Chapter
၃
ၶိုၼ်းမႄးႁဵတ်းယိတ်ႉပလၢင်ႇဢၼ်ပုၵ်ႉၸေႃႇ
၁ မိူဝ်ႈဢၼ် ႁွတ်ႈထိုင်လိူၼ်သတ်ႉတမလႄႈၵူၼ်းမဵဝ်းဢိသရေႇလ တင်းလၢႆ တူၵ်းတီႈတူၵ်းလႅၼ်ၵႃႈၼႂ်းဝၢၼ်ႈၼႂ်းဝဵင်းတီႈယူႇၶဝ်ယဝ်ႉၼၼ်ႉၸိုင် ၵူၼ်းတင်းလၢႆဢွၼ်ၵၼ်မႃးၸူႉၵၼ်တုမ်ၵၼ်ၵႃႈတီႈဝဵင်း ယေႇရုသလႅမ်ႇ မိူၼ်ၸိူဝ်ႉၼင်ႇဢၼ်ပဵၼ်တူဝ်လဵဝ်ၸႂ်လဵဝ်ၵူၺ်း ၼၼ်ႉဢေႃႈ။
၂ မိူဝ်ႈၼၼ်ႉယေႃးသုလုၵ်ႈၸၢႆးယေႃႇၸတၵ်ႉဢိၵ်ႇတင်း ယိတ်ႉပရေႃးႁိၵ်ႈဢၼ်ပဵၼ်ၼွင်ႉၸၢႆးမၼ်းတင်းလၢႆ ၸေႇရုပပေႇလလုၵ်ႈၸၢႆးသႃႇလသေႇလ ဢိၵ်ႇတင်း ၼွင်ႉၸၢႆးမၼ်းတင်းလၢႆၸိူဝ်းၼၼ်ႉဢွၼ်ၵၼ်လုၵ်ႉလႄႈ တႄႇႁဵတ်းယိတ်ႉပလၢင်ႇၽြႃးပဵၼ်ၸဝ်ႈမဵဝ်း ဢိသရေႇလ ႁႂ်ႈလႆႈဢဝ်ယိၸ်ႉဢၼ်တုတ်ႇၽႆးပုၵ်ႉၸေႃႇၵႃႈၼိူဝ်မၼ်းၸွမ်း ၵႃႈၼင်ႇဢၼ်တႅမ်ႈဝႆႉမီးယူႇၵႃႈၼႂ်းၵျၢမ်းလိၵ်ႈ ပိင်းၺၢပ်ႈတိမုဝ်းသေႇ ၵူၼ်းၽြႃးပဵၼ်ၸဝ်ႈၼၼ်ႉဢေႃႈ။
၃ ပိၵ်ႉသမ်ႉၶဝ်ၵူဝ်ႁႄၶဝ်ၸိူဝ်းဢၼ်ယူႇၵႃႈၼႂ်းမိူင်းၼၼ်ႉ ၵူႈတီႈၵူႈလႅၼ်ၸိူဝ်းၼၼ်ႉသေၵေႃႈ ၶဝ်ဢွၼ်ၵၼ်ဢဝ်ယိတ်ႉပလၢင်ႇတႄႇဝႆႉ ၵႃႈၼိူဝ်ၶူင်ႇႁၢၼ်ႉတိၼ်မၼ်းသေလႄႈ ဢဝ်ယိၸ်ႉဢၼ်တုတ်ႇၽႆးဢၼ်ဝႃႈ ယိၸ်ႉဢၼ်တုတ်ႇၽႆးၶိင်ႇႁူဝ်ၼႂ်ၶိင်ႇႁူဝ်ၶမ်ႈၼၼ်ႉပုၵ်ႉၸေႃႇတီႈ ထႃႇဝ ရႃႉၽြႃးယူႇသေႇသေႇဢေႃႈ။
၄ ပွႆးႁဵတ်းသုမ်ႉထဵင်ၵေႃႈၶဝ်ဢွၼ်ၵၼ်ၶၢမ်ႇ ၸွမ်းၵႃႈၼင်ႇဢၼ်ၵျၢမ်းလိၵ်ႈမႃးၼၼ်ႉလႄႈ ႁဵတ်းတၢင်းဢၼ်ၼပ်ႉဢၢၼ်ႇသေလႄႈပုၵ်ႉၸေႃႇယိၸ်ႉဢၼ်တုတ်ႇၽႆး ၵူႈဝၼ်းၵူႈဝၼ်းမႅၼ်ႈၸွမ်းၵႃႈၼင်ႇဢၼ် ထုင်းၾိင်ႈတြႃးမီးလႄႈထုၵ်ႇလီ ႁဵတ်းဝၢတ်ႈယူႇၵူႈဝၼ်းၼၼ်ႉဢေႃႈ။
