၁၈
ၽူႈလႂ်ယႂ်ႇမျၢတ်ႈသေပိူၼ်ႈၼႂ်းမိူင်းၵၢင်ႁၢဝ်
၁ မိူဝ်ႈၼၼ်ႉတပႄးၸဝ်ႈတင်းလၢႆသုတ်ႉၸပ်းသုတ်ႉၸူးတီႈၸဝ်ႈယေႇသုလႄႈလဝ်ထၢမ်ဝႃႈ၊-
၂ ၵႃႈၼႂ်းမိူင်းၵၢင်ႁၢဝ်ၸဝ်ႈၼၼ်ႉၽူႈလႂ်တၵ်းယႂ်ႇမျၢတ်ႈသေပိူၼ်ႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈႁွင်ႉဢဝ်လုၵ်ႈဢွၼ်ႇၵေႃႉၼိုင်ႈမႃးၵႃႈၼႂ်းၵႄႈၵၢင်ၶဝ်ယဝ်ႉၸင်ႇလၢတ်ႈလႄႈဝႃႈ၊-
၃ ၵဝ်ဝႃႈတီႈၸိုဝ်ႈတီႈၸႂ်ႈၸမ်းပေႃးသူဢမ်ႇၶၢႆႉပုတ်ႈသေလႄႈပဵၼ်မိူၼ်ၸိူဝ်ႉၼင်ႇလုၵ်ႈဢွၼ်ႇၼႆႉၸိုင်သူဢမ်ႇလႆႈၶဝ်ႈၵႃႈၼႂ်းမိူင်းၵၢင်ႁၢဝ်ၸဝ်ႈ။
၄ ပိူဝ်ႈၼႆလႄႈၽူႈလႂ်သေဢမ်ႇဝႃႈၵေႃႉဢၼ်ၶျႃးတႅမ်ႇတူဝ်ၸဝ်ႈၵဝ်ႇၸိူဝ်ႉၼင်ႇလုၵ်ႈဢွၼ်ႇၼႆႉၼၼ်ႉၵေႃႉၼၼ်ႉတၵ်းပဵၼ်ၵေႃႉဢၼ်ယႂ်ႇမျၢတ်ႈသေပိူၼ်ႈၵႃႈၼႂ်းမိူင်းၵၢင်ႁၢဝ်ၸဝ်ႈဢေႃႈ။
၅ ၽူႈလႂ်သေဢမ်ႇဝႃႈၵေႃႉဢၼ်ဢိင်ပိုင်ႈၸိုဝ်သဵင်ၵဝ်သေလႄႈႁပ်ႉတုင်းဢဝ်လုၵ်ႈဢွၼ်ႇၸိူဝ်ႉၼင်ႇၼႆၼၼ်ႉၵေႃႉၼၼ်ႉႁပ်ႉတုင်းဢဝ်ၵဝ်ယဝ်ႉ။
၆ ၽူႈလႂ်သေဢမ်ႇဝႃႈၵေႃႉဢၼ်ႁႂ်ႈလုၵ်ႈဢွၼ်ႇဢၼ်ယုမ်ႇမၢတ်ႈၵဝ်ၼၼ်ႉသေၵေႃႉသေၵူၼ်းလႆႈၽိတ်းပိူင်ႈၸိုင်တီႈၵေႃႉၼၼ်ႉပေႃးမၼ်းၶၢမ်ႇတၢင်းဢၼ်ဢဝ်မၢၵ်ႇႁိၼ်လူၺ်ႁွႆႈသႂ်ႇၵႃႈတီႈၶေႃးမၼ်းသေလႄႈပွႆႇတူၵ်းၸူမ်လူင်းၵႂႃႇၵႃႈၼႂ်းၼမ်ႉပၢင်ႇလၢႆႇတီႈဢၼ်လိုၵ်ႉၼၼ်ႉၸိုင်ယဵင်ႈၶႅၼ်းတၵ်းလီဢေႃႈ။
၇ ၵွပ်ႈပိူဝ်ႈမီးလွင်ႈတၢင်းဢၼ်ၽိတ်းပိူင်ႈၼၼ်ႉၼမ်ၼႃႇလႄႈလေႃးၵၼႆႉမီးဢႃႉမင်ႇၵလႃႇဢေႃႈ။လွင်ႈတၢင်းဢၼ်ၽိတ်းပိူင်ႈၼမ်ၼႃႇၼၼ်ႉတၵ်းလႆႈမီးဢေႃႈ။ၼႂ်းဝႃႈၼၼ်သေၵေႃႈၵေႃႉဢၼ်ႁဵတ်းႁႂ်ႈလွင်ႈတၢင်းဢၼ်ၽိတ်းပိူင်ႈပေႃႇပဵၼ်မႃးၼၼ်ႉမီးဢႃႉမင်ႇၵလႃႇဢေႃႈ။
