Chapter
၆
ဢမိင်ႉၶုၼ်ႁေႃၶမ်းတႃႇရိ
၁ မိူဝ်ႈၼၼ်ႉၶုၼ်လူင်တႃႇရိ မီးဢမိင်ႉလႄႈ ၶဝ်ဢွၼ်ၵၼ်ႁႃ ၵႃႈၼႂ်းတိူၵ်ႈလိၵ်ႈဢၼ်ဝႆႉၽၼ်ႇတႃႇၸဝ်ႈ ၵႃႈၼႂ်း ဝဵင်းပႃႇပုလုၼ်ႇၼၼ်ႉဢေႃႈ။
၂ ၶဝ်ထူပ်းႁၼ်ၵဵၼ်ႁမ်းလိၵ်ႈၵႃႈတီႈႁေႃၸဝ်ႈၼႂ်းဝဵင်း ဢႃႇၶမေႇသမိူင်းမေႇတိ လႄႈၵႂၢမ်းဢၼ်ပႃးၼႂ်းလိၵ်ႈၼၼ်ႉမီးဝႆႉလႄႈဝႃႈ ၸမ်း၊-
၃ ၼႂ်းပီႊဢၼ်ၶုၼ်လူင်ၵုရုၸၢမ်ႇႁၢင်ႈၸၢမ်ႇႁေႃပီႊပထမၼၼ်ႉၶုၼ်လူင်ၵုရု မီးဢမိင်ႉလူၺ်ႈလွင်ႈဢမူႉႁိူၼ်းၽြႃးပဵၼ်ၸဝ်ႈ ဢၼ်မီးၵႃႈၼႂ်းဝဵင်း ယေႇရုသလႅမ်ႇၼၼ်ႉလႄႈဝႃႈ ႁႂ်ႈတႄႇႁဵတ်းႁိူၼ်းၸဝ်ႈ တီႈဢၼ်ပုၵ်ႉၸေႃႇယိၸ်ႉၼၼ်ႉသေလႄႈ ႁႂ်ႈၶျႃးငဝ်ႈႁၢၵ်ႈ တိူၵ်ႈမၼ်းဝႆႉမၼ်ႈမၼ်ႈၶိူင်ႇၶိူင်ႇသေ။
၄ ႁႂ်ႈတၢင်းသုင်မၼ်းမီးႁူၵ်းသိပ်းသွၵ်ႇလႄႈ ၼႃႈၼွႆႉမၼ်းၵႂၢင်ႈႁူၵ်းသိပ်းသွၵ်ႇသေ။ႁႂ်ႈဢဝ်တင်းမၢၵ်ႇႁိၼ်ဢၼ်ယႂ်ႇဢၼ်လူင်သၢမ်ႁၢၼ်ႉ မႆႉႁၢၼ်ႉၼိုင်ႈ တႄႇႁဵတ်းပဵၼ်ၸၼ်ႉပဵၼ်ထၢပ်ႈလႄႈ ႁႂ်ႈဢဝ်ၸရိပ်ႈမၼ်းဢွၵ်ႇသေၵႃႈၼႂ်း ၽၼ်ႇတႃႇႁေႃၸဝ်ႈပၼ်သေ။
၅ ႁႂ်ႈဢဝ်ၶိူင်ႈငိုၼ်းၶမ်းဢၼ်ၸၢပ်ႈသႅင်ႇ ၵၼ်တင်းႁိူၼ်းၽြႃးပဵၼ်ၸဝ်ႈဢၼ်ၼေႇပုၶတ်ႉၼေႇၸႃႇ ဢဝ်ဢွၵ်ႇသေၵႃႈၼႂ်းပိၵ်ႉမၢၼ်ႇဢၼ်မီးၵႃႈၼႂ်းဝဵင်းယေႇရုသလႅမ်ႇ လႄႈဢဝ်မႃးၵႃႈတီႈဝဵင်းပႃႇပုလုၼ်ႇ ၸိူဝ်းၼၼ်ႉၶိုၼ်းပၼ်လႄႈႁႂ်ႈဢဝ်ၵႂႃႇသူင်ႇၵႃႈတီႈပိၵ်ႉမၢၼ်ႇၸဝ်ႈ ဢၼ်မီးၵႃႈၼႂ်းဝဵင်းယေႇရုသလႅမ်ႇၼၼ်ႉလႄႈ ဢဝ်တင်းသဵင်ႈတင်းလူင် ၶိုၼ်းဝႆႉတီႈၽႂ်တီႈမၼ်းသေ၊ဝႃႈၼင်ႇၼႆဢေႃႈ။