၅ လိုၼ်းၼၼ်ႉၶဝ်ဢွၼ်ၵၼ်ဢဝ် ယိၸ်ႉဢၼ်တုတ်ႇၽႆးဢၼ်လႆႈပုၵ်ႉၸေႃႇသေႇသေႇ၊ ယိၸ်ႉဢၼ်လႆႈပုၵ်ႉၸေႃႇဝၼ်းလိူၼ်မႂ်ႇဢိၵ်ႇတင်းဝၼ်းပွႆးထမ်ႇမ ၵႃႈဢၼ်ႁႂ်ႈမူတ်းၸၢင်ႇပုၼ်ႈထႃႇဝရႃႉၽြႃး ယိၸ်ႉဢၼ်လႆႈပုၵ်ႉၸေႃႇဢၼ်ႁဵတ်းၸွမ်းၸႂ်ၸေႇတၼႃႇသေလႄႈ ဢဝ်ၶိူင်ႈပုၵ်ႉၸေႃႇမႃးတီႈထႃႇဝရႃႉၽြႃး ႁင်းၽႂ်ႁင်းမၼ်းၸိူဝ်းၼၼ်ႉပုၵ်ႉ ၸေႃႇဢေႃႈ။
၆ ပိၵ်ႉသမ်ႉဢမ်ႇပႆႇၶျႃးငဝ်ႈႁၢၵ်ႈတိူၵ်ႈပိၵ်ႉမၢၼ်ႇထႃႇဝရႃႉၽြႃးသေၵေႃႈ ၶဝ်ဢွၼ်ၵၼ်ဢဝ်ယိၸ်ႉဢၼ်တုတ်ႇၽႆး ပုၵ်ႉၸေႃႇတီႈထႃႇဝရႃႉၽြႃးၸႃႉၸဵမ်လိူၼ်သတ်ႉတမဝၼ်းၼိုင်ႈၼၼ်ႉဢေႃႈ။
ၶိုၼ်းမႄးႁဵတ်းပိၵ်ႉမၢၼ်ႇၽြႃး
၇ ၶဝ်ဢွၼ်ၵၼ် ဢဝ်ငိုၼ်းပၼ်တီႈၶဝ်ၸိူဝ်းဢၼ်မေႃတႄႇမေႃႁဵတ်းဢိၵ်ႇတင်း လၢၵ်ႈသမႃးတင်းလၢႆလႄႈဢွၼ်ၵၼ်ဢဝ် ၸရိပ်ႈတၢင်းၵိၼ်တင်းၼမ်ႉမၼ်းပၼ်တီႈၵူၼ်းဝဵင်းၸိတုၼ်ႇ တင်းၵူၼ်းဝဵင်းတုရုၸိူဝ်းၼၼ်ႉႁႂ်ႈလႆႈဢဝ်မႆႉဢႃႇရိတ်ႉၵႃႈၼိူဝ်လွႆလေႇပၼုၼ်ႇ လူင်းၸူးပၢင်ႇလၢႆႇသူင်ႇႁွတ်ႈ ၵႃႈတီႈတႃႈယွပ်ႇပၸွမ်းၵႃႈၼင်ႇဢၼ်ၶဝ်လႆႈဢၶႂၢင်ႉတီႈၵုရု ၶုၼ်ႁေႃၶမ်းပေႇရသိ ၼၼ်ႉဢေႃႈ။