၈ တိၼ်မႂ်းမိုဝ်းမႂ်းၼၼ်ႉပေႃးႁဵတ်းႁႂ်ႈမႂ်းၽိတ်းပိူင်ႈၸိုင်တႅပ်းပႅတ်ႈသတေႃႉ။တၢင်းဢၼ်တိၼ်မိုဝ်းလူႉၵေႃႈယႃႇပေႃးလႆႈၶဝ်ႈၵႃႈၼႂ်းတၢင်းဢၼ်ဢသၢၵ်ႈလိပ်းၸိုင်ယဵင်ႈၶႅၼ်းတၵ်းလီသေလႆႈၶၢမ်ႇတၢင်းဢၼ်ၶျႃးတူၵ်းသႂ်ႇၵႃႈၼႂ်းၽႆးထႃႇဝရႃႉၼၼ်ႉဢေႃႈ။
၉ ပေႃးမၢၵ်ႇတႃမႂ်းႁဵတ်းႁႂ်ႈမႂ်းၽိတ်းပိူင်ႈၸိုင်ၶွၵ်းဢွၵ်ႇပႅတ်ႈသတေႃႉ။တၢင်းဢၼ်မီးမၢၵ်ႇတႃၶွၼ်ၼိုင်ႈလႄႈလႆႈၶဝ်ႈၵႃႈၼႂ်းတင်းဢၼ်ဢသၢၵ်ႈလိပ်းၼၼ်ႉယဵင်ႈၶႅၼ်းတၵ်းလီသေတၢင်းဢၼ်မီးမၢၵ်ႇတႃသွင်ၶွၼ်လႄႈလႆႈၶၢမ်ႇတၢင်းဢၼ်ၶျႃးတူၵ်းသႂ်ႇၵႃႈၼႂ်းၽႆးငႃႈရၢႆးပုၼ်ႉၼၼ်ႉဢေႃႈ။
ဢူႉပမႃႇသူဝ်းဢၼ်ႁၢႆၵႂႃႇ
၁၀ လွင်ႈၼင်ႇႁိုဝ်သူတၵ်းဢမ်ႇႁဵတ်းတၢင်းဢၼ်လူလၢႆတီႈလုၵ်ႈဢွၼ်ႇၸိူဝ်ႉၼႆသေၵေႃႉသေၵူၼ်းၸိုင်ႁဵတ်းသတိတႃႉ။ၵဝ်ဝႃႈတီႈသူၸမ်းတမၢၼ်ႇၵၢင်ႁၢဝ်လုၵ်ႈဢွၼ်ႇၸိူဝ်းၼႆႉလႆႈတူၺ်းလႆႈႁၼ်ၼႃႈပေႃႈၵဝ်ဢၼ်မီးၵႃႈၼိူဝ်မိူင်းၵၢင်ႁၢဝ်ပုၼ်ႉတႃႇသေႇဢမ်ႇထၢတ်ႇဢေႃႈ။
၁၁ လွင်ႈမၼ်းၸမ်းလုၵ်ႈၵူၼ်းမႃးႁႂ်ႈလႆႈၵႄႇၶျွတ်ႈဢဝ်ၶဝ်ၸိူဝ်းဢၼ်ႁၢႆၵႂႃႇၼၼ်ႉဢေႃႈ။သူထၢင်ႇၸိူဝ်ႉၼင်ႇႁိုဝ်။
၁၂ တီႈၵေႃႉဢၼ်မီးသူဝ်းပၢၵ်ႇၼိုင်ႈၼၼ်ႉပေႃးသူဝ်းတူဝ်ၼိုင်ႈၽိတ်းတၢင်းလႄႈႁၢႆၵႂႃႇၸိုင်ၸွင်ႇမၼ်းတၵ်းဢမ်ႇဢဝ်သူဝ်းၵဝ်ႈသိပ်းပၢႆၵဝ်ႈတူဝ်ၼၼ်ႉဝႆႉၵႃႈၼိူဝ်လွႆယဝ်ႉၸင်ႇၵႂႃႇႁႃသူဝ်းတူဝ်ဢၼ်ၽိတ်းတၢင်းလႄႈႁၢႆလၢႆၵႂႃႇၼၼ်ႉႁိုဝ်။
၁၃ ၵဝ်ဝႃႈတီႈၸိုဝ်ႈတီႈၸႂ်ႈၸမ်းပေႃးၶိုၼ်းထူပ်းႁၼ်ယဝ်ႉၸိုင်မၼ်းယဵင်ႈၶႅၼ်းတၵ်းသိူဝ်းၸူမ်းၼႃႇသသေူဝ်းဢၼ်ဢမ်ႇၽိတ်းတၢင်းဢမ်ႇႁၢႆၵႂႃႇၵဝ်ႈသိပ်းပၢႆၵဝ်ႈတူဝ်ၼၼ်ႉဢေႃႈ။
