႈတေႃႇထိုင်ႁွတ်ႈၽၢႆႇၼိုင်ႈလႄႈ ၵူဝ်ႈၵိူၵ်ႇ ဝႆႉဢေႃႈ။
၁၂ ပိူဝ်ႈၼႆလႄႈယႃႇပေဢွၼ်ၵၼ်ဢဝ်လုၵ်ႈယိင်းသူပၼ်ၵၼ်တင်းၵူၼ်းၸၢႆးၶဝ်။ယႃႇပေႁႂ်ႈလုၵ်ႈယိင်းၶဝ် ႁူမ်ႈပွင်းပဵၼ်ၵူပ်းပဵၼ်ၵူႈလူၺ်ႈၵၼ်တင်းလုၵ်ႈၸၢႆးသူ။ ယႃႇပေဢွၼ်ၵၼ်ႁဵတ်းတၢင်းဢၼ်ၵတ်းယဵၼ်လူၺ်ႈၶဝ်တင်း ၸေးၸိမ်ႇၶဝ်ၼၼ်ႉလႃးလႃး။လွင်ႈၼင်ႇႁိုဝ် သူတၵ်းမီးဢၶႂၢင်ႉဢၼ်ႁႅင်းယႂ်ႇလႄႈလႆႈၵိၼ်မၢၵ်ႇလိၼ်ႁူင်းလိၼ် ဢၶႂၢင်ႉဢၼ်လႆႈလိၼ်ဢၼ်ၵိုတ်းၵျၢၼ်ႇဝႆႉလႄႈ ပဵၼ်ဢမူၺ်ႇၼိၵ်ႉၸႃႉတီႈလုၵ်ႈလၢၼ်သူၼၼ်ႉၸိုင် ၵမ်ၵျၢင်ႉၸိူဝ်ႉၼင်ႇၼၼ်တႃႉ၊ ဝႃႈၼင်ႇၼႆၼၼ်ႉတီႈၶႃႈလူင်ပေႇ။
၁၃ ပိၵ်ႉသမ်ႉႁဝ်းၶႃႈမီးဢပျႅတ်ႈဢၼ်ယႂ်ႇ ဢၼ်ၵိုင်ႇထိူၵ်ႈလႆႈၶၢမ်ႇၼမ်ၼႃႇသေၵေႃႈ ၽြႃးပဵၼ်ၸဝ်ႈႁဝ်းၶႃႈပၼ်တၢမ်ႇဢၼ်လဵၵ်ႉဢၼ်ဢွၼ်ႇတီႈႁဝ်းၶႃႈၵူၺ်းလႄႈ ယင်းႁႂ်ႈၵိုတ်ႈ ၵျၢၼ်ႇဝႆႉဢေႃႈ။
၁၄ ၸွင်ႇႁဝ်းၶႃႈသမ်ႉၶိုၼ်းတၵ်းပူၼ်ႉလိူဝ်ပိင်းၺၢပ်ႈတြႃးၸဝ်ႈထႅင်ႈသေလႄႈ ႁူမ်ႈပွင်းလူၺ်ႈၵၼ်တင်းၵူၼ်းမဵဝ်းဢၼ်ၸၢင်ႊႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉႁိုဝ်။ၸွင်ႇတၢင်းၸႂ်မႆႈၶႆႈၸႃႉၸဝ်ႈႁဝ်းတၵ်းဢွၵ်ႇလႄႈ ယႃႉၽဵဝ်ႈၶႃႈၸဝ်ႈႁဝ်းၶဝ်ပႅတ်ႈ တေႃႇထိုင်ႁွတ်ႈထၢၼ်ႈပေႃးဢမ်ႇႁႂ်ႈသေၵေႃႉသေၵူၼ်း လႆႈၵိုတ်းလႆႈၵျၢၼ်ႇလႆႈၵၢင်းလႆႈ လွတ်ႈဢမ်ႇၸႂ်ႈတီႈၶႃႈႁိုဝ်။
၁၅ ထႃႇဝရႃႉၽြႃးၽြႃးပဵၼ်ၸဝ်ႈမဵဝ်းဢိသရေႇလတီႈၶႃႈ။ ၸဝ်ႈႁဝ်းသိုဝ်ႈတေႃႇတီႈၶႃႈဢေႃႈ။ ၶႃႈၸဝ်ႈႁဝ်းၶဝ်ပဵၼ်ၵေႃႉဢၼ်ၵိုတ်းဢၼ်ၵျၢၼ်ႇလႄႈ လွတ်ႈဝႆႉမိူၼ်ၸိူဝ်ႉၼင်ႇဢၼ်ပဵၼ်ဝၼ်းမိူဝ်ႈၼႆႉတီႈၶႃႈဢေႃႈ။တူၺ်းတီႈၶႃႈလူ။ၶႃႈၸဝ်ႈႁဝ်းၶဝ် ပႃးတင်းဢပျႅတ်ႈတူဝ်ၸဝ်ႈၵဝ်ႇတင်းလၢႆသေလႄႈ မီးယူႇၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။ၵွပ်ႈပိူဝ်ႈဢပျႅတ်ႈၸိူဝ်းၼၼ်ႉလႄႈၽူႈ လႂ်ဢမ်ႇလႆႈၼႃႈတႃလီ ၵႃႈတီႈၽၢႆႇၼႃႈၸဝ်ႈႁဝ်းသေၵေႃႉသေၵူၼ်းတီႈၶႃႈ၊ဝႃႈၼင်ႇၼႆဢေႃႈ။