၁
ယေႇရမိပွင်ႉၶင်းပုၼ်ႈယေႇရုသလႅမ်ႇ
၁ ဝဵင်းဢၼ်ၵူၼ်းၼမ်ၼႃႇၵိုၼ်းၼႃႇၼၼ်ႉ သိတ်ႇၵူၼ်းယဵၼ်ၵူၼ်းယူႇသေလႄႈၼင်ႈယူႇလူင်ပေႇ။မေႈယိင်းဢၼ်ယၢမ်ႈယႂ်ႇမျၢတ်ႈၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းၼၼ်ႉ ပဵၼ်ၸိူဝ်ႉၼင်ႇ မေႈမုၵ်ႉမေႈမၢႆႈၵႂႃႇယဝ်ႉလူင်ပေႇ။ၸဝ်ႈၼၢင်းပိူၼ်ႈၵူႈသိုင်ႇၵူႈမိူင်း လႆႈသၢၵ်ႈၶွၼ်ႇပၼ် ၶွၼ်ႇယဝ်ႉလူင်ပေႇ။
၂ မၼ်းႁႆႈႁွင်ႉႁႅင်းယႂ်ႇၼႃႇၶိင်ႇၵၢင်ၶိုၼ်းလႄႈ ၵႅမ်ႈမၼ်းၼၼ်ႉယမ်းပိူဝ်ႉဝ၊ႆႉတင်းၼမ်ႉတႃမၼ်းဢေႃႈ။ၼႂ်းၸူႉမၼ်းၸူဝ်းမၼ်းၸိူဝ်းၼၼ်ႉဢမ်ႇမီးၵေႃႉဢၼ်ႁႂ်ႈမၼ်းပျေႇၸႂ်ၼိမ်ၸႂ် သေၵေႃႉသေၵူၼ်းလႄႈၵႃႈပဵၼ်ၵေႃႉသေႈမၼ်းၼၼ်ႉ သႅတ်ႉၸႃႇလူႉလႄႈဢွၼ်ၵၼ်ပဵၼ်ရၢၼ်ႇသူႇမၼ်းၵႂႃႇယဝ်ႉ။ယုတၼၼ်ႉလႆႈၶၢႆႉတီႈၵႂႃႇ ၵွပ်ႈပိူဝ်ႈဢၼ်မၼ်းလႆႈၶၢမ်ႇ တၢင်းဢၼ်ၼိၵ်ႈၸၢၵ်ႈငႅၼ်းသေး၊တၢင်းဢၼ်ၸႂ်ႉၵိၼ်သွႆၵိၼ် ဢၼ်ႁၢဝ်ႈၵျၢမ်းၼႃႇၼၼ်ႉယဝ်ႉ။
၃ မၼ်းယူႇၵႃႈၼႂ်းၵူၼ်းသႃႇသၼႃႇပႃႉတင်းလၢႆလႄႈ ဢမ်ႇလႆႈၵတ်းယဵၼ်ၶျၢမ်းသႃႇ။ၶဝ်ၵႃႈဢၼ်လိုပ်ႈၸွမ်းမၼ်းၸိူဝ်းၼၼ်ႉဢွၼ်ၵၼ်ၶိုတ်းမၼ်းၵႃႈတီႈ ဢၼ်ၵိတ်ႇဢၼ်ၵႅၼ်း ၸိူဝ်းၼၼ်ႉဢေႃႈ။
၄ သဵၼ်ႈတၢင်းၸိဢုၼ်ႇၸိူဝ်းၼၼ်ႉဢွၵ်ၵၼ်ၶၢင်းၶီၶၢင်းၽၢၼ်ယူႇ ၵွပ်ႈပိူဝ်ႈဢၼ်ၽူႈ လႂ်ဢမ်ႇမႃးၵႃႈတီႈပွႆးၼၼ်ႉလႄႈ ၽၵ်းတူမၼ်းၵႃႈမီးၼၼ်ႉဢွၼ်ၵၼ်မီးတၢင်းဢၼ် သိတ်ႇၵူၼ်းယဵၼ်ၵူၼ်းယူႇဢေႃႈ။ယိတ်ႉပရေႃးႁိၵ်ႈမၼ်းၸိူဝ်းၼၼ်ႉၵေႃႈဢွၼ်ၵၼ်ပွင်ႉၶင်းယူႇလႄႈ ၵၼ်ႇၺႃႇလုၵ်ႈယိင်းသၢဝ်မၼ်းၸိူဝ်းၼၼ်ႉၵေႃႈ မီးၸႂ်ဢၼ်ၸဵပ်းဢၼ်သႅပ်ႇယူႇသေ လႄႈတူဝ်မၼ်းၼၼ်ႉလႆႈၶီၸႂ်ၶူမ်ၸႂ်ယူႇဢေႃႈ။
