၂
မူၼ်ႈၽုင်းႁိူၼ်းၽြႃးပဵၼ်ၸဝ်ႈ
၁ ၼႂ်းဝၼ်းလိူၼ်သတ်ႉတမ သၢဝ်းပၢႆဢဵတ်းဝၼ်းၼၼ်ႉၼုၵ်ႈၵပၢတ်ႈထႃႇဝရႃႉၽြႃး ဢဝ်ပရေႃးၽႅတ်ႈႁၵ်ႉၵေႇႁွတ်ႈမႃးလႄႈလၢတ်ႈလႄႈဝႃႈၸမ်း၊-
၂ မႂ်းလၢတ်ႈတီႈၸေႇရုပပေႇလ လုၵ်ႈၸၢႆးသႃႇလသေႇလၶုၼ်ဢၼ်ဢုပ်ႉပိူင်ႇၵႃႈတီႈမိူင်းယုတဢိၵ်ႇတင်း ယေႃးသုလုၵ်ႈၸၢႆးယေႃႇၸတိၵ်ႉၶုၼ်ယိတ်ႉပရေႃးႁိၵ်ႈ တင်းၵူၼ်းတင်းလၢႆဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉလႄႈ ဝႃႈ၊-
၃ ၵေႃႉဢၼ်ယၢမ်ႈႁၼ်ႁိူၼ်းၸဝ်ႈၼႆႉတဵမ်ဝႆႉတင်းမုၼ်ၽုင်းမိူဝ်ႈဢွၼ်တၢင်းၼၼ်ႉလႄႈ ၵိုတ်းၵျၢၼ်ႇဝႆႉယူႇၵႃႈၼႂ်းသူၸမ်းပဵၼ်ၽူႈ လႂ်။မိူဝ်ႈလဵဝ်ၼႆႉႁၼ်ပဵၼ်ၸိူဝ်ႉၼင်ႇႁိုဝ်ဝႆႉ။ပဵၼ်ၸိူဝ်ႉၼင်ႇဢၼ်ဢမ်ႇၸႂ်ႈၵႃႈသင်လႃးလႃးၼၼ်ႉသိုဝ်ႈၼႃႈတႂ်ႈတႃသူဢမ်ႇၸႂ်ႈႁိုဝ်။
၄ ၼႂ်းဝႃႈၼၼ်သေၵေႃႈၸေႇရုပပေႇလဢိူၺ်း။ဢဝ်ႁႅင်းဢွၵ်ႇတႃႉ၊ဝႃႈၼင်ႇၼႆထႃႇဝရႃႉၽြႃး မီးဢမိင်ႉဢေႃႈ။ယေႃးသုလုၵ်ႈၸၢႆးယေႃႇၸတိၵ်ႉ ၶုၼ်ယိတ်ႉပရေႃးႁိၵ်ႈဢိူၺ်း။ဢဝ်ႁႅင်းဢွၵ်ႇတႃႉ။ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ၶဝ်ဢိူၺ်း။ဢဝ်ႁႅင်းဢွၵ်ႇတႃႉ၊ဝႃႈ ၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၅ ၵဝ်မီးယူႇလူၺ်ႈၵၼ်တင်းသူမႅၼ်ႈၸွမ်းၼင်ႇၵႂၢမ်းပတိၺိၼ်ႇ ဢၼ်ၵဝ်ႁဵတ်းလူၺ်ႈၵၼ်တင်းသူ ၼႂ်းမိူဝ်ႈဢၼ်သူဢွၵ်ႇသေၵႃႈၼႂ်းမိူင်းဢေႇၵႅပ်ႉတုမႃးလႄႈ ဝိၺိၺ်ႇၵဝ်တူၵ်းတီႈတူၵ်းလႅၼ်ယူႇၵႃႈၼႂ်းသူၼၼ်ႉဢေႃႈ။ယႃႇပေမႆႈၸႂ်ၶီၸႂ်ဝႃႈၼင်ႇၼႆ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး မီးဢမိင်ႉဢေႃႈ။
၆ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊ ထႅင်ႈၵမ်းဢွၼ်ႇၼိုင်ႈၸူဝ်ႈဢၼ်ဢမ်ႇပႆႇႁိုင်ပႆႇၼၢၼ်းၼၼ်ႉ ၵဝ်တၵ်းသၼ်ႇၶွၼႃ်းႉၵၢင်ႁၢဝ်၊လိၼ်မိူင်း၊ပၢင်ႇလၢႆႇ၊တီႈၵုင်းတင်းလၢႆဢေႃႈ။
