၃
တၢင်းသူးတွင်းႁပၵ်ႉၵုၵ်ႉ
၁ ၵႂၢမ်းပထၼႃႇပရေႃးၽႅတ်းႁပၵ်ႉၵုၵ်ႉ ဢၼ်ဢိင်ၸွမ်းသဵင်ၶိုၼ်ႈသဵင်လူင်းသီႇၵျေႃႇၼူတ်ႉၼၼ်ႉၸမ်း၊-ထႃႇဝ ရႃႉၽြႃးတီႈၶႃႈ။
၂ ၶႃႈၸဝ်ႈလႆႈငိၼ်းသဵင်ပျႃႇတိၵ်ႈၸဝ်ႈႁဝ်းလႄႈ ၵူဝ်ႁႄတီႈၶႃႈယဝ်ႉ။ထႃႇဝရႃႉၽြႃးတီႈၶႃႈ။ၶႅၼ်းတေႃႈမႄးၵုမ်းမႄးႁဵတ်း ဢမူႉၸဝ်ႈႁဝ်းၵႃႈၼႂ်းၶူပ်ႇပီႊၸိူဝ်းၼႆႉသေၵမ်းတီႈၶႃႈ။ႁႂ်ႈလႆႈႁူႉလႆႈႁၼ်ၵႃႈၼႂ်းၶူပ်ႇပီႊၸိူဝ်းၼႆႉသေၵမ်းတီႈၶႃႈ။ပိၵ်ႉသမ်ႉတၢင်းၸႂ်မႆႈၶႆႈၸႃႉၸဝ်ႈႁဝ်းဢွၵ်ႇသေ ၵေႃႈၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၵရူႉၼႃႇတြႃးသေၵမ်းတီႈၶႃႈ။
၃ ၽြႃးပဵၼ်ၸဝ်ႈ လုၵ်ႉသေၵႃႈတီႈဝဵင်းတေႇမၼ်ႇ၊ၽြႃးဢၼ်မူတ်းၸၢင်ႇၼၼ်ႉ လုၵ်ႉသေၵႃႈတီႈလွႆပႃႇရၼ်ႇမႃးဢေႃႈ။ၸေႇလႃႇ။မုၼ်ၽုင်းမၼ်းၸဝ်ႈႁူမ်ႇသုမ်ႇၾႃႉၵၢင်ႁၢဝ်လႄႈလိၼ်မိူင်းတဵမ်ဝႆႉတင်းၵုင်ႇသရေႇ မၼ်းၸဝ်ႈဢေႃႈ။
၄ ႁၢင်ႊၽၢင်ငဝ်းဢရွင်ႇမၼ်းၸဝ်ႈမိူၼ်ၸိူဝ်ႉၼင်ႇဢရွင်ႇၵၢင်ဝၼ်းလႄႈ သၢႆဢရွင်ႇဢွၵ်ႇသေၵႃႈတီႈမိုဝ်းမၼ်းၸဝ်ႈလႄႈၵႃႈတီႈၼၼ်ႉ ပဵၼ်တီႈဢၼ်မုၼ်ၽုင်းဢႃႇၼူႉၽေႃႇမၼ်းၸဝ်ႈ တဵတ်ႇလပ်ႉ ယူႇဢေႃႈ။
၅ ၽေးၵႃႇလႃႉႁႃႇလႅင်ႉမိူင်းၵႂႃႇဢွၼ်တၢင်းမၼ်းၸဝ်ႈလႄႈၽေးဢၼ်မႆႈႁွၼ်ႉလွမ်ႉလဵပ်ႈႁွပ်ႈတိၼ်မၼ်းၸဝ်ႈယူႇဢေႃႈ။မၼ်းၸဝ်ႈၸုၵ်းယူႇလႄႈႁႂ်ႈလိၼ်မိူင်းတူင်ႉၼိုင်ယူႇဢေႃႈ။မၼ်းၸဝ်ႈလူတူၺ်းလႄႈ ႁႂ်ႈၵူၼ်းၵူႈၸိူဝ်ႉၵူႈမဵဝ်းသၼ်ႇသၼ်ႇသၢႆသၢႆယူႇ ဢေႃႈ။