၅ ၶဝ်ၸိူဝ်း ဢၼ်ႁဵတ်းၶတ်းၵၼ်တင်းမၼ်းၼၼ်ႉ လႆႈဢုပ်ႉပိူင်ႇမၼ်းလႄႈ ရၢၼ်ႇသူႇမၼ်းၸိူဝ်းၼၼ်ႉလႆႈလီလႆႈပဵၼ်ၵွပ်ႈပိူဝ်ႈဢၼ် ထႃႇဝရႃႉၽြႃး ပၼ်တၢမ်ႇပုၼ်ႈဢပျႅတ်ႈမၼ်းဢၼ်ၼမ်ၼႃႇၼၼ်ႉယဝ်ႉ။လုၵ်ႈလၢင်းမၼ်းၸိူဝ်းၼၼ်ႉၵေႃႈ ရၢၼ်ႇသူႇမၼ်းသိမ်းဢဝ်ၵႂႃႇ ယဝ်ႉယဝ်ႉ။
၆ မုၼ်သရေႇလုၵ်ႈယိင်းၸိဢုၼ်ႇၼၼ်ႉလပ်ႉႁၢႆၵႂႃႇမူတ်းမူတ်းသဵင်ႈသဵင်ႈလႄႈ ၶုၼ်မၼ်းၵႂၢၼ်းမၼ်းၸိူဝ်းၼၼ်ႉ ပဵၼ်မိူၼ်ၸိူဝ်ႉၼင်ႇတိုင်ၼင်ႇယီးဢၼ်ႁႃတီႈဢၼ်တၵ်းၵိၼ်ယူႇလႄႈဢမ်ႇထူပ်းဢမ်ႇလႆႈၼၼ်ႉလႄႈယင်းဢမ်ႇမီးဢဵၼ်မီးႁႅင်း၊ ဢွၼ်ၵၼ်ဢွၵ်ႇပၢႆႈၵႃႈတီႈၽၢႆႇၼႃႈ ၵေႃႉဢၼ်လိုပ်ႈၸွမ်းၶဝ်ၼၼ်ႉၵႂႃႇ ယဝ်ႉ။
၇ ဝဵင်းယေႇရုသလႅမ်ႇၼၼ်ႉ ၶုၵ်းၸႂ်လႆႈၶႆႈၸႂ်ထူပ်းၸေးၸိမ်ႇ ဢၼ်ယၢမ်ႈလႆႈၸၢမ်ႇၸႃးမိူဝ်ႈဢွၼ်ၼၼ်ႉၼႂ်းမိူဝ်ႈဢၼ်မၼ်းလႆႈၶၢမ်ႇ တုၵ်ႉၶႃႉတၢင်းၽၢၼ်ၼၼ်ႉလႄႈ ၶဝ်ၸိူဝ်းဢၼ်ႁဵတ်းၶတ်းၵၼ်တင်းမၼ်းၸိူဝ်းၼၼ်ႉဢွၼ်ၵၼ်ႁၼ်ဢမူႉမၼ်းလႄႈ သေႉသွမ်းတၢင်းဢၼ်မၼ်းသုမ်းၸွမ်း ၼႂ်းမိူဝ်ႈဢၼ်ၵူၼ်းတင်းလၢႆႁွတ်ႈထိုင်ၵႃႈၼႂ်းမိူင်းရၢၼ်ႇသူႇလႄႈ ၵေႃႉဢၼ်ၸွႆႈ ထႅမ်မႃႉၸႃႉဢမ်ႇမီးၼၼ်ႉဢေႃႈ။