၇ ၵဝ်သၼ်ႇၶွၼ်းၵူၼ်းၵူႈၸိူဝ်ႉၵူႈမဵဝ်းလႄႈ လွင်ႈတၢင်းဢၼ်ၵူၼ်းၵူႈၸိူဝ်ႉၵူႈမဵဝ်း လီထုၵ်ႇၸႂ်ၵျိူၵ်ႈၸႂ်ၼၼ်ႉတၵ်းႁွတ်ႈထိုင်လႄႈၵဝ်တၵ်းႁႂ်ႈႁိူၼ်းၼႆႉတဵမ်ဝႆႉတင်းမုၼ်ၽုင်းဢေႃႈဝႃႈ၊ ၼင်ႇၼႆၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉဢေႃႈ။
၈ ငိုၼ်းပဵၼ်ၶွင်ၵဝ်ဢေႃႈ။ၶမ်းပဵၼ်ၶွင်ၵဝ်ဢေႃႈ၊ ဝႃႈၼင်ႇၼႆၸဝ်ႈပူဝ်ႇပႃႇၵၢင် ႁၢဝ်ထႃႇဝရႃႉၽြႃးမီးဢမိင်ႉဢေႃႈ။
၉ မုၼ်ၽုင်းႁိူၼ်းၸဝ်ႈဢၼ်တႄႇႁဵတ်းၵမ်းလိုၼ်းၼႆႉ တၵ်းယိင်ႈၶႅၼ်းယႂ်ႇၼႃသေႁိူၼ်းၸဝ်ႈ ၵမ်းဢွၼ်တၢင်းၼၼ်ႉဢေႃႈ၊ဝႃႈၼင်ႇၼႆ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉဢေႃႈ။ၵႃႈၼႂ်းတီႈၼႆႉၵေႃႈၵဝ်တၵ်းပၼ်တၢင်းဢၼ်ၼိမ်ဢၼ်လီ ဝႃႈၼင်ႇၼႆၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉဢေႃႈ၊ ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။
မင်ႇၵလႃႇပုၼ်ႈၵူၼ်းဢၼ်ဢမ်ႇမူတ်းၸၢင်ႇ
၁၀ ၼႂ်းၶူပ်ႇပီႊဢၼ်ၶုၼ်လူင်တႃႇရိ ၸၢမ်ႇႁၢင်ႈၸၢမ်ႇႁေႃသွင်ပီႊလိူၼ်ၼဝမ သၢဝ်းပၢႆသီႇဝၼ်းၼၼ်ႉ ၼုၵ်ႈၵပၢတ်ႈထႃႇဝရႃႉၽြႃး ဢဝ်တင်းပရေႃးၽႅတ်ႈႁၵ်ႉၵေႇ ႁွတ်ႈမႃးလႄႈလၢတ်ႈလႄႈဝႃႈ၊-
၁၁ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊- တွင်ႈထၢမ်လူၺ်ႈ လွင်ႈတြႃးတီႈယိတ်ႉပရေႃးႁိၵ်ႈတင်းလၢႆလႄႈဝႃႈ၊-
၁၂ ပေႃးသေၵေႃႉသေၵူၼ်းဢဝ်ၼိူဝ်ႉဢၼ်မူတ်းၸၢင်ႇၼၼ်ႉ ပူၵ်ႉႁေႃႇၵႃႈတီႈၶူဝ်းၼုင်ႈမႃးလႄႈဢဝ်တင်းၶူဝ်းၼုင်ႈၼၼ်ႉတိူဝ်ႉထုၵ်ႇသႂ်ႇၶဝ်ႈမုၼ်း၊ ၽၵ်း၊ၼမ်ႉၸပိတ်ႈ၊ၼမ်ႉမၼ်း၊တၢင်းၵိၼ်တၢင်းၶူပ်း သေၸိူဝ်ႉသေပိူင်ၸိုင်တၢင်းၵိၼ်တၢင်းၶူပ်းၼၼ်ႉတၵ်းမူတ်းၸၢင်ႇႁိုဝ်၊ဝႃႈၼင်ႇၼႆဢေႃႈ။ မိူဝ်ႈၼၼ်ႉယိတ်ႉပရေႃးႁိၵ်ႈတင်းလၢႆၶိုၼ်းလၢတ်ႈလႄႈဝႃႈ ဢမ်ႇမူတ်းၸၢင်ႇၵူၺ်းဝႃႈၼင်ႇ ၼႆဢေႃႈ။