၁၄ မိူၼ်ၼင်ႇၼၼ်ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉဢမ်ႇမီးဢလူဝ်ႇၶႂ်ႈႁႂ်ႈလုၵ်ႈဢွၼ်ႇၸိူဝ်းၼႆႉႁၢႆလၢႆသေၵေႃႉသေၵူၼ်း။
ပီႈၼွင်ႉဢၼ်ၽိတ်းပိူင်ႈမႂ်း
၁၅ ပေႃးပီႈၼွင်ႉမႂ်းၽိတ်းပိူင်ႈမႂ်းၸိုင်ၵႂႃႇလႄႈၽုၺ်ႇဢွၵ်ႇၼႄပျႃးဢပျႅတ်ႈမၼ်းဝူင်ႈၵၢင်မႂ်းတင်းမၼ်းတႃႉ။
၁၆ ပေႃးမၼ်းထွမ်ႇမႂ်းၸိုင်မႂ်းၶိုၼ်းလႆႈပီႈၼွင်ႉမႂ်းယဝ်ႉ။ပေႃးမၼ်းဢမ်ႇထွမ်ႇၸိုင်ႁွင်ႉဢဝ်ၵူၼ်းသွင်ၵေႃႉသၢမ်ၵေႃႉလႄႈၵႂႃႇလူၺ်ႈၵၼ်တင်းမႂ်းသေယဝ်ႉႁႂ်ႈၵႂၢမ်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉတႄႇပဵၼ်တီႈသူပ်းၵူၼ်းသွင်ၵေႃႉသၢမ်ၵေႃႉၼၼ်ႉထႅင်ႈလူးၵွၼ်ႇတႃႉ။
၁၇ ပေႃးမၼ်းဢမ်ႇထွမ်ႇၵႂၢမ်းၶဝ်ၸိုင်လၢတ်ႈတီႈၸိူဝ်းၸဝ်ႈတႃႉ။ပေႃးမၼ်းဢမ်ႇထွမ်ႇဢဝ်ၸိူဝ်းၸဝ်ႈၸိုင်မၢတ်ႈမၼ်းပဵၼ်ၸိူဝ်ႉၼင်ႇၵူၼ်းသႃႇသၼႃႇပႃႉဢမ်ႇၼၼ်ၵူၼ်းၵဵပ်းၶွၼ်ႇၼၼ်ႉတႃႉ။
၁၈ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵႃႈဢၼ်သူမတ်ႉၽုၵ်ႇဝႆႉၵႃႈၼိူဝ်လိၼ်မိူင်းၼႆႉၼၼ်ႉတၵ်းလႆႈၶၢမ်ႇတၢင်းဢၼ်မတ်ႉၽုၵ်ႇဝႆႉၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။ၵႃႈဢၼ်သူပွႆႇလွတ်ႈၵႃႈၼိူဝ်လိၼ်မိူင်းၼႆႉၼၼ်ႉတၵ်းလႆႈၶၢမ်ႇတၢင်းဢၼ်ပွႆႇလွတ်ႈၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။
၁၉ လၢႆးသမ်ႉၵဝ်ဝႃႈတီႈသူထႅင်ႈၵမ်းၼိုင်ႈၸမ်းပေႃးသူသွင်ၵေႃႉၸႂ်သၽေႃးမိူၼ်ၵၼ်ၵႃႈၼိူဝ်လိၼ်မိူင်းၼႂ်းလွင်ႈတၢင်းဢၼ်သူသူးတွင်းယွၼ်းသေၸိူဝ်ႉသေပိူင်ၼၼ်ႉၸိုင်ပေႃႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉတၵ်းပၼ်တီႈသူဢေႃႈ။
၂၀ လွင်ႈမၼ်းၸမ်းတီႈလႂ်တၼ်းလႂ်သေဢမ်ႇဝႃႈပေႃးၵူၼ်းသွင်ၵေႃႉသၢမ်ၵေႃႉၸူႉၵၼ်တုမ်ၵၼ်ၼႂ်းၼႃႇမႃႉၸိုဝ်သဵင်ၵဝ်ၸိုင်ၵဝ်ၵေႃႈတၵ်းမီးယူႇၵႃႈၼႂ်းၵႄႈၵၢင်ၶဝ်ၵႃႈတီႈၼၼ်ႉဢေႃႈ၊ဝႃႈၼင်ႇၼႆဢေႃႈ။
ဢူႉပမႃႇၶႃႈၵေႃႉဢၼ်ဢမ်ႇမီးၸႂ်ဢိတ်းလူ
၂၁ မိူဝ်ႈၼၼ်ႉပေႇတရုသုတ်ႉၸပ်းသုတ်ႉၸူးသေလႄႈလဝ်လၢတ်ႈလႄႈဝႃႈ၊-ၸဝ်ႈႁဝ်း၊ပေႃးပီႈၼွင်ႉၵဝ်ၶႃႈၽိတ်းပိူင်ႈၵဝ်ၶႃႈၸိုင်ၵဝ်ၶႃႈတၵ်းလႆႈပွႆႇလွတ်ႈဢပျႅတ်ႈမၼ်းလၢႆပွၵ်ႈၶႃႈ။
၂၂ ႁႂ်ႈထိုင်ၸဵတ်းပွၵ်ႈၶႃႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵဝ်ဢမ်ႇဝႃႈႁႂ်ႈထိုင်ၸဵတ်းပွၵ်ႈ။ ၵဝ်ဝႃႈႁႂ်ႈထိုင်ၸဵတ်းသိပ်းပုၼ်ႊၸဵတ်းပွၵ်ႈဢေႃႈ။
၂၃ ပိူဝ်ႈၼႆလႄႈမိူင်းၵၢင်ႁၢဝ်ၸဝ်ႈမိူၼ်ၸိူဝ်ႉၼင်ႇၶုၼ်လူင်ပႃးၼိုင်ႈဢၼ်မီးဢလူဝ်ႇၶႂ်ႈဢဝ်ၸရၢင်းငိုၼ်းၶႃႈၵူၼ်းမၼ်းတင်းလၢႆၼၼ်ႉဢေႃႈ။
၂၄ ၼႂ်းမိူဝ်ႈဢၼ်ယင်းတိုၵ်ႉၸႃႉဢဝ်ၸရၢင်းယူႇၼၼ်ႉၸိုင်ၶဝ်ဢဝ်ၵူၼ်းၵေႃႉၼိုင်ႈဢၼ်ထုၵ်ႇၼီႈတလၢၼ်ႇတၢၼ်ႇမိုၼ်ႇၼိုင်ႈၼၼ်ႉမႃးတီႈၸဝ်ႈမၼ်းဢေႃႈ။
၂၅ ၵွပ်ႈပိူဝ်ႈၵေႃႉၼၼ်ႉဢမ်ႇမီးငိုၼ်းတၵ်းတႅၼ်းၼီႈၼၼ်ႉလႄႈၸဝ်ႈမၼ်းၸီႇယၢင်ႇႁႂ်ႈဢဝ်မၼ်းလုၵ်ႈလၢင်းမၼ်းမေးမၼ်းတင်းဢုၵ်ႉၸႃႇၶူဝ်းလဵင်းမၼ်းၵႃႈမီးတင်းသဵင်ႈတင်းလူင်ၶၢႆပႅတ်ႈသေလႄႈတႅၼ်းၼီႈဢေႃႈ။
၂၆ ၶႃႈၼၼ်ႉၵေႃႈၶုပ်ႉမူပ်ႇၵူမ်ႈၵွမ်းသေယဝ်ႉတွင်းပၢၼ်ႇဝႃႈ၊-ယိူၼ်ႉၶၢမ်ႇၵဝ်ၶႃႈသေၵမ်းၶႃႈ။ၼီႈၵႃႈမီးၸိူဝ်းၼၼ်ႉၵဝ်ႈၶႃႈတၵ်းတႅၼ်းၶိုၼ်းယူႇၶႃႈဢေႃႈ၊ဝႃႈၼင်ႇၼႆဢေႃႈ။
၂၇ ၸဝ်ႈမၼ်းၵေႃႈမီးၸႂ်ဢၼ်ဢိတ်းလူသေယဝ်ႉပၼ်ၵတ်းယဵၼ်ၶျၢမ်းသႃႇတီႈမၼ်းလႄႈပွႆႇလွတ်ႈၼီႈမၼ်းၵႃႈမီးတင်းသဵင်ႈတင်းလူင်ၼၼ်ႉဢေႃႈ။
၂၈ ၶႃႈၵေႃႉၼၼ်ႉသမ်ႉဢွၵ်ႇၵႂႃႇလႄႈထူပ်းႁၼ်ၶႃႈၵေႃႉၼိုင်ႈဢၼ်ထုၵ်ႇၼီႈမၼ်းတေႇၼႃႇရီႇပၢၵ်ႇၼိုင်ႈၼၼ်ႉဢေႃႈ။မၼ်းယိပ်းငႅၼ်းၶေႃးၶႃႈၵေႃႉၼၼ်ႉသေယဝ်ႉလၢတ်ႈဝႃႈ၊-တႅၼ်းပၼ်ၼီႈဢၼ်မႂ်းထုၵ်ႇတီႈၵဝ်ၼၼ်ႉတႃႉ၊ဝႃႈၼႆဢေႃႈ။
၂၉ ၵေႃႉၼၼ်ႉၵေႃႈၶုပ်ႉမူပ်ႇသေလႄႈတွင်ႈပၢၼ်ႇဝႃႈ၊-ယိူၼ်ႉၶၢမ်ႇၵဝ်ၶႃႈသေၵမ်းၶႃႈ။ၼီႈၵႃႈမီးၸိူဝ်းၼၼ်ႉၵဝ်ၶႃႈတၵ်းၶိုၼ်းတႅၼ်းပၼ်ယူႇၶႃႈဢေႃႈ၊ဝႃႈၼင်ႇၼႆဢေႃႈ။
၃၀ ပဵၵ်ႉသမ်ႉဝႃႈၼင်ႇၼႆၵေႃႈယႃႇမၼ်းယင်းဢမ်ႇထွမ်ႇလႄႈဢဝ်ၶႃႈၵေႃႉၼၼ်ႉၵႂႃႇၶင်ဝႆႉၵႃႈၼႂ်းထွင်ႇတေႃႇထိုင်ႁွတ်ႈမၼ်းၶိုၼ်းတႅၼ်းပၼ်ၼီႈယဝ်ႉမူတ်းဢေႃႈ။
၃၁ မိူဝ်ႈဢၼ်ၶႃႈၼင်ႇၵၼ်တင်းလၢႆႁၼ်လွင်ႈတၢင်းၼၼ်ႉၸိုင်ၶဝ်ၸဵပ်းၸႂ်ၼႃႇလူင်လၢင်လႄႈၵႂႃႇလဝ်လၢတ်ႈလွင်ႈၼၼ်ႉတီႈၸဝ်ႈၶဝ်ဢေႃႈ။
၃၂ မိူဝ်ႈၼၼ်ႉၸဝ်ႈၶဝ်ႁွင်ႉမၼ်းမႃးလႄႈဝႃႈ၊-ၶႃႈဢၼ်ႁၢႆႉမိူၵ်ႈၼႆႉဢိူၺ်း၊ပိူဝ်ႈဢၼ်မႂ်းတွင်ႈပၢၼ်ႇၵဝ်လႄႈၵဝ်ပွႆႇလွတ်ႈၼီႈမႂ်းတင်းသဵင်ႈတင်းမူတ်းယဝ်ႉ။
၃၃ ၸိူဝ်ႉၼင်ႇဢၼ်ၵဝ်ဢိတ်းလူမႂ်းၼၼ်ႉမႂ်းၵေႃႈဢမ်ႇထုၵ်ႇလီဢိတ်းလူၵေႃႉဢၼ်ပဵၼ်ၶႃႈၼင်ႇၵၼ်ၼၼ်ႉႁိုဝ်၊ဝႃႈၼင်ႇၼႆသေယဝ်ႉ၊ၸႂ်မႆႈၶႂ်ႈၸႃႉၼႃႇလႄႈ
၃၄ ဢဝ်မၼ်းဢၢပ်ႈပၼ်ၼႂ်းမိုဝ်းထွင်ႇမူးတင်းလၢႆတေႃႇထိုင်ႁွတ်ႈမၼ်းၶိုၼ်းလႆႈတႅၼ်းပၼ်ၼီႈတင်းသဵင်ႈတင်းမူတ်းၼၼ်ႉဢေႃႈ။
၃၅ မိူၼ်ၼင်ႇၼၼ်ပေႃးသူဢမ်ႇဢဝ်တင်းႁူဝ်ၸႂ်သေလႄႈပွႆႇလွတ်ႈဢပျႅတ်ႈပီႈၼွင်ႉၵၼ်ၸိုင်ပေႃႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉၵေႃႈတၵ်းၸီႇယၢင်ႇသူၸိူဝ်ႉၼင်ႇၼၼ်ယူႇဢေႃႈ၊ဝႃႈၼင်ႇၼႆဢေႃႈ။