၈ ၼႂ်းပီႊတုတိယလိူၼ်တုတိယဢၼ်ၶဝ်ႁွတ်ႈထိုင်ၵႃႈတီႈႁိူၼ်းၽြႃးပဵၼ်ၸဝ်ႈၵႃႈၼႂ်းဝဵင်းယေႇရုသလႅမ်ႇၼၼ်ႉ ၸေႇရုပပေႇလလုၵ်ႈၸၢႆးသႃႇလလေႇလ၊ယေႃးသုလုၵ်ႈၸၢႆးယေႃႇၸ တင်းပီႈၼွင်ႉၶဝ်ဢၼ်ၵိုတ်းဢၼ်ၵျၢၼ်ႇ ဢၼ်ပဵၼ်ယိတ်ႉပရေႃးႁိၵ်ႈတင်းၵူၼ်းမဵဝ်းလေႇဝိ ၶဝ်ၵႃႈဢၼ်ဢွၵ်ႇသေၵႃႈၼႂ်း မုၵ်ႉၸိူဝ်းၶဝ်ၸိူဝ်းဢၼ်လႆႈၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉသေလႄႈ ၶိုၼ်းမႃးၸူးၵႃႈတီႈဝဵင်းယေႇရုသလႅမ်ႇၸိူဝ်းၼၼ်ႉ ဢွၼ်ၵၼ်လုၵ်ႉလႄႈၶၢၼ်းၵူၼ်းလေႇဝိ ဢၼ်ၸႃႉၸဵမ်ဢသၢၵ်ႈလႆႈသၢဝ်းၼိုင်ႈလႄႈဢသၢၵ်ႈလိူဝ်သၢဝ်းၵႂႃႇၸိူဝ်းၼၼ်ႉ ႁႂ်ႈလႆႈဢုပ်ႉထိင်းၵႃႈၼိူဝ်တၢင်းဢၼ်တႄႇႁဵတ်းႁိူၼ်း ထႃႇဝရႃႉၽြႃးၼၼ်ႉ ဢေႃႈ။
၉ မိူဝ်ႈၼၼ်ႉယေႃးသု၊ယုတဢိၵ်ႇတင်းလုၵ်ႈၸၢႆးၼွင်ႉၸၢႆးမၼ်းတင်းလၢႆ ၵတ်ႉမျေႇလဢိၵ်ႇတင်းလုၵ်ႈၸၢႆးမၼ်းတင်းလၢႆ ဢၼ်ပဵၼ်ၵူၼ်းမဵဝ်းယုတ၊ၵူၼ်းႁေႇၼ တပ်ႉတင်းလၢႆဢိၵ်ႇတင်း လုၵ်ႈၸၢႆးၶဝ်ၼွင်ႉၸၢႆးၶဝ်ဢၼ်ပဵၼ်ၵူၼ်းမဵဝ်းလေႇဝိ ၸိူဝ်းၼၼ်ႉဢွၼ်ၵၼ်လုၵ်ႉႁႂ်ႈလႆႈဢုပ်ႉလႆႈထိင်း ၵႃႈၼိူဝ်ၶဝ်ၸိူဝ်းဢၼ်တႄႇ ဢၼ်ႁဵတ်းႁိူၼ်းၽြႃးပဵၼ်ၸဝ်ႈၼၼ်ႉဢေႃႈ။
၁၀ ၶဝ်ၸိူဝ်းဢၼ်တႄႇဢၼ်ႁဵတ်းၼၼ်ႉမိူဝ်ႈဢၼ်ၶဝ် ၶျႃးငဝ်ႈႁၢၵ်ႈတိူၵ်ႈပိၵ်ႉမၢၼ်ႇထႃႇဝရႃႉၽြႃးၼၼ်ႉၸိုင် ၶဝ်ၶၢၼ်းယိတ်ႉပရေႃးႁိၵ်ႈ ဢၼ်ၼုင်ႈမႆႊႁၢင်ႈၶိူင်ႈတၢင်းၼုင်ႈတၢင်းမႆႊၶဝ်သေလႄႈ ယိပ်းၵမ်ၼႄးၶရႃႇယူႇၵူၼ်းဢႃႇသပ်ႉမဵဝ်းလေႇဝိ ဢၼ် ယိပ်းၵမ်သႅင်ႇယူႇၸိူဝ်းၼၼ်ႉ ႁႂ်ႈလႆႈယွင်ႈယေႃးမုၼ်ထႃႇဝရႃႉၽြႃးၸွမ်းၵႃႈၼင်ႇဢၼ်တႃႇဝိတ်ႉ ၶုၼ်ႁေႃၶမ်းဢိသရေႇလၸီႇ ယၢင်ႇဝႆႉၼၼ်ႉဢေႃႈ။
