၁
တၢင်းဢၼ်ၸီႇယၢင်ႇမိူင်းၵူၼ်း
၁ ၼုၵ်ႈၵပၢတ်ႈထႃႇဝရႃႉၽြႃး ဢၼ်ႁွတ်ႈမႃးတီႈၸေႇၽၼိလုၵ်ႈၸၢႆးၵုသိ၊ဢၼ်ပဵၼ်လုၵ်ႈၸၢႆး ၵေႇတလိ၊ဢၼ်ပဵၼ်လုၵ်ႈၸၢႆးဢႃႇမရိ၊ ဢၼ်ပဵၼ်လုၵ်ႈၸၢႆးႁိၸၵိၼႂ်းၸူဝ်ႈပၢၼ်ၶုၼ်လူင်သိယ လုၵ်ႈၸၢႆးဢႃႇ မုၼ်ႇ ၶုၼ်ႁေႃၶမ်းယုတၼၼ်ႉၸမ်း၊-
၂ ၵဝ်တၵ်းပႄႇၽဵဝ်ႈလွင်ႈတၢင်းၵႃႈမီးပႅတ်ႈသေၵႃႈၼိူဝ်ၼႃႈလိၼ်မိူင်းမူတ်းမူတ်းသဵင်ႈသဵင်ႈဢေႃႈ၊ ဝႃႈၼင်ႇၼႆထႃႇဝရႃႉ ၽြႃးမီးဢမိင်ႉဢေႃႈ။
၃ ၵဝ်တၵ်းပႄႇၽဵဝ်ႈၵူၼ်းဢိၵ်ႇတင်းတရိၵ်ႈသၢၼ်ႇပႅတ်ႈလႄႈ ပႄႇၽဵဝ်ႈၼူၵ်ႉၵၢင်ႁၢဝ်တင်းပႃပၢင်ႇလၢႆႇတင်းလၢႆဢိၵ်ႇတင်းလွင်ႈတၢင်းဢၼ်ၶီႇလိုတ်းလႄႈ လူမ်ႉၸိူဝ်းၼၼ်ႉပႃးလူၺ်ႈၵၼ်တင်းၶဝ်ၸိူဝ်းဢၼ်ႁၢႆႉဢၼ်ယုတ်ႈ ၼၼ်ႉပႅတ်ႈဢေႃႈ။ၵူၼ်းသတ်ႉတဝႃႇၵေႃႈ ၵဝ်တၵ်းပႄႇပႅတ်ႈသေၵႃႈၼိူဝ်ၼႃႈလိၼ်ဢေႃႈ၊ ဝႃႈၼင်ႇၼႆထႃႇဝရႃႉၽြႃးမီးဢမိင်ႉ ဢေႃႈ။
၄ ၵဝ်တၵ်းဢဝ်မိုဝ်းၵဝ်ယဵတ်ႇယူႇၽၢႆႇၼိုင်ႈတင်းမိူင်းယုတ ဢိၵ်ႇတင်းၵူၼ်းဝဵင်းယေႇရုသလႅမ်ႇတင်းသဵင်ႈတင်းလူင်လႄႈ တၵ်းပႄႇၽဵဝ်ႈပႅတ်ႈတပေးတပၢၼ်းၽြႃးပႃႇလ ဢၼ်ၵိုတ်းဢၼ်ၵျၢၼ်ႇတင်းလၢႆ၊ၼႃႇမႃႉၸိုုဝ်ႈသဵင် ယိတ်ႉပရေႃးႁိၵ်ႈဢၼ်ၵူဝ်းၵႂၢႆႇရုၵ်ႉထူႉတင်းလၢႆဢိၵ်ႇလူၺ်ႈၵၼ်တင်း ယိတ်ႉပရေႃးႁိၵ်ႈ တၢင်ႇ ၵေႃႉတၢင်ႇၵူၼ်းတင်းလၢႆ၊