၈ ဝဵင်းယေႇရုသလႅမ်ႇၼၼ်ႉမီးဢပျႅတ်ႈ တၢင်းဢၼ်ၽိတ်းပိူင်ႈၼၼ်ႉၼမ်ၼႃႇလႄႈ ပဵၼ်တီႈဢၼ်လီႈႁင်ႈဢဵတ်ႇသဵတ်ႇဢေႃႈ။ၶဝ်ၸိူဝ်းဢၼ်ယၢမ်ႈရူဝ်ႇသေႇၵူဝ်ယမ်မၼ်းၼၼ်ႉဢွၼ်ၵၼ်ႁဵတ်းဢမ်ႇပေႃးၼင်ႇႁိုဝ်တီႈမၼ်း ၵွပ်ႈပိူဝ်ႈဢၼ်ၶဝ်ႁၼ်မၼ်းယူႇတူဝ်ပူၺ်ယူႇၼၼ်ႉဢေႃႈ။မၼ်းၼၼ်ႉၵေႃႈၶင်းၶီၶင်းၽၢၼ်လႄႈ ဝၢႆႇၶိုၼ်းၵႂႃႇတင်း လင်ဢေႃႈ။
၉ ပိၵ်ႉသမ်ႉလၢၵ်ႈၶၼႃႇဢၼ်ၵူဝ်ႈၵိူၵ်ႇမၼ်းပေႃႇဢွၵ်ႇမႃး ၵႃႈတီႈၶူဝ်းၼုင်ႈမၼ်း ဢၼ်လၢၵ်ႈဢၼ်ပူယူႇၼၼ်ႉၵေႃႈ မၼ်းဢမ်ႇၶုၵ်းၸႂ်လႆႈၸႂ်ထူပ်းလွင်ႈဢၼ်တၵ်းလႆႈၶၢမ်ႇၵမ်းလိုၼ်းၼၼ်ႉ။ပိူဝ်ႈၼႆလႄႈ မၼ်းယင်းဢမ်ႇမီးၵေႃႉဢၼ်ပၼ်ၼႃႈလီတီႈမၼ်းလႄႈ ပႃးတင်းလွင်ႈတၢင်းဢၼ်လီဢၢမ်းယူႇသေလႄႈ ႁွတ်ႈထိုင်တၢင်းဢၼ်ၶျႃးတူၵ်းတီႈတႅမ်ႇဢေႃႈ။ထႃႇဝရႃႉၽြႃးတီႈၶႃႈ။ၶႅၼ်းတေႃႈလူတူၺ်းတုၵ်ႉၶႃႉတၢင်းၽၢၼ်ၶႃႈၸဝ်ႈသေၵမ်းတီႈၶႃႈ။
၁၀ ရၢၼ်ႇ သူႇၼၼ်ႉယုၵ်ႉယွင်ႈတူဝ်ၸဝ်ႈၵဝ်ႇဝႆႉတီႈၶႃႈယဝ်ႉ။ရၢၼ်ႇသူႇၼၼ်ႉယဵတ်ႇမိုဝ်းမၼ်းယူႇ ၵႃႈၼိူဝ်ၸေးၸိမ်ႇမၼ်းၵႃႈမီးၼၼ်ႉတီႈၶႃႈယဝ်ႉ။မၼ်းလႆႈႁၼ်လွင်ႈဢၼ်ၵူၼ်းသႃႇသၼႃႇပႃႉ ဢၼ်ၸဝ်ႈႁဝ်းႁၢမ်ႈတပ်ႉႁႄႉၶႅၼ်ဝႆႉလႄႈဝႃႈဢမ်ႇလႆႈၶဝ်ၵႃႈၼႂ်းပရိၵ်ႈသၢတ်ႈၸဝ်ႈၵူၺ်းဝႃႈၼင်ႇၼႆၸိူဝ်းၼၼ်ႉ ဢွၼ်ၵၼ်ၶဝ်ႈၵႃႈၼႂ်းထႃႇၼႃႉ တီႈဢၼ်မူတ်းၸၢင်ႇၸဝ်ႈၼၼ်ႉ တီႈၶႃႈ ယဝ်ႉ။
၁၁ ၵူၼ်းမၼ်းတင်းသဵင်ႈတင်းလူင်ၼၼ်ႉဢွၼ်ၵၼ်ၶင်းၶီၶင်းၽၢၼ်ယူႇ၊ ႁႃၶဝ်ႈမုၼ်းယူႇသေလႄႈ လႆႈၸုၼ်ႉပႅတ်ႈၸေးၸိမ်ႇၶဝ် ပုၼ်ႈတၢင်းၵိၼ်တၢင်းၶူပ်းႁႂ်ႈၶဝ်လႆႈၵၢင်းလွတ်ႈၽေးတၢင်းတၢႆတီႈၶႃႈဢေႃႈ။ထႃႇဝရႃႉၽြႃးတီႈၶႃႈ။ၶႅၼ်းတေႃႈလူတူၺ်းလႄႈႁၼ်သေၵမ်းတီႈၶႃႈ။ၶႃႈၸဝ်ႈလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇတီႈၶႃႈဢေႃႈ။
၁၂
သူၵႃႈဢၼ်ၵႆၵႂႃႇၵႃႈတီႈႁိမ်းၼႆႉၶဝ်ဢိူၺ်း။ဢမ်ႇတိူဝ်ႉၸႂ်သူလႃးလႃးႁိုဝ်။ဢွၼ်ၵၼ်လူတူၺ်းလႄႈၶႆႈၸႂ်ဝူၼ်ႉၸႂ်သေၵမ်း။တုၵ်ႉၶႃႉဢၼ်မိူၼ်ၸိူဝ်ႉၼင်ႇတုၵ်ႉၶႃႉၵဝ်ဢၼ်ႁွတ်ႈထိုင်တီႈၵဝ်ဢၼ် ထႃႇဝရႃႉၽြႃးဢဝ်ၼိၵ်ႈၸၢၵ်ႈငႅၼ်းသေးၵဝ် ၼႂ်းမိူဝ်ႈဢၼ်မၼ်းၸဝ်ႈၸႂ်မႆႈၶႆႈ ၸႃႉႁႅင်းယႂ်ႇၼႃႇၼၼ်ႉၼႆႉယင်းမီးလူးၵွၼ်ႇႁိုဝ်။
၁၃ မၼ်းၸဝ်ႈယူႇၵႃႈတီႈၼိူဝ် ပုၼ်ႈဢၼ်ဢဝ်ၽႆးပွႆႇလူင်းသႂ်ႇၵႃႈၼႂ်းလုပ်ႇၵဝ်တင်းလၢႆလႄႈ ႁႂ်ႈပေႉၼႅင်ႇယႃႉပႅတ်ႈယဝ်ႉ။မၼ်းၸဝ်ႈၵၢင်တူင်ႇႁဵဝ်ႉတူင်ႇၶိုမ်းတိၼ်ၵဝ်ၶဵၼ်းမႅၼ်ႈလႄႈႁႂ်ႈၵဝ်ဝၢႆႇၶိုၼ်းၵႂႃႇတၢင်းလင်ယဝ်ႉ။မၼ်းၸဝ်ႈႁႂ်ႈၵဝ်မီးတၢင်းဢၼ် ႁဵဝ်ႇၸွပ်ႈတၢင်းဢၼ်ၸႂ်လူႉ တင်းဝၼ်းတင်းဝၼ်းဢေႃႈ။
၁၄ မၼ်းၸဝ်ႈဢဝ်မိုဝ်းမၼ်းၸဝ်ႈမတ်ႉၽုၵ်ႈၵၼ်ႁၢပ်ႇဢပျႅတ်ႈ ဢၼ်ၵဝ်ၽိတ်းပိူင်ႈၸိူဝ်းၼၼ်ႉသႂ်ႇလႄႈ ၸိူဝ်းၼၼ်ႉလႆႈမီးတၢင်းဢၼ်လႅမ်ၽၼ်ႈၶဵၼ်းၶွတ်ႇသေလႄႈသႂ်ႇဝႆႉမီးယူႇၵႃႈၼိူဝ်ၶေႃးၵဝ်လႄႈထႃႇဝရႃႉၽြႃးႁႂ်ႈၵဝ်ႁႅင်းဢူၼ်ႈၵႂႃႇလႄႈႁႂ်ႈၵဝ်ႁွတ်ႈထိုင်ၵႃႈၼႂ်းမိုဝ်း ၶဝ်ၸိူဝ်းဢၼ်ၵဝ်ဢမ်ႇႁၢမ်ႈတပ်ႉႁႄႉၶႅၼ်လႆႈၼၼ်ႉယဝ်ႉ။
၁၅ ၸဝ်ႈၽြႃးၼၼ်ႉယိပ်းၵမ်ၵူၼ်းသိုၵ်း ဢၼ်ႁႅင်းယႂ်ႇၼႃႇသေၵဝ်တင်းသဵင်ႈတင်းလူင်ၼၼ်ႉၵႃႈၼႂ်းၶိုင်ႈၵၢင်ၵဝ်လႄႈ ႁွင်ႉဢဝ်မူႇၽုင်မုၵ်ႉၸိူဝ်း ၵူၼ်းၼုမ်ႇၵူၼ်းၵမ်ၵဝ်တင်းလၢႆသေလႄႈယူႇၽၢႆႇၼိုင်ႈတင်းၵဝ်ယဝ်ႉ။ၸဝ်ႈၽြႃးၼၼ်ႉယဵပ်ႇၼူတ်ႈၵၢၼ်ႇၺႃႇလုၵ်ႈယိင်းသၢဝ်ယုတ ၵႃႈၼႂ်းၶိူင်ႈ ၼူတ်ႈမၢၵ်ႇၸပိတ်ႈၼၼ်ႉယဝ်ႉ။
၁၆ ၵွပ်ႈပိူဝ်ႈလွင်ႈတၢင်းၸိူဝ်းၼၼ်ႉလႄႈၵဝ်လႆႈႁႆႈလႆႈႁွင်ႉဢေႃႈ။ၼမ်ႉတႃၵဝ်မီးတၢင်းဢၼ်တူၵ်းယူႇလႄႈ ၵေႃႉဢၼ်ထုၵ်ႇလီၵမ်ႉထွၵ်ႈဢသၢၵ်ႈၵဝ်လႄႈ ႁႂ်ႈၵဝ်ပျေႇၸႂ်ၼိမ်ၸႂ်ၼၼ်ႉၵႆၵၼ်တင်းၵဝ်ဢေႃႈ။လုၵ်ႈၵဝ်လၢင်းၵဝ်ဢွၼ်ၵၼ်လူႉၵႂႃႇႁၢႆၵႂႃႇ ၵွပ်ႈပိူဝ်ႈဢၼ်ရၢၼ်ႇသူႇပေႉၼႅင်ႇၼၼ်ႉယဝ်ႉ။
၁၇ ပိၵ်ႉသမ်ႉလုၵ်ႈယိင်းၸိဢုၼ်ႇ ၼၼ်ႉယုၵ်ႉမိုဝ်းဢႃႈမိုဝ်းမၼ်းသေၵေႃႈ ၵေႃႉဢၼ်ႁႂ်ႈမၼ်းပျေႇၸႂ်ၼိမ်ၸႂ်ၼၼ်ႉဢမ်ႇမီး။ထႃႇဝရႃႉၽြႃးမီးဢမိင်ႉလူၺ်ႈလွင်ႈယႃႇၵုပ်ႉလႄႈ ၶၢၼ်းၶဝ်ၸိူဝ်းဢၼ်လဵပ်ႈႁွပ်ႈမၼ်းၼၼ်ႉပဵၼ်ရၢၼ်ႇသူႇမၼ်းယဝ်ႉ။ဝဵင်းယေႇရုသလႅမ်ႇၼၼ်ႉပဵၼ်တီႈဢၼ်လီႁင်ႈဢဵတ်ႇသဵတ်ႇၵႃႈၼႂ်းၶဝ်ဢေႃႈ။
၁၈ ထႃႇဝရႃႉၽြႃးၸီႇယၢင်ႇၸွမ်းၼင်ႇတြႃးဢေႃႈ။လွင်ႈမၼ်းၸမ်းၵဝ်ပူၼ်ႉလိူဝ်ပိင်းၺၢပ်ႈမၼ်းၸဝ်ႈမႅၼ်ႈယဝ်ႉ။ၵူၼ်းၵူႈၸိူဝ်ႉၵူႈမဵဝ်းၶဝ်ဢိူၺ်း။ဢွၼ်ၵၼ်ထွမ်ႇငိၼ်းလႄႈလူတူၺ်းတုၵ်ႉၶႃႉၵဝ်သေၵမ်း။ၶဝ်ဢွၼ်ၵၼ် သိမ်းဢဝ်ၽူႈမၢဝ်ႇတင်းၽူႈသၢဝ်တင်းလၢႆၵႂႃႇယဝ်ႉ။
၁၉ ၵဝ်ႁွင်ႉဢဝ်ၸူႉၵဝ်ၸူဝ်းၵဝ်တင်းလၢႆလႄႈၶဝ်ၼၼ်ႉဢမ်ႇမီးသႅတ်ႉၸႃႇ။ယိတ်ႉပရေႃးႁိၵ်ႈၵဝ်တင်းလၢႆဢိၵ်ႇတင်း ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၵဝ်ၸိူဝ်းၼၼ်ႉဢွၼ်ၵၼ်ၶျုၵ်ႈဢသၢၵ်ႈၶဝ်ၵႃႈၼႂ်းၶူးၼႂ်းဝဵင်းမိူဝ်ႈဢၼ်ၶဝ်ယင်းတိုၵ်ႉႁႃဢဝ် တၢင်းၵိၼ်တၢင်းၶူပ်းပုၼ်ႈဢၼ်တၵ်းလဵင်ႉဢသၢၵ်ႈၶဝ်ယူႇၼၼ်ႉဢေႃႈ။