၁၁ ဢွၼ်ၵၼ်ယွင်ႈယေႃးမုၼ်ႈၸဝ်ႈယူႇ၊ႁပ်ႉတုင်းဢဝ်ၵျေးၸူးၸဝ်ႈယူႇသေလႄႈ ၶေႉသဵင်တႅၵ်ႈသဵင်ၵၼ်လႄႈႁဵတ်း ၵႂၢမ်းပဵၼ်လႄႉပဵၼ်ၵမ်းတီႈထႃႇဝရႃႉၽြႃးလႄႈဝႃႈ၊-မၼ်းၸဝ်ႈမျၢတ်ႈလီဢေႃႈ။ၵရူႉၼႃႇၸဝ်ႈ ဢၼ်မၼ်းၸဝ်ႈၼႄပျႃးတီႈမဵဝ်းဢိသရေႇလၼၼ်ႉတႄႇယူႇတႃႇသေႇမၼ်ႈၶိူင်ႇဢေႃႈ၊ ဝႃႈၼင်ႇၼႆဢေႃႈ။ၵူၼ်းတင်းသဵင်ႈတင်းလူင်ဢွၼ်ၵၼ်ယွင်ႈယေႃး မူၼ်ႈထႃႇဝရႃႉၽြႃးယူႇသေလႄႈႁဵတ်းတင်းသဵင်ဢၼ်ယႂ်ႇၼႃႇ ႁွင်ႉႁူၼ်ႈႁွင်ႉသႅၼ်ႇၵွပ်ႈပိူဝ်ႈဢၼ်လႆႈၶျႃးငဝ်ႈႁၢၵ်ႈတိူၵ်ႈ ႁိူၼ်းထႃႇဝရႃႉၽြႃးၼၼ်ႉဢေႃႈ။
၁၂ ၵူၺ်းၵႃႈယိတ်ႉပရေႃးႁိၵ်ႈဢိၵ်ႇတင်းၵူၼ်းလေႇဝိ ဢၼ်ပဵၼ်ငဝ်ႈပဵၼ်ႁူဝ်မဵဝ်းပူႇမဵဝ်းပေႃႈၶဝ်ဢၼ်ဝႃႈၶဝ်ၸိူဝ်းဢၼ်ဢသၢၵ်ႈၵေႇလႄႈ ယၢမ်ႈလႆႈႁၼ်ပိၵ်ႉမၢၼ်ႇၸဝ်ႈ ၵမ်းဢွၼ်တၢင်းၸိူဝ်းၼၼ်ႉ ဢွၼ်ၵၼ်ႁဵတ်းတင်းသဵင်ဢၼ်ယႂ်ႇၼႃႇ ႁွင်ႉႁႆႈၼႂ်းမိူဝ်ႈဢၼ်ၶျႃးငဝ်ႈႁၢၵ်ႈပိၵ်ႉမၢၼ်ႇၸဝ်ႈ သိုဝ်ႈၼႃႈတႂ်ႈတႃၶဝ်ၼၼ်ႉ ဢေႃႈ။
၁၃ ၵူၼ်းၼမ်ၼႃႇၵေႃႈဢွၼ်ၵၼ်မီးတင်းၸႂ်ဢၼ်ၸူမ်းသိူဝ်းသေလႄႈ ႁွင်ႉႁူၼ်ႈႁွင်ႉသႅၼ်ႇထၼ်ႈပေႃးၵူၼ်းတင်းလၢႆဢမ်ႇၸၵ်းၽႄလႄႈ ႁူႉလႆႈသဵင်ဢၼ်မီးၸႂ်ဢၼ်ၸူမ်းသိူဝ်းသေလႄႈႁွင်ႉႁူၼ်ႈႁွင်ႉသႅၼ်ႇဢိၵ်ႇတင်း သဵင်ဢၼ်ၵူၼ်းတင်းလၢႆႁႆႈႁွင်ႉၼၼ်ႉဢေႃႈ။လွင်ႈမၼ်းၸမ်း ၵူၼ်းတင်းလၢႆႁဵတ်းသဵင်ဢၼ်ယႂ်ႇၼႃႇသေလႄႈ ႁွင်ႉႁူၼ်ႈႁွင်ႉသႅၼ်ႇလႄႈသဵင်ၼၼ်ႉလႆႈငိၼ်းၵႂႃႇတေႃႇထိုင်ႁွတ်ႈတီႈဢၼ်ၵႆၼႃႇဢေႃႈ။