၆ လွႆဢၼ်တႄႇယူႇတႃႇသမေၼ်ႈၶိူင်ႇၸိူဝ်းၼၼ်ႉႁၵ်းႁိၵ်းတႅၵ်ႇလႅဝ်ၵႂႃႇလႄႈ သၼ်ၵုင်းထႃႇဝရႃႉၸိူဝ်းၼၼ်ႉဢွၼ်ၵၼ်ၼူပ်ႈတူၵ်းၵွမ်ႉတူၵ်းဢေႃႈ။သဵၼ်ႈတၢင်းမၼ်းၸဝ်ႈၵႂႃႇၼၼ်ႉမီးဝႆႉၸဵမ်မိူဝ်ႈမိုၼ်ႉၸိုၼ်ႉ သိုၼ်းၼၼ်ႉဢေႃႈ။
၇ ၵဝ်လႆႈႁၼ်တၢင်းဢၼ်သုမ်ႉထဵင်ၵႃႈၼႂ်းမိူင်းၵုသၸိူဝ်းၼၼ်ႉလႆႈၶၢမ်ႇတုၵ်ႉၶႃႉတၢင်းၽၢၼ်လႄႈ ၽႃႇၵၢင်ၵႃႈၼႂ်းမိူင်းမိတျၢၼ်ႇၸိူဝ်းၼၼ်ႉ သၼ်ႇသၼ်ႇသၢႆသၢႆယူႇၼၼ်ႉဢေႃႈ။ထႃႇဝရႃႉၽြႃးတီႈၶႃႈ။
၈ ၽႆးတၢင်းၸႂ်မႆႈၶႆႈၸႃႉၸဝ်ႈႁဝ်းႁုပ်ႇမႆႈၵႃႈတီႈၼမ်ႉႁွင်ႊၼမ်ႉၵႄးတင်းလၢႆယူႇ၊ ၸဝ်ႈႁဝ်းႁဵတ်းရၢၼ်ႇတၢင်းၽိတ်းသႂ်ႇပၢင်ႇလၢႆႇယူႇ၊ ႁႂ်ႈၸဝ်ႈႁဝ်းလႆႈၶီႇမႃႉၸဝ်ႈႁဝ်းလေႃႉရထႃးၸဝ်ႈႁဝ်း၊ တၢင်းဢၼ်ၵႄႇ သႄႇၶျွတ်ႈဢဝ်ၼၼ်ႉတီႈၶႃႈႁိုဝ်။
၉ လၢၵ်ႈၼၢၵ်ႈၵၢင်ႇၸဝ်ႈႁဝ်းၼၼ်ႉလႆႈၶၢမ်ႇ တၢင်းဢၼ်ဢဝ်ဢွၵ်ႇၼႄပျႃးလႄႈၵတိသႅတ်ႉၸႃႇ ဢၼ်ၸဝ်ႈႁဝ်းဝႆႉတီႈမဵဝ်းၵူႈမဵဝ်းၸိူဝ်းၼၼ်ႉပဵၼ်ဢၼ်မၼ်ႈၶိူင်ႇတီႈၶႃႈဢေႃႈ။ၸဝ်ႈႁဝ်း ၽၼ်းၽႃႇလိၼ်မိူင်းႁႂ်ႈၼမ်ႉႁွင်ႊၼမ်ႉၵႄးလႂ်ပဵၼ်မႃးတီႈၶႃႈဢေႃႈ။
၁၀ လွႆတင်းလၢႆႁၼ်ၸဝ်ႈႁဝ်းလႄႈ ဢွၼ်ၵၼ်သၼ်ႇဝႆၶွၼ်းၶဝ်ႇယူႇတီႈၶႃႈဢေႃႈ။ၼမ်ႉဢၼ်ထူမ်ႈၼၼ်ႉသုမ်ႇႁူမ်ႇတီႈၶႃႈဢေႃႈ။တီႈဢၼ်လႅင်းၼမ်ႉပၢင်ႇလၢႆသႅၼ်ႇႁွင်ႉလႄႈ ယုၵ်ႉမိုဝ်းမၼ်း ၶိုၼ်ႈၵႃႈၼိူဝ်တီႈၶႃႈဢေႃႈ။