၅ ၶဝ်ၸိူဝ်းဢၼ်ၵူဝ်းၵႂၢႆႇၶိူင်ႈပိူင်ၵၢင်ႁၢဝ်တင်းလၢႆ ၵႃႈၼိူဝ်မုင်းႁိူၼ်းၶဝ်ၸိူဝ်းဢၼ်ဢဝ်ထႃႇဝရႃႉၽြႃးဢိၵ်ႇတင်းၽြႃးမႃႇလ ၶမ်ႇတိူင်ႇဝႃႈၵိၼ်ႇဝႃႈသေလႄႈ ၵူဝ်းၵႂၢႆႇ၊ၶဝ်ၸိူဝ်းဢၼ်
၆ သုတ်ႈၶိုၼ်းယိုတ်းၶိုၼ်းသေ ၵႃႈတီႈတၢင်းဢၼ်ၸွမ်းလင်ထႃႇဝရႃႉၽြႃးၼၼ်ႉ၊ တင်းၶဝ်ၸိူဝ်းဢၼ်ဢမ်ႇႁႃဢဝ်ထႃႇဝရႃႉၽြႃးလႄႈ ဢမ်ႇတွင်ႈထၢမ်ႁႃဢဝ်မၼ်းၸဝ်ႈၼၼ်ႉဢေႃႈ။
၇ ဢွၼ်ၵၼ်ယူႇတဵတ်ႇတဵတ်ႇ ၵႃႈတီႈၽၢႆႇၼႃႈၸဝ်ႈထႃႇဝရႃႉၽြႃးတႃႉ။မိူဝ်ႉဝၼ်းထႃႇဝရႃႉၽြႃးၸမ်ႈမႃးယဝ်ႉ။ထႃႇရႃႉၽြႃးမႄးႁႅၼ််းပွႆးယိၸ်ႉဝႆႉလႄႈႁႂ်ႈၶဝ်ၸိူဝ်းဢၼ်မၼ်းၸဝ်ႈႁွင်ႉပၢင်းဢဝ်ၼၼ်ႉ မူတ်းၸၢင်ႇယဝ်ႉ။
၈ ၼႂ်းမိူဝ်ႉဝၼ်းဢၼ် ထႃႇဝရႃႉၽြႃး ၶၢမ်ႇပွႆးၼၼ်ႉၵဝ်တၵ်းပၼ်တၢမ်ႇတီႈၶုၼ်တီႈၵႂၢၼ်း၊ တီႈလုၵ်ႈလၢင်းၶုၼ်ႁေႃၶမ်းဢိၵ်ႇတင်း တီႈၶဝ်ၸိူဝ်းဢၼ်ၼုင်ႈၶူဝ်းၼုင်ႈဢၼ်ၵူၼ်းတၢင်ႇဝၢၼ်ႈတၢင်ႇမိူင်း ႁဵတ်းၼၼ်ႉ ၸိူဝ်းၼၼ်ႉဢေႃႈ။
၉ ၼႂ်းမိူဝ်ႉဝၼ်းၼၼ်ႉၶဝ်ၸိူဝ်းဢၼ်ၶၢမ်ႈၶူင်ႇၽၵ်းတူပိူၼ်ႈ ဢၼ်ႁႂ်ႈႁိူၼ်းၸဝ်ႈၶဝ်တဵမ်ဝႆႉတင်းတၢင်းဢၼ်ႁဵတ်းပေႉႁဵတ်းၼႅင်ႇ၊တၢင်းဢၼ်ပႅတ်ႉဢၼ်လႅၼ်ၸိူဝ်းၼၼ်ႉၵေႃႈ ၵဝ်တၵ်းပၼ်တၢမ်ႇဢေႃႈ။
၁၀ ထႃႇဝရႃႉၽြႃးမီးဢမိင်ႉၸမ်း၊-ၼႂ်းမိူဝ်ႉဝၼ်းၼၼ်ႉတၵ်းလႆႈမီးသဵင်ဢၼ်ႁွင်ႉသႅၼ်ႇ ဢွၵ်ႇသေၵႃႈၼႂ်းႁူးၽၵ်းတူပႃ၊သဵင်ဢၼ်ႁွင်ႉႁႆႈပွင်ႉၶၢင်း ဢွၵ်ႇသေၵႃႈၼႂ်းဝဵင်းတုတိယ၊ သဵင်တၢင်းဢၼ်ႁၵ်းႁိၵ်းယႃႉပႅတ်ႈ ဢၼ်ႁႅင်းယႂ်ႇ ၼႃႇဢွၵ်ႇသေၵႃႈၼႂ်းသၼ်လွႆၼၼ်ႉဢေႃႈ။