၁၃ ႁၵ်ႉၵေႇၵေႃႈၶိုၼ်းတွင်ႈထၢမ်လႄႈဝႃႈ၊-ပေႃးၵေႃႉဢၼ်ဢမ်ႇမူတ်းသႂ် ၵွပ်ႈပိူဝ်ႈတူဝ်တၢႆၼၼ်ႉတိူဝ်ႉထုၵ်ႇသႂ် လွင်ႈတၢင်းၼၼ်ႉသေၸိူဝ်ႉသေပိူင်ၸိုင်တၵ်းမီးတၢင်းဢၼ်ၵူဝ်ႈၵိူၵ်ႇႁိုဝ်၊ ဝႃႈၼင်ႇၼႆသေယဝ်ႉယိတ်ႉပရေႃးႁိၵ်ႈၸိူဝ်းၼၼ်ႉ ၶိုၼ်းလၢတ်ႈလႄႈဝႃႈ၊-
၁၄ ပဵၼ်ဢၼ်ၵူဝ်ႈၵိူၵ်ႇဢေႃႈ၊ဝႃႈၼင်ႇၼႆဢေႃႈ။ႁၵ်ႉၵေႇၵေႃႈသမ်ႉၶိုၼ်းလၢတ်ႈထႅင်ႈလႄႈဝႃႈ၊- မဵဝ်းၵူၼ်းၼႆႉၵူၼ်းမိူင်းၼႆႉၸိူဝ်းၼႆႉ ပဵၼ်မိူၼ်ၸိူဝ်ႉၼင်ႇၼၼ်ၵႃႈတီႈၽၢႆႇၼႃႈၵဝ်ဢေႃႈ။ ၵႃႈဢၼ်ၶဝ်ဢဝ်မိုဝ်းၶဝ်သၢင်ႈႁဵတ်းၼၼ်ႉၵေႃႈပဵၼ်မိူၼ်ၸိူဝ်ႉၼင်ႇၼၼ်ဢေႃႈ။ၶိူင်ႈပိူင်ဢၼ်ၶဝ်ပုၵ်ႉၸေႃႇတီႈၵဝ်ၵေႃႈ ပဵၼ်ဢၼ်ၵူဝ်ႈၵိူၵ်ႇဢေႃႈ၊ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။
၁၅ မိူဝ်ႈလဵဝ်ၼႆႉ သူဢွၼ်ၵၼ်ၶႆႈၸႂ်ဝူၼ်ႉၸႂ် လွင်ႈတၢင်းၸႃႉၸဵမ်ဝၼ်းမိူဝ်ႈၼႆႉ ၶိုၼ်းမိူဝ်းပႃႈလင် ၸူဝ်ႈဢၼ်ဢမ်ႇပႆႇဢဝ်မၢၵ်ႇႁိၼ်လုၵ်ႈၼိုင်ႈ တၢင်ႇသႂ်ႇၵႃႈၼိူဝ်မၢၵ်ႇႁိၼ်လုၵ်ႈၼိုင်ႈတီႈ ပိၵ်ႉမၢၼ်ႇထႃႇဝရႃႉၽြႃးၼၼ်ႉ သေၵမ်း။
၁၆ ၸႃႉၸဵမ်ၶိင်ႇမိူဝ်ႉဝၼ်းၼၼ်ႉလႄႈယၢမ်းမိူဝ်ႈဢၼ်ၵူၼ်း မႃးၸူးၵႃႈတီႈၵွင်ၶဝ်ႈပိူၵ်ႇ ဢၼ်ဢွၵ်ႇသၢဝ်းတၢင်ၼၼ်ႉၸိုင်လႆႈသိပ်းတၢင်ၵူၺ်းဢေႃႈ။ယၢမ်းမိူဝ်ႈဢၼ်မႃးၸူးၵႃႈတီႈႁိမ်းၼူတ်ႈမၢၵ်ႇၸပိတ်ႈ ႁႂ်ႈလႆႈဢဝ်မေႃႈၼမ်ႉၸပိတ်ႈႁႃႈသိပ်းၼၼ်ႉၸိုင်၊လႆႈသၢဝ်းၼိုင်ႈၵူၺ်းဢေႃႈ။
၁၇ ၵဝ်ဢဝ်ၽေးတၢင်းဢၼ်လူမ်းတိူဝ်ႉထုၵ်ႇလႄႈတူၼ်ႈမၼ်းတၢႆၽေးတၢင်းဢၼ်သႃးလႄႈတူၼ်ႈမၼ်းတၢႆ ဢိၵ်ႇတင်းၽေးမၢၵ်ႇႁဵပ်းပၼ်တၢမ်ႇတီႈသူၼႂ်းၵႃႈဢၼ်သူဢဝ်မိုဝ်းသူသၢင်ႈႁဵတ်းၼၼ်ႉမႃးယဝ်ႉ။ၵူၺ်းၵႃႈသူဢမ်ႇဢွၼ်ၵၼ်ၶိုၼ်းမႃးၵႃႈတီႈၵဝ်ဝႃႈၼင်ႇၼႆထႃႇဝရႃႉၽြႃးမီး ဢမိင်ႉဢေႃႈ။