၁၁ ၵၢင်ဝၼ်းဢိၵ်ႇတင်းလိူၼ်ၸုၵ်းၵိုတ်းယူႇ ၵႃႈၼႂ်းတီႈဢၼ်ၶဝ်ယူႇၼၼ်ႉၵွပ်ႈပိူဝ်ႈဢၼ်လႅင်းပိုၼ်ၵၢင်ႇၸဝ်ႈႁဝ်း ဢၼ်ၸၢင်ႊၵႂႃႇၸိူဝ်းၼၼ်ႉဢိၵ်ႇတင်းၵွပ်ႈပိူဝ်ႈသၢႆဢရွင်ႇႁွၵ်ႇၸဝ်ႈႁဝ်း ဢၼ်မၢပ်ႈမႅပ်ႈၼၼ်ႉတီႈၶႃႈဢေႃႈ။
၁၂ ၸဝ်ႈႁဝ်းပႃးတင်းတၢင်းၸႂ်မႆႈၶႆႈၸႃႉသေလႄႈ ၶီႇၵႂႃႇၵႃႈၼိူဝ်ၼႃႈလိၼ်မိူင်းတင်းၼႃႈလႄႈ ပႃးတင်းၸႂ်တေႃးသႃႉသေလႄႈယဵပ်ႇၼူတ်ႈၵူၼ်းၵူႈၸိူဝ်ႉၵူႈမဵဝ်းတီႈၶႃႈဢေႃႈ။
၁၃ ၸဝ်ႈႁဝ်း ဢွၵ်ႇၵႂႃႇ ႁႂ်ႈလႆႈၵႄႇသႄႇၶျွတ်ႈဢဝ်ၵူၼ်းၸဝ်ႈႁဝ်းတင်းလၢႆ ဢိၵ်ႇတင်းႁႂ်ႈလႆႈၵႄႇသႄႇၶျွတ်ႈဢဝ်ၶဝ်ၸိူဝ်းဢၼ် လႆႈၶၢမ်ႇၽိၵ်ႈသိၵ်ႈတီႈၸဝ်ႈႁဝ်းၼၼ်ႉတီႈၶႃႈဢေႃႈ။ၸဝ်ႈႁဝ်းဢဝ်ၵွၵ်းႁူဝ်ၵႃႈၼႂ်းႁိူၼ်းၵူၼ်းႁၢႆႉၵူၼ်းယုတ်ႈသၵ်းသွင်ႉလႄႈ ပႄႇၽဵဝ်ႈမူႇလႃႉငဝ်ႈႁၢၵ်ႈမၼ်းပႅတ်ႈတေႃႇထိုင်ႁွတ်ႈၶေႃးတီႈၶႃႈ ဢေႃႈ။ၸေႇလႃႇ။
၁၄ ၸဝ်ႈႁဝ်းဢဝ်ႁွၵ်ႇမၼ်းၸိူဝ်းၼၼ်ႉတႅင်းသႂ်ႇၵွၵ်းႁူဝ်ၶုၼ်ပူဝ်ႇမၼ်းတင်းလၢႆ ပွင်ႇပဵဝ်ၵႂႃႇတီႈၶႃႈဢေႃႈ။ၶဝ်ၼၼ်ႉတၵ်းဢွၼ်ၵၼ်ပတ်ႉထူဝ်းမႃးမိူၼ်ၸိူဝ်ႉၼင်ႇ ၽူၼ်လူင်လူမ်းလူင်ၼၼ်ႉႁႂ်ႈၶႃႈၸဝ်ႈႁဝ်းၶဝ်ၽူင်ႉၵႂႃႇပိဝ်ၵႂႃႇတီႈၶႃႈဢေႃႈ။တၢင်းဢၼ်ၶဝ်ၸူမ်းသိူဝ်းပဵၼ်မိူၼ်ၸိူဝ်ႉၼင်ႇႁၢင်ႊ ၶဝ်မီးတၢင်းၵျၢမ်ႇတၢင်းပွင် ဢၼ်တၵ်းတဵတ်ႇတဵတ်ႇၶူပ်းၵိၼ်ၶဝ်ၸိူဝ်း ဢၼ်ယၢၵ်ႈဢၼ်ၽၢၼ်ႇၼၼ်ႉတီႈၶႃႈဢေႃႈ။
၁၅ ၸဝ်ႈႁဝ်းၶီႇမႃႉၸဝ်ႈႁဝ်းၸိူဝ်းၼၼ်ႉသေလႄႈ ၵႂႃႇၵႃႈၼႂ်းၵၢင်ၼမ်ႉပၢင်ႇလၢႆႇတီႈဢၼ်မေႃးလင်ႊယူႇ ႁိုင်းႁိုင်းၼၼ်ႉ တီႈၶႃႈဢေႃႈ။
၁၆ ၶႃႈၸဝ်ႈငိၼ်းပျႃႇတိၵ်ႈၸဝ်ႈၼၼ်ႉလႄႈၵႃႈၼႂ်းႁူဝ်ဢူၵ်းမီးတၢင်းဢၼ်သၵ်ႉယူႇ၊ သီႇသူပ်းၶႃႈၸဝ်ႈတူင်ႉယွပ်ႇယူႇ၊ တၢင်းဢၼ်ၽင်ႉဢူႉၶဝ်ႈၵႃႈၼႂ်းလုပ်ႇၶႃႈၸဝ်ႈယူႇ၊ ၶႃႈၸဝ်ႈမီးတၢင်းဢၼ်သၼ်ႇသၼ်ႇသၢႆသၢႆ တင်းတူဝ်တင်းၶိင်းယူႇတီႈၶႃႈဢေႃႈ။
လွင်ႈမၼ်းၸမ်း ၵဝ်တၵ်းလႆႈယူႇၼိမ်ၼိမ်လီလီၼႂ်းမိူဝ်ႉဝၼ်းဢၼ်ၽေးႁွတ်ႈထိုင်၊ ဝၼ်းဢၼ်ၵေႃႉဢၼ်ယႃႉပႅတ်ႈၼၼ်ႉ တၵ်းႁဵတ်းမုၵ်ႉႁဵတ်းၸိူဝ်းသေလႄႈၶီႇမႃးတိုၵ်းတေႃးၵူၼ်းတင်းလၢႆၼၼ်ႉဢေႃႈ။
၁၇ ပိၵ်ႉသမ်ႉ တူၼ်ႈမၢၵ်ႇလိူဝ်ႇသၢင်းၽေႃးဢမ်ႇလႆႈမွၵ်ႇလႆႈၵီႈ၊ ဢမ်ႇလႆႈမီးတိၼ်ႇမီးမၢၵ်ႇတီႈတူၼ်ႈၶိူဝ်းမၢၵ်ႇၸပိတ်ႈ၊ တၢင်းဢၼ်တူၼ်ႈသၼ်ႇလုၼ်ႇသၢင်ႈႁဵတ်းၼၼ်ႉထၢတ်ႇၵႂႃႇႁၢႆၵႂႃႇ၊ တူင်ႈၼႃးတင်းလၢႆဢမ်ႇလႆႈပၼ်မၢၵ်ႇမၼ်းႁူင်းမၼ်း၊ ၽုင်သူဝ်းသဵင်ႈသေၵႃႈတီႈၶွၵ်ႈသူဝ်းလႄႈ
၁၈ ၽုင်ဝူဝ်းဢမ်ႇလႆႈမီးၵႃႈၼႂ်းသိုင်ႇဝူဝ်း သေၵေႃႈ ၵဝ်တၵ်းၸူမ်းပျေႃႇယူႇ ၵႃႈၼႂ်းထႃႇဝရႃႉၽြႃးလႄႈသႂၢင်ႇသိူဝ်းယူႇၵႃႈၼႂ်းၽြႃးပဵၼ်ၸဝ်ႈ ဢၼ်ၵႄႇသႄႇၶျွတ်ႈဢဝ်ၵဝ်ၼၼ်ႉဢေႃႈ။
၁၉ ၸဝ်ႈထႃႇဝရႃႉၽြႃးပဵၼ်တၢင်းၵတ်ႉတၢင်းၶၼ်ၵဝ်လႄႈ မၼ်းၸဝ်ႈတၵ်းႁႂ်ႈတိၼ်ၵဝ် ပဵၼ်ၸိူဝ်ႉၼင်ႇၵႂၢင်ၼင်ႇယီးၼၼ်ႉသေလႄႈ တၵ်းႁႂ်ႈၵဝ်ၵႂႃႇမႃးယူႇၵႃႈၼိူဝ်ထႃႇၼႃႉတီႈသုင်ၵဝ်တင်းလၢႆဢေႃႈ။ဢၼ်ၼႆႉပဵၼ်ပုၼ်ႈၵေႃႉဢၼ်ပဵၼ်ၵႄႇပဵၼ်ႁူဝ်ၶိူင်ႈပိူင်တူႇရီႇယႃႇၵဝ်ၼၼ်ႉဢေႃႈ။