၂၀ ထႃႇဝရႃႉၽြႃးတီႈၶႃႈ။ၶႅၼ်းတေႃႈလူတူၺ်းသေၵမ်းတီႈၶႃႈ။ၶႃႈၸဝ်ႈယၢပ်ႇၸႂ်ၽိုတ်ႇၸႂ်တီႈၶႃႈဢေႃႈ။တွင်ႉၶႃႈၸဝ်ႈပုမ်ၶႃႈၸဝ်ႈၼႆႉ မီးတၢင်းဢၼ်လိူတ်ႈယူႇသၵ်းယူႇတီႈၶႃႈဢေႃႈ။ႁူဝ်ၸႂ်ၶႃႈၸဝ်ႈမီးတၢင်းဢၼ်ပိၼ်ႈၶႂမ်ႈယူႇ ၵွပ်ႈပိူဝ်ႈဢၼ်ၶႃႈၸဝ်ႈၽိတ်းပိူင်ႈၼႃႇလူင်လၢင်ၼၼ်ႉတီႈၶႃႈဢေႃႈ။ၵႃႈတီႈၼွၵ်ႈၸမ်းၽေးလၢပ်ႇယႃႉပႅတ်ႈလႄႈ၊ ၵႃတီႈၼႂ်းၸမ်းပဵၼ်ၸိူဝ်ႉၼင်ႇဢၼ်တၢႆယူႇၼၼ်ႉတီႈၶႃႈဢေႃႈ။
၂၁ ၶဝ်လႆႈငိၼ်းလွင်ႈဢၼ်ၶႃႈၸဝ်ႈၶၢင်းၶီၶၢင်းၽၢၼ်လႄႈ ဢမ်ႇမီးၵေႃႉဢၼ်ႁႂ်ႈပျေႇၸႂ်ၼိမ်ၸႂ်သေၵေႃႉသေၵူၼ်းၼၼ်ႉ တီႈၶႃႈယဝ်ႉ။ရၢၼ်ႇသူႇၶႃႈၸဝ်ႈတင်းသဵင်ႈတင်းလူင်လႆႈငိၼ်းလွင်ႈတၢင်းဢၼ် ႁွတ်ႈထိုင်တီႈၶႃႈၸဝ်ႈၼၼ်ႉလႄႈဢွၼ်ၵၼ်ၸူမ်းသိူဝ်း လူၺ်ႈလွင်ႈဢၼ်ၸဝ်ႈႁဝ်းၸိူဝ်ႉၼင်ႇၼၼ်တီႈၶႃႈဢေႃႈ။လွင်ႈၼင်ႇႁိုဝ်ၶဝ်တၵ်းလႆႈပဵၼ်ၸိူဝ်ႉၼင်ႇၶႃႈၸဝ်ႈၼႆႉၸိုင် ၸဝ်ႈၶႅၼ်းတေႃႈႁႂ်ႈမိူဝ်ႉဝၼ်းဢၼ်ၸဝ်ႈႁဝ်းၶဵၼ်းဝႆႉၼၼ်ႉ ႁွတ်ႈထိုင်သေၵမ်း လူၺ်ႈတီႈၶႃႈ။
၂၂ ႁႂ်ႈတူႉၸရိူၵ်ႈၶဝ်ၵူႈၸိူဝ်ႉၵူႈပိူင်ႁွတ်ႈထိုင်ၵႃႈတီႈၽၢႆႇၼႃႈၸဝ်ႈႁဝ်းသေၵမ်းတီႈၶႃႈ။ၶႅၼ်းတေႃႈႁဵတ်းတီႈၶဝ်မိူၼ်ၸိူဝ်ႉၼင်ႇဢၼ်ၸဝ်ႈႁဝ်းႁဵတ်းတီႈၶႃႈၸဝ်ႈၵွပ်ႈပိူဝ်ႈဢပျႅတ်ႈ ၵႃႈဢၼ်ၶႃႈၸဝ်ႈၽိတ်းပိူင်ႈၼၼ်ႉသေၵမ်းတီႈၶႃႈ။ၶႃႈၸဝ်ႈမီးတၢင်းဢၼ်ၶင်းၶီၶင်းၽၢၼ်ၼမ်ၼႃႇလႄႈ ၸႂ်လူႉယူႇတီႈၶႃႈဢေႃႈ။