၆ ပိူဝ်ႈဢၼ်ပဵၼ်ၼင်ႇၼႆလႄႈ ၶုၼ်လူင်ၼၼ်ႉၶိုၼ်းပူင်ဢမိင်ႉလႄႈဝႃႈ၊-တႃႇတၼေႇမဵဝ်ႉဝုၼ်ႇၽၢႆႇဝၼ်းတူၵ်းၼမ်ႉႁွင်ႊသေႇသပေႃႇၸၼေႇ ဢိၵ်ႇတင်းၵေႃႉသေႈဢၼ်ႁူမ်ႈပွင်းၵၼ်တင်းသူဢၼ်ဝႃႈ ၵူၼ်းဢၽႃႇသသၵ်ႉဢၼ်ယူႇၽၢႆႇဝၼ်းတူၵ်းၼမ်ႉႁွင်ႊၶဝ်ဢိူၺ်း။ ဢွၼ် ၵၼ်ယူႇၵႆၵႆတီႈၼၼ်ႉတႃႉ။
၇ ယႃႇပေဢွၼ်ၵၼ်ႁၢမ်ႈတပ်ႉႁႄႉၶႅၼ် ဢမူႉတၢင်းဢၼ်တႄႇႁဵတ်းႁိူၼ်းၽြႃးပဵၼ်ၸဝ်ႈၼၼ်ႉ။ႁႂ်ႈမဵဝ်ႉဝုၼ်ႇယုတဢိၵ်ႇတင်းၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ယုတ ၸိူဝ်းၼၼ်ႉလႆႈတႄႇႁဵတ်းႁိူၼ်းၽြႃးပဵၼ်ၸဝ်ႈၼၼ်ႉၵႃႈၼႂ်းတီႈမၼ်းၼၼ်ႉ သေ။
၈ လိူဝ်သေၼၼ်ႉၵဝ်မီးဢမိင်ႉလွင်ႈဢၼ်သူတၵ်းလႆႈႁဵတ်းၸိူဝ်ႉၼင်ႇႁိုဝ်သေလႄႈ ၸွႆႈထႅမ်ၶဝ်ၸိူဝ်းဢၼ်တႄႇႁဵတ်းႁိူၼ်းၽြႃးပဵၼ်ၸဝ်ႈၼၼ်ႉ ဢိၵ်ႇတင်းလွင်ႈဢၼ်သူတၵ်းလႆႈထုတ်ႇဢဝ် ၵႃႈၼႂ်းၽၼ်ႇတႃႇၶုၼ်ႁေႃၶမ်းဢၼ်ဝႃႈၶွၼ်ႇဢၼ်လႆႈၶၢမ်ႇဢဝ်ၵႃႈတီႈၽၢႆႇဝၼ်းတူၵ်းၼမ်ႉႁွင်ႊၼၼ်ႉ ပုၼ်ႈၸရိပ်ႈမၼ်းလႄႈဢဝ်ပၼ်တီႈၶဝ်ၼၼ်ႉၵမ်းလဵဝ် ၶၼ်ၶၼ်ၽႂ်းၽႂ်းႁႂ်ႈၶဝ်ဢမ်ႇလႆႈမီးတၢင်းဢၼ်ႁၢမ်ႈတပ်ႉႁႄႉၶႅၼ်ဢေႃႈ။
၉ ၼွၵ်ႈသေၼၼ်ႉ ႁႂ်ႈဢဝ်ၵႃႈဢၼ်ၶဝ်မီးဢလူဝ်ႇၶႆႈလႆႈတင်းသဵင်ႈတင်းလူင်ဢၼ်ဝႃႈ ဝူဝ်း လႂ်၊သူဝ်းပေႃႈ လႂ်၊သူဝ်းဢွၼ်ႇ လႂ်၊ ပုၼ်ႈဢၼ်တၵ်းပုၵ်ႉၸေႃႇယိၸ်ႉဢၼ်တုတ်ႇၽႆးတီႈၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်ၼၼ်ႉဢိၵ်ႇတင်း ၶဝ်ႈၵျုင်ႇ၊ၵိူဝ်၊ၼမ်ႉၸပိတ်ႈ၊ၼမ်ႉမၼ်းပၼ်ၵူႈဝၼ်းၸွမ်းၵႃႈၼင်ႇဢၼ် ယိတ်ႉပရေႃးႁိၵ်ႈဝဵင်း ယေႇရုသလႅမ်ႇ ၸိူဝ်းၼၼ်ႉၸီႇယၢင်ႇၼၼ်ႉ