၁၈ သူဢွၼ်ၵၼ်ၶႆႈၸႂ်ဝူၼ်ႉၸႂ်လွင်ႈတၢင်းၸႃႉၸဵမ်ဝၼ်းမိူဝ်ႈၼႆႉ ၶိုၼ်းမိူဝ်းပႃႈလင်ၼၼ်ႉဢၼ်ပဵၼ်လိူၼ်ၼဝမ သၢဝ်းပၢႆသီႇဝၼ်း ဝၼ်းဢၼ်ၶျႃးငဝ်ႈႁၢၵ်ႈတိူၵ်ႈပိၵ်ႉမၢၼ်ႇ ထႃႇဝရႃႉၽြႃးၼၼ်ႉသေၵမ်း။လွင်ႈတၢင်းဢၼ်တၵ်းလႆႈၶႆႈၸႂ်ဝူၼ်ႉၸႂ်ၸမ်း၊ၵႃႈၼႂ်းယွင်ၶဝ်ႈယေးၶဝ်ႈ ယင်းမီးၶဝ်ႈပိူၵ်ႇယူႇလူးၵွၼ်ႇႁိုဝ်။
၁၉ ၶိူဝ်းတူၼ်ႈၸပိတ်ႈ၊တူၼ်ႈမၢၵ်ႇလိူဝ်ႇသၢင်းၽေႃး၊တူၼ်ႈမၢၵ်ႇၸင်ႈ၊ တူၼ်ႈသၼ်ႇလုၼ်ႇ ၸိူဝ်းၼၼ်ႉဢမ်ႇပႆႇတိၼ်ႇပႆႇမၢၵ်ႇ။ၵူၺ်းၵႃႈဢဝ်ၵႃႈတီႈၸႃႉၸဵမ်ဝၼ်းမိူဝ်ႈၼႆႉၵႂႃႇ ၵဝ်တၵ်းပၼ်တၢင်းလီတီႈသူဢေႃႈ၊ဝႃႈၼင်ႇၼႆဢေႃႈ။
မွင်းၵူၺ်းတၼ်းသိၵ်ႈၽြႃးပဵၼ်ၸဝ်ႈ
၂၀ ၼႂ်းလိူၼ်ၼၼ်ႉလႆႈသၢဝ်းပၢႆသီႇဝၼ်းၼၼ်ႉၼုၵ်ႈၵပၢတ်ႈထႃႇဝရႃႉၽြႃး သမ်ႉႁွတ်ႈမႃးတီႈႁၵ်ႉၵေႇလႄႈဝႃႈ ၸမ်း၊ –
၂၁ မႂ်းလၢတ်ႈတီႈၸေႇရုပပေႇလၶုၼ်ဢၼ်ဢုပ်ႉပိူင်ႇမိူင်းယုတၼၼ်ႉလႄႈဝႃႈ၊-ၵဝ်တၵ်းသၼ်ႇၶွၼ်း ၾႃႉၵၢင်ႁၢဝ်ဢိၵ်ႇတင်းလိၼ်မိူင်းဢေႃႈ။
၂၂ ၵဝ်တၵ်းၶႂၢမ်ႈပိၼ်ႈရႃႇၸႃႉပလၢင်ႇ သိုင်ႇၸိုင်ႈဝၢၼ်ႈမိူင်းတင်းလၢႆ
ပႅတ်ႈလႄႈ ယႃႉၽဵဝ်ႈတၼ်းၶူဝ်းသိုင်ႇၸိုင်ႈဝၢၼ်ႈမိူင်းၵူၼ်းၵူႈၸိူဝ်ႉၵူႈမဵဝ်းပႅတ်ႈဢေႃႈ။လေႃႉရထႃးတင်းလၢႆဢိၵ်ႇတင်း ၶဝ်ၸိူဝ်းဢၼ်ၶီႇလေႃႉရထႃးၸိူဝ်းၼၼ်ႉၵေႃႈၵဝ်တၵ်းၶႂၢမ်ႈပိၼ်ႈပႅတ်ႈလႄႈ မႃႉတင်းၵူၼ်းသိုၵ်းၶီႇမႃႉၸိူဝ်းၼၼ်ႉ ပီႈၼွင်ႉၵၼ်ၼင်ႇၵၼ်ၵၼ်ၵေႃႉၼိုင်ႈလႄႈ ၵေႃႉၼိုင်ႈတၵ်းဢဝ်လၢပ်ႇၶႃႈၽၼ်းၵၼ်လႄႈ လူမ်ႉတၢႆဢေႃႈ။
၂၃ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉၸမ်း၊-ၶႃႈၵဝ်ၸေႇရုပပေႇလလုၵ်ႈၸၢႆးသႃႇလသေႇလဢိူၺ်း။ၼႂ်းမိူဝ်ႉဝၼ်းၼၼ်ႉၵဝ်တၵ်းဢဝ်မႂ်းလႄႈၶၢၼ်းဝႆႉမိူၼ်ၸိူဝ်ႉၼင်ႇမွင်းၵူၺ်းတၼ်းသိၵ်ႈၼၼ်ႉဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉဢေႃႈ။