Chapter
၄
ပေႃႇၸဢဝ်ရုထ
၁ မိူဝ်ႈၼၼ်ႉ ပေႃႇၸ ၶိုၼ်ႈၸူးၵႃႈတီႈႁူးၽၵ်းတူဝဵင်းလႄႈ ၼင်ႈယူႇၵႃႈတီႈၼၼ်ႉသေယဝ်ႉႁၼ်ၵေႃႉဢၼ်ပိူင်ႇထုတ်ႇဢဝ်ဢၼ်ပေႃႇၸလၢတ်ႈဝႆႉၼၼ်ႉ ပႆတၢင်းၵႂႃႇလႄႈႁွင်ႉဢဝ်မၼ်းၼၼ်ႉလႄႈဝႃႈ၊-ၵေႃႉၼႆႉဢိူၺ်း။ဝေႉလႄႈၼင်ႈၵႃႈတီႈၼႆႉလူးၵွၼ်ႇသေၵမ်း၊ ဝႃႈၼင်ႇၼႆလႄႈ ၵေႃႉၼၼ်ႉၵေႃႈဝေႉလႄႈၼင်ႈၵႃႈတီႈၼၼ်ႉ ဢေႃႈ။
၂ မၼ်းသမ်ႉႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ဝဵင်းၼၼ်ႉသိပ်းၼိုင်ႈမႃးလႄႈလၢတ်ႈဝႃႈ၊-ၼင်ႈၵႃႈတီႈၼႆႉသေၵမ်း၊ ဝႃႈၼင်ႇၼႆလႄႈၶဝ်ၵေႃႈၼင်ႈဢေႃႈ။
၃ မၼ်းလၢတ်ႈတီႈၵေႃႉဢၼ်ပိူင်ႇထုတ်ႇဢဝ်ၼၼ်ႉလႄႈဝႃႈ၊-ၼေႃးမိဢၼ်လုၵ်ႉသေၵႃႈတီႈမိူင်းမေႃႇၽၶိုၼ်းမႃးၼၼ်ႉ တၵ်းၶၢႆၵႂၢၵ်ႉလိၼ်ဢၼ်ပီႈၸၢႆးႁဝ်းဢေႇလိမလိၵ်ႉ ပိူင်ႇၼၼ်ႉလႄႈ၊ၵဝ်ၶႃႈမီးတၢင်းၵျၢမ်ႇ တၢင်းပွင်တၵ်းမွၵ်ႇလၢတ်ႈတီႈၸဝ်ႈဝႃႈ၊-
၄ သိုဝ်ႉဢဝ်ၵႃႈတီႈၽၢႆႇၼႃႈ ၶဝ်ၸိူဝ်းဢၼ်ၼင်ႈယူႇၵႃႈတီႈၼႆႉ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ် ၵူၼ်းမဵဝ်းတင်းလၢႆၼႆႉသေၵမ်း။ပေႃးၸဝ်ႈမီးဢလူဝ်ႇၶႆႈထုတ်ႇဢဝ်ၸိုင်မွၵ်ႇလၢတ်ႈတီႈၵဝ်ၶႃႈႁႂ်ႈၵဝ်ၶႃႈလႆႈႁူႉသေၵမ်းတႃႉ။ၼွၵ်ႈသေၸဝ်ႈၼႆႉ ဢမ်ႇမီးၵေႃႉဢၼ်ပိူင်ႇထုတ်ႇဢဝ်ယဝ်ႉ။ၵဝ်ၶႃႈတူၵ်းလိုၼ်းၸဝ်ႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ၵေႃႉၼၼ်ႉၶိုၼ်းလၢတ်ႈလႄႈဝႃႈ၊-