၁၀ ႁႂ်ႈၶဝ်လႆႈပုၵ်ႉၸေႃႇယိၸ်ႉ ဢၼ်ႁွမ်ဢၼ်ႁူၺ်း တီႈၽြႃးပဵၼ်ၸဝ်ႈၸဝ်ႈၽုင်ႇၵၢင်ႁၢဝ်လႄႈ သူးတွင်းပုၼ်ႈဢသၢၵ်ႈၶုၼ်ႁေႃၶမ်းဢိၵ်ႇတင်း လုၵ်ႈလၢၼ်မဵဝ်းၸိူဝ်ႉၶိူဝ်းၸဝ်ႈ သေ။
၁၁ လိူဝ်သေၼၼ်ႉၵဝ်မီးဢမိင်ႉလႄႈဝႃႈၸမ်း၊-ၵေႃႉ လႂ်သေဢမ်ႇဝႃႈ ပေႃးဝေႈပိူင်ႈသေၵႂၢမ်းၸဝ်ႈၼႆႉၵႂႃႇၸိုင်ႁႂ်ႈထွတ်ႇထူၺ်ႈဢဝ်သဝ်မႆႉ သေၵႃႈၼႂ်းႁိူၼ်းၵေႃႉၼၼ်ႉသေလႄႈ ပၵ်းသေယဝ်ႉ ဢဝ်မၼ်းမတ်ႉႁွႆႈၵႅၼ်ႈၶေႃးတူၵ်းသေ။ ႁိူၼ်းမၼ်းၵေႃႈႁႂ်ႈပဵၼ်ၵွင်ၶီႈဝူဝ်းသေဝႃႈ ၼင်ႇၼႆဢေႃႈ။
၁၂ ႁႂ်ႈၽြႃးပဵၼ်ၸဝ်ႈ ဢၼ်ႁႂ်ႈၼႃႉမႃႉၸိုဝ်သဵင်မၼ်းၸဝ်ႈတႄႇယူႇၵႃႈတီႈၼၼ်ႉၼၼ်ႉ ယႃႉၽဵဝ်ႈပႅတ်ႈၶုၼ်ႁေႃၶမ်းဢိၵ်ႇတင်း ၶႃႈဝၢၼ်ႈၵူၼ်းမိူင်းၵႃႈဢၼ်ယိတ်းမိုဝ်းၶဝ်သေလႄႈ ဝေႈပိူင်ႈၵႂၢမ်းၸဝ်ႈလႄႈႁဵတ်းႁႂ်ႈႁိူၼ်းၽြႃးပဵၼ်ၸဝ်ႈ ၵႃႈၼႂ်းဝဵင်း ယေႇရုသလႅမ်ႇလူႉလႅဝ်ၼၼ်ႉသေၵမ်းလူၺ်ႈ။ၵဝ်တႃႇရိၼႆႉပုင်ဢမိင်ႉၸဝ်ႈဢေႃႈ။ႁႂ်ႈဢွၼ်ၵၼ်ႁဵတ်းၸွမ်းဢမိင်ႉၸဝ်ႈၼႆႉၶၼ်ၶၼ်ၽႂ်းၽႂ်းသေ၊ဝႃႈၼင်ႇၼႆဢေႃႈ။
တၢင်းဢၼ်သၢၵ်ႈၵၢပ်ႈပိၵ်ႉမၢၼ်ႇၽြႃး
၁၃ မိူဝ်ႈၼၼ်ႉတႃႇတၼေႇမဵဝ်ႉဝုၼ်ႇၽၢႆႇဝၼ်းတူၵ်းၼမ်ႉႁွင်ႊယေႇသႃႇပေႃႇၸၼေႇ ဢိၵ်ႇတင်းၵေႃႉသေႈဢၼ်ႁူမ်ႈၵၼ်တင်းၶဝ်ၸိူဝ်းၼၼ်ႉ ဢွၼ်ၵၼ်ႁဵတ်းၶၼ်ၶၼ်ၽႂ်းၽႂ်းၸွမ်းၵႃႈၼင်ႇဢမိင်ႉၸဝ်ႈၶုၼ်လူင် တႃႇရိ မီး ၼၼ်ႉဢေႃႈ။