၁၁ ၵူၼ်းၵႃႈတီႈမၵ်ႉတေႇသၶဝ်ဢိူၺ်း။ဢွၼ်ၵၼ်ႁႆႈႁွင်ႉပွင်ႉၶင်းတႃႉ။ၵူၼ်းမိူင်းၶႃႇၼၢၼ်ႇတင်းသဵင်ႈတင်းလူင် ထၢတ်ႇၵႂႃႇယဝ်ႉ။ၶဝ်ၸိူဝ်းဢၼ်ပႃးငိုၼ်းတင်းသဵင်ႈတင်းလူင် ၼၼ်ႉဢွၼ်ၵၼ်သုမ်းပႅတ်ႈယဝ်ႉ။
၁၂ ၼႂ်းၶိင်ႇမိူဝ်ႉဝၼ်းၼၼ်ႉၵဝ်တၵ်းယိပ်းၵမ်ဝၢၼ်ႇၽႆးတဵၼ်းသေလႄႈ ၸႅတ်ႈထၢမ်ၸႅတ်ႈတူၺ်းဝဵင်းယေႇရုသလႅမ်ႇဢေႃႈ။ၵဝ်တၵ်းပၼ်တၢမ်ႇ တီႈၶဝ်ၸိူဝ်းဢၼ်ၵွၼ်ႈၵမ်းၵႅၼ်ႇၶႅင်မႃးၵႃႈၼိူဝ်ဢူၼ်ႁူၼ်းၶဝ်လႄႈ လၢတ်ႈၼႂ်းၸႂ်လႄႈဝႃႈထႃႇဝရႃႉၽြႃးဢမ်ႇႁဵတ်းၵျေးၸူး၊ ဢမ်ႇပၼ်ဢပျႅတ်ႈ ၵူၺ်း၊ဝႃႈၼင်ႇၼႆၼၼ်ႉဢေႃႈ။
၁၃ ၸေးၸိမ်ႇဢုၵ်ႉၸႃႇၶဝ်ၼၼ်ႉတၵ်းလႆႈပဵၼ် တီႈဢၼ်ႁိမ်ဢဝ်ႁူင်ႇဢဝ်လႄႈႁိူၼ်းတီႈယူႇၶဝ်ၸိူဝ်းၼၼ်ႉ တၵ်းလႆႈမီးတၢင်းဢၼ်သိတ်ႇၵူၼ်းယဵၼ်ၵူၼ်းယူႇဢေႃႈ။ပိၵ်ႉသမ်ႉၶဝ်ဢွၼ်ၵၼ်ႁဵတ်းႁိူၼ်းသေၵေႃႈ ၶဝ်ဢမ်ႇလႆႈယူႇလႆႈသဝ်းၵႃႈၼႂ်းမၼ်းလႄႈ ပိၵ်ႉသမ်ႉၶဝ်ဢွၼ်ၵၼ်ၽုၵ်ႇသူၼ်ဢူးယဵၼ်ႇမၢၵ်ႇၸပိတ်ႈသေၵေႃႈ ၶဝ်ဢမ်ႇလႆႈသူတ်ႉလႆႈ ၵိၼ်ၼမ်ႉၸပိတ်ႈမၼ်း။
၁၄ ဝၼ်းယႂ်ႇဝၼ်းလူင်ထႃႇဝရႃႉၽြႃးၸမ်မႃးယဝ်ႉ။ၸမ်မႃးယဝ်ႉ။ႁိပ်ႈၼႅတ်ႈမႃးယူႇဢေႃႈ။သတၢင်းသဵင်ၶၢဝ်ႇဝၼ်းထႃႇဝရႃႉၽြႃးၼၼ်ႉမႃးလႄႈ ၵေႃႉဢၼ်ႁႅင်းယႂ်ႇၼႃႇတၵ်းႁွင်ႉသႅၼ်ႇသဵင် ဢၼ်ၶူမ်ၼႃႇၶၼ်းၼႃႇၼၼ်ႉလူင်လၢင်ဢေႃႈ။