၅ ၵဝ်ၶႃႈ တၵ်းထုတ်ႇဢဝ်ဢေႃႈ၊ဝႃႈၼင်ႇၼႆဢေႃႈ။မိူဝ်ႈၼၼ်ႉပေႃႇၸ လၢတ်ႈလႄႈဝႃႈ၊-ဝၼ်းဢၼ်ၸဝ်ႈသိုဝ်ႉဢဝ်ၵႂၢၵ်ႉလိၼ်ၵႃႈတီႈ ၼေႃးမိၼၼ်ႉတၵ်းလႆႈသိုဝ်ႉပႃးဢဝ်ရုထ ဢၼ်ပဵၼ်မေႈယိင်းမဵဝ်းမေႃႇၽ ဢၼ်ပဵၼ်မေးၵေႃႉဢၼ်တၢႆယဝ်ႉၼၼ်ႉလႄႈ ႁႂ်ႈလႆႈဢဝ်ဢမူၺ်ႇဢုၵ်ႉၸႃႇၵေႃႉဢၼ်တၢႆယဝ်ႉၼၼ်ႉ သိုပ်ႇၸိုဝ်ႈသဵင်မၼ်းလူးၵွၼ်ႇဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ ၵေႃႉဢၼ်ပိူင်ႇ ထုတ်ႇဢဝ်ၼၼ်ႉၶိုၼ်းလၢတ်ႈလႄႈဝႃႈ၊-
၆ ပေႃးပဵၼ်ၼႆၵဝ်ဢမ်ႇထုတ်ႇဢဝ်လႆႈ။ပေႃးထုတ်ႇဢဝ်ၸိုင်တၵ်းပဵၼ်တၢင်းဢၼ် ယႃႉဢမူၺ်ႇဢုၵ်ႉၸႃႇၵဝ်ႇလူႉဢေႃႈ။ၵွပ်ႈပိူဝ်ႈဢၼ်ၵဝ်ဢမ်ႇထုတ်ႇဢဝ်လႆႈလႄႈ မႂ်းထုတ်ႇဢဝ်သေၵမ်း၊ဝႃႈၼင်ႇၼႆဢေႃႈ။
၇ မိူဝ်ႈၵွၼ်ႇဢွၼ်ႈၼၼ်ႉဢိသရေႇလ ၶဝ်မီးထုင်းၽိင်ႈၼႂ်းတၢင်းဢၼ်ထုတ်ႇဢဝ်ၼႂ်းတၢင်းဢၼ် လႅၵ်ႈလၢႆႈဢုၵ်ႉၸႃႇၵၼ်ၼၼ်ႉၸမ်း ၵေႃႉၼိုင်ႈတၵ်းလႆႈထွတ်ႇဢဝ်ၶႅပ်းတိၼ်မၼ်းသေလႄႈဢၢပ်ႈပၼ်တီႈၵေႃႉၼိုင်ႈဢေႃႈ။ဢၼ်ႁဵတ်းၸိူဝ်ႉၼင်ႇၼၼ်ၼၼ်ႉ ႁႂ်ႈသၢၵ်ႈသလေႆႈတႄႇပဵၼ်ၼႂ်းၵူၼ်းမဵဝ်းဢိသရေႇလၶဝ်ဢေႃႈ။
၈ ပိူဝ်ႈၼႆလႄႈၵေႃႉဢၼ်ပိူင်ႇထုတ်ႇဢဝ်ၼၼ်ႉလၢတ်ႈတီႈပေႃႇၸ လႄႈဝႃႈ၊-မႂ်းသိုဝ်ႉဢဝ်ပုၼ်ႈၸဝ်ႈၵဝ်ႇသေၵမ်း၊ ဝႃႈၼင်ႇၼႆသေလႄႈထွတ်ႇၶႅပ်းတိၼ်မၼ်းဢေႃႈ။
၉ ပေႃႇၸ ၵေႃႈလၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉဢိၵ်ႇတင်း ၵူၼ်းတင်းလၢႆၼၼ်ႉလႄႈဝႃႈ၊-ဝၼ်းမိူဝ်ႈၼႆႉ သူၸဝ်ႈပဵၼ်သၢၵ်ႈသေ လွင်ႈဢၼ်ၵဝ်ၶႃႈသိုဝ်ႉဢဝ်ဢုၵ်ႉၸႃႇဢေႇလိမလိၵ်ႉ ဢုၵ်ႉၸႃႇၶိလျုၼ်ႇ ဢုၵ်ႉၸႃႇမႁႃႇလုၼ်ႇ ၵႃႈမီးၸိူဝ်းၼၼ်ႉၵႃႈ ၼႂ်းမိုဝ်း ၼေႃးမိ ၼၼ်ႉဢေႃႈ။