၁၄ ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၵူၼ်းယုတ ၸိူဝ်းၼၼ်ႉဢွၼ်ၵၼ်တႄႇႁဵတ်းလႄႈတၢင်းၵျၢမ်ႇတၢင်းပွင်ၶဝ် ပဵၼ်ၵွပ်ႈပိူဝ်ႈဢၼ် ပရေႃးၽႅတ်ႈႁၵ်ႉၵေႇတင်းၸႃႇၶရိ လုၵ်ႈၸၢႆးဢိတေႃႇ ႁေႃးလၢတ်ႈၼၼ်ႉဢေႃႈ။ၶဝ်ဢွၼ်ၵၼ်တႄႇႁဵတ်းႁႂ်ႈလႆႈယဝ်ႉတူဝ်ႈၸွမ်းၵႃႈၼင်ႇဢၼ်ဢမိင်ႉၽြႃးပဵၼ်ၸဝ်ႈမဵဝ်း ဢိသရေႇလ ဢိၵ်ႇတင်းဢမိင်ႉၶုၼ်ၵုရု၊ၶုၼ်တႃႇရိ၊ ၶုၼ် ဢႃႇတၸေႇရိတ်ႉၶုၼ်ပေႇရသိမီးၼၼ်ႉဢေႃႈ။
၁၅ ၼႂ်းပီႊဢၼ်ၶုၼ်လူင်တႃႇရိၸၢမ်ႇႁၢင်ႈၸၢမ်ႇႁေႃႁူၵ်းပီႊလိူၼ်ႈ ဢႃႇတႃႇသၢမ်ဝၼ်းၼၼ်ႉႁိူၼ်းၸဝ်ႈယဝ်ႉတူဝ်ႈ လီငၢမ်းဢေႃႈ။
၁၆ ၵူၼ်းမဵဝ်းဢိသရေႇလ၊ယိတ်ႉပရေႃးႁိၵ်ႈၵူၼ်းမဵဝ်းလေႇဝိ ဢိၵ်ႇတင်းၶဝ်ၸိူဝ်းဢၼ်ၶဝ်ႈပႃးၼႂ်းမုၵ်ႉၼႂ်းၸိူဝ်း ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇလႄႈ ယင်းၵိုတ်းယင်းၵျၢၼ်ႇၸိူဝ်းၼၼ်ႉဢွၼ်ၵၼ်မီးတင်းၸႂ်ဢၼ်ၸူမ်းသိူဝ်းသေလႄႈၶၢမ်ႇပွႆးဢ ၼူႉမေႃးတၼႃႇႁိူၼ်းၽြႃးပဵၼ်ၸဝ်ႈဢေႃႈ။
၁၇ ၼႂ်းပွႆးဢၼူႉမေႃးတၼႃႇႁိူၼ်းၽြႃးပဵၼ်ၸဝ်ႈၼၼ်ႉ ၶဝ်ဢွၼ်ၵၼ်ပုၵ်ႉၸေႃႇယိၸ်ႉဢၼ်ဝႃႈဝူဝ်းပၢၵ်ႇၼိုင်ႈ၊ သူဝ်းပေႃႈသွင်ပၢၵ်ႇ၊သူဝ်းဢွၼ်ႇသီႇပၢၵ်ႇ ဢိၵ်ႇတင်းပေႉပေႃႈသိပ်းပၢႆသွင်တူဝ်ဢၼ်ပဵၼ်ယိၸ်ႉ တီႈဢၼ်ၽႄႇဢပျႅတ်ႈမဵဝ်းဢိသရေႇလ တင်းသဵင်ႈတင်းလူင် ၸွမ်းလူၺ်ႈတင်းဢၼ်ၼပ်ႉဢၢၼ်ႇမဵဝ်းဢိသရေႇလ သိပ်းပၢႆသွင်မဵဝ်းၼၼ်ႉဢေႃႈ။
ပွႆးပႃသၶႃႇ
၁၈ ၶဝ်ဢွၼ်ၵၼ်ၶၢၼ်း ယိတ်ႉပရေႃးႁိၵ်ႈ တင်းလၢႆဝႆႉတီႈၽႂ်တီႈမၼ်းဢိၵ်ႇတင်းၵူၼ်းမဵဝ်းလေႇဝိတင်းလၢႆ ဝႆႉတီႈမုၵ်ႉၸိူဝ်းၽႂ်မုၵ်ႉၸိူဝ်းမၼ်း ႁႂ်ႈလႆႈႁဵတ်းဝၢတ်ႈၽြႃးၵႃႈၼႂ်းဝဵင်းယေႇရုသလႅမ်ႇ ၸွမ်းၵႃႈၼင်ႇဢၼ်တႅမ်ႈဝႆႉမီး ယူႇၵႃႈၼႂ်းၵျၢမ်းလိၵ်ႈမုဝ်းသေႇၼၼ်ႉဢေႃႈ။