၁၅ မိူဝ်ႉဝၼ်းၼၼ်ႉ ပဵၼ်ဝၼ်းဢၼ်တၢင်းၸႂ်မႆႈၶႆႈၸႃႉဢွၵ်ႇ၊ဝၼ်းဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်၊ ဝၼ်းတၢင်းဢၼ်တီႇၽဵဝ်ႈလႄႈယႃႉမူတ်းမူတ်းသဵင်ႈသဵင်ႈ၊ ဝၼ်း ဢၼ်လပ်းသိပ်ႇလႄႈ
၁၆ ဢၼ်လႅင်းလပ်ႉႁၢႆၵႂႃႇ၊ ဝၼ်းဢၼ်ၾႃႉမိုတ်ၾႃႉၵုမ်ႈလႄႈလပ်းသိင်ႇၼႃတၼ်ၼႃႇဝၼ်းဢၼ်ပဝ်ႇၼႄးၶရႃႇလႄႈ ႁွင်ႉပၢဝ်ႇႁွင်ႉသေႃႇယူႇၽၢႆႇၼိုင်ႈတင်းဝဵင်း ဢၼ်မၼ်ႈၶိူင်ႇတင်းလၢႆဢိၵ်ႇတင်းတိူၵ်ႈတီႈတိုၵ်းသိုၵ်း ဢၼ်သုင်ၼႃႇၸိူဝ်းၼၼ်ႉ ဢေႃႈ။
၁၇ ၵဝ်တၵ်းၼိၵ်ႈၸၢၵ်ႈငႅၼ်းသေးၵူၼ်းတင်းလၢႆထၼ်ႈပေႃး ႁႂ်ႈၶဝ်လႆႈၵႂႃႇမိူၼ်ၸိူဝ်ႉၼင်ႇၵေႃႉဢၼ်တႃမွတ်ႇတႃတၼ်ၼၼ်ႉ ၵွပ်ႈပိူဝ်ႈဢၼ်ၶဝ်ၽိတ်းပိူင်ႈထႃႇဝရႃႉၽြႃးၼၼ်ႉလႄႈ လိူတ်ႈၶဝ်တၵ်းလႆႈၶၢမ်တၢင်းဢၼ်ထွၵ်ႇႁိုဝ်ႈပႅတ်ႈ မိူၼ်ၸိူဝ်ႉၼင်ႇမုၼ်ႈလိၼ်ၼၼ်ႉလႄႈ ၼိူဝ်ႉၶဝ်ၼင်ၶဝ်ၼၼ်ႉမိူၼ်ၸိူဝ်ႉၼင်ႇၶီႈၼင်ႇဢႃႇ ၼၼ်ႉဢေႃႈ။
၁၈ ၼႂ်းမိူဝ်ႉဝၼ်းဢၼ်ထႃႇဝရႃႉၽြႃးၸႂ်မႆႈၶႆႈၸႃႉၼၼ်ႉ ငိုၼ်းၶမ်းၶဝ်ဢမ်ႇၵႄႇသႄႇၶျွတ်ႈဢဝ်ၶဝ်လႆႈ၊ ၽႆးတေႃးသႃႉတၢင်းၸႂ်မႆႈၶႆႈၸႃႉမၼ်းၸဝ်ႈတၵ်းမႆႈပႅတ်ႈတင်းမိူင်းဢေႃႈ။မၼ်းၸဝ်ႈတၵ်းၸီႇယၢင်ႇၵူၼ်းဝၢၼ်ႈၵူၼ်းမိူင်းၵႃႈမီး ႁႂ်ႈၸဵဝ်းယဝ်ႉၸဵဝ်းတူဝ်ႈဢေႃႈ။