၁၀ လိူဝ်သေၼၼ်ႉၵဝ်ၶႃႈသိုဝ်ႉဢဝ် ရုထ မေႈယိင်းမဵဝ်းမေႃႇၽ မေးမႁႃႇလုၼ်ႇၼၼ်ႉႁဵတ်းမေးၵဝ်ၶႃႈ ႁႂ်ႈလႆႈဢဝ်ဢမူၺ်ႇဢုၵ်ႉၸႃႇၵေႃႉ ဢၼ်တၢႆယဝ်ႉၼၼ်ႉသိုပ်ႇၸိုဝ်သဵင်မၼ်းႁႂ်ႈၸိုဝ်ႈသဵင်ၵေႃႉဢၼ်တၢႆယဝ်ႉ ဢမ်ႇလႆႈထၢတ်ႇသေၵႃႈၼႂ်းမုၵ်ႉၸိူဝ်းပီႈၼွင်ႉမၼ်းဢိၵ်ႇတင်း ၵႃႈၼႂ်းၽၵ်းတူတီႈယူႇမၼ်းၼၼ်ႉဢေႃႈ။သူၸဝ်ႈပဵၼ်သၢၵ်ႈသဝေၼ်းမိူဝ်ႈ ၼႆႉဢေႃႈ၊ဝႃႈၼင်ႇၼႆဢေႃႈ။
၁၁ ၵူၼ်းၵႃႈဢၼ်မီးၵႃႈၼႂ်းၽၵ်းတူဝဵင်းဢိၵ်ႇတင်း ၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်း ၼၼ်ႉၵေႃႈဢွၼ်ၵၼ်ၶိုၼ်းလၢတ်ႈလႄႈဝႃႈ၊-ႁဝ်းပဵၼ်သၢၵ်ႈသေႇဢေႃႈ။ႁႂ်ႈထႃႇဝရႃႉၽြႃးႁဵတ်ႈႁႂ်ႈမေႈယိင်းဢၼ်ႁွတ်ႈထိုင်ၵႃႈၼႂ်းႁိူၼ်းမႂ်းၼၼ်ႉ ပဵၼ်ၸိူဝ်ႉၼင်ႇ ရႃႇၶေႇလ ဢိၵ်ႇတင်း လေႇဢႃႇ သွင်ၵေႃႉ ဢၼ်တေႁဵတ်းမဵဝ်းဢိသရေႇလၼၼ်ႉသေၵမ်းလူၺ်ႈ။မႂ်းၵေႃႈႁႂ်ႈတဵမ်ဝႆႉတင်းတၢင်းၵတ်ႉတၢင်းၶၼ်ၵႃႈတီႈဢေႇၽရတ်ႉလႄႈ မီးတၢင်းဢၼ်သရေႇႁူင်ႁၢင်းၵႃႈတီႈဝဵင်းပႅတ်ႉလိႁႅမ်ႇသေၵမ်းလူၺ်ႈ။
၁၂ ၵွပ်ႈပိူဝ်ႈၸိူဝ်ႉၽၼ်းဢၼ်ထႃႇဝရႃႉၽြႃး တၵ်းဢဝ်ၵႃႈၼႂ်းမေႈယိင်းဢၼ်ဢသၢၵ်ႈၼုမ်ႇၼႆႉပၼ်တီႈမႂ်းၼၼ်ႉလႄႈ ႁႂ်ႈမဵဝ်းၸိူဝ်ႉၶိူဝ်းမႂ်း ပဵၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်းၽေႇရိတ်ႉဢၼ်တႃႇမႃႇ ၵိူတ်ႇလဵင်ႉယုတ မႃးၼၼ်ႉသေၵမ်းလူၺ်ႈ၊ဝႃႈၼင်ႇၼႆဢေႃႈ။
၁၃ ၼင်ႇၼၼ်လႄႈ ပေႃႇၸ သိမ်းဢဝ် ရုထ ႁဵတ်းပဵၼ်မေးလႄႈၶဝ်ႈၸူးတီႈမၼ်းဢေႃႈ။ထႃႇဝရႃႉၽြႃးႁႂ်ႈမၼ်းပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉမႃးလုၵ်ႈၸၢႆးဢေႃႈ။
၁၄ မေႈယိင်းတင်းလၢႆၵေႃႈလၢတ်ႈတီႈ ၼေႃးမိ လႄႈဝႃႈ၊-ႁႂ်ႈထႃႇဝရႃႉၽြႃးဢၼ်ဢမ်ႇႁႂ်ႈမႂ်းပဵၼ်ၵေႃႉဢၼ်ဢမ်ႇမီး ၵေႃႉဢၼ်ပိူင်ႇထုတ်ႇဢဝ်ဝၼ်းမိူဝ်ႈၼႆႉၼၼ်ႉမီးမၢင်ႇၵလႃႇသေၵမ်းလူၺ်ႈ။ႁႂ်ႈၸိုဝ်သဵင်မၼ်းမီးတၢင်းဢၼ်ႁူင်ႁၢင်းၵႃႈၼႂ်းမဵဝ်းဢိသရေႇလ သေၵမ်း လူၺ်ႈ။
၁၅ ႁႂ်ႈမၼ်းပဵၼ်ၵေႃႉဢၼ်မႄးၵုမ်းမႄးႁဵတ်းဢသၢၵ်ႈမႂ်း၊ၵေႃႉဢၼ်လုမ်းလႃးမႂ်းလီလီငၢမ်းငၢမ်း ၼႂ်း မိူဝ်ႈဢၼ်မႂ်းဢသၢၵ်ႈယႂ်ႇၼၼ်ႉသေၵမ်းလူၺ်ႈ။
၁၆ လုၵ်ႈပႂ်ႉမႂ်းဢၼ်ႁၵ်ႉမႂ်းလႄႈ ယိင်ႈၶႅၼ်းလီတီႈမႂ်းလိူဝ်တွၼ်းၼႃႇသလေုၵ်ႈၸၢႆးၸဵတ်းၵေႃႉၼၼ်ႉ လႆႈၵိူတ်ႇလဵင်ႉလုၵ်ႈၸၢႆးမႃးယဝ်ႉ၊ဝႃႈၼင်ႇၼႆဢေႃႈ။ၼေႃးမိဢဝ် လုၵ်ႈဢွၼ်ႇၼၼ်ႉႁွပ်ႇဢုမ်ႈလႄႈလူထိင်းဢေႃႈ။
၁၇ မေႈယိင်းဢၼ်ႁိူၼ်းၸမ်ၵၼ်တင်းလၢႆၵေႃႈ ဢွၼ်ၵၼ်ဝႃႈ၊-ၼေႃးမိလႆႈလုၵ်ႈၸၢႆးယဝ်ႉ၊ဝႃႈၼင်ႇၼႆသေလႄႈဢွၼ်ၵၼ်ပၼ်ၸိုဝ်မၼ်းဝႃႈ ဢုဝ်ႇပိတ်ႉ ဢေႃႈ။မၼ်းပဵၼ်ပေႃႈ ယေႇသေႇ ၵေႃႉဢၼ်ပဵၼ်ပေႃႈ တႃႇဝိတ်ႉၼၼ်ႉဢေႃႈ။
၁၈ ၸူဝ်ႈလုၵ်ႈပၢၼ်လၢၼ် ၽေႇရိတ်ႉ ၸမ်း၊ၽေႇရိတ်ႉမီးလုၵ်ႈၸၢႆးႁေႇၸရုၼ်ႇ၊
၁၉ ႁေၸရုၼ်ႇမီးလုၵ်ႈၸၢႆးဢႃႇရမ်ႇ၊ဢႃႇရမ်ႇမီးလုၵ်ႈၸၢႆးဢမိၼတပ်ႉ၊
၂၀ ဢမိၼတပ်ႉမီးလုၵ်ႈၸၢႆးၼႃႇသုၼ်ႇ၊ၼႃႇသုၼ်ႇမီးလုၵ်ႈၸၢႆး ၸႃႇလမုၼ်ႇ၊
၂၁ ၸႃႇလမုၼ်ႇမီးလုၵ်ႈၸၢႆး ပေႃႇၸ၊ပေႃႇၸမီးလုၵ်ႈၸၢႆး ဢုဝ်ႇပိတ်ႉ၊ ဢုဝ်ႇပိတ်ႉမီးလုၵ်ႈၸၢႆး ယေႇသေႇ၊ ယေႇသေႇမီးလုၵ်ႈၸၢႆး တႃႇဝိတ်ႉဢေႃႈ။