၁၉ မုၵ်ႉၸိူဝ်းၶဝ်ၸိူဝ်းဢၼ်လႆႈၶၢမ်ႇ တၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉဢွၼ်ၵၼ်ၶၢမ်ႇပွႆး ပႃႇသၶႃႇ ၼႂ်းလိူၼ်ပထမ သိပ်းသီႇဝၼ်းၼၼ်ႉဢေႃႈ။
၂၀ ယိတ်ႉပရေႃးႁိၵ်ႈဢိၵ်ႇတင်းၵူၼ်းမဵဝ်းလေႇဝိ တင်းလၢႆၸိူဝ်းၼၼ်ႉႁႂ်ႈတူဝ်ၸဝ်ႈၵဝ်ႇမူတ်းသႂ်ၽွမ်ႉၽွမ်ႉၵၼ်လႄႈ ၶဝ်တင်းသဵင်ႈတင်းလူင်မူတ်းသႂ်ယူႇသေလႄႈ ဢွၼ်ၵၼ်ဢဝ်သူဝ်းဢွၼ်ႇပႃသၶႃႇတၢႆ ပုၼ်ႈမုၵ်ႉၸိူဝ်းပုၼ်ႈၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၵႃႈမီး ဢိၵ်ႇတင်းပုၼ်ႈယိတ်ႉပရေႃးႁိၵ်ႈ ဢၼ်ပဵၼ်ပီႈၼွင်ႉၸိူဝ်ႉၶိူဝ်းဢိၵ်ႇတင်း ပုၼ်ႈတူဝ်ၸဝ်ႈၵဝ်ႇဢေႃႈ။
၂၁ ၵူၼ်းမဵဝ်းဢိသရေႇလဢၼ်လႆႈၶၢမ်ႇ တၢင်းဢၼ်သိမ်းဢဝ်ၵႂႃႇၸိူဝ်းၼၼ်ႉဢိၵ်ႇတင်းၶဝ်ၸိူဝ်းဢၼ်ၸုၼ်ႉပႅတ်ႈ တၢင်းဢၼ်ၵူဝ်ႈၵိူၵ်ႇၵူၼ်းတၢင်ႇၸိူဝ်ႉတၢင်ႇမဵဝ်းလႄႈ မႃးႁႃၽြႃးပဵၼ်ၸဝ်ႈဢိသရေႇလၸိူဝ်းၼၼ်ႉဢွၼ်ၵၼ်ၵိၼ်ႇဢေႃႈ။
၂၂ မီးတင်းၸႂ်ဢၼ်ၸူမ်းသိူဝ်းသေလႄႈ ၶၢမ်ႇပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉ ၸဵတ်းဝၼ်းတဵမ်တဵမ်ဢေႃႈ။လွင်ႈမၼ်းၸမ်းထႃႇဝရႃႉၽြႃးပၼ်ဢၶႂၢင်ႉႁႂ်ႈၶဝ်လႆႈၸူမ်းသိူဝ်းလႄႈ ႁႂ်ႈႁူဝ်ၸႂ်ၶုၼ်ႁေႃၶမ်းဢႃႇသုရိၶၢႆႉပုတ်ႈမႃးယူႇၽၢႆႇၶဝ်ႁႂ်ႈလႆႈၸွႆႈထႅမ်မႃႉၸႃႉၶဝ်ၼႂ်းလွင်ႈတၢင်းဢၼ် တႄႇႁဵတ်းႁိူၼ်းၽြႃးပဵၼ်ၸဝ်ႈမဵဝ်းဢိသရေႇလၼၼ်ႉဢေႃႈ။